ସମ୍ବଲପୁର: ବୁର୍ଲା ଭୀମସାରରେ ୨ ଡାକ୍ତରୀ ଛାତ୍ର ଗୋଷ୍ଠୀ ମଧ୍ଯରେ ସଂଘର୍ଷ । ୟୁଜି ଛାତ୍ର ବାର୍ଷିକ ଉତ୍ସବରେ ଗଣ୍ଡଗୋଳ ହୋଇଛି । ହାଉସ ସର୍ଜନ ଓ ପିଜି ଛାତ୍ରଙ୍କ ମଧ୍ଯରେ ମାରପିଟ ଲାଗି ତିନି ଜଣ ଆହତ ହୋଇଛନ୍ତି । ଏନେଇ ବୁର୍ଲା ଥାନାରେ ହାଉସ ସର୍ଜନ ଲିଖିତ ଅଭିଯୋଗ କରିଛନ୍ତି । ମାଡ଼ ପ୍ରତିବାଦରେ ହାଉସ ସର୍ଜନ କାର୍ଯ୍ଯବନ୍ଦ ଆନ୍ଦୋଳନ ନିଷ୍ପତ୍ତି ନେଇଛନ୍ତି ।
ଗଣ୍ଡଗୋଳ କଥାକୁ ଭୀମରାସ କର୍ତ୍ତୃପକ୍ଷ ସ୍ବୀକାର କରିଥିବାବେଳେ ବିଳମ୍ବିତ ରାତିରେ ଆଲୋଚନା ପରେ ବି ସମାଧାନ ବାହାରିପାରିନି । ପୂର୍ବ ଶତୃତାରୁ ଗୋଷ୍ଠୀ ସଂଘର୍ଷ ହୋଇଥିବା ସୂଚନା ମିଳିଛି ।
ନନ୍ଦିଘୋଷ ବ୍ୟୁରୋ: ମୁଖ୍ଯମନ୍ତ୍ରୀ ବସ ସେବାକୁ ବିରୋଧ । ବ୍ଲକ ସ୍ତରରେ ଚଳାଚଳକୁ ବିରୋଧ କରି ଆଜି ସନ୍ଧ୍ଯାରୁ ୨୪ ଘଣ୍ଟିଆ ବସ ଚଳାଚଳ ବନ୍ଦ ଡାକରା ଦେଇଛି ପଶ୍ଚିମାଞ୍ଚଳ ଓ ଦକ୍ଷିଣାଞ୍ଚଳ ଘରୋଇ ବସ୍ ମାଲିକ ସଂଘ । ୧୩ ଜିଲ୍ଲାର ପ୍ରାୟ ୨୪ଟି ଘରୋଇ ବସ୍ ମାଲିକ ସଂଘ ଧର୍ମଘଟ କରିବେ ବୋଲି ଘୋଷଣା କରିଛନ୍ତି । ଟାୟାର ଟୁ ବା ବ୍ଲକଠାରୁ ଜିଲ୍ଲା ମୁଖ୍ଯାଳୟକୁ ବସ ଚଳାଚଳକୁ ବିରୋଧ କରୁଛି ଘରୋଇ ବସ ମାଲିକ ସଂଘ । ଏହାଦ୍ବାରା ସେମାନଙ୍କର କ୍ଷତି ହେଉଥିବାରୁ ଏହି ବସ ଚଳାଚଳ ବନ୍ଦ କରିବାକୁ ଦାବି ହୋଇଛି ।
ଏ ଦିଗରେ ବିଚାର କରି ଦାବିକୁ ମାନିବା ପାଇଁ ସରକାରଙ୍କୁ ଅନୁରୋଧ କରିଛନ୍ତି। ଏପଟେ ଧର୍ମଘଟରୁ ଓହରିଯିବାକୁ ଅପିଲ କରିଛନ୍ତି ପରିବହନ ମନ୍ତ୍ରୀ ବିଭୂତି ଭୂଷଣ ଜେନା। ମନ୍ତ୍ରୀ କହିଛନ୍ତି ଏନେଇ ଆଜି ଆଲୋଚନା କରାଯିବ । ବ୍ଲକ ସ୍ତରରେ ଚଳାଚଳ କରୁଥିବା ବସର ରୁଟ ପରିବର୍ତନ ପାଇଁ ତର୍ଜମା ଚାଲିଛି । ଆପୋଷ ଆଲୋଚନା କରି ଖୁବଶୀଘ୍ର ରାଜ୍ଯ ସରକାର ନିଷ୍ପତ୍ତି ନେବେ ।
ନନ୍ଦିଘୋଷ ବ୍ୟୁରୋ: ଦେଶରେ ନକ୍ସଲ ସ୍ଥିତି ନେଇ ଆଜି ସମୀକ୍ଷା କରିବେ କେନ୍ଦ୍ର ଗୃହମନ୍ତ୍ରୀ ଅମିତ ଶାହ। ଏହି ବୈଠକରେ ଆନ୍ଧ୍ରପ୍ରଦେଶ, ବିହାର, ଛତିଶଗଡ଼, ଝାଡ଼ଖଣ୍ଡ, ତେଲଙ୍ଗାନା, ଓଡ଼ିଶା, ମହାରାଷ୍ଟ୍ର ଓ ମଧ୍ଯପ୍ରଦେଶର ମୁଖ୍ଯମନ୍ତ୍ରୀ ଯୋଗଦେବେ। ୨୦୧୦ ତୁଳନାରେ ଦେଶରେ ବାମପନ୍ଥୀ ଉଗ୍ରବାଦ ହ୍ରାସ ପାଇଛି। ୨୦୨୩ରେ ବାମପନ୍ଥୀ ଉଗ୍ରବାଦଜନିତ ହିଂସା ଘଟଣା ୭୨ ପ୍ରତିଶତ ହ୍ରାସ ପାଇଥିବାବେଳେ ମୃତ୍ଯୁସଂଖ୍ଯା ୮୬ ପ୍ରତିଶତ ହ୍ରାସ ପାଇଛି। ନକ୍ସଲଙ୍କ ଲଢେଇ ଶେଷ ଅବସ୍ଥାରେ ପହଞ୍ଚିଥିବା କୁହାଯାଇଛି। ବାମପନ୍ଥୀ ଉଗ୍ରବାଦ ପ୍ରଭା
ଏଥିରେ ଜାତୀୟ ନିରାପତ୍ତା ଉପପରାମର୍ଶଦାତାଙ୍କ ସମେତ କେନ୍ଦ୍ର, ରାଜ୍ଯ, କେନ୍ଦ୍ରୀୟ ସଶସ୍ତ୍ର ପୋଲିସ ବାହିନୀ ବା ସିଏପିଏଫର ବରିଷ୍ଠ ଅଧିକାରୀମାନେ ସାମିଲ ହେବେ। ଗତବର୍ଷ ଅକ୍ଟୋବର ୬ରେ ବାମପନ୍ଥୀ ଉଗ୍ରବାଦ ଅଧ୍ଯୁଷିତ ରାଜ୍ଯଗୁଡିକର ବି ବୈଠକ ବସିଥିଲା। ଚଳିତବର୍ଷ ଅକ୍ଟୋବର ସୁଦ୍ଧା ୨୦୨ ବାମପନ୍ଥୀ ଉଗ୍ରବାଦୀ କ୍ଯାଡର ନିହତ ହୋଇଥିବାବେଳେ ୭୨୩ଜଣ କ୍ଯାଡର ଆତ୍ମସମର୍ପଣ କରିଛନ୍ତି। ୮୧୨ ଜଣ ହୋଇଛନ୍ତି ଗିରଫ। ଚଳିତ ବର୍ଷ ବି ବାମପନ୍ଥୀ ଉଗ୍ରବାଦୀ ଅଧ୍ଯୁଷିତ ଜିଲ୍ଲା ସଂଖ୍ଯା ୩୮କୁ ଖସିଆସିଛି। ସେହିପରି ବର୍ତ୍ତମାନ ସୁଦ୍ଧା ଏହି ସବୁ ରାଜ୍ଯରେ ୧୪ ହଜାର ୪୦୦ କିଲୋମିଟର ରାସ୍ତା ଓ ୬ ହଜାର ମୋବାଇଲ ଟାୱାର ପ୍ରତିଷ୍ଠା ହୋଇଛି।
ନନ୍ଦିଘୋଷ ବ୍ୟୁରୋ: ବାଂଲାଦେଶ ବିପକ୍ଷ ପ୍ରଥମ ଟି-ଟ୍ବେଣ୍ଟି ଜିତିଲା ଭାରତ । ୪୯ଟି ବଲ ବାକିଥାଇ ୭ ୱିକେଟରେ ଜିତିଲା ଟିମ୍ ଇଣ୍ଡିଆ । ହାର୍ଦ୍ଦିକ ପାଣ୍ଡ୍ଯା ୧୬ ବଲରେ ୩୯ ରନର ଦମଦାର ପାଳି ଖେଳିଥିବାବେଳେ କ୍ଯାପଟେନ ସୂର୍ଯ୍ଯକୁମାର ଯାଦବ ୧୪ ବଲରେ ୨୯ ଏବଂ ସଞ୍ଜୁ ସାମସନ ୧୯ ବଲରେ ୨୯ ରନ କରିଥିଲେ । ପଦାର୍ପଣ ମ୍ଯାଚରେ ନୀତିଶ ରେଡ୍ଡୀ ୧୫ ବଲରେ ୧୬ ରନ କରି ଅପରାଜିତ ରହିଛନ୍ତି । ପ୍ରଥମେ ବ୍ଯାଟିଂ କରି ବାଂଲାଦେଶ ୧୨୭ ରନରେ ଅଲଆଉଟ ହୋଇଯାଇଥିଲା । ଗୋଟିଏ ବଲ୍ ବାକି ଥାଇ ଭ୍ରମଣକାରୀ ଦଳ ୧୦ଟି ୱିକେଟ ହରାଇଥିଲା । ମ୍ଯାଚରେ ଆରମ୍ଭରୁ ବାଂଲାଦେଶ ବିପର୍ଯ୍ଯୟ ସାମ୍ମାନ କରିଥିଲା । ଦଳୀୟ ସ୍କୋର ମାତ୍ର ୫ ରନ ଥିବାବେଳେ ପ୍ରଥମ ୱିକେଟ ଯାଇଥିଲା । ମାତ୍ର ୯ ଓଭରରେ ଦଳ ୫୭ ରନ କରି ୫ ୱିକେଟ ହରାଇସାରିଥିଲା । ଶେଷରେ ୧୯.୫ ଓଭରରେ ୧୦ଟି ୱିକେଟ ଯାଇ ବାଂଲାଦେଶ ଅଲଆଉଟ ହୋଇଯାଇଥିଲା । ଅର୍ଶଦୀପ ଓ ବରୁଣ ଚକ୍ରବର୍ତ୍ତୀ ୩ଟି ଲେଖାଏଁ ୱିକେଟ ନେଇଥିବାବେଳେ ହାର୍ଦ୍ଦିକ ପାଣ୍ଡ୍ୟା, ମୟଂ ଯାଦବ ଓ ୱାସିଂଟନ ସୁନ୍ଦର ଗୋଟିଏ ଲେଖାଏଁ ୱିକେଟ ନେଇଛଥିଲେ । ୧୨୮ ରନର ଟାର୍ଗେଟ ଲକ୍ଷ୍ଯ ନେଇ ପଡ଼ିଆକୁ ଓହ୍ଲାଇଥିବା ଟିମ୍ ଇଣ୍ଡିଆ । ଆରମ୍ଭରୁ ଦଳ ଆକ୍ରମଣାତ୍ମକ ଢଙ୍ଗରେ ଖେଳିଥିଲା । ଶେଷରେ ୧୧ ଓଭର ୫ଟି ବଲରେ ଭାରତ ବିଜୟ ହାସଲ କରିଥିଲା । ଭାରତ-ବାଂଲାଦେଶ ମଧ୍ଯରେ ୩ଟି ଟି-ଟ୍ବେଣ୍ଟି ମ୍ଯାଚ ଖେଳାଯିବ । ପ୍ରଥମ ମ୍ଯାଚ ଜିତି ଭାରତ ଏବେ ୧-୦ରେ ଆଗୁଆ ରହିଛି ।
ନନ୍ଦିଘୋଷ ବ୍ୟୁରୋ: ଚେନ୍ନାଇ ଏୟାର ସୋରେ ବଡ ଅଘଟଣ। ଭାରତୀୟ ବାୟୁସେନାର ୯୨ତମ ବାର୍ଷିକୀ ଅବସରରେ ଆୟୋଜିତ ଏୟାର ସୋ କାର୍ଯ୍ୟକ୍ରମରେ ଅଣନିଶ୍ବାସୀ ହୋଇ ପ୍ରାଣ ହରାଇଛନ୍ତି ୩ ଦର୍ଶକ। ୨୩୦ରୁ ଅଧିକ ଦର୍ଶକଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି। ମାରିନା ବିଚରେ ଭାରତୀୟ ବାୟୁସେନାର ଚମତ୍କାର ପ୍ରଦର୍ଶନକୁ ଅବଲୋକନ କରିବା ଲାଗି ଲକ୍ଷ ଲକ୍ଷ ଦର୍ଶକ ଗୋଟିଏ ସ୍ଥାନରେ ସମବେତ ହୋଇଥିଲେ। ତେବେ ଅଧିକ ଉତ୍ତାପ ଓ ଭିଡ ଯୋଗୁ ପରିସ୍ଥିତି ନିୟନ୍ତ୍ରଣ ବାହାରକୁ ଚାଲିଯାଇଥିଲା। ବ୍ଯାପକ ଟ୍ରାଫିକ ସମସ୍ଯା କାରଣରୁ ଲକ୍ଷାଧିକ ଲୋକ ବିଭିନ୍ନ ସ୍ଥାନରେ ଫସିଯାଇଥିଲେ। ଚେନ୍ନାଇର ଅଧିକାଂଶ ସ୍ଥାନରେ ଏହି ସମସ୍ଯା ଦେଖାଦେଇଥିଲା। ଦିନ ୧୧ଟାରୁ ଏୟାର ସୋ ସ୍ଥାନରେ ପ୍ରାୟ ୧୬ ଲକ୍ଷ ଲୋକଙ୍କ ସମାଗମ ହୋଇଥିଲା। ଏପରିକି ଅନେକ ବୟସ୍କ ଲୋକ ବି ଏହି ସୁଯୋଗକୁ ହାତଛଡ଼ା ନ କରିବା ଲାଗି ସେଠାରେ ସମବେତ ହୋଇଥିଲେ। ସ୍ଥାନୀୟ ଇଲାକାରେ ପାନୀୟ ଜଳର ଘୋର ଅଭାବ ଯୋଗୁ ଅନେକ ଲୋକଙ୍କ ଅବସ୍ଥା ସଂଗୀନ ହୋଇପଡିଥିଲା। ଅନେକ ଲୋକ ସ୍ଥିତି ସହି ନପାରି ରୋଡ ଉପରେ ହିଁ ବସିଯାଇଥିଲେ। ଏହି ସୋରେ ୭୨ଟି ବିମାନ ସାମିଲ ହୋଇଥିଲେ। ଭେଲାଚେରୀ ଏମଆରଟିଏସ ରେଳଷ୍ଟେସନରେ ବି ନାହିଁ ନଥିବା ସମସ୍ଯା ସୃଷ୍ଟି ହୋଇଥିଲା।
ନନ୍ଦିଘୋଷ ବ୍ୟୁରୋ: ଗୋ ହତ୍ୟାକୁ ଦଣ୍ଡନୀୟ ଅପରାଧ ଘୋଷଣା କର । ନହେଲେ ଲୋକେ ପୁଣି ତୁମକୁ ସରକାରରୁ ହଟାଇବେ । ପୁଣି ବିକଳ୍ପ ଦଳ କ୍ଷମତାକୁ ଆସିବ । ଗୋଟିଏ ଦେଶ ଗୋଟିଏ ଇଲେକ୍ସନ କଥା ଚିନ୍ତା କରୁଛ । ଗୋଟିଏ ଦେଶ ଗୋଟିଏ ଟ୍ୟାକ୍ସ ନିୟମ ଆଣୁଛ । ସେମିତି ଗୋଟିଏ ଦେଶ ଗୋଟିଏ ଗୋ ରକ୍ଷା କାନୁନ୍ ଆଣ । ଆଜି ଭୁବେନଶ୍ବରରେ ଗୋ-ଧ୍ବଜ ସ୍ଥାପନା ଅବସରରେ କେନ୍ଦ୍ରର ବିଜେପି ସରକାରଙ୍କୁ ଏଭଳି କଡା ସମାଲୋଚନା କରିଛନ୍ତି ସ୍ବାମୀ ଶ୍ରୀ ଅଭିମୁକ୍ତେଶ୍ବରାନନ୍ଦଜୀ ସରସ୍ବତୀ ମହାରାଜ । ଗୋ-ଧ୍ବଜ ସ୍ଥାପନା ଭାରତ ଯାତ୍ରାରେ ଭୁବନେଶ୍ବର ଠାରେ ଆୟୋଜିତ ଏହି ଗୋ-ଧ୍ବଜ ସ୍ଥାପନା କାର୍ଯ୍ୟକ୍ରମରେ ମହାରାଜ କହିଛନ୍ତି ଭାରତର ନେତାମାନେ ବହୁତ ଚାଲାକ । କିଛି ରାଜ୍ୟରେ ଗୋ ମାତାଙ୍କୁ ହତ୍ୟା ବିରୁଦ୍ଧରେ କାନୁନ୍ ଆଣୁଛନ୍ତି । ଏଥିରେ କୁହାଯାଉଛି ଏଠି ଗୋ ମାତାଙ୍କୁ ମାରନି । କିନ୍ତୁ ଅନ୍ୟ ସ୍ଥାନକୁ ନେଇ ମାର । ଏହି ପରିସ୍ଥିତିରେ ପୁରା ଭାରତରେ ଗାଈ ରକ୍ଷା ପାଇଁ ଗୋଟିଏ ନିୟମ ଆସୁ । କଂଗ୍ରେସ ସରକାର ସମୟରେ ଏଭଳି ଗୋ ହତ୍ୟା ବଢିବାରୁ ଲୋକେ ବିଜେପି ସରକାର ଆଣିଲେ । କିନ୍ତୁ ବିଜେପି ସରକାର ଦୋ ମୁହାଁ ନୀତି ଆପଣେଇଛି । ନାଗାଲାଣ୍ଡରେ ବିଜେପି ସରକାର । ବିଜେପି ସରକାର ଆସିବା ପରେ ଭାରତ ଗୋମାଂସ ଚାଲାଣରେ ଦୁଇ ନମ୍ବର ରହିଛି । ତେଣୁ ଗୋ ହତ୍ୟାକୁ ଦଣ୍ଡନୀୟ ଅପରାଧ ଘୋଷଣା କରାଯାଉ । ଗାଈକୁ ରାଜ୍ୟମାତା ହିସାବରେ ଘୋଷଣା କରାଯାଉ । ଶିବସେନା ଗାଇକୁ ରାଜ୍ୟମାତା ଘୋଷଣା କରିଛନ୍ତି । ତେଣୁ ମହାରାଷ୍ଟରେ ଶିବସେନାକୁ ଆଶୀର୍ବାଦ ଦେଇଛି । ବିଜେପି ଭାବୁଛି ଦେଶରେ ବିକଳ୍ପ ନାହିଁ । କିନ୍ତୁ ପାପ ବଢିଲେ ବିକଳ୍ପ ଆପେ ଆପେ ସୃଷ୍ଟି ହୁଏ । ଲୋକ ନିଶ୍ଚୟ ପରିବର୍ତ୍ତନ କରିବେ ।
ନନ୍ଦିଘୋଷ ବ୍ୟୁରୋ: ପ୍ରସିଦ୍ଧ ଶୈବପୀଠ ହରିଶଙ୍କର ପୀଠରେ ଜନ୍ମଦିନ ପାଳନ କଲେ ଅଭିନେତା ସବ୍ୟସାଚୀ ମିଶ୍ର । ବଲାଙ୍ଗୀର ମାଓପ୍ରବଣ ଖପ୍ରାଖୋଲ ବ୍ଲକରେ ବହୁ ଚର୍ଚିତ ଚଳଚ୍ଚିତ୍ର ରାଣ୍ଡୀ ପୁଅ ଅନନ୍ତାର ସୁଟିଂ ଚାଲିଛି । ନିର୍ଦେଶକ ସବ୍ୟସାଚୀ ମହାପାତ୍ରଙ୍କ ଏହି ଚଳଚ୍ଚିତ୍ରର ସୁଟିଂ ସେଟରେ ନିଜ ଜନ୍ମଦିନ ପାଳନ କରିଛନ୍ତି ପ୍ରଖ୍ଯାତ ସିନେ ଅଭିନେତା ସବ୍ୟସାଚୀ ମିଶ୍ର । ପ୍ରଥମେ ବାବା ହରିଶଙ୍କରଙ୍କ ଦର୍ଶନ କରି ପୂଜାର୍ଚନା କରିଥିଲେ ସବ୍ୟସାଚୀ । ସମସ୍ତ କଳାକାର ଓ ପ୍ରସଂଶକଙ୍କ ସହ ମନ୍ଦିର ପ୍ରାଙ୍ଗଣରେ କେକ୍ କାଟି ଜନ୍ମଦିନ ପାଳନ କରିଥିଲେ । ନିଜ ଜନ୍ମଦିନ ଦିନକୁ ସ୍ମରଣୀୟ କରିବା ପାଇଁ ମନ୍ଦିରକୁ ଆସୁଥିବା ଶ୍ରଦ୍ଧାଳୁ ମାନଙ୍କ ପାଇଁ ଥଣ୍ଡା ପାନୀୟ ଜଳ ବ୍ୟବସ୍ଥା କରିଥିଲେ । ପ୍ରଚଣ୍ଡ ଖରାରେ ଭକ୍ତ ଖାଲି ପାଦରେ ଛିଡା ହୋଇ ପାରୁନଥିବାରୁ ସେଠାରେ ଫୁଟ୍ କାର୍ପେଟ ବିଛାଇବା ପାଇଁ ବ୍ୟବସ୍ଥା କରିବେ ବୋଲି କହିଛନ୍ତି । ତାସହ କିଛି ଗରିବ ମେଧାବୀ ଛାତ୍ରଛାତ୍ରୀମାନଙ୍କୁ ପାଠ ପଢିବା ପାଇଁ ସେ ସହାୟତା ପ୍ରଦାନ କରିଛନ୍ତି । ଏହି ଅବସରରେ ସବ୍ୟସାଚୀଙ୍କ ସହ ଚଳଚ୍ଚିତ୍ରର ନିର୍ଦେଶକ ସବ୍ୟସାଚୀ ମହାପାତ୍ରଙ୍କ ସମସ୍ତ ଷ୍ଟାଫ୍ ଉପସ୍ଥିତ ଥିଲେ ।
ନନ୍ଦିଘୋଷ ବ୍ୟୁରୋ: ଦିନକୁ ଦିନ ନୂଆମୋଡ ନେଉଛି କୋଲକାତା ଆରଜି କର ମେଡିକାଲ କଲେଜ ଦୁଷ୍କର୍ମ ଓ ହତ୍ଯା ଘଟଣା। ଧମକ, ଅର୍ଥ ହେରଫେର ଓ ରାଗିଂ ଅଭିଯୋଗ କ୍ରମେ କଲେଜର ଇଣ୍ଟରନାଲ କାଉନସିଲ ୧୦ ଡାକ୍ତରଙ୍କୁ ବହିଷ୍କୃତ କରିଛି। ସେମାନଙ୍କ ବିରୋଧରେ ଅନେକ ଅଭିଯୋଗ ପରେ ଏହି ପଦକ୍ଷେପ ନିଆଯାଇଛି। ଏହି ଡାକ୍ତରମାନଙ୍କୁ ସ୍ଥାୟୀ ଭାବେ ହଷ୍ଟେଲରୁ ବି ବହିଷ୍କୃତ କରାଯାଇଛି। ବର୍ତ୍ତମାନ ସୁଦ୍ଧା ଇଣ୍ଟର୍ଣ୍ଣ, ହାଉସ ଷ୍ଟାଫ, ଛାତ୍ରଙ୍କ ସମେତ ମୋଟ ୫୯ଜଣଙ୍କୁ ଅସ୍ଥାୟୀ ଭାବେ ସସପେଣ୍ଡ କରାଗଲାଣି। ବହିଷ୍କୃତ ଡାକ୍ତରଙ୍କ ମଧ୍ଯରେ ଅଛନ୍ତି ସୌରଭ ପାଲ, ଆଶିଷ ପାଣ୍ଡେ, ଅଭିଷେକ ସେନ ପ୍ରମୁଖ। ୭୨ ଘଣ୍ଟା ମଧ୍ଯରେ ହଷ୍ଟେଲ ଖାଲି କରିବାକୁ ସେମାନଙ୍କୁ ନିର୍ଦ୍ଦେଶ ଦିଆଯାଇଛି। ପରେ ସେମାନଙ୍କ ନାମକୁ ରାଜ୍ଯ ମେଡିକାଲ ପରିଷଦ ନିକଟକୁ ପଠାଯିବ ବୋଲି ସୂଚନା ମିଳିଛି। ବହିଷ୍କୃତ ଅଧ୍ଯାପକଙ୍କ ମଧ୍ଯରୁ କେତେ ଜଣ କିଛି ଛାତ୍ରଛାତ୍ରୀଙ୍କୁ ଏକ ନିର୍ଦ୍ଦିଷ୍ଟ ଦଳରେ ସାମିଲ ଲାଗି ପ୍ରବର୍ତ୍ତାଉଥିବା ଅଭିଯୋଗ ହୋଇଥିଲା। ସେପଟେ ଅନଶନରତ ଡାକ୍ତରମାନେ ଜାରି ରଖିଛନ୍ତି ଅନଶନ।
ନନ୍ଦିଘୋଷ ବ୍ୟୁରୋ: ରାଜ୍ୟରେ ମାସାଧିକ କାଳ ଜାରି ରହିଛି ଆଳୁ ସଙ୍କଟ । ଏଭଳି ସମସ୍ୟା ମଧ୍ୟରେ ଚୋରାରେ ଆସୁଥିବା ମାତ୍ର ଅଳ୍ପ କିଛି ଟ୍ରକ ଆଳୁ ବ୍ୟବସାୟୀଙ୍କ ଠାରୁ ଆଣି ସରକାର ଲୋକଙ୍କୁ ଦେଲେ । ହେଲେ ଟ୍ରେନରେ ଆଳୁ ଆସିବା ସହ ୧୦ ଟଙ୍କାରେ ମିଳିବ ବୋଲି କହିଲେ। କିନ୍ତୁ ଆଜି ଯାଏ ଟ୍ରେନର ଆଳୁ ଆସି ପହଞ୍ଚିଲା ନାହିଁ। ସେପଟେ ରାଜ୍ୟରେ କୃଷି ଉତ୍ପାଦନ ବୃଦ୍ଧି ପାଇଁ ବିଭିନ୍ନ ବିଭାଗ ମଧ୍ୟରେ ସମନ୍ୱୟ ବୈଠକ ବସାଇବା ପାଇଁ କହିଲେ। ତାହା ମଧ୍ୟ ହେଲା ନାହିଁ। ଏବେ ପୁଣି ପଞ୍ଜାବ ଓ ୟୁପିରୁ ଆଳୁ ବିହନ ଆଣି ରାଜ୍ୟରେ ଆଳୁ ଉତ୍ପାଦନ ବଢାଇବା ପାଇଁ କୃଷି ମନ୍ତ୍ରୀଙ୍କ ବାହାସ୍ପଟକୁ ନେଇ ବର୍ଷିଛନ୍ତି କୃଷକ ସଙ୍ଗଠନ, ବ୍ୟବସାୟୀ ସଂଘ ଓ ଜନ ସଂଗଠନ । ରାଜ୍ୟର ବିଜେପି ସରକାର ବାରମ୍ବାର ମିଛ କହୁଥିବା ବେଳେ ଏ କଥାକୁ କେମିତି ବିଶ୍ୱାସ କରିହେବ ବୋଲି ପ୍ରଶ୍ନ କରିଛନ୍ତି ସମସ୍ତେ ।
ରାଜ୍ୟରେ ଦୂର ହେଉନି ଆଳୁ ସଙ୍କଟ । ଶିଖର ଛୁଉଁଛି ଦରଦାମ । ମାଳ ମାଳ ସମସ୍ୟା ଭିତରେ ବାରମ୍ବାର ବାହସ୍ଫୋଟ ମାରୁଛନ୍ତି ରାଜ୍ୟସରକାର । ମିଛ ପ୍ରତିଶ୍ରୁତି ଦେଇ ଲୋକଙ୍କ ସହ କରୁଛନ୍ତି ପ୍ରତାରଣା । ପଶ୍ଚିମବଙ୍ଗ ଓଡିଶାକୁ ଆଳୁ ଯୋଗାଣ ବନ୍ଦ କରିବା ପରେ ମାସେରୁ ଅଧିକ ସମୟ ଧରି ରାଜ୍ୟରେ ସୃଷ୍ଟି ହୋଇଥିଲା ଆଳୁ ସଙ୍କଟ। ଏହି ସମସ୍ୟାର ସମାଧାନରେ ବିଫଳ ହୋଇଥିବା ରାଜ୍ୟ ସରକାର ପୁଣି ବାହସ୍ଫୋଟ ମାରିଛନ୍ତି । ରାଜ୍ୟରେ ଆଳୁ ସଙ୍କଟ ଦୂର ପାଇଁ ଦୀର୍ଘ ମିଆଦି ଯୋଜନା କରିବା ଓ ପଞ୍ଜାବ , ୟୁପିରୁ ଆଳୁ ବିହନ ଆଣି ଓଡ଼ିଶାର ଚାଷୀଙ୍କୁ ଯୋଗାଇବା ନେଇ କୃଷିମନ୍ତ୍ରୀଙ୍କ ମନ୍ତବ୍ୟ ପରେ ସରକାରଙ୍କ ଉପରେ ବର୍ଷିଛନ୍ତି କୃଷକ ସଙ୍ଗଠନ। ହେଲେ ବିଜେପି ସରକାର ବାରବାର ମିଛ କହିଲେ ଚାଷୀ ମାନେ ଏହି କଥାକୁ କେମିତି ବିଶ୍ୱାସ କରିବେ ବୋଲି ପ୍ରଶ୍ନ କରିଛି କୃଷକ ମଜଦୂର ମହାସଂଘ। ଓଡ଼ିଶାରେ ଆଳୁ ସଙ୍କଟ ବେଳେ ଆଳୁ ଟ୍ରେନରେ ଆସିବ, ୧୦ ଟଙ୍କାରେ ମିଳିବ ବୋଲି କହିଥିଲେ ସରକାର । ଏହି ଟ୍ରେନ ଆଳୁ କୁଆଡେ ଗଲା ବୋଲି ପ୍ରଶ୍ନ କରିଛି ମହାସଂଘ। କୃଷି ଉତ୍ପାଦନ ବୃଦ୍ଧି ପାଇଁ ବିଭିନ୍ନ ବିଭାଗ ମଧ୍ୟରେ ସମନ୍ୱୟ ବୈଠକ କରିବେ ବୋଲି କହିଥିଲେ । ଏହି ବୈଠକ କେବେ ବସିବ ବୋଲି ମଧ୍ୟ ପ୍ରଶ୍ନ ହୋଇଛି। କୃଷକ ସଙ୍ଗଠନ ଗୁଡିକ ସରକାରଙ୍କ ସହ ଚାଷୀ ସମସ୍ୟା ସମ୍ପର୍କରେ ଆଲୋଚନା ନେଇ ବାରମ୍ବାର ଚିଠି ଲେଖିଥିଲେ ମଧ୍ୟ ଏ ଯାଏ ତାହା ହୋଇପାରି ନାହିଁ। ବିଜେପି ସରକାର ଯେଉଁ ରାଜ୍ୟରେ ଅଛି ସେଠି ଚାଷୀ ମାନେ ଶୋଷଣର ଶିକାର ହେଉଥିବା ଅଭିଯୋଗ କରିଛି ସଂଗଠନ। ସରକାର ଚାଷୀଙ୍କ ସହ ଆଲୋଚନା କରନ୍ତୁ ଓ ବୈଠକ କରାନ୍ତୁ ବୋଲି ଦାବି ହୋଇଛି ।
ସେପଟେ ଆଳୁ ବିହନ ପ୍ରସଙ୍ଗ ନେଇ ସରକାରଙ୍କ ଆଭିମୁଖ୍ୟ ଉପରେ ପ୍ରଶ୍ନ ଉଠାଇଛି ରାଜ୍ୟ ବ୍ୟବସାୟୀ ସଂଘ । ଓଡ଼ିଶାରେ ଗଳି ଆଳୁକୁ ମଞ୍ଜି ଭାବେ ବ୍ୟବହାର କରାଯାଇ ଚାଷ ହେଉଛି। ତେଣୁ ଉନ୍ନତମାନର ପଞ୍ଜାବ ,ୟୁପିରୁ ଆଳୁ ବିହନ ଆଣିବା ପାଇଁ ପୂର୍ବରୁ ବ୍ୟବସାୟୀ ସଂଘ ପକ୍ଷରୁ ସରକାରଙ୍କୁ ପ୍ରସ୍ତାବ ଦିଆଯାଇଥିଲା। ହେଲେ ଏହାକୁ ହେୟଜ୍ଞାନ କରାଯାଇଥିଲା। ବ୍ୟବସାୟୀ ସଂଘ ଉପରେ ସରକାରଙ୍କ ଭରସା ନାହିଁ। ଏବେ ରାଜ୍ୟସରକାରଙ୍କ ଆଳୁ ବିହନ ଆଣିବା ନିଷ୍ପତ୍ତି କଥାରେ ନୁହଁ କାମରେ ପ୍ରତିଫଳିତ ହେବା ଦରକାର ବୋଲି କୁହାଯାଇଛି । ସରକାର ବାସ୍ତବତାକୁ ଆସନ୍ତୁ ବୋଲି ନିବେଦନ କରିଛି ରାଜ୍ୟ ବ୍ୟବସାୟୀ ସଂଘ। ସେପଟେ ସରକାରଙ୍କ ଏଭଳି କଥାକୁ ସମାଲୋଚନା କରିଛି ସିଟିଜେନସ ଫୋରମ। ଦରଦାମ ପ୍ରସଙ୍ଗକୁ ଏଡ଼ାଇବା ପାଇଁ ଏଭଳି ବୟାନ ଦିଆଯାଇଛି ବୋଲି କହିଛି ଫୋରମ।
ନନ୍ଦିଘୋଷ ବ୍ୟୁରୋ: ପାକିସ୍ତାକୁ ପରାସ୍ତ କଲା ଟିମ ଇଣ୍ଡିଆ। ମହିଳା ଟି-୨୦ ବିଶ୍ଵକପରେ ପାକିସ୍ତାନକୁ ମାତ ଦେଇଛି ଭାରତ। ପାକ୍ ଟିମକୁ ୬ ୱିକେଟରେ ହରାଇଛି ଭାରତ। ପ୍ରଥମ ବ୍ଯାଟି କରି ପାକିସ୍ତାନ ଭାରତ ଆଗରେ ୧୦୬ ରନର ଟାର୍ଗେଟ ଦେଇଥିଲା। ଜବାବରେ ଭାରତ ୪ ୱିକେଟ ହରାଇ ଟାର୍ଗେଟ ହାସଲ କରି ନେଇଛି। ଭାରତ ପକ୍ଷରୁ ଶେଫାଳି ବର୍ମା ସର୍ବାଧିକ ୩୨ ରନ କରି ଟିମକୁ ବିଜୟୀ କରାଇଛନ୍ତି। ଅଧିନାୟକ ହରମନପ୍ରୀତ କୌର ଦ୍ଵିତୀୟ ସର୍ବାଧିକ ୨୯ ରନ କରିଥିବାବେଳେ ଜେମିମା ରୋଡ୍ରିଗସ ୨୩ ରନ କରିଥିଲେ। ପାକିସ୍ତାନ ବ୍ଯାଟିଂରେ ନିଦା ଦାର ସର୍ବାଧିକ ୨୮ ରନ କରିଥିଲେ। ମୁନିବା ଅଲି ଦ୍ଵିତୀୟ ସର୍ବାଧିକ ୧୭ ଏବଂ ଅଧିନାୟକ ଫାତିମା ସାନା ୧୩ ରନ କରିଥିଲେ। ଭାରତର ଅରୁନ୍ଧତୀ ରେଡ୍ଡୀଙ୍କୁ ସର୍ବାଧିକ ୪ ୱିକେଟ ମିଳିଛି। ଶ୍ରେୟଙ୍କା ପାଟିଲଙ୍କୁ ୨ଟି, ଆଶା ଶୋଭନା, ଦିପ୍ତୀ ଶର୍ମା ଏବଂ ରେଣୁକା ସିଂହଙ୍କୁ ଗୋଟିଏ ଲେଖାଏ ୱିକେଟ ମିଳିଛି।
