ଭୁବନେଶ୍ବର: ଓଲିଉଡ଼ର ଯୁବ ପ୍ରଯୋଜକ, ଅଭିନେତା, ଗାୟକ ଅଭିନେତା ସୋହମ ସିଂଙ୍କୁ ହୃଦଘାତ । ଏକ ଘରୋଇ ଡାକ୍ତରଖାନାରେ ଆଇସିୟୁରେ ଚାଲିଛି ଚିକିତ୍ସା । ଏବେ ତାଙ୍କ ସ୍ବାସ୍ଥ୍ୟାବସ୍ଥା ଠିକ ଥିବା ଜଣାପଡ଼ିଛି । ତାଙ୍କ ସିନେମା ଅଜାତ ଶତ୍ରୁ, ଆଇ ଲଭ ୟୁ ପ୍ରିୟା ଏବଂ ରାଉଡି ରାଜାକୁ ଦର୍ଶକ ବେଶ ପସନ୍ଦ କରିଥିଲେ । ଆଗକୁ ଏକ ବଡ଼ ବଜେଟର ଆକ୍ସନ ସିନେମା ଆସୁଛି ଯାହାର ନାଁ ରଖିଛନ୍ତି ଆଲ୍ଲୀ ବଜରଙ୍ଗୱାଲି l ସେ ଓଡ଼ିଆ ଚଳଚ୍ଚିତ୍ର ଜଗତର ଜଣେ ଚର୍ଚ୍ଚିତ ଚେହେରା l ତାଙ୍କ ଆଶୁ ଆରୋଗ୍ୟ ପାଇଁ କରି ପ୍ରଶଂସକ ଓ ଓଲିଉଡ଼ ଜଗତର ବିଭିନ୍ନ ବ୍ୟକ୍ତି ବିଶେଷ ମହାପ୍ରଭୁ ଜଗନ୍ନାଥଙ୍କ ପାଖରେ ପ୍ରାର୍ଥନ କରିଛନ୍ତି ।
କେବେ ସୁଧୁରିବ ବ୍ରହ୍ମପୁର ଏମକେସିଜି ମେଡିକାଲ ସମସ୍ୟା
ବ୍ରହ୍ମପୁର: ଦିନକୁ ଦିନ ବଢିବାରେ ଲାଗିଛି ବ୍ରହ୍ମପୁର MKCG ମେଡକାଲ ସମସ୍ଯା । ଦକ୍ଷିଣ ଓଡ଼ିଶାର ଏହି ପ୍ରମୁଖ ହସ୍ପିଟାଲ ଅନେକ ସମୟରେ ବିଭିନ୍ନ କାରଣ ପାଇଁ ଚର୍ଚ୍ଚାରେ ରହି ଆସିଛି । ଏବେ ଖରାଦିନ ଆସିଥିବା ବେଳେ ୱାର୍ଡରେ ଫ୍ୟାନ ଓ ଲାଇଟ ଖରାପ ଯୋଗୁଁ ହନ୍ତସନ୍ତ ହେଉଛନ୍ତି ରୋଗୀ ଓ ତାଙ୍କ ସମ୍ପର୍କୀୟ । ସେପଟେ କର୍ତ୍ତୃପକ୍ଷ କହିଛନ୍ତ, ଖୁବଶୀଘ୍ର ଟେଣ୍ଡର କରି କରାଯିବ ସମାଧାନ ।
ସମସ୍ଯା ଘେରରେ ବ୍ରହ୍ମପୁର ଏମକେସିଜି ମେଡିକାଲ । ଦକ୍ଷିଣ ଓଡ଼ିଶାର ଏହି ବଡ଼ ହସ୍ପିଟାଲରେ ହନ୍ତସନ୍ତ ରୋଗୀ । ମଶା ସାଙ୍ଗକୁ ଗରମରେ ଆଉଟୁ ପାଉଟୁ ଲୋକେ । ଅନେକ ୱାର୍ଡରେ ଲାଇଟ୍ ଜଳୁ ନଥିବା ବେଳେ ବୁଲୁନି ଫ୍ଯାନ୍ । ବାରମ୍ବାର ଅଭିଯୋଗ ପରେ ବି ବେଫିକର ହସ୍ପିଟାଲ ମ୍ୟାନେଜର୍ । ହସ୍ପିଟାଲରେ ପାନୀୟଜଳ, ବିଦ୍ୟୁତ୍ ବ୍ଯବସ୍ଥା ସହ ଉପକରଣ ପରିମଳ ଓ ସ୍ଵଚ୍ଛତା ପାଇଁ ପ୍ରତିବର୍ଷ ଖର୍ଚ୍ଚ ହେଉଛି ଲକ୍ଷାଧିକ ଟଙ୍କା ।
ଡାକ୍ତରଖାନାରେ ରହିଛି ୨୦ରୁ ଅଧିକ ବିଭାଗ । ପ୍ରତିଦିନ ୨ ହଜାରରୁ ଅଧିକ ରୋଗୀ ଏଠାକୁ ଆସନ୍ତି । ହେଲେ ଅନେକ ସମୟରେ ସମସ୍ଯା ପାଇଁ ଚର୍ଚ୍ଚାରେ ରହି ଆସିଛି ହସ୍ପିଟାଲ । ସ୍ତ୍ରୀ ଓ ପ୍ରସୂତି ବିଭାଗ ତୃତୀୟ ମହଲାର ଅନେକ ପଙ୍ଖା ଅଚଳ ହୋଇଥିବାରୁ ପ୍ରସୂତି ଓ ଶିଶୁ କଲବଲ ହେଉଛନ୍ତି । ନିରାଶ୍ରୟ, ଅସ୍ଥିଶଲ୍ଯ, ସବୁ ବିଭାଗରେ ସମାନ ଅବସ୍ଥା ।
ମେଡିକାଲକୁ ଚିକିତ୍ସା ପାଇଁ ଆସୁଥିବା ରୋଗୀ ଡେଙ୍ଗୁ, ମ୍ଯାଲେରିଆ ନେଇ ଫେରୁଛନ୍ତି । ସମସ୍ୟା ଦୀର୍ଘ ଦିନ ହେଲା ଲାଗି ରହିଥିଲେ ସୁଦ୍ଧା ହସ୍ପିଟାଲ ମ୍ୟାନେଜର୍ ପଦକ୍ଷେପ ନେଉ ନଥିବା ଅଭିଯୋଗ ହୋଇଛି । ତେବେ ସମସ୍ୟା ସାଧାରଣ ବିଦ୍ୟୁତ ବିଭାଗ ସମସ୍ତ ବିଦ୍ୟୁତ ସମ୍ବନ୍ଧୀୟ କାର୍ଯ୍ୟ ତଦାରଖ କରୁଛି । ଲାଗୁ ନଥିବା ଫ୍ୟାନ ସହ ଲାଇଟକୁ ଏକା ସାଙ୍ଗରେ ହିସାବ କରି ବିଭାଗକୁ ଦିଆଯିବା ପରବର୍ତ୍ତୀ ପର୍ଯ୍ୟାୟରେ ଟେଣ୍ଡର୍ ପ୍ରକ୍ରିୟା ମାଧ୍ୟମରେ କାମ ସଂପୂର୍ଣ୍ଣ ହେବ ବୋଲି କର୍ତ୍ତୃପକ୍ଷ ସୂଚନା ଦେଇଛନ୍ତି । ତେବେ ଏନେଇ କ୍ଯାମେରା ଆଗରେ କିଛି ପ୍ରତିକ୍ରିୟା ରଖି ନାହାନ୍ତି ।
ବେଆଇନ ୟୁଜର ଫି’ ଆଦାୟକୁ ବିରୋଧ, ଗର୍ଜିଲେ ଅଟୋ ଚାଳକ
ପୁରୀ: ଗର୍ଜିଲେ ଅଟୋ ଚାଳକ । ବେଆଇନ ଭାବେ ୟୁଜର ଫି ଆଦାୟକୁ ବିରୋଧ କରି ପୁରୀ ସହର ଅଟୋ ଓ ଟୋଟୋ ମିଳିତ ମହାମଞ୍ଚ ପକ୍ଷରୁ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରାଯାଇଛି । ତୁରନ୍ତ ଏହା ପ୍ରତ୍ୟାହାର ନ ହେଲେ ଅଟୋ ଚାଳକ ରାଜରାସ୍ତାକୁ ଓହ୍ଲାଇ ଅଖ, ଚକ ବନ୍ଦ କରିବେ ବୋଲି ଚେତାବନୀ ଦେଇଛନ୍ତି ।
ଶରଧା ବାଲିରୁ ପ୍ରାୟ ୫୦୦ରୁ ଅଧିକ ଅଟୋ ଚାଳକ ଶୋଭାଯାତ୍ରାରେ ଆସି ଜିଲ୍ଲାପାଳଙ୍କ କାର୍ଯ୍ୟଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିଥିଲେ । ଅଟୋ ଚାଳକ ପରିବହନ ବିଭାଗକୁ ୫ ପ୍ରକାର କର ଦେଉଥିବାବେଳେ ପୁରୀ ସହରରେ ଅଟୋ ଚାଳକଙ୍କଠାରୁ ପୌରପାଳିକା ବେଆଇନ ଭାବେ ୟୁଜର ଫି ବାବଦରେ ୧୦୦୦ ଟଙ୍କା ଆଦାୟ କରୁଛି । ଏଥିପାଇଁ ଆଇନରେ କୌଣସି ବ୍ୟବସ୍ଥା ନାହିଁ । ପୂର୍ବରୁ ଜିଲ୍ଲା ଓ ପୋଲିସ ପ୍ରଶାସନ ପୁରୀ ସହରରେ ଅଟୋ ଚାଳକମାନଙ୍କୁ ଅଟୋର କାଗଜପତ୍ର ପଞ୍ଜିକରଣ ନିମନ୍ତେ ନିଷ୍ପତ୍ତି ନେଇଥିଲେ । ଏହି ନିଷ୍ପତ୍ତି ଅନୁଯାୟୀ ଅଟୋ ଚାଳକମାନେ ପରିବହନ କାର୍ଯ୍ୟାଳୟରେ ପଞ୍ଜୀକରଣ କରୁଥିଲେ । କିନ୍ତୁ କୌଣସି ଅଟୋ ସଂଘ ସହ ଆଲୋଚନା ନକରି ପୁରୀ ପୌରପାଳିକା ଅଟୋ ଚାଳକଙ୍କଠାରୁ ବେଆଇନ ଭାବେ ୧୦୦୦ ଟଙ୍କା ୟୁଜର ଫିସ ଆଦାୟ କରୁଛନ୍ତି । ଏହା ତୁରନ୍ତ ପ୍ରତ୍ୟାହାର ପାଇଁ ସଂଘ ଦାବି କରିଛି ।
ନୂଆ ମୁଖ୍ୟ ନିର୍ବାଚନ କମିଶନଙ୍କ ନିଯୁକ୍ତିକୁ ନେଇ ରାହୁଲ ଉଠାଇଲେ ପ୍ରଶ୍ନ
ନୂଆଦିଲ୍ଲୀ: ଦେଶର ନୂଆ ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କ ନିଯୁକ୍ତିକୁ ନେଇ ପ୍ରଶ୍ନ ଉଠାଇଲେ ବିରୋଧୀ ଦଳ ନେତା ରାହୁଲ ଗାନ୍ଧୀ । ସେ କହିଛନ୍ତି, ସରକାରଙ୍କ ରାତି ଅଧିଆ ନିଯୁକ୍ତି ଲୋକଙ୍କ ମନରେ ସନ୍ଦେହ ସୃଷ୍ଟି କରିଛି । ଭାରତୀୟ ନିର୍ବାଚନ କମିଶନର ଏକ ନିରପେକ୍ଷ ଓ ସାମ୍ବିଧାନିକ ସଂସ୍ଥା । ଏହାର ମୁଖ୍ୟ ଚୟନ ବେଳେ ସୁପ୍ରିମକୋର୍ଟର ପ୍ରଧାନ ବିଚାରପତିଙ୍କୁ ବାଦ ଦେବା ପୂରା ପ୍ରକ୍ରିୟା ଉପରେ ପ୍ରଶ୍ନ ଚିହ୍ନ ଲଗାଇଛି ।
ବିରୋଧୀ ଦଳ ନେତା ହିସାବରେ ସମ୍ବିଧାନର ଲକ୍ଷ୍ୟ ଓ ଭିତ୍ତିକୁ ସୁରକ୍ଷା ଦେବା ମୋର କର୍ତ୍ତବ୍ୟ । ବର୍ତ୍ତମାନର ସରକାର ସିଇସି ନିଯୁକ୍ତି ସମୟରେ ଅନେକ ଦିଗକୁ ଅଣଦେଖା କରୁଥିବା ରହୁଲ ଅଭିଯୋଗ କରିଛନ୍ତି ।
ଗତକାଲି ପୂର୍ବତନ ଆଇଏଏସ ଅଫିସର ଜ୍ଞାନେଶ କୁମାରଙ୍କୁ ସରକାର ନୂଆ ସିଇସି ଭାବେ ନିଯୁକ୍ତି ଦେଇଛନ୍ତି । ନୂଆ ନିୟମ ଅନୁସାରେ ଏହି ଚୟନ ହୋଇଛି । ପୂର୍ବରୁ ପ୍ରଧାନମନ୍ତ୍ରୀ, ବିରୋଧୀ ଦଳ ନେତା ଓ ସୁପ୍ରିମକୋର୍ଟଙ୍କ ପ୍ରଧାନ ବିଚାରପତିଙ୍କୁ ନେଇ ଗଠିତ କମିଟି ସିଇସି ମନୋନୀତ କରୁଥିଲେ । ନୂଆ ନିୟମ ଅନୁସାରେ ପ୍ରଧାନ ବିଚାରପତିଙ୍କ ବଦଳରେ ମନ୍ତ୍ରିମଣ୍ଡଳର ଜଣେ ସଦସ୍ଯଙ୍କୁ ସାମିଲ କରାଯାଇଛି । କିଛି ଦିନ ତଳେ ଏ ପ୍ରସଙ୍ଗକୁ ଲୋକସଭାରେ ଉଠାଇଥିଲେ ରାହୁଲ । ସେତେବେଳେ ଆଶଂକା କରିଥିଲେ ପ୍ରଧାନମନ୍ତ୍ରୀ ଓ ତାଙ୍କ ମନ୍ତ୍ରିମଣ୍ଡଳର ସଦସ୍ଯଙ୍କ ଦ୍ବାରା ଚୟନ ବ୍ଯକ୍ତି ହିଁ ସିଇସି ହେବେ । ଏଭଳି ସ୍ଥିତିରେ ସେ କମିଟିରେ ତାଙ୍କର ମତ ଓ ମନ୍ତବ୍ଯ କେତେ ଗୁରୁତ୍ବ ବହନ କରିବ ତାକୁ ନେଇ ସେ ସନ୍ଦେହ ପ୍ରକଟ କରିଥିଲେ । ଏବେ ରାହୁଲଙ୍କ ସହିତ ବହୁ କଂଗ୍ରେସ ନେତା ଆପତ୍ତି ପ୍ରକାଶ କରି କହିଛନ୍ତି ଯେ, ଏ ସମ୍ବନ୍ଧରେ ଏକ ମାମଲା ସୁପ୍ରିମକୋର୍ଟରେ ରହିଛି । ଆସନ୍ତାକାଲି ଏହାର ଶୁଣାଣି ଅଛି । ଠିକ ୨୪ ଘଣ୍ଟା ପୂର୍ବରୁ ତରବରିଆ ଭାବେ ସିଇସି ନିଯୁକ୍ତି ସାମ୍ବିଧାନିକ ସଂସ୍ଥାର ନିରପେକ୍ଷତା ଉପରେ ପ୍ରଶ୍ନବାଚୀ ସୃଷ୍ଟି କରିଛି ।
ନେପାଳୀ ଛାତ୍ରୀ ମୃତ୍ୟୁ ଓ ପରବର୍ତ୍ତି ଛାତ୍ର ଅଶାନ୍ତି ଘଟଣାର ତଦନ୍ତ ପାଇଁ ଉଚ୍ଚସ୍ତରୀୟ ତଥ୍ୟ ଅନୁସନ୍ଧାନକାରୀ କମିଟି ଗଠନ
ଭୁବନେଶ୍ବର: କିଟ ବିଶ୍ବବିଦ୍ୟାଳୟରେ ବିଟେକ ତୃତୀୟ ବର୍ଷର ନେପାଳୀ ଛାତ୍ରୀ ପ୍ରକ୍ରିତି ଲାମସାଲ ଆତ୍ମହତ୍ୟା ଏବଂ ପରବର୍ତ୍ତି ଛାତ୍ର ଅଶାନ୍ତି ଘଟଣାର ତଦନ୍ତ ପାଇଁ ରାଜ୍ୟ ସରକାର ଗଠନ କଲେ ଉଚ୍ଚସ୍ତରୀୟ ତଥ୍ୟ ଅନୁସନ୍ଧାନକାରୀ କମିଟି । ଗୃହ ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ, ମହିଳା ଶିଶୁ ବିକାଶ ବିଭାଗର ପ୍ରମୁଖ ସଚିବ ଓ ଉଚ୍ଚ ଶିକ୍ଷା ବିଭାଗର ସଚିବଙ୍କୁ ନେଇ ଏହି କମିଟି ଗଠନ କରାଯାଇଛି ।
କିଟ୍ ବିଶ୍ବବିଦ୍ୟାଳୟକୁ ନୋଟିସ ଜାରି କରାଯାଇଥିବା ବେଳେ କମିଟି ରିପୋର୍ଟ ଆଧାରରେ ପରବର୍ତ୍ତି କାର୍ଯ୍ୟାନୁଷ୍ଠାନ ନିଆଯିବ। ଛାତ୍ରଛାତ୍ରୀଙ୍କୁ ଆକ୍ରମଣ ଓ ଦୁର୍ବ୍ୟବହାର ଘଟଣାର ତଦନ୍ତ କରାଯାଉଛି । ଦୋଷୀ ସାବ୍ୟସ୍ତ ହେଲେ ସଂପୃକ୍ତ ବ୍ୟକ୍ତିଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ରାଜ୍ୟ ସରକାର ସ୍ପଷ୍ଟ କରିଛନ୍ତି । ଏହି ଘଟଣାରେ ୩ ଜଣ ନିର୍ଦ୍ଦେଶକଙ୍କୁ ଗିରଫ କରାଯାଇଛି । ଜେନେରାଲ HR ନିର୍ଦ୍ଦେଶକ ଶିବାନନ୍ଦ ମିଶ୍ର, ଆଡମିନ୍ ନିର୍ଦ୍ଦେଶକ ପ୍ରତାପ କୁମାର ଚମ୍ପତ୍ତି ଏବଂ ହଷ୍ଟେଲ ନିର୍ଦ୍ଦେଶକ ସୁଧୀର ରଥଙ୍କୁ ଗିରଫ କରିଛି ଇନଫୋସିଟି ଥାନା ପୋଲିସ ।
ଏମାନଙ୍କ ସହିତ ଦୁଇ ସିକ୍ୟୁରିଟି ଗାର୍ଡ ରମାକାନ୍ତ ନାୟକ ଏବଂ ଯୋଗେନ୍ଦ୍ର ବେହେରାଙ୍କୁ ମଧ୍ୟ ଗିରଫ କରି କୋର୍ଟ ଚାଲାଣ କରିଛି ପୋଲିସ । ବିଶ୍ବବିଦ୍ୟାଳୟର କିଛି କର୍ମଚାରୀ ଆନ୍ଦୋଳନରତ ଛାତ୍ରଛାତ୍ରୀଙ୍କୁ କରିଥିବା ଦୁର୍ବବ୍ୟହାର ପାଇଁ ସେମାନେ ଅନୁତପ୍ତ ବୋଲି କୁଳପତି ପ୍ରଫେସର ସରନଜିତ ସିଂହ କହିଛନ୍ତି ।
କିଟ ପକ୍ଷରୁ ମଧ୍ୟ ଗିରଫ ଦୁଇ ସୁରକ୍ଷା କର୍ମୀଙ୍କୁ ବହିଷ୍କାର କରାଯାଇଥିବା ବେଳେ, ଆନ୍ତର୍ଜାତିକ ରିଲେସନ କାର୍ଯ୍ୟାଳୟର ଜଣେ ବରିଷ୍ଠ ପ୍ରଶାସନିକ ଅଧିକାରୀଙ୍କୁ ନିଲମ୍ବିତ କରାଯାଇଥିବା ବିଶ୍ବବିଦ୍ୟାଳୟର ରେଜିଷ୍ଟ୍ରାର ସୂଚନା ଦେଇଛନ୍ତି । ଏହାସହ ନେପାଳୀ ଛାତ୍ରଛାତ୍ରୀଙ୍କ ପ୍ରତ୍ୟାବର୍ତ୍ତନ ପାଇଁ କ୍ୟାମ୍ପସ-୬ରେ ବିଶ୍ବବିଦ୍ୟାଳୟ ପକ୍ଷରୁ ଏକ କଣ୍ଟ୍ରୋଲ ରୁମ ଖୋଲାଯାଇଛି । ପୋଲିସ ମଧ୍ୟ ନେପାଳୀ ଛାତ୍ରଛାତ୍ରୀଙ୍କ ସୁରକ୍ଷା ପାଇଁ ଏକ ଟେଲିଫୋନ ନମ୍ବର ଜାରି କରିଛି ।
ସେପଟେ ଆଜି ଏମ୍ସରେ ମୃତ ଛାତ୍ରୀଙ୍କ ବାପା ଓ ସମ୍ପର୍କୀୟଙ୍କ ଉପସ୍ଥିତିରେ ଶବ ବ୍ୟବଚ୍ଛେଦ କରାଯାଇଛି । ଆସନ୍ତାକାଲି ସେମାନଙ୍କୁ ମୃତଦେହ ହସ୍ତାନ୍ତର କରାଯିବ । କିଟ ଛାତ୍ରୀ ଆତ୍ମହତ୍ୟା ଓ ପରବର୍ତ୍ତୀ ଅଶାନ୍ତ ପରିସ୍ଥିତି ପ୍ରତିବାଦରେ ବିଭିନ୍ନ ଛାତ୍ର ସଂଗଠନ ପକ୍ଷରୁ କିଟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରାଯିବା ସହ ଥାନାରେ ମାମଲା ଦାୟର କରାଯାଇଛି । ଆଜି ବିଧାନସଭାର ଶୂନ୍ୟକାଳରେ ମଧ୍ୟ ବିଭିନ୍ନ ଦଳର ବିଧାୟକ ଉଦବେଗ ପ୍ରକାଶ କରିଥିଲେ ।
ବିପର୍ଯ୍ୟସ୍ତ ଆଇନ ଶୃଙ୍ଖଳାକୁ ନେଇ ରାଜ୍ୟ ସରକାରଙ୍କୁ ଘେରିଲେ ବିରୋଧୀ
ଭୁବନେଶ୍ବର: ରାଜ୍ୟରେ ବିପର୍ଯ୍ୟସ୍ତ ଆଇନ ଶୃଙ୍ଖଳା ପରିସ୍ଥିତି । ରାଜଧାନୀରେ ପ୍ରଧାନମନ୍ତ୍ରୀଙ୍କ ଗସ୍ତ ସମୟରେ ମୁଣ୍ଡ ଗଡୁଛି । ଖେଳ ସମୟରେ ପୁରୀରେ ବୋମା ମାଡ ହେଉଛି । ରାଜଧାନୀ ଭୁବନେଶ୍ଵରରେ ଲୋକେ ନିଜକୁ ସୁରକ୍ଷିତ ମଣୁନାହାନ୍ତି । ଆପାର୍ଟମେଣ୍ଟରେ ଲୋକଙ୍କୁ ଘରୁ ଚୋରି ହେଉଛି । ସିସିଟିଭିକୁ ବି ଭୟ କରୁନାହାଁନ୍ତି ଲୁଟେରା । ବିଧାୟକଙ୍କୁ ମଧ୍ଯ ଆକ୍ରମଣ ହେଉଛି । ଆଳିରେ ବି ଆଇନ ଶୃଙ୍ଖଲା ପରିସ୍ଥିତି ବିଗିଡ଼ି ଯାଇଛି l ଅପରାଧ ରୋକିବାରେ ରାଜ୍ୟ ସରକାର ବିଫଳ ହୋଇଛନ୍ତି । ପୋଲିସ ସବୁ କ୍ଷେତ୍ରରେ ନିରବ ରହୁଛି । ଆଇନ ଶୃଙ୍ଖଳା ପରିସ୍ଥିତି ନେଇ ଗୃହରେ ଏପରି ବର୍ଷିଛନ୍ତି ବରିଷ୍ଠ ବିଜେଡି ବିଧାୟକ ପ୍ରତାପ ଦେବ ।
ବିପର୍ଯ୍ୟସ୍ତ ଆଇନ ଶୃଙ୍ଖଳା ପରିସ୍ଥିତିକୁ ନେଇ ସରକାର ସଚେତନ ରୁହନ୍ତୁ । ଏହା କ’ଣ ଓଡ଼ିଆ ଅସ୍ମିତା ବୋଲି ପ୍ରଶ୍ନ କରିଛନ୍ତି ପ୍ରତାପ । ଲୋକେ କିପରି ସୁରକ୍ଷିତ ରହିବେ । ଓଡ଼ିଶାରେ ଆଇନ ଶୃଙ୍ଖଳା ନିୟନ୍ତ୍ରଣ କରା ନଗଲେ ନିୟନ୍ତ୍ରଣ ବାହାରକୁ ଚାଲିଯିବ ବୋଲି ସେ ସରକାରଙ୍କୁ ଚେତାଇ ଦେଇଛନ୍ତି । ଏଥିପାଇଁ ଗୃହ ବିଭାଗ ଦାୟୀ ରହିବ ବୋଲି ସେ ଚେତାବନୀ ଦେଇଛନ୍ତି । ଅନେକ ଜାଗାରେ ପୋଲିସ କହୁଛି ଉପରୁ କିଛି ନିର୍ଦ୍ଦେଶ ଆସିନାହିଁ । ଉପରୁ କିଏ ନିର୍ଦ୍ଦେଶ ଦେଉଛି । ରାଜନୈତିକ ହସ୍ତକ୍ଷେପ କିଏ କରୁଛି ବୋଲି ପ୍ରଶ୍ନ କରିଛନ୍ତି ବରିଷ୍ଠ ବିଜେଡି ବିଧାୟକ ପ୍ରତାପ ଦେବ ।
ସେପଟେ ବିପର୍ଯ୍ୟସ୍ତ ଆଇନ ଶୃଙ୍ଖଳା ପରିସ୍ଥିତି ନେଇ ଗୃହରେ ବର୍ଷିଛନ୍ତି କଂଗ୍ରେସ ବିଧାୟକ ଦଳ ନେତା ରାମଚନ୍ଦ୍ର କାଡାମ । ରାଜ୍ୟରେ ଶିଶୁ ଓ ମହିଳା ଅସୁରକ୍ଷିତ । ଆଇନ ଶୃଙ୍ଖଳା ପରିସ୍ଥିତି ଆଉ ନାହିଁ । ଏଥିପାଇଁ ମୁଖ୍ୟମନ୍ତ୍ରୀ ଦାୟୀ ବୋଲି କହିଛନ୍ତି କାଡ଼ାମ ।
ଚାକିରିରୁ ଅବସର ନେବାର ୧୧ ବର୍ଷ ପରେ ବି ମିଳିନି ଦିବ୍ୟାଙ୍ଗଙ୍କୁ ପେନସନ, ହାଇକୋର୍ଟଙ୍କ ରାୟକୁ ସ୍ବାସ୍ଥ୍ୟ ବିଭାଗର ଫୁ…
ସାଲେପୁର: ସ୍ୱାସ୍ଥ୍ୟ ବିଭାଗର ମନମାନୀ । ଚାକିରିରୁ ଅବସରର ୧୧ ବର୍ଷ ପରେ ମଧ୍ଯ ଜଣେ ଦିବ୍ଯାଙ୍ଗ ବୃଦ୍ଧାଙ୍କୁ ମିଳୁନି ପେନସନ । ଏନେଇ ସେ ମାନ୍ୟବର ଅଦାଲତଙ୍କ ଆଶ୍ରୟ ନେଇଥିଲେ । ହାଇକୋର୍ଟ ଗତବର୍ଷ ଏପ୍ରିଲ ୨୨ ତାରିଖରେ ମାମଲାର ବିସ୍ତୃତ ଶୁଣାଣି କରି ତାଙ୍କ ଅଭିଯୋଗ ଉପରେ ତ୍ଵରିତ କାର୍ଯ୍ଯାନୁଷ୍ଠାନ ନେବାକୁ ସ୍ଵାସ୍ଥ୍ଯ ବିଭାଗକୁ ନିର୍ଦ୍ଦେଶ ଦେଇଥିଲେ । ହେଲେ ଏଯାବତ୍ ଜାନକୀଙ୍କ ଯାତନାର ଅନ୍ତ ଘଟି ନାହିଁ ।
କଟକ ଜିଲ୍ଲା ସାଲେପୁର ବ୍ଲକ ତ୍ରିଲୋଚନପୁର ଗାଁର ଦିବ୍ଯାଙ୍ଗ ବୃଦ୍ଧା ଜାନକୀ ଦାସ । ୧୯୮୩ ମସିହାରୁ ସ୍ୱାସ୍ଥ୍ୟ ବିଭାଗର ପାଥଲୋଜି ଆସିଷ୍ଟାଣ୍ଟ ଭାବେ ବିଭିନ୍ନ ମେଡିକାଲରେ ରହି ସେବା କରି ଆସୁଥିଲେ । ୨୦୧୪ ମସିହାରେ ସେ ଚାକିରିରୁ ଅବସର ନେଇଥିଲେ । ମାତ୍ର ଅବସରକୁ ଦୀର୍ଘ ୧୧ ବର୍ଷ ବିତି ଯାଇଥିଲେ ସୁଦ୍ଧା ବୃଦ୍ଧାଙ୍କୁ ଏପର୍ଯ୍ଯନ୍ତ ପେନସନ ମିଳିନାହିଁ । ଏନେଇ ସେ ମାନ୍ୟବର ଅଦାଲତଙ୍କ ଆଶ୍ରୟ ନେଇଥିଲେ । ଓଡିଶା ହାଇକୋର୍ଟ ଗତବର୍ଷ ଏପ୍ରିଲ ୨୨ ତାରିଖରେ ମାମଲାର ବିସ୍ତୃତ ଶୁଣାଣି କରି ତାଙ୍କ ଅଭିଯୋଗ ଉପରେ ତ୍ଵରିତ କାର୍ଯ୍ଯାନୁଷ୍ଠାନ ଲାଗି ସ୍ଵାସ୍ଥ୍ଯ ବିଭାଗକୁ ନିର୍ଦ୍ଦେଶ ଦେଇଥିଲେ । ହେଲେ ହାଇକୋର୍ଟଙ୍କ ନିର୍ଦ୍ଦେଶକୁ ସ୍ବାସ୍ଥ୍ୟ ବିଭାଗ ଅଣଦେଖା କରି ଦେଇଥିବା ଅଭିଯୋଗ ହୋଇଛି । ଫଳରେ ସେ ପୁଣି ଥରେ ହାଇକୋର୍ଟଙ୍କ ଦୃଷ୍ଟି ଆକର୍ଷଣ କରିଥିଲେ । ସ୍ଵାସ୍ଥ୍ଯ ବିଭାଗ ନିର୍ଦ୍ଦେଶକୁ ଅନୁପାଳନ କରୁ ନଥିବାରୁ ଅଦାଲତ କ୍ଷୋଭ ପ୍ରକାଶ କରିବା ସହିତ ୪ ସପ୍ତାହ ମଧ୍ଯରେ ଘଟଣାର ସମାଧାନ କରିବାକୁ ତାଗିଦ କରିଛନ୍ତି ।
ଅନ୍ୟପକ୍ଷରେ ସ୍ୱାସ୍ଥ୍ୟ ବିଭାଗ ଦୀର୍ଘ ବର୍ଷ ତଳୁ ତାଙ୍କୁ ଶାରୀରିକ ଭିନ୍ନକ୍ଷମ ପ୍ରମାଣପତ୍ର ଦେଇ ନିଜର ଦୟା ଅନୁକମ୍ପା ଦେଇ ସାରିଛନ୍ତି । ହେଲେ ଅବସର ପରେ ତାଙ୍କୁ ଏପର୍ଯ୍ଯନ୍ତ ପେନସନ ମିଳୁନାହିଁ । ଫଳରେ ସେ ନିଜର ଚିକିତ୍ସା କରିପାରୁନାହାଁନ୍ତି । ଏଠି ପ୍ରଶ୍ନ ଉଠୁଛି, ବୃଦ୍ଧାଙ୍କ ପ୍ରତି ସ୍ଵାସ୍ଥ୍ଯ ବିଭାଗର ଏ ଅବହେଳା କାହିଁକି ? କୋର୍ଟଙ୍କ ନିର୍ଦ୍ଦେଶ ପରେ ବି ସ୍ଵାସ୍ଥ୍ଯ ବିଭାଗ ଅବମାନନା କଲା କେମିତି ? ନା ଏହା ପଛରେ ଅନ୍ଯ କିଛି ଷଡଯନ୍ତ୍ର ରହିଛି । ଯାହାର ତଦନ୍ତ କରିବା ସାଙ୍ଗକୁ ବୃଦ୍ଧାଙ୍କୁ ସମସ୍ତ ପେନସନ ଟଙ୍କା ଯୋଗାଇ ଦେବାକୁ ଦାବି ହୋଇଛି ।

