ଭୁବନେଶ୍ବର : ଗିରଫ ହେଲେ ସୁନ୍ଦରଗଡ଼ ବଣାଇ ITDA PA ବିଶ୍ଵଦର୍ଶୀ ସାହୁ। ଆୟ ବହିର୍ଭୁତ ସଂପତ୍ତି ଠୁଳ ଅଭିଯୋଗରେ ତାଙ୍କୁ ଗିରଫ କରିଛି ଭିଜିଲାନସ। ତାଙ୍କଠୁ ମିଳିଛି ଅମାପ ସମ୍ପତ୍ତି। ଭୁବନେଶ୍ଵରରେ ଗୋଟିଏ ବହୁତଳ କୋଠା, ୨ଟି ଫ୍ଲାଟ, ରାଜଧାନୀରେ ୯ଟି ଦାମୀ ପ୍ଲଟ, ଦେଢଶହ ଗ୍ରାମ ସୁନା ଅଳଙ୍କାର ସହ ୪ ଲକ୍ଷରୁ ଅଧିକ ଟଙ୍କାର କ୍ଯାସ ମିଳିଛି । ଆୟବର୍ହିଭୂତ ସମ୍ପତ୍ତି ଠୁଳ ଅଭିଯୋଗରେ ITDA ପ୍ରକଳ୍ପ ଅଧିକାରୀଙ୍କ ସରକାରୀ ଘର ଏବଂ ବାସଭବନରେ ରେଡ୍ ହୋଇଥିଲା। ଗତକାଲି ଭୁବନେଶ୍ଵରର ୩ ସ୍ଥାନ ସମେତ ବାଲେଶ୍ଵର, ଯାଜପୁର ଓ ବଣାଇର ଦୁଇଟି ସ୍ଥାନରେ ରେଡ କରିଥିଲା ଭିଜିଲାନସ।
ରାଜନୀତି ବିଜ୍ଞାନ ପ୍ରଶ୍ନପତ୍ର ଲିକ ମାମଲା, ୧୨ ଗିରଫ
ବରଗଡ : ଯୁକ୍ତ ତିନି ତୃତୀୟ ସେମିଷ୍ଟର ରାଜନୀତି ବିଜ୍ଞାନ ପ୍ରଶ୍ନପତ୍ର ଲିକ ମାମଲା । ୧୨ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି ବରପାଲି ପୋଲିସ । ବରଗଡ ଜିଲ୍ଲା ବରପାଲି ମହାବିଦ୍ୟାଳୟରେ ତୃତୀୟ ସେମିଷ୍ଟାର ପରୀକ୍ଷା ଚାଲିଥିବାବେଳେ ସ୍କ୍ବାଡ ପ୍ରଶ୍ନପତ୍ର ଓ ଉତ୍ତର ଖାତା ଦେଖି ସନ୍ଦେହ କରିଥିଲା । ଏ ନେଇ ତୁରନ୍ତ ମହାବିଦ୍ୟାଳୟର ଅଧ୍ୟକ୍ଷାଙ୍କୁ ପରୀକ୍ଷା ହଲକୁ ଡାକି ତଦାରଖ ପାଇଁ କହିଥିଲେ। ଅଧ୍ୟକ୍ଷା ସଙ୍ଗେସଙ୍ଗେ ପରୀକ୍ଷା ହଲରେ ଚେକିଂ କରି କିଛି ଛାତ୍ରଙ୍କୁ ଧରିଥିଲେ l ପ୍ରଶ୍ନ ପତ୍ର ଲିକ୍ ହୋଇଛି ବୋଲି ବରପାଲି ମହାବିଦ୍ୟାଳୟର ଅଧ୍ୟକ୍ଷା ସୁଶ୍ରୀ ଜୟନ୍ତୀ ଦାଶ ବରପାଲି ଥାନାରେ ଏତଲା ଦେଇଥିଲେ l ପୋଲିସ ଉକ୍ତ ଘଟଣାର ଅଧିକ ଛାନ ବିନ କରି ୧୦ ଜଣ ଛାତ୍ର ଓ ଜଣେ କମ୍ପ ଦୋକାନୀ ସହ କିରାଣୀଙ୍କୁ ଗତକାଲି ଅପରାହ୍ନରେ ଗିରଫ କରି କୋର୍ଟ ଚାଲାଣ କରିଛନ୍ତି ।ଏହି ପ୍ରଶ୍ନ ପତ୍ର ଲିକ ଘଟଣାରେ ରେଢ଼ାଖୋଲ ଉପଖଣ୍ଡ ନାକଟିଦେଉଳ ମହାବିଦ୍ୟାଳୟର କିରାଣୀ ଆଲୋକ ସାହୁ ସମେତ ବିଭିନ୍ନ ମହାବିଦ୍ୟାଳୟ ଛାତ୍ର ସମେତ ମୋଟ ୧୨ଜଣକୁ ପୋଲିସ କେସ ନଂ ୨୯/୨୫.ଆଇପିସି ୩୧୮ (୪)୬୧୨, ୬୬ ଆଇ ଟି ଆର (୯) ଦଫାରେ ଗିରଫ କରି କୋର୍ଟ ଚାଲାଣ କରିଥିବା ପୋଲିସ କହିଛି ।
ରାତିରେ ଶୋଇଥିଲେ, ସକାଳୁ ମିଳିଲା ମୃତଦେହ
ଭୁବନେଶ୍ବର : ରାତିରେ ଶୋଇଥିଲେ, ସକାଳୁ ମିଳିଲା ମୃତଦେହ । ଭୁବନେଶ୍ବର ଖାରବେଳ ନଗରରେ ଅଭାବନୀୟ ଘଟଣା। ସ୍ଥାନୀୟ ପଞ୍ଜାବୀ କଲୋନୀରୁ ମିଳିଛି ୨ ଯୁବକଙ୍କ ମୃତଦେହ। ୨ ମୃତକ ମୋ ପିଠା ନାମକ ସଂସ୍ଥାରେ କାମ କରୁଥିଲେ। ଘଟଣାସ୍ଥଳରେ ଖାରବେଳ ନଗର ପୋଲିସ ଓ ସାଇଣ୍ଟିଫିକ ଟିମ ପହଞ୍ଚି ତଦନ୍ତ କରୁଛି । ଯୁବକଙ୍କ ମୃତ୍ଯୁର କାରଣ ସ୍ପଷ୍ଟ ହୋଇପାରିନାହିଁ। ଘର ମାଲିକଙ୍କୁ ପଚରାଉଚରା କରିବା ସହ ସିସିଟିଭି ଯାଞ୍ଚ କରାଯାଉଛି । ଏହାସହ ମୋ ପିଠା ସଂସ୍ଥାର ମାଲିକଙ୍କୁ ଡକାଯାଇଛି ବୋଲି ପୋଲିସ କହିଛି । ମୃତଦେହକୁ ଉଦ୍ଧାର କରି କ୍ୟାପିଟାଲ ହସ୍ପିଟାଲ ନିଆଯାଇଛି । ମୃତକଙ୍କ ପରିବାର ମଧ୍ୟ ଥାନାରେ ପହଞ୍ଚିଛନ୍ତି ।
ତୃତୀୟ ଶ୍ରେଣୀ ଛାତ୍ରଙ୍କୁ ଶିକ୍ଷୟିତ୍ରୀଙ୍କ ମାଡ଼ ଅଭିଯୋଗ
ପାରାଦୀପ: ଗଣିତ ଖାତା ନଦେବାରୁ ତୃତୀୟ ଶ୍ରେଣୀ ଛାତ୍ରଙ୍କୁ ଶିକ୍ଷୟିତ୍ରୀଙ୍କ ମାଡ଼ ଅଭିଯୋଗ। ଏଭଳି ଘଟଣା ଦେଖିବାକୁ ମିଳଛି ପାରାଦୀପର ଏକ ଘରୋଇ ସ୍କୁଲରେ । ଛାତ୍ର ଜଣଙ୍କ ଗଣିତ ପାଠ କରିନଥିବାରୁ ଶିକ୍ଷୟତ୍ରୀ ତାଙ୍କୁ ମାଡ଼ ମାରିଥିବା ଅଭିଯୋଗ ହୋଇଛି । ଛାତ୍ର ଜଣଙ୍କ ଘରେ ପହଞ୍ଚି ବସି ଉଠି ପାରୁନଥିବାରୁ ପରିବାର ସଦସ୍ୟ ଘଟଣା ସମ୍ପର୍କରେ ଜାଣିବାକୁ ପାଇଥିଲେ। ଏ ସମ୍ପର୍କରେ ପ୍ରଧାନ ଶିକ୍ଷୟିତ୍ରୀଙ୍କୁ ଭେଟି ଅଭିଯୋଗ କରିଥିଲେ ଅଭିଭାବକ। ମାତ୍ର ପ୍ରଧାନ ଶିକ୍ଷୟିତ୍ରୀ ଛାତ୍ରଙ୍କ ବାପାଙ୍କୁ ଗେଟ ବାହାରକୁ ଯିବା ପାଇଁ ନିର୍ଦ୍ଦେଶ ଦେଇଥିଲେ ।
ଦଣ୍ଡମୁକ୍ତ ଅଞ୍ଚଳରେ ଛାତ୍ରଙ୍କୁ ନିର୍ମମ ଭାବେ ବାଡେଇବା ଘଟଣାକୁ ନେଇ ଛାତ୍ରଙ୍କ ବାପା ପାରାଦୀପ ଆଦର୍ଶ ଥାନାରେ ଏତଲା ଦେଇଛନ୍ତି । ପୋଲିସ ଘଟଣାର ତଦନ୍ତ ଆରମ୍ଭ କରିଛି ।
ଆଜି ଅର୍ଥନୈତିକ ସର୍ଭେ ରିପୋର୍ଟ, ସଂସଦରେ ଉପସ୍ଥାପନ କରିବେ ନିର୍ମଳା ସୀତାରମଣ
ନୂଆଦିଲ୍ଲୀ: ଆସନ୍ତାକାଲି ବଜେଟ ଉପସ୍ଥାପନ ହେବା ପୂର୍ବରୁ ଆଜି ସଂସଦରେ ଇକୋନୋମିକ ସର୍ଭେ ରିପୋର୍ଟ ଉପସ୍ଥାପନ ହେବ। କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ଲୋକସଭାରେ ଏହି ରିପୋର୍ଟ ଉପସ୍ଥାପନ କରିବେ। ଗତ ଆର୍ଥିକ ବର୍ଷରେ ଦେଶର ଅର୍ଥନୀତି କେମିତି ଥିଲା, ତାହା ଏହି ରିପୋର୍ଟରୁ ଜଣାପଡ଼ିଥାଏ। ଆସନ୍ତା ଆର୍ଥିକ ବର୍ଷ କେମିତି ରହିବ, ତାହା ଅର୍ଥନୈତିକ ସର୍ଭେ ରିପୋର୍ଟରୁ ସୂଚନା ମିଳିଥାଏ।
ଅର୍ଥନୈତିକ ସର୍ଭେ ରିପୋର୍ଟରୁ ମଧ୍ୟ ଆଭାସ ମିଳିଥାଏ, କେମିତି ହୋଇପାରେ କେନ୍ଦ୍ର ବଜେଟ। କେନ୍ଦ୍ର ସରକାରଙ୍କ ମୁଖ୍ୟ ଆର୍ଥିକ ପରାମର୍ଶଦାତା ଭି. ଅନନ୍ତ ନାଗେଶ୍ଵରଙ୍କ ପ୍ରତ୍ଯକ୍ଷ ତତ୍ତ୍ଵାବଧାନରେ ଏହି ରିପୋର୍ଟ ପ୍ରସ୍ତୁତ ହୋଇଛି।
ବଜେଟ ଅଧିବେଶନ:ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ସମ୍ବୋଧନ
ନୂଆଦିଲ୍ଲୀ: ଆଜିଠୁ ଆରମ୍ଭ ହୋଇଛି ସଂସଦର ବଜେଟ ଅଧିବେଶନ । ଉଭୟ ଗୃହର ମିଳିତ ଅଧିବେଶନକୁ ସମ୍ବୋଧନ କରିଛନ୍ତି ରାଷ୍ଟ୍ରପତି ଦ୍ରୌପଦୀ ମୁର୍ମୁ । ପ୍ରଥମେ ସମ୍ବିଧାନ ପ୍ରଣେତାଙ୍କୁ ପ୍ରଣାମ ଜଣାଇ ରାଷ୍ଟ୍ରପତି ମହାକୁମ୍ଭ ଅଘଟଣକୁ ନେଇ ଦୁଃଖପ୍ରକାଶ କରିଥିଲେ । ଆହତଙ୍କ ଆଶୁଆରୋଗ୍ୟ କାମନା କଲେ ରାଷ୍ଟ୍ରପତି । ସେ କହିଛନ୍ତି, ଦେଶ ବର୍ତ୍ତମାନ ଦ୍ରୁତ ଗତିରେ ବିକାଶ କରୁଛି । ବିକଶିତ ଭାରତ ଯାତ୍ରାକୁ ନୂଆ ଗତି ଦିଆଯାଇଛି । ଡିଜିଟାଲ ବିପ୍ଲବ କରାଯାଇଛି । ୨ କୋଟି ୨୫ ଲକ୍ଷ ଲୋକ ସ୍ବାମୀତ୍ଵ ଯୋଜନାରେ ସାମିଲ ହୋଇଛନ୍ତି । ୧୦ ବର୍ଷର ଶାସନ ବିକଶିତ ଭାରତକୁ ଗତି ମିଳିଛି ବୋଲି କହିଛନ୍ତି ରାଷ୍ଟ୍ରପତି । ସେହିପରି ଶିକ୍ଷା ଓ ରୋଜଗାର ଉପରେ ଫୋକସ କରାଯାଇଛି । ୨୫ କୋଟି ଗରିବୀରୁ ଉପରକୁ ଉଠିଛନ୍ତି । ଗରିବଙ୍କ ପାଇଁ ସରକାର ପ୍ରତିଶୃତିବଦ୍ଧ । ଇସ୍ରୋ ୧୦୦ତମ ରକେଟ ଉତକ୍ଷେପଣ କରିଛି । ଏଥିପାଇଁ ଇସ୍ରୋକୁ ଅଭିନନ୍ଦନ ଜଣାଇଛନ୍ତି ରାଷ୍ଟ୍ରପତି ।
ସବକା ସାଥ୍ ସବକା ବିକାଶ ଆମର ଲକ୍ଷ୍ୟ ବୋଲି କହିଛନ୍ତି ରାଷ୍ଟ୍ରପତି । କ୍ରୀଡ଼ା କ୍ଷେତ୍ରରେ ମଧ୍ୟ ଦେଶର ଉନ୍ନତି ହୋଇଛି । ବିଶ୍ଵ ଚେସ୍ ଚାମ୍ପିୟନସିପରେ ବିଜୟୀ ହୋଇ ଭାରତ ଇତିହାସ ରଚିଛି । କିଷାନ, ଯବାନ ଓ ବିଜ୍ଞାନ ଉପରେ ଫୋକସ ଦିଆଯାଉଛି । ଅଷ୍ଟମ ବେତନ କମିଶନ ଗଠନ ହୋଇଛି । ଉତ୍ତମ ସ୍ବାସ୍ଥ୍ୟସେବା ପାଇଁ ଆୟୁଷ୍ମାନ ଭାରତ ଯୋଜନା ଲାଗୁ ହୋଇଛି । ବନ୍ଦେ ଭାରତ ଓ ନମୋ ଭାରତ ଟ୍ରେନ୍ ଚାଲୁଛି । ଲୋକଙ୍କ ସୁବିଧା ପାଇଁ କମନ୍ ସର୍ଭିସ ସେଣ୍ଟର ଓ କର ବ୍ୟବସ୍ଥାକୁ ସରଳ କରାଯାଇଛି । ମହିଳାଙ୍କୁ ସଶସ୍ତ କରିବା ଲକ୍ଷ୍ୟ ରଖାଯାଇଛି । ମାତୃଭାଷାରେ ଶିକ୍ଷାକୁ ଗୁରୁତ୍ଵ ମିଳିଛି । AI ଓ ଡିଜିଟାଲ କ୍ଷେତ୍ରରେ ଭାରତ ଆଗରେ ରହିଛି । ୧୩ଟି ଭାଷାରେ ଏବେ ପରୀକ୍ଷା ହେଉଛି । ଦେଶରେ ୧ ହଜାର କିଲୋମିଟରରୁ ଅଧିକ ମେଟ୍ରୋ ରେଳ ନେଟୱର୍କ ବିସ୍ତାରିତ ହୋଇଛି । ବିମାନ ବନ୍ଦନ ଓ ରେଳ ଷ୍ଟେସନ ସଂଖ୍ୟା ବଢ଼ିଛି । ଆଦିବାସୀ ଅଞ୍ଚଳରେ ୩୦ ମେଡିକାଲ କଲେଜ ସ୍ଥାପିତ ହୋଇଛି । ମେଡ୍ ଇନ୍ ଇଣ୍ଡିଆରୁ ମେଡ୍ ଫର୍ ୱାର୍ଲଡକୁ ଆମେ ଯାଉଛୁ । ଆଜି ବିଶ୍ଵ ଭାରତର ଯୋଗ ପରମ୍ପରାକୁ ମାନିଛି । ଦଣ୍ଡ ନୁହେଁ, ନ୍ଯାୟ ସଂହିତା ଉପରେ ଗୁରୁତ୍ଵ ଦିଆଯାଇଛି । ଚାଷୀଙ୍କ ଆୟ ବୃଦ୍ଧି ପାଇଁ ଆମେ କାମ କରୁଛୁ । AI କ୍ଷେତ୍ରରେ ଭାରତ ଅଗ୍ରଣୀ ରହିଛି । ମୁଦ୍ରା ଋଣ ପରିମାଣ ବୃଦ୍ଧି କରାଯାଇଛି । ଆଗାମୀ ୫ ବର୍ଷରେ ମେଡିକାଲ ସିଟ୍ ୭୫ ହଜାର ବୃଦ୍ଧି କରାଯିବା ନେଇ ଲକ୍ଷ୍ଯ ରହିଛି ବୋଲି ନିଜ ଅଭିଭାଷଣରେ କହିଛନ୍ତି ମହାମହିମ ।
ଆପଣଙ୍କ ମୃତ୍ୟୁରେ ପୃଥିବୀର ବୋଝ କମ ହୁଏକି ?
ନନ୍ଦିଘୋଷ ବ୍ୟୁରୋ: ଦୁନିଆରେ ଜନ୍ମ ମରଣ ସତ୍ୟ। ଅନେକ ସମୟରେ ଆଖପାଖ ଲୋକଙ୍କଠାରୁ ଶୁଣିବାକୁ ମିଳିଥାଏ ଯେ, ମଣିଷର ମୃତ୍ୟୁରେ ପୃଥିବୀର ଓଜନ କମ୍ ହୁଏ। ଏଠାରେ ପ୍ରଶ୍ନ ଉଠୁଛି ଯେ, ମରଣ ପରେ କଣ ସତରେ ପୃଥିବୀର ଓଜନ କମିଯାଏ । ଏହାକୁ ନେଇ ଅନେକ ଥର ଗବେଷଣା ହୋଇଛି । ତେବେ ଚାଲନ୍ତୁ ଜାଣିବା ଲୋକମାନେ କହୁଥିବା କଥା କେତେ ଦୂର ଠିକ୍ ଅବା ଭୁଲ୍ ଅଟେ।
ପୃଥିବୀପୃଷ୍ଠରେ ଜନସଂଖ୍ୟା ଦିନକୁ ଦିନ ବୃଦ୍ଧି ପାଇବାରେ ଲାଗିଛି । ପୃଥିବୀରେ ବର୍ତ୍ତମାନ ୮୦୦ କୋଟିରୁ ଅଧିକ ଲୋକ ବସବାସ କରୁଛନ୍ତି। ରିପୋର୍ଟ ଅନୁଯାୟୀ, ଆଗାମୀ ୨୦ ବର୍ଷରେ ଜନସଂଖ୍ୟା ବୃଦ୍ଧି ହୋଇ ୯୦୦ କୋଟିରେ ପହଞ୍ଚିବ । ତେବେ ଏଠାରେ ପ୍ରଶ୍ନ ଉଠୁଛି କି ପୃଥିବୀର ଯେତିକି ଓଜନ କ୍ଷମତା ରହିଛି ତାଠାରୁ ଅଧିକ ଲୋକ ବସବାସ କରିପାରିବେ କି ନାହିଁ? ଲୋକଙ୍କ ମୃତ୍ୟୁ ପରେ ପୃଥିବାର ବୋଝ କମିଯାଉଛି କି ନାହିଁ… ଚାଲନ୍ତୁ ଜାଣିବା ।
ଅନେକ ଥର ଆପଣ ନିଶ୍ଚୟ ଶୁଣିଥିବେ ଯେ ମଣିଷ ମରିବା ପରେ ପୃଥିବୀର ଭାର ହ୍ରାସ ହୋଇଥାଏ । କିମ୍ବା କିଛି ଲୋକ କୁହନ୍ତି ଯେ, ମଣିଷ ପୃଥିବୀ ଉପରେ ବୋଝ ଅଟେ । କିନ୍ତୁ ବୈଜ୍ଞାନିକଙ୍କ ମତ ଅନୁଯାୟୀ, ଏହି ସବୁ କଥା ଗୁଡିକରେ କୌଣସି ସତ୍ୟତା ନାହିଁ । ଏହା ଲୋକ କଥା ବୋଲି ବୈଜ୍ଞାନିକ କହିଛନ୍ତି । ବାସ୍ତବରେ, ମୃତ୍ୟୁ କିମ୍ବା ଲୋକଙ୍କ ଜନ୍ମ ପୃଥିବୀର ଓଜନ ଉପରେ ଅଧିକ ପରିବର୍ତ୍ତନ କରେ ନାହିଁ। କାରଣ ମାଧ୍ୟାକର୍ଷଣ ଶକ୍ତି ଯୋଗୁଁ ପୃଥିବୀର ଓଜନ ବୃଦ୍ଧି ଏବଂ ହ୍ରାସ ଉପରେ ନିର୍ଭର କରିଥାଏ । ଲୋକଙ୍କ ମୃତ୍ୟୁ ସହିତ ଏହାର କୌଣସି ସମ୍ପର୍କ ନାହିଁ । କିମ୍ୱା ଏହା ଦ୍ୱାର ପୃଥିବୀର ଓଜନ ହ୍ରାସ ହୁଏ ନାହିଁ ।
ଏବେ ଆପଣଙ୍କ ମନରେ ପ୍ରଶ୍ନ ଆସୁଥିବ ଯେ, ପୃଥିବୀର ଓଜନ କେତେ? ପୃଥିବୀର ଓଜନ ସମ୍ବନ୍ଧରେ ବୈଜ୍ଞାନିକମାନେ ଭିନ୍ନ ଭିନ୍ନ ମତ ଦେଇଛନ୍ତି । ବାସ୍ତବରେ ପୃଥିବୀର ଓଜନ ଏହାର ମାଧ୍ୟାକର୍ଷଣ ଶକ୍ତି ଉପରେ ନିର୍ଭର କରେ । ଏହାକୁ ସରଳ ଭାଷାରେ କହିବାକୁ ଗଲେ ପୃଥିବୀର ଓଜନ ଲକ୍ଷ ଲକ୍ଷ କୋଟି ଅଟେ । ନାସା ଅନୁଯାୟୀ ପୃଥିବୀର ଓଜନ ୫.୯୭୨୨x୧୦୨୪କିଲୋଗ୍ରାମ ଅଟେ। ଏହାକୁ ୧୩.୧ ସେପ୍ଟିଲିୟନ୍ ପାଉଣ୍ଡରେ ମଧ୍ୟ ମାପ କରାଯାଏ। ତେବେ ମାଧ୍ୟାକର୍ଷଣ ଶକ୍ତି ହିସାବରେ ପୃଥିବୀର ଓଜନ କମ ବେଶି ହୋଇଥାଏ ।
ବୈଜ୍ଞାନିକଙ୍କ ଅନୁଯାୟୀ, ପୂର୍ବରୁ ପୃଥିବୀରେ ଅଧିକ ଜନସଂଖ୍ୟା ନଥିଲା । ପୂର୍ବରୁ ପୃଥିବୀରେ ମାନବ ଜନସଂଖ୍ୟା ବହୁତ କମ୍ ଥିଲା । ବୈଜ୍ଞାନିକଙ୍କ ଅନୁଯାୟୀ, ଦଶ ହଜାର ବର୍ଷ ପୂର୍ବେ ପୃଥିବୀରେ କେବଳ ଅଳ୍ପ ଲକ୍ଷ ଲୋକ ଥିଲ । ଅଷ୍ଟାଦଶ ଶତାବ୍ଦୀର ଶେଷ ଭାଗରେ, ପୃଥିବୀର ଜନସଂଖ୍ୟା ୧୦୦ କୋଟି ସଂଖ୍ୟାକୁ ଛୁଇଁଥିଲା । ୧୯୨୦ରେ, ପୃଥିବୀରେ ଦୁଇଶହ କୋଟି ଲୋକ ଥିଲେ । ବର୍ତ୍ତମାନ ଦିନକୁ ଦିନ ଲୋକଙ୍କ ସଂଖ୍ୟା ପୃଥିବୀରେ ବୃଦ୍ଧି ହେବାରେ ଲାଗିଛି ।
କଣାସ ଅଞ୍ଚଳରେ ଝାଡ଼ାବାନ୍ତି ନେଲା ଆଉ ଏକ ଜୀବନ
ପୁରୀ: ପୁରୀ କଣାସ ଅଞ୍ଚଳରେ ଝାଡ଼ାବାନ୍ତି ନେଲା ଆଉ ଏକ ଜୀବନ। ଝାଡ଼ାବାନ୍ତିରେ ଆକ୍ରାନ୍ତ ହୋଇ ଜଣେ ମହିଳାଙ୍କ ମୃତ୍ୟୁ ହୋଇଥିବାର ଅଭିଯୋଗ ହୋଇଛି। ମୃତକ ହେଲେ ଜାଗୁଳେଇ ପଦରର ଜହ୍ନି ବେହେରା। ଝାଡ଼ାବାନ୍ତି ହେବାରୁ ଗତକାଲି ପୁରୀରୁ ଭୁବନେଶ୍ୱରକୁ ତାଙ୍କୁ ସ୍ଥାନାନ୍ତର କରାଯାଇଥିଲା। ଚିକିତ୍ସିତ ହେଉଥିବା ବେଳେ ତାଙ୍କର ମୃତ୍ୟୁ ହୋଇଛି। ଏହାକୁ ମିଶାଇ କଣାସ ଅଞ୍ଚଳରେ ଝାଡ଼ାବାନ୍ତିରେ ୬ ଜଣଙ୍କ ମୃତ୍ୟୁ ହୋଇଥିବାର ଅଭିଯୋଗ ହୋଇଛି।
ସେପଟେ ଜାଗୁଳାଇ ପଦରରୁ ଆହୁରି ୫ ଆକ୍ରାନ୍ତ ଚିହ୍ନଟ ହୋଇଛନ୍ତି। ସେମାନଙ୍କୁ କଣାସ ହସ୍ପିଟାଲରେ ଭର୍ତ୍ତି କରାଯାଇଛି। ଏମାନେ ସମସ୍ତେ ଦୟା ନଦୀର ପାଣି ବ୍ୟବହାର କରୁଥିଲେ ବୋଲି ଜଣାପଡ଼ିଛି। ପ୍ରାୟ ୨୦ ଦିନ ହେଲାଣି ଏହି ଅଞ୍ଚଳରେ ବ୍ୟାପିଛି ଝାଡ଼ାବାନ୍ତି। କୁହାଯାଉଛି ବିଭିନ୍ନ ଗାଁର ଦୁଇ ଶହର ଅଧିକ ଲୋକ ଆକ୍ରାନ୍ତ ହୋଇଥିଲେ। ପ୍ରଶାସନ ପକ୍ଷରୁ ସ୍ଵୀକାର କରାଯାଇଥିଲା, କୋଲି ବ୍ୟାକଟେରିଆ ନମୁନାରୁ ମିଳିଥିଲା। ୨୦ ଦିନରୁ ଅଧିକ ହେଲାଣି ଏହି ଅଞ୍ଚଳରେ ଝାଡ଼ାବାନ୍ତି ବ୍ୟାପିଛି। ବିଶେଷ କରି ଦୟା ଓ ଅନ୍ୟାନ୍ୟ ନଦୀର ପାଣି ବ୍ୟବହାର କରୁଥିବା ଗାଁର ଲୋକେ ଆକ୍ରାନ୍ତ ହୋଇଛନ୍ତି। ଏହି ସବୁ ନଦୀର ପାଣି ବହୁତ ପ୍ରଦୂଷିତ ହୋଇଥିବାରୁ ଝାଡ଼ାବନ୍ତି ବ୍ୟାପୁଛି । ପୁଣି ନୂଆ ରୋଗୀ ଚିହ୍ନଟ ହେବା ଦ୍ଵାରା ପ୍ରଶାସନର ମୁଣ୍ଡବ୍ୟଥା ବଢ଼ି ଯାଇଛି। ରାଜ୍ୟ ସରକାର ପୁରାପୁରି ଭାବେ କଣାସ ଅଞ୍ଚଳରେ ଝାଡ଼ାବାନ୍ତିକୁ ରୋକି ପାରି ନାହାନ୍ତି। ଏହାକୁ ନେଇ ସ୍ଥାନୀୟ ଅଞ୍ଚଳର ଲୋକଙ୍କ ମଧ୍ୟରେ ଅସନ୍ତୋଷ ତେଜିଲାଣି।
ମହାନଦୀ ଶୁଖାଇବାକୁ ଛତିଶଗଡ଼ ସରକାରଙ୍କ ବଡ଼ ପ୍ଲାନ, ସମସ୍ତ ଗେଟ ବନ୍ଦ କରିଦେଲା ଛତିଶଗଡ଼ ସରକାର
ଭୁବନେଶ୍ୱର: ଓଡ଼ିଶାର ଜୀବନ ରେଖା ମହାନଦୀକୁ ଶୁଖାଇବାକୁ ଛତିଶଗଡ଼ ସରକାରଙ୍କ ବଡ଼ ପ୍ଲାନ୍ । ମହାନଦୀ ଜଳ ବିବାଦ ଟ୍ରିବୁନଲରେ ଆଲୋଚନା ପରେ ବି ସମସ୍ତ ଗେଟ ବନ୍ଦ କରିଦେଲା ଛତିଶଗଡ଼ ସରକାର । ପୂର୍ବରୁ ଶିବରୀ ନାରାୟଣ ଵ୍ୟାରେଜ ସହ ଉପର ମୁଣ୍ଡର ଅନେକ ବ୍ୟାରେଜ ବନ୍ଦ କରିଦେଇଥିବା ବେଳେ କିଛିଦିନ ହେଲା କଲମା ବ୍ୟାରେଜର ସମସ୍ତ ୬୬ ଗେଟ ବନ୍ଦ କରିଦେଲା ଛତିଶଗଡ଼ ସରକାର। ଏହାସହ ବେଆଇନ ଭାବେ ୨୦ଟି ଜଳଯୋଗାଣ ପ୍ରକଳ୍ପ ନିର୍ମାଣ କରୁଛି ଛତିଶଗଡ। କେତେକ ପ୍ରକଳ୍ପ ଶେଷ ହୋଇଥିବା ବେଳେ ଆଉ କେତେକ ପ୍ରକଳ୍ପ ଦ୍ରୁତ ଗତିରେ ଆଗେଇ ଚାଲିଛି। କେନ୍ଦ୍ର ସରକାରଙ୍କ ଜଳ ଜୀବନ ମିଶନ ଆଧାରରେ ୭୦୨ କୋଟି ଟଙ୍କା ବ୍ୟୟ ଅଟକଳରେ ଏହି କାମ କରାଯାଉଥିବା ବେଳେ ଚୁପ ବସିଛନ୍ତି ରାଜ୍ୟ ସରକାର । ଯାହାଫଳରେ ହୀରାକୁଦ ଜଳଭଣ୍ଡାରକୁ ମାତ୍ର ୩୭୮ ଘନଫୁଟ ଜଳ ପ୍ରବେଶ କରୁଥିବା ସୂଚନା ମିଳିଛି । କଲମା ବ୍ୟାରେଜ ବନ୍ଦ ଯୋଗୁଁ ରାଜ୍ୟରେ ଜଳର ଉତ୍କଟ ସମସ୍ୟା ଦେଖାଗଲାଣି । ଖରାଦିନ ପୂର୍ବରୁ ମହାନଦୀର ଏପରି ସ୍ଥିତି ଆଗାମୀ ଦିନର ଚିତ୍ରକୁ ସ୍ପଷ୍ଟ କରିଦେଇଛି । ଏହି ଅବସ୍ଥା ଲାଗିରହିଲେ ଆଗାମୀ ଖରାଦିନରେ ଉତ୍କଟ ଜଳ ସମସ୍ୟା ଦେଖାଦେବ ବୋଲି ଚର୍ଚ୍ଚା ହେଉଛି ।
ସେପଟେ ଛତିଶଗଡ଼ର ଏଭଳି ଦାଦାଗିରିରେ ରାଜ୍ୟ ସରକାର କାହିଁକି ଚୁପ ବୋଲି ରାଜ୍ୟବାସୀ ପ୍ରଶ୍ନ ଉଠାଇଛନ୍ତି ।
ସରକାରଙ୍କ ବଦଳି ନିର୍ଦ୍ଦେଶକୁ ମାନୁ ନାହାନ୍ତି ଅଫିସର; OASମାନଙ୍କୁ ତୁରନ୍ତ ରିଲିଭ କରିବାକୁ ସରକାରଙ୍କ ନିର୍ଦ୍ଦେଶ
ଭୁବନେଶ୍ୱର: ସରକାରଙ୍କ ବଦଳି ନିର୍ଦ୍ଦେଶକୁ ମାନୁ ନାହାନ୍ତି ଅଫିସର। ବଦଳି ପରେ ବି କାର୍ଯ୍ୟରେ ଯୋଗ ନ ଦେଇ ପୂର୍ବ ସ୍ଥାନରେ ରହୁଛନ୍ତି। ୨୦୨୪ ଜୁଲାଇ ୨ ତାରିଖରୁ ଚଳିତ ମାସ ୨୪ ତାରିଖ ମଧ୍ୟରେ ମୋଟ ୩୭ଟି ବଦଳି ନିର୍ଦ୍ଦେଶ ସମ୍ପୂର୍ଣ୍ଣ କାର୍ଯ୍ୟକାରୀ ହୋଇପାରିନି। ବଦଳି ହୋଇଥିବା ଅଫିସରଙ୍କୁ ଚଳିତ ମାସ ୩୧ ତାରିଖ ସୁଦ୍ଧା ରିଲିଭ୍ ନ କଲେ ତାକୁ ସରକାରଙ୍କ ନିର୍ଦ୍ଦେଶର ଅବମାନନା ଭାବେ ବିବେଚନା କରାଯାଇ ସମ୍ପୃକ୍ତ କର୍ତ୍ତୃପକ୍ଷଙ୍କ ବିରୋଧରେ ଆବଶ୍ୟକ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଚେତାବନୀ ଦିଆଯାଇଛି। ଏନେଇ ସାଧାରଣ ପ୍ରଶାସନ ବିଭାଗର ଅତିରିକ୍ତ ମୁଖ୍ୟ ସଚିବ ସୁରେନ୍ଦ୍ର କୁମାର ସମସ୍ତ ବିଭାଗୀୟ ସଚିବ, ବିଭାଗୀୟ ମୁଖ୍ୟ ଓ ଜିଲ୍ଲାପାଳମାନଙ୍କୁ ଚିଠି ଲେଖିଛନ୍ତି। ବଦଳି ନିର୍ଦ୍ଦେଶ ଆଧାରରେ ଓଏଏସ୍ ଅଫିସରମାନଙ୍କୁ ରିଲିଭ୍ କରିବାକୁ ନିର୍ଦ୍ଦେଶ ଦେଇଛନ୍ତି ।
ସେ ତାଙ୍କ ଚିଠିରେ ଦର୍ଶାଇଛନ୍ତି ଯେ, ବାରମ୍ବାର ତାଗିଦ୍ ସତ୍ତ୍ୱେ ବରିଷ୍ଠ ଓଏଏସ୍ ଅଫିସରମାନଙ୍କ ବଦଳିକୁ ସେମାନଙ୍କର ଉପରିସ୍ଥ କର୍ତ୍ତୃପକ୍ଷମାନେ କାର୍ଯ୍ୟକାରୀ କରୁନଥିବା ଦେଖିବାକୁ ମିଳିଛି । ବଦଳି ହୋଇଥିବା ଅଧିକାଂଶ ଅଫିସର ନିଜର ବର୍ତ୍ତମାନ ସ୍ଥାନରୁ ରିଲିଭ୍ ହୋଇନଥିବା ଅବା ନୂଆ ଦାୟିତ୍ୱ ଗ୍ରହଣ କରିନଥିବା ଦେଖିବାକୁ ମିଳିଛି । ଏହି ବଦଳି ନିର୍ଦ୍ଦେଶକୁ କାର୍ଯ୍ୟକାରୀ କରାନଯିବା ଦ୍ୱାରା ସରକାରଙ୍କ ବିଭିନ୍ନ କଲ୍ୟାଣମୂଳକ ଯୋଜନାର କାର୍ଯ୍ୟକାରିତା ଓ ନିର୍ଦ୍ଧାରିତ ସମୟସୀମା ମଧ୍ୟରେ ଲୋକଙ୍କୁ ସେବା ପ୍ରଦାନ କ୍ଷେତ୍ରରେ ଗୁରୁତର ପ୍ରାଶାସନିକ ସମସ୍ୟା ସୃଷ୍ଟି ହୋଇଛି । ବଦଳି ନିର୍ଦ୍ଦେଶ ସତ୍ତ୍ୱେ ଅଫିସରମାନେ ଦୀର୍ଘଦିନ ଧରି ରିଲିଭ୍ ହେଉନଥିବାରୁ ବଦଳିର ପ୍ରକୃତ ଉଦ୍ଦେଶ୍ୟ ପୂରଣ ହୋଇପାରୁନି । ଏହା ଖୋଲାଖୋଲି ସରକାରୀ ନିର୍ଦ୍ଦେଶର ଅବମାନନା, ଯାହାକି ସମ୍ପୃକ୍ତ କର୍ତ୍ତୃପକ୍ଷଙ୍କ ବିରୋଧରେ ଉପଯୁକ୍ତ କାର୍ଯ୍ୟାନୁଷ୍ଠାନ ଆବଶ୍ୟକ କରୁଛି ବୋଲି ଚିଠିରେ ଉଲ୍ଲେଖ କରାଯାଇଛି।
୨୦୨୪ ଜୁଲାଇ ମାସର ୮ଟି ବଦଳି ନିର୍ଦ୍ଦେଶ, ଅଗଷ୍ଟ ମାସର ୬ଟି ବଦଳି ନିର୍ଦ୍ଦେଶ, ସେପ୍ଟେମ୍ବର ମାସର ୩ଟି, ଅକ୍ଟୋବର ମାସର ୨ଟି, ନଭେମ୍ବର ମାସର ୫ଟି, ଡିସେମ୍ବର ମାସର ୪ଟି ଓ ଚଳିତ ଜାନୁୟାରୀ ମାସର ୪ଟି ବଦଳି ନିର୍ଦ୍ଦେଶକୁ ତୁରନ୍ତ କାର୍ଯ୍ୟକାରୀ କରିବାକୁ ତାଗିଦ୍ କରାଯାଇଛି।