ଭୁବନେଶ୍ବର: ଗୋଟିଏ ଦିନର ବିରତି ପରେ ଆଜି ପୁଣି ସରଗରମ ହେବ ବିଧାନସଭା । ଆଜି ଗୃହରେ ୨୦୨୫-୨୬ ଆର୍ଥିକ ବର୍ଷର ବଜେଟ ଗୃହରେ ଉପସ୍ଥାପିତ ହେବ । ମୁଖ୍ୟମନ୍ତ୍ରୀ ତଥା ଅର୍ଥମନ୍ତ୍ରୀ ମୋହନ ଚରଣ ମାଝି ଗୃହରେ ବଜେଟ ଆଗତ କରିବେ । ଏଥର ବଜେଟ ପାଖପାଖି ୧୫ ପ୍ରତିଶତ ବୃଦ୍ଧି ପାଇବ ବୋଲି ଆଶା କରାଯାଉଛି । ସୂଚନା ଅନୁସାରେ ଏଥରକ ବଜେଟ୍ ୨ ଲକ୍ଷ ୮୦ ହଜାର କୋଟି ଟଙ୍କା ଛୁଇଁପାରେ । ୨୦୨୪-୨୫ ଆର୍ଥିକ ବର୍ଷରେ ୪୦ ହଜାରରୁ ଅଧିକ କୋଟି ଟଙ୍କା ଋଣ କରିବାକୁ ପଡ଼ିଥିଲା ।
ସେହିପରି ଆଜି ଗୃହ, ସ୍ଵାସ୍ଥ୍ୟ ଓ ପରିବାର କଲ୍ୟାଣ, ଅର୍ଥ, ଇଲେକ୍ଟ୍ରୋନିକ ଓ ସୂଚନା ପ୍ରଯୁକ୍ତି, ସାଧାରଣ ପ୍ରଶାସନ ଓ ସାଧାରଣ ଅଭିଯୋଗ, ସଂସଦୀୟ ବ୍ୟାପାର ବିଭାଗର ପ୍ରଶ୍ନକାଳ ରହିଛି । ଶୂନ୍ୟକାଳରେ ବାରବାଟୀ ଅବ୍ୟବସ୍ଥା, ଆଇନ ଶୁଙ୍ଖଳା, କେନ୍ଦ୍ର ଅବହେଳା ପରି ଅନେକ ପ୍ରସଙ୍ଗ ଉଠିପାରେ । ଶାସକ ଦଳ ମଧ୍ୟ ବହୁ ପ୍ରସଙ୍ଗ ଉଠାଇପାରେ । ବିରୋଧୀ ବିଜେଡି ପକ୍ଷରୁ ମୁଲତବି ପ୍ରସ୍ତାବ ଦିଆଯିବ। କେନ୍ଦ୍ର ବଜେଟରେ ଓଡ଼ିଶା ପାଇଁ ସ୍ବତନ୍ତ୍ର ଅନୁଦାନ ନଥିବା ନେଇ ବିରୋଧି ଡବଲ ଇଞ୍ଜିନ ସରକାରଙ୍କୁ ଟାର୍ଗେଟ କରିଥିଲେ । ତେଣୁ ଏଥର ରାଜ୍ୟ ବଜେଟ ପେଡ଼ିରେ କଣ ରାଜ୍ୟବାସୀଙ୍କ ପାଇଁ ରହିଛି ତାହା ଉପରେ ସମସ୍ତଙ୍କ ନଜର ।
ଆଜି ଆସିବ ୨୦୨୫-୨୬ ରାଜ୍ୟ ବଜେଟ
୧୩ ଜିଲ୍ଲା ପାଇଁ ସଭାପତିଙ୍କ ନାଁ ଘୋଷଣା କଲା ବିଜେପି
ଭୁବନେଶ୍ବର: ଜାନୁଆରୀ ୨୫ ତାରିଖରେ ୨୩ ଜିଲ୍ଲାର ସଭାପତିଙ୍କ ନାଁ ଘୋଷଣା କରିଥିଲା ବିଜେପି । ଆଜି ଆଉ ୧୩ ଜିଲ୍ଲା ପାଇଁ ସଭାପତିଙ୍କ ନାଁ ଘୋଷଣା କରିଛି । ରାଜ୍ୟ ନିର୍ବାଚନ ଅଧିକାରୀ ତଥା ସାଂସଦ ପ୍ରତାପ ଚନ୍ଦ୍ର ଷଡଙ୍ଗୀଙ୍କ ଅନୁମୋଦନ କ୍ରମେ ଏହି ତାଲିକା ପ୍ରକାଶ କରାଯାଇଛି ।
ଯଯାତି କେଶରୀ ପଟ୍ଟନାୟକଙ୍କୁ ଅନୁଗୁଳ ଜିଲ୍ଲ ସଭାପତି କରାଯାଇଥିବା ବେଳେ ଭଗବାନ ପଣ୍ଡାଙ୍କୁ ଭଦ୍ରକ ଏବଂ ନିରଞ୍ଜନ ମିଶ୍ର ଭୁବନେଶ୍ବର ସଭାପତି କରାଯାଇଛି । ଗଜପତି ପାଇଁ ନବକିଶୋର ଶବର ଏବଂ ଯାଜପୁର ପାଇଁ ଦେବଯାନୀ ପ୍ରଧାନଙ୍କ ନାଁ ଘୋଷଣା କରାଯାଇଛି ।
ସେହିପରି ରଘୁନନ୍ଦନ ପଣ୍ଡାଙ୍କୁ ଝାରସୁଗୁଡା, ପଣ୍ଡିତ କୁମାର ବିସ୍ମାଝୀଙ୍କୁ କନ୍ଧମାଳ, ବିଶ୍ୱରଞ୍ଜନ ବଡଜେନାଙ୍କୁ ଖୋର୍ଦ୍ଧା, ଶିବ ମୁଦୁଲିଙ୍କୁ କୋରାପୁଟ, ତାପସ ରଞ୍ଜନ ମାର୍ଥାଙ୍କୁ ନୟାଗଡ, ଗୋପି ଆନନ୍ଦଙ୍କୁ ରାୟଗଡା, ବେଣୁଧର ଦାଶଙ୍କୁ ସୁବର୍ଣ୍ଣପୁର ଏବଂ ପୂର୍ଣ୍ଣିମା କେର୍କେଟାଙ୍କୁ ରାଉରକେଲା ଜିଲ୍ଲା ସଭାପତି କରାଯାଇଛି ।
ବଢ଼ିବ ବିଜୁଳି ଦର ! ଉପଭୋକ୍ତା ମହାସଂଘ ଦେଲା ଚେତାବନୀ
ଭୁବନେଶ୍ବର: ବଢ଼ିବ କି ବିଜୁଳି ବିଲ୍ ? ଆସନ୍ତାକାଲି ଓଇଆରସିରେ ଚଳିତବର୍ଷ ବିଜୁଳି ଦର ଧାର୍ଯ୍ୟ କରିବାକୁ ଜନ ଶୁଣାଣି ଆରମ୍ଭ ହେବ । ଏମିତି ସ୍ଥିତିରେ ଏପରି ପ୍ରଶ୍ନ ଉଠିବାରେ ଲାଗିଛି ।
ପ୍ରଥମ ଦିନରେ OPGC ଓ OHPC ର ଶୁଣାଣି ରହିଛି । ସୂଚନା ଅନୁସାରେ ସରକାରଙ୍କ ଅଧୀନରେ ଥିବା ଏହି ଦୁଇ ସଂସ୍ଥା ଦର ବୃଦ୍ଧି କରିବାକୁ ପ୍ରସ୍ତାବ ଦେଇଛନ୍ତି । ଆସନ୍ତା ୨୭ ତାରିଖ ପର୍ଯ୍ୟନ୍ତ ଶୁଣାଣି ଚାଲିବ । ଏହି ଦୁଇ ସଂସ୍ଥା ବିଜୁଳି ଦର ବୃଦ୍ଧି ପାଇଁ ବାରମ୍ଵାର ଦାବି କରି ଆସୁଛନ୍ତି l ଆସନ୍ତାକାଲି ଉଭୟ ସଂସ୍ଥା ବିଜୁଳି ଶୁକ୍ଳ ବୃଦ୍ଧି ପାଇଁ ଜନ ଶୁଣାଣିରେ ନିଜର ପକ୍ଷ ରଖିବେ ।
ଅନ୍ୟପଟେ ଉପଭୋକ୍ତା ମହାସଂଘ କହିଛି ବିଜୁଳି ଦର ବୃଦ୍ଧି ହେଲେ ଏହାକୁ ବିରୋଧ କରାଯିବ ବୋଲି ଚେତାବନୀ ଦେଇଛି । କେନ୍ଦ୍ରୀୟ ଶକ୍ତି ଅର୍ଥ ନିଗମର ରିପୋର୍ଟ ଅନୁସାରେ ସର୍ବଭାରତୀୟ ସ୍ତରରେ ବିଦ୍ୟୁତ ୟୁନିଟ ପିଛା ୫ ଟଙ୍କା ୮ ପଇସା ଆଦାୟ କରିଥିବା ବେଳେ ଓଡ଼ିଶାରେ ବିଦ୍ଯୁତ କମ୍ପାନୀଗୁଡିକ ଉପଭୋକ୍ତାଙ୍କଠାରୁ ୟୁନିଟ ପିଛା ୫ ଟଙ୍କା ୯୮ ପଇସା ନେଉଛନ୍ତି । ଅର୍ଥାତ ପ୍ରାୟ ୧ କୋଟି ଗ୍ରାହକଙ୍କଠାରୁ ୟୁନିଟ ପିଛା ୯୦ ପଇସା ଅଧିକ ନେଇଛନ୍ତି । ଏହାକୁ ଗ୍ରାହକମାନଙ୍କୁ ଫେରାଇ ଦିଆଯାଉ ବୋଲି ମହାସଂଘ ଦାବି କରିଛି ।
ନବୀନ ଲଗାଇଥିବା ଗଛରୁ ଏବେ ଫଳ ତୋଳୁଛନ୍ତି ରାଜ୍ୟ ବିଜେପି ସରକାର
ଭୁବନେଶ୍ବର: ଏକ ନିଅଣ୍ଟିଆ ରାଜ୍ୟକୁ ବଳକା ରାଜ୍ୟରେ ପରିଣତ କରିଥିଲେ ନବୀନ ସରକାର । ନବୀନ ପଟ୍ଟନାୟକ ଲଗାଇଥିବା ବିକାଶର ଦ୍ରୁମରୁ ଏବେ ଫଳ ତୋଳୁଛନ୍ତି ବିଜେପି ସରକାର । ୨୪ ବର୍ଷର ସ୍ଥିର ସରକାରରେ ରାଜ୍ୟ ଅଭିବୃଦ୍ଧି ଆଗଉଥିଲା । କିନ୍ତୁ ୮ ମାସର ମୋହନ ସରକାରରେ ଏହା ତଳ ମୁହାଁ ହୋଇଛି । ଆସନ୍ତାକାଲି ବିଧାନସଭାରେ ବଜେଟ ଆସିଥିବାକୁ ଥିବା ବେଳେ ଅର୍ଥନୈତିକ ସର୍ଭେ ରିପୋର୍ଟରେ ନିଜର ଅପାରଗତାର ପ୍ରମାଣ ଦେଇଛନ୍ତି ରାଜ୍ଯ ସରକାର। କିନ୍ତୁ ମନ୍ତ୍ରୀ ବାହାବା ନେବା ଭୁଲୁ ନାହାନ୍ତି । ବିରୋଧୀ କଟାକ୍ଷ କରି କହିଛନ୍ତି ‘ଜଗତେ କେବଳ ଜନେ ହସିବ’ ।
ବିକାଶରେ ଲାଗିଲା ବ୍ରେକ୍ । ୮ ମାସର ଡବଲ ଇଞ୍ଜିନ ସରକାରରେ ରାଜ୍ୟର ଅଭିବୃଦ୍ଧି ହାର ୮.୫ ପ୍ରତିଶତରୁ ୭.୨ ପ୍ରତିଶତକୁ ଖସିଛି । ଅଭାବୀ ରାଜ୍ୟକୁ ପ୍ରଭାବୀ ରାଜ୍ୟରେ ପରିଣତ କରିଥିଲେ ପୂର୍ବର ନବୀନ ସରକାର । କିନ୍ତୁ ବିଜେପି ସରକାର କ୍ଷମତାକୁ ଆସିବା ପରେ ତାକୁ ସମ୍ଭାଳି ପାରିନାହାନ୍ତି । ଅର୍ଥନୈତିକ ସର୍ଭେ ରିପୋର୍ଟରୁ ସରକାରଙ୍କ ପାରିବା ପଣିଆ ଧରାପଡ଼ିଛି । ସବୁ ବର୍ଗର ଲୋକଙ୍କ ବିକାଶ ପାଇଁ ନବୀନ ଯେଉଁ ସବୁ ଯୋଜନା କରିଥିଲେ, ସେସବୁର ଯୋଜନାର ରଙ୍ଗ ବଦଳାଇ, ପ୍ରଚାର କରି ତାକୁ ନିଜର ସଫଳତା ବୋଲି ସରକାର ଦର୍ଶାଇଛନ୍ତି । ଏପରି ଅଭିଯୋଗ କରିଛନ୍ତି ବିରୋଧୀ ।
କୃଷି, ଶିଳ୍ପ, ଶିକ୍ଷା, ଆବାସ ଏପରିକି ଅନୁସୂଚିତ ଜାତି ଓ ଜନଜାତି ବିକାଶ ପାଇଁ ୨୦୨୪-୨୫ ଆର୍ଥିକ ବର୍ଷରେ ବଜେଟ୍ ହ୍ରାସ କରିଛନ୍ତି ବିଜେପି ସରକାର । ବିଜେଡି ଅଭିଯୋଗ କରିଛି, ଦେଶର ସବୁଠୁ ଦ୍ରୁତ ଆର୍ଥିକ ଉନ୍ନତି କରୁଥିବା ଓଡ଼ିଶାକୁ ପୂର୍ବ ସରକାରଙ୍କଠାରୁ ଉତ୍ତରାଧିକାରୀ ସୂତ୍ରରେ ପାଇ ମଧ୍ଯ ବିଜେପି ସରକାର ଦିଶାହୀନ ହୋଇଛନ୍ତି । ଆର୍ଥିକ ଦୃଷ୍ଟିରୁ ସ୍ବାବଲମ୍ବୀ ଥିବାରୁ ନୂଆ ଯୋଜନା ହାତକୁ ନେଇପାରୁଛନ୍ତି ରାଜ୍ୟ ସରକାର ।
ସେପଟେ କଂଗ୍ରେସର ଅଭିଯୋଗ, ଓଡ଼ିଶାର ବିକାଶ କଥା କହି ବାହାବା ନେବାକୁ ଚେଷ୍ଟା କଲେ ଏବର ସରକାରଙ୍କୁ ଜନେ ହସିବେ । କିନ୍ତୁ ମନ୍ତ୍ରୀମାନେ ସରକାରଙ୍କ ସଫଳତାର ଗୁଣଗାନ କରି ଚାଲିଛନ୍ତି ।
ବିଜେଡି ସରକାର ସମୟରେ ରାଜ୍ୟ କେବେ ବି ରାଜସ୍ବ ନିଅଣ୍ଟିଆ ସ୍ଥିତିରେ ନଥିଲେ । ଏ ସରକାର ଆସୁ ଆସୁ ରାଜସ୍ବ ନିଅଣ୍ଟ ସ୍ଥିତିକୁ ଆସିଲେଣି । ୯ ଲକ୍ଷ ୮୮ ହଜାର କୋଟି ଟଙ୍କାର ରାଜସ୍ବ ନିଅଣ୍ଟ ହେବ ବୋଲି ଷୋଡ଼ଶ ଅର୍ଥ କମିଶନଙ୍କୁ ନିଜେ ମୁଖ୍ୟମନ୍ତ୍ରୀ ହିସାବ ଦେଇଛନ୍ତି । ଏହାର ଅର୍ଥ ରାଜ୍ୟ ଏବେଠୁ ନିଅଣ୍ଟିଆ ସ୍ଥିତି ଆଡ଼କୁ ଗଲାଣି ।
ପୂର୍ବରୁ ଆର୍ଥିକ ସୁପରିଚାଳନାରେ ଓଡ଼ିଶା ଏକ ନମ୍ବର ବୋଲି ନୀତି ଆୟୋଗ ଓ କେନ୍ଦ୍ର ସରକାର ବହୁ ବାର ମୋହର ମାରିଥିଲେ । ଏବେ ମୁଣ୍ଡ ପିଛା ଆୟ ବଢିଛି ବୋଲି ରାଜ୍ୟ ସରକାର ଯେଉଁ ବାହାବା ନେଉଛନ୍ତି, ସେଇଟା କେବଳ ନବୀନ ସରକାରଙ୍କ ଯୋଗୁଁ ସମ୍ଭବ ହୋଇପାରିଛି । ରାଜ୍ୟରେ ବିଜେପି ସରକାରକୁ ତ ବର୍ଷେ ପୂରିନି ତା’ହେଲେ ମୁଣ୍ଡପିଛା ଆୟ ନେଇ ହିସାବ ପାଇଲେ କେମିତି ? ଶ୍ରେୟ ନେବାକୁ ଏବର ସରକାର ଯଦି ଏତେ ତରବର ତା’ହେଲେ ରାଜ୍ୟରେ ଦରଦାମ ବୃଦ୍ଧି ଶ୍ରେୟ କାହିଁକି ନେଉ ନାହାନ୍ତି ବୋଲି କଂଗ୍ରେସ ପ୍ରଶ୍ନ କରିଛି ।
ଆସନ୍ତା ୧୭ ତାରିଖରେ ରାଜ୍ୟ ସରକାର ୨୦୨୫-୨୬ ଆର୍ଥିକ ବର୍ଷ ପାଇଁ ବଜେଟ୍ ଆଗତ କରିବେ । ସୂଚନା ଅନୁସାରେ ଏଥରକ ବଜେଟ୍ ୨ ଲକ୍ଷ ୮୦ ହଜାର କୋଟି ଟଙ୍କା ଛୁଇଁପାରେ । କିନ୍ତୁ ସହରଠୁ ଗାଁ, କେଉଁଠି ବି କିଛି କାମ ହେଉନି । ୨୦୨୪-୨୫ ଆର୍ଥିକ ବର୍ଷରେ ୪୦ ହଜାରରୁ ଅଧିକ ଋଣ କରିବାକୁ ପଡ଼ିଥିଲା । ରାଜସ୍ବ ବୃଦ୍ଧି ଉପରେ ଫୋକସ ନ କରି ଏଥରକ ବି ଆୟ ଉତ୍ସ ଭାବେ ରାଜ୍ୟ ସରକାର ଋଣକୁ ଭରସା କରିବେ ବୋଲି ସମୀକ୍ଷକ ଆକଳନ କରୁଛନ୍ତି ।
ମିସା ବନ୍ଦୀ ପେନସନ୍କୁ ସିପିଏମ୍ ପ୍ରତ୍ୟାଖ୍ୟାନ
ଭୁବନେଶ୍ବର: ରାଜ୍ୟ ବିଜେପି ସରକାରଙ୍କ ମିସା ବନ୍ଦୀ ପେନସନକୁ ସିପିଏମର ପ୍ରତ୍ୟାଖ୍ୟାନ । ଦଳ ପକ୍ଷରୁ କୁହାଯାଇଛି, ୧୯୭୫ ଜୁନ୍ ୨୬ରେ ଜାରି ହୋଇଥିବା ଜରୁରୀ କାଳୀନ ପରିସ୍ଥିତି ଘୋଷଣା ପରେ ଏହାକୁ ଓଡ଼ିଶା ସମେତ ସମଗ୍ର ଦେଶରେ ଲକ୍ଷ ଲକ୍ଷ ଲୋକ ବିରୋଧ କରିଥିଲେ । ବିଭିନ୍ନ ଦଳର ନେତା, କର୍ମୀ, ବୁଦ୍ଧିଜୀବୀ, ସାମ୍ବାଦିକଙ୍କୁ ମିସା ଓ ଡ଼ିଆଇଆର୍ ଆଇନ୍ ବଳରେ ବିନା ବିଚାରରେ ଗିରଫ କରି ଜେଲରେ ରଖା ଯାଇଥିଲା । ସାମଗ୍ରିକ ଭାବେ ଗଣତାନ୍ତ୍ରିକ ଅଧିକାର ଉପରେ ଅଙ୍କୁଶ ଲଗାଯାଇଥିଲା । ସେତେବେଳେ ଜରୁରୀ ପରିସ୍ଥିତିର ବିରୋଧ କରିଥିବା ବିଜେପି ଆଜି ରାଜ୍ୟ ଓ କେନ୍ଦ୍ରରେ କ୍ଷମତାସୀନ।
ଦଳ ପକ୍ଷରୁ କୁହାଯାଇଛି, କେନ୍ଦ୍ରରେ ନରେନ୍ଦ୍ର ମୋଦିଙ୍କ ଦ୍ଵାରା ପରିଚାଳିତ ସରକାରର ୧୧ ବର୍ଷର ଶାସନରେ ତିଳ ତିଳ କରି ଗଣତନ୍ତ୍ରର ହତ୍ୟା କରାଯାଉଛି । ସରକାରୀ ନୀତିର ବିରୋଧ କରୁଥିବା ସାମ୍ବାଦିକ, ବୁଦ୍ଧିଜୀବୀ, ଓକିଲ, ସାମାଜିକ କର୍ମୀ, ରାଜନେତାଙ୍କୁ ବର୍ଷ ବର୍ଷ ଧରି ଜେଲରେ ସାଧାରଣ ବନ୍ଦୀ ଭାବେ ରଖାଯାଉଛି । ଜରୁରୀ ଅବସ୍ଥା ଜାରି ନହେଲେ ସୁଦ୍ଧା ବିଜେପି ପକ୍ଷରୁ ବର୍ତ୍ତମାନ ନବ୍ୟ ଫାସିବାଦୀ ଆକ୍ରମଣ ଜୋରଦାର ହୋଇଛି । ଭିନ୍ନମତ ରଖୁଥିବା, ସରକାରୀ ନୀତିର ବିରୋଧ କରୁଥିବା ଲୋକକୁ ଦେଶଦ୍ରୋହୀ ଆଖ୍ୟା ଦିଆଯାଇ ଜେଲରେ ଭର୍ତ୍ତି କରାଯାଉଛି। ଦିବ୍ୟାଙ୍ଗ, ଅକ୍ଷମ, ମହିଳା, ବୃଦ୍ଧ ମଧ୍ୟ ଏଥିରୁ ନିସ୍ତାର ପାଉ ନାହାନ୍ତି । ଗଣତନ୍ତ୍ରକୁ ଯୋଜନାବଦ୍ଧ ଭାବେ ହତ୍ୟା କରୁଥିବା ବିଜେପି ସରକାର ଗଣତନ୍ତ୍ର ସୁରକ୍ଷା ପାଇଁ ଜେଲ୍ ଯାଇଥିବା ଲୋକଙ୍କୁ ପେନ୍ସନ୍ ବ୍ୟବସ୍ଥା କରିବା ହାସ୍ଯାସ୍ପଦ କଥା । ପୁଣି ଗଣତନ୍ତ୍ରର ସୁରକ୍ଷା ପାଇଁ ସଂଗ୍ରାମ କରିବା ପ୍ରତ୍ୟେକ ଦେଶପ୍ରେମୀର କର୍ତ୍ତବ୍ୟ । ଏଥିରେ ପେନସନ୍ କାହିଁକି ଦିଆଯିବ ବୋଲି ପ୍ରଶ୍ନ କରିଛି ସିପିଏମ୍ ।
ରିଏଲ ଇଷ୍ଟେଟ ମାମଲାର ଦ୍ବନ୍ଦ୍ବ ଦୂର କରିବ ରେବା
ଭୁବନେଶ୍ବର: ସହରାଞ୍ଚଳରେ ଘର ଖଣ୍ଡିଏ କରିବାକୁ ଲୋକଙ୍କ ଆଗ୍ରହ ବଢୁଛି । ଏହା ସହିତ ରିଏଲ ଇଷ୍ଟେଟ କାରବାରରେ ଆଇନଗତ ମାମଲା ମଧ୍ୟ ବଢି ଚାଲିଛି । ଜମି ହେଉ କି ଘର କିଣିବା ବେଳେ ସମସ୍ତ କାଗଜପତ୍ର ଯାଞ୍ଚ କରିବାର ସୁଯୋଗ ନଥିବାରୁ କ୍ରେତା ଅଯଥାରେ ଅଦାଲତି ମାମଲାରେ ଫସୁଛନ୍ତି । ଏହି ସେକ୍ଟରରେ ମାମଲା ବଢୁଥିବାରୁ ଓରେରା କୋର୍ଟରେ ମାମଲା ସଂଖ୍ୟା ମଧ୍ୟ ବଢି ଚାଲିଛି । ଏହାକୁ ଦୃଷ୍ଟିରେ ରଖି ରାଜ୍ୟରେ ପ୍ରଥମ ଥର ପାଇଁ ଦେଶର ଚତୁର୍ଥ ରାଜ୍ୟ ଭାବେ ଗଢାଯାଇଛି ରିଏଲ ଇଷ୍ଟେଟ ବାର ଆସୋସିଏସନ ।
ରିଏଲ ଇଷ୍ଟେଟ କାରବାର ସମ୍ପର୍କିତ ମାମଲା ଲଢୁଥିବା ଓକିଲମାନଙ୍କୁ ନେଇ ଗଢା ଯାଇଛି ରେବା । ଏହାର ପ୍ରଥମ ସମ୍ମିଳନୀ ଭୁବନେଶ୍ବରରେ ଅନୁଷ୍ଠିତ ହୋଇଛି । ରିଏଲ ଇଷ୍ଟେଟ କାରବାରକୁ ସ୍ବଚ୍ଛ କରିବା ପାଇଁ ଅନେକ ଆଇନ ଆସୁଥିଲେ ମଧ୍ୟ ଏହା କାର୍ଯ୍ୟକାରୀ କରିବାରେ ସମସ୍ୟା ଉପଜୁଛି । ଅନେକ ଆଇନ ମଧ୍ୟରେ ଥିବା ଦ୍ବନ୍ଦ୍ବ ଦୂର କରିବାକୁ ରେବା କାମ କରିବ ବୋଲି ଆଶା କରାଯାଉଛି ।
ରାଜ୍ୟରେ ୨୦୧୭ ପୂର୍ବର ଆପାର୍ଟମେଣ୍ଟ କିଣାବିକା ନେଇ ହଟୁନି ଦ୍ଵନ୍ଦ୍ଵ
ଭୁବନେଶ୍ବର: ରାଜ୍ୟରେ ରେରା ଆଇନ ଆସିବା ପୂର୍ବରୁ ଅର୍ଥାତ ୨୦୧୭ ପୂର୍ବର ଆପାର୍ଟମେଣ୍ଟ କିଣାବିକା ପାଇଁ ରାଜ୍ୟ ସରକାରଙ୍କ ବିଜ୍ଞପ୍ତି ଉପରେ ହାଇକୋର୍ଟ ରହିତାଦେଶ ଲଗାଇଛନ୍ତି । ପ୍ରଥମେ ନଗର ଉନ୍ନୟନ ବିଭାଗ ଓ ପରେ ରାଜସ୍ବ ବିଭାଗ ୨୦୧୭ ପୂର୍ବର ଆପାର୍ଟମେଣ୍ଟ ବିକ୍ରୀ ପାଇଁ ବିଜ୍ଞପ୍ତି କଲେ । ହେଲେ ଏହା ଆଇନ ଅନୁସାରେ ହୋଇ ନଥିବାରୁ ହାଇକୋର୍ଟ ଏହା ଉପରେ ଷ୍ଟେ କରିବା ସହ ରାଜ୍ୟ ସରକାରଙ୍କୁ ନୋଟିସ କରିଛନ୍ତି । ତେବେ କାହିଁକି ସରକାରଙ୍କ ବିଜ୍ଞପ୍ତି ଉପରେ ଲାଗିଲା ରୋକ୍ ? କେଉଁଠି ରହିଲା ଅସୁବିଧା ? ୨୦୧୭ ପୂର୍ବର ଅପାର୍ଟମେଣ୍ଟ କିଣାବିକା ପାଇଁ ଅକୁପାନ୍ସି ପ୍ରମାଣପତ୍ର ଜରୁରୀ ନା ନାହିଁ ? ବିଜ୍ଞପ୍ତିକୁ ନେଇ ଅନେକ ଦ୍ବନ୍ଦ୍ବ ରହିଥିବା ବେଳେ ସରକାରଙ୍କ ସ୍ପଷ୍ଟୀକରଣ ଜରୁରୀ ହୋଇପଡ଼ିଛି ।
ରିଏଲ ଇଷ୍ଟେଟ କାରବାରକୁ ବ୍ୟବସ୍ଥିତ କରିବାକୁ ୨୦୧୭ରେ କାର୍ଯ୍ୟକାରୀ ହେଲା ରେରା ଆଇନ । ହେଲେ ରେରା ଆଇନ କାର୍ଯ୍ୟକାରୀ ପୂର୍ବରୁ ଅର୍ଥାତ ୨୫ ଫେବୃଆରୀ ୨୦୧୭ ପୂର୍ବରୁ କାମ ସରିଥିବା ଆପାର୍ଟମେଣ୍ଟ ଗୁଡ଼ିକର କିଣାବିକା ପାଇଁ ସରକାର ବିଜ୍ଞପ୍ତି କଲେ । ୧ ଫେବୃଆରୀ, ୨୦୨୫ରେ ନଗର ଉନ୍ନୟନ ବିଭାଗ ଏବଂ ୩ ଫେବୃଆରୀ ୨୦୨୫ରେ ରାଜସ୍ବ ବିଭାଗ ଏହି ବିଜ୍ଞପ୍ତି କଲେ ଯେ, ୨୦୧୭ ପୂର୍ବର ଆପାର୍ଟମେଣ୍ଟ କିଣାବିକାରେ କିଛି ସମସ୍ୟା ନାହିଁ । ସବ ରେଜିଷ୍ଟ୍ରାରମାନେ ଏହି ଦଳିଲ ପଞ୍ଜୀକରଣ ପାଇଁ ମନା କରିପାରିବେ ନାହିଁ । ହେଲେ ମାମଲା ହାଇକୋର୍ଟକୁ ଗଲା ଓ ହାଇକୋର୍ଟ ଏହା ଉପରେ ରହିତାଦେଶ ଲାଗୁ କଲେ । ଏହି ସବୁ ପ୍ରପର୍ଟି ପାଇଁ ଓଡ଼ିଶା ଆପାର୍ଟମେଣ୍ଟ ଓନରସିପ୍ ଆଇନ- ୨୦୨୩ ଲାଗୁ ହେବ ନାହିଁ ବୋଲି ସରକାର କହିଲେ । ହେଲେ ୧୯୮୨ ଓ ୨୦୧୫ର ଆଇନ ଅନୁସାରେ ଆପାର୍ଟମେଣ୍ଟ କିଣାବିକା ପାଇଁ ଅକୁପାନ୍ସି ସାର୍ଟିଫିକେଟ ଏବଂ କମ୍ପ୍ଲିସନ ସାର୍ଟିଫିକେଟ ଜରୁରୀ । ନୂଆ ବିଜ୍ଞପ୍ତିରେ ଥିବା ଦ୍ବନ୍ଦ୍ବ ଯୋଗୁଁ ହାଇକୋର୍ଟ ସ୍ଥଗିତାଦେଶ କରିଛନ୍ତି । ଏହା ଉପରେ ସରକାର ସ୍ପଷ୍ଟୀକରଣ ରଖିବା ଦରକାର ।
ରେରା ଆଇନ ୨୦୧୭ ଆସିବା ବେଳେ ରାଜ୍ୟର ବିଭିନ୍ନ ସହରରେ ଚାଲିଥିବା ଆପାର୍ଟମେଣ୍ଟକୁ ରନିଂ ପ୍ରକଳ୍ପ ହିସାବରେ ଗଣତି କରି ରେରା ଅଧୀନରେ ଆସିବ ସ୍ପଷ୍ଟ କଲେ । ହେଲେ ୨୫ ଫେବୃଆରୀ ୨୦୧୭ ସୁଦ୍ଧା ଯେଉଁ ସବୁ ପ୍ରକଳ୍ପ ସରିଥିଲା, ତାହା କିଣାବିକା ପାଇଁ ଆପାର୍ଟମେଣ୍ଟ ମାଲିକାନା ଆଇନ ୧୯୮୨ ଏବଂ ୨୦୧୫ ଅନୁସାରେ ଅକ୍ୟୁପାନ୍ସି ଓ କମ୍ପ୍ଲିସନ ସାର୍ଟିଫିକେଟ ଜରୁରୀ । ହେଲେ ସରକାରଙ୍କ ବିଜ୍ଞପ୍ତିରେ ତାହା ଉଲ୍ଲେଖ ନାହିଁ । ଯଦି ୨୦୧୭ ପୂର୍ବର ଆପାର୍ଟମେଣ୍ଟ କିଣାବିକାରେ ଅକୁପାନ୍ସି ସାର୍ଟିଫିକେଟ ଦରକାର ନାହିଁ, ତା’ହେଲେ ସରକାର ଏହା ସ୍ପଷ୍ଟ କରିବା ଦରକାର । ନହେଲେ ଏହି ସବୁ ପ୍ରକଳ୍ପର କେବଳ ମାଲିକାନା ବଦଳିପାରେ ହେଲେ ଏହା ଆଇନ ଦୃଷ୍ଟିକୋଣରୁ ବୈଧ ହେବ ନାହିଁ । ଏପରିକି ୨୦୧୭ ପୂର୍ବର ଆପାର୍ଟମେଣ୍ଟରେ ରେରା ଆଇନର କିଛି ଭୂମିକା ନାହିଁ ବୋଲି ଯେଉଁ ଧାରଣା ରହିଛି ତାହାକୁ ଦୂର କରିଛନ୍ତି ରେରାର ପ୍ରଶାସନିକ ସଦସ୍ୟ । ୨୦୧୭ ପୂର୍ବର ହେଲେ ବି ଯଦି କୌଣସି ଆଇନଗତ ସମସ୍ୟା ଥାଏ, ସେଥିରେ ବି ରେରା କୋର୍ଟ ହସ୍ତକ୍ଷେପ କରିପାରିବ ।
ଏଠାରେ ପ୍ରଶ୍ନ, ଯଦି ସରକାର ସବୁ ଜାଣିଛନ୍ତି, ତା’ହେଲେ କାହିଁକି ତରବରିଆ ଭାବେ ଏପରି ବିଜ୍ଞପ୍ତି କଲେ ? କାହିଁକି ଅକୁପାନ୍ସି ସାର୍ଟିଫିକେଟ ବାବଦରେ ସ୍ପଷ୍ଟୀକରଣ ରଖିଲେ ନାହିଁ ? ୨୦୧୭ ପୂର୍ବର ଆପାର୍ଟମେଣ୍ଟ ପାଇଁ ଅକୁପାନ୍ସି ଓ କମ୍ପ୍ଲିସନ ସାର୍ଟିଫିକେଟ ଜରୁରୀ ନା ନାହିଁ ? କ୍ରେତାଙ୍କ ସ୍ବାର୍ଥ ଦୃଷ୍ଟିକୋଣରୁ ସରକାର ଏ ବାବଦରେ ସ୍ପଷ୍ଟ ଚିତ୍ର ରଖିବା ଦରକାର ।
ଖାଦ୍ୟ ଯୋଗାଣ ତଥା ବିଜ୍ଞାନ ବୈଷୟିକ ମନ୍ତ୍ରୀଙ୍କ ବାହସ୍ଫୋଟ: ୫ କର୍ମଚାରୀଙ୍କୁ ନେଇ ଗାଁରେ ବିଜ୍ଞାନକୁ କରିବେ ସମ୍ପୃଦ୍ଧ
ଭୁବନେଶ୍ବର: ପୁଣି ଚର୍ଚ୍ଚାରେ ଖାଦ୍ୟ ଯୋଗାଣ ତଥା ବିଜ୍ଞାନ ବୈଷୟିକ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର । ରାଜ୍ୟର ଆଳୁ ସଙ୍କଟ ବେଳେ ମିଛ କହି ବିବାଦରେ ଥିବା ବେଳେ ଏବେ ପୁଣି ବିଜ୍ଞାନକୁ ସମୃଦ୍ଧ କରିବା ସମ୍ପର୍କିତ ନିଷତ୍ତିକୁ ନେଇ ବିବାଦକୁ ଟାଣି ହୋଇଯାଇଛନ୍ତି । ଓଡ଼ିଶାର ଗ୍ରାମାଞ୍ଚଳର ଛାତ୍ରଛାତ୍ରୀମାନେ ବିଜ୍ଞାନରେ ଦୁର୍ବଳ । ଏସବୁରେ ସୁଧାର ଆଣିବାକୁ ସରକାର ଓଡିଶା ବିଜ୍ଞାନ ଏକାଡେମୀ ଦ୍ୱାରା ଜୋନାଲ ସ୍ତରରେ ବ୍ୟାପକ କାର୍ଯ୍ୟକ୍ରମ କରିବାକୁ ନିଷ୍ପତ୍ତି ନେଇଛନ୍ତି । ବିଜ୍ଞାନ ଓ ବୈଷୟିକ ମନ୍ତ୍ରୀ ଏ ସମ୍ପର୍କରେ ଜଣାଇଥିବା ବେଳେ ଅତ୍ୟଧିକ କାର୍ଯ୍ୟ ଚାପରେ ଥିବା ଓଡିଶା ବିଜ୍ଞାନ ଏକାଡେମୀ ମାତ୍ର ୫ ଜଣରେ କିଭଳି ଏତେ କାମ କରିପାରିବ ତାକୁ ନେଇ ପ୍ରଶ୍ନ ଉଠିବାରେ ଲାଗିଛି ।
ଖାଦ୍ୟ ଯୋଗାଣ ତଥା ବିଜ୍ଞାନ ବୈଷୟିକ ମନ୍ତ୍ରୀଙ୍କ ବିଜ୍ଞାନକୁ ନେଇ ବାହାସ୍ଫୋଟ । ମାତ୍ର ପାଞ୍ଚ ଜଣ କର୍ମଚାରୀରେ ଚାଲିଥିବା ବିଜ୍ଞାନ ଏକାଡେମୀ ଉପରେ ଅଧିକ ଚାପ ପକାଇବାକୁ ଚେଷ୍ଟା । ଓଡ଼ିଶାର ବିଜ୍ଞାନ ଶିକ୍ଷା କ୍ଷେତ୍ରରେ ଛାତ୍ରଛାତ୍ରୀଙ୍କୁ ସମୃଦ୍ଧ କରିବା ପାଇଁ କାର୍ଯ୍ୟ କରୁଥିବା ଓଡିଶା ବିଜ୍ଞାନ ଏକାଡେମୀ ସଭାପତି ଓ ସମ୍ପାଦକଙ୍କୁ ମିଶାଇ ମାତ୍ର ପାଞ୍ଚ ଜଣରେ ଚାଲିଛି । ଏଭଳି ସମୟରେ ସରକାର ଆହୁରି ଚାପ ଲଦିବା ଚେଷ୍ଟାକୁ ଖୋଲାଖୋଲି ନାପସନ୍ଦ କରିଛନ୍ତି ଏକାଡେମୀର ଅଧିକାରୀ । ଯାହାକୁ ନେଇ ଭିନ୍ନ ଏକ ବିବାଦ ମୁଣ୍ଡ ଟେକିଛି ।
ବିଜ୍ଞାନ ଓ ବୈଷୟିକ ମନ୍ତ୍ରୀଙ୍କ କହିବା କଥା ଛାତ୍ରଛାତ୍ରୀଙ୍କ ମଧ୍ୟରେ ବିଜ୍ଞାନର ପ୍ରଚାର ପ୍ରସାର ପାଇଁ ୮ରୁ ୧୦ଟି ଜିଲ୍ଲାକୁ ନେଇ ଜୋନାଲ ସ୍ତରରେ ଶିକ୍ଷକ, ଛାତ୍ରଛାତ୍ରୀ ଓ ବୈଜ୍ଞାନିକମାନଙ୍କର ଭାବ ବିନିମୟ କାର୍ଯ୍ୟକ୍ରମ ହେବ । ଯାହା ଫଳରେ ବିଭିନ୍ନ ସ୍କୁଲର ଛାତ୍ରଛାତ୍ରୀ, ଶିକ୍ଷକଙ୍କ ଯିବା ଆସିବା ସମସ୍ୟା ମଧ୍ୟ ଦୂର ହେବ । ହେଲେ ମନ୍ତ୍ରୀଙ୍କ ଏଭଳି ନିଷ୍ପତ୍ତିକୁ ନେଇ ଏକାଡେମୀ ଅଧିକାରୀଙ୍କ ମଧ୍ୟରେ ଅସନ୍ତୋଷ ଉପୁଜିଛି । ସଭାପତି ଓ ସମ୍ପାଦକ ଦୁଇଜଣ ସଂସ୍ଥାକୁ ସମ୍ଭାଳୁଛନ୍ତି । ଜିଲ୍ଲା ସ୍ତରରେ କେହି ସହଯୋଗର ହାତ ବଢାଇବାକୁ ନାହାନ୍ତି । ତେଣୁ ଜୋନାଲ ସ୍ତରରେ ଏହା କିଭଳି କାର୍ଯ୍ୟକାରୀ ହେବ ବୋଲି ପ୍ରଶ୍ନ କରିଛନ୍ତି ସମ୍ପାଦକ ପ୍ରଫେସର ଆଶିଷ କୁମାର ମହାନ୍ତି ।
ବିଜ୍ଞାନ ଏକାଡେମୀ ଏବେ ପାଞ୍ଚ ଜଣ କର୍ମଚାରୀରେ ପାଞ୍ଚଟି ପ୍ରମୁଖ କାର୍ଯ୍ୟ କରୁଛି । ତିନୋଟି ବିଜ୍ଞାନ ପତ୍ରିକା ବିଜ୍ଞାନ ଦିଗନ୍ତ, ସାଇନ୍ସ ହୋରାଇଜନ ଓ ଭିଯୁଆଲି ହ୍ୟାଣ୍ଡିକପ ପାଇଁ ବ୍ରେଲି ପତ୍ରିକା ପ୍ରକାଶନ ଓ ବାଣ୍ଟିବା । ୧୬ଟି ବିଜ୍ଞାନ ସମ୍ବନ୍ଧୀୟ ପୁରସ୍କାର ଓ ସମ୍ମାନ ଦେବା ଭଳି ବିଭିନ୍ନ ଦାୟିତ୍ୱ ତୁଲାଉଛି । ତେଣୁ କର୍ମଚାରୀ ସଂଖ୍ୟା ନ ବଢିଲେ କାର୍ଯ୍ୟକ୍ରମ କରିବା ଅସମ୍ଭବ । ଯେଉଁଥି ପାଇଁ କିଛି ନୂଆ ବୈଜ୍ଞାନିକ ଆବଶ୍ୟକ ବୋଲି କୁହାଯାଇଛି । ସେପଟେ ଏହାକୁ ନେଇ ସରକାରଙ୍କ ଉପରେ ବର୍ଷିଛି ଓଡିଶା ଅଭିଭାବକ ମହାସଂଘ । ସରକାର ପ୍ରକୃତ ସ୍ଥିତି ଜାଣିବାକୁ ଅସମର୍ଥ ବୋଲି ଅଭିଯୋଗ ହୋଇଛି । ସେପଟେ ଗ୍ରାମାଞ୍ଚଳ ସ୍କୁଲରେ ପିଲାଙ୍କ ବିଜ୍ଞାନ ଆଇଡ଼ିଆ ନାହିଁ । ସେମାନଙ୍କ ଉପରେ ଫୋକସ ଦିଆଯାଉଛି । ଅଳ୍ପ କର୍ମଚାରୀରେ ଏହା କରିବା କଷ୍ଟ ବହୁତ । କିନ୍ତୁ କିଛି ତ କରିବାକୁ ପଡିବ ବୋଲି କହିଛନ୍ତି ସଭାପତି ।
ପୂର୍ବରୁ ଆଳୁ ସଙ୍କଟ ନେଇ ମନ୍ତବ୍ୟ, ଧାନରେ କଟନୀ ଛଟନୀ ଆଦି ମନ୍ତବ୍ୟ ପ୍ରସଙ୍ଗକୁ ନେଇ ବିବାଦକୁ ଆସିଥିବା ବିଜ୍ଞାନ ଓ ବୈଷୟିକ ତଥା ଖାଦ୍ୟ ଯୋଗାଣ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର ଏବେ ରାଜ୍ୟର ବିଜ୍ଞାନ ଶିକ୍ଷା ସମ୍ପର୍କିତ ମନ୍ତବ୍ୟକୁ ନେଇ ଚର୍ଚ୍ଚାକୁ ଆସିଛନ୍ତି ।
ଦିଲ୍ଲୀ ଷ୍ଟେସନ ଦଳାଚକଟା: ପ୍ରଶ୍ନ ଅନେକ… ଯାତ୍ରୀଙ୍କ ଜୀବନ ସହ ଖେଳ କାହିଁକି ?
ଭୁବନେଶ୍ବର: ମହାକୁମ୍ଭ ଆରମ୍ଭ ପରଠାରୁ ଅଘଟଣ ପରେ ଅଘଟଣ । ପ୍ରୟାଗରାଜରେ ଦଳାଚକଟା । ମହାକୁମ୍ଭରେ ଲାଗିଲା ନିଆଁ । ଆଉ ଏବେ ଦିଲ୍ଲୀରେ ଦଳାଚକଟା । ୧୮ ଜଣ ଶ୍ରଦ୍ଧାଳୁଙ୍କ ମୃତ୍ୟୁ ଘଟିଥିବା ବେଳେ ବହୁତ ଆହତ ହୋଇଛନ୍ତି । ହଜାର ହଜାର ସଂଖ୍ୟାରେ ଯାତ୍ରୀ ପ୍ରୟାଗରାଜ ଯିବାକୁ ଷ୍ଟେସନ ମୁହାଁ ହେଉଥିବା ବେଳେ ରେଳବାଇର ଖାମଖିଆଲି ମନୋଭାବକୁ ନେଇ ଉଠିଛି ପ୍ରଶ୍ନ । କେବଳ ରେଳ ବିଭାଗ ନୁହେଁ, ବିଜେପି ସରକାର ବି କାଠଗଡ଼ାରେ । ଦିଲ୍ଲୀ ଅଘଟଣକୁ ନେଇ ସାରା ରାଜ୍ୟରେ ରାଜନୀତି ଉଷ୍ମ ହୋଇଥିବା ବେଳେ ବିରୋଧୀଙ୍କ ଟାର୍ଗେଟରେ ରହିଛି ବିଜେପି ।
ଦିଲ୍ଲୀ ଦଳାଚକଟା ଅନେକ ପ୍ରଶ୍ନ ଛିଡ଼ା କରିଛି । ଧାର୍ମିକ ଭାବନାକୁ ନେଇ କାହିଁକି ଚାଲିଛି ଖେଳ ? ତଦନ୍ତ ନିର୍ଦ୍ଦେଶ ଓ କ୍ଷତିପୂରଣ ଘୋଷଣା କରିଦେଲେ ସରିଯାଉଛି କି ଦାୟିତ୍ବ ? ପ୍ରବଳ ଭିଡ଼ ହେବା ଜାଣି ବି ପରିଚାଳନାରେ ବିଫଳତା କାହିଁକି ? ଦେଶର ସର୍ବବୃହତ ଓ ସବୁଠାରୁ ବ୍ଯସ୍ତବହୁଳ ନୂଆଦିଲ୍ଲୀ ରେଳ ଷ୍ଟେସନରେ ଦଳାଚକଟାରେ ଶ୍ରଦ୍ଧାଳୁଙ୍କ ମୃତ୍ଯୁକୁ ନେଇ ଏମିତି ପ୍ରଶ୍ନ ଉଠିବାରେ ଲାଗିଛି । ଗତ ଜାନୁଆରୀ ୨୯ରେ ପ୍ରୟାଗରାଜ ଦଳାଚକଟାରେ ୩୦ ଜଣଙ୍କ ମୃତ୍ଯୁ ପରେ ଗତକାଲି ଦିଲ୍ଲୀ ରେଳ ଷ୍ଟେସନରେ ୧୮ ଜଣଙ୍କ ମୃତ୍ଯୁ ଘଟଣା ସମସ୍ତଙ୍କୁ କରିଛି ସ୍ତମ୍ଭୀଭୂତ କରିଦେଇଛି ।
ପ୍ରୟାଗରାଜ ଯିବାକୁ ଦିଲ୍ଲୀ ରେଳ ଷ୍ଟେସନରେ ପ୍ରବଳ ଗହଳି ରହୁଛି । ପ୍ରୟାଗରାଜ ପାଇଁ ଘଣ୍ଟାକୁ ହାରାହାରି ୧୫୦୦ ଟିକେଟ ବିକ୍ରି ହେଉଥିବା ଦର୍ଶାଉଛି, ଲୋକଙ୍କ ମଧ୍ୟରେ ମହାକୁମ୍ଭକୁ ନେଇ କେତେ ଉତ୍କଣ୍ଠା ରହିଛି । ହେଲେ ରେଳ ବିଭାଗ କେବଳ ଟିକେଟ୍ କାଟିବାରେ ବ୍ୟସ୍ତ ରହୁଥିବା ବେଳେ ଭିଡ଼ ସୁପରିଚାଳନା ପାଇଁ କୌଣସି ବ୍ୟବସ୍ଥା କରୁ ନଥିବା ହେଉଛି ଅଭିଯୋଗ । ସେପଟେ ପ୍ରବଳ ଗହଳି ସ୍ବତ୍ତ୍ବେ ଫୁଟ ଓଭରବ୍ରିଜରେ କୌଣସି ନିୟନ୍ତ୍ରଣ ବ୍ଯବସ୍ଥା ନରହିବା ପରିଚାଳନାଗତ ଅପାରଗତାକୁ ଦର୍ଶାଉଛି । ସବୁଠାରୁ ବଡ଼ ପ୍ରଶ୍ନ ହେଉଛି ସମାନ ନାଁରେ ଦୁଇଟି ଟ୍ରେନ୍ ଗୋଟିଏ ସମୟରେ କିପରି ଆସିଲା । ପ୍ରୟାଗରାଜକୁ ଟ୍ରେନ୍ ସଂଖ୍ୟା ସୀମିତ ଥିଲେ ବି ଘଣ୍ଟାକୁ ୧୫୦୦ ହାରରେ ରେଳବାଇ ଟିକେଟ୍ ବିକ୍ରି କରିବା ଦର୍ଶଉଛି, ରେଳ ବିଭାଗ କେବଳ ନିଜ ପୁଣା ଭରିବାରେ ବ୍ୟସ୍ତ ରହୁଛି, ଯାତ୍ରୀଙ୍କ ସୁରକ୍ଷା ପ୍ରତି ବୁଜି ଦେଇଛି ଆଖି । ଯଦି ରେଳ ବିଭାଗ ଯାତ୍ରୀଙ୍କ ସୁରକ୍ଷା କଥା ଚିନ୍ତା କରୁଥାନ୍ତି ଘଣ୍ଟାକୁ ଯେମିତି ୧୫୦୦ ଟିକେଟ ବିକ୍ରି କରୁଥିଲା, ସେହି ହିସାବରେ ଟ୍ରେନତ ସଂଖ୍ୟା ବି ବଢ଼ାଇ ପାରିଥାନ୍ତି । ହେଲେ, ବିଭାଗ ପକ୍ଷରୁ ଏମିତି କିଛି କରାଯାଇ ନଥିଲା ।
କୁହାଯାଉଛି ସ୍ବତନ୍ତ୍ରତା ସେନାନୀ ଏକ୍ସପ୍ରେସ ଓ ଭୁବନେଶ୍ବର ରାଜଧାନୀ ଏକ୍ସପ୍ରେସ ବିଳମ୍ବ ଥିବାରୁ ଏହି ୨ ଟ୍ରେନର ଯାତ୍ରୀ ପ୍ଲାଟଫର୍ମ ନଂ ୧୨, ୧୩ ଓ ୧୪ରେ ଥିଲେ । ସେପଟେ ପ୍ରୟାଗରାଜ ଏକ୍ସପ୍ରେସ ନାମରେ ୨ଟି ଟ୍ରେନ ଏକା ସାଙ୍ଗରେ ଷ୍ଟେସନକୁ ଆସିଯାଇଥିଲା । ଏହାପରେ ନିଜ ନିଜ ଟ୍ରେନ୍ ଧରିବାକୁ ଯାତ୍ରୀଙ୍କ ମଧ୍ୟରେ ଆରମ୍ଭ ହୋଇଥିଲା ଧାଁ ଦୌଡ଼ । ଆଉ ଏଇଠୁ ଆରମ୍ଭ ହୋଇଗଲା ଦଳାଚକଟା ।
ଘଟଣାର ତଦନ୍ତ ଲାଗି ୨ ଜଣିଆ ଟିମ୍ ଗଠିତ ହୋଇଛି । ମୃତକଙ୍କ ପରିବାରକୁ ୧୦ ଲକ୍ଷ ଓ ଆହତଙ୍କୁ ଅଢେଇ ଲକ୍ଷ ଲେଖାଏଁ ଟଙ୍କାର ସହାୟତା ଘୋଷଣା କରାଯାଇଛି । ବାରମ୍ବାର ଅଘଟଣ ଘଟୁଥିବା ବେଳେ ସରକାର ମୃତାହତଙ୍କ ପାଇଁ କ୍ଷତିପୂରଣ ଘୋଷଣା କରି ଦେଇ ନିଜ କାମ ସରିଗଲା ବୋଲି ଭାବୁଛନ୍ତି । ଲୋକଙ୍କ ଜୀବନର ସୁରକ୍ଷା ପ୍ରତି କ’ଣ ସରକାର ଉତ୍ତରଦାୟୀ ନୁହଁନ୍ତି ବୋଲି ପ୍ରଶ୍ନ ଉଠିବାରେ ଲାଗିଛି ।
ସେପଟେ ଦଳାଚକଟା ଘଟଣାକୁ ନେଇ ବଢିଛି ରାଜନୀତି । ବିଜେପି ଉପରେ ବର୍ଷିଛନ୍ତି ବିରୋଧୀ । ବିରୋଧୀ ଦଳ ନେତା ରାହୁଲ ଗାନ୍ଧୀ, ଏଆଇିସସି ସଭାପତି ମଲ୍ଲିକାର୍ଜୁନ ଖଡଗେ, ସମାଜବାଦୀ ପାର୍ଟି ନେତା ଅଖିଳେଶ ଯାଦବ, ଆପ ନେତା ଅରବିନ୍ଦ କେଜ୍ରିଓ୍ବାଲ, ଦିଲ୍ଲୀର ପୂର୍ବତନ ମୁଖ୍ଯମନ୍ତ୍ରୀ ଆତିଶୀ, କଂଗ୍ରେସ ନେତା ଭୂପେଶ ବଘେଲ ପ୍ରମୁଖ ବିଜେପିକୁ ଟାର୍ଗେଟ କରିଛନ୍ତି । ଶ୍ରଦ୍ଧାଳୁଙ୍କ ଜୀବନ ପ୍ରତି ସରକାର ଗୁରୁତ୍ବ ଦେଉ ନଥିବା ବିରୋଧୀ ଅଭିଯୋଗ କରିଛନ୍ତି । ସେପଟେ ଉତ୍ତର ପ୍ରଦେଶରେ ରେଳବାଇ ପକ୍ଷରୁ ହାଇଆଲର୍ଟ ଜାରି କରାଯାଇଛି ।
ସୂଚନାଯୋଗ୍ୟ, ଗତକାଲି ରାତିରେ ଦଳାଚକଟାରେ ୧୮ ଜଣଙ୍କ ଜୀବନ ଚାଲି ଯାଇଥିଲେ ବି ନା ରେଳ ବିଭାଗ, ନା ସରକାର କିଛି ଶିକ୍ଷା ଲାଭ କରିବା ଭଳି ମନେ ହେଉନାହିଁ । ଆଜି ପୁଣି ନୂଆଦିଲ୍ଲୀ ରେଳ ଷ୍ଟେସନରେ ଦଳାଚକଟା ଘଟିବା ଘଟଣା ସାମ୍ନାକୁ ଆସିଛି । ଷ୍ଟେସନର ୮ ନମ୍ବର ପ୍ଲାଟଫର୍ମରେ ଦଳାଚକଟା ସ୍ଥିତି ଉପୁଜି ଥିବା ଜଣାପଡିଛି ।
ପୁରୀରେ IPL ଟ୍ରଫି: ମହାପ୍ରଭୁଙ୍କ ନିକଟରେ ହେଲା ପୂଜାର୍ଚ୍ଚନା
ପୁରୀ: ଆସନ୍ତା ୨୧ ତାରିଖରୁ ଆରମ୍ଭ ହେବ IPL ମ୍ୟାଚ୍ । ଯାହାକୁ ନେଇ ସାରା ବିଶ୍ବରେ କ୍ରିକେଟ୍ ପ୍ରେମୀଙ୍କ ମଧ୍ୟରେ ଉତ୍ସାହ । ଚଳିତ ସିଜିନରେ କିଏ ହାତେଇବ ଟ୍ରଫି ତାକୁ ନେଇ କଳ୍ପନାଜଳ୍ପନା ଆରମ୍ଭ ହୋଇଗଲାଣି । ଏହାରି ଭିତରେ ପୁରୀରେ ପହଞ୍ଚିଛି IPL ଟ୍ରଫି ।
ଆଜି ପୁରୀ ଆସିଛି IPL ଟ୍ରଫି । କୋଲକତା ନାଇଟ ରାଇଡର୍ସ ଫ୍ରାଞ୍ଚାଇଜ୍ ସଦସ୍ୟ ଟ୍ରଫିକୁ ନେଇ ଆଜି ପୁରୀରେ ପହଞ୍ଚି ଥିଲେ । ଏହାପରେ ଶ୍ରୀମନ୍ଦିର ନିଆଯାଇ ମହାପ୍ରଭୁଙ୍କ ପାଖରେ ଟ୍ରଫଇ ପୂଜା କରାଯାଇଛି । ଟ୍ରଫିକୁ ଦେଖିବା ପାଇଁ ବଡ଼ଦାଣ୍ଡରେ ପ୍ରବଳ ଜନସମାଗମ ହୋଇଥିଲା । ଗତବର୍ଷ କୋଲକାତା ନାଇଟ ରାଇଡର୍ସ ଆଇପିଏଲ୍ ଟ୍ରଫି ହାତେଇଥିବା ବେଳେ ଚଳିତ ଥର ମଧ୍ୟ ଟ୍ରଫି ହାତେଇବ ବୋଲି ପ୍ରାର୍ଥନା କରିଛନ୍ତି ।
ନୂତନ ସିଜିନ୍ ପୂର୍ବରୁ, ଏହି ଟୁରରେ ୯ଟି ସହରରେ ପ୍ରତିଷ୍ଠିତ TATA IPL ଟ୍ରଫି ଯାତ୍ରା କରିବ । ଗୌହାଟୀ, ଭୁବନେଶ୍ୱର, ଜାମସେଦପୁର, ରାଞ୍ଚି, ଗ୍ୟାଙ୍ଗଟକ୍, ସିଲିଗୁଡ଼ି, ପାଟନ, ଦୁର୍ଗାପୁର ଓ କୋଲକାତା ସମେତ ବିଭିନ୍ନ ଅଞ୍ଚଳକୁ ଯାତ୍ରା କରିବ ଟ୍ରଫି ।