spot_img
Home Blog Page 1166

ନିଷ୍କ୍ରିୟ ଫୋନ ନମ୍ବରରେ କାମ କରିବନି ଫୋନ୍ ପେ କି ଗୁଗୁଲ ପେ

ଭୁବନେଶ୍ବର : ନିଷ୍କ୍ରିୟ ଫୋନ ନମ୍ବରରେ କାମ କରିବନି ଫୋନ୍ ପେ କିମ୍ବା ଗୁଗୁଲ ପେ । ଗାଡ଼ିରେ ଥିବା ଫାସ୍ଟାଗ୍ରେ ଜମା ନଥିଲେ ଟୋଲଗେଟ୍ରେ ଡବଲ ତଣ୍ଡ ଗଣିବେ । ନୂଆ ଟିକସ ବ୍ୟବସ୍ଥାରେ ଅଗ୍ରୀମ ଟିକସ କାଟିହେବ । ଏହିପରି ଏପ୍ରିଲ ପହିଲାରୁ ୭ଟି ନିୟମରେ ହେଉଛି ପରିବର୍ତ୍ତନ । ଯାହାକୁ ଜାଣିବା ନିହାତି ଦରକାର । ୨୦୨୫ ଫେବୃଆରୀ ପହିଲାରେ କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ପ୍ରତ୍ୟକ୍ଷ କରଦାତାଙ୍କ ପାଇଁ ଘୋଷଣା କଲେ ୧୨ ଲକ୍ଷ ଟଙ୍କା ପର୍ଯ୍ୟନ୍ତ ଆୟ ଉପରେ ଟିକସ ଦେବାକୁ ପଡ଼ିବନି । ଏହି ସୁବିଧା ପାଇବା ପାଇଁ ଆୟକରଦାତାଙ୍କୁ ନୂଆ ଟିକସ ବ୍ୟବସ୍ଥାରେ ରିଟର୍ଣ୍ଣ ଫାଇଲ କରିବାକୁ ପଡ଼ିବ । ଏପ୍ରିଲ ପହିଲାରୁ ୨୦୨୫-୨୬ ଆର୍ଥିକ ବର୍ଷ ପାଇଁ ଅଗ୍ରୀମ ଟିଡିଏସ୍ କାଟିପାରିବେ । ଯାହାକୁ ଆସନ୍ତାବର୍ଷ ରିଟର୍ଣ୍ଣ ଫାଇଲ କରିବାବେଳେ ଫେରସ୍ତ ପାଇଁ ଦାବି କରିହେବ । ଫାସ୍ଟାଗ୍ରେ ଜମା ନଥିଲେ ଟୋଲଗେଟ୍ ଆସିବା ପୂର୍ବରୁ ଲୋକେ ରିଚାର୍ଜ କରିଦେଉଥଲେ । ଏଣିକି ଏ ସୁବିଧା ଆଉ ଉପଲବ୍ଧ ହେବ ନାହିଁ । ଟୋଲଗେଟ୍ ଦେଇ ଗାଡ଼ି ଯିବାର ଘଣ୍ଟାକ ପୂର୍ବରୁ ରିଚାର୍ଜ କଲେ ଫି ସହିତ କଟିବ ପେନାଲଟି । ଗାଡ଼ି ଟୋଲଗେଟ୍ ପାର୍ ହେବାର ୧୫ ମିନିଟ ପର୍ଯ୍ୟନ୍ତ ରିଚାର୍ଜ ଫାସଟ୍ୟାଗ୍ କାମ କରିବନି । ଯଦି ଗାଡ଼ିଚାଳିକ ୧୫ ମିନିଟ ଭିତରେ ପୁଣି ଥରେ ରିଚାର୍ଜ କରନ୍ତି ତାହେଲେ କଟିଥିବା ପେନାଲଟି ଫାସଟାଗ୍ ଆକାଉଣ୍ଟକୁ ଫେରିଆସିବ ।

୨୦୨୪ ଅଗଷ୍ଟରୁ କେନ୍ଦ୍ର ସରକାରୀ କର୍ମଚାରୀଙ୍କ ପାଇଁ କେନ୍ଦ୍ର ସରକାର ଲାଗୁ କରିଛନ୍ତି ୟୁନିଫର୍ମ ପେନ୍ସନ୍ ସ୍କିମ୍ । ଏହି ବ୍ୟବସ୍ଥାଟି ଏପ୍ରିଲ ପହିଲାରୁ ଲାଗୁ ହେବାକୁ ଯାଉଛି । ଏହି ବ୍ୟବସ୍ଥାରେ କର୍ମଚାରୀ ଅନ୍ୟୁନ ୨୫ ବର୍ଷ ଚାକିରି କରିଥିବେ । ସେ ଅବସର ନେବାର ୧୨ମାସ ପୂର୍ବରୁ ପାଇଥିବା ମୂଳ ଦରମାର ୫୦ ପ୍ରତିଶତ ପେନ୍ସନ୍ ଆକାରରେ ପାଇବେ । ଏଥିରେ ପ୍ରାୟ ୨୩ ଲକ୍ଷ କେନ୍ଦ୍ର ସରକାରୀ କର୍ମଚାରୀ ଏହାର ଲାଭ ପାଇବେ । ସେହିପରି ଜିଏସ୍ଟି ବ୍ୟବସ୍ଥାରେ ବି ପରିବର୍ତ୍ତନ ଦେଖିବାକୁ ମିଳିବ । ଏଣିକି କ୍ରୟ-ବିକ୍ରୟ ଓ ପରିବହନ ପାଇଁ ମିଳୁଥିବା ଇ-ଓ୍ବେ ବିଲ୍ ୧୮୦ଦିନ ପର୍ଯ୍ୟନ୍ତ ବୈଧ ରହିବ । ଏହାସହିତ ଜିଏସ୍ଟି ପୋର୍ଟାଲରେ ମଲ୍ଟି ଫ୍ୟାକଟ୍ର ଅଥେଣ୍ଟିକେସନ୍ ବ୍ୟବସ୍ଥା ଉପଲବ୍ଧ ହେବ । ଏହାସହିତ କେତେକ ଭାରତୀୟ ଷ୍ଟେଟ୍ ବ୍ୟାଙ୍କ ସମେତ କେତେକ ଘରୋଇ ବ୍ୟାଙ୍କ ସେମାନଙ୍କ କ୍ରେଡିଟ କାର୍ଡରେ ରିଓ୍ବାର୍ଡ ପଏଣ୍ଟ୍ରେ ପରିବର୍ତ୍ତନ କରିଛନ୍ତି । ଏପ୍ରିଲ ପହିଲାରୁ କେତେକ ରାଷ୍ଟ୍ରାୟତ୍ତ ବ୍ୟାଙ୍କ ସେମାନଙ୍କ ସଞ୍ଜୟ ଖାତାରେ ଅନ୍ୟୁନ ନିର୍ଦ୍ଦିଷ୍ଟ ପରିମାଣର ଅର୍ଥ ଜମା ରଖିବା ପାଇଁ ନିୟମ ପରିବର୍ତ୍ତନ କରିଛନ୍ତି ।

ଓଡ଼ିଶାରେ କେତେ ଥର ହୋଇଛି ଟ୍ରେନ ଦୁର୍ଘଟଣା, ଆଉ କେଉଁଠି ହୋଇଛି ଜାଣନ୍ତୁ

ଭୁବନେଶ୍ବର : ଓଡ଼ିଶାରେ ଅନେକ ସମୟରେ ଟ୍ରେନ ଦୁର୍ଘଟଣା ହୋଇଛି । ତେବେ ଆସନ୍ତୁ ଜାଣିବା କେଉଁଠି ଆଉ କେତେବେଳେ ଟ୍ରେନ୍ ଦୁର୍ଘଟଣା ହୋଇଥିଲା  ।

୧ ଜୁନ୧୯୯୫- ହୀରାକୁଦ ଏକ୍ସପ୍ରେସ ଦୁର୍ଘଟଣାରେ ୧୫ ମୃତ ହୋଇଥିଲା । ୧୫ ଅଗଷ୍ଟ ୧୯୯୭- ବିଶାଖାପାଟଣା-ବ୍ରହ୍ମପୁର ମଧ୍ୟରେ କରମଣ୍ଡଳ ଦୁର୍ଘଟଣାରେ ୭୫ ମୃତ ହୋଇଥିଲା । ୧୩ ଫେବ୍ରୁଆରୀ ୨୦୦୯- ଯାଜପୁରରେ ହାଓ୍ବଡା- ଚେନ୍ନାଇ କରମଣ୍ଡଳ ଏକ୍ସପ୍ରେସ ଦୁର୍ଘଟଣାଗ୍ରସ୍ତ, ୧୬ ମୃତ, ୧୬୦ ଆହତ ହୋଇଥିଲେ । ୨୯ ସେପ୍ଟେମ୍ବର ୨୦୧୬- କଟକରେ ଟ୍ରେନ ଦୁର୍ଘଟଣାରେ ଜଣଙ୍କର ମୃତ୍ୟୁ ହୋଇଥିବା ବେଳେ  ମୃତ ୨୭ ଜାନୁଆରୀ ୨୦୨୨- କଟକ ରେଳ ଷ୍ଟେସନ ୟାର୍ଡରେ ମାଲବାହୀ ଟ୍ରେନ ଲାଇନଚ୍ୟୁତ ହୋଇଥିଲା । ସେହିପରି ୯ ଫେବୃଆରୀ ୨୦୨୨- ଖୋର୍ଦ୍ଧା ଆଙ୍କୁଲାରେ ମଧ୍ୟ ମାଲବାହୀ ଟ୍ରେନ ଲାଇନଚ୍ୟୁତ ।

୨୩ ଏପ୍ରିଲ ୨୦୨୨- ରାୟଗଡ଼ା ପିତାମହଲରେ ଧାନବାଦ-ଆଲେପି ଏକ୍ସପ୍ରେସ ଧକ୍କାରେ ୨୭ ମଇଁଷି ମୃତ ହୋଇଥିବା ବେଳେ ୨୧ ମେ ୨୦୨୨- ବାଲେଶ୍ବର ସୋରରେ ଚଳନ୍ତା ଟ୍ରେନରେ ନିଆଁ ଲାଗିଯାଇଥିଲା । ୩୦ ମେ ୨୦୨୨-ଖୋର୍ଦ୍ଧା କାଳୁପଡା ଘାଟରେ କୋଇଲା ବୋଝେଇ ଟ୍ରେନରେ ଅଗ୍ନିକାଣ୍ଡ ହୋଇଥିଲା । ୨୩ ଅଗଷ୍ଟ ୨୦୨୨-ଭୁବନେଶ୍ବର ଷ୍ଟେସନ ନିକଟରେ ମାଲବାହୀ ଟ୍ରେନ ଲାଇନଚ୍ୟୁତ ଓ ୧୨ ସେପ୍ଟେମ୍ବର ୨୦୨୨ ଜୟପୁରର ଛତ୍ରିପୁଟରେ ବିଶାଖାପାଟଣା-କିରଣ୍ଡୁଳ ଟ୍ରେନ ଲାଇନଚ୍ୟୁତ ହୋଇଥିଲା ।

୧୭ ସେପ୍ଟେମ୍ବର ୨୦୨୨- ଭଦ୍ରକରେ ହାଓ୍ବଡା-ଭୁବନେଶ୍ବର ଜନଶତାବ୍ଦୀ ଏକ୍ସପ୍ରେସ ଲାଇନଚ୍ୟୁତ

୧୩ ଅକ୍ଟୋବର ୨୦୨୨- ସମ୍ବଲପୁର ସରଲା ନିକଟରେ ମାଲବାହୀ ଟ୍ରେନ ଲାଇନଚ୍ୟୁତ

୧୮ ଅକ୍ଟୋବର ୨୦୨୨-ଝାରସୁଗୁଡ଼ା-ବ୍ରଜରାଜନଗର ଷ୍ଟେସନରେ ପାସେଞ୍ଜର ଟ୍ରେନରେ ଅଗ୍ନିକାଣ୍ଡ

୨୦ ଅକ୍ଟୋବର ୨୦୨୨- ସୋରରେ ଖଡ଼ଗପୁର ଭୁବନେଶ୍ବର ମେମୁ ଟ୍ରେନରେ ଅଗ୍ନିକାଣ୍ଡ ।

୨୧ ନଭେମ୍ବର ୨୦୨୨-ଯାଜପୁର କୋରାଇରେ ମାଲବାହୀ ଟ୍ରେନ ଦୁର୍ଘଟଣା: ୩ ମୃତ

୨୨ ନଭେମ୍ବର ୨୦୨୨- ପୁରୀ ମାଳତିପାଟପୁରରେ ପୁରୀ-ହାଓ୍ୱଡା ଟ୍ରେନ ଲାଇନଚ୍ୟୁତ

୨ ଜୁନ ୨୦୨୩- ବାଲେଶ୍ବର ବାହାନଗାରେ ଦୁର୍ଘଟଣା: ୨୮୦ ମୃତ

୩୦ ମାର୍ଚ୍ଚ ୨୦୨୫- କଟକ ନିର୍ଗୁଣ୍ଡିରେ ବେଙ୍ଗାଳୁରୁ-କାମାକ୍ଷା ଏକ୍ସପ୍ରେସର ୧୧ ବଗି ଲାଇନଚ୍ୟୁତ ହୋଇଛି ।

କାହିଁକି ଲାଇନଚ୍ୟୁତ ହେଲା କାମାକ୍ଷା ଏକ୍ସପ୍ରେସ?

କଟକ : କାହିଁକି ଲାଇନଚ୍ୟୁତ ହେଲା କାମାକ୍ଷା ଏକ୍ସପ୍ରେସ? କଟକ ମଙ୍ଗୁଳି ଷ୍ଟେସନରେ କାମାକ୍ଷା ଏକ୍ସପ୍ରେସର ୧୧ଟି ବଗି ଲାଇନଚ୍ୟୁତ ହେବାର କାରଣ କଣ? ସୁପରଫାଷ୍ଟ ଏକ୍ସପ୍ରେସ ଲାଇନଚ୍ୟୁତ ହେବାର କାରଣ ଖୋଜିବା ପାଇଁ  ରେଳ ବିଭାଗର ଏକ କମିଟି  ଗଠିତ ହୋଇଛି । କମିଟି ତଦନ୍ତ କରି ରିପୋର୍ଟ ଦେବ ।  ତଦନ୍ତ କମିଟି ଦେଇଥିବା ରିପୋର୍ଟକୁ ରେଳ ମନ୍ତ୍ରଣାଳୟ କେତେ ଗୁରୁତର ସହ ନେବ ତାହା ଭିନ୍ନକଥା । କିନ୍ତୁ, ରେଳ ବିଭାଗର ଅବହେଳା ଯୋଗୁ ଯେ ବାରମ୍ବାର ରେଳ ଦୂର୍ଘଟଣା ଘଟୁଛି- ଏହା ସ୍ପଷ୍ଟ । ଜୁନ ୨୦୨୩ରେ ବାଲେଶ୍ବର ବାହାନଗାରେ ଭୟଙ୍କର ଟ୍ରେନ ଦୁର୍ଘଟଣା ମନରୁ ନଲିଭିଣୁ, ଆଜିର ଏ ଟ୍ରେନ ଦୁର୍ଘଟଣା ସମସ୍ତଙ୍କୁ ଆତଙ୍କିତ କରିଛି ।

ଆଜିର ଦୁର୍ଘଟଣାର ପାରିପାଶ୍ବିକ ସ୍ଥିତି ଅନୁଧ୍ୟାନ କଲେ ଏହା ସ୍ପଷ୍ଟ ଯେ- ରେଳଧାରଣାଗୁଡିକର ସଠିକ ରକ୍ଷଣାବେକ୍ଷଣ କରାଯାଉନାହିଁ । ବର୍ଷବର୍ଷ ଧରି ନୂଆ ରେଳଧାରଣା ପକାଯାଉନାହିଁ । ଏପରିକି ରେଳଧାରଣା ମଧ୍ୟରେ ଥିବା ପଥର ଗେଟି, ସିମେଣ୍ଟ ସ୍ଲାବର ମଧ୍ୟ ପରିବର୍ତ୍ତନ କରାଯାଉନାହିଁ । ନିୟମିତ ବ୍ୟବଧାନରେ ରେଳ ଧାରଣାର ଯାଞ୍ଚ ଓ ଖାମଖିଆଲି ମନୋଭାବ ଯୋଗୁ ରେଳଯାତ୍ରୀଙ୍କ ଜୀବନ ବିପଦରେ ପଡୁଛି । ଆଜି ମଧ୍ୟ ଦୁର୍ଘଟଣାର ଦୀର୍ଘ ସମୟ ପର୍ଯ୍ୟନ୍ତ ରେଳ ବିଭାଗ ମୃତାହତଙ୍କ ସଠିକ ସୂଚନା ଦେବାକୁ ଅସମର୍ଥ ହୋଇଥିଲା । ରେଳବାଇ ମୃତାହତଙ୍କ ସଂଖ୍ୟା ଲୁଚାଇବାକୁ ଚାହୁଁଥିଲା ନା, କାହା ଚାପରେ ସଂଖ୍ୟା କହୁନଥିଲା ତାକୁ ନେଇ ଉଠିଛି ପ୍ରଶ୍ନ । ବ୍ୟବସ୍ଥାଗତ ତୃଟି ଯୋଗୁ ଏଭଳି ଦୂର୍ଘଟଣାର ମୁଖ୍ୟ କାରଣ ବୋଲି ରେଳ ସୁରକ୍ଷା ବିଶେଷଜ୍ଞ କହିଛନ୍ତି ।

ନିର୍ଗୁଣ୍ଡିରେ ଲାଇନଚ୍ୟୁତ ବେଙ୍ଗାଳୁରୁ-କାମାକ୍ଷା ଏକ୍ସପ୍ରେସ, ୫ଟି ଟ୍ରେନର ଗତିପଥ ପରିବର୍ତ୍ତନ

ଭୁବନେଶ୍ବର ; ଦିନ ପ୍ରାୟ ୧୨ଟା । ସ୍ଥାନ କଟକ ନିର୍ଗୁଣ୍ଡି। ସବୁଦିନ ପରି ଚଳଚଞ୍ଚଳ ଥିଲା ରେଳପଥ। ହେଲେ ଅକସ୍ମାତ ଟ୍ରାକରୁ ଖସିଲା ବେଙ୍ଗାଳୁରୁ-କାମାକ୍ଷା ଏକ୍ସପ୍ରେସ। ୧୧ ଏସି ବଗି ହୋଇଗଲା ଲାଇନଚ୍ୟୁତ। ନିମିଷକେ ମଧ୍ଯରେ ବଦଳିଯାଇଥିଲା ଦୃଶ୍ୟ। ଗନ୍ତବ୍ୟସ୍ଥଳରେ ପହଞ୍ଚିବା ଲାଗି ଆନନ୍ଦରେ ଥିବା ଯାତ୍ରୀଙ୍କ ମଧ୍ୟରେ ଖେଳିଗଲା ଆତଙ୍କ। ଜୀବନ ବିକଳରେ ଟ୍ରେନରୁ ଓହ୍ଲାଇଥିଲେ ଯାତ୍ରୀ। ତୁରନ୍ତ ସ୍ଥାନୀୟ ଅଞ୍ଚଳ ହୋଇଯାଇଥିଲା ଲୋକାରଣ୍ୟ। ଖବର ପ୍ରସାରିତ ହେବା ମାତ୍ରେ ଘଟଣାସ୍ଥଳରେ ପହଞ୍ଚିଥିଲେ ଏନଡିଆରଏଫ ଓ ଅଗ୍ନିଶମ ବାହିନୀ। ଦେବଦୂତ ସାଜିଥିଲେ ଟିମ। ଆହତମାନଙ୍କୁ କଟକ ବଡ଼ ମେଡିକାଲରେ ଭର୍ତ୍ତି କରାଯାଇ ଆରମ୍ଭ ହୋଇଥିଲା ଚିକିତ୍ସା।

ମା’ ଚିତ୍ରା ରୟଙ୍କ ହୃଦରୋଗ ଚିକିତ୍ସା ପାଇଁ ବେଙ୍ଗାଳୁରୁ ଯାଇଥିଲେ ପଶ୍ଚିମବଙ୍ଗ ଅଲ୍ଲୀପୁରର ଶୁଭଙ୍କର ରୟ। ପ୍ରାଣରେ ଭରିଥିଲା ଆଶା। କିଛି ଘଣ୍ଟା ପରେ ପହଞ୍ଚିଥାନ୍ତେ ଘରେ। ହେଲେ ନିୟତିର ବିଧି ଥିଲା ଅଲଗା। କାମାକ୍ଷା ଏକ୍ସପ୍ରେସ ଦୁର୍ଘଟଣାରେ ଆରପାରିକୁ ଚାଲିଗଲେ ଶୁଭଙ୍କର। ସାରା ପରିବାରରେ ଘୋଟିଯାଇଛି ଦୁଃଖର କଳାବାଦଲ।ଦୁର୍ଘଟଣା ପରେ ବିପନ୍ନ ଯାତ୍ରୀଙ୍କୁ ସହାୟତା ଲାଗି ଯାଇଥିଲା ସ୍ବତନ୍ତ୍ର ଟ୍ରେନ। ସେଥିରେ ଯାତ୍ରୀମାନେ ନିଜ ଗନ୍ତବ୍ୟସ୍ଥଳକୁ ଯାଇଥିଲେ। ଜିଲ୍ଲା ପ୍ରଶାସନ ଓ ରେଳବାଇ ବରିଷ୍ଠ ଅଧିକାରୀମାନଙ୍କ ତତ୍ତ୍ବାବଧାନରେ ଚାଲିଥିଲା ଉଦ୍ଧାର କାର୍ଯ୍ୟ।

ଦୁର୍ଘଟଣା ପରେ ମୃତାହତଙ୍କୁ ଭେଟିଥିଲେ ବିଭିନ୍ନ ରାଜନୈତିକ ଦଳର ବିଧାୟକ। ସେପଟେ ଦୁର୍ଘଟଣାକୁ ନେଇ କୌଣସି ଟ୍ରେନ ବାତିଲ ହୋଇନଥିବାବେଳେ ୫ଟି ଟ୍ରେନର ଗତିପଥ ପରିବର୍ତ୍ତନ କରାଯାଇଛି। ସେଗୁଡିକ ହେଲା ଧଉଳି, ନୀଳାଚଳ, ପୁରୁଲିଆ, ଫଲକନାମା, ସିକନ୍ଦାରାବାଦ ସିଲଚର ଏକ୍ସପ୍ରେସ। ଦୁର୍ଘଟଣାକୁ ନେଇ ଜାରି ହୋଇଛି ହେଲ୍ପଲାଇନ ନମ୍ବର। ହେଲ୍ପଲାଇନ ଡେସ୍କ ନମ୍ବର-୮୧୧୪୩ ୮୨୩୭୧, ଏମର୍ଜେନ୍ସି କଣ୍ଟ୍ରୋଲ ରୁମ ନମ୍ବର ୮୪୫୫୮ ୮୫୯୯୯, କଟକ ହେଲ୍ପଲାଇନ ନମ୍ବର- ୭୨୦୫୧ ୪୯୫୯୧, ଭୁବନେଶ୍ଵର ହେଲ୍ପଲାଇନ ନମ୍ବର- ୮୧୧୪୩ ୮୨୩୭୧, ଖୋର୍ଦ୍ଧା ରୋଡ ହେଲ୍ପଲାଇନ ନମ୍ବର-୦୬୭୪୨ ୪୯୨୨୪୫।

ଜମୁଛି କଣ୍ଢେଇ ମେଳଣ ଉତ୍ସବ, ସାମିଲ ହୋଇଛନ୍ତି ୨୨ଟି ଗ୍ରାମର ଦୋଳ ବିମାନ

ଭୁବନେଶ୍ବର : କଳା ପ୍ରଦର୍ଶନ କରୁଛନ୍ତି କଣ୍ଢେଇ । ରାମ, ଲକ୍ଷ୍ମଣ, ସୀତା, ରାବଣ ଚରିତ୍ରରେ କଳା ଦେଖାଉଛନ୍ତି । ସୂତାରେ ନାଚୁଛନ୍ତି କଣ୍ଢେଇ ଚରିତ୍ର । ପ୍ରଚ୍ଛଦପଟରେ କଳାକାରଙ୍କ ଧ୍ବନିକୁ ଅନୁକରଣ କରି କାଠିରେ ନଚାଉଛନ୍ତି କଳାକାର । ଦଣ୍ଡନାଚ, ରେକର୍ଡ ଡ୍ଯାନ୍ସ, ସାପ ଖେଳ ସାଙ୍ଗକୁ ରାମାୟଣର ପ୍ରତି ଚରିତ୍ରକୁ ଅତି ନିଖୁଣ ଭାବେ ପ୍ରଦର୍ଶନ କରୁଛନ୍ତି କଣ୍ଢେଇ । ଭୁବନେଶ୍ବର ଉପକଣ୍ଠ ଭଗବାନପୁରରେ ପ୍ରତି କଣ୍ଢେଇ ମେଳଣ ଉତ୍ସବରେ ପ୍ରତିଦିନ ସଂଧ୍ଯାରେ ଜମୁଛି କଣ୍ଢେଇ ନାଚ । ଗଞ୍ଜାମ ଜିଲ୍ଲା ବଡ଼କୋଦଣ୍ଡା ଗ୍ରାମର ମାଆ ବ୍ୟାଘ୍ର ଦେବୀ କଣ୍ଢେଇ ଦଳ କଣ୍ଢେଇ ଅପେରା ପ୍ରଦର୍ଶିତ କରୁଛନ୍ତି । ଅପେରା ଦଳରେ ୬ ଜଣ କଳାକାର ନିଜ ଆଙ୍ଗୁଠି ଓ କାଠି ସାହାଯ୍ଯରେ କଳା ନୈପୁଣ୍ଯତାକୁ ପ୍ରଦର୍ଶିତ କରୁଛନ୍ତି ।

ଦିନଥିଲା ପିଲାମାନେ କଣ୍ଢେଇ ଧରି ଖେଳୁଥିଲେ । କିନ୍ତୁ ଏବେ ମୋବାଇଲ୍ ଓ ଇଣ୍ଟରନେଟରେ ସମୟ ବିତାଉଛନ୍ତି । ତେଣୁ ସଂସ୍କୃତିକୁ ବଞ୍ଚାଇ ରଖିବାକୁ ଭଗବାନପୁର ୬୪ ତମ ଛୋଟି ଭୁଆଶୁଣୀ କଣ୍ଢେଇ ମେଳଣ କମିଟି ପକ୍ଷରୁ ଏପରି ପ୍ରୟାସ କରାଯାଇଛି । ପ୍ରତିଦିନ କଣ୍ଢେଇ ଯାତ୍ରା ଦେଖିବାକୁ ଜମୁଛି ଭିଡ଼ । ୫ ଦିନ ଧରି ଅନୁଷ୍ଠିତ ହେବ ଉତ୍ସବ । ଦୁଇଦିନ ଯାତ୍ରା ପରେ ୩୧ ତାରିଖରେ କପିଳେଶ୍ବର ଦିବ୍ଯାଙ୍ଗ ଭଜନ ଗ୍ରୁପ ଦ୍ବାର ଭଜନ ପରିବେଷଣ ହେବ । ଶେଷ ଦିନ ସନ୍ଧ୍ଯା ରେ କଣ୍ଢେଇ ଦିଅଁ ମେଳଣ ଓ ପିଲାଙ୍କ ଦ୍ବାରା ହରିହରି ଭେଟ ଅନୁଷ୍ଠିତ ହେବ । ଏହାସହ ଗ୍ରାମବାସୀଙ୍କୁ ନେଇ ଥକା ମେଣ୍ଟା ଭୋଜିର ଆୟୋଜନ ହେବ ।

ପଥର ଖାଦାନରେ ବ୍ଲାଷ୍ଟ ଯୋଗୁଁ ଘର ଫାଟି ଯାଉଥିବା ଅଭିଯୋଗ

ରାଉରକେଲା : କାନ୍ଥ ଫାଟି ଦୁଇଫାଳ । ଘରୁ ମାଟି ଝଡ଼ି ଦେଖାଗଲାଣି ଇଟା । କୌଣସି ସମୟରେ ଭଶୁଡ଼ି ଯାଇପାରେ ଘର । ଏହା କୌଣସି ଭୂମିକମ୍ପର ଦୃଶ୍ଯ ନୁହେଁ । ସୁନ୍ଦରଗଡ଼ ଲାଠିକଟା ବ୍ଲକ ଗୋଟିଧର ଗ୍ରାମର ଦୃଶ୍ୟ । ଗାଁ ନିକଟରେ ଥିବା ପଥର ଖାଦାନରେ ନିୟମିତ ବ୍ଲାଷ୍ଟିଂ ଯୋଗୁଁ ଗାଁରେ ଏପରି ସ୍ଥିତି ସୃଷ୍ଟି ହୋଇଛି । ପ୍ରଚଣ୍ଡ ଶବ୍ଦରେ ଲୋକେ ଶୋଇ ପାରୁ ନଥିବା ଅଭିଯୋଗ କରିଛନ୍ତି । କୌଣସି ସମୟରେ ଘର ଧସିଯିବାର ଭୟ ରହିଥିବା ଅଭିଯୋଗ କରିଛନ୍ତି ବଲଣ୍ଡା ପଞ୍ଚାୟତ ଓ ଝାଡ଼ତରଙ୍ଗ ଗ୍ରାମପଞ୍ଚାୟତର ୧୦ ରୁ ଅଧିକ ଗ୍ରାମବାସୀ । ଏପରିକି ଖାଦାନ ନିକଟରେ ପିତାମହଲ ଡ଼୍ୟାମ ମଧ୍ଯ ବ୍ଲାଷ୍ଟିଂ ଯୋଗୁ ଫାଟି ଯିବା ସହ ତଳକୁ ଦବି ଯାଉଥିବା କହିଛନ୍ତି ଲୋକେ ।

ବ୍ଲାଷ୍ଟିଂ ହେଲେ ଗ୍ରାମବାସୀ ଭୟରେ ଘରୁ ବାହାରି ଆସୁଛନ୍ତି । ଏନେଇ ଗ୍ରାମବାସୀ ରାଜସ୍ଵ ଵିଭାଗ, ପ୍ରଦୂଷଣ ଵିଭାଗ ଓ ପ୍ରଶାସନ ନିକଟରେ ଅଭିଯୋଗ କରିଥିଲେ ମଧ୍ୟ କୌଣସି ପଦକ୍ଷେପ ନିଆଯାଉ ନଥିବା ଅଭିଯୋଗ କରିଛନ୍ତି । ଘର ସବୁ ଭାଙ୍ଗି ଯାଉଥିବାରୁ କିପରି ମରାମତି କରିବେ ସେନେଇ ଚିନ୍ତାରେ ଲୋକେ । ଗ୍ରାମବାସୀଙ୍କ ଅଭିଯୋଗ ସମ୍ପର୍କରେ ଅନୁଧ୍ୟାନ କରି କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଖଣି ବିଭାଗ ସୂଚନା ଦେଇଥିଲେ ସୁଦ୍ଧା ତୁରନ୍ତ ପଦକ୍ଷେପ ନନେଲେ ଆନ୍ଦୋଳନକୁ ଓହ୍ଲାଇବାକୁ ଲୋକେ ଚେତାବନୀ ଦେଇଛନ୍ତି ।

କୋରାପୁଟ ମିନାକ୍ଷୀ ହାଇଡ୍ରା ପ୍ରକଳ୍ପର ମନମୁଖି କାର୍ଯ୍ୟକୁ ବିରୋଧ

ଜୟପୁର : ମିନାକ୍ଷୀ ହାଇଡ୍ରୋ ବିଦ୍ୟୁତ ପ୍ରକଳ୍ପ । ଗୋଟିଏ ଚୁକ୍ତିରେ ଚାଲିଛି ୩ ତିନିଟି ପ୍ରକଳ୍ପ । ନା ହୋଇଛି ପଲ୍ଲୀସଭା ନା ଅଛି ପରିବେଶ ମଞ୍ଜୁରୀ । ନଷ୍ଟ ହେଉଛି ସଂରକ୍ଷିତ ଜଙ୍ଗଲ । ମନମୁଖି କାମ ଚଳାଇଛି ତେଲେଙ୍ଗାନା କମ୍ପାନୀ । ପ୍ରତିବାଦରେ ଏକାଠି ହେଲେ ୧୯ ଖଣ୍ଡ ଗାଁର ଲୋକେ । ହାଇଦ୍ରାବାଦର ଏହି କଂପାନୀ ପ୍ରକଳ୍ପ କାର୍ଯ୍ୟ ଆରମ୍ଭ କରି ୨୫ ମେଗାୱାଟ ବିଦ୍ୟୁତ ଉତ୍ପାଦନ କରୁଛି । ହେଲେ ଏହାରି ଭିତରେ ଦ୍ବିତୀୟ ପ୍ରକଳ୍ପ ସାରି ତୃତୀୟ ପ୍ରକଳ୍ପ ନିର୍ମାଣ କରୁଛି । ପ୍ରକଳ୍ପ ନିର୍ମାଣ ପୂର୍ବରୁ କୌଣସି ଗ୍ରାମସଭା କିମ୍ବା ପଲ୍ଲିସଭା କରାଯାଇ ନଥିବାବେଳେ ଜଙ୍ଗଲ ଓ ପରିବେଶ ସମ୍ବନ୍ଧୀୟ କୌଣସି କାଗଜପତ୍ର ନଥିବା ଅଭିଯୋଗ ହୋଇଛି । ଏହାସହ ବିନା ସୁରକ୍ଷାରେ ନଦୀର ୩୫ ଫୁଟ ଉଚ୍ଚରେ କାମ କରୁଛନ୍ତି ଶ୍ରମିକ । ଏହି ଅଞ୍ଚଳ ଧଣ୍ଡରାଖୋଲ ସଂରକ୍ଷିତ ଜଙ୍ଗଲ ହୋଇଥିବାରୁ କିପରି ପ୍ରକଳ୍ପ ନିର୍ମାଣ ହେଉଛି ତାକୁ ନେଇ ପ୍ରଶ୍ନ ଉଠାଇଛନ୍ତି ଲୋକେ । ଏହାଦ୍ବାର ଲୋକଙ୍କ ଜୀବନ ଜୀବିକା ପ୍ରଭାବିତ ହେଉଥିବା ଅଭିଯୋଗ ହୋଇଛି ।

କୋରାପୁଟ ଜିଲ୍ଲା ବୈପାରୀଗୁଡା ଧଣ୍ଡରାପୋଲ ରିଜର୍ଭ ଫରେଷ୍ଟରେ ଚାଲିଛି ପ୍ରକଳ୍ପ ନିର୍ମାଣ କାର୍ଯ୍ଯ । କଂପାନୀ ମୂଳ ପ୍ରକଳ୍ପର ସରକାରୀ ମଞ୍ଜୁରିରେ ଚଞ୍ଚକତା କରି ତୃତୀୟ ପ୍ରକଳ୍ପ ଜାରି ରଖିଥିବା ଅଭିଯୋଗ ହୋଇଛି । ଯାହାଦ୍ବାରା ବାଦୁଡିପାର, ଅଟାଲଗୁଡା ଓ ମାଳିପଦର ଗାଁ ଜଳମଗ୍ନ ହେବା ଆଶଙ୍କା କରିଛନ୍ତି ଗ୍ରାମବାସୀ । ଏହାଦ୍ବାରା ଅନ୍କ ମୂଲ୍ଯବାନ ଗଛ କଟାଯାଉଥିଲେ ବି ପୂନଃ ବୃକ୍ଷ ରୋପଣ କରାଯାଉ ନାହିଁ । ସ୍ଥାନୀୟ ଯୁବକ ଯୁବତୀଙ୍କୁ ନିଯୁକ୍ତି ନ ଦେଇ ବାହାର ଅଞ୍ଚଳର ଲୋକଙ୍କୁ ନେଇ କାମ୍ କରୁଛି କମ୍ପାନୀ । ଏନେଇ ପ୍ରକଳ୍ପ କର୍ତ୍ତୃପକ୍ଷ କୌଣସି ପ୍ରତିକ୍ରିୟା ଦେଇ ନଥିବାବେଳେ ଗ୍ରାଉଣ୍ଡ ଜିରୋ କୁ ଯାଇ ତଦନ୍ତ କରି ପଦକ୍ଷେପ ନେବେ ବୋଲି କହିଛନ୍ତି ଜୟପୁର ଉପ ଜିଲ୍ଲାପାଳ । ପ୍ରତିବାଦରେ ୧୯ ଖଣ୍ଡ ଗ୍ରାମ ବାସୀ ଏକାଠି ହୋଇ ବୈଠକ କରିଥିବାବେଳେ କାର୍ଯ୍ଯାନୁଷ୍ଠାନ ନନେଲେ ରାଜରାସ୍ତାକୁ ଓହ୍ଲାଇବେ ବୋଲି ଚେତାବନୀ ଦେଇଛନ୍ତି ।

ଖୁବଶୀଘ୍ର ଆରମ୍ଭ ହେବ ଶ୍ରୀମନ୍ଦିରର ନୂଆ ୟୁଟୁବ୍ ଚ୍ୟାନେଲ

ପୁରୀ : ଶ୍ରୀମନ୍ଦିର ଫଟୋ ଭାଇରାଲ କଲେ ରକ୍ଷାନାହିଁ । ଆରମ୍ଭ ହେବ ଶ୍ରୀମନ୍ଦିର ନୂଆ ୟୁଟ୍ୟୁବ୍ ଚ୍ଯାନେଲ । କୋଠଭୋଗରେ ଜୈବିକ ପଦ୍ଧତିରେ ବ୍ୟବହାର ହେବ ଅମୃତ ଅନ୍ନ । ଶ୍ରୀମନ୍ଦିର କାର୍ଯ୍ଯାଳୟରେ ଅନୁଷ୍ଠିତ ବୈଠକରେ ଗୁରୁତ୍ବପୂର୍ଣ୍ଣ ନିଷ୍ପତ୍ତି ।  ଶ୍ରୀମନ୍ଦିର ଉପରେ ଡ୍ରୋନ ଓ ଭିତରେ ମୋବାଇଲ ଫୋନ ନେଇ ଫୋଟୋ ଭାଇରାଲ କରୁଥିବା ବ୍ୟକ୍ତିଙ୍କ ବିରୁଦ୍ଧରେ ନିଆଯିବ କଠୋର କାର୍ଯ୍ୟାନୁଷ୍ଠାନ । ଜିଲ୍ଲାପାଳଙ୍କ ଅଧ୍ୟକ୍ଷତାରେ କମିଟି ଗଠନ ହୋଇଛି । ଏ ନେଇ ରାଜ୍ୟସରକାରଙ୍କୁ ପ୍ରସ୍ତାବ ଦିଆଯିବ । ପ୍ରସ୍ତାବ ପାରିତ ହେଲା ପରେ ଟ୍ରିପଲ ଆକ୍ଟ ଅନୁଯାଇ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ଶ୍ରୀମନ୍ଦିର କାର୍ଯ୍ୟାଳୟ ପରିସରରେ ଅନୁଷ୍ଠିତ ଗୁରୁତ୍ୱପୂର୍ଣ୍ଣ ବୈଠକ ପରେ ଏହି ସୂଚନା ଦେଇଛନ୍ତି ଶ୍ରୀମନ୍ଦିର ମୁଖ୍ୟ ପ୍ରଶାସକ । ବୈଠକରେ ଚଳିତ ବର୍ଷ ରଥଯାତ୍ରା ସୁରୁଖୁରେ ଅନୁଷ୍ଠିତ ହେବା ନେଇ କରାଯାଇଛି ଆଲୋଚନା । ରତ୍ନଭଣ୍ଡାର ବାହାର ଓ ଭିତର ରତ୍ନଭଣ୍ଡାର ମଝିରେ ୫ଟି ବିମ୍ ଲାଗିଥିଲା । ସେସବୁ କଳଙ୍କି ଲାଗିଥିବାରୁ କଢ଼ାଯାଇ ଷ୍ଟେନଲେସ୍ ଷ୍ଟିଲ୍ ବିମ୍ ଖଞ୍ଜା ଯାଇଛି । ଦୁର୍ବଳ ପଥର ବଦଳାଯାଉଛି । କେମିକାଲ ୱାସିଂ ଚାଲିଛି । ବାହାର ରତ୍ନଭଣ୍ଡାରକୁ ଡିପ୍ଲାଷ୍ଟରିଂ ସମୟରେ ପଥର ଖରାପ ବାହାରୁଛି । ପରେ ଚଟାଣ ମରାମତି ହେବ । ଅକ୍ଷୟ ତୃତୀୟା ବେଳକୁ ମରାମତି ଓ ସଂରକ୍ଷଣ ଶେଷ ହୋଇପାରେ।

ପଣା ସଂକ୍ରାନ୍ତି କିମ୍ବା ଅକ୍ଷୟ ତୃତୀୟା ଠାରୁ ଆରମ୍ଭ ହେବ ଶ୍ରୀମନ୍ଦିରର ନୂଆ ୟୁଟୁବ୍ ଚ୍ୟାନେଲ । ଗୁଣ୍ଡିଚା ମନ୍ଦିର ଆଗରେ କରାଯିବ ସୂଚନା କେନ୍ଦ୍ର । ଏଲଇଡି ଡିସପ୍ଲେ ମାଧ୍ୟମରେ ଗୁଣ୍ଡିଚା ମନ୍ଦିର ସମ୍ପର୍କିତ ତଥ୍ୟ ଜାଣିପାରିବେ ଶ୍ରଦ୍ଧାଳୁ । ଏହାସହ କୋଠଭୋଗରେ ଜୈବିକ ପଦ୍ଧତିରେ ବ୍ୟବହାର ହେବ ଅମୃତ ଅନ୍ନ । ୟୁନିଫର୍ମ ପଲିସି ପରିଚାଳନା କମିଟିରେ ପାସ୍ ହୋଇଛି । ରାଜ୍ୟ ସରକାରଙ୍କ ଅନୁମୋଦନ ହେବାପରେ ଲାଗୁ ହେବ । ୨୦୨୫-୨୬ ଆର୍ଥିକ ବର୍ଷ ପାଇଁ ବଜେଟ୍ ହୋଇଛି । ନାଟମଣ୍ଡପରେ ଶୀତତାପ ନିୟନ୍ତ୍ରିତ ବ୍ୟବସ୍ଥା ଉପରେ ବିସ୍ତୃତ ଆଲୋଚନା ହୋଇଛି । ଏକ୍ସପର୍ଟ ମାନେ ଡାଇଗ୍ରାମ ଦେଖାଇଛନ୍ତି ବୋଲି ସୂଚନା ଦେଇଛନ୍ତି ଶ୍ରୀମନ୍ଦିର ମୁଖ୍ୟ ପ୍ରଶାସକ ।

ଇଦ୍, ରାମନବମୀ ପାଇଁ କଡ଼ା ସୁରକ୍ଷା ବଳୟରେ ସାରା ରାଜ୍ୟ

ଭୁବନେଶ୍ବର : ଉତ୍ସାହର ସହ ପର୍ବ ପାଳନ କର, କିନ୍ତୁ ଆଇନକୁ ହାତକୁ ନିଅନି । ମହଙ୍ଗା ପଡିପାରେ ଧର୍ମକୁ ନେଇ ଆପତ୍ତିଜନକ ମନ୍ତବ୍ୟ । ରେଞ୍ଜ ଆଇଜି ଓ ଡ଼ିଆଇଜି ଙ୍କ ସହ ଡିଜିପିଙ୍କ ଗୁରୁତ୍ୱପୂର୍ଣ୍ଣ ବୈଠକ । ଶୋଭାଯାତ୍ରା ପାଇଁ ଅନୁମତି ପୂର୍ବରୁ ହେବ କଡାକଡି ଯାଞ୍ଚ । ଆଗକୁ ଇଦ, ରାମ ନବମୀ ଓ ପଣା ସଂକ୍ରାନ୍ତି । ହିନ୍ଦୁ ଓ ମୁସଲମାନ ସମ୍ପ୍ରଦାୟର ଭାଇ ଭଉଣୀ ବେଶ ଆନନ୍ଦ ଉଲ୍ଲାସରେ ଏହି ପର୍ବକୁ ପାଳନ କରିବାକୁ ପ୍ରସ୍ତୁତ ହେଉଛନ୍ତି । ଭାଇଚାରା ଓ ସଦଭାବନା ସହ ରାଜ୍ୟରେ ଏହି ପର୍ବକୁ ପାଳନ ନିମନ୍ତେ ଅଣ୍ଟା ଭିଡ଼ିଛି ପୋଲିସ ପ୍ରଶାସନ । ବରିଷ୍ଠ ପୋଲିସ ଅଧିକାରୀ ଏ ନେଇ ଏସପି, ଆଇଜି ଓ ଡ଼ିଆଇଜିଙ୍କ ସହ ବୈଠକ କରିବା ପରେ ବଛା ବଛା ପୋଲିସ ଅଧିକାରୀଙ୍କ ଛୁଟି ବାତିଲ କରାଯାଇଛି । ଜିଲ୍ଲା ଠାରୁ ଆରମ୍ଭ କରି କମିଶନରେଟ ପୋଲିସ ପର୍ଯ୍ୟନ୍ତ ଅପରାଧୀଙ୍କ ଗତିବିଧି କୁ ଲକ୍ଷ କରାଯାଇଛି । ଭୁବନେଶ୍ୱରରେ ପେଶାଦାର ତଥା ଫେରାର ଅପରାଧୀଙ୍କ ଘରେ ଲଟକା ଲାଗୁଛି । ସହରକୁ ଅପରାଧ ମୁକ୍ତ କରିବା ପାଇଁ ନିଶା ମାଫିଆଙ୍କ ବିରୋଧରେ ଜିରୋ ଟଲରାନ୍ସ ଗ୍ରହଣ କରାଯାଉଛି ।

ସମ୍ବଲପୁର, ସୁନ୍ଦରଗଡ, ଭଦ୍ରକ, ବାଲେଶ୍ଵର, କେନ୍ଦ୍ରାପଡା, ଖୋର୍ଦ୍ଧା ଉପରେ ଅଧିକ ନଜର ରହିଛି । ସୋସିଆଲ ମିଡିଆରେ ଆପତ୍ତିଜନକ ମନ୍ତବ୍ୟ, ସଦଭାବନା କ୍ଷୁର୍ଣ୍ଣ ହେଉଥିବା ବାର୍ତ୍ତା ଓ ପୋଷ୍ଟ ନକରିବାକୁ ଅନୁରୋଧ କରାଯାଇଛି । ଧର୍ମକୁ ନେଇ କଟାକ୍ଷ ଓ ଗୁଜବ ଉପରେ ନଜର ରଖିବାକୁ ଓଡିଶା ପୋଲିସ ପକ୍ଷରୁ ପରାମର୍ଶ ଦିଆଯାଇଛି । ସେପଟେ ଫେଷ୍ଟିଭ ସିଜିନକୁ ଦୃଷ୍ଟିରେ ରଖି ପୁରୁଣା ଦାଗି ବା ୱାରେଣ୍ଟିଙ୍କୁ ଚିହ୍ନଟ ଚାଲିଛି । ଥାନାରେ ହାଜିରା ଦେଉନଥିବା ଅପରାଧୀଙ୍କ ଘରେ ଲଟକା ଲାଗୁଛି । କ୍ୟାପିଟାଲ ଥାନା ଓ ଖଣ୍ଡଗିରି ଥାନା ଅଧିନରେ ଲଟକା ଲଗାଇ ଅପରାଧୀଙ୍କ ଛାତିରେ ଛନକା ପୁରାଇଛନ୍ତି ଡିସିପି ଜଗମୋହନ। ପୂର୍ବରୁ ଥାନା ଅଧିକାରୀ ଓ ଏସିପିଙ୍କୁ ନେଇ ଗୁରୁତ୍ୱପୂର୍ଣ୍ଣ ବୈଠକ କରିଥିଲେ ଡିସିପି । ମାତ୍ରାଧିକ ଅପରାଧରେ ଲିପ୍ତ ବ୍ୟକ୍ତିବିଶେଷଙ୍କୁ ଚିହ୍ନଟ ସହ ତଡିପାର କରିବାକୁ ନିର୍ଦ୍ଦେଶ ଦେଇଥିବା ଜଣାପଡିଛି ।

ପୂର୍ବ କାମ ଉପରେ ପତଳା ପିଚୁ ଢଳାଯାଇ ଅର୍ଥ ହଡ଼ପ

ବରୀ : ରାସ୍ତା ସମ୍ପ୍ରସାରଣ କାର୍ଯ୍ୟରେ ଚଞ୍ଚକତା । ପୂର୍ବ କାମ ଉପରେ ପତଳା ପିଚୁ ଢଳାଯାଇ ଅର୍ଥ ହଡ଼ପ । ଲାଗିନି ସୂଚନା ଫଳକ । ବିଭାଗୀୟ ଅଧିକାରୀଙ୍କ ସହ  ଠିକାଦାରଙ୍କ ମଧୁଚନ୍ଦିକା ଅଭିଯୋଗ । ପୂର୍ତ୍ତ ବିଭାଗ ପକ୍ଷରୁ ବରୀ ମାଉଣ୍ଡ ଠାରୁ ଵିଦୃପା ପର୍ଯ୍ୟନ୍ତ ନିର୍ମାଣ ଚାଲିଛି ରାସ୍ତା କାମ। ଏହି ରାସ୍ତା ଦେଇ ପ୍ରତିଦିନ ହଜାର ହଜାର ସଂଖ୍ୟକ ଭାରି ଯାନ ଯାତାୟତ କରିଥାଏ । ଏପରି କି ଏହି ରାସ୍ତା ଦେଇ ନିତିଦିନ ସ୍କୁଲ, କଲେଜ, ବରୀ ଗୋଷ୍ଟି ସ୍ବାସ୍ଥ୍ୟ କେନ୍ଦ୍ର, ବରୀ ବ୍ଲକ ଓ ବୌଦ୍ଧ ପୀଠ ରତ୍ନଗିରିକୁ ଶତାଧିକ ପର୍ଯ୍ୟଟକ ଯାତାୟତ କରିଥାନ୍ତି। ଯାହାକୁ ଆଖି ଆଗରେ ରଖି ସରକାରଙ୍କ ପୂର୍ତ୍ତ ବିଭାଗ ପକ୍ଷରୁ ଏହି ରାସ୍ତା ସମ୍ପ୍ରସାରଣ ନିମନ୍ତେ 21 କୋଟି ରୁ ଅଧିକ ଟଙ୍କା ମଞ୍ଜୁର କରାଯାଇ ନିର୍ମାଣ କାର୍ଯ୍ୟ ଆରମ୍ଭ କରାଯାଇଥିଲା। କିନ୍ତୁ ନିୟମ ଅନୁଯାୟୀ ନିର୍ମାଣ କାର୍ଯ୍ୟ ଆରମ୍ଭ ପୂର୍ବରୁ ସେଠାରେ ସୂଚନା ଫଳକ ଲଗାଯାଇନାହିଁ । ସମ୍ପୃକ୍ତ ଠିକାଦାର ନିୟମର ଖୋଲା ଖୋଲି ଉଲଘଂନ କରିଥିବା ଅଭିଯୋଗ ହୋଇଛି।

୭ ମାସ ପୂର୍ବରୁ କାର୍ଯ୍ୟ ଆରମ୍ଭ ହୋଇଥିଲେ ମଧ୍ୟ ଏ ପର୍ଯ୍ୟନ୍ତ କୌଣସି ପ୍ରକାର ଅଗ୍ରଗତି ହୋଇନାହିଁ । କାମର ଯାଞ୍ଚ ପାଇଁ  ବିଭାଗୀୟ ଅଧିକାରୀ ଆସୁନଥିବା ଅଭିଯୋଗ ହୋଇଛି । ଅଧିକାରୀ ମାନଙ୍କ ଲାଞ୍ଚ ଖୋର ମନୋଭାବ ଯୋଗୁଁ କାମର ମାନ ଅତି ନିମ୍ନମାନର ହେଉଥିବା ସ୍ଥାନୀୟ ଗ୍ରାମବାସୀ ମାନେ କହିଛନ୍ତି। ଏ ବିଷୟରେ ସମ୍ପୃକ୍ତ ବିଭାଗୀୟ ଅଧିକାରୀ ଙ୍କୁ ପଚାରିବାରୁ ସେ  କିଛି ଜାଣିନାହାନ୍ତି ବୋଲି କହିଛନ୍ତି । ଏହି କାର୍ଯ୍ୟ ପ୍ରତି ବିଭାଗୀୟ ଉପରିସ୍ଥ ଅଧିକାରୀ ମାନେ ନଜର ଦେବା ସହିତ ଯାଜପୁର ଜିଲ୍ଲାପାଳ ଦୃଷ୍ଟି ଦେବାକୁ ସ୍ଥାନୀୟ ଲୋକମାନେ ଦାବି କରିଛନ୍ତି ।