ନୂଆଦିଲ୍ଲୀ : ଅଡୁଆରେ ବଲିଉଡ୍ ଅଭିନେତ୍ରୀ ନର୍ଗିସ ଫାଖରିଙ୍କ ଭଉଣୀ । ଫିଲ୍ମ ରକଷ୍ଟାରରେ ରଣବୀର କପୁରଙ୍କ ସହ ନଜର ଆସିଥିବା ନର୍ଗିସ ଫାଖରିଙ୍କ ଭଉଣୀ ଆଲିଆ ଫାଖରିଙ୍କ ନାଁରେ ଏକ ସାଂଘାତିକ ଖବର ସାମ୍ନାକୁ ଆସିଛି । ପୂର୍ବତନ ପ୍ରେମିକଙ୍କୁ ପୋଡି ମାରିବା ମାମଲାରେ ଆଲିଆ ଫାଖରିଙ୍କୁ ଗିରଫ କରିଛି ନ୍ୟୁୟର୍କ ପୋଲିସ । ଏହି ଖବର ଏବେ ସବୁଆଡେ ଚର୍ଚ୍ଚାର ବିଷୟ ପାଲଟିଛି ।
ସୂଚନା ମୁତାବକ, ନର୍ଗିସ ଫାଖରିଙ୍କ ଭଉଣୀ ଆଲିଆ ଫାଖରି ନିଜ ପୂର୍ବତନ ପ୍ରେମିକଙ୍କ ସହିତ ପୁଣି ସମ୍ପର୍କ ସୁଧାରିବାକୁ ଚାହୁଁଥିଲେ । କିନ୍ତୁ ତାଙ୍କ ପୂର୍ବତନ ପ୍ରେମିକ ଏଡଓ୍ୱାଡ ଜ୍ୟାକୋବସ୍ ଏପରି ଚାହୁଁନଥିଲେ ଏବଂ ସେ ତାଙ୍କ ସହ ରିଲେସନସିପରେ ରହିବାକୁ ମନା କରିଦେଇଥିଲେ । ଏଥିରେ ରାଗିଯାଇ ଆଲିଆ ନିଜ ପୂର୍ବତନ ପ୍ରେମିକ ଏଡଓ୍ୱାଡ୍ ଏବଂ ତାଙ୍କ ଗଲଫ୍ରେଣ୍ଡ ଇଟିଏନକୁ ହତ୍ୟା କରିଥିଲେ । ଉଭୟଙ୍କୁ ଗ୍ୟାରେଜରେ ନିଆଁ ଲଗାଇ ପୋଡି ମାରିଦେଇଥିବା ଅଭିଯୋଗ ହୋଇଛି । ଏବେ ଏହି ମାମଲାରେ ଆଲିଆ ଫାଖରିଙ୍କୁ ଗିରଫ କରି ପଚରାଉଚରା କରୁଛି ପୋଲିସ ।
ଆଲିଆ ଫାଖରିଙ୍କ ନାଁରେ ରହିଛି ଅନେକ ଅଭିଯୋଗ । ସୂଚନା ଅନୁସାରେ, ୨୬ ନଭେମ୍ୱରରେ ଗିରଫ କରାଯାଇଥିଲା । ଏହା ପର ଦିନ ତାଙ୍କୁ ନିଆଁ ଲଗାଇବା ତଥା ପ୍ରଥମ ସ୍ତରୀୟ ହତ୍ୟା ମାମଲାରେ ଦୋଷୀ ସାବ୍ୟସ୍ତ କରିଥିଲେ । ଯଦି ଏହି ଅଭିଯୋଗ ଗୁଡିକ ସତ ପ୍ରମାଣିତ ହୁଏ ,ତେବେ ଆଲିଆଙ୍କୁ ଆଜୀବନ କାରାଦଣ୍ଡ ହୋଇପାରେ ବୋଲି କୁହାଯାଉଛି ।
