ନନ୍ଦିଘୋଷ ବ୍ୟୁରୋ : ବଢିବାରେ ଲାଗିଛି ନେପାଳରେ ଘଟିଥିବା ପ୍ରଳୟଙ୍କରୀ ଫ୍ଲାସ ଫ୍ଲଡରେ ମୃତ୍ୟୁସଂଖ୍ୟା। ୪୭୦ରୁ ମୃତଦେହ ଉଦ୍ଧାର ହୋଇଛି। ୧୪୦୦ରୁ ଅଧିକ ନିଖୋଜ ଅଛନ୍ତି। ୧୩ ହଜାରରୁ ଅଧିକ ଯବାନ ରେସ୍କ୍ୟୁ ଅପରେସନରେ ନିୟୋଜିତ ହୋଇଛନ୍ତି । ନିଖୋଜ ୨୮୮ ଭାରତୀୟଙ୍କ ମଧ୍ୟରୁ ୨୧ ଜଣଙ୍କୁ ଉଦ୍ଧାର କରାଯାଇଛି। ୨୮୮ ଜଣଙ୍କ ମଧ୍ୟରୁ ୭୩ ଜଣ ତ୍ରିଶୂଳୀ ୱାନ ପାୱାର ପ୍ରୋଜେକ୍ଟରେ କାର୍ଯ୍ୟରତ ଥିଲେ। ନିଖୋଜ ଭାରତୀୟଙ୍କ ମଧ୍ୟରେ ଅଛନ୍ତି ବିହାର, ଉତ୍ତରପ୍ରଦେଶ, ପଶ୍ଚିମବଙ୍ଗ ସମେତ କିଛି ରାଜ୍ୟର ପର୍ଯ୍ୟଟକ।
ଭାରତୀୟ ନାଗରିକଙ୍କ ସହାୟତା ପାଇଁ କାଠମାଣ୍ଡୁସ୍ଥିତ ଭାରତୀୟ ଦୂତାବାସ ପକ୍ଷରୁ ବ୍ୟାପକ ପଦକ୍ଷେପ ନିଆଯାଇଛି। … ସେପଟେ ତିବ୍ବତ-ନେପାଳ ସୀମାରେ ଏକ ଜଳାଶୟ ୭୨ ଘଣ୍ଟାରେ ଭାଙ୍ଗିପାରେ ବୋଲି ସତର୍କ କରାଇଛି ଚୀନ ଜଳ ସମ୍ପଦ ମନ୍ତ୍ରାଳୟ। ଏହି ଜଳାଶୟରେ ୨ ନିୟୁତ କ୍ୟୁବିକ ଘନଫୁଟ ଜଳ ଥିବାରୁ ଯଦି ଏହା ଭାଙ୍ଗେ ତେବେ ସ୍ଥିତି ଅଧିକ ଭୟଙ୍କର ହେବ ବୋଲି ଆଶଙ୍କା ବ୍ୟକ୍ତ କରାଯାଇଛି। ଉତ୍ତର ଲାଙ୍ଗତାଙ୍କ ଲିରୁଙ୍ଗରେ ବିଶାଳ ଗ୍ଲାସିୟର ଧସିବା ଯୋଗୁ ଏହି ଅଘଟଣ ଘଟିଥିଲା। ପ୍ରାୟ ୫ ହଜାର ୨୦୦ ମିଟର ଗ୍ଳାସିୟର ଧସିବା ସହ ୧୨୦୦ ମିଟର ତଳେ ଥିବା ଭୋତେକୋଶୀ ନଦୀର ଶାଖା ନଦୀ ଲିହେନ୍ଦ ନଦୀରେ ଖସିବା ଯୋଗୁ ଏହି ଭୟଙ୍କର ଦୁର୍ବିପାକ ଘଟିଥିଲା।
