ନନ୍ଦିଘୋଷ ବ୍ୟୁରୋ: ବାଂଲାଦେଶରେ ପୁଣି ହିନ୍ଦୁ ମନ୍ଦିର ଉପରେ ଆକ୍ରମଣ ହୋଇଛି । ତିନିଟି ହିନ୍ଦୁ ମନ୍ଦିରରେ ଥିବା ୮ଟି ପ୍ରତିମୂର୍ତ୍ତିକୁ ଭାଙ୍ଗି ଦେଇଛନ୍ତି ଦୁର୍ବୃତ୍ତ। ବାଂଲାଦେଶର ମିମେନସିଂ ଓ ଦିନାଜପୁରରେ ଏହି ଘଟଣା ଘଟିଛି । ଏହି ଘଟଣାରେ ପୋଲିସ ଦୁଇ ଜଣଙ୍କୁ ଗିରଫ କରିଛି । ସଂଖ୍ୟାଲଘୁଙ୍କ ଉପରେ ଆକ୍ରମଣ ବଢିଚାଲିଥିବାବେଳେ ମନ୍ଦିରଗୁଡିକୁ ବି ଟାର୍ଗେଟ କରୁଛନ୍ତି ଦୁର୍ବୃତ୍ତ । ମିମେନସିଂର ହଳୁଆଘାରେ ଥିବା ଦୁଇଟି ମନ୍ଦିର ଓ ସକୁଆରେ ଥିବା ଗୋଟିଏ ମନ୍ଦିରର ପ୍ରତିମୂର୍ତ୍ତିକୁ ଭଙ୍ଗାଯାଇଛି । ବିଲଦୋରାସ୍ଥି ପୋଲସକନ୍ଦା ମନ୍ଦିରରେ ବି ଏକ ପ୍ରତିମୂର୍ତ୍ତିକୁ ଭଙ୍ଗାଯାଇଛି ।
ଗତ ମଙ୍ଗଳବାର ଦିନାଜପୁରରେ ଥିବା ଝାରବାରି ଶାସନ କାଳୀ ମନ୍ଦିରରେ ଦୁର୍ବୃତ୍ତମାନେ ୫ଟି ମୂର୍ତ୍ତି ଭାଙ୍ଗିଥିିଲେ । ଗତ ସପ୍ତାହରେ ସୁନାମଗଞ୍ଜ ଜିଲ୍ଲାରେ ହିନ୍ଦୁମାନଙ୍କ ଘର ଓ ଦୋକାନ ଉପରେ ଆକ୍ରମଣ କରାଯିବା ସହ ମନ୍ଦିରଗୁଡିକୁ ଭାଙ୍ଗିଥିଲେ ଦୁର୍ବୃତ୍ତ । ଗତ ଅଗଷ୍ଟରେ ଶେଖ ହସିନା ସରକାରର ପତନ ପରଠାରୁ ଦେଶରେ ସଂଖ୍ୟାଲଘୁଙ୍କ ଉପରେ ଆକ୍ରମଣ ବୃଦ୍ଧି ପାଉଛି ।
