ମେକ୍ସିକୋ : ମେକ୍ସିକୋ ମର୍ମନ୍ତୁଦ ସଡ଼କ ଦୁର୍ଘଟଣା । ମେକ୍ସିକୋ କେନ୍ଦ୍ରୀୟ ରାଜମାର୍ଗରେ ଏହି ଦୁର୍ଘଟଣା ଘଟିଛି । ଟ୍ରାକ୍ଟର-ଟ୍ରଲି ସହ ଯାତ୍ରୀବାହୀ ବସ୍ ଧକ୍କା ହୋଇଥିଲା । ଫଳରେ ଉଭୟ ଗାଡି ଖାଲରେ ପଡିଯାଇଥିଲା । ଫଲରେ ପ୍ରାୟ ୨୪ଜଣଙ୍କ ମୃତ୍ୟୁ ହୋଇଥିବା ବେଳେ ୫ଜଣ ଗୁରୁତର ଭାବେ ଆହତ ହୋଇଛନ୍ତି । ଆହତ ମାନଙ୍କୁ ଉଦ୍ଧାର କରି ନିକଟସ୍ଥ ହସ୍ପିଟାଲରେ ଭର୍ତ୍ତି କରାଯାଇଛି । ଜକାଟେକସ୍ ଗଭର୍ଣ୍ଣରଙ୍କ ସୂଚନା ମୁତାବତ, ଶନିବାର ଏହି ଦୁର୍ଘଟଣା ଘଟିଛି । ମେକ୍ସିକୋର କେନ୍ଦ୍ରୀୟ ଜାତୀୟ ରାଜପଥରେ ଏକ ଯାତ୍ରୀବାହୀ ବସକୁ ମକ୍କା ଭର୍ତ୍ତି ଟ୍ରାକ୍ଟର ପଛକୁ ଧକା ଦେଇଥିଲା । ଖବର ପାଇ ରେସକ୍ୟୁ ଟିମ୍ ଘଟଣାସ୍ଥଳରେ ପହଞ୍ଚି ୫ଗୁରୁତରଙ୍କ ଉଦ୍ଧାର କରି ହସ୍ପିଟାଲରେ ଭର୍ତ୍ତି କରିଛନ୍ତି । ଏହି ଘଟଣାରେ ମୋଟ୍ ୨୪ଜଣଙ୍କ ମୃତ୍ୟୁ ହୋଇଛି । ଡାକ୍ତରଖାନାରେ ଚିକିତ୍ସିତ ହେଉଥିବା ଆହତମାନଙ୍କ ଅବସ୍ଥା ସଙ୍କଟାପନ୍ନ ରହିଛି । ଏହି ବସ୍ ଆମେରିକା-ମେକ୍ସିକୋ ସୀମାରେ ଥିବା ଚିହୁଆହୁଆ ରାଜ୍ୟର ସିୟୁଡାଡ ଜୁଆରେଜକୁ ଯାଉଥିଲା। ଏହି ଦୁର୍ଘଟଣାରେ ପ୍ରାଣ ହରାଇଥିବା ଲୋକମାନେ ମେକ୍ସିକୋର ବାସିନ୍ଦା ଥିଲେ।
ଶିଶୁ କନ୍ୟାକୁ ମାଆର ନିସ୍ତୁକ ମାଡ଼, ମାଆକୁ ଥାନାରେ ଅଟକ ରଖିଛି ପୋଲିସ
ବାଣପୁର : ୧୬ ମାସ ଶିଶୁକୁ ମାଆର ଅମାନୁଷିକ ଅତ୍ୟାଚାରର ଭିଡିଓ ଭାଇରାଲ । ଖୋର୍ଦ୍ଧା ଜିଲ୍ଲା ବାଣପୁର ଥାନା ଭଗବତୀ ସାହିର ଏହି ଘଟଣା ବୋଲି ସୂଚନା ରହିଛି । ଜନ୍ମିତା ମାଆ ଘଟାଇଛି ଏହି କାଣ୍ଡ l ମାଆ ହୋଇ ୧୬ ମାସର ଶିଶୁ କନ୍ୟାକୁ ନିସ୍ତୁକ ମାଡ଼ ମାରୁଥିବା ଦେଖିବାକୁ ମିଳିଛି l ଶିଶୁକୁ ମାଡ଼ ମାରିବାର ଭିଡିଓ କରି ଓଡ଼ିଶା ବାହାରେ ରହୁଥିବା ସ୍ୱାମୀ ପାଖକୁ ପଠାଇଛି ସ୍ତ୍ରୀ । ମହିଳା ଜଣକ ଗମ୍ଭାରୀମୁଣ୍ଡା ନିକଟସ୍ଥ ହରିଚନ୍ଦନପୁର ଗାଁର ପ୍ରମୋଦ ନାୟକଙ୍କ ସ୍ତ୍ରୀ ବନିତା ନାୟକ l ପ୍ରମୋଦ କେରଳରେ କାମ କରୁଥିବା ବେଳେ ସ୍ତ୍ରୀ ଘର ଛାଡି ବାଣପୁରର ଭଗବତୀ ସାହିରେ ଭଡାଘରେ ରହୁଥିବା ପରିବାର ଲୋକେ ଅଭିଯୋଗ କହିଛନ୍ତି l କୌଣସି କାରଣ ନେଇ ସେଠାରେ ୧୬ମାସର ଶିଶୁକୁ ତଣ୍ଟି ଚିପି ବେକରେ ଗୋଡ ଥୋଇ ମାଡ଼ ମାରିଛି ସ୍ତ୍ରୀ । ଅସହ୍ୟ ମରଣାତ୍ମକ ଆକ୍ରମଣ କରିଵା ସହ ସ୍ୱାମୀ ପାଖକୁ ପଠାଇଛି ଭିଡିଓ l ଏନେଇ ଛୁଆର ବାପ ତାଙ୍କ ପରିବାରକୁ ଜଣାଇବା ପରେ ଛୁଆକୁ ସୁରକ୍ଷା ଦେବା ପାଇଁ ବଡ଼ବାପା ମାଧବ ନାୟକ ଓ ପରିବାରର ସମସ୍ତ ଲୋକ ବାଣପୁର ଥାନାରେ ଅଭିଯୋଗ କରିଛନ୍ତି l ବାଣପୁର ପୋଲିସ ଅଭିଯୋଗ ପାଇ ଶିଶୁ କନ୍ୟା ସ୍ମୁତି ନାୟକକୁ ଉଦ୍ଧାର କରିବା ସହ ମାଆ ବନିତା ନାୟକକୁ ଥାନାରେ ଅଟକ ରଖି ପଚରା ଉଚରା କରୁଛି l
ବାତ୍ୟା ପରେ ବଢିଲା ଦୁଃଖ । ମୁଣ୍ଡରୁ ଉଡାଇ ନେଲା ଛପର, ଚାଷ ଜମିରେ ଲୋଟିଛି ଫସଲ
ଭୁବନେଶ୍ବର : ବାତ୍ୟା ଦାନା ଦେଇଯାଇଛି ଅସୁମାରୀ ଦୁଃଖ । ମୁଣ୍ଡରୁ ଉଡାଇ ନେଇଛି ଛପର । ବର୍ଷକର ଦାନାରେ ଭରିଦେଇଛି ପାଣି । ବାଲେଶ୍ବରରୁ ଭଦ୍ରକ, କେନ୍ଦ୍ରାପଡାରୁ କେନ୍ଦୁଝର ସବୁଠି ବାତ୍ୟା ଜନିତ ବର୍ଷା ବିତ୍ପାତ । ମୟୂରଭଞ୍ଜରେ ବି ମାଡି ଯାଇଛି ବର୍ଷା ପାଣି । ବାଲେଶ୍ବର ରେମୁଣା ବ୍ଲକରେ ଶହ ଶହ ଏକର ଚାଷ ଜମିରେ ଲୋଟିଛି ସୁନାର ଫସଲ । ପରିବା କ୍ଷେତରେ ୬ ଫୁଟ ଉଚ୍ଚର ପାଣି । ବାତ୍ୟା ଓ ବନ୍ୟା ଯୋଗୁ ଜିଲ୍ଲାର ୩ ହଜାର ୧୪୦ ହେକ୍ଟର ଚାଷଜମି ପ୍ରଭାବିତ ହୋଇଛି । ଭୋଗରାଇ, ଜଳେଶ୍ବର ଓ ନୀଳଗିରି ବ୍ଲକରେ ବି ସମାନ ପରିସ୍ଥିତି ଦେଖିବାକୁ ମିଳିଛି । ସେପଟେ କାଂଶବାଂଶ ନଦୀର ଜଲସ୍ତର ବଢ଼ି ଅନେକ ଗାଁକୁ ପାଣି ପଶୁଥିବା ଦେଖିବାକୁ ମିଳିଛି । ଗଣ୍ଡିବେଡ଼ ମାର୍କୋଣା ଆନନ୍ଦପୁର ନିକଟରେ ରାସ୍ତା ଉପରେ ଚାଲିଛି ପାଣି। ଯାତାୟତ ଏକ ପ୍ରକାର ଠପ ହୋଇ ଯାଇଛି । ଖଇରା ଏବଂ ଔପଦା ବ୍ଲକର ଅନେକ ଲୋକ ପ୍ରଭାବିତ ହୋଇଛନ୍ତି l ବାଉରିପଦାର ଲୋକେ ବାତ୍ୟା ଆଶ୍ରୟସ୍ଥଳୀରେ ଦୁର୍ଦ୍ଦିନରେ ଦିନ କାଟୁଛନ୍ତି । ବାତ୍ୟା ଯୋଗୁ ଭଦ୍ରକ ଜିଲ୍ଲା ଆରଡ଼ି, ଧାମନଗର, ବାସୁଦେବପୁର ଓ ଚାନ୍ଦବାଲି ଆଦି ଅଞ୍ଚଳରେ ବଢ଼ିଛି ଲୋକଙ୍କ ଦୁର୍ଦ୍ଦଶା। ଭାଙ୍ଗିଯାଇଛି ଘର, ଉଜୁଡିଯାଇଛି ସୁନାର ଫସଲ । ବର୍ଷଯାକର ପେଟପାଟଣା ଚିନ୍ତାରେ ଏବେ ଚାଷୀ । ବାସୁଦେବପୁର ବ୍ଲକର ଦାନା ତାଣ୍ଡପ ରଚିଛି । କେଉଁଠି ଘରର ଚାଳ ଛପର ଉଡିଯାଇଛି ତ କେଉଁଠି ଆଜବେଷ୍ଟ ଘର ଭାଙ୍ଗିଯାଇଛି । ଘର ଭାଙ୍ଗି ଯିବା ପରେ ବେସାହାରା ହୋଇଛନ୍ତି ପରିବାର । ଅନ୍ୟର ସାହାଯ୍ୟ ଓ ସହଯୋଗ ଅପେକ୍ଷା କରିଛନ୍ତି ବିପନ୍ନ । ଯାଜପୁର ବିଞ୍ଝାରପୁରରେ ବି ସୀମା ଲଂଘିଛି ଚାଷୀଙ୍କ ଦୁର୍ଦ୍ଦଶା । ବାତ୍ୟାରେ କ୍ଷତିଗ୍ରସ୍ତ ହୋଇଛି ସମ୍ପୂର୍ଣ୍ଣ ଧାନ ଫସଲ। ହେଲେ ଏପର୍ଯ୍ୟନ୍ତ ପ୍ରଶାସନିକ ଅଧିକାରୀ ଚାଷୀଙ୍କ ନିକଟରେ ପହଞ୍ଚିନଥିବା ଅଭିଯୋଗ ହୋଇଛି । ବଡ଼ଚଣା ବ୍ଲକରେ ବି ଏକର ଏକର ବିରି ଫସଲ ସହ ପନିପରିବା ଚାଷ ପ୍ରଭାବିତ ହୋଇଛି। କେନ୍ଦୁଝର ଜିଲ୍ଲାର ଭାତହାଣ୍ଡି କୁହାଯାଉଥିବା ହାଟଡ଼ିହି ବ୍ଲକରେ ଶହ ଶହ ହେକ୍ଟର ଜମିରେ ଧାନ ଚାଷ କ୍ଷତିଗ୍ରସ୍ତ ହୋଇଛି । ବୁଢ଼ାବଳଙ୍ଗ ନଦୀର ଜଳସ୍ତରକୁ ଲକ୍ଷ କରି ବାରିପଦା ସହରର ତଳି ଅଂଚଳରେ ରହୁଥିବା ଲୋକମାନଙ୍କୁ ଆଶ୍ରୟସ୍ଥଳୀକୁ ଅଣାଯାଇଛି। ଜିଲ୍ଲା ପ୍ରଶାସନ ଏଵଂ ବାରିପଦା ପୌରପରିଷଦ ଅଧିକାରୀ ମାନେ ପରିସ୍ଥିତି ଉପରେ ନଜର ରଖିଛନ୍ତି ।
ରାଜ୍ୟର ଆର୍ଥିକ ସ୍ବାୟତ୍ତତା ହ୍ରାସ କରିବାକୁ କେନ୍ଦ୍ର କରୁଛି ଷଡଯନ୍ତ୍ର !
ଭୁବନେଶ୍ବର: ରାଜ୍ୟଗୁଡିକୁ ଦୁର୍ବଳ କରିବାକୁ କେନ୍ଦ କରୁଛି ଷଡଯନ୍ତ୍ର । ୨୦୨୬ ମାର୍ଚ୍ଚ ପରେ ସେସ୍ ଟିକସକୁ ଜିଏସଟିରେ ମିଶ୍ରଣ କରିବାକୁ ଚାଲିଛି ମସୁଧା । ଏ ନେଇ କେନ୍ଦ୍ର ଅର୍ଥ ରାଷ୍ଟ୍ରମନ୍ତ୍ରୀଙ୍କ ଅଧ୍ୟକ୍ଷତାରେ ମନ୍ତ୍ରିସ୍ତରୀୟ ଗୋଷ୍ଠୀ ବୈଠକ ଅନୁଷ୍ଠିତ ହୋଇଗଲାଣି । ଏପରି କରିବା ଫଳରେ ଆର୍ଥିକ କ୍ଷେତ୍ରରେ ଦୁର୍ବଳ ରାଜ୍ୟ ବେଶୀ କ୍ଷତିଗ୍ରସ୍ତ ହେବେ । ସେପଟେ ଜିଏସଟି ସ୍ଲାବରେ ପରିବର୍ତ୍ତନ ହେଲେ ସାଧାରଣ ଲୋକଙ୍କ ଉପରେ ଅଧିକ ଟିକସ ବୋଝ ପଡ଼ିବା ନେଇ ଆଶଙ୍କା ପ୍ରକାଶ ପାଇଛି । ଏବେ ଦାବି ଉଠିଛି ସେସ୍ ଟିକସକୁ ପୂର୍ବ ପରି ଚାଲୁ ରଖାଯାଉ । ନଚେତ୍ ସେସ୍ ଆଦାୟ କ୍ଷମତା ରାଜ୍ୟକୁ ଦିଆଯାଉ ।
ରାଜ୍ୟକୁ ଦୁର୍ବଳ କରିବା ମୁଡରେ ରହିଛି କେନ୍ଦ୍ର । ରାଜ୍ୟର ଆର୍ଥିକ ସ୍ବାୟତ୍ତତାକୁ ସଂକୁଚିତ କରିବାକୁ କରୁଛି ମସୁଧା । ୨୦୨୬ ମାର୍ଚ୍ଚ ପରେ ସେସ୍ ଟିକସକୁ ଜିଏସଟି ସହିତ ମିଶ୍ରଣ କରିବାକୁ ମନ୍ତ୍ରିସ୍ତରୀୟ ଗୋଷ୍ଠୀରେ ଚାଲିଛି ମନ୍ତ୍ରଣା । କେନ୍ଦ୍ର ଅର୍ଥ ରାଷ୍ଟ୍ରମନ୍ତ୍ରୀଙ୍କ ଅଧ୍ୟକ୍ଷତାରେ ଦୁଇଟି ବୈଠକ ଅନୁଷ୍ଠିତ ହେଲାଣି । ଜିଏସଟି ସହିତ ମିଶିଲେ କେନ୍ଦ୍ର ସେସ୍ ଅର୍ଥରୁ ଅଧା ମାରି ନେଇଯିବ । ଅଧା ଅର୍ଥ ରାଜ୍ୟ ହରାଇବ । ମଦ, ସିଗାରେଟ୍, ଟବାକୋ, ଟବାକୋ ଉତ୍ପାଦ, ଲମ୍ବା ଲକଜରି କାର୍ ଓ କୋଇଲା ଉପରେ କେନ୍ଦ୍ର ସରକାର ଲକ୍ଷାଧିକ କୋଟି ସେସ୍ ଆଦାୟ କରୁଛନ୍ତି । ବ୍ୟବସ୍ଥା ହେଲା ରାଜ୍ଯକୁ ୫ ବର୍ଷ କ୍ଷତିପୂରଣ ଅବଧି ସରିବା ପରେ ଯେଉଁ ରାଜ୍ୟରେ ଏହିସବୁ ଜିନିଷ ବ୍ୟବହାର ହେବ ସେହି ରାଜ୍ୟକୁ କ୍ଷତିପୂରଣ ବାବଦରେ ଋଣ ଆକାରରେ ପ୍ରଦାନ କରାଯିବ । ଏଥିପାଇଁ ସେସ୍ ଆଦାୟ ସୀମାକୁ ୨୦୨୬ ମାର୍ଚ୍ଚ ପର୍ଯ୍ୟନ୍ତ ସଂପ୍ରାସାରଣ କରାଗଲା । ଏବେ ଏହି ଅର୍ଥକୁ ନିଜ ଟ୍ରେଜେରିକୁ ନେବାକୁ କେନ୍ଦ୍ର କରୁଛି ଚାଲ୍ । ଏହାସହ ଜିଏସଟି ସ୍ଲାବରେ ପରିବର୍ତ୍ତନ କରି ଉଚ୍ଚ ଟିକସ ବସାଇବାକୁ ମଧ୍ୟ କେନ୍ଦ୍ର ଯୋଜନା କରୁଥିବା ଅଭିଯୋଗ ହୋଇଛି । ଦାବି ଉଠିଛି ପୂର୍ବ ପରି ଏହିସବୁ ଜିନିଷ ଉପରେ କେନ୍ଦ୍ର ସେସ୍ ବ୍ୟବସ୍ଥା ଜାରି ରଖୁ । ନଚେତ୍ ରାଜ୍ୟକୁ ଏହି ସେସ୍ ଆଦାୟ କରିବାର କ୍ଷମତା ସମ୍ପୂର୍ଣ୍ଣ କେନ୍ଦ୍ର ପ୍ରଦାନ କରୁ । ତା’ହେଲେ ଦୁର୍ବଳ ଆର୍ଥିକ ସ୍ଥିତିରେ ଥିବା କେତେକ ରାଜ୍ୟର ଆର୍ଥିକ ସ୍ଥିତି ସୁଧୁରି ପାରିବ ।
ଅର୍ଥ ବିଶେଷଜ୍ଞ ବି କେନ୍ଦ୍ର ସରକାରଙ୍କ ଏପରି ବିଚାରକୁ ସମାଲୋଚନା କରିଛନ୍ତି । ସେସ୍ ଅର୍ଥ ନିର୍ଦ୍ଦିଷ୍ଟ ସମୟ ଓ ଗୋଟିଏ ନିର୍ଦ୍ଦିଷ୍ଟ ଉଦ୍ଦେଶ୍ୟ ପାଇଁ ଲାଗୁ ହୋଇଥାଏ । ଆଦାୟ ହେଉଥିବା ଅର୍ଥ ସେସ୍ ପୁଲରେ ଜମା ହୋଇଥାଏ । ସେଥିରୁ ରାଜ୍ୟକୁ କିଛି ଅର୍ଥ କେନ୍ଦ୍ର ଦେଇଥାଏ । ଓଡ଼ିଶାର କେନ୍ଦୁପତ୍ର ଉପରୁ ଜିଏସଟି ସମ୍ପୂର୍ଣ୍ଣ ଛାଡ଼ କରିବାକୁ ଦାବି ହୋଇଆସୁଥିଲେ ବି କେନ୍ଦ୍ର ଶୁଣୁନି । ଏହାସହ ଓଡ଼ିଶାର କୋଇଲାରୁ କେନ୍ଦ୍ରୀୟ କମ୍ପାନୀ ଓ କେନ୍ଦ୍ର ସରକାର ସେସ୍ ଆଦାୟ କରି ମାଲାମାଲ୍ ହେଉଛନ୍ତି । କିନ୍ତୁ ଏହାର ସିଂହଭାଗ ଓଡ଼ିଶାକୁ ମିଳୁନି ।
ପୂର୍ବ ବିଜେଡି ସରକାର କେନ୍ଦ୍ର ଆଦାୟ କରୁଥିବା ସେସ୍ ଅର୍ଥର ସିଂହଭାଗ ରାଜ୍ୟକୁ ଦେବାକୁ ବାରମ୍ବାର କେନ୍ଦ୍ର ପାଖରେ ଦାବି କରିଆସୁଥିଲେ । ଏବେ ସମୟ ଆସିଛି ପେଟ୍ରୋଲ, ଡିଜେଲଠାରୁ ଆରମ୍ଭ କରି ସିନ୍, ଡିମେରିଟ୍ ଓ ଲକଜରି ସାମଗ୍ରୀ ଉପରୁ କେନ୍ଦ୍ର ଆଦାୟ କରୁଥିବା ସେସ୍ ଅର୍ଥ ବିଗତ ୧୦ ବର୍ଷ ଭିତରେ କେଉଁ ରାଜ୍ୟକୁ କେତେ ମିଳିଛି ଓ ଭିତ୍ତିଭୂମି ନିର୍ମାଣ ବାବଦରେ କେତେ ଖର୍ଚ୍ଚ ହୋଇଛି ତାର ହିସାବ ବିରୋଧୀ କେନ୍ଦ୍ରକୁ ମାଗିବା ଦରକାର ବୋଲି ଦାବି ଉଠିଛି ।
ପଦାରେ ପଡ଼ିଲା କୋଟିଆ ପ୍ରସଙ୍ଗରେ ମୋହନ ସରକାରଙ୍କ ଆନ୍ତରିକତା
ଭୁବନେଶ୍ବର: କୋଟିଆ ପ୍ରସଙ୍ଗରେ ଓଡ଼ିଶାର ବିଜେପି ସରକାରଙ୍କ ଆନ୍ତରିକତା କେତେ ତାହା ପଦାରେ ପଡିଛି । ଗୋଟିଏ ପଟେ ଡବଲ ଇଞ୍ଜିନ ସରକାରର କଥା କହୁଥିବା ବିଜେପି ଆନ୍ଧ୍ରର ମନମାନି ସତ୍ତ୍ୱେ ମଧ୍ୟ ଓଡ଼ିଶାର ସ୍ୱାର୍ଥ ରକ୍ଷା ପାଇଁ ପାଟି ଫିଟାଉ ନାହାଁନ୍ତି । ସେପଟେ ଆଇନଗତ ଲଢେଇରେ ସୁପ୍ରିମକୋର୍ଟରେ କୋଟିଆ ମାମଲାର ଶୁଣାଣି ବେଳେ ଓଡ଼ିଶାର କେହି ବି ଉପସ୍ଥିତ ନ ଥିବା ଦେଖିବାକୁ ମିଳିଛି । ଯାହାକୁ ନେଇ କୋଟିଆ ପ୍ରସଙ୍ଗରେ ରାଜ୍ୟ ସରକାରଙ୍କ ଆଭିମୁଖ୍ଯକୁ ନେଇ ପ୍ରଶ୍ନ ଉଠାଇଛନ୍ତି ଉତ୍କଳ ସମ୍ମିଳନୀ ସମେତ ଅନ୍ୟାନ୍ୟ ଜନ ସଂଗଠନ ।
କୋଟିଆ ଦଖଲ ପାଇଁ ଆନ୍ଧ୍ର ନିଜର ସବୁ ଶକ୍ତି ଲଗାଇ ଦେଇଛି । ବିଭିନ୍ନ ମାଧ୍ୟମରେ ଚକ୍ରାନ୍ତ କରି କୋଟିଆ ଲୋକଙ୍କୁ ନିଜ ଆଡକୁ ଆକର୍ଷିତ କରିବାକୁ ଲଗାତର ଉଦ୍ୟମ ଜାରି ରଖିଛି । ଓଡିଶାର ବିଜେପି ସରକାର କିନ୍ତୁ ଏ ନେଇ ଆଦୌ ଚିନ୍ତିତ ନ ଥିବା ଦେଖିବାକୁ ମିଳୁଛି । କୋଟିଆ ମାମଲାରେ ସୁପ୍ରିମକୋର୍ଟରେ ଓଡିଶା ସରକାରଙ୍କ ଅରିଜିନାଲ ସୁଟ ସଂଶୋଧନ ଆବେଦନ ଉପରେ ଶୁଣାଣି ସମୟରେ ଖୋଦ ଓଡିଶା ପକ୍ଷରୁ କୌଣସି ପ୍ରତିନିଧି ଉପସ୍ଥିତ ନଥିଲେ । ଏହାକୁ ନେଇ ସାଧାରଣରେ ପ୍ରଶ୍ନ ଉଠିଛି । ସରକାରଙ୍କର ଏହା ଏକ ବଡ଼ ଭୁଲ ବୋଲି କହିଛି ଉତ୍କଳ ସମ୍ମିଳନୀ । ଓଡିଶାର ତତ୍କାଳୀନ ସରକାର ୨୦୨୩ ରେ ସମ୍ବିଧାନର ୧୩୧ ଧାରା ଉଚ୍ଛେଦ ପାଇଁ ଆବେଦନ କରିଥିଲେ । ତେଣୁ ଏହି ଉଦ୍ୟମ ବେଳେ ଓଡ଼ିଶା ସରକାରଙ୍କ ପ୍ରତିନିଧି ଭାବେ କେହି ଉପସ୍ଥିତ ହେବା ନିହାତି ଆବଶ୍ୟକ ବୋଲି କହିଛି ଉତ୍କଳ ସମ୍ମିଳନୀ । ଏ ସମ୍ପର୍କରେ ମୁଖ୍ୟମନ୍ତ୍ରୀଙ୍କୁ ଭେଟି ଆଲୋଚନା କରିବାକୁ ନିଷ୍ପତ୍ତି ନେଇଛି ଉତ୍କଳ ସମ୍ମିଳନୀ । କୋଟିଆ ଶୁଣାଣି ବେଳେ ଓଡ଼ିଶାର ପ୍ରତିନିଧି ଉପସ୍ଥିତ ନ ରହିବାକୁ ଦୁର୍ଭାଗ୍ୟଜନକ ବୋଲି କହିଛି ଓଡ଼ିଆ ଅସ୍ମିତା ପରିଷଦ । ଆମ ଶରୀରରୁ ହାତ କାଟିଦେବା ଯାହା ଆନ୍ଧ୍ର ହାତକୁ କୋଟିଆକୁ ଟେକି ଦେବା ସେୟା ବୋଲି କହିଛି ପରିଷଦ ।
ଆଇନଗତ ଲଢେଇ ବେଳେ ଓକିଲ ରହୁ ନାହାଁନ୍ତି । ଏହାଦ୍ବାରା ମୋହନ ସରକାର କୋଟିଆ ପ୍ରସଙ୍ଗରେ କେତେ ଯତ୍ନବାନ ତାହା ଜଣାପଡିଯାଇଛି ବୋଲି କହିଛି ଓଡିଶା ବିକାଶ ପରିଷଦ । ବିଜେପି ସରକାର ଯେତିକି ତତ୍ପର ହେବା କଥା ତାହା ନହୋଇ କେବଳ ଉପର ଠାଉରିଆ ମନ୍ତବ୍ୟ ଦେବାରେ ବ୍ୟସ୍ତ । ତୁରନ୍ତ ଏ ପ୍ରସଙ୍ଗରେ ଧ୍ୟାନ ନ ଦେଲେ ଓଡ଼ିଶାବାସୀ କ୍ଷମା ଦେବେନି ବୋଲି ଚେତାଇ ଦେଇଛି ପରିଷଦ । ଏହାକୁ ରାଜ୍ଯ ସରକାର ଅଣଦେଖା ନ କରିବାକୁ ଦାବି କରିଛି । ସେପଟେ ଆଇନଜୀବୀଙ୍କ କହିବା କଥା ଏଭଳି ସମ୍ବେଦନଶୀଳ ଘଟଣାର ଶୁଣାଣି ବେଳେ ଆଇନଜୀବୀ ଉପସ୍ଥିତ ନ ରହିଲେ ବି କୌଣସି ପ୍ରତିନିଧି ଉପସ୍ଥିତ ରହିବା କଥା । ରାଜ୍ୟ ସରକାର କୌଣସି ଆବଶ୍ୟକ ଦସ୍ତାବିଜ ଦେଇ ନଥିବେ । ସେଥିପାଇଁ ଅସୁବିଧା ହୋଇଥାଇ ପାରେ ।
କୋଟିଆରେ ଆନ୍ଧ୍ର ସରକାରଙ୍କ ପକ୍ଷରୁ ବିଭିନ୍ନ ଯୋଜନାରେ କାର୍ଡ ଦିଆଯିବା ସହ ନିର୍ବାଚନ କରାଯିବା ଓ ଅନ୍ୟାନ୍ୟ ମନଇଚ୍ଛା ନିର୍ମାଣ କରାଯାଉଛି । ତେଣୁ ଏଭଳି ସ୍ଥିତିରେ ରାଜ୍ୟର ବିଜେପି ସରକାର ଏସବୁକୁ ଅଣଦେଖା କରିବା କୋଟିଆକୁ ସଂକଟରେ ପକାଇଥିବା ଚର୍ଚ୍ଚା ହେଉଛି ।
ବାତ୍ୟା ‘ଦାନା’କୁ ନେଇ ସରକାରଙ୍କୁ ପଞ୍ଚାନନଙ୍କ ତାତ୍ସଲ୍ୟ
ଭୁବନେଶ୍ବର: ବାତ୍ୟା ‘ଦାନା’କୁ ନେଇ ରାଜ୍ୟ ସରକାରଙ୍କୁ ପୂର୍ବତନ ମନ୍ତ୍ରୀ ତଥା ବରିଷ୍ଠ କଂଗ୍ରେସ ନେତା ପଞ୍ଚାନନ କାନୁନଗୋଙ୍କ ତାତ୍ସଲ୍ୟ । ଅଭିଯୋଗ କରିଛନ୍ତି, ବାତ୍ୟା ନେଇ ଲୋକଙ୍କୁ ଆତଙ୍କିତ କଲେ ରାଜ୍ୟ ସରକାର । ପୂର୍ବରୁ ଓଡ଼ିଶା କେତେ ଭୟଙ୍କର ବାତ୍ୟାକୁ ସଫଳତାର ସହ ମୁକାବିଲା କରିଆସିଛି । ମହାବାତ୍ୟା ପରେ ଫାଇଲିନ୍, ହୁଡହୁଡ୍, ୟସ୍, ଫନି ଓ ଅମ୍ଫାନ୍ ଭଳି ବାତ୍ୟାରେ ଘଣ୍ଟା ପ୍ରତି ପ୍ରାୟ ୨୦୦ କି.ମି. ପବନ ବହିଥିଲା । ରାଜ୍ୟରେ ପୂର୍ବ ସରକାର ସମୟରେ ଦୁର୍ବିପାକ ମୁକାବିଲା ନେଇ ବଳିଷ୍ଠ ଭିତ୍ତିଭୂମି ପ୍ରସ୍ତୁତ ହୋଇଥିଲା । ଏବର ଡବଲ ଇଞ୍ଜିନ ସରକାର ନିଜର ବଡ଼ିମା ଦେଖାଇଛନ୍ତି ।
ସରକାର ଗତ ସପ୍ତାହେ ତଳୁ ଏହି ବାତ୍ୟାକୁ ନେଇ ଏପରି ବଢ଼େଇ ଚଢ଼େଇ ପ୍ରଚାର କଲେ, ଲାଗିଲା ଯେ ପୁଣି ଥରେ ଯେପରି ମହାବାତ୍ୟା ପରି ସ୍ଥିତି ସୃଷ୍ଟି ହେବ । ପ୍ରଥମେ କହିଲେ ୧୪ ଜିଲ୍ଲା ପ୍ରଭାବିତ ହେବ । ପରେ ଏହାକୁ ବଦଳାଇ ୧୧ ଓ ୯ ଜିଲ୍ଲା ପ୍ରଭାବିତ ହେବ ବୋଲି ପ୍ରଚାର କଲେ । ବାସ୍ତବରେ ହେଲା ବେଳକୁ ୩ ଜିଲ୍ଲା ପ୍ରଭାବିତ ହେଲା ।
ବାତ୍ୟା ନହେଲା ପୂର୍ବରୁ ସରକାର ୪ ଲକ୍ଷ ଲୋକଙ୍କୁ ସ୍ଥାନାନ୍ତର କରିଥିବା ପ୍ରଚାର କଲେ । ଏବେ କହୁଛନ୍ତି ୮ ଲକ୍ଷ ଲୋକ ସ୍ଥାନାନ୍ତର ହୋଇଛନ୍ତି । ସରକାରଙ୍କ ଘନ ଘନ ପ୍ରଚାର ଯୋଗୁଁ ବାତ୍ୟା ପ୍ରଭାବ ପକାଉ ନଥିବା ଅଞ୍ଚଳର ଲୋକେ ବିକଳରେ ଚଢ଼ା ଦାମରେ ଜିନିଷ କିଣି ହଇରାଣ ହରକତ ହେଲେ । ଏଥିରେ କେବଳ ବେପାରୀ ଗୋଷ୍ଠୀଙ୍କର ଫାଇଦା ହେଲା ବୋଲି ସେ କହିଛନ୍ତି ।
ବାତ୍ୟା ମୁକାବିଲାରେ ଓଡ଼ିଶା ମଡେଲ ଓ ନବୀନଙ୍କ ଦୂରଦୃଷ୍ଟିକୁ ସୁମିତ ଅଓ୍ବସ୍ତିଙ୍କ ପ୍ରଶଂସା
ଭୁବନେଶ୍ବର: ବାତ୍ଯା ମୁକାବିଲାରେ ଓଡ଼ିଶା ମଡେଲକୁ ପୁଣି ପ୍ରଶଂସା । ବିଶିଷ୍ଟ ସାମ୍ବାଦିକ ତଥା ଉପସ୍ଥାପକ ସୁମିତ ଅୱସ୍ତି ବାତ୍ଯା ମୁକାବିଲା ନେଇ ପୂର୍ବତନ ମୁଖ୍ଯମନ୍ତ୍ରୀ ନବୀନ ପଟ୍ଟନାୟକଙ୍କ ମଡେଲକୁ କରିଛନ୍ତି ଭୂୟସୀ ପ୍ରଶଂସା । ଭୟଙ୍କର ଓ ଅତ୍ୟଧିକ ଭୟଙ୍କର ବାତ୍ଯାର ମୁକାବିଲାରେ ନବୀନଙ୍କ ଦୂରଦୃଷ୍ଟି ବେଶ୍ ଉପାଦେୟ ହୋଇଛି ବୋଲି କହିଛନ୍ତି ସୁମିତ ।
ସେ କହିଛନ୍ତି, ବାତ୍ଯା ସଂକଟ ବେଳେ କିପରି ଏହାର ମୁକାବିଲା କରାଯାଇପାରିବ ସେ ନେଇ ନବୀନଙ୍କ ଭିଜନ ଆଜି ବାଟ ଦେଖାଇଛି । ପ୍ରଥମେ ଭବିଷ୍ଯତ ବାଣୀ, ପରେ ବାତ୍ଯାର ମାର୍ଗ ଓ ତୀବ୍ରତା ଟ୍ରାକ କରିବା, ପ୍ରଭାବିତ ହେବାକୁ ଥିବା ଅଞ୍ଚଳରୁ ଲୋକଙ୍କୁ ସ୍ଥାନାନ୍ତର କରିବା, ସେମାନଙ୍କୁ ସ୍ଥାୟୀ ଓ ମଜଭୁତ ଆଶ୍ରୟ ସ୍ଥଳରେ ଥଇଥାନ କରିବା ସହ ଖାଦ୍ଯପେୟ, ଔଷଧ ଇତ୍ଯାଦିର ବ୍ଯବସ୍ଥା କରିବା କେବଳ ନବୀନଙ୍କ ଦୂରଦୃଷ୍ଟିର ପରିଣାମ ବୋଲି କହିଛନ୍ତି ସୁମିତ । ଏସବୁ ସଠିକ୍ ଯୋଜନା, ସଠିକ୍ ଟିମ ୱାର୍କର ଫଳ ବୋଲି ସେ କହିଛନ୍ତି।
ବାତ୍ୟା ପରିଚାଳନା ବାହାବା ନେବାକୁ ବ୍ୟସ୍ତ ରାଜ୍ୟ ସରକାରଙ୍କ ମୁଖା ଖୋଲିଲା ବିଜେଡି
ଭୁବନେଶ୍ବର: ବାତ୍ୟା ପରିଚାଳନାର ବାହାବା ନେବାରେ ବ୍ୟସ୍ତ ରାଜ୍ୟ ସରକାରଙ୍କ ମୁଖା ଖୋଲି ଦେଇଛି ବିଜେଡି । ଲୋକଙ୍କ ପାଖରେ ନା ପହଞ୍ଚିଛି ରିଲିଫ ନା ମିଳିଛି ସହାୟତା । ବାତ୍ୟାର ଆକାର ବି ଛୋଟ ଥିଲେ ବି ଏହାକୁ ବଡ଼ ଦେଖାଇ ଶ୍ରେୟ ନେବାକୁ ରାଜ୍ୟ ସରକାର ଚେଷ୍ଟା କରିଥିବା ଦଳ କରିଛି ଅଭିଯୋଗ । ପ୍ରାକୃତିକ ବିପର୍ଯ୍ୟୟ ପରିଚାଳନାର ରୋଲ ମଡେଲ ନବୀନ ପଟ୍ଟନାୟକଙ୍କ ସହ ନିଜକୁ ତୁଳନା କରି କାମ କରିବାକୁ ଚେଷ୍ଟା କରି ଫେଲ ମାରିଥିବା ମୋହନ ସରକାର ହେଉଛନ୍ତି ଲୋକହସା । ବାତ୍ୟା ସହାୟତା, ସ୍ଥାନାନ୍ତର ପରି ପ୍ରସଙ୍ଗରେ ରାଜ୍ୟ ସରକାରଙ୍କଠାରୁ ଶ୍ବେତପତ୍ର ଦାବି କରିଛି ବିଜେଡି ।
ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପ୍ରାକୃତିକ ବିପର୍ଯ୍ୟୟ ମୁକାବିଲାରେ ସାରା ବିଶ୍ବରେ ସୁନାମ ଅର୍ଜନ କରିଛନ୍ତି । ଖାସ କରି ନବୀନଙ୍କ ଜିରୋ କାଜୁଆଲଟି ନୀତି ସଫଳ ପରିଚାଳନାର ଉଦାହରଣ ପାଲଟିଛି । ବର୍ତ୍ତମାନର ସରକାର ‘ଦାନା’ ବାତ୍ୟାରେ ଜିରୋ କାଜୁଆଲଟି ଦାବି କରୁଛି । ହେଲେ କେନ୍ଦ୍ରାପଡ଼ା ରାଜନଗରରେ ୩ ଜଣ ଓ କେନ୍ଦୁଝର ଟାମ୍ପଲାରେ ଜଣଙ୍କ ମୃତ୍ୟୁ ହୋଇଛି । ରାଜ୍ୟ ସରକାରଙ୍କ ବାତ୍ୟା ପରିଚାଳନା ବିଫଳତାକୁ ଲୋକଲୋଚନକୁ ଆଣିଛି ବିଜେଡି । ୧୫ ଦିନରୁ ଅଧିକ ହେଲା ବାତ୍ଯା ସମ୍ପର୍କରେ ସୂଚନା ସତ୍ତ୍ବେ ସରକାର ମୁକାବିଲା ପ୍ରସ୍ତୁତି କରିପାରିଲେ ନାହିଁ । ଯେଉଁଥି ପାଇଁ ସରକାର ଲୋକହସାର ପାତ୍ର ହୋଇଛନ୍ତି ।
୨୪ ବର୍ଷରେ ନବୀନ ଅନେକ ଭୟଙ୍କର ବାତ୍ୟାର ସାମ୍ନା ଜିରୋ କାଜୁଆଲଟି ସହ କରିଛନ୍ତି । ନବୀନଙ୍କ ମଡେଲକୁ ଜାତିସଂଘ ବି ପ୍ରଶଂସା କରିଥିଲା । ୧୯୯୯ରେ ମାତ୍ର ୨୩ ବହୁମୁଖୀ ଆଶ୍ରସ୍ଥଳୀ ଥିଲା । ହେଲେ ନବୀନକଙ୍କ ସମୟରେ ଏହା ୯୦୦କୁ ବୃଦ୍ଧି ପାଇଥିଲା । ବାତ୍ଯା ୟସରେ ୧୮୫ କି.ମି. ବେଗରେ ପବନ ଆସିଥିଲା । ବାତ୍ଯା ୟସ ବେଳେ ୧୦ ଲକ୍ଷ ଲୋକଙ୍କୁ ସ୍ଥାନାନ୍ତର କରାଯାଇଥିଲା । ତେଣୁ ବାତ୍ଯା ଦାନାରେ କେତେ ଲୋକଙ୍କୁ ସ୍ଥାନାନ୍ତର କରିଛନ୍ତି ତାହାର ସତ୍ଯ ସରକାର ସାମ୍ନାକୁ ଆଣନ୍ତୁ ବୋଲି ବିଜେଡି ଦାବି କରିଛି ।
ବିଜେପି ସରକାରକୁ ବାତ୍ୟା ପ୍ରସ୍ତୁତି କରିବାକୁ ଯଥେଷ୍ଟ ସମୟ ମିଳିଥିଲା । ହେଲେ ଏ ଅବ୍ୟବସ୍ଥାର କାରଣ କ’ଣ ବୋଲି ବିଜେଡି ପ୍ରଶ୍ନ କରିଛି । ବିଜେଡି କର୍ମୀ ଗ୍ରାଉଣ୍ଡରେ ସେବା ପାଇଁ ଅଛନ୍ତି ଓ ରହିବେ । ଏଯାଏଁ ଶଂଖ ଭବନ ହେଲ୍ପଲାଇନକୁ ୨୭୦୦ ଫୋନ କଲ୍ ଆସିଛି । ସେହି ଗ୍ରାଉଣ୍ଡ ରିପୋର୍ଟ କହୁଛି ଅନେକ ଲୋକ ଆଶ୍ରୟସ୍ଥଳୀରେ ପହଞ୍ଚି ପାରିଲେ ନାହିଁ । ଏପରି ସ୍ଥିତିରେ ସକରାରଙ୍କ ପ୍ରାକ୍-ପ୍ରସ୍ତୁତି କାଠଗଡ଼ାରେ ଠିଆ ହୋଇଛି ।
ସେହିପରି ଦଳୀୟ ଆଧାରରେ ବିଜେପି ଲୋକଙ୍କୁ ସ୍ଥାନାନ୍ତର କରାଯାଇଥିବା ଗୁରୁତର ଅଭିଯୋଗ ଆଣିଛି ବିଜେଡି । ଖାଦ୍ୟ ନଥିବାରୁ ଆଶ୍ରୟସ୍ଥଳୀରୁ ଲୋକେ ପଳାଉଥିଲେ । ଶେଷ ସମୟରେ ୫ଟି ସ୍କୁଲକୁ ଆଶ୍ରୟସ୍ଥଳୀ କରାଗଲା । ନୀଳଗିରିରେ ବାତ୍ୟା ଆଶ୍ରୟସ୍ଥଳୀ ଭାଙ୍ଗି ଥିବାରୁ ଅଙ୍ଗନବାଡି ସେଣ୍ଟରରେ ଲୋକେ ରହିଲେ । ମନ୍ତ୍ରୀ ବାହା ବାହା ନେବାକୁ ବୁଲିଲେ । ହେଲେ ସଠିକ୍ ଲୋକଙ୍କୁ ନେଇ ସମୀକ୍ଷା ବୈଠକ କଲେନି । ସେମାନେ ନିଜ ଦଳୀୟ ନେତାଙ୍କୁ ନେଇ ସମୀକ୍ଷା ବୈଠକ କଲେ । ନବୀନଙ୍କ ସମୟରେ ମକଡ୍ରିଲ କରାଯାଉଥିଲା ଆଶ୍ରୟସ୍ଥଳୀରେ । ଯାହା ଜରିଆରେ ଲୋକଙ୍କୁ ପ୍ରଶିକ୍ଷଣ ଦିଆଯାଇଥିଲା । ବିଜେପି ସରକାର ନବୀନ ପଟ୍ଟନାୟକଙ୍କ ବାତ୍ୟା ପରିଚାଳନା ଏସଓପି ପଢନ୍ତୁ ବୋଲି ବିଜେଡି ମତ ରଖିଛି । ତେବେ ବିଜେଡି ଅଭିଯୋଗର ଉତ୍ତର ରଖିଛି ବିଜେପି ।
ନବୀନ ପଟ୍ଟନାୟକଙ୍କ ପ୍ରାକୃତିକ ବିପର୍ଯ୍ୟୟ ପରିଚାଳନା ନୀତିକୁ ଜାତୀୟ ସ୍ତରରୁ ବି ସ୍ବୀକୃତି ମିଳୁଛି । ଯେତେ ବଡ଼ ଝଡ଼ କି ବାତ୍ୟା ଆସେ, ତାହା ନବୀନଙ୍କ ଦୂରଦୃଷ୍ଟି ଚିନ୍ତାଧାରା ଯୋଗୁଁ ମୁକାବିଲା କରି ହୁଏ । ଏହା ସଠିକ୍ ଚିନ୍ତାଧାରା ଓ ଟିମଓ୍ବର୍କର ପରିଣାମ । କାରଣ ପୂରା ଟିମର ବିଶ୍ବାସ ଥାଏ ଯେ ନବୀନ ନିଜ ପାଇଁ ନୁହେଁ ସମସ୍ତଙ୍କ ପାଇଁ ଏହି କାମ କରୁଛନ୍ତି ।
‘ଦାନା’ ଦେଇଗଲା ଅସୁମାରୀ ଦୁଃଖ: ଉଡ଼ାଇଲା ଛପର, ବୁଡ଼ାଇଲା ଦାନା
ଭୁବନେଶ୍ବର: ଦାନା ବୁଡାଇଲା ବର୍ଷକର ଦାନାପାଣି । ଏବେ ଅସୁମାରୀ ଦୁଃଖରେ ଚାଷୀ । ବାଲେଶ୍ବରରୁ ଭଦ୍ରକ, କେନ୍ଦ୍ରାପଡାରୁ କେନ୍ଦୁଝର ସବୁଠି ବାତ୍ୟା ଜନିତ ବର୍ଷା ବିତ୍ପାତ ଦେଖିବାକୁ ମିଳିଛି । ସେପଟେ କାଂଶବାଂଶ ନଦୀରେ ଜଳସ୍ତର ବଢ଼ି ଗାଁକୁ ପାଣି ପଶୁଛି । ବୁଢ଼ାବଳଙ୍ଗ ନଦୀରେ ବି ସମାନ ସ୍ଥିତି । ବାରିପଦା ସହରବାସୀ ଏବେ ଆତଙ୍କିତ ଅବସ୍ଥାରେ ରହିଛନ୍ତି ।
ବାତ୍ୟା ଦାନା ଦେଇଯାଇଛି ଅସୁମାରୀ ଦୁଃଖ । ମୁଣ୍ଡରୁ ଉଡାଇ ନେଇଛି ଛପର । ବର୍ଷକର ଦାନାରେ ଭରିଦେଇଛି ପାଣି । ବାଲେଶ୍ବର ରେମୁଣା ବ୍ଲକରେ ଶହ ଶହ ଏକର ଚାଷ ଜମିରେ ଲୋଟିଛି ସୁନାର ଫସଲ । ପରିବା କ୍ଷେତରେ ୬ ଫୁଟ ଉଚ୍ଚର ପାଣି । ହଳଦିଆ ପଡ଼ିଗଲାଣି ପତ୍ର । ବାତ୍ୟା ଓ ବନ୍ୟା ଯୋଗୁଁ ଜିଲ୍ଲାର ୩ ହଜାର ୧୪୦ ହେକ୍ଟର ଚାଷଜମି ପ୍ରଭାବିତ ହୋଇଛି । ଭୋଗରାଇ, ଜଳେଶ୍ବର ଓ ନୀଳଗିରି ବ୍ଲକରେ ବି ସମାନ ପରିସ୍ଥିତି । ସେପଟେ କାଂଶବାଂଶ ନଦୀର ଜଳସ୍ତର ବଢ଼ି ଅନେକ ଗାଁକୁ ପାଣି ପଶୁଥିବା ଦେଖିବାକୁ ମିଳିଛି । ଗଣ୍ଡିବେଡ଼ ମାର୍କୋଣା ଆନନ୍ଦପୁର ନିକଟରେ ରାସ୍ତା ଉପରେ ଚାଲିଛି ପାଣି । ଯାତାୟତ ଏକ ପ୍ରକାର ଠପ ହୋଇଯାଇଛି । ଖଇରା ଓ ଔପଦା ବ୍ଲକର ଅନେକ ଲୋକ ପ୍ରଭାବିତ ହୋଇଛନ୍ତି l ବାଉରିପଦାର ଲୋକେ ବାତ୍ୟା ଆଶ୍ରୟସ୍ଥଳୀରେ ଦୁର୍ଦ୍ଦିନରେ ଦିନ କାଟୁଛନ୍ତି ।
ବାତ୍ୟା ଯୋଗୁଁ ଭଦ୍ରକ ଜିଲ୍ଲା ଆରଡ଼ି, ଧାମନଗର, ବାସୁଦେବପୁର ଓ ଚାନ୍ଦବାଲି ଆଦି ଅଞ୍ଚଳରେ ବଢ଼ିଛି ଲୋକଙ୍କ ଦୁର୍ଦ୍ଦଶା । ଭାଙ୍ଗିଯାଇଛି ଘର, ଉଜୁଡି ଯାଇଛି ସୁନାର ଫସଲ । ବର୍ଷକ ଯାକର ପେଟପାଟଣା ଚିନ୍ତାରେ ଏବେ ଚାଷୀ । ସେପଟେ ଆରଡିରେ ଲଗାଣ ବର୍ଷା ଯୋଗୁଁ ଆଖଣ୍ଡଳମଣିଙ୍କ ରୋଷଶାଳା ଛାତରୁ ଖସିଛି ପ୍ଲାଷ୍ଟର ଖଣ୍ଡ । ଯାଜପୁର ବିଞ୍ଝାରପୁରରେ ବି ସୀମା ଲଂଘିଛି ଚାଷୀଙ୍କ ଦୁର୍ଦ୍ଦଶା । ବାତ୍ୟାରେ କ୍ଷତିଗ୍ରସ୍ତ ହୋଇଛି ସମ୍ପୂର୍ଣ୍ଣ ଧାନ ଫସଲ । ହେଲେ ଏପର୍ଯ୍ୟନ୍ତ ପ୍ରଶାସନିକ ଅଧିକାରୀ ଚାଷୀଙ୍କ ନିକଟରେ ପହଞ୍ଚି ନଥିବା ହୋଇଛି ଅଭିଯୋଗ । ବଡ଼ଚଣା ବ୍ଲକରେ ବି ଏକର ଏକର ବିରି ଫସଲ ସହ ପନିପରିବା ଚାଷ ହୋଇଛି ପ୍ରଭାବିତ ।
ବର୍ଷା ଓ ପବନ ଯୋଗୁଁ କେନ୍ଦୁଝର ଜିଲ୍ଲାର ଭାତହାଣ୍ଡି ଭାଙ୍ଗି ଯାଇଛି । ହାଟଡ଼ିହି ବ୍ଲକରେ ଶହ ଶହ ହେକ୍ଟର ଜମିରେ ଧାନ ଚାଷ କ୍ଷତିଗ୍ରସ୍ତ ହୋଇଛି । ମୟୂରଭଞ୍ଜ ଜିଲ୍ଲାର ବିଭିନ୍ନ ଅଞ୍ଚଳରେ ଓ ଶିମିଳିପାଳ ଜଙ୍ଗଲରେ ବର୍ଷା ଲାଗି ରହିଛି । ଫଳରେ ବୁଢ଼ାବଳଙ୍ଗ ନଦୀର ଜଳସ୍ତରକୁ ଲକ୍ଷ କରି ବାରିପଦା ସହରର ତଳି ଅଞ୍ଚଳରେ ରହୁଥିବା ଲୋକମାନଙ୍କୁ ଆଶ୍ରୟସ୍ଥଳୀକୁ ଅଣାଯାଇଛି । ଜିଲ୍ଲା ପ୍ରଶାସନ ଓ ବାରିପଦା ପୌରପରିଷଦ ଅଧିକାରୀମାନେ ପରିସ୍ଥିତି ଉପରେ ନଜର ରଖିଛନ୍ତି ।
ସେହିପରି କେନ୍ଦ୍ରାପଡ଼ା ରାଜନଗରରେ ବ୍ୟାପକ କ୍ଷୟକ୍ଷତି ଘଟିଛି । ଲୋକଙ୍କ ଘର ଦ୍ଵାର ଭାଙ୍ଗିବା ସହିତ ଧାନ ଫସଲ ନଷ୍ଟ ହୋଇଛି । ଗଛ ଓ ବିଦ୍ୟୁତ୍ ଖୁଣ୍ଟ ଉପୁଡି ପଡ଼ିବା ସହିତ ଲୋକେ ଜଳବନ୍ଦୀ ଅବସ୍ଥାରେ ଅଛନ୍ତି । ଭିତରକନିକା ହବାଳିଖଟିରେ ବାତ୍ୟା ଲ୍ୟାଣ୍ଡଫଲ୍ କରିବା ପରେ ସେଠାରେ ଥିବା କଟେଜ ଗୁଡ଼ିକ ଭାଙ୍ଗି ଛାରଖାର ହୋଇଯାଇଛି । ୪ଦିନ ହେବ ବିଦ୍ୟୁତ୍ ସରବରାହ ବନ୍ଦ ରହିଥିବାରୁ ରାଜନଗର ଅନ୍ଧାରରେ ରହିଛି । ସାତଭାୟାର ବଗପାଟିଆ, ଚାରିଘରିଆର ଶତାଧିକ ପରିବାର ଜଳବନ୍ଦୀ ଅବସ୍ଥାରେ ଅଛନ୍ତି । ଭାରତୀୟ ନୌସେନା ଓ ବିଭିନ୍ନ ସ୍ଵେଚ୍ଛାସେବୀ ସଂଗଠନ ବଗପାଟିଆ ଓ ଚାରିଘରିଆ ଗାଁରେ ପହଁଞ୍ଚି ରନ୍ଧା ଖାଦ୍ୟ ସହିତ ଶୁଖିଲା ଖାଦ୍ୟ ବଣ୍ଟନ କରୁଛନ୍ତି । ଶହ ଶହ ଏକର ଚାଷଜମି ପାଣିରେ ବୁଡ଼ି ରହିଥିବା ବେଳେ ବାତ୍ୟା ପରିଚାଳନାରେ ସରକାର ଫେଲ୍ ମାରିଥିବା ରାଜନଗର ବିଧାୟକ ଧ୍ରୁବ ସାହୁ ଗୁରୁତର ଅଭିଯୋଗ ଆଣିଛନ୍ତି । ତୁରନ୍ତ ବାତ୍ୟା ବିପନ୍ନଙ୍କ ପାଇଁ ସରକାର ପ୍ୟାକେଜ୍ ଘୋଷଣା କରନ୍ତୁ ବୋଲି ସେ ଦାବି କରିଛନ୍ତି । ଯେଉଁ କର୍ମଚାରୀମାନେ ଦିନରାତି ଏକ କରି ବାତ୍ୟା ସମୟରେ ଲୋକମାନଙ୍କ ପାଇଁ କାମ କରୁଥିଲେ ସେଇମାନଙ୍କୁ ନିଲମ୍ବିତ କରି ସରକାର କ’ଣ ବାର୍ତ୍ତା ଦେବାକୁ ଚାହୁଁଛନ୍ତି ବୋଲି ସେ ପ୍ରଶ୍ନ କରିଛନ୍ତି ।
ମୁହଁରୁ ଦାନା ଛଡ଼ାଇ ନେଲା ‘ଦାନା’: ଭାଙ୍ଗିଛି ଘର, ଉଜୁଡ଼ିଛି ଫସଲ
ବାଲେଶ୍ବର: ବାତ୍ୟା ‘ଦାନା’ ଯାଇଛି । ହେଲେ ଲୋକଙ୍କ ମୁହଁରୁ ଦାନା ଛଡ଼ାଇ ନେଇଛି । ପବନ ଓ ବର୍ଷା ଚାଷୀଙ୍କ ମେରୁଦଣ୍ଡ ଭାଙ୍ଗି ଦେଇଛି । ବାଲେଶ୍ବର ଜିଲ୍ଲାର ହଜାର ହଜାର ହେକ୍ଟର ପରିବା ଓ ଧାନ ବିଲରେ ଲହଡ଼ି ଭାଙ୍ଗୁଛି ପାଣି । ଚାଷୀ ପରିବା ତୋଳିବ କ’ଣ, କ୍ଷେତକୁ ଯିବାକୁ ଡରୁଛି । ବାଲେଶ୍ବରରେ ଚାଷକୁ ଉଜାଡି ଦେଇଛି ଦାନା । ସେପଟେ ସରକାର କହିଛନ୍ତି କ୍ଷୟକ୍ଷତିର ଆକଳନ କରାଯାଇ କ୍ଷତିପୂରଣ ଦିଆଯିବ । ହେଲେ ସରକାରୀ କଳର ସହାୟତା କ’ଣ ଚାଷୀର କ୍ଷତିକୁ ଭରଣା କରିପାରିବ ?
ପରିବା କ୍ଷେତରେ ଲହଡ଼ି ଭାଙ୍ଗୁଛି ୬ ଫୁଟ ଉଚ୍ଚାର ପାଣି । ପାଣିରେ ବୁଡ଼ି ହଳଦିଆ ପଡ଼ିଗଲାଣି ଗଛର ପତ୍ର । କଲରା ତୋଳିବାକୁ ଯିବାକୁ ଡରୁଛନ୍ତି ଚାଷୀ । କେବଳ କଲରା ମଞ୍ଚା ନୁହେଁ । କୁନ୍ଦୁରି,ପୋଟଳ, ଜହ୍ନି ମଞ୍ଚା ବି ପାଣିରେ ଭାସୁଛି । ବାଇଗଣ, ଭେଣ୍ଡି, ଲଙ୍କା, ବୋଇତାଳୁ ଗଛ ଦେଖା ଯାଉନି । ରେମୁଣା ବ୍ଲକ୍ ପତ୍ରିପାଳ, ମାହାନ୍ତିପଡ଼ା, ବଡ଼ପାଳ, ହରିପୁର, ମନ୍ଦାରପୁର ଆଦି ଗାଁର ଚାଷୀ ମୁଣ୍ଡରେ ହାତ ଦେଇ ବସିଛନ୍ତି ।
ସମାନ ସ୍ଥିତି ଦେଖିବାକୁ ମିଳିଛି ଧାନ ଚାଷୀଙ୍କର । ବାତ୍ୟା ଓ ଲଗାଣ ବର୍ଷାରେ ବୁଡ଼ି ଯାଇଛି ଧାନବିଲ । କ୍ଷେତରେ ଏବେ ଧାନରେ ଥୋଡ଼ ଆସିଛି । ପବନ ବାଜିଥିଲେ ଧାନ ଫଳିଥାନ୍ତା । ୩ ଦିନ ହେଲା ବିଲରେ ଆଉ ଧାନଗଛ ଦେଖାଯାଉ ନାହିଁ । ସବୁଆଡ଼େ ଖାଲି ପାଣି ଆଉ ପାଣି ।
ଗତ ୨୪ ତାରିଖରୁ ବାଲେଶ୍ବର ଜିଲ୍ଲାରେ ବର୍ଷା ଲାଗି ରହିଛି । ଔପଦା ବ୍ଲକରେ ସର୍ବାଧିକ ୨୪୦ ମି.ମି. ବର୍ଷା ହୋଇଥିବାବେଳେ, ରେମୁଣା ବ୍ଲକରେ ୮୫ ମି.ମି. ଓ ବାଲେଶ୍ବର ସଦର ବ୍ଲକରେ ୯୦ ମି.ମି. ବର୍ଷା ରେକର୍ଡ଼ କରାଯାଇଛି । ବାତ୍ୟା ଓ ବନ୍ୟା ଯୋଗୁଁ ଜିଲ୍ଲାର ୩ ହଜାର ୧୪୦ ହେକ୍ଟର ଚାଷ ଜମି ପ୍ରଭାବିତ ହୋଇଥିବା ସରକାରୀ ଭାବେ କୁହାଯାଇଛି । ହେଲେ ବାସ୍ତବରେ ପ୍ରାୟ ୧୦ ହଜାର ହେକ୍ଟର ଚାଷଜମି ବାତ୍ୟା ଓ ବନ୍ୟା ଯୋଗୁଁ ପ୍ରଭାବିତ ହୋଇଛି । ପ୍ରଶାସନ ତରଫରୁ କୃଷି, ହର୍ଟିକଲଚର, ପଶୁପାଳନ ସମେତ ସମସ୍ତ ବିଭାଗକୁ କ୍ଷୟକ୍ଷତିର ଆକଳନ କରି ରିପୋର୍ଟ ଦେବାକୁ ନିର୍ଦ୍ଦେଶ ଦିଆଯାଇଛି । ରିପୋର୍ଟ ମିଳିବା ପରେ ସରକାରଙ୍କ ପାଖକୁ ପଠାଇ ଦିଆଯିବ ବୋଲି କହିଛନ୍ତି ଜିଲ୍ଲାପାଳ ।