ଭୁବନେଶ୍ୱର : ବିଜେଡିର ସଭ୍ଯ ସଂଗ୍ରହ ଅଭିଯାନ ବହୁତ ଭଲ ଚାଲିଛି । ନିଜ ଆଡୁ ବହୁତ ଲୋକ ବିଜେଡିରେ ସାମିଲ ହେଉଛନ୍ତି । ସେମାନଙ୍କୁ ଦଳ ସ୍ୱାଗତ କରୁଛି । ଯୁବ ଓ ଛାତ୍ର ମାନେ ବିଜେଡିର ଭବିଷ୍ୟତ । ସୋସିଆଲ ମିଡିଆରେ ସକ୍ରିୟ ରହି ବିରୋଧୀଙ୍କ ଅପପ୍ରଚାରର କଡା ଜବାବ ଦିଅନ୍ତୁ । ଛାତ୍ର ବିଜେଡିର ଦୁଇ ଦିନିଆ ଡିଜିଟାଲ କର୍ମଶାଳାକୁ ଉଦଘାଟନ କରି ଏପିର ଆହ୍ବାନ ଦେଇଛନ୍ତି ସଭାପତି ନବୀନ ପଟ୍ଟନାୟକ । ସେ କହିଛନ୍ତି, ଅକ୍ଟୋବରରୁ ଆରମ୍ଭ ହୋଇଥିବା ମେମ୍ବରସିପ ଡ୍ରାଇଭ ଭଲ ଚାଲିଛି । ସଭ୍ୟ ସଂଗ୍ରହ ଗୋଟେ ରାଜନୈତିକ ଦଳର ଗୁରୁତ୍ୱପୂର୍ଣ୍ଣ କାର୍ଯ୍ୟକ୍ରମ । ବିଜେଡି ସରକାର ବହୁତ ଭଲ କାମ କରିଛି । ଆମ ଯୋଜନା ଅନ୍ୟ ମାନଙ୍କ ପାଇଁ ମଡେଲ ସାଜିଛି । କେନ୍ଦ୍ର ସରକାର ଏହାକୁ ଅନୁକରଣ କରିଛନ୍ତି । ଭୋଟ ରାଜନୀତି ଦଳର ଲକ୍ଷ୍ୟ ନୁହେଁ । ବିଜେଡି ସରକାରର ବହୁତ ଯୋଜନା ବିଜେପି ସରକାର ବନ୍ଦ କରି ଦେଇଛନ୍ତି । ବିକାଶ ଓ କଲ୍ୟାଣ ଦଳର ଫୋକସ । ବିଜେଡି ଓଡ଼ିଶାର ଏକ ନମ୍ବର ଦଳ । ଗତ ନିର୍ବାଚନରେ ଦଳ ଅଧିକ ଭୋଟ ପାଇଛି । ଭୋଟ ପ୍ରତିଶତ ବି ବଢିଛି । ବିଜେଡି ଓଡ଼ିଶାବାସୀଙ୍କ ହୃଦୟରେ ଅଛି । ଓଡ଼ିଆ ସ୍ୱାଭିମାନର ସୁରକ୍ଷା କରିବା ପାଇଁ ସମସ୍ତେ କାମ ଜାରି ରଖନ୍ତୁ ବୋଲି ଆହ୍ବାନ ଦେଇଛନ୍ତି ବିଜେଡି ସୁପ୍ରିମୋ ।
ଆମ୍ବ ଟାକୁଆ ମୃତ୍ୟୁ ପ୍ରସଙ୍ଗ : ବିଜେପି ସରକାରଙ୍କୁ ନବୀନଙ୍କ ଟାର୍ଗେଟ
ଭୁବନେଶ୍ୱର : ଆମ୍ବ ଟାକୁଆ ଜାଉ ଖାଇ ମୃତ୍ୟୁବରଣ ପ୍ରସଙ୍ଗରେ ରାଜ୍ଯ ସରକାରଙ୍କୁ ଘେରିଲେ ବିରୋଧୀ ଦଳ ନେତା ତଥା ବିଜେଡି ସୁପ୍ରିମୋ ନବୀନ ପଟ୍ଟନାୟକ । ପୂର୍ବ ସରକାରଙ୍କ ବାର ବର୍ଷର ତପସ୍ୟାକୁ ବିଜେପି ସରକାର ଶୁଖୁଆ ପୋଡ଼ାରେ ସାରି ଦେଲେ ବୋଲି କହି କଟାକ୍ଷ କରିଛନ୍ତି । ବିଜେଡି ସରକାର ଆରମ୍ଭ କରିଥିବା ବିକାଶ ମୂଳକ ଯୋଜନା ଲୋକଙ୍କୁ ବଞ୍ଚିବାକୁ ଶକ୍ତି ଦେଇଥିଲା । ଏବେ ବିନା କାରଣରେ ଗରିବ ଆଦିବାସୀ ଭାଇ ଭଉଣୀଙ୍କ ଚାଉଳକୁ ବନ୍ଦ କରିଛନ୍ତି । ସେମାନେ ଆମ୍ବ ଟାକୁଆ ଖାଉଛନ୍ତି । ଏହା ବହୁତ ଦୁଃଖର କଥା । ଦୁଇ ଜଣ ମୃତ୍ୟୁବରଣ କରିଛନ୍ତି । ଅନ୍ୟମାନେ ଚିକିତ୍ସିତ ହେଉଛନ୍ତି । ଏହା ଅତି ଗମ୍ଭୀର ପ୍ରସଙ୍ଗ କହି ନବୀନ କ୍ଷୋଭ ପ୍ରକାଶ କରିଛନ୍ତି ।
ଆଜି ବି ଖସିଲା ଭାରତର ମାର୍କେଟ : ନିବେଶକଙ୍କ ୪ ଲକ୍ଷ କୋଟି ଟଙ୍କା ଗୋଲ୍ !
ନୂଆଦିଲ୍ଲୀ : ଆଜି ଦିନକରେ ନିବେଶକଙ୍କ ୪ ଲକ୍ଷ କୋଟି ଟଙ୍କା ଗୋଲ୍। ମାର୍କେଟରୁ ଉଡ଼ି ଯାଇଛି ୪ ଲକ୍ଷ କୋଟି ଟଙ୍କା। କାରଣ ଆଜି ବି ଖସିଛି ମାର୍କେଟ। ବମ୍ଵେ ଷ୍ଟକ ଏକ୍ସଚେଞ୍ଜର ସୂଚକାଙ୍କ ସେନସେକ୍ସ ୮୫୦ ପଏଣ୍ଟରୁ ଅଧିକ ହ୍ରାସ ପାଇଥିବା ବେଳେ ନିଫଟି ଖସିଛି ପ୍ରାୟ ୩୦୦ ପଏଣ୍ଟ। ଅଟୋ, ଫାର୍ମା, ଆଇଟି, ମେଟାଲ ପ୍ରମୁଖ କ୍ଷେତ୍ରରେ ରେଡ୍ ଜୋନକୁ ଖସିଛି। ଏହି ସବୁ ସେକ୍ଟର ୧ ରୁ ୨ ପ୍ରତିଶତ ଖସିଛି।
ଟ୍ରମ୍ପଙ୍କ ବିଜୟ ପରେ ଭାରତୀୟ ମାର୍କେଟରେ କିଛି ସମୟ ଉତ୍ସାହ ଦେଖା ଦେଇଥିଲା । କିନ୍ତୁ ଆଜି ପୁଣି ଖସିଛି। ବିଦେଶୀ ନିବେଶକମାନେ ମାର୍କେଟରୁ ପୁଂଜି ପ୍ରତ୍ୟାହାର କରି ନେଉଥିବାରୁ ମାର୍କେଟରେ ଏପରି ସ୍ଥିତି ଦେଖିବାକୁ ମିଳିଛି। କେବେ ନିବେଶକମାନେ ଆମେରିକାର ଫେଡେରାଲ ରିଜର୍ଭର ପଲିସିକୁ ଅପେକ୍ଷା କରିଛନ୍ତି। ଯଦି ଫେଡେରାଲ ରିଜର୍ଭ ସୁଧ ହାର ହ୍ରାସ କରେ, ତେବେ ଭାରତୀୟ ମାର୍କେଟରୁ ଆହୁରି ପୁଂଜି ପ୍ରତ୍ୟାହାର କରିପାରନ୍ତି ନିବେଶକ।
ହଷ୍ଟେଲରୁ ମିଳିଲା ଛାତ୍ରୀଙ୍କ ଝୁଲନ୍ତା ମୃତଦେହ
ଭୁବନେଶ୍ୱର : ମେଡିକାଲ କୋଚିଂ ସେଣ୍ଟର ହଷ୍ଟେଲରୁ ମିଳିଲା ଛାତ୍ରୀଙ୍କ ମୃତଦେହ। ଝୁଲନ୍ତା ଅବସ୍ଥାରେ ଛାତ୍ରୀଙ୍କ ମୃତଦେହ ଉଦ୍ଧାର ହୋଇଛି। ଭୁବନେଶ୍ବର ପଟିଆ ସ୍ଥିତ ଏକ ହଷ୍ଟେଲରୁ ମୃତଦେହ ଉଦ୍ଧାର କରିଛି ପୋଲିସ। ମୃତ ଛାତ୍ରୀଙ୍କ ନାଁ କଲ୍ୟାଣୀ ସାହୁ। ଘର କଟକ ଜିଲ୍ଲା ସାଲେପୁର। ଯୁକ୍ତ ୨ ବିଜ୍ଞାନ ରେ ପଢିବା ସହ ମେଡିକାଲ ପାଇଁ କୋଚିଂ ନେଉଥିଲେ ଛାତ୍ରୀ ଜଣକ। ତେବେ ମୃତ୍ୟୁର କାରଣ ଏଯାଏଁ ଜଣାପଡ଼ିନାହିଁ।
ଘଟଣାସ୍ଥଳରେ ଛାନଭିନ ଚଳାଇଛି ଚନ୍ଦ୍ରଶେଖରପୁର ଥାନା ପୋଲିସ । ମୃତଦେହ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଯାଇଛି । ସେପଟେ ସମ୍ପୃକ୍ତ କୋଚିଂ ସେଣ୍ଟର ବିରୋଧରେ ସାଙ୍ଘାତିକ ଅଭିଯୋଗ ଆଣିଛନ୍ତି ଛାତ୍ରୀଙ୍କ ପରିବାର ଲୋକେ। ମାତ୍ରାଧିକ ଚାପ ପାଇଁ ଝିଅ ଡିପ୍ରେସନରେ ଥିବା ଅଭିଯୋଗ ଆଣିଛନ୍ତି। ଏନେଇ ପୋଲିସ ଘଟଣାର ପୁଙ୍ଖାନୁପୁଙ୍ଖ ତଦନ୍ତ କରିବା ପାଇଁ ଦାବି କିଛନ୍ତି ପରିବାର।
ଭୁବନେଶ୍ୱର ବିମାନବନ୍ଦରରେ ଅପ୍ରୀତିକର ପରିସ୍ଥିତି ; ଧାରଣାରେ ବସିଲେ ଯାତ୍ରୀ
ଭୁବନେଶ୍ୱର : ଭୁବନେଶ୍ୱର ବିମାନବନ୍ଦରରେ ଅପ୍ରୀତିକର ପରିସ୍ଥିତି । ବାରମ୍ବାର ବିମାନ ବାତିଲ ପରେ ଧାରଣାରେ ବସିଲେ ଯାତ୍ରୀ । ଭୁବନେଶ୍ବରରୁ ହାଇଦ୍ରାବାଦ ଯିବାକୁ ଥିବା ବିମାନ IX 2932 ବିମାନ ଗତକାଲି ସକାଳ ୯ ଟା ୫୫ରେ ଥିବା ବେଳେ କୌଣସି କାରଣ ପାଇଁ ବାତିଲ ହୋଇ ଆଜି ସକାଳ ୮ ଟା ୪୫କୁ ଧାର୍ଯ୍ୟ କରାଯାଇଥିଲା । ହେଲେ ଆଜି ବି ସେହି ବିମାନ ବାତିଲ କରାଯାଇଛି । ବାରମ୍ବାର ବାତିଲ ପରେ ଧାରଣାରେ ବସିଲେ ଯାତ୍ରୀ । ଭୁବନେଶ୍ୱର ବିମାନବନ୍ଦର ଭିତରେ ଉତ୍ତେଜନା ଦେଖା ଦେଇଛି ।
ଆମେରିକାରେ କିଏ କାହାକୁ ଦେଇଛି ଭୋଟ୍ ?
ନନ୍ଦିଘୋଷ ବ୍ୟୁରୋ : ପୁଣି ଆମେରିକାରେ କ୍ଷମତାକୁ ଫେରିଛନ୍ତି ଡୋନାଲ୍ଡ ଟ୍ରମ୍ପ । ଭୋଟ୍ ଗଣନାରେ ୨୯୫ ଭୋଟ୍ ପାଇଥିବା ବେଳେ କମଳା ହାରିସ୍ ୨୨୬ଟି ଭୋଟ ହାସଲ କରିଥିଲେ । ରାଷ୍ଟ୍ରପତି ନିର୍ବାଚନାରେ ବଡ଼ ଭୂମିକା ତୁଲାଉଥିବା ସ୍ୱିଙ୍ଗ୍ ରାଜ୍ୟଗୁଡିକରେ ମଧ୍ୟ ଟ୍ରମ୍ପଙ୍କୁ କ୍ଲିନ୍ ସ୍ୱିପ୍ ମିଳିଛି । ବହୁ ବିବାଦରେ ଫସିଥିବା ଟ୍ରମ୍ପଙ୍କ ଉପରେ ପୁଣି ଥରେ ଭରସା କରିଛନ୍ତି ଦେଶବାସୀ ।
କାହାକୁ କେତେ ଭୋଟ
କମଳା ହାରିସଙ୍କୁ ୪୩ ପ୍ରତିଶତ ଶ୍ୱେତାଙ୍ଗ ଲୋକ ମାନେ ଭୋଟ ଦେଇଥିବା ବେଳେ ଟ୍ରମ୍ପଙ୍କୁ ଭୋଟ ଦେଇଥିବା ଶ୍ୱେତାଙ୍ଗଙ୍କ ସଂଖ୍ୟା ୫୫ । ସେହିପରି ୮୬ ପ୍ରତିଶତ ଅଶ୍ୱେତ ଲୋକ କମଳା ହାରିସଙ୍କୁ ଭୋଟ ଦେଇଥିବା ବେଳେ ୧୨ ପ୍ରତିଶତ ଅଶ୍ୱେତ ଲୋକ ଟ୍ରମ୍ପଙ୍କୁ ନିଜ ଭୋଟ ଦେଇଛନ୍ତି । ଅନ୍ୟପଟେ ୫୬ ପ୍ରତିଶତ ଏସୀୟ ଲୋକ ଟ୍ରମ୍ପଙ୍କୁ ଏବଂ ୩୮ ପ୍ରତିଶତ କମଳାଙ୍କୁ ଭୋଟ ଦେଇଛନ୍ତି । ସେହିପରି ୫୩ ପ୍ରତିଶତ ଲାଟିନ୍ ଭୋଟର ହାରିସଙ୍କ ସପକ୍ଷରେ ମତଦାନ ଦେଇଥିବା ବେଳେ ଟ୍ରମ୍ପଙ୍କୁ ୪୫ ପ୍ରତିଶତ ଭୋଟ ଦେଇଥିଲେ । ୪୩ ପ୍ରତିଶତ ଅନ୍ୟାନ୍ୟ ଲୋକଙ୍କ ଭୋଟ ହାରିସଙ୍କୁ ଏବଂ ୫୩ ପ୍ରତିଶତ ଡୋନାଲ୍ଡ ଟ୍ରମ୍ପଙ୍କୁ ମିଳିଛି ।
ଯୁବପୀଢୀଙ୍କ ପ୍ରଥମ ପସନ୍ଦ ଥିଲେ ହାରିସ
ସୂଚନା ମୁତାବକ, ଆମେରିକା ରାଷ୍ଟ୍ରପତି ନିର୍ବାଚନରେ ୧୮ରୁ ୨୯ ବର୍ଷୀୟ ଭୋଟରଙ୍କ ପସନ୍ଦ କମଳା ହାରିସ ବୋଲି ଜଣାପଡିଛି । ୫୫ ପ୍ରତିଶତ ଯୁବଗୋଷ୍ଠୀ ହାରିସଙ୍କୁ ଭୋଟ କରିଥିବା ବେଳେ ୪୨ ପ୍ରତିଶତ ଭୋଟ ଟ୍ରମ୍ପଙ୍କୁ ମିଳିଛି । ସେହିପରି ୩୦ରୁ ୪୪ ବର୍ଷୀୟ ଭୋଟର ୫୧ ପ୍ରତିଶତ ଭୋଟ କମଳାଙ୍କୁ ଏବଂ ୪୬ ପ୍ରତିଶତ ଭୋଟ୍ ଟ୍ରମ୍ପଙ୍କୁ ଦେଇଛନ୍ତି । କେବଳ ୪୫ରୁ ୬୪ ଏବଂ ୬୫ରୁ ଅଧିକ ବର୍ଷୀୟ ଭୋଟର ହିଁ କମଳାଙ୍କ ତୁଳନାରେ ଟ୍ରମ୍ପଙ୍କୁ ଅଧିକ ଭୋଟ ଦେଇଛନ୍ତି ।
ଅନ୍ୟପକ୍ଷେ , କମଳା ହାରିସଙ୍କୁ ସବୁଠୁ ଅଧିକ ୫୪ ପ୍ରତିଶତ ମହିଳା ଭୋଟର ଭୋଟ ଦେଇଛନ୍ତି । ଯାହା ତୁଳନାରେ ୪୪ ପ୍ରତିଶତ ପୁରଷ ଭୋଟର ବି କମଳାଙ୍କୁ ଚୟନ କରିଥିଲେ । ସେହିପରି ଟ୍ରମ୍ପଙ୍କୁ ୫୪ ପ୍ରତିଶତ ପୁରୁଷ ବାଛିଥିବା ବେଳେ ୪୪ ପ୍ରତିଶତ ମହିଳା ଭୋଟ ଦେଇଛନ୍ତି ।
ଯଦି ଶିକ୍ଷା ଅନୁଯାୟୀ ଭୋଟଙ୍କ ତାଲିକା ଦେଖାଯାଏ ତେବେ, କଲେଜ ଡିଗ୍ରୀ ନଥିବା ଲେକଙ୍କ ମଧ୍ୟରେ ହାରିସଙ୍କୁ ୫୭ ପ୍ରତିଶତ ଏବଂ ଟ୍ରମ୍ପଙ୍କୁ ୪୪ ପ୍ରତିଶତ ଲୋକ ଭୋଟ ଦେଇଛନ୍ତି ।
ସୁନ୍ଦରଗଡ଼ରେ ମର୍ମନ୍ତୁଦ ଦୁର୍ଘଟଣା : ଝିଅକୁ ସ୍କୁଲକୁ ଛାଡ଼ିବାକୁ ଯାଉଥିବାବେଳେ ଚଢିଗଲା ଟ୍ରେଲର
ସୁନ୍ଦରଗଡ଼ : ସୁନ୍ଦରଗଡ଼ରେ ମର୍ମନ୍ତୁଦ ଦୁର୍ଘଟଣା। ଝିଅକୁ ସ୍କୁଲକୁ ଛାଡ଼ିବାକୁ ଯାଉଥିବାବେଳେ ଚଢିଗଲା ଟ୍ରେଲର । ପତ୍ନୀ ଓ ଝିଅ ଆଖି ଆଗରେ ଚାଲିଗଲା ବାପାର ଜୀବନ। ସୁନ୍ଦରଗଡ଼ ଟାଉନ ଥାନା ପାରିଜାତ ପାର୍କ ନିକଟ ଛକରେ ଘଟିଛି ମର୍ମନ୍ତୁଦ ସଡ଼କ ଦୁର୍ଘଟଣା । ବାଇକରେ ବାପା ମାଆ ଝିଅକୁ ସ୍କୁଲକୁ ଛାଡ଼ିବାକୁ ଯାଉଥିବା ବେଳେ ଚଢ଼ିଗଲା ଟ୍ରେଲର । ମୃତକ ମହିପାନି ଗାଁର ଯୋଗେଶ୍ବର କାଲୋ ବୋଲି ସୂଚନା ମିଳିଛି। ସୁନ୍ଦରଗଡ଼ ସହରର ଏକ ଘରୋଇ ସ୍କୁଲକୁ ଝିଅ ଛାଡ଼ିବା ପାଇଁ ଯାଉଥିବା ବେଳେ ଏଭଳି ଅଘଟଣ ଘଟିଛି। ଦୁର୍ଘଟଣା ପରେ ଘଟଣାସ୍ଥଳରେ ଉତ୍ତେଜନା ଦେଖାଦେଇଛି।
ଧାରା ୩୭୦କୁ ନେଇ ଜମ୍ମୁ ଓ କାଶ୍ମୀର ବିଧାନସଭାରେ ହାତାହାତି
ଶ୍ରୀନଗର : ଧାରା ୩୭୦କୁ ନେଇ ଜମ୍ମୁ ଓ କାଶ୍ମୀର ବିଧାନସଭାରେ ହାତାହାତି। ସରକାରୀ ଦଳ ଓ ବିରୋଧୀ ଦଳ ବିଧାୟକଙ୍କ ମଧ୍ଯରେ ତୁମୁଳ ହଟ୍ଟଗୋଳ। ଅଧିକାଂଶ ବିଧାୟକ ନିଜ ଆସନରୁ ଉଠିଆସି ଗୃହର ମଧ୍ଯଭାଗରେ ହାତାହାତି ହେବା ସହ ପରସ୍ପରକୁ ଗାଳି କରିବା ଦେଖାଯାଇଛି। ଜମ୍ମୁ ଓ କାଶ୍ମୀରକୁ ସ୍ବତନ୍ତ୍ର ମାନ୍ଯତା ଦେବା ସଂକ୍ରାନ୍ତରେ ନିର୍ବାଚିତ ପ୍ରତିନିଧିଙ୍କ ସହ କେନ୍ଦ୍ର ସରକାର ଆଲୋଚନା କରନ୍ତୁ ବୋଲି ଗତ ୬ ତାରିଖରେ ବିଧାନସଭାରେ ପ୍ରସ୍ତାବ ଗୃହୀତ ହେବା ପରେ ଗୃହରେ ଅଚଳାବସ୍ଥା ସୃଷ୍ଟି ହୋଇଥିଲା। ଏହି ପ୍ରସ୍ତାବ ପ୍ରତ୍ଯାହାର ନହେବା ଯାଏ ଗୃହ କାର୍ଯ୍ୟ ଚଳାଇଦିଆଯିବ ନାହିଁ ବୋଲି ଦାବି କରିଛନ୍ତି ବିଜେପି ବିଧାୟକ। ଏହାକୁ ନେଇ ଦୁଇ ଦିନ ଧରି ଚାଲିଛି ହଟ୍ଟଗୋଳ। ବିଗତ ୨୦୧୯ରେ ଜମ୍ମୁ ଓ କାଶ୍ମୀରରୁ ୩୭୦ ଧାରା ଉଚ୍ଛେଦ ହୋଇଥିଲା। ଏହି ଧାରାକୁ ପୁନଃଲାଗୁ ନିମନ୍ତେ ନ୍ଯାସନାଲ କନଫରେନ୍ସ ଦାବି କରିବା ସହ ମୁଖ୍ଯ ନିର୍ବାଚନ ପ୍ରସଙ୍ଗ କରିଥିଲା।
ଆସନ୍ତା ୧୪ ଓ ୧୫ ଦୁଇଦିନ ଧରି ଢେଙ୍କାନାଳରେ ହେବ ହାତୀ ଗଣନା
ଢେଙ୍କାନାଳ : ପୂର୍ଣ୍ଣିମା ଆଲୋକରେ ହେବ ହାତୀ ଗଣନା। ବନବିଭାଗ ନିଷ୍ପତ୍ତି କ୍ରମେ ଆସନ୍ତା ୧୪ ଓ ୧୫ ଦୁଇଦିନ ଧରି ଢେଙ୍କାନାଳ ଜିଲ୍ଲାରେ ହେବ ହାତୀ ଗଣନା । ଏଥିପାଇଁ ବନବିଭାଗ ପକ୍ଷରୁ ପ୍ରସ୍ତୁତି ଚୂଡାନ୍ତ ପର୍ଯ୍ୟାୟରେ। ହାତୀ ସଂଖ୍ୟାରେ ଶିମିଳିପାଳ ଏକ ନମ୍ୱର୍ ହୋଇଥିବା ବେଳେ ଦ୍ଵିତୀୟ ରେ ରହିଛି ଢେଙ୍କାନାଳ। ହାତୀ ଗଣନା ପାଇଁ ଜିଲାରେ ସମସ୍ତ ୮ଟି ରେଞ୍ଜରେ ରେଞ୍ଜର, ଫରେଷ୍ଟ ଗାର୍ଡ, ଡେପୁଟୀ ରେଞ୍ଜର ଓ ଫରେଷ୍ଟର ଏବଂ ହାତୀ ସ୍କ୍ୱାଡ କର୍ମଚାରୀ, ଟ୍ରାକର ଆଦିଙ୍କୁ ନେଇ ୪୦୦ରୁ ଉଦ୍ଧ୍ୱର୍ ଲୋକଙ୍କୁ ନିୟୋଜିତ କରାଯାଇଛି ।
ସେହିପରି ଗଣନା ସମୟରେ ଫଟୋଗ୍ରାଫର, ବନ୍ୟପ୍ରାଣୀ ଉପରେ କାର୍ଯ୍ୟ କରୁଥିବା ସ୍ୱେଚ୍ଛାସେବୀ ଅନୁଷ୍ଠାନର କର୍ମକର୍ତ୍ତା ଉପସ୍ଥିତ ରହିବେ। ଏଥିପାଇଁ ୪ଟି ନାଇଟି ଭିଜନ ଡ୍ରୋନ ଲଗାଯିବ । ସେହିପରି ବାଇନାକୁଲାର ସହିତ ଲାଇଟ୍ ଏବଂ ଲାଇଟ୍ ଲାଗିଥିବା ସ୍ୱତନ୍ତ୍ର ଗାଡି ମଧ୍ୟ ବ୍ୟବସ୍ଥା ରହିଛି । ଜିଲ୍ଲାରେ ୩୦୦ରୁ ଅଧିକ ହାତୀ ରହିଥିବା ବେଳେ କେବଳ ହିନ୍ଦୋଳ ରେଞ୍ଜ ୨୦୦ ହାତୀ ଥିବା ଜଣାପଡିଛି। ଢେ଼ଙ୍କାନାଳ dfo ଙ୍କ ସହ ଅଧିକ ଆଲୋଚନା କରିଛନ୍ତି ଆମ୍ ପ୍ରତିନିଧି ସତ୍ୟ ସ୍ୱରୂପ ଦାସ।
ହାରିଗଲେ କମଳା ହାରିସ କିନ୍ତୁ ଆମେରିକା ନିର୍ବାଚନରେ ଚମକିଲେ ୬ ଭାରତୀୟ
ୱାଶିଂଟନ: ଆମେରିକାରେ ଆରମ୍ଭ ହୋଇଛି ଟ୍ରମ୍ପ ଯୁଗ । ଭାରତୀୟ ବଂଶୋଦ୍ଭବ କମଳା ହାରିସଙ୍କୁ ଧୂଳି ଚଟାଇଛନ୍ତି ଟ୍ରମ୍ପ । କିନ୍ତୁ ନିର୍ବାଚନରେ ଭାରତୀୟଙ୍କ ଦବ୍ଦବା ଦେଖିବାକୁ ମିଳିଛି । ଚମକିଛନ୍ତି ୬ ଭାରତୀୟ । ଆମେରିକା ନିର୍ବାଚନରେ ଭାରତୀୟ ବଂଶୋଦ୍ଭବଙ୍କ ପତିଆରା ଦେଖିବାକୁ ମିଳିଛି । ୬ ଭାରତୀୟ ପ୍ରାର୍ଥୀ ନିର୍ବାଚନ ଜିତି ସିନେଟ ଯିବେ । ମିଶିଗନରୁ ଶ୍ରୀ ଥାନେଦାର ଏହି ନିର୍ବାଚନରେ ବମ୍ପର ବିଜୟ ଲାଭ କରିଛନ୍ତି । ପେସାରେ ଶ୍ରୀ ଥାନେଦାର କମଳା ହାରିସଙ୍କ ଡେମୋକ୍ରାଟିକ ପାର୍ଟିରୁ ନିର୍ବାଚନ ଜିତିଛନ୍ତି । କିଏ ଏହି ଶ୍ରୀ ଥାନେଦାର ?
କର୍ଣ୍ଣାଟକ ବେଲଗାମର ଶ୍ରୀ ଥାନେଦାର ପିଏଚଡି ପାଇଁ ଆମେରିକା ଯାଇଥିବାବଳେ ସେଠାକାର ବାସିନ୍ଦା ହୋଇଯାଇଥିଲେ । ଆଶ୍ଚର୍ଯ୍ୟର କଥା ହେଉଛି ଯେ ଆମେରିକା ନର୍ବାଚନରେ ଜିତିଥିବା ସମସ୍ତ ଭାରତୀୟ-ଆମେରିକୀୟ ସଦସ୍ୟ ଡେମୋକ୍ରାଟିକ ପାର୍ଟିର ଅଟନ୍ତି । ଶ୍ରୀ ଥାନେଦାରଙ୍କ ବ୍ୟତୀତ କାର୍ଲିଫର୍ଣ୍ଣିଆରୁ ଅମି ବେରା, ରୋ ଖାନ୍ନା, ଇଲିନୋଇସରୁ ରାଜା କୃଷ୍ଣାମୂର୍ତ୍ତି ଓ ୱାଶିଂଟନର ପ୍ରମିଳା ଜୟପାଳ ନିର୍ବାଚନରେ ବିଜୟ ହାସଲ କରିଛନ୍ତି । ଏହା ସହ ଭର୍ଜିନିଆରୁ ହାସ ସୁବ୍ରମଣ୍ୟମ ବି ବିଜୟ ହାସଲ କରିଛନ୍ତି । ରାଜା କୃଷ୍ଣମୂର୍ତ୍ତି ଆମେରିକା ସଂସଦରେ ଚୀନ ସହ ରିପବ୍ଲିକାନ ସଦସ୍ୟଙ୍କ ଚୟନ ସମିତିରେ ରାଙ୍କିଂ ସଦସ୍ୟ ଥିଲେ । ସେହିପରି ଅମି ବେରା ସଦନର ବିଦେଶୀ ମାମଲାରେ ସମିତିର ଇଣ୍ଡୋ ପେସିଫିକ ଉପସମିତିର ସଦସ୍ୟ ରହିଛନ୍ତି । ନିକଟରେ ସେ ଷ୍ଟୁଡିଓ ଡିଭିଜନାଲ କକସ୍ର ସହ ଅଧ୍ୟକ୍ଷ ରହିଛନ୍ତି ।
କୁହାଯାଉଛି ଶ୍ରୀ ଥାନେଦାର ଆମେରିକୀୟ କଂଗ୍ରେସରେ ହିନ୍ଦୁ, ବୌଦ୍ଧ, ଶିଖ ଓ ଜୈନ କକ୍ସର ସ୍ଥାପନା କରିଥିଲେ । ଜୟପାଲ ଲଡ୍ସର ପ୍ରଗତିଶୀଳ କକ୍ସର ସେ ଅଧ୍ୟକ୍ଷ ରହିଆସିଛନ୍ତି । ଏହା ଡେମୋକ୍ରାଟିକ ମେଣ୍ଟ ମଧ୍ୟରେ ସବୁଠାରୁ ଦୁର୍ବଳ ବ୍ଲକରେ ଗୋଟିଏ ଅଟେ । ସେପଟେ ଆଇନ ଓ ଟେକ୍ନିକ୍ ବ୍ୟାକଗ୍ରାଉଣ୍ଡରୁ ଆସିଥିବା ସୁବ୍ରମଣ୍ୟମ ଓବାମା ପ୍ରଶାସନର ଟେକନିକାଲ ନୀତିର ପରାମର୍ଶଦାତା ରୂପେ କାମ କରିସାରିଛନ୍ତି ।