କଟକ: ଜଗତପୁର ଶିଳ୍ପାଞ୍ଚଳ ଦେଇ ଯାଇଥିବା ମହାନଦୀରେ ଭାସିଯାଇ ଦୁଇ ଅଷ୍ଟମ ଶ୍ରେଣୀ ଛାତ୍ର ନିଖୋଜ । ମହାନଦୀକୁ ଗାଧୋଇବାକୁ ଯାଇଥିବା ବେଳେ ଛାତ୍ରଦ୍ବାୟ ବୁଡ଼ି ଯାଇଛନ୍ତି ।
ଖବର ପାଇ ଘଟଣାସ୍ଥଳରେ ଅଗ୍ନିଶମ ବାହିନୀ ପହଞ୍ଚି ଦୁଇ ଛାତ୍ରଙ୍କୁ ଉଦ୍ଧାର କରିବାକୁ ଖୋଜାଖୋଜି ଆରମ୍ଭ କରିଛି । ରିପୋର୍ଟ ଲେଖାଯିବା ପର୍ଯ୍ୟନ୍ତ ଛାତ୍ର ଦ୍ବୟଙ୍କ କୌଣସି ସନ୍ଧାନ ମିଳିନାହିଁ ।
ପୁରୀ: କେନ୍ଦ୍ରାଞ୍ଚଳ ଡିଆଇଜି ଭାବେ ଦାୟିତ୍ୱ ନେବା ପରେ ଶ୍ରୀମନ୍ଦିର ଯାଇ ମହାପ୍ରଭୁଙ୍କୁ ଦର୍ଶନ କରିଛନ୍ତି ଚରଣ ସିଂ ମୀନା । ଦାୟିତ୍ୱକୁ ସଠିକ୍ ଭାବେ ପାଳନ କରିବା ସହ ଲୋକଙ୍କୁ ସଠିକ୍ ସେବା ଯୋଗାଇବା ନେଇ ସେ ମହାପ୍ରଭୁଙ୍କ ପାଖରେ ପ୍ରାର୍ଥନା କରିଛନ୍ତି ।
ଥାନାକୁ ଆସୁଥିବା ଲୋକଙ୍କୁ ପୋଲିସ କିଭଳି ଉତ୍ତମ ବ୍ୟବହାର ପ୍ରଦର୍ଶନ କରିବା, ଶୀଘ୍ର ନ୍ୟାୟ ପ୍ରଦାନ କରାଯିବ ସେ ନେଇ ଉଦ୍ୟମ କରାଯିବ କହିଛନ୍ତି କେନ୍ଦ୍ରାଞ୍ଚଳ ଡିଆଇଜି । ମହିଳା ଓ ଶିଶୁ ନିର୍ଯାତନା ଉପରେ ରୋକ୍ ଲଗାଇବା ସହ ଶ୍ରୀମନ୍ଦିର ସୁରକ୍ଷା ଓ ଭକ୍ତଙ୍କ ସୁରକ୍ଷାକୁ ପ୍ରାଥମିକତା ଦିଆଯି । ବୋଲି ସେ କହିଛନ୍ତି ।
ଖୁବଶୀଘ୍ର ଶ୍ରୀମନ୍ଦିରରେ ସ୍ୱତନ୍ତ୍ର ବାଟାଲିୟନ ନିଯୁକ୍ତି କରାଯିବା ସହ ଆସନ୍ତା ରଥଯାତ୍ରା ଦାୟିତ୍ୱ ମଧ୍ୟ କେନ୍ଦ୍ରାଞ୍ଚଳ ଡିଆଇଜିଙ୍କ ଉପରେ ନ୍ୟସ୍ତ ଥିବାରୁ ଏହାକୁ ସୂଚାରୁ ରୂପେ ସମ୍ପାଦନ କରିବେ ବୋଲି ଆଶା ରଖିଛନ୍ତି ।
ଭୁବନେଶ୍ବର: ଲୋୟର ପିଏମଜିରେ ଅଲ ଓଡିଶା ରାଇସ ମିଲର୍ସ ସଂଘର ଧାରଣା ଓ ବିକ୍ଷୋଭ । ଯୋଗାଣ ବିଭାଗ ଓ ଯୋଗାଣ ନିଗମର ମିଲର ମାରଣ ନୀତି ପ୍ରତିବାଦରେ ସଂଘ ଧାରଣା ଦେଇଛି । ମିଲିଂ ଚାର୍ଜ, ପରିବହନ ଖର୍ଚ୍ଚ ଓ ଅଖା ବାବଦ ଖର୍ଚ୍ଚ ବୃଦ୍ଧି ଆଦି ୮ ଦଫା ଦାବି ପୂରଣ ପାଇଁ ସଂଘ ଦାବି କରିଛି । ଦାବି ପୂରଣ ନହେଲେ କୌଣସି ମିଲର ଆଗାମୀ ବର୍ଷ କଷ୍ଟମ ମିଲିଂରେ ଭାଗ ନେବେ ନାହିଁ ବୋଲି ସରକାରଙ୍କୁ ଚେତାବନୀ ଦେଇଛି ମିଲର ସଂଘ ।
ଖରିଫ ଋତୁରେ ମଧ୍ଯ କୌଣସି ମିଲର କଷ୍ଟମ ମିଲିଂରେ ଭାଗ ନେବେ ନାହିଁ । ଏହାଛଡା ମିଲରମାନଙ୍କ ଉପରେ ଅଯଥା ରେଡକୁ ବନ୍ଦ କରିବାକୁ ସଙ୍ଘ ଦାବି କରିଛି । ଦାବି ସମ୍ପର୍କରେ ସରକାରଙ୍କୁ ବାରମ୍ବାର ଜଣାଇବା ପରେ ବି କୌଣସି ପଦକ୍ଷେପ ନିଆଯାଇ ନଥିବାରୁ ସଂଘ ଆନ୍ଦୋଲନକୁ ଓହ୍ଲାଇଥିବା କହିଛି ।
କେନ୍ଦୁଝର: ଭାଉଜକୁ ଡାହାଣୀ ଭାବୁଥିଲା ଦିଅର । ଆଉ ଏହି ସନ୍ଦେହ ଜଣଙ୍କୁ ବନାଇ ଦେଲା ହତ୍ୟାକାରୀ । ଏମିତି ଘଟଣା ଘଟିଛି କେନ୍ଦୁଝର ଜିଲ୍ଲା ଘଷିପୁରା ଥାନା ଖାଲପାଳ ପଞ୍ଚାୟତ ପାତନା ଗାଁରେ । ଦିଅରର ଟାଙ୍ଗିଆ ଚୋଟରେ ଯାଇଛି ଭାଉଜର ଜୀବନ । ଭାଉଜକୁ ହତ୍ୟା କରିବା ପରେ ଟାଙ୍ଗିଆ ସହ ଥାନାକୁ ଯାଇ ଆତ୍ମସମର୍ପଣ କରିଛି ଅଭିଯୁକ୍ତ ଦିଅର ଗଙ୍ଗା ମୁର୍ମୁ । ମୃତ ମହିଳା ହେଲେ ସିଦ୍ଧ ମୁର୍ମୁଙ୍କ ପତ୍ନୀ ସୀତା ।
ଅଭିଯୋଗ ଅନୁସାରେ, କିଛିଦିନ ହେବ ଗଙ୍ଗାର ପତ୍ନୀ ମୃତ୍ୟୁବରଣ କରିଛନ୍ତି । ଆଉ ତାଙ୍କ ପିଲାଙ୍କ ଦେହ ମଧ୍ୟ ଭଲ ରହୁନାହିଁ । ଭାଉଜ ଗୁଣି ଗାରେଡି କରୁଥିବା ଓ ଡାହାଣୀ ହୋଇଥିବାରୁ ଏଭଳି ଘଟୁଥିବା ଗଙ୍ଗା ସନ୍ଦେହ କରୁଥିଲେ । ଆଜି ଘରେ କେହି ନଥିବା ବେଳେ ସୀତାକୁ ଟାଙ୍ଗିଆରେ ହାଣି ହତ୍ୟା କରିଥିଲା ଗଙ୍ଗା । ହତ୍ୟା ପରେ ଦୈତାରୀ ଥାନାରେ ଆତ୍ମସମର୍ପଣ କରିଥିଲା ଅଭିଯୁକ୍ତ । ଦୈତାରୀ ଥାନାରୁ ଖବର ପାଇ ଘଷିପୁରା ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ଜବଦ କରିବା ସହ ତଦନ୍ତ ଆରମ୍ଭ କରିଛି । ଏହାସହ ଦୈତାରୀ ଥାନା ପୋଲିସ ଅଭିଯୁକ୍ତ ଗଙ୍ଗାକୁ ଘଷିପୁରା ଥାନାକୁ ହସ୍ତାନ୍ତର କରିଛି ।
ଭୁବନେଶ୍ବର: ଆନ୍ଦୋଳନକୁ ଓହ୍ଲାଇବ ଘରୋଇ ବସ ମାଲିକ ସଂଘ । ବ୍ଲକ ମୁଖ୍ୟାଳୟରୁ ଜିଲ୍ଲା ମୁଖ୍ୟାଳୟ ପର୍ଯ୍ୟନ୍ତ ଲକ୍ଷ୍ମୀ ବସ ଚଳାଚଳ ନେଇ ରାଜ୍ୟ ସରକାରଙ୍କ ନିଷ୍ପତ୍ତିକୁ ବିରୋଧ କରି ଦିଆଯାଇଛି ଏହି ବସ୍ ଧର୍ମଘଟ ଡାକରା । ପୂର୍ବରୁ ଲକ୍ଷ୍ମୀ ବସ୍ ଚଳାଚଳକୁ ବିରୋଧ କରି ଆସୁଛି ଘରୋଇ ବସ ମାଲିକ ସଂଘ ।
ସଙ୍ଘ ପକ୍ଷରୁ ଅଭିଯୋଗ କରାଯାଇଛି, ଏହି ବସ ଚାଲିବା ଦ୍ଵାରା ଘରୋଇ ବସ ମାଲିକଙ୍କୁ କ୍ଷତି ସହିବାକୁ ପଡ଼ିବ । ଫଳରେ ଟିୟର ଟୁ ବ୍ୟବସ୍ଥାକୁ ବିରୋଧ କରି ଆସନ୍ତା ୭ ତାରିଖ ସନ୍ଧ୍ୟା ୬ଟାରୁ ୮ ତାରିଖ ସନ୍ଧ୍ୟା ୬ଟା ପର୍ଯ୍ୟନ୍ତ ବନ୍ଦ ଡାକରା ଦେଇଛି ଦକ୍ଷିଣାଞ୍ଚଳ ଓ ପଶ୍ଚିମାଞ୍ଚଳ ଘରୋଇ ବସ୍ ମାଲିକ ସଂଘ । ଦାବି ପୂରଣ ନହେଲେ ପୁଣି ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ବନ୍ଦ ଡାକରା ଦିଆଯାଇଥିବା ନେଇ ନିଷ୍ପତ୍ତି ହୋଇଥିବା ସୂଚନା ଦେଇଛି ଘରୋଇ ବସ ମାଲିକ ସଂଘ ।
କୋଲକାତା: ଗଙ୍ଗା ନଦୀ କୂଳରେ ଥିଲା ଦୁଇ ମହଲା କୋଠା । କେବଳ ଏହି ଘର ନୁହେଁ କନେକ ଘର ଗଙ୍ଗା କୂଳରେ ରହିଛି । ହେଲେ ଲୋକେ ଅନାଇଛନ୍ତି, ସମସ୍ତଙ୍କ ଆଖି ଆଗରେ ହଠାତ୍ ତାସ ଘର ପରି ଭୁଶୁଡ଼ି ପଡ଼ିଲା କୋଠା । ଆଉ ଚାହୁଁ ଚାହୁଁ ଗଙ୍ଗାରେ ଦୁଇ ମହଲା କୋଠାଟି ସମାଧି ନେଇଗଲା । ଏମିତି ଘଟଣା ଘଟିଛି ପଶ୍ଚିମବଙ୍ଗର ମୁର୍ଶିଦାବାଦ ଜିଲ୍ଲା ଶିକଦାରପୁର ଗାଁରେ ।
ପ୍ରବଳ ବର୍ଷା ଫଳରେ ଗଙ୍ଗା ନଦୀରେ ବନ୍ଯା ଆସିଛି । ଫଳରେ ନଦୀ କୂଳିଆ ଅଞ୍ଚଳରେ ଆତଙ୍କ ଖେଳିଯାଇଛି । ଅନେକ ଘର ଗଙ୍ଗା ନଦୀ ଗର୍ଭରେ ଲୀନ ହୋଇଯାଇଛି । ଶିକଦାରପୁର ଗାଁରେ ନଦୀ କୂଳରେ ଥିବା ଏହି ଦୁଇ ମହଲା ଘରଟି ଭୁଶୁଡ଼ି ପଡ଼ି ଭାସିଯାଇଛି । ଏ ବିପର୍ଯ୍ଯୟ ସମୟର ଦୃଶ୍ଯ ମୋବାଇଲରେ କଏଦ ହୋଇଛି । କେବଳ ଏଇ ଗୋଟିଏ ଘର ନୁହେଁ ବରଂ ଏହିପରି ଅନେକ ଘର ଓ ସମ୍ପତ୍ତି ନଦୀରେ ଭାସିଯାଇଛି ।
ବଲାଙ୍ଗୀର: ଭିଜିଲାନ୍ସ ଜାଲରେ ପଡ଼ିଲେ ଆଉ ଜଣେ ଲାଞ୍ଚୁଆ ଯନ୍ତ୍ରୀ । ଏମଜିଏନଆରଜିଏରେ ହୋଇଥିବା କାମର ବିଲ୍ ପାଇଁ ୭ ହଜାର ଟଙ୍କା ଲାଞ୍ଚ ନେଉଥିଲେ କନିଷ୍ଠ ଯନ୍ତ୍ରୀ । ଲାଞ୍ଚ ଟଙ୍କା ଉଦ୍ଧାର ସହ କନିଷ୍ଠ ଯନ୍ତ୍ରୀ ହରେକୃଷ୍ଣ ସାହୁଙ୍କୁ ଗିରଫ କରିଛି ଭିଜିଲାନ୍ସ ।
ବଲାଙ୍ଗୀର ଜିଲ୍ଲା ବେଲପଡା ବ୍ଳକରେ ଏମଜିଏନଆରଜିଏରେ ହୋଇଥିବା କାମର ବିଲ୍ ପାଇଁ ହିତାଧିକାରୀମାନେ ବାରମ୍ବାର ଅନୁରୋଧ କରୁଥିଲେ । ବିଲ ପାଇଁ କନିଷ୍ଠ ଯନ୍ତ୍ରୀ ୧୫ ହଜାର ଟଙ୍କା ଦାବି କରିଥିଲେ । ଲାଞ୍ଚ ନଦେଲେ ବିଲ କରିବି ନାହିଁ ବୋଲି ଧମକ ଦେଇଥିଲେ I ଏନେଇ ଭିଜିଲାନ୍ସର ଦ୍ୱାରସ୍ଥ ହୋଇଥିଲେ ଅଭିଯୋଗକାରୀ ।
ବେଲପଡା ବ୍ଳକ ଅନ୍ତର୍ଗତ କନ୍ଧେନଝୁଲା ଗାଁର ମୀନକେତନ ଚହଁର ମନରେଗା ଯୋଜନାରେ ଏକ କୂଅ ଖୋଲିଥିଲେ I ଏହାର ଟଙ୍କା ପାଇବା ପାଇଁ ବାରମ୍ବାର ବ୍ଳକକୁ ଆସୁଥିଲେ ମଧ୍ୟ ବିଲ୍ ହୋଇପାରୁ ନଥିଲା I ବେଲପଡ଼ା ବ୍ଲକ କନିଷ୍ଠ ଯନ୍ତ୍ରୀ ହରେକୃଷ୍ଣ ସାହୁ ବିଲ୍ କରିବା ପାଇଁ ତାଙ୍କୁ ଲାଞ୍ଚ ମାଗିଥିଲେ I ମୀନକେତନ ବହୁ ନେହୁରା ହେବା ପରେ ମଧ୍ଯ ବିଲ କରୁ ନଥିଲେ I ଭିଜିଲାନ୍ସର ଟୋଲ ଫ୍ରୀ ନମ୍ବରକୁ କଲ କରି ଅଭିଯୋଗ କରିଥିଲେ ମୀନକେତନ I
ଭିଜିଲାନ୍ସର ଯୋଜନା ମୁତାବକ ହରେକୃଷ୍ଣ ଲାଞ୍ଚ ଟଙ୍କା ନେବା ବେଳେ ସମ୍ବଲପୁର, ବରଗଡ଼ ଓ ସୋନପୁର ଭିଜିଲାନ୍ସ ଟିମ ହରେକୃଷ୍ଣକୁ ଟ୍ରାପ କରିଥିଲା I ହରେକୃଷ୍ଣକୁ ଟ୍ରାପ ହେବା ପରେ ବରଗଡ ଭିଜିଲାନ୍ସ କାର୍ଯ୍ୟାଳୟରେ ପଚରା ଉଚରା ଚଳାଇଛି ଭିଜିଲାନ୍ସ I ଏନେଇ ହରେକୃଷ୍ଣଙ୍କ ପୈତୃକ ଘର, ନିଜ ବାସଭବନ ଓ ଅଫିସ କାର୍ଯ୍ୟାଳୟରେ ଭିଜିଲାନ୍ସ ଚଢାଉ କରି ଛାନଭିନ୍ ଚଳାଇଛି I
ଭୁବନେଶ୍ବର: ଗାଡି ହର୍ଣ୍ଣ ମାରିବାକୁ ନେଇ ଯୁବକଙ୍କ ସହ ପୋଲିସ କର୍ମୀଙ୍କୁ ଛୁରାମାଡ଼ । ଭୁବନେଶ୍ଵର ମଞ୍ଚେଶ୍ୱର ଥାନା ଅନ୍ତର୍ଗତ ଚକେଇସିଆଣି ସ୍ଥିତ ଶ୍ରୀରାମନଗରରେ ଘଟିଛି ଘଟଣା । ଅଭିଯୁକ୍ତ ନା କେବଳ ଯୁବକଙ୍କୁ ଛୁରା ମାରିଥିଲା, ଏମିତିକି ପୋଲିସକୁ ମଧ୍ୟ ଛୁରା ମାରିଥିଲେ ।
ଅଭିଯୋଗ ଅନୁସାରେ, ଗତକାଲି ରାତି ପ୍ରାୟ ଗୋଟାଏ ବେଳେ ଶ୍ରୀରାମନଗରରେ ୪ ଯୁବକ ବସିଥିବା ବେଳେ ହଠାତ ଏକ ବାଇକରେ ଆସି ଦୁଇ ଯୁବକ ହର୍ଣ୍ଣ ମାରିଥିଲେ । ଏଥିରେ ଉତକ୍ଷିପ୍ତ ହୋଇ ଦୁଇ ପକ୍ଷ ଭିତରେ ପାଟିତୁଣ୍ଡ ହୋଇଥିଲା । ଯାହାକୁ ନେଇ ଯୁବକ ଜଣଙ୍କ ଛୁରାମାଡ଼ କରିଥିଲେ । ଏପରିକି ପୋଲିସ ଖବର ପାଇ ସେମାନଙ୍କୁ କାବୁ କରିବାକୁ ଉଦ୍ୟମ ବେଳେ ପୋଲିସ କନଷ୍ଟେବଳ ଛୁରା ମାଡ଼ରେ ଆହତ ହୋଇଛନ୍ତି ।
ସେପଟେ ଯୁବକ ଜଣଙ୍କ ପାରିବାରିକ କଳହକୁ ନେଇ ନିଶାଶକ୍ତ ଅବସ୍ଥାରେ ଏଭଳି କରିଥିବା କହିଛନ୍ତି ମଞ୍ଚେଶ୍ୱର ଥାନା ଅଧିକାରୀ । ଘଟଣାରେ ୩ ଜଣ ଯୁବକ ଓ ଜଣେ କନଷ୍ଟେବଳ ଆହତ ହୋଇଥିବା କହିଛନ୍ତି ଭୁବନେଶ୍ବର ଡିସିପି । ସମସ୍ତେ ବର୍ତ୍ତମାନ ସୁସ୍ଥ ଅଛନ୍ତି ।
ଅଭିଯୁକ୍ତ ଦୀପକ ନାୟକଙ୍କୁ କାବୁ କରାଯାଇଛି । ଅଧିକ ଖୋଲତାଡ଼ ଜାରି ରହିଛି । ପୋଲିସ ନିଜେ ଏହି ଘଟଣାରେ ଏତଲା କରିଛି । ସେପଟେ ଦଶହରା ବେଳେ କିଭଳି ସହର ଅପରାଧ ମୁକ୍ତ ରହିବ ସେ ନେଇ ଭୁବନେଶ୍ୱର ପୋଲିସ ତତ୍ପର ରହିଛି । ପେଶାଦାର ଅପରାଧୀଙ୍କୁ କାବୁ କରାଯାଇଛି । ଯିଏ ବି ଆଇନକୁ ହାତକୁ ନେବ ତାକୁ ପୋଲିସ ଜେଲ ପଠାଇବ ବୋଲି ଚେତାବନୀ ଦେଇଛନ୍ତି ଭୁବନେଶ୍ୱର ଡିସିପି ।
ସମ୍ବଲପୁର: ଘରୋଇ ବିବାଦର ସମାଧାନ କରିବାକୁ ଯାଇ ହଣା ଖାଇଲେ କନଷ୍ଟେବଳ । କନେଷ୍ଟବଳଙ୍କ ପାପୁଲି ହାଣି ଦେଲା ଅଭିଯୁକ୍ତ । ସମ୍ବଲପୁର ଜିଲ୍ଲା ବୁର୍ଲା ଥାନା ଝରାପାଲି ଗାଁରେ ଘଟିଛି ବର୍ବରକାଣ୍ଡ । ଗୁରୁତର କନଷ୍ଟେବଳ ହେଲେ ସରୋଜ ଭୋଇ । ତାଙ୍କୁ ଗୁରୁତର ଅବସ୍ଥାରେ ପ୍ରଥମେ ବୁର୍ଲା ଓ ପରେ କଟକ ବଡ଼ ଡାକ୍ତରଖାନାକୁ ସ୍ଥାନାନ୍ତରିତ କରାଯାଇଛି ।
ଅଭିଯୋଗ ଅନୁସାରେ, ଦିନ ପ୍ରାୟ ସାଢେ ୧୧ଟାରେ ଝରାପାଲି ଗାଁରେ ସ୍ବାମୀ-ସ୍ତ୍ରୀଙ୍କ ମଧ୍ଯରେ ଗଣ୍ଡଗୋଳ ହୋଇଥିବା ଖବର ପାଇଁ କନଷ୍ଟେବଳ ସରୋଜ ଗାଁକୁ ଯାଇଥିଲେ । ଏକ ଘରେ ଲୁଚି ରହିଥିବା ଅଭିଯୁକ୍ତ ସ୍ବାମୀ କମଳ ଚରଣ ପ୍ରଧାନକୁ ଧରିବାକୁ ଉଦ୍ଯମ କରିଥିଲେ । ଏହି ସମୟରେ ଏକ ଧାରୁଆ ଅସ୍ତ୍ରରେ କମଳ କନଷ୍ଟେବଳଙ୍କ ହାତକୁ ହାଣି ଦେଇଥିଲା । ଫଳରେ ସରୋଜଙ୍କ ଡାହାଣ ହାତ ପାପୁଲିର ୩ଟି ଆଙ୍ଗୁଳି କଟିଯାଇଥିଲା । ଅଭିଯୁକ୍ତ ଘଟଣାସ୍ଥଳରୁ ଫେରାର ହୋଇଯାଇଛି । ପୋଲିସ ଘଟଣାର ତଦନ୍ତ ଜାରି ରଖିଛି ।
ମୁମ୍ୱାଇ: ଅଭିନେତା ତଥା ଶିବସେନା ନେତା ଗୋବିନ୍ଦାଙ୍କୁ ଡାକ୍ତରଖାନାରୁ ଡିସଚାର୍ଜ କରାଯାଇଛି। ଗୋବିନ୍ଦାଙ୍କ ଗୋଡରେ ଗୁଳି ବାଜିବା ଯୋଗୁଁ ତାଙ୍କୁ ମୁମ୍ୱାଇ ସିଟି କେୟାର ଏସିଆ ହସ୍ପିଟାଲରେ ଅକ୍ଟୋବର ୧ ରେ ଆଡମିଟ୍ କରାଯାଇଥିଲା। ଡାକ୍ତରଖାନାରୁ ଶୁକ୍ରବାର ଡିସଚାର୍ଜ ହୋଇଛନ୍ତି ଗୋବିନ୍ଦା । ଡାକ୍ତରଖାନାରୁ ବାହାରି ପରେ ସେ ପ୍ରଥମେ ପ୍ରଶଂସକ ଏବଂ ଗଣମାଧ୍ୟମକୁ ହାତଯୋଡି ଧନ୍ୟବାଦ ଜଣାଇଛନ୍ତି। ସେ କହିଛନ୍ତି, ଯେଉଁମାନେ ମୋ ପାଇଁ ଭଗବାନଙ୍କ ନିକଟରେ ପ୍ରାର୍ଥନା କରିଛନ୍ତି, ସେମାନଙ୍କ ପାଖେ ମୁଁ ଚିର ଋଣି । କେବଳ ସେତିକି ନୁହେଁ ସିଏମ୍ ସିନ୍ଦେ, ପୋଲିସଙ୍କୁ ମଧ୍ୟ ଧନ୍ୟବାଦ ଜଣାଇଛନ୍ତି ଗୋବିନ୍ଦା ।
ହସ୍ପିଟାଲରୁ ଡିସଚାର୍ଜ ହେବା ସମୟରେ ତାଙ୍କ ନିକଟରେ ପତ୍ନୀ ସୁନିତା ଏବଂ ଝିଅ ଟିନାଙ୍କୁ ଦେଖିବାକୁ ମିଳିଛି । ଗୋବିନ୍ଦାଙ୍କ ଗୋଡରେ ପ୍ଲାଷ୍ଟର ଥିବା ବେଳେ ତାଙ୍କୁ ହ୍ୱିଲଚେୟାରରେ ଅଣାଯାଉଥିବା ଦେଖିବାକୁ ମିଳିଛି । ଗୋବିନ୍ଦାଙ୍କ ସ୍ୱାସ୍ଥ୍ୟାବସ୍ଥା ଠିକ୍ ଥିବା ପତ୍ନୀ କହିଛନ୍ତି ।
