ଭୁବନେଶ୍ବର : ବଢିବ ତାପମାତ୍ରା । କମିବ ଶୀତ । ଆସନ୍ତା ୩ ଦିନ ମଧ୍ୟରେ ୨ ରୁ ୪ ଡିଗ୍ରୀ ପର୍ଯ୍ୟନ୍ତ ତାପମାତ୍ରା ବୃଦ୍ଧି ପାଇବ । ଉପକୂଳ ସମେତ ଆଭ୍ୟନ୍ତରୀଣ ଓଡ଼ିଶାରେ ତାପମାତ୍ରା ବୃଦ୍ଧି ପାଇବ ବୋଲି ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର। ହାଲୁକା ଶୀତ ସହ କଲବଲ କରିବ ଘନକୁହୁଡି । ୯ ତାରିଖ ପର୍ଯ୍ୟନ୍ତ ଘନକୁହୁଡି ନେଇ ୩ ଜିଲ୍ଲାକୁ ୟେଲୋ ଆଲର୍ଟ ଜାରି କରାଯାଇଛି। ବିଶେଷ କରି ସୁନ୍ଦରଗଡ, କନ୍ଧମାଳ ଏବଂ କୋରାପୁଟରେ ଘନ କୁହୁଡି ଅନୁଭୁତ ହେବ। ୯ ତାରିଖରେ ସମ୍ବଲପୁର, ଝାରସୁଗୁଡା, ବଲାଙ୍ଗୀର, ଗଞ୍ଜାମ ଏବଂ କଳାହାଣ୍ଡିରେ ହାଲୁକା କୁହୁଡି ନେଇ ସତର୍କତା ଜାରି କରାଯାଇଛି। ବିଶେଷ କରି ରାତି ୨ ଟାରୁ ସକାଳ ୧୦ ପର୍ଯ୍ୟନ୍ତ ଘାଟି ରାସ୍ତା ଏବଂ ଦୁର୍ଘଟଣା ପ୍ରବଣ ରାସ୍ତାରେ ନଜର ରଖିବାକୁ ପରିବହନ ବିଭାଗକୁ ସତର୍କ କରାଯାଇଛି ।
ଜମୁଛି ବରଗଡ଼ ବିଶ୍ୱ ପ୍ରସିଦ୍ଧ ଧନୁଯାତ୍ରା, କୃଷ୍ଣ ବଳରାମଙ୍କ ଲୀଳାରେ ଉତ୍ସବମୁଖର ଗୋପପୁର
ବରଗଡ଼ : ବିଶ୍ବ ପ୍ରସିଦ୍ଧ ଧନୁଯାତ୍ରାର ଆଜି ଷଷ୍ଠ ଦିନ । ଆଜି ମଥୁରାନଗରୀରେ ଅନୁଷ୍ଠିତ ହେବ ରଙ୍ଗସଭା, ଆସନ୍ନ ଯୁଦ୍ଧ ପ୍ରସ୍ତୁତି ପାଇଁ ଆଲୋଚନା, ପ୍ରଶାସନିକ ଅଧିକାରୀଙ୍କ ସହ ଜନତା ଦରବାର, ଶଙ୍ଖଚୂଡ଼ଙ୍କୁ ଗୋପପୁର ପ୍ରେରଣ କାର୍ଯ୍ୟକ୍ରମ । ସେହିଭଳି ଗୋପପୁରରେ ଅନୁଷ୍ଠିତ ହେବ ଗୋପୀଙ୍କ ଦଧିବିକା ଓ ବସ୍ତ୍ରହରଣ କାର୍ଯ୍ୟକ୍ରମ ।ପଞ୍ଚମ ଦିନରେ ଗୋପପୁରରେ ଭଗବାନ ଶ୍ରୀକୃଷ୍ଣଙ୍କ ଲୀଳାଖେଳା ଚାଲିଥିବା ବେଳେ ପ୍ରଭୁଙ୍କ ଦ୍ୱାରା ଯାମଳାର୍ଜ୍ଜୁନ ଭଞ୍ଜନ, କାଳୀୟ ଦଳନ ହୋଇଥିଲା। ସେହିପରି ମଥୁରାରେ ମହାରାଜ କଂସ, ଜରାସନ୍ଧକୁ ପରାସ୍ତ କରି ହେତି ଓ ପ୍ରହେତି ଙ୍କୁ ବିବାହ କରିଛନ୍ତି ଏବଂ କୃଷ୍ଣଙ୍କୁ ନିହତ କରିବା ଉଦେଶ୍ୟରେ ରଂଗସଭା ଆୟୋଜନ ପାଇଁ ଯୋଜନା ପ୍ରସ୍ତୁତ କରିଛନ୍ତି।ମଥୁରା ନଗରୀରେ ମହାରାଜ ଉଗ୍ରସେନଙ୍କୁ ଗାଦିଚ୍ଯୁତ କରିୁ ପୁଅ କଂସ ନିଜେ ରାଜ ସିଂହାସନ ଅକ୍ତିଆର କରିବା ପରେ ମଥୁରାରେ ଚଳାଇଛନ୍ତି ରାଜୁତି। ପ୍ରତିଦିନ ନଗର ଭ୍ରମଣରେ ବାହାରୁଛନ୍ତି ମହାରାଜ କଂସ। ଏପରି ଖୁସି ମୁହୂର୍ତ୍ତରେ ରାଜ୍ୟ ତଥା ରାଜ୍ୟ ବାହାରୁ ଆସିଥିବା କଳାକାରଙ୍କ ନୃତ୍ୟ ଗୀତକୁ ଉପଭୋଗ କରଛନ୍ତି ମହାରାଜ କଂସଙ୍କ ସହ ମଥୁରାବାସୀ।
ବଢିଲା ବାଂଲାଦେଶର ପୂର୍ବତନ ପ୍ରଧାନମନ୍ତ୍ରୀ ଶେଖ୍ ହସିନାଙ୍କ ପାଇଁ ଅଡ଼ୁଆ
ନୂଆଦିଲ୍ଲୀ : ବଢିଲା ବାଂଲାଦେଶର ପୂର୍ବତନ ପ୍ରଧାନମନ୍ତ୍ରୀ ଶେଖ୍ ହସିନାଙ୍କ ପାଇଁ ଅଡ଼ୁଆ। ଦେଶର ଅନ୍ତରୀଣ ସରକାର ଶେଖ୍ ହସିନାଙ୍କ ପାସପୋର୍ଟ ରଦ୍ଦ କରିଛନ୍ତି । ଶେଖ୍ ହସିନାଙ୍କ ବ୍ୟତୀତ ୯୬ ଜଣଙ୍କ ପାସପୋର୍ଟ ବାତିଲ କରାଯାଇଛି। ସେମାନଙ୍କ ମଧ୍ୟରୁ ଅଧିକାଂଶ ଆୱାମୀ ଲିଗ୍ ସହ ଜଡ଼ିତ ନେତା ଓ ବ୍ୟବସାୟୀ। ଜୁଲାଇ ମାସରେ ବିକ୍ଷୋଭ ସମୟରେ ନିଖୋଜ କରିବା ଏବଂ ଲୋକଙ୍କୁ ହତ୍ୟା କରିଥିବା ଅଭିଯୋଗ ହୋଇଛି। ପାସପୋର୍ଟ ରଦ୍ଦ ପରେ ଯଦି ଶେଖ୍ ହସିନା ଭାରତ ଛାଡ଼ି ବାଂଲାଦେଶ ଯିବାକୁ ଚେଷ୍ଟା କରନ୍ତି ତେବେ ତାଙ୍କୁ ତୁରନ୍ତ ଗିରଫ କରାଯିବ ବୋଲି ସ୍ପଷ୍ଟ ହୋଇଛି।ଏହା ପୂର୍ବରୁ ଗତ ମଙ୍ଗଳବାର ସକାଳେ ଶେଖ ହସିନା ଓ ଅନ୍ୟ ୧୫ ଜଣଙ୍କ ବିରୋଧରେ ଅନ୍ତର୍ଜାତୀୟ ଅପରାଧ ଟ୍ରିବ୍ୟୁନାଲରେ ଆଉ ଏକ ଅଭିଯୋଗ ଦାଖଲ କରାଯାଇଥିଲା। ୨୦୨୧ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ବାଂଲାଦେଶ ଗସ୍ତ ସମୟରେ ହୋଇଥିବା ଗୁଳିକାଣ୍ଡ ଘଟଣାକୁ ଏଥିରେ ଦର୍ଶାଯାଇଛି। ଶଫିକୁଲ ଇସଲାମ ମୁଫତିଙ୍କ ଦ୍ୱାରା ଦାଖଲ ହୋଇଥିବା ଅଭିଯୋଗରେ କୁହାଯାଇଛି ଯେ ୨୦୨୧ରେ ଯେତେବେଳେ ପ୍ରଧାନମନ୍ତ୍ରୀ ମୋଦୀ ଆସିଥିଲେ, ସେତେବେଳେ ସେଠାରେ ବିକ୍ଷୋଭ ଚାଲିଥିଲା। ସେହି ସମୟରେ ଶେଖ ହସିନାଙ୍କ ସରକାର ବିକ୍ଷୋଭକାରୀଙ୍କ ଉପରକୁ ଆଖିବୁଜା ଗୁଳି ଚଳାଇଥିଲେ, ଯେଉଁଥିରେ ଶଫିକୁଲ ଇସଲାମ ମୁଫତିଙ୍କ ୧୭ ବର୍ଷର ପୁଅ ନିହତ ହୋଇଥିଲେ। ଆହୁରି ଅନେକ ନିରୀହ ଲୋକଙ୍କୁ ହତ୍ୟା କରାଯାଇଥିଲା।
ଆଜିଠୁ ଭୁବନେଶ୍ବରରେ ପ୍ରବାସୀ ଭାରତୀୟ ସମ୍ମିଳନୀ
ଭୁବନେଶ୍ବର : ଆଜିଠୁ ଦୁଲୁକିବ ରାଜଧାନୀ । ଜନତା ମଇଦାନ ପସ୍ତୁତ । ୧୮ତମ ପ୍ରବାସୀ ଭାରତୀୟ ଦିବସ ପାଇଁ ସବୁଠି ଉତ୍ସାହ । ଭିନ୍ନ ଭିନ୍ନ ରଙ୍ଗର ଆଲୋକମାଳାରେ ଝଲସୁଛି ରାସ୍ତା ଓ ଗଳି । ଏଥର ଓଡ଼ିଶାରେ ପ୍ରବାସୀ ଭାରତୀୟ ସମ୍ମିଳନୀର ୧୮ ତମ ସଂସ୍କରଣ ଆୟୋଜନ ହୋଇଛି । ଐତିହାସିକ, ସାଂସ୍କୃତିକ ଓ ଆଧ୍ୟାତ୍ମିକ ଦୃଷ୍ଟି କୋଣରୁ ଓଡିଶାରେ ପ୍ରବାସୀ ଭାରତୀୟ ଦିବସ ଆୟୋଜନ ହୋଇଛି । ଯୁବ ସମାବେଶରୁ ଆରମ୍ଭ ହେବ ତିନି ଦିନିଆ ପ୍ରବାସୀ ଭାରତୀୟ ସମ୍ମଳନୀ । ଯୁବ ଦିବସ ପରେ ଓଡ଼ିଶାରେ ପୁଞ୍ଜି ବିନିଯୋଗ ସମ୍ଭାବନା ନେଇ ପ୍ରବସୀ ମାନଙ୍କ ସହିତ ଆଲୋଚନା ହେବ । ଯେଉଁଥିରେ ବୈଦେଶିକ ବ୍ୟାପାର ମନ୍ତ୍ରୀ ଏବଂ କେନ୍ଦ୍ର ଯୁବ ବ୍ୟାପାର ମନ୍ତ୍ରୀ ଓ ମୁଖ୍ୟମନ୍ତ୍ରୀ ସମ୍ବୋଧିତ କରିବେ । କାଲି ପ୍ରଧାନମନ୍ତ୍ରୀ ଆନୁଷ୍ଠାନିକ ଭାବେ ପ୍ରବାସୀ ଭାରତୀୟ ସମ୍ମିଳନୀକୁ ଉଦଘାଟନ କରିବା ସହ ସମ୍ବୋଧିତ କରିବେ । ପ୍ରବାସୀ ଭାରତୀୟଙ୍କୁ ଦେଶର ବିଭିନ୍ନ ପର୍ଯ୍ୟଟନ ସ୍ଥଳ ବୁଲାଇବା ପାଇଁ ତିନି ଦିନ ଧରି ଚାଲିବାକୁ ଥିବା ପ୍ରବାସୀ ଭାରତୀୟ ଏକ୍ସପ୍ରେସକୁ ଶୁଭାରମ୍ଭ କରାଯିବ। ୧୦ ତାରିଖରେ ଉଦଯାପନୀ ଉତ୍ସବରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ମୁଖ୍ୟ ଅତିଥି ଭାବେ ଯୋଗ ଦେବେ। ତିନି ଦିନିଆ ସମ୍ମିଳନୀରେ ଓଡ଼ିଶା ଏବଂ ଦେଶ ବିକାଶରେ ଥିବା ବିଭିନ୍ନ ସମ୍ଭାବନା ବିଷୟରେ ପ୍ରବାସୀଙ୍କ ସହ ଆଲୋଚନା କରାଯିବ। ମହିଳାଙ୍କ ପାଇଁ ସ୍ୱତନ୍ତ୍ର ଭାବେ ପ୍ରବାସୀ ଦିବସର ବ୍ୟବସ୍ଥା ହୋଇଛି । ଏହା ସହ ବିଭିନ୍ନ ପ୍ଲେନାରି ସେସନରେ ପ୍ରତିଷ୍ଠିତ ବ୍ୟକ୍ତି ବିଶେଷ ମାନେ ପ୍ରବାସୀ ମାନଙ୍କ ସହ ଆଲୋଚନା କରିବେ। ଉତ୍ସବକୁ ଆକର୍ଷଣୀୟ କରିବା ପାଇଁ ପ୍ରତି ସନ୍ଧ୍ୟାରେ ସାଂସ୍କୃତିକ କାର୍ଯ୍ୟକ୍ରମର ପରିବେଷଣ କରାଯିବ । ପୁରୀ, କଟକ, ଭୁବନେଶ୍ୱର ଯାଜପୁରର ପ୍ରାୟ ୩୦ରୁ ଉର୍ଦ୍ଧ୍ବ ପର୍ଯ୍ୟଟନ ସ୍ଥଳୀକୁ ପ୍ରବାସୀ ମାନଙ୍କୁ ବୁଲାଇ ନେବା ପାଇଁ ବ୍ୟବସ୍ଥା କରାଯାଇଛି। ନୂଆ ଭାଇରସ୍ ପାଇଁ କେନ୍ଦ୍ର ସରକାରଙ୍କ ଯାହା ସତର୍କତା ମୂଳକ ନିର୍ଦ୍ଦେଶ ରହିଛି ତାକୁ ଅନୁପାଳନ କରିବା ସହ ସମସ୍ତଙ୍କ ସୁରକ୍ଷା ଓ ନିରାପଦକୁ ଦୃଷ୍ଟି ଦିଆଯାଉଛି ।
କାଲିଠୁ ପ୍ରବାସୀ ଭାରତୀୟ ସମ୍ମିଳନୀ, କାର୍ଯ୍ୟକ୍ରମ ତଦାରଖ କଲେ ଜୟଶଙ୍କର
ଭୁବନେଶ୍ବର: ପ୍ରବାସୀ ଭାରତୀୟ ଦିବସ ପାଇଁ ଉତ୍ସବ ମୁଖର ରାଜଧାନୀ ଭୁବନେଶ୍ବର । ଆସନ୍ତାକାଲିଠାରୁ ୧୦ ତିରିଖ ଯାଏଁ ୩ ଦିନି ଧରି ସମ୍ମିଳନୀ ପାଇଁ ଜନତା ମଇଦାନରେ ସମସ୍ତ ପ୍ରସ୍ତୁତି ସରିଛି । ଜନତା ମଇଦାନ ବ୍ୟତୀତ ପ୍ରବାସୀ ଭାରତୀୟଙ୍କୁ ଆକୃଷ୍ଟ କରିବାକୁ ଭୁବନେଶ୍ୱରରେ ଆୟୋଜିତ ହେଉଛି ବିଭିନ୍ନ କାର୍ଯ୍ୟକ୍ରମ । ଉଦଘାଟନୀ ଉତ୍ସବରେ ପ୍ରଧାନମନ୍ତ୍ରୀ ଓ ଉଦଯାପନୀ ଉତ୍ସବରେ ରାଷ୍ଟ୍ରପତି ଯୋଗଦେବେ । ୫ ଦିନିଆ ଗସ୍ତରେ ଓଡ଼ିଶା ଆସି ସମ୍ପୂର୍ଣ୍ଣ କାର୍ଯ୍ୟକ୍ରମର ତଦାରଖ କରିଛନ୍ତି ବୈଦେଶିକ ମନ୍ତ୍ରୀ ଏସ. ଜୟଶଙ୍କର । ପୁରୀ, କୋଣାର୍କ, ଚିଲିକା ସମେତ ୩୧ଟି ପର୍ଯ୍ୟଟନ ସ୍ଥଳରେ ଅତିଥିମାନଙ୍କୁ ସ୍ୱାଗତ ପାଇଁ ବ୍ୟବସ୍ଥା ହୋଇଛି । ସୁରକ୍ଷା ବ୍ୟବସ୍ଥା ମଧ୍ୟ କଡ଼ାକଡ଼ି କରାଯାଇଛି ।
କାଲିଠୁ ପ୍ରବାସୀ ଭାରତୀୟ ସମ୍ମିଳନୀ । ଓଡ଼ିଶାରେ ପହଞ୍ଚୁଥିବା ଅତିଥିଙ୍କୁ ଦିଆଯାଉଛି ସମ୍ବର୍ଦ୍ଧନା । ବିମାନବନ୍ଦରରେ ପାରମ୍ପରିକ ବାଦ୍ୟ ନୃତ୍ୟରେ କରାଯାଉଛି ସ୍ଵାଗତ । ଓଡ଼ିଶାରେ ପ୍ରଥମ ଥର ପାଇଁ ଆଯୋଜନ କରାଯାଉଛି ଏଭଳି ସମ୍ମିଳନୀ । ଇଭେଣ୍ଟ ପାଇଁ ଜନତା ମଇଦାନରେ ସରିଛି ସମସ୍ତ ପ୍ରସ୍ତୁତି । ରେଙ୍ଗ ବେରଙ୍ଗର ଆଲୋକ ମାଳାରେ ଝଲସୁଛି ସହରର ରାସ୍ତାଘାଟ । ଜାନୁଆରୀ ୧୦ ତାରିଖ ପର୍ଯ୍ୟନ୍ତ ୩ ଦିନ ଧରି ଆୟୋଜିତ ହେଉଥିବା ୧୮ତମ ପ୍ରବାସୀ ଭାରତୀୟ ଦିବସରେ ଯୋଗଦେବେ ଅନେକ ଭିଆଇପି । ଉଦଘାଟନୀ ଉତ୍ସବରେ ଯୋଗଦେବାକୁ ଆସନ୍ତାକାଲି ସନ୍ଧ୍ୟାରେ ଭୁବନେଶ୍ଵରରେ ପହଞ୍ଚିବେ ପ୍ରଧାନମନ୍ତ୍ରୀ । ଉଦଯାପନୀ ଉତ୍ସବରେ ଯୋଗଦେବେ ମହାମହିମ ରାଷ୍ଟ୍ରପତି । ସମ୍ମିଳନୀରେ ଯୋଗଦେବାକୁ ସୋମବାରଠୁ ଭୁବନେଶ୍ବରରେ ପହଞ୍ଚି ସାରିଛନ୍ତି ବୈଦେଶିକ ମନ୍ତ୍ରୀ ଏସ୍. ଜୟଶଙ୍କର । ସେ କୋଣାର୍କ ରାମଚଣ୍ଡୀ ନିକଟସ୍ଥ ଇକୋ ରିଟ୍ରିଟରେ ରାତ୍ରିଯାପନ କରି ମଙ୍ଗଳବାର କୋଣାର୍କ ସୂର୍ଯ୍ୟ ମନ୍ଦିର ପରିଦର୍ଶନ କରିଛନ୍ତି । ଜନତା ମଇଦାନରେ ଓଡ଼ିଶାର ଐତିହ୍ୟ, କଳା, ସଂସ୍କୃତିର ଝଲକ ଦେଖିବାକୁ ମିଳିବ । ଭୁବନେଶ୍ୱର ସହରର ପରିଷ୍କାର ପରିଚ୍ଛନ୍ନତା ସହ ଅତିଥି ସତ୍କାର ପାଇଁ ଅପିଲ କରିଛନ୍ତି ମୁଖ୍ୟମନ୍ତ୍ରୀ ।
ଏକାମ୍ର କ୍ଷେତ୍ରରେ ସ୍ଵତନ୍ତ୍ର ଅତିଥିଙ୍କୁ ଭାବପୂର୍ଣ୍ଣ ସ୍ଵାଗତ ସମ୍ବର୍ଦ୍ଧନା ପାଇଁ ପ୍ରଶାସନିକ ସ୍ତରରେ ସବୁ ପ୍ରକାର ପ୍ରସ୍ତୁତି ସରିଛି । ଆମେରିକା, ସିଙ୍ଗାପୁର, ଦୁବାଇ, ଅଷ୍ଟ୍ରେଲିଆ, ଜର୍ମାନୀ, ଇଂଲଣ୍ଡ, ୟୁରୋପ ଭଳି ପ୍ରାୟ ୭୦ଟି ଦେଶରୁ ୬ ହଜାର ପ୍ରବାସୀ ଭାରତୀୟ ଏକାଠି ହେବେ । ସମସ୍ତଙ୍କୁ ଓଡ଼ିଶାର ଆତିଥେୟତା ଓ ସୁଖଦ ଅନୁଭୂତି ଦେବାକୁ ବିଭିନ୍ନ ବିଭାଗର ଅଧିକାରୀ ଦାୟିତ୍ବରେ ଅଛନ୍ତି । ଭୁବନେଶ୍ବରରେ ଏହି ସମୟରେ ଆୟୋଜନ ହେଉଛି ରାଜାରାଣୀ ସଙ୍ଗୀତ ଉତ୍ସବ, ମୁକ୍ତେଶ୍ବର ନୃତ୍ୟ ଉତ୍ସବ, ଫୁଲ ପ୍ରଦର୍ଶନୀ, ଚିଲିକା ବିହଙ୍ଗ ଉତ୍ସବ ସହ ଅନେକ କାର୍ଯ୍ୟକ୍ରମ । ଓଡ଼ିଶା ସଂସ୍କୃତିର ଗାଥା ପାଇଁ ନୂଆ ରୂପରେ ସଜେଇ ହୋଇଛି ରାଜ୍ୟ ମ୍ୟୁଜିୟମ । ଲିଙ୍ଗରାଜ ମନ୍ଦିର ସହିତ ଅନ୍ୟ ମନ୍ଦିରରେ ଭିଆଇପିଙ୍କ ଦର୍ଶନ ପାଇଁ ସୁବନ୍ଦୋବସ୍ତ କରାଯାଇଛି ।
କାର୍ଯ୍ୟକ୍ରମ ବାବଦରେ ସବିଶେଷ ତଥ୍ୟ ଓ ସହଯୋଗ ପାଇଁ ୧୯୨୯ କେନ୍ଦ୍ରୀୟ କମାଣ୍ତ କଣ୍ଟ୍ରୋଲ ରୁମ୍ ଖୋଲାଯାଇଛି । ଓଡ଼ିଶାରେ ପୁଞ୍ଜି ବିନିଯୋଗର ସମ୍ଭାବନା, ପର୍ଯ୍ୟଟନ କ୍ଷେତ୍ରର ବିକାଶ ଏବଂ ବିକଶିତ ଓଡ଼ିଶା ୨୦୩୬ ଭଳି ତିନୋଟି ପ୍ରସଙ୍ଗରେ ସ୍ବତନ୍ତ୍ର ଆଲୋଚନା ପାଇଁ ଓଡ଼ିଶା ସରକାରଙ୍କ ପକ୍ଷରୁ ବ୍ୟବସ୍ଥା କରାଯାଇଛି ।
କାନାଡ଼ାର ପରବର୍ତ୍ତୀ ପ୍ରଧାନମନ୍ତ୍ରୀ ହେବେ ଭାରତୀୟ ବଂଶୋଦ୍ଭଭ ଅନୀତା ଆନନ୍ଦ!
ଅଟାଓ୍ବା: କାନାଡ଼ାର ପ୍ରଧାନମନ୍ତ୍ରୀ ପଦରୁ ଜଷ୍ଟିନ ଟ୍ରୁଡୁଙ୍କ ଇସ୍ତଫା ପରେ କିଏ ହେବ କାନାଡ଼ାର ପ୍ରଧାନମନ୍ତ୍ରୀ, ତାକୁ ନେଇ ଚର୍ଚ୍ଚା ଚାଲିଛି। ଦୌଡ଼ରେ ଅଛନ୍ତି ଭାରତୀୟ ବଂଶୋଦ୍ଭବ ଅନୀତା ଆନନ୍ଦ। ଅନିତା ଏବେ ପରିବହନ ମନ୍ତ୍ରୀ ଅଛନ୍ତି। ଏହା ପୂର୍ବରୁ ସେ ପ୍ରତିରକ୍ଷା, ପବ୍ଲିକ ସର୍ଭିସେସ୍ ଓ ପ୍ରୋକ୍ୟୁରିଏଣ୍ଟ ମନ୍ତ୍ରାଳୟ ବି ସମ୍ଭାଳିଥିଲେ। ଟ୍ରେଜେରି ବୋର୍ଡର ମଧ୍ୟ ସଭାପତି ଥିଲେ ଅନୀତା ଆନନ୍ଦ। ତାଙ୍କର ବାପା ଜଣେ ତାମିଲ ଓ ମାଆ ପଞ୍ଜାବୀ । ୫୭ ବର୍ଷୀୟ ଅନୀତା ଆନନ୍ଦ ଅକ୍ସଫୋର୍ଡରେ ପାଠ ପଢ଼ିଛନ୍ତି। ୨୦୧୯ରେ ସାଂସଦ ଭାବେ ନିର୍ବାଚିତ ହେବା ପରେ ପରେ ସେ ମନ୍ତ୍ରୀ ହୋଇଥିଲେ। ଯୁଦ୍ଧରେ ଧ୍ଵଂସସ୍ତୁପରେ ପରିଣତ ହୋଇଥିବା ୟୁକ୍ରେନକୁ ସହାୟତା ଯୋଗାଡ଼ କରିବାରେ ଅନୀତା ଆନନ୍ଦଙ୍କ ପ୍ରମୁଖ ଭୂମିକା ଥିଲା। ଟ୍ରେଜେରି ବୋର୍ଡ ସଭାପତି ଭାବେ ନିଯୁକ୍ତି ପାଇବା ପରେ ସେ ୨୦୨୪ ଡିସେମ୍ଵରରେ ପ୍ରତିରକ୍ଷା ମନ୍ତ୍ରାଳୟ ଛାଡ଼ିଥିଲେ। ତା ପରେ ପୁଣି ଏକ ଅଦଳ ବଦଳରେ ତାଙ୍କୁ ମିଳିଥିଲା ପରିବହନ ବିଭାଗ। ଗତକାଲି ପ୍ରଧାନମନ୍ତ୍ରୀ ପଦରୁ ଇସ୍ତଫା ଘୋଷଣା କରିଥିଲେ ଜଷ୍ଟିନ। ନିଜ ଦଳରୁ ବିରୋଧର ସମ୍ମୁଖୀନ ହେବାରୁ ସେ ଇସ୍ତଫା ଦେବାକୁ ବାଧ୍ୟ ହୋଇଥିଲେ। ତେବେ ନୂଆ ପ୍ରଧାନମନ୍ତ୍ରୀ ନିଯୁକ୍ତ ହେବା ପର୍ଯ୍ୟନ୍ତ ସେ ଏହି ପଦରେ ରହିବେ। ମାର୍ଚ୍ଚ ୨୪ ତାରିଖ ଯାଏ କାନାଡ଼ାର ପାର୍ଲାମେଣ୍ଟ ମଧ୍ୟ ସସପେଣ୍ଡ ରହିବ ବୋଲି କୁହାଯାଇଛି ।
ବିଜେଡି ସମାବେଶ ଦେଖି ବିଜେପି ଛାନିଆ
ଭୁବନେଶ୍ବର: ଦରଦାମ ବୃଦ୍ଧି ପ୍ରତିବାଦରେ ବିଜେଡି ପ୍ରତି ଜନଶକ୍ତି ଓ ଜନମତ ପ୍ରତିଫଳିତ ହୋଇଛି । ନବୀନ ପଟ୍ଟନାୟକ ପ୍ରତି ଓଡ଼ିଶାବାସୀଙ୍କ କ୍ରେଜ ଅତୁଟ ରହିବା ସହ ବିଜେଡିକୁ ଶକ୍ତିଶାଳୀ କରିଛି । ୭ ମାସ ଭିତରେ ବିଜେପି ସରକାରଙ୍କ ପ୍ରତି ଓଡ଼ିଶାବାସୀ ଅତିଷ୍ଠ ହୋଇଗଲେଣି । ଶାସନ ବ୍ୟବସ୍ଥା ଦିଗହରା ହୋଇଥିବା ବେଳେ ସରକାରରେ ନାହିଁ ସମନ୍ବୟ । ଏଭଳି କହି ବିଜେପିକୁ ସମାଲୋଚନା କରିଛନ୍ତି ବରିଷ୍ଠ ବିଜେଡି ବିଧାୟକ ପ୍ରସନ୍ନ ଆଚାର୍ଯ୍ୟ । ସେହିପରି ଓଡ଼ିଶାରେ ବିକାଶ ସଂପୂର୍ଣ୍ଣ ଠପ ହୋଇଛି ବୋଲି କହିଛି କଂଗ୍ରେସ । ତେବେ ବିଜେଡିର ଦରଦାମ ବୃଦ୍ଧି ପ୍ରତିବାଦ ଏବେ ବିଜେପି ମନରେ ଛନକା ପୂରାଇଛି ।
ଓଡ଼ିଶାରେ ଭୁଶୁଡ଼ି ପଡ଼ିଛି ଶାସନ ବ୍ୟବସ୍ଥା । ୭ ମାସରେ ଦିଗହରା ହେଲାଣି ସରକାର । କାହାର କାହା ମଧ୍ୟରେ ନାହିଁ ସମନ୍ନୟ । ସବୁ କ୍ଷେତ୍ରରେ ଅବ୍ୟବସ୍ଥା, ନିୟନ୍ତ୍ରଣ ବାହାରେ ଦରଦାମ୍, ଆତ୍ମହତ୍ୟା କରୁଛି ଚାଷୀ । ସରକାରଙ୍କ ମିଥ୍ୟା ପ୍ରତିଶ୍ରୁତିକୁ ନେଇ କ୍ରୋଧରେ ଜର୍ଜରିତ ଜନତା । ବିଜେଡିର ଦରଦାମ ବୃଦ୍ଧି ପ୍ରତିବାଦ ସମାବେଶରେ ଏକାଠି ହୋଇ ସରକାର ବିରୋଧରେ ଦେଖିବାକୁ ମିଳିଛି ନାରାବାଜି । ରାଜଧାନୀରେ ଜନଶକ୍ତି ଓ ଜନମତର ହୋଇଛି ଶକ୍ତି ପ୍ରଦର୍ଶନ । ବିଜେପି ସରକାର ବିରୋଧରେ ଅସନ୍ତୋଷ ଜାହିର କରି ରାଜ୍ୟର ବିଭିନ୍ନ କୋଣରୁ ହଜାର ହଜାର ଜନତା ବିଜେଡି ପ୍ରତି ଦେଖାଇଛନ୍ତି ଅକୁଣ୍ଠ ସମର୍ଥନ ।
ଖାଲି ସେତିକି ନୁହେଁ, ନବୀନ ପଟ୍ଟନାୟକ ଓଡ଼ିଶାବାସୀଙ୍କ ଲୋକପ୍ରିୟ ନେତା ଥିଲେ ଓ ରହିବେ ବୋଲି ପ୍ରମାଣିତ କରିଛି ଏହି ସମାବେଶ । ତେଣୁ ସରକାର ବେଳ ଥାଉ ଥାଉ ସୁଧୁରିଯିବା ସହ ଯାହା ପ୍ରତିଶ୍ରୁତି ଦେଇଛନ୍ତି ତାହା ପାଳନ କରନ୍ତୁ । ଏହାସହ ଦରଦାମ ନିୟନ୍ତ୍ରଣକୁ ଆଣନ୍ତୁ ବୋଲି ପରାମର୍ଶ ଦେଇଛନ୍ତି ବିଜେଡିର ବରିଷ୍ଠ ବିଧାୟକ ପ୍ରସନ୍ନ ଆଚାର୍ଯ୍ୟ ।
ସେପଟେ ବିଜେଡିର ଶକ୍ତି ପ୍ରଦର୍ଶନକୁ ନେଇ ଉତ୍ସାହିତ ଅଛନ୍ତି ଦଳୀୟ ନେତା ଓ କର୍ମୀ । ବିଧାୟକ ସାରଦା ନାୟକ କହିଛନ୍ତି, ଦରଦାମ ବୃଦ୍ଧି ଯୋଗୁଁ କଂଗ୍ରେସ କ୍ଷମତାରୁ ହଟିଥିଲା । ଏବେ ସମାନ ସ୍ଥିତି ଭୋଗିବ ବିଜେପି । ଯାହା ସଙ୍କେତ ଦେଇ ସାରିଛନ୍ତି ଓଡ଼ିଶାବାସୀ । ସେହିପରି ବିଧାୟକ ତାରାପ୍ରସାଦ ବାହୀନିପତିଙ୍କ କହିବା କଥା, ରାଜ୍ୟରେ ଶାସନ ବ୍ୟବସ୍ଥା ବୋଲି କିଛି ନାହିଁ । ଗାଁ ଓ ପଞ୍ଚାୟତରେ ୭ ମାସ ହେବ ବିକାଶ କାମ ସଂପୂର୍ଣ୍ଣ ଠପ । ଅନ୍ୟପଟେ ବିଜେଡି ସମାବେଶରେ ଜନସମୁଦ୍ର ଦେଖି ଛାନିଆ ହୋଇଛି ବିଜେପି । ହେଲେ ଦଳୀୟ ନେତା ଏହାକୁ ମାନିବାକୁ ନାରାଜ । ସେପଟେ କିନ୍ତୁ ରାଜନୈତିକ ସମୀକ୍ଷକ କହିଛନ୍ତି, ନବୀନ ପଟ୍ଟନାୟକଙ୍କ କାର୍ଯ୍ୟକ୍ରମ ଶାସକ ଦଳ ଉପରେ ଚାପ ପକାଇଛି ।
ଚାଷୀ ସମସ୍ୟାର ସମାଧାନଠାରୁ ଆରମ୍ଭ କରି ଦରଦାମ ନିୟନ୍ତ୍ରଣ, ସବୁଥିରେ ଫେଲ ମାରିଛି ବିଜେପି ସରକାର । ଯାହା ସରକାରଙ୍କ କାର୍ଯ୍ୟଦକ୍ଷତା ଉପରେ ପ୍ରଶ୍ନବାଚୀ ସୃଷ୍ଟି କରିଛି । ଜନତାଙ୍କୁ ଦେଇଥିବା ପ୍ରତିଶ୍ରୁତି ପାଳନ କରିବାରେ ବିଜେପି ସରକାର ବିଫଳ ହେବାରୁ ତୃଣମୂଳ ସ୍ତରରେ ଦାନା ବାନ୍ଧିଲାଣି ଅସନ୍ତୋଷ । ତେଣୁ ସରକାରକୁ ଆଟାକ କରିବାକୁ ବିରୋଧୀଙ୍କୁ ମିଳିଛି ମାଇଲେଜ୍ ।
ମିଳିନି ଅଦିନିଆ ବର୍ଷାଜନିତ କ୍ଷତିପୂରଣ, ଚାଷୀଙ୍କୁ ପ୍ରତାରଣା କରିଛନ୍ତି ସରକାର: ଶାସକ-ବିରୋଧୀ ମୁହାଁମୁହିଁ
ଭୁବନେଶ୍ବର: ଚାଷୀଙ୍କ ପ୍ରତି ପ୍ରତାରଣା କରିଛନ୍ତି ସରକାର । ଧାନମଣ୍ଡି ଅବ୍ୟବସ୍ଥାଠାରୁ ଆରମ୍ଭ କରି ଅଦିନିଆ ବର୍ଷାଜନିତ କ୍ଷତିପୂରଣ ଦେବା ଯାଏଁ ସବୁଠି ସରକାର ବିଫଳ । କେବଳ ଭାଷଣ ବାଜିରେ ସରକାର ଚାଲିଛି କହି କକ୍ଷାକ୍ଷ କରିଛି ବିଜେଡି । ସେହିପରି ଚାଷୀ ଓ ଅଦିନିଆ ବର୍ଷା କ୍ଷତିପୂରଣ ନେଇ ସରକାରଙ୍କୁ ଟାର୍ଗେଟ କରିଛି କଂଗ୍ରେସ । ବିଜେପି କହିଛି ମୋହନ ସରକାର ଯାହା ଘୋଷଣା କରିଛନ୍ତି ତାହା ଚାଷୀଙ୍କୁ ମିଳିବ ।
ଚାଷୀଙ୍କ ପ୍ରତି ରାଜ୍ୟ ସରକାରଙ୍କ ନାହିଁ ଦରଦ । ଧାନମଣ୍ଡି ସମସ୍ୟା ଓ ଅଦିନିଆ ବର୍ଷାର କ୍ଷତିପୂରଣ ନେଇ ବର୍ଷିଛନ୍ତି ଦୁଇ ବିରୋଧୀ ବିଜେଡି ଓ କଂଗ୍ରେସ । ବିଜେଡି ବିଧାୟକ ସାରଦା ନାୟକ ଅଭିଯୋଗ କରିଛନ୍ତି ଯେ ରାଜ୍ୟ ସରକାର ଯାହା କହନ୍ତି ତାହା କରନ୍ତିନି । ରାଜ୍ୟରେ କେବଳ କଥା କୁହା ସରକାର ଚାଲିଛି । ଅଦିନିଆ ବର୍ଷାରେ ଚାଷୀଙ୍କ ଫସଲ ନଷ୍ଟ ହୋଇଥିବା ବେଳେ ରାଜ୍ୟ ସରକାର କ୍ଷତିପୂରଣ ଦେବାରେ ଅହେତୁକ ବିଳମ୍ବ ହେବା ରାଜ୍ୟରେ ସରକାର ଚାଲୁ ନଥିବା ପରି ଅନୁଭବ ହେଉଛି । ସେହିପରି କଂଗ୍ରେସ ନେତା ନିଶିକାନ୍ତ ମିଶ୍ର କହିଛନ୍ତି ଯେ ବିଜେପି ସରକାର ଚାଷୀ ବିରୋଧୀ ।
ଚାଷୀ ପ୍ରସଙ୍ଗରେ ଦୁଇ ବିରୋଧୀ ବିଜେଡି ଓ କଂଗ୍ରେସ ସରକାରଙ୍କୁ କାଠଗଡ଼ାକୁ ଟାଣିବା ପରେ ଜବାବ ରଖିଛି ବିଜେପି । ବିଜେପି କହିଛି ମୋହନ ସରକାର ଯାହା ଘୋଷଣା କରନ୍ତି ତାହା ପାଳନ କରିବେ । ପ୍ରବାସୀ ଭାରତୀୟ ସମ୍ମିଳନୀ ପାଇଁ ସରକାର ବ୍ୟସ୍ତ ଅଛନ୍ତି । ଚାଷୀଙ୍କ ସମସ୍ୟା ପାଇଁ ଚିରାଚରିତ ଢଙ୍ଗରେ ବିଜେଡିକୁ ଦାୟୀ କରିଛି ବିଜେପି ।
ରାଜ୍ୟରେ ଅମଳ ସମୟରେ ଅଦିନିଆ ବର୍ଷାରେ ଫସଲ ନଷ୍ଟ ଯୋଗୁଁ ୯ରୁ ଅଧିକ ଚାଷୀ ଜୀବନ ହାରିଛନ୍ତି । ଯାହା କେବେ ଦେଖା ଦେଇ ନଥିଲା ରାଜ୍ୟରେ । ଏତେ ପରେ ମଧ୍ଯ ଚାଷୀଙ୍କ ସମସ୍ୟା ପ୍ରତି ସରକାର ଅଧିକ ଫୋକସ ନକରିବା ଚିନ୍ତାର କାରଣ ବୋଲି କହିଛନ୍ତି ବିରୋଧୀ ।
HMPV ପ୍ରତିଷେଧକ ବ୍ୟବସ୍ଥା କ’ଣ କରିଛ: ବିଜେଡି
ଭୁବନେଶ୍ବର: ଦେଶରେ ଗୋଟିଏ ପରେ ଗୋଟିଏ HMPV ସଂକ୍ରମିତ ଚିହ୍ନଟ ହେଉଛନ୍ତି । ଗତକାଲି ୬ ଜଣ ସଂକ୍ରମିତ ଚିହ୍ନଟ ହୋଇଥିବା ବେଳେ ଆଜି ଆଉ ଦୁଇଜଣ ଚିହ୍ନଟ ହୋଇଛନ୍ତି । ଭଲ ଖବର ହେଲା ଓଡ଼ିଶାରେ ଏହି ଭୂତାଣୁ ଏପର୍ଯ୍ୟନ୍ତ ଚିହ୍ନଟ ହୋଇନାହିଁ । ତଥାପି ସତର୍କ ରହିବା ସହ ଆଗୁଆ ପ୍ରତିଷେଧକ ବ୍ୟବସ୍ଥା ହେବା ଜରୁରୀ । ତେଣୁ HMPVକୁ ନେଇ ଓଡ଼ିଶାରେ ପ୍ରତିଷେଧକ ବ୍ୟବସ୍ଥା କ’ଣ କରିଛନ୍ତି ବୋଲି ସରକାରଙ୍କୁ ପ୍ରଶ୍ନ କରିଛି ବିଜେଡି । ରାଜ୍ୟ ସରକାର, ମୁଖ୍ୟମନ୍ତ୍ରୀ ଓ କେନ୍ଦ୍ର ସରକାରଙ୍କୁ ପ୍ରତିଷେଧକ ବ୍ୟବସ୍ଥା କରିବା ପାଇଁ ଅନୁରୋଧ କରିଛି ବିଜେଡି । ଯେମିତି ଓଡ଼ିଶାବାସୀଙ୍କର କୌଣସି କ୍ଷତି ହେବ ନାହିଁ ସେଥିପାଇଁ ଚିନ୍ତା ପ୍ରକଟ କରିଛି ଦଳ ।
ବିଜେଡି ନେତା ପ୍ରତାପ ଜେନା କହିଛନ୍ତି, ଦେଶର ୪ଟି ରାଜ୍ୟରେ ଏହି ଭୂତାଣୁ ଚିହ୍ନଟ ହୋଇଛନ୍ତି । ମହାପ୍ରଭୁ ଜଗନ୍ନାଥଙ୍କ ଆଶୀର୍ବାଦରୁ ଓଡ଼ିଶାରେ ସେପରି କିଛି ପରିସ୍ଥିତି ନାହିଁ । ଚୀନରେ ଏହି ରୋଗରେ ହଜାରେ ଆକ୍ରାନ୍ତରୁ ଅଢ଼େଇ ଶହରୁ ତିନି ଶହ ଲୋକ ମୃତ୍ୟୁ ମୁଖରେ ପଡୁଥିଲେ । ଦେଶ ବାହାରୁ ଲୋକେ ଆସୁଥିବାରୁ ଆମକୁ ସତର୍କ ରହିବାକୁ ପଡ଼ିବ ।
ସେ ଆହୁରି କହିଛନ୍ତି, ଓଡ଼ିଶାରେ ଯେପରି ସେମିତି କୌଣସି ପରିସ୍ଥିତି ସୃଷ୍ଟି ନହେବ ସେଥିପାଇଁ ଆମକୁ ପଦକ୍ଷେପ ନେବାକୁ ପଡ଼ିବ । କୋଭିଡ ସମୟରେ କେନ୍ଦ୍ର ଜାରି କରିଥିବା ଗାଇଡଲାଇନଠାରୁ ଦୁଇପାଦ ଆଗକୁ ଯାଇ ତତକାଳୀନ ବିଜେଡି ସରକାର ପ୍ରତିଷେଧକ ବ୍ୟବସ୍ଥା କରିଥିଲେ । ସେଥିପାଇଁ କୋଭିଡ ପରିଚାଳନାରେ ସାରା ଦେଶରେ ଓଡ଼ିଶା ସମସ୍ତଙ୍କଠାରୁ ଆଗରେ ରହିବା ସହ ଶ୍ରେଷ୍ଠ ରାଜ୍ୟ ପାଲଟି ଥିଲା । ଆମେ ରାଜ୍ୟ ସରକାର, ମୁଖ୍ୟମନ୍ତ୍ରୀ ଏବଂ କେନ୍ଦ୍ର ସରକାରଙ୍କୁ ଅନୁରୋଧ କରୁଛୁ, ପ୍ରତିଷେଧକ ବ୍ୟବସ୍ଥା କରନ୍ତୁ, ଯାହାଦ୍ବାରା ଓଡ଼ିଶାରେ ଯେପରି କୌଣସି ଅପ୍ରିତିକର ପରିସ୍ଥିତି ସୃଷ୍ଟି ନହେବ ।
କଟକର ଐତିହ୍ୟ ବୁଲି ଦେଖିବେ ପ୍ରବାସୀ ଭାରତୀୟ
କଟକ: ଆସନ୍ତାକାଲିଠାରୁ ଆରମ୍ଭ ହେଉଛି ପ୍ରବାସୀ ଭାରତୀୟ ସମ୍ମିଳନୀ । ଏଥିପାଇଁ ପ୍ରବାସୀ ଭାରତୀୟଙ୍କ ଓଡ଼ିଶା ଆଗମନ ଆରମ୍ଭ ହୋଇସାରିଛି । ଏହି ସମ୍ମିଳନୀରେ ଓଡିଶା ଆସୁଥିବା ଅତିଥିମାନେ ଐତିହାସିକ କଟକ ସହରର ୫ଟି ସ୍ଥାନ ବୁଲି ଦେଖିବେ । ନେତାଜୀ ଜନ୍ମସ୍ଥାନ ସଂଗ୍ରହାଳୟ, ଯୋବ୍ରା ମାରିଟାଇମ ମ୍ୟୁଜିୟମ୍, ବାରବାଟୀ ଦୁର୍ଗ ପରିସର, ସିଲଭରସିଟି ବୋଟ କ୍ଲବ ଓ ଜୁଡିସିଆଲ ମ୍ୟୁଜିୟମ ସହ ଲଳିତଗିରି ଓ ମାଣିଆବନ୍ଧ ବୁଲି ଦେଖିବେ ପର୍ଯ୍ଯଟକ । ଏଥିପାଇଁ ଏସବୁ ସ୍ଥାନ ଓ ସହରର ସୁନ୍ଦର ସାଜସଜା କାମ ସରିଛି । ୭ ତାରିଖରୁ ୧୦ ତାରିଖ ପର୍ଯ୍ୟନ୍ତ ସିଲଭର ସିଟି ବୋଟ କ୍ଲବରେ ଅତିଥି ଓ ସାଧାରଣ ଲୋକଙ୍କ ପାଇଁ ମହାନଦୀ ଫେଷ୍ଟିଭାଲ ଆୟୋଜନ କରାଯାଇଛି ।
କଟକ ସହର ବୁଲି ଦେଖିବେ ପ୍ରବାସୀ ଭାରତୀୟ । ଏଥିପାଇଁ ସଜେଇ ହେଲାଣି ସିଲଭର ସିଟି । ଭୁବନେଶ୍ବରରେ ୮ ତାରିଖରୁ ୧୦ ତାରିଖ ପର୍ଯ୍ୟନ୍ତ ଆୟୋଜିତ ଅଷ୍ଟାଦଶ ପ୍ରବାସୀ ଭାରତୀୟ ସମ୍ମିଳନୀକୁ ଆସୁଥିବା ଅତିଥିମାନେ ୩ ଦିନରେ କଟକ ସହରର ନେତାଜୀ ଜନସ୍ଥାନ ସଂଗ୍ରହାଳୟ, ବାରବାଟୀ ଦୁର୍ଗ, ସିଲଭରସିଟି ବୋଟ କ୍ଲବ, ନ୍ୟାୟିକ ମ୍ୟୁଜିୟମ, ଯୋବ୍ରା ମାରିଟାଇମ ମ୍ୟୁଜିୟମ ବୁଲି ଦେଖିବେ । ଏଥିପାଇଁ ଏସବୁ ସ୍ଥାନକୁ ସୁନ୍ଦର ଭାବେ ସଜା ଯିବା ସହିତ ଆଲୋକ ବ୍ୟବସ୍ଥା କରାଯାଇଛି । ଯେଉଁ ରାସ୍ତା ଦେଇ ସେମାନେ କଟକ ବୁଲିବେ ସେ ସବୁକୁ ପରିଷ୍କାର କରି ୱାଲ ପେଣ୍ଟିଂ କରାଯାଉଛି ।
କେବଳ ସେତିକି ନୁହେଁ ପ୍ରବାସୀ ଭାରତୀୟ ଲଳିତଗିରି ଯାଇ ସେଠାକାର ଐତିହାସିକ ଗୁମ୍ଫା ଓ ବୌଦ୍ଧ ପରମ୍ପରା ବୁଲି ଦେଖିବେ । ସେହିପରି ଶାଢୀ ବୁଣା ଦେଖିବାକୁ ମାଣିଆବନ୍ଧ ପରିଦର୍ଶନ କରିବେ । ଅନ୍ଯପକ୍ଷରେ କଟକ ସିଲଭର ସିଟି ବୋଟ କ୍ଲବରେ ୭ରୁ ୧୦ ତାରିଖ ପର୍ଯ୍ୟନ୍ତ ମହାନଦୀ ଫେଷ୍ଟିଭାଲ ଆୟୋଜିତ ହେଉଛି । କଟକ ପ୍ରସିଦ୍ଧ ଦହିବରା ଆଳୁଦମ, ଠୁଙ୍କାପୁରୀ ଖାଦ୍ଯର ପସରା ସାଙ୍ଗକୁ ଫିଲିଗିରି ଗହଣା ତିଆରି ଓ ମାଣିଆବନ୍ଧ ଶାଢୀ ବୁଣାର ଡେମୋ ସହ ପ୍ରଦର୍ଶନୀ ଲାଗିବ । ଏଥିପାଇଁ ସମସ୍ତଙ୍କ ସହଯୋଗ କାମନା କରିଛି ସିଏମସି ଓ ଜିଲ୍ଲା ପ୍ରଶାସନ ।