ଆମେଠି: ପୁଣି ବିଜେପି ଶାସିତ ଉତ୍ତରପ୍ରଦେଶରେ ଅରାଜକତା। ଆମେଠିରେ ଜଣେ ସରକାରୀ ସ୍କୁଲ ଶିକ୍ଷକ, ତାଙ୍କ ପତ୍ନୀ ଓ ୨ ସନ୍ତାନଙ୍କୁ ଗୁଳି କରି ହତ୍ଯା କରିଛନ୍ତି ଦୁର୍ବୃତ୍ତ। ଘର ଭିତରେ ପ୍ରବେଶ କରି ଦୁର୍ବୃତ୍ତମାନେ ଏହି ଜଘନ୍ଯ କାଣ୍ଡ ଘଟାଇଛନ୍ତି। ଅପରାଧ ଘଟାଇବା ପରେ ସେମାନେ ଘଟଣାସ୍ଥଳରୁ ଫେରାର ହୋଇଯାଇଛନ୍ତି।
ମୃତକ ହେଉଛନ୍ତି ସୁନିଲ କୁମାର, ପତ୍ନୀ ପୁନମ ଏବଂ ୫ ବର୍ଷ ଓ ୨ ବର୍ଷର ଦୁଇ ଝିଅ। ଅହୋରା ଭବାନୀ କ୍ରସିଂ ନିକଟରେ ସେମାନେ ଭଡା ଘରେ ଥିବାବେଳେ ଏହି ଘଟଣା ଘଚିଛି। ଏସପି ଅନୂପ କୁମାର ସିଂ କହିଛନ୍ତି- ଲୁଟିବା ଲାଗି ଏହି ଅମାନବୀୟ ଘଟଣା ଘଟିନାହିଁ। ବରଂ ହତ୍ଯା ପଛରେ ଅନ୍ଯ କିଛି କାରଣ ରହିଛି। ପରିବାର ସହ ଅନ୍ଯ କୌଣସି ବ୍ଯକ୍ତିଙ୍କ ବିବାଦ ଥିବା ଅନୁମାନ କରାଯାଇଛି।
ଗତ ଅଗଷ୍ଟ ୧୮ ତାରିଖରେ ଚନ୍ଦନ ବର୍ମା ନାମକ ଜଣେ ବ୍ଯକ୍ତିଙ୍କ ବିରୋଧରେ ପୁନମ ଅଭିଯୋଗ ଆଣି ଏସସି-ଏସଟି ଆଇନ ଆଧାରରେ ଏଫଆଇଆର ଦାୟର କରିଥିଲେ। ସେହି କାରଣକୁ ନେଇ ଏହି ହତ୍ଯାକାଣ୍ଡ ଘଟିଥିବା ପୋଲିସ ଆଶଙ୍କା କରୁଛି। ସୁନିଲ ଜଣେ ସରକାର ସ୍କୁଲ ଶିକ୍ଷକ ଥିଲେ ଏବଂ ପନହୋନା କମ୍ପୋଜିଟ ସ୍କୁଲରେ କାର୍ଯ୍ୟରତ ଥିଲେ। ପୂର୍ବରୁ ସେ ୟୁପି ପୋଲିସରେ ବି ନିଯୁକ୍ତି ପାଇଥିଲେ।
