ଭୁବନେଶ୍ବର: ସଫେଇ କର୍ମଚାରୀ ସହଦେବ ନାୟକ ହତ୍ୟା ମାମଲା । ମଞ୍ଚେଶ୍ବର ଥାନାରେ ଆତ୍ମସମର୍ପଣ କଲା ମୁଖ୍ୟ ଅଭିଯୁକ୍ତ ରମା ନାୟକ । ମଞ୍ଚେଶ୍ବର ଥାନାରେ ଆତ୍ମସମର୍ପଣ ପରେ ରମାକୁ ଗିରଫ କରିଛି ପୋଲିସ। ୪୦ ଦିନ ପରେ ସେ ଆତ୍ମସମର୍ପଣ କରିଛି । ଆଜି ତାକୁ କୋର୍ଟଚାଲାଣ କରାଯିବ । ଜାନୁଆରୀ ୮ ତାରିଖରେ ସଫେଇ କର୍ମଚାରୀ ସହଦେବ ନାୟକଙ୍କୁ ହତ୍ୟା କରାଯାଇଥିଲା। ଭୁବନେଶ୍ବର ରସୁଲଗଡ଼ ଓଭରବ୍ରିଜ ଉପରେ ସହଦେବଙ୍କ ମୁଣ୍ଡ ଗଣ୍ଡି ଅଲଗା କରିଦେଇଥିଲେ ଅଭିଯୁକ୍ତ । ଘଟଣାରେ ମୋଟ ୬ ଜଣଙ୍କୁ ଗିରଫ କରିସାରିଛି ପୋଲିସ । ମୁଖ୍ୟ ଅଭିଯୁକ୍ତକୁ ଗିରଫ ଦାବି କରି ଧାରଣାରେ ବସିଥିଲେ ସହଦେବଙ୍କ ପତ୍ନୀ । ନହେଲେ ବିଧାନସଭା ଆଗରେ ଧାରଣାରେ ବସିବେ ବୋଲି ସେ ଚେତାବନୀ ଦେଇଥିଲେ ।
ଯାତ୍ରା ପେଣ୍ଡାଲରେ ଆଧାତ୍ମିକ ବାତାବରଣ: ୧୫ ମିନିଟ୍ ଭିତରେ ପରିବେଷଣ ହେଲା ରାମାୟଣ
ଭୁବନେଶ୍ବର: ଯାତ୍ରା ପେଣ୍ଡାଲରେ ଜମିଲା ରାମାୟଣ । ଖଣ୍ଡଗିରି ମେଳାରେ ତୁଳସୀ ଗଣନାଟ୍ୟ ତରଫରୁ ପରିବେଷଣ ହେଲା ରାମାୟଣ । ମୋବାଇଲ ଟର୍ଚ୍ଚ ଜାଳି ପ୍ରଭୁ ରାମ ଲକ୍ଷ୍ମଣ ଓ ମା’ ସୀତାଙ୍କୁ ଦର୍ଶକମାନେ ସ୍ଵାଗତ କରିଛନ୍ତି । ଲାଇଟ ସାଉଣ୍ଡ ଓ ମିଉଜିକରେ ସହ କମ୍ପିଲା ଜୟ ଶ୍ରୀରାମ ନାରା । ୧୫ ମିନିଟ୍ ଭିତରେ ପରିବେଷଣ ହେଲା ରାମାୟଣ । କେଇ ମିନିଟ ଭିତରେ ରାମଙ୍କ ବନବାସ, ମା ସୀତାଙ୍କ ହରଣ, ରାମ ସେତୁ ନିର୍ମାଣ, ଲଙ୍କା ବିଜୟ ଓ ରାବଣ ଦହନକୁ ଦେଖାଇଲେ କଳାକାର । ହନୁମାନ ଲଙ୍କାରେ ତାଣ୍ଡବ ରଚାଇଥିବା ବେଳେ ମଞ୍ଚ ଉପରେ ପାଚିଲା କଦଳୀ କାନ୍ଦିରୁ କଦଳୀ ଛିଡାଇ ଲୋକଙ୍କ ଉପରକୁ ଫିଙ୍ଗି ଥିଲେ । ଆଉ ହନୁମାନଙ୍କ ପ୍ରସାଦ ଭାବି ଦର୍ଶକମାନେ ଖାଇଥିଲେ । ଯାତ୍ରାରେ ସମ୍ପୂର୍ଣ୍ଣ ଆଧାତ୍ମିକ ବାତାବରଣ ସୃଷ୍ଟି ହୋଇଥିଲା ।
ଶ୍ରୀମନ୍ଦିରରେ ବଡ଼ ମହାସ୍ନାନ: ରକ୍ତର ଛିଟା ପଡ଼ିଥିବା ଦେଖିବା ପରେ ବନ୍ଦ ହେଲା ଦର୍ଶନ
ପୁରୀ: ଶ୍ରୀମନ୍ଦିରରେ ବଡ଼ ମହାସ୍ନାନ । ବେହେରଣ ଦ୍ୱାର ନିକଟରେ ରକ୍ତ ଛିଟା ପଡ଼ିଥିବା ଦେଖିବା ପରେ ବଡ଼ ମହାସ୍ନାନ କରାଯାଇଛି । ଅବକାଶ ପୂଜା ପରେ ମଇଲମ, ରୋଷହୋମ ହୋଇ ମହାପ୍ରଭୁଙ୍କ ବେଶ ହେବା ସମୟରେ ସେବାୟତ ଦେଖିବାକୁ ପାଇଥିଲେ ରକ୍ତ ଛିଟା । କେଉଁ କାରଣ ଯୋଗୁଁ ରକ୍ତ ଛିଟା ପଡ଼ିଥିଲା ସେନେଇ ସେବାୟତଙ୍କ ଦୃଷ୍ଟି ଆକର୍ଷଣ ହେବାରୁ ଦର୍ଶନ ବନ୍ଦ କରାଯାଇ ମହାସ୍ନାନ ଜାରି ରହିଛି । ମହାସ୍ନାନ ପରେ ଚୂନ ପାଣି ପଡି ଗୋପାଳ ବଲ୍ଲଭ ନୀତି ଅନୁଷ୍ଠିତ ହେବ l
ଆଜି ଆମେରିକାରୁ ଭାରତ ଫେରିବେ ଆଉ ୧୧୯ ଭାରତୀୟ
ନୂଆଦିଲ୍ଲୀ: ଦ୍ବିତୀୟ ପର୍ଯ୍ୟାୟରେ ଆଜି ଆମେରିକାରୁ ଭାରତ ଫେରିବେ ଆଉ ୧୧୯ ଭାରତୀୟ । ପଞ୍ଜାବ ଅମୃତସରରେ ପହଞ୍ଚିବ ଆମେରିକୀୟ ବିମାନ ସି-17 ଗ୍ଲୋବମାଷ୍ଟର । ପୂର୍ବରୁ ପ୍ରଥମ ପର୍ଯ୍ୟାୟରେ ଭାରତ ଆସିଥିଲେ ୧୦୪ ଭାରତୀୟ । ଆମେରିକାରେ ବେଆଇନ ଭାବେ ବାସ କରିଥିବା ଲୋକଙ୍କୁ ନିଜ ନିଜ ଦେଶକୁ ଫେରାଇଦିଆଯିବା ପ୍ରକ୍ରିୟା ଜାରି ରହିଥିବାବେଳେ ଭାରତକୁ ବହୁ ସଂଖ୍ୟକ ନାଗରିକ ଫେରିବା ସମ୍ଭାବନା ରହିଛି । ଫେରିବାକୁ ଥିବା ଲୋକଙ୍କ ମଧ୍ୟରେ ସର୍ବାଧିକ ୬୭ ଜଣ ଅଛନ୍ତି ପଞ୍ଜାବର । ହରିୟାଣାର ୩୩, ଗୁଜରାଟର ୮ ଜଣ, ଉତ୍ତରପ୍ରଦେଶର ୩ଜଣ, ରାଜସ୍ଥାନର ୨ ଜଣ, ମହାରାଷ୍ଟ୍ରର ୨ ଜଣ, ହିମାଚଳ ପ୍ରଦେଶ ଓ ଜାମ୍ମୁ ଓ କାଶ୍ମୀରର ୨ ଜଣ ଭାରତ ଫେରିେବ । ଦୟନୀୟ ଅବସ୍ଥାରେ ଭାରତୀୟମାନଙ୍କୁ ପଠାଇ ଦିଆଯାଉଥିବା ଘଟଣାକୁ ନେଇ ଦେଶରେ ବିବାଦ ଲାଗିରହିଛି । ଏହି ବିଷୟ ସଂସଦରେ ବି ଉଠିଛି । ପର୍ଯ୍ୟାୟକ୍ରମେ ଆମେରିକାରେ ବାସ କରୁଥିବା ବେଆଇନ ଭାରତୀୟଙ୍କୁ ଫେରାଇ ଅଣାଯିବ ବୋଲି ସୂଚନା ମିଳିଛି ।

