ନନ୍ଦିଘୋଷ ବ୍ୟୁରୋ: ଜାଗର ଜାଳିବାକୁ ଯାଇଥିବା ବେଳେ ତାଲାଭାଙ୍ଗି ଘରେ କଳାକନା ବୁଲାଇଲେ ଦୁର୍ବୃତ୍ତ । ନୀଳଗିରି ଥାନା ସାନପାଟପୁର ଗାଁର ସୁବାସ ଦଳେଇଙ୍କ ଘରୁ ସୁନା, ରୁପା, ଟଙ୍କା ଓ ଦରକାରୀ କାଗଜ ପତ୍ର ଲୁଟିନେଇଛନ୍ତି ଦୁର୍ବୃତ୍ତ । ବୁଧବାର ମହାଶିବରାତ୍ରିରେ ପରିବାର ଲୋକେ ନିକଟ ପଶ୍ଚିମେଶ୍ୱର ମହାଦେମନ୍ଦିରକୁ ଦୀପ ଜାଳିବାକୁ ଯାଇଥିଲେ । ଆଜି ସକାଳୁ ଘରକୁ ଫେରି ଘରର ମୁଖ୍ୟକବାଟ ତାଲା ଭଙ୍ଗାଯାଇଥିବା ବେଳେ ଘର ଭିତରେ ଆଲମୀରା ତଡ଼ାଯାଇଥିବା ଦେଖିବାକୁ ପାଇଥିଲେ । ସୁବାସ ଦଳେଇ ଜଣେ ଗରିବ ଶ୍ରେଣୀର ହୋଇଥିବାରୁ ତାଙ୍କୁ ନ୍ୟାୟ ଦେଇ ଦୁର୍ବୃତ୍ତଙ୍କୁ ଧରି ଦୃଢ଼ କାର୍ଯ୍ୟାନୁଷ୍ଠାନ ନେବାସହ ଅଞ୍ଚଳରେ ପୋଲିସ ପାଟ୍ରୋଲିଂକୁ କଡ଼ାକଡ଼ି କରିବାକୁ ଦାବି ହେଉଛି।
ମହାକାଳପଡା ବ୍ଲକର ରାଜଗଡ ଅଞ୍ଚଳରେ ଧାନ କିଣାରେ ଅନିୟମିତା
ନନ୍ଦିଘୋଷ ବ୍ୟୁରୋ: ସରକାର କହୁଛନ୍ତି ଚାଷୀନଙ୍କ ଠାରୁ ମଣ୍ଡି ମାଧ୍ୟମରେ ଧାନ ସଂଗ୍ରହ କରାଯାଉଛି। କିନ୍ତୁ ବାସ୍ତବ ଚିତ୍ର ପୂରା ଅଲଗା। ଅସଲରେ କିପରି ଧାନ ସଂଗ୍ରହ ହେଉଛି, ତାର ଅସଲ ଚିତ୍ର ଦେଖିବାକୁ ମିଳିଛି କେନ୍ଦ୍ରାପଡ଼ା ଜିଲ୍ଲା ମହାକାଳପଡା ବ୍ଲକର ରାଜଗଡ ଅଞ୍ଚଳରେ। ଅଳାଇଲୋ ସେବା ସମବାୟ ସମିତି ରାଜଗଡ଼ର ସମ୍ପାଦକ ଥରେ ମଣ୍ଡି ଖୋଲିଥିଲେ । ହେଲେ ପରେ ଚାଷୀଙ୍କୁ ସିଧାସଳଖ ମିଲକୁ ଧାନ ନେବା ପାଇଁ କହୁଛନ୍ତି ବୋଲି ଚାଷୀ ଅଭିଯୋଗ କରିଛନ୍ତି । ସମ୍ପାଦକ ଯାହାକୁ ଚାହିଁବେ ତାର ଧାନ ଉଠୁଛି ଏବଂ ଯାହାକୁ ନ ଚାହିଁବେ ତାର ଧାନ ଉଠିବ ନାହିଁ । ଯାହାର ଜମି ନାହିଁ ସେ ଟୋକନ ପାଇଛନ୍ତି। ସମ୍ପାଦକଙ୍କ କଥାରେ ଟ୍ରାକ୍ଟରରେ ୩୫ କୁଇଣ୍ଟାଲ ଧାନ ନେଇ ମିଲକୁ ଯାଇଥିଲ ଜଣେ ଚାଷୀ। କିନ୍ତୁ ୮ ଦିନ ବିତିଥିଲେ ମଧ୍ଯ ଧାନ ମିଲକୁ ଧାନ ଯାଇ ପାରିଲାନାହିଁ। ଯାହାକୁ ନେଇ ଚାଷୀ ଧାନ ଲଦାଯାଇଥିବା ଟ୍ରାକ୍ଟରକୁ ନେଇ ଅଳାଇଲୋ ସେବା ସମବାୟ ସମିତି ରାଜଗଡ଼ କାର୍ଯ୍ଯାଳୟ ଆଗରେ ପ୍ରତିବାଦ କରିଛନ୍ତି।
ଆସାମର ମୋରିଗାଓଁରେ ଶକ୍ତିଶାଳୀ ଭୂମିକମ୍ପ
ନନ୍ଦିଘୋଷ ବ୍ୟୁରୋ: ଗତ ବିଳମ୍ଵିତ ରାତିରେ ଆସାମର ମୋରିଗାଓଁରେ ଶକ୍ତିଶାଳୀ ଭୂମିକମ୍ପ ଝଟକା ଅନୁଭୂତ ହୋଇଛି। ନ୍ୟାସନାଲ ସେଣ୍ଟର ଫର୍ ସିସମୋଲୋଜି ଅନୁସାରେ, ଆସାମର ମୋରିଗାଓଁରେ ରିକ୍ଟର ସ୍କେଲରେ ୫ ଦଶମିକ ୦ ତୀବ୍ରତା ସହିତ ପୃଥିବୀ ଥରିଥିଲା। ଜାତୀୟ ଭୂକମ୍ପ ବିଜ୍ଞାନ କେନ୍ଦ୍ର ଅନୁଯାୟୀ, ଗୁରୁବାର ସକାଳେ, ଗୁରୁବାର ବିଳମ୍ଵିତ ରାତି ୨ଟା ୨୫ ମିନିଟରେ ଭୂମିକମ୍ପ ହୋଇଥିଲା । ଗଭୀରତା ଥିଲା ୧୬ କିଲୋମିଟର। ମୋରିଗାଁଓ ସହିତ, ଗୁଆହାଟୀ, ଶିଲଂ ଏବଂ ଆସାମର ଅନ୍ୟାନ୍ୟ ସ୍ଥାନରେ ମଧ୍ୟ ଭୂକମ୍ପର ଝଟକା ଅନୁଭୂତ ହୋଇଥିଲା। ଅଞ୍ଚଳରେ ଭୂମିକମ୍ପର ଝଟକା ଅନୁଭବ କରିବା ପରେ ଲୋକମାନେ ଭୟଭୀତ ହୋଇ ଘରୁ ବାହାରକୁ ବାହାରି ଆସିଯାଇଥିଲେ । ପର୍ଯ୍ୟନ୍ତ କୌଣସି ପ୍ରକାରର କ୍ଷତି ସମ୍ପର୍କରେ ସୂଚନା ମିଳିପାରିନାହିଁ।
ସୂଚନା ଫଳକକୁ ନେଇ ଆଇନ ମନ୍ତ୍ରୀଙ୍କ ଗାଁରେ ବିଜେଡି-ବିଜେପି ମୁହାଁମୁହିଁ
ନନ୍ଦିଘୋଷ ବ୍ୟୁରୋ: ସୂଚନା ଫଳକକୁ ନେଇ ଆଇନ ମନ୍ତ୍ରୀଙ୍କ ଗାଁରେ ବିଜେଡି-ବିଜେପି ମୁହିଁମୁହିଁ । ଏକ ସହାୟକ ସୂଚନା ଫଳକ ବୋର୍ଡକୁ କାଢ଼ିଦେବା ନେଇ ଖୋର୍ଦ୍ଧା ବାଣପୁର ଗମ୍ଭାରୀମୁଣ୍ଡା ପଞ୍ଚାୟତର ଗୋଡିଝର ଗାଁରେ ଦେଖାଦେଇଛି ବିଜେଡି ଓ ବିଜେପି କର୍ମୀଙ୍କ ମଧ୍ୟରେ ବିବାଦ । ଗୋଡିଝରର ଏହି ମନ୍ଦିରଟି ଦୀର୍ଘ ବର୍ଷ ଧରି ଉନ୍ନତି ହୋଇ ପାରିନଥିଲା । ମନ୍ଦିରର ଉନ୍ନତି ନେଇ କିଛି ବିଜେଡି କର୍ମୀ ପୂର୍ବତନ ସରକାରଙ୍କ ସମୟରେ ଆର୍ଥିକ ସହାୟତା ନିମନ୍ତେ ଦରଖାସ୍ତ କରିବା ପରେ ବାଲୁଙ୍କେଶ୍ୱର ଦେବଙ୍କ ମନ୍ଦିର ମରାମତି, ନବୀକରଣ ଓ ରୂପାନ୍ତରୀକରଣ ନିମନ୍ତେ ୪ଲକ୍ଷ ଟଙ୍କା ମଂଜୁର କରିଥଲେ । ଯାହାର ଏକ ଏକ ସୂଚନା ଫଳକ ମନ୍ଦିର ପରିସରରେ ଲଗାଯାଇଥିଲା । ସେଥିରେ ପୂର୍ବତନ ମୁଖ୍ୟମନ୍ତ୍ରୀଙ୍କ ଫଟୋ ମଧ୍ୟ ରହିଥଲା । HAT ମନ୍ଦିର ବେଢାରୁ ସେହି ସହାୟକ ସୂଚନା ଫଳକଟିକୁ କିଛି ବିଜେପି କର୍ମୀ କାଢିନେଇ ଯାଇଥିବା ବେଳେ ଏହାକୁ ନେଇ ବିଜେଡି ଓ ବିଜେପି କର୍ମୀଙ୍କ ମଧରେ ଉତ୍ତେଜନା ସୃଷ୍ଟି ହୋଇଥିଲା । ପରେ ବିଜେଡି କର୍ମୀମାନେ ଏହାକୁ ପୁଣି ଆଣି ଲଗାଇଥିଲେ । ତଥାପି ଉତ୍ତେଜନା ପ୍ରଶମିତ ନହେବାରୁ ଶେଷରେ ପୋଲିସ ଉପସ୍ଥିତିରେ ବାଣପୁର ବ୍ଳକ ପ୍ରଶାସନ ଆଜି ଅପରାହ୍ନରେ ସେହି ସୂଚନା ବୋର୍ଡଟିକୁ କାଢିନେଇଛି ।
ଓଡ଼ିଶାର ହକ ପାଇଁ କାଲିଠୁ କ୍ରିୟାନୁଷ୍ଠାନ କମିଟିର ଲଢେଇ : ସମର୍ଥନ କରିବ ବିଜେଡି
ନନ୍ଦିଘୋଷ ବ୍ୟୁରୋ: ଓଡ଼ିଶାର ହକ ପାଇଁ କାଲିଠୁ କ୍ରିୟାନୁଷ୍ଠାନ କମିଟିର ଲଢେଇ । ସମର୍ଥନ କରିବ ବିଜେଡି। ପୋଲାଭରମ ପ୍ରକଳ୍ପରେ ଆନ୍ଧ୍ରକୁ ଅହେତୁକ ଅନୁକମ୍ପା ଦେଖାଇ ଓଡିଶାକୁ ଉପେକ୍ଷିତ କରୁଛନ୍ତି ଡବଲ ଇଞିନ ସରକାର । କେନ୍ଦ୍ରର ଏକ ପାଖିଆ ନିଷ୍ପତ୍ତିରେ ମାଲକାନଗିରି ଜିଲ୍ଲା ବୁଡ଼ିବା ସହ ଓଡ଼ିଶାର ବ୍ଯାପକ କ୍ଷତି କରିବ । ଏହା ବିରୋଧରେ କାଲି ପୋଲାଭରମ ପ୍ରତିବାଦ କ୍ରିୟାନୁଷ୍ଠାନ କମିଟି ଆନ୍ଦୋଳନ କରିବ। ଏହାକୁ ବିଜେଡି ସମର୍ଥନ କରୁଥିବା ବେଳେ ପୋଲାଭରମ ହକ ନପାଇବା ଯାଏ ବିଜେଡି ଲଢେଇ ଜାରି ରଖିବ ବୋଲି କହିଛି । ପୋଲାଭରମ ନେଇ ଦଳ ଦିଲ୍ଲୀରୁ ପଲ୍ଲୀ ଯାଏ ଲଢ଼େଇ କରୁଛି । ଯେଉଁ ସଙ୍ଗଠନ ଏହି ଲଢ଼େଇରେ ସାମିଲ ହେବେ ଦଳ ତାହାକୁ ସମର୍ଥନ ଦେବ । ବିରୋଧୀ ଦଳ ନେତା ନବୀନ ପଟ୍ଟନାୟକ ସବୁବେଳେ ରାଜ୍ୟ ସ୍ବାର୍ଥକୁ ଗୁରୁତ୍ଵ ଦେଇ କାମ କରୁଛନ୍ତି ବୋଲି ବିଜେଡି କହିଛି । ପଡୋଶୀକୁ ଖୁସି ପାଇଁ ଓଡ଼ିଶାକୁ ଦୁଃଖ ଦେଉଛି ଡବଲ ଇଂଜନ ସରକାର । ପୋଲାଭରମ ପ୍ରକଳ୍ପ କାମକୁ ନିର୍ଦ୍ଦିଷ୍ଟ ସମୟସୀମା ମଧ୍ୟରେ ଶେଷ କରିବାକୁ ଆନ୍ଧ୍ର ସରକାରଙ୍କୁ ସ୍ବତନ୍ତ୍ର ଅନୁଦାନ ଦେଇଛି ଡବଲ ଇଞ୍ଜିନ ସରକାର । ପ୍ରକଳ୍ପ କାର୍ଯ୍ୟକାରୀ ହେଲେ ଓଡିଶା ମାନଚିତ୍ରରୁ ହଜିଯିବ ମାଲକନଗିରି ଜିଲ୍ଲାର କାଲିମେଳା ଓ ପଡିଆ ବ୍ଲକର ବହୁ ଗ୍ରାମ । ଆନ୍ଧ୍ରପ୍ରଦେଶକୁ ରାଜନୈତିକ ସ୍ବାର୍ଥ ପାଇଁ କେନ୍ଦ୍ର ସରକାର ଅହେତୁକ ଅନୁକମ୍ପା ଦେଖାଉଥିବା ଅଭିଯୋଗ ହୋଇଛି ।
ମଉଳିଲା ଇଂଲଣ୍ଡର ଆଶା, ଆଫଗାନିସ୍ତାନର ବଡ଼ ବିଜୟ
ନନ୍ଦିଘୋଷ ବ୍ୟୁରୋ: ICC ଚାମ୍ପିଅନ୍ସ ଟ୍ରଫି 2025 ରେ ଇଲଣ୍ଡର ବଡ଼ ବିପର୍ଯ୍ୟୟ । ଇଂଲଣ୍ଡ ଭଳି ବିଶ୍ୱ ଚାମ୍ପିଅନ ଦଳକୁ ପରାସ୍ତ କରିଛି ଦୁର୍ବଳ ବିବେଚିତ ଆଫଗାନିସ୍ତାନ ଦଳ । ହସମତୁଲ୍ଲା ଶାହିଦିଙ୍କ ଅଧିନାୟକତ୍ୱରେ ଆଫଗାନିସ୍ତାନ ଦଳ ଇଂଲଣ୍ଡକୁ ୮ ରନରେ ପରାସ୍ତ କରିଛଇ । ଏହି ପରାଜୟ ସହିତ, ଜସ୍ ବଟଲରଙ୍କ ଅଧିନାୟକତ୍ୱରେ ଇଂଲଣ୍ଡ ଦଳ ଟୁର୍ଣ୍ଣାମେଣ୍ଟରୁ ବାହାର ହୋଇଯାଇଛି। ଏବେ ଆଫଗାନିସ୍ତାନ ଦଳ ସେମିଫାଇନାଲ ଦୌଡ଼ରେ ରହିଛି । ପରବର୍ତ୍ତୀ ମ୍ୟାଚ୍ ଅଷ୍ଟ୍ରେଲିଆ ବିପକ୍ଷରେ ଖେଳିବ ଆଫଗାନିସ୍ଥାନ । ଯଦି ଆଫଗାନିସ୍ତାନ ଦଳକୁ ସେମିଫାଇନାଲରେ ପ୍ରବେଶ କରିବାକୁ ପଡ଼େ, ତେବେ ତାକୁ ଯେକୌଣସି ମୂଲ୍ୟରେ କଙ୍ଗାରୁ ଦଳକୁ ପରାସ୍ତ କରିବାକୁ ପଡ଼ିବ। ଆଫଗାନିସ୍ତାନ ଏବଂ ଅଷ୍ଟ୍ରେଲିଆ ମଧ୍ୟରେ କାଲି ଲାହୋରରେ ଅନୁଷ୍ଠିତ ହେବ ମ୍ୟାଚ।
ଲିଙ୍ଗରାଜ ମନ୍ଦିରରେ ଉଠିଲା ମହାଦୀପ
ଭୁବନେଶ୍ୱର: ବାବା ଲିଙ୍ଗରାଜଙ୍କ ମନ୍ଦିରରେ ଉଠିଲା ମହାଦୀପ। ନିର୍ଦ୍ଧାରିତ ସମୟ ଠାରୁ ସାମାନ୍ୟ ବିଳମ୍ବ ପରେ ଉଠିଲା ମହାଦୀପ। ବେଢା ପରିକ୍ରମା ପରେ ରାତି ୧୦ଟା ୪୦ରେ ନମନ୍ଦିର ଉପରକୁ ମହାଦୀପ ଉଠିଲା । ହର ହର ମହାଦେବ ଧ୍ୱନୀରେ କମ୍ପିଲା ଲିଙ୍ଗରାଜ ମନ୍ଦିର ପରିସର । ମହାଦୀପ ଦର୍ଶନ କଲେ ଶ୍ରଦ୍ଧାଳୁ ।
ମହାଦୀପକୁ ଦର୍ଶନ କରିଛନ୍ତି ହଜାର ହଜାର ଶ୍ରଦ୍ଧାଳୁ। ମହାଦୀପକୁ ଦର୍ଶନ କରି ବ୍ରତ ପୂରଣ କରିଛନ୍ତି ଶ୍ରଦ୍ଧାଳୁ। ଜାଗର ପାଇଁ ଉତ୍ସବମୁଖର ହୋଇ ଉଠିଥିଲା ଭୁବନେଶ୍ବର ଏକାମ୍ରକ୍ଷେତ୍ର ।
ମହାଦୀପ ଉଠାଉଥିବା ବେଳେ ଖସିପଡିଲେ ସେବାୟତ
ଭୁବନେଶ୍ୱର: ଲିଙ୍ଗରାଜ ମନ୍ଦିରରେ ଅଘଟଣ। ମହାଦୀପ ଉଠୁଥିବା ବେଳେ ମନ୍ଦିରରେ ଅଘଟଣ । ମହାଦୀପ ନେଇ ମନ୍ଦିର ଉପରକୁ ଉଠୁଥିବା ବେଳେ ଖସିପଡିଲେ ସେବାୟତ ।ଅନ୍ୟ ଜଣେ ସେବାୟତ ମହାଦୀପକୁ ନେଇ ମନ୍ଦିର ଚୂଡ଼ାକୁ ଗଲେ । ଅଘଟଣକୁ ନେଇ ସେବାୟତଙ୍କ ମଧ୍ୟରେ ଅସନ୍ତୋଷ । ଗୁରୁତର ଅବସ୍ଥାରେ ସେବାୟତଙ୍କୁ ମେଡିକାଲରେ ଭର୍ତ୍ତି କରାଯାଇଛି ।
ଆସନ୍ତା ଶିକ୍ଷାବର୍ଷରୁ CBSE ଦଶମରେ ଦୁଇଟି ବୋର୍ଡ ପରୀକ୍ଷା ନେଇ ବଢିଲା ଦ୍ଵନ୍ଦ୍ଵ
ଭୁବନେଶ୍ୱର: ୨୦୨୫-୨୬ ଶିକ୍ଷା ବର୍ଷରୁ CBSE ବର୍ଷକୁ ୨ଟି ଦଶମ ବୋର୍ଡ ପରୀକ୍ଷା କରିବାକୁ ଯାଉଛି। ପ୍ରଥମ ପରୀକ୍ଷା ଫେବୃଆରୀ ଓ ଦ୍ଵିତୀୟ ମେ’ ମାସରେ ହେବ। ଯିଏ ଅଧିକ ଭଲ କରିବାକୁ ଚାହୁଁଥିବେ ସେମାନେ ପ୍ରଥମ ସହ ଦ୍ଵିତୀୟ ପରୀକ୍ଷା ବି ଦେଇପାଇବେ। ହେଲେ ପ୍ରଥମ ପରୀକ୍ଷା ବାଧ୍ୟତାମୂଳକ। ମତାମତ ମାର୍ଚ୍ଚ ୯ସୁଦ୍ଧା ଦେବାକୁ ଅଭିଭାବକ, ଶିକ୍ଷାବିତଙ୍କ ସହ ଅନେକ ଅଂଶୀଦାରଙ୍କ ପାଇଁ ସିବିଏସଇ ୱେବସାଇଟରେ ବ୍ୟବସ୍ଥା କରାଯାଇଛି। ହେଲେ ମତାମତ ଆସିବା ପର୍ବରୁ ହିଁ ଦ୍ବନ୍ଦ୍ବ ଓ ଅସନ୍ତୋଷ ଦେଖା ଦେଲାଣି। ଗୋଟିଏ ପଟେ ଛାତ୍ରଛାତ୍ରୀ ଦୁଇଟି ପରୀକ୍ଷାକୁ ନେଇ ଖୁସି ଅନୁଭବ କରୁଛନ୍ତି। ହେଲେ ଦୁଇଟି ପରୀକ୍ଷାର ଚାପ ବି ମନରେ ରହିଛି। ଏକାଦଶ ପାଠପଢା ସହ କ୍ରାସ୍ କୋର୍ସ ପ୍ରସ୍ତୁତିରେ ଅସୁବିଧା ଆଶଙ୍କା ରହିଛି। କାରଣ ଦ୍ବିତୀୟ ପରୀକ୍ଷା ଯେଉଁ ସମୟରେ ଦେବେ, ସେହି ସମୟରେ JEE, ମେଡିକାଲ ପରି ପାଠ୍ୟକ୍ରମର ଅଗ୍ରୀମ କୋଚିଂ ଆରମ୍ଭ କରିଥାନ୍ତି। ଡବଲ ବୋର୍ଡ ପରୀକ୍ଷାରେ ଭିତ୍ତିଭୂମି ମଧ୍ୟ ଏକ ପ୍ରମୁଖ ଦିଗ ବହନ କରିବ। ପ୍ରଥମ ବୋର୍ଡ ପରୀକ୍ଷା ସହ ଅନ୍ୟ କ୍ଲାସ ପ୍ରମୋସନ ପରୀକ୍ଷାର ଖାତା ଦେଖାରେ ଶିକ୍ଷକ ବ୍ୟସ୍ତ ଥିବେ। ପୁଣି ଦ୍ବିତୀୟ ପରୀକ୍ଷାର ଖାତା ଦେଖା ସମୟରେ ଏକାଦଶ ପାଠପଢା ପ୍ରଭାବିତ ହୋଇପାରେ। ଅଡୁଆ ସେତେବେଳେ ବଢିବ, ଯେବେ ଆଇସିଏସଇ ଓ ଷ୍ଟେଟ ବୋର୍ଡ ଗୁଡ଼ିକରୁ ନିଷ୍ପତ୍ତି ମଗାଯିବ। ସେମାନେ ପିଲାମାନଙ୍କୁ ଡବଲ ପରୀକ୍ଷାର ଆଉ ଏକ ସୁଯୋଗ ଦେବେ ତ? ନା ସିବିଏସଇକୁ ଆଗରେ ରଖି କେନ୍ଦ୍ର ଶିକ୍ଷା ବିଭାଗ ନିଷ୍ପତ୍ତି ନେବ? ବେଷ୍ଟ ଅଫ୍ ଓ୍ବାନର ରେଜଲ୍ଟ ପ୍ରକାଶ ପାଇବ ନା ପରୀକ୍ଷାକୁ ସପ୍ଲିମେଣ୍ଟାରୀ ଢାଞ୍ଚାରେ ବିବେଚନା କରାଯିବ? ଏତେ ସବୁ ପ୍ରଶ୍ନ ଭିତରେ ଏବେ ଘାଣ୍ଟି ହେଉଛି ସିବିଏସଇର ନୂଆ ନିୟମ ।
ସେପଟେ କେନ୍ଦ୍ରକୁ ତୀବ୍ର ଭର୍ସନା କରିଛନ୍ତି ଅଭିଭାବକ ଓ ଶିକ୍ଷାବିତ। ସରକାର ଦୁଇ ପ୍ରକାର କଥା କହି ପାରିବେନି। ପ୍ରଥମେ ଜାତୀୟ ଶିକ୍ଷା ନୀତି ୨୦୨୦ ରେ କହିଲେ ବୋର୍ଡ ପରୀକ୍ଷା ଦ୍ବାଦଶ ଶ୍ରେଣୀରେ ହେବ। ଏବେ ଦଶମରେ ଦୁଇଟି ବୋର୍ଡ ପରୀକ୍ଷାର ଅର୍ଥ କଣ ବୋଲି ଓଡ଼ିଶା ଅଭିଭାବକ ମହାସଂଘ ପ୍ରଶ୍ନ କରିଛି। ସେହିପରି ଶିକ୍ଷାବିତମାନେ ସିବିଏସଇ ଓ କେନ୍ଦ୍ର ସରକାରଙ୍କ ବ୍ୟବସାୟିକ ଦିଗ ଆଡ଼କୁ ଇସାରା କରିଛନ୍ତି। ଯେତେ ଥର ପରୀକ୍ଷା ହେବ, ସେତେ ଥର ଫର୍ମ ଫିଲ ଅପ୍ ହେବ। ବାରମ୍ବାର ଫର୍ମ ଫିଲ ଉପରେ ଟଙ୍କା ଖର୍ଚ୍ଚ ହେବ। ସରକାରଙ୍କ ଏହା ଏକ ବ୍ୟୟ ବହୁଳ ନିଷ୍ପତ୍ତି ବୋଲି ଶିକ୍ଷାବିତ ମହଲରେ ଅଭିଯୋଗ ହୋଇଛି।
ଜାତୀୟ ଶିକ୍ଷା ନୀତି ୨୦୨୦ ଆଧାରରେ ଆଞ୍ଚଳିକ ଭାଷାରେ ପରୀକ୍ଷା ଦେବାର ନିୟମ ରହିଛି। ହେଲେ ଉର୍ଦ୍ଦୁ, ବଙ୍ଗଳା, ତାମିଲ, ତେଲଗୁ, ଗୁଜୁରାଟି ଓ ମଣିପୁରୀ ପରି ଆଞ୍ଚଳିକ ଭାଷାରେ ପରୀକ୍ଷା ଦେବାକୁ ସିବିଏସଇ ଚିଠା ଯୋଜନାରେ ସ୍ଥାନ ମିଳିଥିବାବେଳେ ଓଡ଼ିଆକୁ ଏଥିରୁ ବାଦ୍ ଦିଆଯାଇଥିଲା। ହେଲେ ବିଭିନ୍ନ ମହଲରୁ ଓଡ଼ିଆ ଅସ୍ମିତା ନେଇ ନିନ୍ଦା ଆସିବା ପରେ ଚିଠା ଯୋଜନାକୁ ପୁଣି ସଂଶୋଧନ କରି ଓଡ଼ିଆ ଭାଷାକୁ ସାମିଲ କରାଗଲା ।
ଫେଲ୍ ମାରୁଛି ରାଜ୍ୟ ବିଜେପି ସଭାପତି ଚୟନ ଡେଡଲାଇନ
ଭୁବନେଶ୍ୱର: ଚାଲିଛି ବିଜେପି ସାଙ୍ଗଠନିକ ନିର୍ବାଚନ ପର୍ବ। ଫେଲ୍ ମାରୁଛି ରାଜ୍ୟ ସଭାପତି ଚୟନ ଡେଡଲାଇନ। ପ୍ରଥମେ ଜାନୁଆରୀ ୧୫, ତାପରେ ଜାନୁଆରୀ ଶେଷ ଓ ପୁଣି ଫେବୃଆରୀ ଶେଷ। ଏବେ ରାଜ୍ୟ ପ୍ରଭାରୀ କହୁଛନ୍ତି ମାର୍ଚ୍ଚ ୧୫ ସୁଦ୍ଧା ବଛାଯିବ ରାଜ୍ୟ ସଭାପତି। ତାରିଖ ପରେ ତାରିଖ ବଦଳୁଥିବା ବେଳେ ଦୂର ହୋଇପାରୁନି ରାଜ୍ୟ ସଭାପତି ଦ୍ବନ୍ଦ। ସଭାପତି ପଦକୁ ନେଇ ଦଳ ଭିତରେ ସ୍ପଷ୍ଟ ଭାବେ ବାରି ହୋଇପଡୁଛି କନ୍ଦଳ। ତେବେ ସରକାର ଗଠନର ୮ ମାସ ପରେ ବି ନିଗମ ଓ ବୋର୍ଡ ନିଯୁକ୍ତିକୁ ନେଇ ମଧ୍ୟ କସରତ ସରୁନାହିଁ। ଜିଲ୍ଲା ଯୋଜନା କମିଟି, ସ୍ବତନ୍ତ୍ର ଉନ୍ନୟନ ପରିଷଦ, ରାଜ୍ୟ ଯୋଜନା ବୋର୍ଡ, ବିଭିନ୍ନ ବିଭାଗରେ ଉପଦେଷ୍ଟା, ନିଗମ ଓ ବୋର୍ଡ ଭଳି ଥଇଥାନ ପଦବୀରେ ଶତାଧିକ ନେତାଙ୍କୁ ନିଯୁକ୍ତି କରିବାକୁ ଦଳ ଯୋଜନା କରୁଛି। ଏଥିପାଇଁ ଆରମ୍ଭ ହୋଇଛି କସରତ।
ରାଜ୍ୟରେ ପ୍ରଥମ ଥର ପାଇଁ ସରକାର ଗଠନ ପରେ ଦଳ ଓ ସରକାର ମଧ୍ୟରେ ସମନ୍ବୟ ପାଇଁ ଘନ ଘନ ବୈଠକ ବସୁଛି। ଉପ ମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂଦେଓଙ୍କ ସରକାରୀ ବାସଭବନରେ ଏକାଠି ହୋଇଛନ୍ତି ଦଳର ତୁଙ୍ଗ ନେତା। ରାଜ୍ୟ ପ୍ରଭାରୀ ବିଜୟ ପାଲ ତୋମାର, ରାଷ୍ଟ୍ରୀୟ ସାଧାରଣ ସମ୍ପାଦକ ତରୁଣ ଚୁଗ, ରାଜ୍ୟ ସଭାପତି, ମୁଖ୍ୟମନ୍ତ୍ରୀ, ଉପମୁଖ୍ୟମନ୍ତ୍ରୀ, ଦଳର ବରିଷ୍ଠ ନେତାମାନେ ଏକାଠି ହୋଇ ନିଗମ ଓ ବୋର୍ଡ଼ ନିଯୁକ୍ତି ବାବଦରେ ଆଲୋଚନା କରିଥିବା ଜଣାପଡ଼ିଛି। ଏହା ସହ ରାଜ୍ୟ ସଭାପତି ଓ ରାଜ୍ୟ କମିଟି ପଦାଧିକାରୀ ଚୟନ ବି ମୁଖ୍ୟ ପ୍ରସଙ୍ଗ ରହିଛି। ଏସବୁ ନିଯୁକ୍ତି ହୋଇପାରୁନଥିବାରୁ ଦଳ ଓ ସରକାର ଉଭୟ ଗତିଶୀଳ ହୋଇ ପାରୁନାହାନ୍ତି। ସବୁ କଥାରେ କେନ୍ଦ୍ରୀୟ ନେତୃତ୍ବଙ୍କ ଇଙ୍ଗିତକୁ ଅପେକ୍ଷା କରୁଛି ରାଜ୍ୟ ବିଜେପି। ତେବେ ଖୁବ ଶୀଘ୍ର ସାଙ୍ଗଠନିକ ନିର୍ବାଚନ ସହିତ ନିଗମ ଓ ବୋର୍ଡ ନିଯୁକ୍ତି ହେବ ବୋଲି କେନ୍ଦ୍ର ନେତା କହିଛନ୍ତି।
ସଙ୍ଗଠନରେ ଦ୍ବନ୍ଦ, ସରକାରରେ ସ୍ଥାଣୁତା। ସଭାପତି ଚୟନ ନେଇ ପଦ୍ମ ଯେପରି ଘୁଞ୍ଚି ଘୁଞ୍ଚି ଯାଉଛି, ନିଗମ ଓ ବୋର୍ଡ ନିଯୁକ୍ତି ମଧ୍ୟ ସେତିକି ବିଳମ୍ବିତ ହେଉଛି। ଅନ୍ୟପଟେ ଆଶାୟୀଙ୍କ ତାଲିକା ବଢ଼ି ଚାଲିଥିବାରୁ, ବିଜେପି ନେତାଙ୍କ ଚିନ୍ତା ବଢ଼ିବାରେ ଲାଗିଲାଣି।