ଇମ୍ଫାଲ : ଧୀରେ ଧୀରେ ସ୍ବାଭାବିକ ହେଉଛି ମଣିପୁର ସ୍ଥିତି। ପ୍ରାୟ ଦୁଇ ସପ୍ତାହ ପରେ ଆଜିଠାରୁ ଖୋଲିବ ଶିକ୍ଷା ପ୍ରତିଷ୍ଠାନ। ହିଂସା କାରଣରୁ ମଣିପୁରରରେ ବନ୍ଦ ଥିବା ବିଶ୍ବବିଦ୍ୟାଳୟ ସମେତ ସ୍କୁଲ ଓ କଲେଜ ଖୋଲିବ। ଏନେଇ ସମସ୍ତ ଜିଲ୍ଲା ଓ ଜୋନାଲ ସ୍ତରୀୟ ଅଫିସରଙ୍କୁ ନିର୍ଦ୍ଦେଶ ଦିଆଯାଇଛି। ସରକାରଙ୍କ ନିଷ୍ପତ୍ତି ଫଳରେ ସମସ୍ତ ସରକାରୀ, ବେସରକାରୀ ସ୍କୁଲ ଆଦି ଖୋଲିବ। ରାଜ୍ଯ ଗୃହ ବିଭାଗ ସହ ଆଲୋଚନା ପରେ ଏହି ନିଷ୍ପତ୍ତି ନିଆଯାଇଛି। ଇମ୍ଫାଲ ପଶ୍ଚିମ, ଇମ୍ଫାଲ ପୂର୍ବ, ଥୋବାଲ, ବିଷ୍ଣୁପର, କାକଚିଙ୍ଗ ଓ ଜିରିବାମରେ ହିଂସା ଦେଖାଦେବା ପରେ ସ୍କୁଲ କଲେଜ ବନ୍ଦ ଲାଗି ସରକାର ନିଷ୍ପତ୍ତି ନେଇଥିଲେ। ସେପଟେ ରାଜ୍ଯରେ ହିଂସା ପ୍ରତିବାଦରେ ବିଭିନ୍ନ ସ୍ଥାନରେ ସଭା କରାଯାଇଛି।
ଆଜି ବସିବ କଂଗ୍ରେସର କାର୍ଯ୍ୟକାରିଣୀ ବୈଠକ
ନୂଆଦିଲ୍ଲୀ : ଆଜି ବସିବ କଂଗ୍ରେସର କାର୍ଯ୍ୟକାରିଣୀ ବୈଠକ। ଏହି ବୈଠକରେ ହରିୟାଣା, ମହାରାଷ୍ଟ୍ର ଓ ଝାଡ଼ଖଣ୍ଡ ବିଧାନସଭା ନିର୍ବାଚନ ପ୍ରସଙ୍ଗରେ ହେବ ଆଲୋଚନା । ତିନି ରାଜ୍ୟରେ ଦଳର ପ୍ରଦର୍ଶନ ନେଇ କରାଯିବ ସମୀକ୍ଷା। ଏହା ସହ ଶୀତକାଳୀନ ଅଧିବେଶନରେ କେନ୍ଦ୍ର ସରକାରଙ୍କୁ ଆଦାନୀ ପ୍ରସଙ୍ଗ ନେଇ ଟାର୍ଗେଟ କରିବା ରଣନୀତି ନେଇ ବି ଆଲୋଚନା ହେବ। ବୈଠକରେ ଏଆଇସିସି ସଭାପତି ମଲ୍ଲିକାର୍ଜୁନ ଖଡଗେ, ବିରୋଧୀ ଦଳ ନେତା ରାହୁଲ ଗାନ୍ଧି, ସାଂସଦ ପ୍ରିୟଙ୍କା ଗାନ୍ଧି ପ୍ରମୁଖ ସାମିଲ ହେବେ ।
ଆସନ୍ତା ବର୍ଷ ହେବାକୁ ଥିବା ବିହାର ଓ ଦିଲ୍ଲୀ ବିଧାନସଭା ନିର୍ବାଚନ ରଣନୀତି ସମ୍ପର୍କରେ ମଧ୍ଯ ବୈଠକରେ ଆଲୋଚନା ହେବ ବୋଲି ସୂଚନା ମିଳିଛି । ଗତ ନିର୍ବାଚନରେ ମହାରାଷ୍ଟ୍ର ଓ ହରିୟାଣାରେ ଯେପରି ଦଳ ବିପର୍ଯ୍ୟୟର ଶିକାର ହେଲେ ତାହାକୁ ନେଇ ମାନସମନ୍ଥନ କରାଯିବ । ମହାରାଷ୍ଟ୍ରରେ ମହା ଅଘାଡି ମେଣ୍ଟରେ ଥିବା ଶିବସେନା ୟୁବିଟି ମାତ୍ର ୨୦ ଆସନ ପାଇଥିବାବେଳେ କଂଗ୍ରେସ ପାଇଥିଲା ୧୬ ଆସନ । ଏନସିପି ଶରଦ ପାଓ୍ବାର ପାଇଥିଲା ୧୦ ଆସନ।
ଆଜିଠାରୁ ଆରମ୍ଭ ୩ ଦିନିଆ ଡିଜିପି ସମ୍ମିଳନୀ , ସାମିଲ ହେବେ ପ୍ରଧାନମନ୍ତ୍ରୀ ଓ ଗୃହମନ୍ତ୍ରୀ
ଭୁବନେଶ୍ବର : ଆଜିଠାରୁ ଭୁବନେଶ୍ବରରେ ଆରମ୍ଭ ହେବ ତିନି ଦିନିଆ ଡିଜିପି ସମ୍ମିଳନୀ। ସାମିଲ ହେବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ଗୃହମନ୍ତ୍ରୀ ଅମିତ ଶାହ। ଆଜି ଅପରାହ୍ନ ୪ ଟା ୨୫ ମିନିଟରେ ଭୁବନେଶ୍ୱରରେ ପହଞ୍ଚିବେ ପ୍ରଧାନମନ୍ତ୍ରୀ । ରାଜଭବନରେ କିଛି ସମୟ ବିଶ୍ରାମ ପରେ ଅପରାହ୍ନ ୬ଟା ୨୦ରେ ରାଜଭବନରୁ ବିଜେପି କାର୍ଯ୍ୟାଳୟରେ ପହଞ୍ଚିବେ । ଗସ୍ତର ଦ୍ଵିତୀୟ ଦିନରେ ମୋଦି ସକାଳ ୮ ଟା ୨୫ ରେ ଲୋକସେବା ଭବନ କନଭେନସନ ସେଣ୍ଟରରେ ପହଞ୍ଚି ଡିଜିପି ଓ ଆଇଜିପି ସମ୍ମିଳନୀରେ ଯୋଗଦେବେ। ସେହିପରି ଗସ୍ତର ତୃତୀୟ ଦିନ ଅର୍ଥାତ ଡିସେମ୍ବର ୧ ତାରିଖରେ ଡିଜିପି ସମ୍ମିଳନୀରେ ଯୋଗଦେଇ ଅପରାହ୍ନ ୪ ଟା ୪୫ରେ ଦିଲ୍ଲୀ ଫେରିଯିବେ।
ପ୍ରଧାନମନ୍ତ୍ରୀଙ୍କ ଗସ୍ତ ପାଇଁ ସ୍ବତନ୍ତ୍ର ବ୍ୟବସ୍ଥା କରାଯାଇଛି। ପ୍ରଧାନମନ୍ତ୍ରୀଙ୍କ ସମେତ ତିନି ଦିନିଆ ଓଡ଼ିଶା ଗସ୍ତରେ ଆସୁଛନ୍ତି ଗୃହମନ୍ତ୍ରୀ ଅମିତ ଶାହ । ଆଜି ଡିଜିପି ସମ୍ମିଳନୀକୁ ଉଦଘାଟନ କରିବେ ଗୃହମନ୍ତ୍ରୀ । ସନ୍ଧ୍ୟା ଆଠଟା ପର୍ଯ୍ୟନ୍ତ ଡିଜିପି ସମ୍ମିଳନୀରେ ରହିବେ ଗୃହମନ୍ତ୍ରୀ। ସେହିପରି ୩୦ ଓ ଡିସେମ୍ବର ୧ ତାରିଖରେ ମଧ୍ୟ ଗୃହମନ୍ତ୍ରୀ ଡିଜିପି ସମ୍ମିଳନୀରେ ଯୋଗଦେବାର କାର୍ଯ୍ୟକ୍ରମ ରହିଛି। ପ୍ରଧାନମନ୍ତ୍ରୀ ଓ ଗୃହମନ୍ତ୍ରୀଙ୍କ ଗସ୍ତ ପାଇଁ ତ୍ରିସ୍ତରୀୟ ସୁରକ୍ଷା ବଳୟରେ ରାଜଧାନୀ ଭୁବନେଶ୍ଵର ରହିବ। ଭୁବେନଶ୍ଵରରେ ୭୦ ପ୍ଲାଟୁନରୁ ଅଧିକ ଫୋର୍ସ ମୁତୟନ ରହିବେ। ରାଜ୍ୟ ପୋଲିସ, ସଶସ୍ତ୍ର ବାହିନୀ ଓ କେନ୍ଦ୍ରୀୟ ସଶସ୍ତ୍ର ବଳ ମୁତୟନ ହୋଇଛନ୍ତି। ସୁରକ୍ଷା ପାଇଁ ଆଣ୍ଟି ଟେରର ଫୋର୍ସ ସଜାଗ ରହିବେ। ରାଜ୍ୟ ଓ କେନ୍ଦ୍ର ଗୁଇନ୍ଦା ସଂସ୍ଥା ରାଜଧାନୀ ଉପରେ କଡ଼ା ନଜର ରଖିବେ ବୋଲି ପୋଲିସ କମିଶନର କହିଛନ୍ତି।
ଛିଣ୍ଡୁନି ମହାରାଷ୍ଟ୍ର ଗଣିତ, କିଏ ହେବେ ମୁଖ୍ଯମନ୍ତ୍ରୀ ହୋଇପାରୁନି ନିଷ୍ପତ୍ତି
ନନ୍ଦିଘୋଷ ବ୍ୟୁରୋ: ଛିଣ୍ଡୁନି ମହାରାଷ୍ଟ୍ର ଗଣିତ। କିଏ ହେବେ ମୁଖ୍ଯମନ୍ତ୍ରୀ ତଥାପି ହୋଇପାରୁନି ନିଷ୍ପତ୍ତି। ଅଚଳାବସ୍ଥା ମଧ୍ଯରେ ଦିଲ୍ଲୀ ଗସ୍ତ କରିଛନ୍ତି କାମଚଳା ମୁଖ୍ଯମନ୍ତ୍ରୀ ଏକନାଥ ସିନ୍ଦେ। ସମ୍ଭବତଃ ନୂଆ କ୍ଯାବିନେଟର ରୂପରେଖ ନେଇ ଆଲୋଚନା କରିପାରନ୍ତି ସିନ୍ଦେ। ୨୮୮ ଆସନ ବିଶିଷ୍ଟ ମହାରାଷ୍ଟ୍ର ବିଧାନସଭାରେ ବିଜେପିର ୧୩୨, ଶିବସେନାର ୫୭ ଓ ଏନସିପିର ୪୧ ବିଧାୟକ ଅଛନ୍ତି। ତେବେ ଦେବେନ୍ଦ୍ର ଫଡନବିସ ମୁଖ୍ଯମନ୍ତ୍ରୀ ହେବା ଏକରକମ ନିଶ୍ଚିତ ହୋଇଛି। କେତେକ ସର୍ତ୍ତରେ ସିନ୍ଦେ ଉପମୁଖ୍ଯମନ୍ତ୍ରୀ ହେବା ସମ୍ଭାବନା ରହିଛି। ଶିବସେନାକୁ ନଗର ଉନ୍ନୟନ, ରାଜସ୍ବ, କୃଷି, ସ୍ବାସ୍ଥ୍ୟ, ଗ୍ରାମୀଣ ବିକାଶ, ଶିଳ୍ପ, ସାମାଜିକ ନ୍ୟାୟ ଓ ରାଜ୍ଯ ସଡକ ପରିବହନ ବିଭାଗ ମିଳିପାରେ। ସେପଟେ ଏନସିପି ଉପମୁଖ୍ଯମନ୍ତ୍ରୀ, ଅର୍ଥ ଓ ଯୋଜନା, ମେଡିକାଲ ଶିକ୍ଷା, କ୍ରୀଡା, ମହିଳା ଓ ଶିଶୁ କଲ୍ଯାଣ ଆଦି ବିଭାଗ ଲାଗି ଚାହିଁଛି। ମନ୍ତ୍ରିମଣ୍ଡଳରେ ବିଜେପି ୨୧ରୁ ୨୨, ଶିବସେନା ୧୦ରୁ ୧୨ ଓ ଏନସିପି ୮ରୁ ୯ ମନ୍ତ୍ରୀ ପାଇବା ଆଶା ରହିଛି। ରାଜ୍ଯ ମନ୍ତ୍ରିମଣ୍ଡଳରେ ସର୍ବାଧିକ ୪୩ ମନ୍ତ୍ରୀ ରହିପାରିବେ।
ରାଜ୍ଯସଭା ସାଂସଦ ମାନସ ମଙ୍ଗରାଜଙ୍କ ପ୍ରଶ୍ନ : ସଠିକ୍ ଉତ୍ତର ଦେଇ ପାରିଲେ ନାହିଁ କେନ୍ଦ୍ର କ୍ରୀଡାମନ୍ତ୍ରୀ
ନନ୍ଦିଘୋଷ ବ୍ୟୁରୋ: ରାଜ୍ଯରେ କ୍ରୀଡାର ଭିତ୍ତିଭୂମି ବିକାଶ ପ୍ରସଂଗରେ ରାଜ୍ଯସଭା ସାଂସଦ ମାନସ ମଂଗରାଜ ପଚାରିଥିବା ପ୍ରଶ୍ନର ସଠିକ ଉତ୍ତର ଗୃହରେ ଦେଇ ପାରିଲେ ନାହିଁ କେନ୍ଦ୍ର କ୍ରୀଡା ମନ୍ତ୍ରୀ ମନସୁଖ ମାଣ୍ଡବ୍ଯ। ଗତ ପାଂଚ ବର୍ଷ ମଧ୍ଯ୍ଯରେ ଓଡିଶାରେ କ୍ରୀଡାର ବିକାଶ ପାଇଁ କେଉଁ ଯୋଜନାରେ କେତେ ଅର୍ଥ କେନ୍ଦ୍ର ଦେଇଛି ଜାଣିବାକୁ ଚାହିଁଥିଲେ ମାନସ ମଂଗରାଜ । ତେବେ ମନ୍ତ୍ରୀ ରାଜ୍ଯୱାରୀ ହିସାବ ନଦେଇ ଦେଶର ସାମଗ୍ରିକ ଅନୁଦାନ କଥା କହିଥିଲେ।ସେହିଭଳି ଜାତୀୟ ରାଜପଥ-୫୩ ଅନ୍ତର୍ଗତ ପାରାଦୀପ -ଡୁବୁରୀ ୪ ଥାକିଆ ରାସ୍ତାରେ ଏବେ ୮୨ ପ୍ରତିଶତ କାମ ସରିଲାଣି।ବଳକା ଥିବା କାମ ୨୦୨୫ ଫେବୃଆରୀ ସୁଦ୍ଧା ସମ୍ପନ୍ନ ହେବ ବୋଲି ବିଭାଗୀୟ ମନ୍ତ୍ରୀ ନିତୀନ ଜୟରାମ ଗଡକରି ଗୃହକୁ ସୂଚନା ଦେଇଛନ୍ତି।ସେହିଭଳି ସାମୁଦ୍ରିକ ମତ୍ସ୍ଯ ଉତ୍ପାଦନ ସମ୍ପର୍କରେ ସେ ବିଭାଗୀୟ ମନ୍ତ୍ରୀ ରାଜୀବ ରଂଜନ ସିଂକୁ ପଚାରିଛନ୍ତି।
ଅବସର ଘୋଷଣା କଲେ ସିର୍ଦ୍ଧାର୍ଥ କୌଲ, ସୋସିଆଲ ମିଡିଆରେ ଲେଖିଲେ..
ନନ୍ଦିଘୋଷ ବ୍ୟୁରୋ: ଗୋଟିଏ ପଟେ ଟିମ ଇଣ୍ଡିଆ ଅଷ୍ଟ୍ରେଲିଆ ବିପକ୍ଷରେ ଖେଳୁଛି ବର୍ଡର ଗାଭାସ୍କର ଟ୍ରଫି ଅନ୍ୟପଟେ ଅବସର ଘୋଷଣା କଲେ ଜଣେ ଖେଳାଳି । ଟିମ ଇଣ୍ଡିଆର ପୂର୍ବତନ କ୍ରିକେଟର ସିର୍ଦ୍ଧାର୍ଥ କୌଲ ନିଜର ଅବସର ଘୋଷଣା କରିଛନ୍ତି । ୨୦୧୯ ମସିହାରେ ସେ ନିଜର ଶେଷ ଆନ୍ତର୍ଜାତୀୟ କ୍ରିକେଟ ଖେଳିଥିଲେ । ସେ ନିଜର ଆନ୍ତର୍ଜାତୀୟ କ୍ରିକେଟ କ୍ୟାରିୟରରେ ୩ଟି ଦିନିକିଆ ଏବଂ ୩ଟି ଟି-୨୦ ମ୍ୟାଚ ଖେଳିବାର ସୁଯୋଗ ପାଇଛନ୍ତି । କିନ୍ତୁ ଆଇପିଏଲରେ ୫୫ ମ୍ୟାଚରେ ୫୮ ଓ୍ବିକେଟ ଅକ୍ତିଆର କରିଛନ୍ତି । କୋଲକାତା ନାଇଟ ରାଇଡର୍ସ, ସନ ରାଇଜର୍ସ ହାଇଦ୍ରାବାଦ ଏବଂ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ପକ୍ଷରୁ ଖେଳିଛନ୍ତି । ସୋସିଆଲ ମିଡିଆ ଜରିଆରେ ଏକ ଭାବପୂର୍ଣ୍ଣ ପୋଷ୍ଟ କରି ନିଜର ଅବସର ଘୋଷଣା କରିଛନ୍ତି ।
https://www.instagram.com/iamsidkaul/?utm_source=ig_embed&ig_rid=4785954e-83eb-4264-9787-83cea2fbd96e
୪ଟି ସିଜିନରେ ଆଇପିଏଲରୁ ୫୦ କୋଟିରୁ ଅଧିକ ରୋଜଗାର କଲେଣି ଷ୍ଟାର୍କ
ନନ୍ଦିଘୋଷ ବ୍ୟୁରୋ: ଅଷ୍ଟ୍ରେଲିୟ କ୍ରିକେଟର ମିଚେଲ ଷ୍ଟାର୍କଙ୍କୁ ଚଳିତ ସିଜିନରେ ଦିଲ୍ଲୀ କ୍ୟାପିଟାଲ୍ସ ୧୧.୭୫ କୋଟି ଟଙ୍କାରେ କିଣିଛି । ଚଳିତ ସିଜିନରେ ଯେଭଳି ଆଶା ରଖାଯାଇଥିଲା ଏଥରକ ସେମିତି ଆଖି ଦୃଶିଆ ଟଙ୍କାରେ କିଣା ହୋଇନାହାନ୍ତି । ତଥାପି ଷ୍ଟାର୍କଙ୍କ କଥା ଯଦି କହିବା ତାହେଲେ ସେ ୪ଟି ସିଜିନରେ ୫୦.୯ କୋଟି ଟଙ୍କା ଆୟ କରିଛନ୍ତି । ଗତ ସିଜିନରେ କୋଲକାତା ନାଇଟ ରାଇଡର୍ସ ତାଙ୍କୁ କିଣିଥିଲା । ୨୪.୭୫ କୋଟିରେ କେକେଆର କିଣିଥିବାବେଳେ ଏହା ଆଇପିଏଲ ଇତିହାସରେ ରେକର୍ଡ କରିଥିଲା ।
ମାତ୍ର ଏଥରକ ତାଙ୍କୁ ଅଧିକ ଟଙ୍କାରେ କିଣିନାହାନ୍ତି । ତେବେ ଆମେ ଯଦି ଷ୍ଟାର୍କଙ୍କ ଆଇପିଏଲ କ୍ୟାରିୟର କଥା କହିବା ତାହେଲେ ସେ ମାତ୍ର ୪ଟି ସିଜିନ ଖେଳିଛନ୍ତି । ପ୍ରଥମେ ସେ ୨୦୧୪ରେ ଆରସିବି ପାଇଁ ଖେଳିଥିଲେ । ୨ଟି ସିଜନରେ ସେ ଆରସିବି ପାଇଁ ଖେଳିଥିଲେ । ସେତେବେଳେ ଦଳ ତାଙ୍କୁ ୪ କୋଟି ଟଙ୍କାରେ କିଣିଥିଲା । ମାତ୍ର ପରେ ସେ ୨୦୧୮ରେ କୋଲକାତା ନାଇଟ ରାଇଡର୍ସରେ ସାମିଲ ହୋଇଥିଲେ । କୋଲକାତା ତାଙ୍କୁ ୯.୪ କୋଟି ଟଙ୍କାରେ କିଣିଥିଲା । ପରେ ଯାଇ ପୁଣିଥରେ ୨୦୨୪ ଅକ୍ସନରେ ଭାଗ ନେଇଥିବାବେଳେ କୋଲକାତା ୨୪.୭୫ କୋଟି ଟଙ୍କାରେ କିଣିଥିଲା । ତେବେ ୪ଟି ସିଜିନରେ ସେ ୫୦ କୋଟିର ଅଧିକ ରୋଜଗାର କରିଛନ୍ତି ।
ବିରଳ କଇଁଛଙ୍କ ସୁରକ୍ଷା ପାଇଁ ଅଣ୍ଟା ଭିଡ଼ିଛି ବାଲେଶ୍ବର ଜିଲ୍ଲା ବନ ବିଭାଗ
ନନ୍ଦିଘୋଷ ବ୍ୟୁରୋ: ସଂକଟରେ ଅଲିଭ୍ ରିଡ଼ଲେ । କେଉଁଠି ଏମାନଙ୍କ ସଂଖ୍ୟା କମୁଛି, ତ କେଉଁଠି ଲୋକଙ୍କ ସେଚତନତା ଯୋଗୁ ସମୁଦ୍ର କୂଳରେ ଦେଖିବାକୁ ମିଳୁଛି ମାଳ ମାଳ ଅଲିଭ୍ ରିଡ଼ଲେ କଇଁଛ । ହେଲେ ବାଲେଶ୍ବର ଜିଲ୍ଲାର ଚାନ୍ଦିପୁର, ତାଳସାରୀ, ଡ଼ଗରା ପ୍ରଭୃତି ସମୁଦ୍ର କୂଳରେ ଅଲିଭ୍ ରିଡ଼ଲେଙ୍କ ସଂରକ୍ଷଣ ନେଇ ପଦକ୍ଷେପ ଗ୍ରହଣ କରିଛି ବନ ବିଭାଗ । ସମୁଦ୍ରରୁ ମାଛମରା ଉପରେ କଟକଣା ସାଙ୍ଗକୁ ବେଳାଭୂମୀରେ ଯାନବାହନ ଚଳାଚଳ ଅଲିଭ ରିଡ଼ଲେଙ୍କ ପାଇଁ ବିପଦ ସୃଷ୍ଟି କରୁଥିବା କୁହାଯାଇଛି । ହେଲେ ସଚେତନତା ହିଁ ଏହି ପ୍ରଜାତୀକୁ ପ୍ରକୃତ ସୂରକ୍ଷା ଯୋଗାଇ ପାରିବ ବୋଲି କୁହାଯାଇଛି ।
ଅଣ୍ଡାଦାନ ପରେ ସମୁଦ୍ରକୁ ଫେରୁଛନ୍ତି ଅଲିଭ ରିଡଲେ । ବାଲେଶ୍ବର ଜିଲ୍ଲାର ଚାନ୍ଦିପୁର, ପରିଖି, ମୁରଲିଚଢା, ଉଦୟପୁର ଓ ତାଳସାରୀ ବେଳାଭୂମୀର ଏହି ସୁନ୍ଦର ଦୃଶ୍ୟ । ରାତିରେ ଅଣ୍ଡାଦାନ ଆଉ ସକାଳେ ସମୁଦ୍ର ଭିତରକୁ ଚାଲି ଯାଉଛନ୍ତି ଅଲିଭ ରିଡ଼ଲେ କଇଁଛ । ହେଲେ ଜିଲ୍ଲାରେ ଅଲିଭ୍ ରିଡ଼ଲେ କଇଁଛ ଅଣ୍ଡା ଦେବା ପାଇଁ ଆସିବା ସଂଖ୍ୟା ନଗଣ୍ୟ । କାହିଁକି ବାଲେଶ୍ବର ମୁହାଁ ହେଉନାହାନ୍ତି ଅଲିଭ୍ ରିଡ଼ଲେ ପ୍ରଜାତୀର କଇଁଛ ? ତାହାକୁ ନେଇ ପ୍ରଶ୍ନ ସୃଷ୍ଟି ହୋଇଥିବା ବେଳେ ପରିବେଶବିତ୍ ସମୁଦ୍ରରେ ମାଛମରା ଓ ଯାନ ବାହନ ଚଳାଚଳକୁ ଦାୟୀ କରିଛନ୍ତି ।
ବନ ବିଭାଗ ତରଫରୁ ମିଳିଥିବା ତଥ୍ୟ ଅନୁସାରେ ବାଲେଶ୍ବର ଜିଲ୍ଲାର ସମୁଦ୍ର କୂଳକୁ ଗତ ୨୦୨୦-୨୧ ମସିହାରେ ୨ଟି ଅଲିଭ ରିଡ଼ଲେ କଇଁv ଆସିଥିଲେ । ମୋଟ ୩୦୫ଟି ଛୁଆ ଜନ୍ମ କରିଥିଲେ । ସେହିପରି ୨୦୨୧-୨୨ରେ ୧୧ଟି କଇଁଛ ୯୧୬ଟି , ୨୦୨୨-୨୩ରେ ୧୯ଟି କଇଁଛ ୧ ହଜାର ୫୬୪ଟି ଓ ୨୦୨୩-୨୪ ମସିହାରେ ୭୧ଟି କଇଁଛ ଆସି ୫ ହଜାର ୪୬୩ ଟି ଅଣ୍ଡାଦାନ କରିଥିଲେ । ଏମାନଙ୍କ ଗତୀବିଧି ଉପରେ ନଜର ରଖିବା ଓ ସୂରକ୍ଷା ଦାୟିତ୍ବରେ ୧୪ ଜଣ ଜଗୁଆଳୀଙ୍କୁ ନିଯୁକ୍ତ କରାଯାଇଛି । ଏଥିସହିତ ପ୍ରତିବର୍ଷ ନଭେମ୍ବର ମାସରୁ ଏପ୍ରିଲ ମାସ ପର୍ଯ୍ୟନ୍ତ ବେଳାଭୂମୀକୁ ପରିସ୍କାର ରଖିବା ଉପରେ ଗୁରୁତ୍ବ ଦିଆଯାଉଛି। ପ୍ରତିବର୍ଷ ଏପ୍ରିଲ ୧୫ ତାରିଖରୁ ଜୁନ୍ ମାସ ୧୫ ତାରିଖ ପର୍ଯ୍ୟନ୍ତ ସମୁଦ୍ରରେ ଟ୍ରଲର ଚଳାଚଳ ନେଇ କଟକଣା ଜାରି କରାଯାଇଛି । ଗତ ୪ ବର୍ଷ ମଧ୍ୟରେ ୧୦୩ କଇଁଚ ୮ ହଜାର ୨୪୮ ଜୀବନ୍ତ ଛୁଆ ଜନ୍ମ କରିବା ପରିବେଶ ପାଇଁ ଶୁଭଙ୍କର ନିଶ୍ଚିତ । ହେଲେ ଏହା ସଂଖ୍ୟା ବୃଦ୍ଧି କରାଯାଇ ପାରିଲେ ପରିବେଶରେ ସନ୍ତୁଳନ ରକ୍ଷା କରାଯାଇ ପାରିବ ବୋଲି ଆଶା ପ୍ରକାଶ ପାଇଛି।
୨୩ ବର୍ଷ ପରେ ଅଜାକୁ ଫେରାଇ ଆଣିଲେ ନାତି!
ନନ୍ଦିଘୋଷ ବ୍ୟୁରୋ: ୨୩ ବର୍ଷ ପରେ ଅଜାକୁ ଫେରାଇ ଆଣିଲେ ନାତି । ଅଜା ଦେଇଥିବା ସ୍ନେହ ଶ୍ରଦ୍ଧାକୁ ଭୁଲି ନଥିଲେ ନାତି । ଆଖି ଆଗରେ ନାଚି ଉଠୁଥିଲା ଅଜାଙ୍କ ମୁହଁ । ଅଜାଙ୍କ ସ୍ମୃତିକୁ ମନେ ପକାଇ ୨୩ ବର୍ଷ ପରେ ଅଜାଙ୍କ ପ୍ରତିମୂର୍ତ୍ତି ଘରେ ସ୍ଥାପନା କଲେ ନୂଆପଡା ଜିଲ୍ଲା ସିନାପାଲି ବ୍ଲକ ନିଲିଜି ଗାଁର ପ୍ରଦୀପ ପ୍ରଧାନ । ପରିବାରରେ ବାଞ୍ଛାନିଧିଙ୍କୁ ଦେଖି ବେଶ ଖୁସି ପ୍ରକାଶ କରୁଛନ୍ତି ପରିବାର ଲୋକେ ।
ଦୀର୍ଘ ୨୩ ବର୍ଷ ତଳେ ଅଜା ଦେଇଥିବା ସ୍ନେହ ଶ୍ରଦ୍ଧାକୁ ଭୁଲି ନଥିଲେ ନାତି । ଆଖି ଆଗରେ ନାଚି ଉଠୁଥିଲା ଅଜାଙ୍କ ମୁହଁ । ଅଜାଙ୍କ ସ୍ମୃତିକୁ ମନେ ପକାଇ ୨୩ ବର୍ଷ ପରେ ଅଜାଙ୍କ ପ୍ରତିମୂର୍ତ୍ତି ଘରେ ସ୍ଥାପନା କଲେ ନୂଆପଡା ଜିଲ୍ଲା ସିନାପାଲି ବ୍ଲକ ନିଲିଜି ଗାଁର ପ୍ରଦୀପ ପ୍ରଧାନ । ସେହି ଗାଁର ବାଞ୍ଛାନିଧି ପ୍ରଧାନଙ୍କ ୨୩ବର୍ଷ ତଳେ ପର ଲୋକ ହୋଇଯାଇଛି । ବାଞ୍ଛାନିଧିଙ୍କ ପରଲୋକ ପରେ ଅଜାଙ୍କ ସ୍ନେହ, ଶ୍ରଦ୍ଧା ଭୁଲି ପାରିନଥିଲା ନାତି। ଘରର ଏକ ସ୍ଥାନରେ ଅଧା ଉଇ ଧରା ଫଟୋଟି ପାଇଥିଲେ ପ୍ରଦୀପ । ସେହି ଫଟୋଟିକୁ ପ୍ରଥମେ ବମ୍ବେକୁ ପଠାଇ ଏକ ଭଲ ଫଟୋଟି ତିଆରି କରିଥିଲେ । ପରେ ରାଜସ୍ଥାନ ଯାଇ ୭୦ହଜାର ଟଙ୍କାରେ ଅଜାଙ୍କ ପ୍ରତିମୂର୍ତ୍ତି ଗଢି ଏବେ ଘରକୁ ଆଣିଛନ୍ତି। ଏବେ ନିଜ ଘରେ ସବୁବେଳେ ଅଜାକୁ ଦେଖି ନାତି ପ୍ରଦୀପଙ୍କ ସହିତ ପୂରା ପରିବାର ବେଶ ଖୁସି ଅଛନ୍ତି ।
ସ୍ୱର୍ଗତ ବାଞ୍ଛାନିଧି ଥିଲେ ଗାଁର ଗୌନ୍ତିଆ। ତାଙ୍କ ଜୀବନ କାଳରେ ଅନେକ ଲୋକଙ୍କୁ ସହଯୋଗ କରିବା ଶହ ନିଜ ପରିବାର କୁ ଦେଇ ଆସିଥିଲେ ଅନେକ ଖୁସି ଓ ସ୍ନେହ। ୧୦୦ ବର୍ଷ ବୟସରେ ତାଙ୍କ ମୃତ୍ଯୁ ହୋଇଥିଲା । ସେ ଆର ପାରିକି ଚାଲିଯାଇଥିଲେ ସତ ତାଙ୍କ ସହଯୋଗ ଏବେ ବି ଗାଁ ଲୋକଙ୍କ ମନରୁ ଲିଭିନାହିଁ । ଗାଁ ଲୋକ ଓ ନିଜ ପରିବାର ଲୋକଙ୍କ ପାଇଁ ଘରକୁ ବାଞ୍ଛାନିଧିଙ୍କ ପ୍ରତିମୂର୍ତ୍ତି ଫେରାଇ ଆଣିଛନ୍ତି ନାତି ପ୍ରଦୀପ ପ୍ରଧାନ।
ରାସ୍ତାରେ ଫସିରହୁଛି ଜରୁରୀକାଳୀନ ଗାଡି, ଭୁବନରେ ଅସହ୍ଯ ହେଲାଣି ଟ୍ରାଫିକ ସମସ୍ଯା
ନନ୍ଦିଘୋଷ ବ୍ୟୁରୋ: ଭୁବନରେ ଅସହ୍ଯ ହେଲାଣି ଟ୍ରାଫିକ ସମସ୍ଯା । ରାସ୍ତାରେ ଫସିରହୁଛି ଜରୁରୀକାଳୀନ ଗାଡି । ରଗଡ଼ି ଛକରୁ କାଳୀ ବଜାର ଦେଇ ଯାଇଥିବା ଭୁବନର ସହରର ମୁଖ୍ୟ ରାସ୍ତା ଦୀର୍ଘଦିନ ଧରି ପ୍ରଶସ୍ତ କରାଯାଇନାହିଁ । ଏହି ରାସ୍ତା ଦେଇ ପ୍ରତିଦିନ ଶହ ଶହ ଭାରିଯାନ ଚଳାଚଳ କରୁଛି । ଫଳରେ ଟ୍ରାଫିକ ସମସ୍ଯା ଉପୁଜୁଛି । ଅନେକ ସମୟରେ ଦୁର୍ଘଟଣା ଘଟୁଥିବାରୁ ଅଞ୍ଚଳରେ ଭୟର ବାତାବରଣ ଖେଳିଯାଇଛି ।
ଢେଙ୍କାନାଳରୁ ଭୁବନକୁ ସଂଯୋଗ କରୁଥିବା ରଗଡ଼ି ଠାରୁ କାଳୀ ବଜାର ପୂର୍ତ୍ତ ବିଭାଗ ରାସ୍ତାଟି ଭୁବନ ସହର ଦେଇ ଯାଇଛି । ହେଲେ ଦୀର୍ଘ ବର୍ଷ ଧରି ରାସ୍ତାର ସମ୍ପ୍ରସାରଣ କରାଯାଇନାହିଁ । ଏଥି ସହିତ ଭୁବନ ନୀଳକଣ୍ଠପୁର ବ୍ରାହ୍ମଣୀ ନଦୀରେ ବାଜି ରାଉତ ସେତୁ ହେବା ପର ଠାରୁ ଢେଙ୍କାନାଳ ଓ କଟକକୁ ଲୋକ ଏହି ରାସ୍ତା ଦେଇ ଯାଉଛନ୍ତି । ପୂର୍ବରୁ ଡ଼ୁବୁରୀ ଚଣ୍ଡିଖୋଲ ଦେଇ କଟକ ଯାଉଥିବା ଓ କାମାକ୍ଷାନଗର ଦେଇ ଢେଙ୍କାନାଳ ଯାଉଥିବା ଗାଡ଼ି ସବୁ ଭୁବନ ସହର ଦେଇ ଏହି ରାସ୍ତାରେ ଯାଉଛନ୍ତି । ତାଳଚେର ଠାରୁ ଡ଼ୁବୁରୀ ଦେଇ ଯାଉଥିବା ଲୁହାପଥର , କୋଇଲା ଓ କ୍ରୋମାଇଟ୍ ବୋଝେଇ ଭାରି ଯାନ ଗୁଡିକ ମଧ୍ଯ ଏହି ରାସ୍ତାରେ ଯାଉଛନ୍ତି । ଯାହା ଫଳରେ ଅନେକ ସମୟରେ ଘଣ୍ଟା ଘଣ୍ଟା ଧରି ରାସ୍ତାରେ ଗାଡି ଅଟକିବା ସହିତ ଆମ୍ବୁଲାନ୍ସ ମଧ୍ୟ ଅଟକି ଯାଉଛି । ଏଥିସହିତ ଅନେକ ଥର ଦୁର୍ଘଟଣା ଘଟି ଅନେକ ଧନଜୀବନ ହାନି ଘଟିଲାଣି । ସ୍କୁଲ କଲେଜ ପିଲାମାନେ ମଧ୍ୟ ବିପଦପୂର୍ଣ୍ଣ ଭାବରେ ଯିବା ଆସିବା କରୁଛନ୍ତି। ଯାହାକି ଏବେ ଭୁବନ ବାସିନ୍ଦାଙ୍କ ପାଇଁ ମୁଣ୍ଡବ୍ୟଥାର କାରଣ ପାଲଟିଛି।
ଭୁବନ ସହର ମଧ୍ୟ ଦେଇ ଦୈନିକ ଶହ ଶହ ଭାରି ଯାନ ଚଳାଚଳ କରୁଛି । ଯାହା ପାଇଁ ସାଧାରଣ ଲୋକମାନେ ବହୁ ଅସୁବିଧାର ସମ୍ମୁଖୀନ ହେଉଛନ୍ତି । ସେଥିପାଇଁ ରଗଡ଼ି ଛକଠାରୁ ଭୁବନ ଜାତୀୟ ରାଜପଥ ୫୩ ସଂଯୋଗ କରୁଥିବା ରାସ୍ତାରେ ଆଉ ଏକ ବାଇପାସ ରାସ୍ତା ନିର୍ମାଣ ଓ ରଗଡି ଛକ ଠାରେ ନୋ ଏଣ୍ଟ୍ରି କରିବାକୁ ଅଞ୍ଚଳବାସୀ ଦାବି କରିଛନ୍ତି । ସେପଟେ ଏହି ବିଷୟରେ ଅନୁଧ୍ୟାନ କରିବା ସହିତ ନୋ ଏଣ୍ଟ୍ରି କରିବା ପାଇଁ ବିଭିନ୍ନ ଦିଗକୁ ବିଚାରକୁ ନିଆଯିବ ବୋଲି କହିଛନ୍ତି ଢେଙ୍କାନାଳ ଜିଲ୍ଲାପାଳ ।