କେନ୍ଦ୍ରାପଡ଼ା: ପଦାରେ ପଡ଼ିଲା ଦୁଷ୍କର୍ମ ପୀଡିତାଙ୍କୁ ଡେରାବିଶ ଥାନା କର୍ମଚାରୀଙ୍କ ନିର୍ଯାତନା ଓ ପ୍ରମାଣ ନଷ୍ଟ ଉଦ୍ୟମ । କେନ୍ଦ୍ରାପଡ଼ା ଜିଲ୍ଲା ଡେରାବିଶ ଥାନାର ମହିଳା କନେଷ୍ଟବଳ ଶିଖା ପାତ୍ରଙ୍କ ନାମରେ ସାଙ୍ଘାତିକ ଅଭିଯୋଗ ଆଣିଲେ ଦୁଇ ଦୁଷ୍କର୍ମ ପୀଡିତା । ଦୁଷ୍କର୍ମକାରୀଙ୍କୁ ସାହାଯ୍ୟ କରିବାକୁ ପୋଲିସ ନିଜେ ଷଡଯନ୍ତ୍ର କରିଥିବା ଅଭିଯୋଗ ହୋଇଛି ।
ସୂଚନା ଅନୁଯାୟୀ, ଡାକ୍ତରୀ ମାଇନା ଦିନ ଶିଖା ପାତ୍ର ପୀଡିତା ଦୁଇ ଜଣଙ୍କୁ ମେଡିକାଲ ଟେଷ୍ଟ ନକରିବାକୁ ବାଧ୍ୟ କରିବା ସହ ସାଧା କାଗଜରେ ଦସ୍ତଖତ ନେଇ ମିଛ ରିପୋର୍ଟ ତିଆରି କରିବାକୁ ଉଦ୍ୟମ କରିଥିଲେ । ଏହି ଘଟଣା ପରେ ସେମାନଙ୍କୁ ଡେରାବିଶ ଥାନାକୁ ଫେରାଇ ଆଣିଥିଲେ । କିନ୍ତୁ ଥାନା ପରିସରରେ ପୀଡିତା କାକୁତି ମିନତୀ ହୋଇ ମେଡିକାଲ ଟେଷ୍ଟ କରାଇବାକୁ ପୋଲିସକୁ ନିବେଦନ କରିଥିଲେ । ଘଟଣା ସମୟର ଭିଡିଓ ଭାଇରଲ ହୋଇଥିଲା । ଘଟଣା ପ୍ରଘଟ ହୋଇଯିବା ଭୟରେ ବିଳମ୍ବରେ ଆଉ ଥରେ ପୀଡିତାଙ୍କୁ ମେଡିକାଲ ଟେଷ୍ଟ ପାଇଁ ନିଆଯାଇଥିଲା । କିନ୍ତୁ ଅଭିଯୁକ୍ତମାନଙ୍କୁ କୋର୍ଟରେ ହାଜର କରାଯିବା ବେଳେ ସେମାନଙ୍କର ମେଡିକାଲ ଟେଷ୍ଟ ହୋଇନଥିଲା । ଏନେଇ ପୀଡିତା ଜଣକ କେନ୍ଦ୍ରାପଡ଼ା ଜିଲ୍ଲାପାଳ ଓ କେନ୍ଦ୍ରାପଡ଼ା ଏସଡିପିଓଙ୍କ ନିକଟରେ ଅଭିଯୋଗ କରିଛନ୍ତି । ଏହାର ତଦନ୍ତ କରାଯିବ ବୋଲି ଏସଡିପିଓ କହିଛନ୍ତି ।
