ଭୁବନେଶ୍ବର: ପୁଣି ଯୋଜନାକୁ ନେଇ ମୁହାଁମୁହିଁ ଶାସକ ଓ ବିରୋଧୀ । ବିଜେଡି ସରକାର ସମୟରେ ‘ଆମ ଗାଁ ଓ ଆମ ବିକାଶ’ ଯୋଜନାର ନାଁ ପରିବର୍ତ୍ତନ କରି ବିଜେପି କରିଛି ‘ବିକଶିତ ଗାଁ, ବିକଶିତ ଓଡ଼ିଶା’ । ଏଥିପାଇଁ ବିସ୍ତୃତ ମାର୍ଗଦର୍ଶିକା ଜାରି ହେବା ପରେ ବିଜେପିକୁ ଘେରିଛନ୍ତି ବିରୋଧୀ । ବିଜେଡି ବିଧାୟକ ବଦ୍ରି ନାରାୟଣ ପାତ୍ର କହିଛନ୍ତି, ନବୀନଙ୍କ ଲୋକପ୍ରିୟ ଯୋଜନାର କେବଳ ନାଁ ପରିବର୍ତ୍ତନ କରୁଛି ବିଜେପି । ଅନ୍ୟପଟେ କଂଗ୍ରେସ କହିଛି ବିଜେପି କର୍ମୀଙ୍କ ପାଇଁ ବିକଶିତ ଗାଁ, ବିକଶିତ ଓଡ଼ିଶା ଯୋଜନା କରାଯାଇଛି । ୭ ମାସରେ ବିଜେପି କେବଳ ରଙ୍ଗ ଓ ନାଁ ପରିବର୍ତ୍ତନ କରି ବିକଶିତ କରିଛି ।
୨୪ ବର୍ଷ ଧରି ନବୀନ ପଟ୍ଟନାୟକଙ୍କ ନେତୃତ୍ବରେ ବିଭିନ୍ନ ଲୋକପ୍ରିୟ ଯୋଜନା କରାଯାଇଥିଲା । ଗୋଟିଏ ପରେ ଗୋଟିଏ ଲୋକପ୍ରିୟ ଯୋଜନାକୁ ଗ୍ରାଉଣ୍ଡରେ ସଫଳ ରୂପାୟନ କରିଥିଲା ପୂର୍ବ ସରକାର । ଏହାରି ଭିତରେ ୭ ମାସର ବିଜେପି ସରକାର କେବଳ ନବୀନଙ୍କ ଯୋଜନାର ନାଁ ପରିବର୍ତ୍ତନ କରି ନୂଆ ନାଁ ଦେଉଛି । ବିଜେଡି ସରକାର ସମୟର ଆମ ଗାଁ, ଆମ ବିକାଶ ଯୋଜନାକୁ ସେତେବେଳେ କେନ୍ଦ୍ର ସରକାର ଓ ଜାତିସଂଘ ପୁରସ୍କାର ଦେଇଥିଲେ । ଏହି ଯୋଜନାକୁ ଏବେ ନୂଆ ନାଁ ଦେଇ ବିଜେପି ସରକାର ବିକଶିତ ଗାଁ, ବିକଶିତ ଓଡ଼ିଶା କରିଛି ବୋଲି ବରିଷ୍ଠ ବିଜେଡି ବିଧାୟକ ବଦ୍ରି ନାରାୟଣ ପାତ୍ର କହିଛନ୍ତି । ତେଣୁ ରଙ୍ଗ ବଦଳାଇବା ଓ ନାଁ ପରିବର୍ତ୍ତନ କରିବା ବିଜେପି ସରକାର ବନ୍ଦ କରି କିଛି ନୂଆ ଯୋଜନା କରୁ । ବାରମ୍ବାର ପୂର୍ବ ସରକାର, ପୂର୍ବ ସରକାର ନଘୋଷି ବିଜେପି କିଛି ନୂଆ ଯୋଜନା କରି ଏହାକୁ ସଫଳ କରିବାକୁ ପରାମର୍ଶ ଦେଇଛନ୍ତି ବଦ୍ରି ।
ଅନ୍ୟପଟେ ବିକଶିତ ଗାଁ, ବିକଶିତ ଓଡ଼ିଶା ପାଇଁ ବିସ୍ତୃତ ମାର୍ଗଦର୍ଶିକା ଜାରି କରାଯାଇଛି । ଜିଲ୍ଲାପାଳ ଓ ବିଡିଓଙ୍କୁ ଏହି ମାର୍ଗଦର୍ଶିକା ପଠାଯାଇଛି । ଆସନ୍ତା ଫେବୃଆରୀ ମାସ ୧୫ ତାରିଖ ସୁଦ୍ଧା ପ୍ରତି ଗାଁ ମାର୍ଗଦର୍ଶିକା ଅନୁସାରେ ୫ ବର୍ଷିଆ ଯୋଜନାର ତାଲିକା ପ୍ରସ୍ତୁତ କରି ପଠାଇବାକୁ କୁହାଯାଇଛି । ଗାଁର ବିକାଶକୁ ତ୍ବରାନ୍ବିତ କରିବାକୁ ବିଜେପି ସରକାର ଗୁରୁତ୍ବ ଦେଇଥିବା ବିଜେପି ବିଧାୟକ ପୂର୍ଣ୍ଣ ସେଠୀ କହିଛନ୍ତି ।
ତେବେ ବିଜେପି ୭ ମାସ ଧରି ରଙ୍ଗ ଓ ନାଁ ବଦଳାଇବାରେ ଏକ୍ସପର୍ଟ ହୋଇଛି । ବିକଶିତ ଗାଁ, ବିକଶିତ ଓଡ଼ିଶା ବିଜେପି କର୍ମୀଙ୍କ ପାଇଁ ସରକାର କରିଥିବା କଂଗ୍ରେସ ବିଧାୟକ ନୀଳମାଧବ ହିକକା କହିଛନ୍ତି ।
୨୪ ବର୍ଷରେ ନବୀନ ଓଡ଼ିଶାବାସୀଙ୍କ ପାଇଁ ଜନ୍ମରୁ ମୃତ୍ୟୁ ଯାଏଁ ଯୋଜନା କରି ଏହାକୁ ସଫଳ ରୂପାୟନ କରିଥିଲେ । ସରକାର ବଦଳିବା ପରେ ବିଜେପି ନବୀନଙ୍କ ଯୋଜନାର ନାଁ ପରିବର୍ତ୍ତନ କରି ନୂଆ ନାଁ ଦେଇ ବାହାବା ସାଉଁଟିବାକୁ ଉଦ୍ଯମ କରୁଛି । ବିଜେପିର ଏପରି ଆଭିମୁଖ୍ୟକୁ କଡ଼ା ସମାଲୋଚନା ସତ୍ତ୍ବେ ସରକାର କିନ୍ତୁ ବେଫିକର ।
