ନନ୍ଦିଘୋଷ ବ୍ୟୁରୋ: ଗାଜା-ଇସ୍ରାଏଲ ପ୍ରଥମ ପର୍ଯ୍ୟାୟ ଯୁଦ୍ଧ ବିରତି ପ୍ରସଙ୍ଗ। ଆଉ ୬ ପଣବନ୍ଦୀଙ୍କୁ ଛାଡିଲା ଆତଙ୍କୀ ସଂଗଠନ ହମାସ। ୭ ଅକ୍ଟୋବରରେ ଘଟଣାରେ ଅପହୃତ ୪ ପଣବନ୍ଦୀ ସହ ହମାସ ନିକଟରେ ଅନେକ ବର୍ଷ ଧରି ବନ୍ଦୀ ଥିବା ୨ ଇସ୍ରାଏଲ ପଣବନ୍ଦୀଙ୍କୁ ମୁକ୍ତ କରିଛି ଇସ୍ରାଏଲ। ଆସନ୍ତା ସପ୍ତାହରେ ଆଉ ୪ ପଣବନ୍ଦୀଙ୍କ ମୃତଦେହ ଇସ୍ରାଏଲକୁ ହସ୍ତାନ୍ତର କରିବ ବୋଲି ସୂଚନା ଦେଇଛି ହମାସ। ପ୍ରତି ବଦଳରେ ୬୦୨ ପଣବନ୍ଦୀଙ୍କୁ ମୁକ୍ତ କରିଛି ଇସ୍ରାଏଲ। ଏବେବି ହମାସ ପାଖରେ ଆଉ ୫୯ ପଣବନ୍ଦୀ ଜୀବୀତ ଥିବା ଜଣାପଡିଛି। ହମାସ ଓ ଇସ୍ରାଏଲ ମଧ୍ୟରେ ପ୍ରଥମ ପର୍ଯ୍ୟାୟ ଯୁଦ୍ଧ ବିରତିରେ ପଣବନ୍ଦୀଙ୍କୁ ମୁକ୍ତ କରାଯାଇଥିବାବେଳେ ପରବର୍ତ୍ତୀ ପର୍ଯ୍ୟାୟ ଯୁଦ୍ଧ ବିରତିରେ ଅନ୍ୟ ବନ୍ଦୀଙ୍କୁ ମୁକ୍ତ ହେବା ସମ୍ଭାବନା ରହିଛି। ପାଲେଷ୍ଟାଇନ ଓ ହମାସ ମଧ୍ୟରେ ୩ଟି ପର୍ଯ୍ୟାୟରେ ଯୁଦ୍ଧ ବିରତି ପାଳନ କରାଯାଇ ପଣବନ୍ଦୀଙ୍କୁ ମୁକ୍ତ କରିବ ଆତଙ୍କୀ ସଂଗଠନ ହମାସ। ଇସ୍ରାଏଲ ଏବଂ ହମାସ ମଧ୍ୟରେ ଆସନ୍ତା ମାର୍ଚ୍ଚ ପହିଲାରୁ ଆରମ୍ଭ ହେଉଛି ଦ୍ଵିତୀୟ ପର୍ଯ୍ୟାୟ ଯୁଦ୍ଧ ବିରତି।
ଆଜି ଭାରତ-ପାକିସ୍ତାନ ଟକ୍କର, ଜାଣନ୍ତୁ କଣ ରହିଛି ଟକ୍କର
ନନ୍ଦିଘୋଷ ବ୍ୟୁରୋ: ଚାମ୍ପିୟନସ ଟ୍ରଫିରେ ଆଜି ସବୁଠାରୁ ବଡ଼ ମ୍ୟାଚ୍। ହାଇଭୋଲଟେଜ୍ ଇଣ୍ଡିଆ-ପାକିସ୍ତାନ ଟକ୍କର। ଦୁବାଇରେ ହେବ ଏହି ମ୍ଯାଚ। ମୁହାଁମୁହିଁ ହେବ ଦୁଇ ପ୍ରତିନ୍ଦ୍ଵନ୍ଦ୍ଵୀ ଭାରତ –ପାକିସ୍ତାନ। ରୋହିତ ଶର୍ମାଙ୍କ ନେତୃତ୍ଵରେ ପଡିଆକୁ ଓହ୍ଲାଇବ ଟିମ ଇଣ୍ଡିଆ। ଚାମ୍ପିୟନ୍ସ ଟ୍ରଫିର ପ୍ରଥମ ମ୍ୟାଚରେ ବାଂଲାଦେଶକୁ ଭାରତ ୬ ୱିକେଟରେ ହରାଇଥିବାରୁ ଖେଳାଳିଙ୍କ ଆତ୍ମବିଶ୍ଵାସ ଦୃଢ ରହିଛି। ଆଜିର ମ୍ୟାଚ ଜିତିଲେ ଟିମ୍ ଇଣ୍ଡିଆ ସେମିଫାଇନାଲର ପ୍ରମୁଖ ଦାବିଦାର ହେବ। ଭାରତର ପ୍ଲେଇଂ ଇଲେଭେନ ଉପରେ ରହିଛି ସମସ୍ତଙ୍କ ନଜର। ଜଣାପଡୁଛି ଏକ ଅତିରିକ୍ତ ସ୍ପିନର ଭାବେ ବରୁଣ ଚକ୍ରବର୍ତ୍ତୀଙ୍କୁ ସ୍ଥାନ ମିଳିପାରେ। ଏପରି ହେଲେ ହର୍ଷିତ ରାଣା ବାଦ୍ ପଡ଼ିବେ। ସେପଟେ ବ୍ଯାଟିଂରେ ଟପ୍ ଅର୍ଡର ହିଁ ଟ୍ରମ୍ପ କାର୍ଡ ହେବ। ଚେଜ୍ ମାଷ୍ଟର କୋହଲିଙ୍କ ଉପରେ ସମସ୍ତଙ୍କ ନଜର। ସେପଟେ ପାକିସ୍ତାର ବଳ ହେଉଛି ଫାଷ୍ଟ ବୋଲିଂ। କିନ୍ତୁ ସ୍ପେଶାଲିଷ୍ଟ ସ୍ପିନର ନାହାନ୍ତି। ଅବରାର ଅହମ୍ମଦ ଜଣେ ମାତ୍ର ସ୍ପିନର ଅଛନ୍ତି। ଆଜିର ମ୍ଯାଚ ପାକିସ୍ତାନ ପାଇଁ କର ବା ମର ପରିସ୍ଥିତି ସୃଷ୍ଟି କରିଛି। ଯଦି ଆଜି ଭାରତଠାରୁ ପାକିସ୍ତାନ ହାରି ଯାଏ ତେବେ ଟୁର୍ଣ୍ଣାମେଣ୍ଟରୁ ବାହାରି ଯାଇପାରେ ଆୟୋଜକ ପାକିସ୍ତାନ ।
ଏପଟେ ସୁପର ସନ୍ ଡେ’ର ସୁପର ମୁକାବିଲାକୁ ଭାରତ ଚାହିଁ ବସିଛି । କାରଣ ପାକିସ୍ତାନ ପାଖରୁ ଭାରତକୁ ୮ ବର୍ଷ ପୂର୍ବର ପ୍ରତିଶୋଧ ନେବାକୁ ସୁଯୋଗ ମିଳିଛି । ଭାରତ ଏହି ସୁଯୋଗକୁ କେବେ ହାତଛଡ଼ା କରିବାକୁ ଚାହିଁବ ନାହିଁ । ଆଉ ୨୦୧୭ର ପ୍ରତିଶୋଧ ନେବାକୁ ପୂରା ଭାରତୀୟ କ୍ରିକେଟ୍ ଟିମ ସମେତ ସାରା ଦେଶ ଚାହିଁ ବସିଛି ।
ଦୁବାଇ ମାଟିରେ ଭାରତ ହାବୁଡ଼ରେ ପଡ଼ି ଗଲେ ପାକିସ୍ତାନ ବନିଯାଏ ଭିଗି ବିଲି । ଏଠାରେ ଭାରତ ନାଁ ଶୁଣିଲେ ଥର ଥର କମ୍ପନ୍ତି ପାକିସ୍ତାନୀ ଖେଳାଳି । କାରଣ ଦୁବାଇରେ ପାକିସ୍ତାନ ବିରୋଧରେ ଭାରତ ଉଇନିଂ ଷ୍ଟ୍ରାଇକ ରେଟ୍ 100 % ରହିଛି । ଉଭୟ ଦେଶ ଦିନିକିଆ ଫର୍ମାଟରେ ଦୁବାଇରେ ଦୁଇ ଥର ପରସ୍ପରକୁ ଭେଟିଛନ୍ତି । ଆଉ ଦୁଇ ଥର ଭାରତ ବିଜୟ ହାସଲ କରିଛି । ଏହି ଦୁଇଟି ମ୍ୟାଚ ୨୦୧୮ରେ ଏସିଆ କପରେ ଖଳା ଯାଇଥିଲା । ଗ୍ରୁପ ଷ୍ଟେଜରେ ଭାରତ ପାକିସ୍ତାନକୁ ୮ ଓ୍ବିକେଟରେ ହରାଇ ଥିବା ବେଳେ ସୁପର ଫୋରରେ ନଅ ଓ୍ବିକେଟରେ ଧୂଳି ଚଟାଇ ଥିଲା ।
ପୁଣି ୭ ବର୍ଷ ପରେ ଭାରତ ଓ ପାକିସ୍ତାନ ଦୁବାଇରେ ମୁହାଁମୁହିଁ ହେବାକୁ ଯାଉଛନ୍ତି । ଆଉ ଏହି ମ୍ୟାଚ ଜିତି ଭାରତ ୨୦୧୭ ଚାମ୍ପିୟନ୍ସ ଟ୍ରଫି ପରାଜୟର ପ୍ରତିଶୋଧ ନେବାକୁ ଅନାଇ ବସିଛି । ରାତି ପାହିବାକୁ ଅପେକ୍ଷା, ଭାରତ ହାତରୁ ପାକିସ୍ତାନର ଆଉ ଏକ ପରାଜୟ ଦେଖିବାକୁ କ୍ରିକେଟ ପ୍ରେମୀ ଅନାଇ ବସିଛନ୍ତି ।
ଶାନଦାର ଓ ନିଃସ୍ବାର୍ଥ କ୍ରିକେଟ ପାଇଁ ରୋହିତଙ୍କୁ ପ୍ରଶଂସା କଲେ ପାକିସ୍ତାନର ଦୁଇ ପୂର୍ବତନ କ୍ରିକେଟର ଆକ୍ରମ ଓ ହାଫିଜ
ଫେବୃଆରୀ ୨୩ରେ ଭାରତ-ପାକିସ୍ତାନ ମଧ୍ୟରେ ହେବାକୁ ଯାଉଛି ମହାମୁକାବିଲା । ଏହା ମଧ୍ୟରେ ଭାରତୀୟ ଅଧିନାୟକ ତଥା ହିଟମ୍ୟାନ ରୋହିତ ଶର୍ମାଙ୍କ ପାଇଁ ଆସିଛି ଏକ ବଡ଼ ଖବର । ଚାମ୍ପିୟନ୍ସ ଟ୍ରଫିର ମେଗା ଫାଇଟ ପୂର୍ବରୁ ରୋହିତଙ୍କ ପ୍ରଶଂସାରେ ଶତମୁଖ ହୋଇଉଠିଛନ୍ତି ପାକିସ୍ତାନର ଦୁଇ ପୂର୍ବତନ କ୍ରିକେଟର । ମହାନ କ୍ରିକେଟର ଓ୍ବାସିମ ଆକ୍ରମ ଓ ମହମ୍ମଦ ହାଫିଜ ରୋହିତଙ୍କୁ ବେଶ ପ୍ରଶଂସା କରିଛନ୍ତି । ବାଂଲାଦେଶ ବିପକ୍ଷ ମ୍ୟାଚରେ ରୋହିତ ଶର୍ମା ୩୬ଟି ବଲରୁ ୪୧ ରନ ସଂଗ୍ରହ କରିଥିଲେ । ଚାମ୍ପିୟନ୍ସ ଟ୍ରଫିର ଓପନିଂ ମ୍ୟାଚରେ ରୋହିତଙ୍କ ଏହି ଗୁରୁତ୍ବପୂର୍ଣ୍ଣ ପାଳି ଦଳକୁ ବିଜୟୀ କରାଇବାରେ ସହାୟକ ହୋଇଥିଲା । ଉକ୍ତ ମ୍ୟାଚରେ ଭାରତ ୬ ଓ୍ବିକେଟରେ ବିଜୟୀ ହୋଇଥିଲା । ଆକ୍ରମ ରୋହିତଙ୍କୁ ଶାନଦାର କ୍ରିକେଟ ପାଇଁ ପ୍ରଶଂସା କରିଥିବା ବେଳେ ହାଫିଜ ଭାରତୀୟ ଅଧିନାୟକଙ୍କ ଡ୍ରେସିଂ ରୁମର ନିଃସ୍ବାର୍ଥ କ୍ରିକେଟକୁ ପ୍ରଶଂସା କରିଥିଲେ ।
ରୋହିତ ଦିନିକିଆରେ ଡବଲ ସେଞ୍ଚୁରୀ ହାସଲ କରିଛନ୍ତି । ରୋହିତ ଜଣେ ସ୍ବତନ୍ତ୍ର ଖେଳାଳି । ୨୦୦୮ରେ ସେ ରୋହିତଙ୍କୁ ପ୍ରଥମ ଥର ପାଇଁ ଦେଖିଥିଲେ । ୨୦୦୮ରେ ଅଷ୍ଟ୍ରେଲିଆରେ ତ୍ରିରାଷ୍ଟ୍ରୀୟ ସିରିଜ ସମୟରେ ଆକ୍ରମ କମେଣ୍ଟାରୀ କରୁଥିଲେ । ଏହି ଯୁବ କ୍ରିକେଟଙ୍କ ପାଖେ ନିଶ୍ଚିତ ଭାବେ କିଛି ବଡ଼ ପ୍ରତିଭା ରହିଛି ବୋଲି ସେହି ସମୟରେ ସେ ଅନୁମାନ କରିପାରିଥିଲେ ବୋଲି କହିଛନ୍ତି ବିଶ୍ବର ଅନ୍ୟତମ କିମ୍ବଦନ୍ତୀ ବୋଲର ଆକ୍ରମ । ଉକ୍ତ ମ୍ୟାଚରେ ରୋହିତ ୭୦ ରନ୍ ସଂଗ୍ରହ କରିଥିଲେ । ସେହିପରି ଜଣେ ଅଧିନାୟକ ଭାବେ ଟିମ୍ ଇଣ୍ଡିଆର ନେତୃତ୍ବ ନେଉଥିବା ରୋହିତଙ୍କୁ ପ୍ରଶଂସା କରିଛନ୍ତି ପାକିସ୍ତାନର ଅନ୍ୟତମ ପୂର୍ବତନ କ୍ରିକେଟର ହାଫିଜ । ରୋହିତ ବ୍ୟକ୍ତିଗତ ରେକର୍ଡ ଅପେକ୍ଷା ଦଳୀୟ ପ୍ରଦର୍ଶନକୁ ଗୁରୁତ୍ବ ଦେଇଥାନ୍ତି ବୋଲି ହାଫିଜ କହିଛନ୍ତି ।
’ଛାବା’ ଫିଲ୍ମ ଦେଖିବା ପରେ ଦିଲ୍ଲୀରେ ବବାଲ୍: ଆକବର ଓ ହୁମାୟୁନ ରୋଡ଼ରେ ଥିବା ସାଇନ ବୋର୍ଡ ଉପରେ କାଳି ଲଗାଇ ଶିବାଜୀଙ୍କ ପୋଷ୍ଟର ଲଗାଇଲେ କିଛି ଯୁବକ
ନୂଆଦିଲ୍ଲୀ: ବଲିଉଡ ଅଭିନେତା ଭିକି କୌଶଲଙ୍କ ଅଭିନୀତ ହିନ୍ଦି ଫିଲ୍ମ ’ଛାବା’ ଗୋଟିଏ ପରେ ଗୋଟିଏ ରେକର୍ଡ କରି ଚାଲିଥିବା ବେଳେ ଏହା ମଧ୍ୟରେ ଫିଲ୍ମକୁ ନେଇ ଆସିଛି ଏକ ବଡ଼ ଖବର । ଫିଲ୍ମକୁ ଦେଖିବା ପରେ ଦିଲ୍ଲୀରେ ବବାଲ ସୃଷ୍ଟି ହୋଇଛି । ଦିଲ୍ଲୀର ଆକବର ରୋଡ଼ ଓ ହୁମାୟୁନ ରୋଡ଼ଆରେ ଥିବା ସାଇନ ବୋର୍ଡମାନଙ୍କରେ ଉପଦ୍ରବକାରୀମାନେ କାଳି ଲଗାଇ ଦେଇଛନ୍ତି । ତା’ ବଦଳରେ ଉକ୍ତ ସାଇନ ବୋର୍ଡରେ ସେମାନେ ଛତ୍ରପତି ଶିବାଜୀଙ୍କ ପୋଷ୍ଟର ଲଗାଇ ଦେଇଥିଲେ । ପୋଲିସ ସୂତ୍ରରୁ ଏହି ସୂଚନା ମିଳିଥିବା ଏକ ରିପୋର୍ଟରେ କୁହାଯାଇଛି ।
ଏନେଇ କିଛି ଭିଡିଓ ସୋସିଆଲ ମିଡ଼ିଆରେ ଭାଇରାଲ ହେବାରେ ଲାଗିଛି । ’ଛାବା’ ଫିଲ୍ମ ଦେଖିବା ପରେ ଲୋକମାନେ ସାଇନ ବୋର୍ଡରେ କାଳି ସ୍ପ୍ରେ କରିଥିଲେ ଓ ତା’ ଉପରେ ମହାଠା ସାମ୍ରାଜ୍ୟର ପ୍ରତିଷ୍ଠାତା ଶିବାଜୀଙ୍କ ଫଟୋ ପେଷ୍ଟ କରିଥିଲେ । ଆକବର, ବାବର ଓ ହୁମାୟୁନଙ୍କ ନାମକୁ ସଡ଼କରୁ ହଟାଇବାକୁ ଦାବି କରିବା ସହ ସେମାନେ ଆମ ପାଇଁ କଳଙ୍କ ବୋଲି କହିଥିଲେ । ଏହି ମୋଗଲ ଶାସକମାନେ ଛତ୍ରପତି ଶିବାଜୀଙ୍କ ସହିତ ବହୁତ ଭୁଲ କରିଥିଲେ ବୋଲି ମଧ୍ୟ କହିଥିଲେ । ଖବର ପାଇ ଘଟଣାସ୍ଥଳରେ ପୋଲିସ ଓ ପ୍ରଶାସନିକ ଅଧିକାରୀମାନେ ପହଞ୍ଚିଥିଲେ ଓ ବିକୃତ ବୋର୍ଡଗୁଡ଼ିକୁ ପରିଷ୍କାର କରିଥିଲେ ବୋଲି କୁହାଯାଇଛି । ଏହି ଘଟଣାର ତଦନ୍ତ ଆରମ୍ଭ ହୋଇଛି । ସିସିଟିଭି ଫିଟେଜକୁ ଅନୁଧ୍ୟାନ କରି ଅଭିଯୁକ୍ତମାନଙ୍କୁ ଧରିବାକୁ ପ୍ରୟାସ କରାଯାଉଛି ।
ନିୟନ୍ତ୍ରଣ ହରାଇ ଗଭୀର ଖାଇ ମଧ୍ୟକୁ ଖସିଲା ବସ: ୧୫ ଯାତ୍ରୀ ଆହତ
ଜମ୍ମୁ: କଟରାରୁ ଦିଲ୍ଲୀ ଯାଉଥିବା ଏକ ଯାତ୍ରୀବାହୀ ବସ୍ ଅମ୍ପଫଲ୍ଲା ନିକଟରେ ଦୁର୍ଘଟଣାଗ୍ରସ୍ତ ହୋଇଛି । ବସଟି ନିୟନ୍ତ୍ରଣ ହରାଇ ସଡ଼କରୁ ଖସି ଗଭୀର ଖାଇ ମଧ୍ୟକୁ ଖସିପଡ଼ିଥିଲା । ଏହି ଦୁର୍ଘଟଣାରେ ୧୫ ଜଣ ଯାତ୍ରୀ ଆହତ ହୋଇଛନ୍ତି । ସୂଚନା ମିଳିବା ପରେ ପୋଲିସ ଓ ଉଦ୍ଧାରକାରୀ ଟିମ୍ ଘଟଣାସ୍ଥଳରେ ପହଞ୍ଚିବା ସହ ଆହତଙ୍କୁ ଚିକିତ୍ସା ନିମନ୍ତେ ହସ୍ପିଟାଲରେ ଭର୍ତ୍ତି କରିଥିଲେ । ଡାକ୍ତରଙ୍କ ଅନୁସାରେ, ଆହତଙ୍କ ଅବସ୍ଥା ବର୍ତ୍ତମାନ ସ୍ଥିର ରହିଛି । ସ୍ଥାନୀୟ ପ୍ରଶାସନ ଘଟଣାର ଯାଞ୍ଚ କରିବା ସହ ଆହତଙ୍କ ପରିବାରଙ୍କୁ ସୂଚନା ଦେଉଛନ୍ତି ।
ଟିମ୍ ଇଣ୍ଡିଆର ଷ୍ଟାର ଖେଳାଳିଙ୍କ ସ୍ବାସ୍ଥ୍ୟାବସ୍ଥା ବିଗିଡ଼ିଲା: ପାକିସ୍ତାନ ବିପକ୍ଷ ମ୍ୟାଚ ପୂର୍ବରୁ ବଢ଼ିଲା ଟେନସନ
ଫେବୃଆରୀ ୨୩ରେ ହେବାକୁ ଥିବା ଭାରତ-ପାକିସ୍ତାନ ଡାଇଭୋଲଟେଜ ମ୍ୟାଚକୁ ବିଶ୍ବର କୋଟି କୋଟି କ୍ରିକେଟପ୍ରେମୀ ଉତ୍ସୁକତାର ସହ ଅପେକ୍ଷା କରି ରହିଛନ୍ତି । ଏହି ଦୁଇ ପାରମ୍ପରିକ ପ୍ରତିଦ୍ବନ୍ଦ୍ବୀଙ୍କ ମ୍ୟାଚ ସବର୍ଦା ରୋମାଞ୍ଚକର ହୋଇଥାଏ । ତେବେ ଏହା ମଧ୍ୟରେ ଟିମ୍ ଇଣ୍ଡିଆ ପାଇଁ ଆସିଛି ଏକ ଚିନ୍ତାଜନକ ଖବର । ଗୋଟିଏ ପଟେ ଏହି ମହାମୁକାବିଲା ପାଇଁ ଦୁଇ ଟିମର ଖେଳାଳିମାନେ ଜୋରଦାର ଭାବେ ଅଭ୍ୟାସ ଚଳାଇଥିବା ବେଳେ ଅନ୍ୟ ପକ୍ଷରେ ଜଣେ ଷ୍ଟାର ଖେଳାଳି ବୀମାରଗ୍ରସ୍ତ ହୋଇଛନ୍ତି । ତେଣୁ ଚାମ୍ପିୟନ୍ସ ଟ୍ରଫିର ପାକିସ୍ତାନ ବିପକ୍ଷ ଗୁରୁତ୍ବପୂର୍ଣ୍ଣ ମ୍ୟାଚ ପୂର୍ବରୁ ଏହି ଖବର ଭାରତ ଓ ଭାରତୀୟ ଫ୍ୟାନ୍ସଙ୍କ ପାଇଁ ନିଶ୍ଚିତ ଭାବେ ଏକ ବଡ଼ ଖବର ।
ସୂଚନା ମୁତାବକ, ଟିମ୍ ଇଣ୍ଡିଆର ଷ୍ଟାର ବ୍ୟାଟ୍ସମ୍ୟାନ ତଥା ଓ୍ବିକେଟ କିପର ଋଷଭ ପନ୍ତ ବୀମାରଗସ୍ତ ହୋଇଛନ୍ତି । ପନ୍ତଙ୍କ ବୀମାରୀ ଏବେ ଟିମ୍ ଇଣ୍ଡିଆର ଚିନ୍ତା ବଢ଼ାଇ ଦେଇଛି । କାରଣ ଦଳ ପାଇଁ ଏବେ କେବଳ ଜଣେ ମାତ୍ର ଓ୍ବିକେଟ କିପର କେଏଲ ରାହୁଲ ରହିଛନ୍ତି । ଦୁବାଇ ଇଣ୍ଟରନ୍ୟାସନାଲରେ ହେବାକୁ ଥିବା ବଡ଼ ମ୍ୟାଚ ପୂର୍ବରୁ ଭାରତୀୟ ଟିମକୁ ଲାଗିଛି ଏକ ବଡ଼ ଝଟକା । ଖରାପ ସ୍ବାସ୍ଥ୍ୟ କାରଣରୁ ପନ୍ତ ଅଭ୍ୟାସ କରିନଥିଲେ । ପନ୍ତଙ୍କୁ ଭାଇରଲ ବୁଖାର ହୋଇଥିବାରୁ ତାଙ୍କୁ ପ୍ରାକ୍ଟିସ ସେସନରୁ ଆରାମ ଦିଆଯାଇଥିଲା । ତେଣୁ ରବିବାର ମୁକାବିଲା ପୂର୍ବରୁ ପନ୍ତ ଫିଟ ହୋଇପାରିବେ କି ନା ତାହା ଏବେ ବଡ଼ ପ୍ରଶ୍ନ । ତେବେ ପନ୍ତ ଆସନ୍ତାକାଲି ପ୍ଲେଇଂ-୧୧ରେ ରହିବେ ନାହିଁ, କାରଣ ରାହୁଲଙ୍କୁ ଦଳ ପ୍ରଥମ ଓ୍ବିକେଟ କିପର ବ୍ୟାଟ୍ସମ୍ୟାନ ଭାବେ ନିଯୁକ୍ତ କରାଯାଇଛି ।
ବାହାରିନରେ ଚମକିଲା ଓଡ଼ିଶା: “ବାହାରିନ ଓଡିଆ ସମାଜ”ର ପିଲାମାନଙ୍କ ଦ୍ଵାରା ପ୍ରସ୍ତୁତ ସମ୍ବଲପୁରୀ ନୃତ୍ୟ ସଭିଙ୍କ ମନ ମୋହିଲା
ମାନାମା: ବାହାରିନର ରାଜଧାନୀ ମାନାମା ଠାରେ ଭାରତୀୟ ଦୂତାବାସ ତରଫରୁ “India in Bahrain” ମହୋତ୍ସବର ଆୟୋଜନ କରାଯାଇଥିଲା । ଭାରତୀୟ କଳା ସଂସ୍କୃତି ଓ ବାଣିଜ୍ୟକୁ ଉତ୍ସାହିତ କରିବାକୁ ବାହାରିନରେ ଥିବା ଭାରତୀୟ ଦୂତାବାସ ତରଫରୁ ଏହି ପଦକ୍ଷେପ ନିଆଯାଇଥିଲା । ଏଥିରେ ଭାରତର ବିଭିନ୍ନ ରାଜ୍ୟର ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯାଇଥିଲା । ଭାରତୀୟ ଦୂତାବାସର ନିମନ୍ତ୍ରଣ କ୍ରମେ ଯୋଗଦେଇଥିଲେ ୧୯ଟି ଭାରତୀୟ ସଂଗଠନ । ଏହି କାର୍ଯ୍ୟକ୍ରମରେ ବାହାରିନରେ ଅବସ୍ଥିତ “ବାହାରିନ ଓଡ଼ିଆ ସମାଜ”କୁ ସ୍ୱତନ୍ତ୍ର ଭାବେ ଆମନ୍ତ୍ରଣ କରାଯାଇଥିଲା । ଓଡିଆ ସମାଜ “ଓଡିଶାର ଷ୍ଟଲ” କୁ ପ୍ରତିନିଧିତ୍ୱ କରିବା ସହ ସାଂସ୍କୃତିକ କାର୍ଯ୍ୟକ୍ରମରେ ମଧ୍ୟ ଅଂଶ ଗ୍ରହଣ କରିଥିଲେ।
ସେହି ସାଂସ୍କୃତିକ କାର୍ଯ୍ୟକ୍ରମରେ ମୁଖ୍ୟ ଆକର୍ଷଣ ଥିଲା “ବାହାରିନ ଓଡିଆ ସମାଜ” ର ପିଲା ମାନଙ୍କ ଦ୍ଵାରା ପ୍ରସ୍ତୁତ ସମ୍ବଲପୁରୀ ନୃତ୍ୟ । ଏହି ନୃତ୍ୟ ପରିବେଷଣ କରିଥିଲେ
ମ୍ରିଆଣି ନାୟକ, ଆରାଧ୍ୟା ଜେନା, ଗୁଞ୍ଜନ ପାଲ, ଆରାଇନା ମହାନ୍ତି, ଆୟୁଷି ଦାଶ ଓ ଶିବାନସି ନାୟକ । ସାଂସ୍କୃତିକ କାର୍ଯ୍ୟକ୍ରମ ବ୍ୟତୀତ ଏକ ସୁନ୍ଦର ଓଡିଶା stall ର ପ୍ରବନ୍ଧ ମଧ୍ୟ ହୋଇଥିଲା । ଏଥିରେ ଓଡ଼ିଶାର ବିଭିନ୍ନ ହସ୍ତଶିଳ୍ପ, ଆଦିବାସୀ ଉତ୍ପାଦ, ପାରମ୍ପରିକ ବସ୍ତ୍ର ଓ ହସ୍ତତନ୍ତ୍ର ର ପ୍ରଦର୍ଶନ କରାଯାଇଥିଲା। ଏଥିରେ ଭାରତୀୟ ଦୂତାବାସର କାର୍ଯ୍ୟକର୍ତ୍ତା, ସମସ୍ତ ଅତିଥି ବୃନ୍ଦ ଓ ଅନେକ ଅଣଓଡିଆ ଏହିସବୁ ହସ୍ତଶିଳ୍ପ ଦେଖିବାକୁ ଆଗ୍ରହ ପ୍ରକାଶ କରିବା ସହ ଏହାର ଉଚ୍ଚ ପ୍ରଶଂସା କରିଥିଲେ ଯାହା କି ଆମ ଓଡିଶା ପାଇଁ ବହୁତ ଗର୍ବ ଓ ଗୌରବର ବିଷୟ । ବାହାରିନ ଓଡିଆ ସମାଜ ର ଯୁଗ୍ମ ସମ୍ପାଦକ ଶାରଦା ପ୍ରସାଦ ପଟ୍ଟନାୟକ, କୋଷାଧ୍ୟକ୍ଷ ପ୍ରିୟଦତ୍ତ ରୟ, କ୍ରୀଡା ସମ୍ପାଦକ ଅମରେଶ ପଣ୍ଡା, ପୂର୍ବତନ ସାଧାରଣ ସମ୍ପାଦକ ସୌମ୍ୟଦର୍ଶି ଦାଶ ଏବଂ ବରିଷ୍ଠ ସଦସ୍ୟ କରୁଣାକର ନାୟକ ଏହି ଷ୍ଟଲର ମୁଖ୍ୟ ଆୟୋଜକ ଥିଲେ।
ବାହାରିନ ଓଡିଆ ସମାଜର ଅନେକ ସଭ୍ୟ ଏକତ୍ରିତ ହୋଇ କାର୍ଯ୍ୟକ୍ରମର ଆନନ୍ଦ ନେବା ସହିତ ପ୍ରତିଯୋଗି ମାନଙ୍କ ମନୋବଳ ବଢାଇଥିଲେ । ଅନେକ ପ୍ରକାର ଓଡ଼ିଆ ଖାଦ୍ୟପେୟ ର ବ୍ୟବସ୍ଥା ମଧ୍ୟ କରାଯାଇଥିଲା । ଲୋକମାନେ ଓଡ଼ିଆ ଖାଦ୍ୟର ଭରପୁର ମଜା ନେଇଥିଲେ। “ବାହାରିନ ଓଡିଆ ସମାଜ”ର ଏହି ଛୋଟ ପ୍ରୟାସ ବିଦେଶ ମାଟିରେ ଓଡ଼ିଆ ର କଳା, ସଂସ୍କୃତି ଓ ପରମ୍ପରା ର ପ୍ରସାର ଓ ପ୍ରଚାର ପାଇଁ ନିଶ୍ଚୟ ସହାୟକ ହେବ ବୋଲି ବାହାରିନ ଓଡିଆ ସମାଜ ର ସମସ୍ତ ସଭ୍ୟମାନଙ୍କର ଆଶା ଓ ବିଶ୍ବାସ । ପରିଶେଷରେ ଓଡ଼ିଆ ସମାଜର ସଭାପତି ପ୍ରଭାକର ପାଢ଼ୀ, ସାଧାରଣ ସମ୍ପାଦକ ଶାନ୍ତନୁ ସେନାପତି , ସାଂସ୍କୃତିକ ସମ୍ପାଦିକା ଅଙ୍କିତା ନାୟକ, ଜନ ସମ୍ପର୍କ ସମ୍ପାଦକ ଅମରନାଥ ସୁବୁଧି , ବରିଷ୍ଠ ସଦସ୍ୟ ବିଷ୍ଣୁ ପ୍ରସାଦ ମହାନ୍ତି, ସମସ୍ତ ସଦସ୍ୟ ମାନଙ୍କୁ କୃତଜ୍ଞତା ଜ୍ଞାପନ କରିଥଲେ। ଉଲ୍ଲେଖଯୋଗ୍ୟ ଯେ, ବାହାରିନରେ ଗତ ୧୮ ବର୍ଷ ଧରି “ବାହାରିନ ଓଡ଼ିଆ ସମାଜ” ଓଡ଼ିଆର ସମୃଦ୍ଧ ଶ୍ରୀଜଗନ୍ନାଥ ସଂସ୍କୃତି, ଐତିହ୍ୟ ଓ ହସ୍ତତନ୍ତ୍ରର ପ୍ରଚାର ପ୍ରସାର କରିଆସୁଅଛି ।
ସୈନିକ ସ୍କୁଲ ସ୍ଥାନାନ୍ତର ଚକ୍ରାନ୍ତ ବିରୋଧରେ ତେଜିଲା ସ୍ବର: ଚନ୍ଦକା ନିକଟକୁ ସ୍କୁଲ ଉଠାଇ ନେବାକୁ ଚକ୍ରାନ୍ତ ହୋଇଥିବା ଅଭିଯୋଗ କଲା ମହାସଂଘ
ଭୁବନେଶ୍ବର: ସୈନିକ ସ୍କୁଲ ସ୍ଥାନାନ୍ତର ଚକ୍ରାନ୍ତ ବିରୋଧରେ ତେଜିଲା ସ୍ବର । ରାସ୍ତା ଓ ଡମ୍ପିୟାର୍ଡ଼ ସମ୍ପ୍ରସାରଣ ଆଳରେ ଷଡଯନ୍ତ୍ର ଅଭିଯୋଗ । ପଦାରେ ପଡିଲା ଡବଲ ଇଞ୍ଜିନ ସରକାରର ଦୋମୁହାଁ ନୀତି । ସୈନିକ ସ୍କୁଲ ଓଡିଆ ଅସ୍ମିତାର ପରିଚୟ ନୁହଁ କି ବୋଲି ଉଠିଲା ପ୍ରଶ୍ନ । ଭୁବନେଶ୍ବରରୁ ସୈନିକ ସ୍କୁଲ ସ୍ଥାନାନ୍ତରଣ ଚର୍ଚ୍ଚା ପରେ ମିଳିତ ଭାବେ କ୍ଷେତ୍ର ପରିଦର୍ଶନ କରିଛନ୍ତି ରାଜ୍ଯ ଅବିଭାବକ ମହାସଂଘ, ସୈନିକ ସ୍କୁଲ ଅଭିଭାବକ ସଙ୍ଘ ଓ ସ୍ଥାନୀୟ ବୁଦ୍ଧିଜୀବୀ । ରାସ୍ତା ଓ ଡମ୍ପିଂୟାର୍ଡ଼ ସମ୍ପ୍ରସାରଣ ପାଇଁ ଚଞ୍ଚକତା କରି ସହରରୁ ୩୦ କିମି ଦୁର ଚନ୍ଦକା ନିକଟକୁ ସ୍କୁଲ ଉଠାଇ ନେବାକୁ ଚକ୍ରାନ୍ତ ହୋଇଥିବା ଅଭିଯୋଗ କରିଛି ମହାସଂଘ । ସ୍କୁଲ ପରିସରରେ ଦେଶର ସୁରକ୍ଷା ପାଇଁ ବଳିଦାନ ଦେଇଥିବା ଶହ ଶହ ସହିଦଙ୍କ ଶ୍ରଦ୍ଧାଞ୍ଜଳି ପାଇଁ ସ୍ମାରକୀ ସହିତ ଆମର ଯବାନ ଜ୍ୟୋତି ରହିଛି । କର୍ପୋରେଟ ହାଉସଙ୍କୁ ଜମି ପ୍ରଦାନ ପାଇଁ ଅନୁଷ୍ଠିତ ଉଚ୍ଚସ୍ତରୀୟ ବୈଠକରେ କିଛି ବ୍ୟକ୍ତିଗତ ମନ୍ତବ୍ୟକୁ ନେଇ ଏପରି ଦୁର୍ଭାଗ୍ୟ ଜନକ ନିଷ୍ପତ୍ତି ନିଆଯାଇଥିବା ମହାସଂଘ ଅଭିଯୋଗ କରିଛି ।
ଭୁବନେଶ୍ୱରର ଗଡ଼କଣରେ ରାଜ୍ୟ ତଥା ଦେଶର ଗର୍ବ ଗୌରବ ଭାବେ ୧୯୬୧ ରୁ ପ୍ରତିଷ୍ଠିତ ସୈନିକ ସ୍କୁଲ ପ୍ରତିରକ୍ଷା କ୍ଷେତ୍ରରେ ସର୍ବୋକ୍ତୃଷ୍ଟ ଯୋଗଦାନ କରି ଆସୁଛି । ବର୍ତ୍ତମାନର ଉପରାଷ୍ଟ୍ରପତି ମଧ୍ୟ ଏହି ଅନୁଷ୍ଠାନର ଛାତ୍ର l ଓଡିଆ ପିଲାମାନେ କିପରି ଗୁଣାତ୍ମକ ଶିକ୍ଷା ସହ ସେନା ବାହିନୀରେ ଯୋଗ ଦେଇପାଇବେ ସେହି ଲକ୍ଷ୍ୟରେ ପୂର୍ବତନ ମୁଖ୍ୟମନ୍ତ୍ରୀ ବିଜୁ ପଟ୍ଟନାୟକଙ୍କ ଉଦ୍ୟମରେ ଏହି ଅନୁଷ୍ଠାନ ଭୁବନେଶ୍ବରରେ ପ୍ରତିଷ୍ଠା ହୋଇଥିଲା । ସୈନିକ ସ୍କୁଲ ନାମରେ ଆବଣ୍ଟିତ ହୋଇଥିବା ୨୨୪ ଏକର ଜମିରୁ ୩୦ ଏକର ଜମି ଡମ୍ପିଂୟାର୍ଡ ପାଇଁ ଦିଆଯାଇଥିଲା । ବଳକା ୧୯୪ ଏକର ମଧ୍ଯରୁ ଏବେ ୧୪୨ ଏକର ଜମିରେ ସୈନିକ ସ୍କୁଲ ଚାଲୁଛି । ସୈନିକ ସ୍କୁଲ ସ୍ଥାନାନ୍ତରଣ ନିଷ୍ପତ୍ତିକୁ ନ ଦବାଇଲେ ଆଗାମୀ ଦିନରେ ଜୋରଦାର ବିରୋଧ କରିବା ସହିତ ରାସ୍ତାକୁ ଓହ୍ଲାଇବା ନେଇ ଚେତାବନୀ ଦେଇଛି ମହାସଂଘ।
ଦାଦନ ଖଟିବାକୁ ଯାଇଛନ୍ତି ମାଟ୍ରିକ ଛାତ୍ରଛାତ୍ରୀ! ଦାଦନ ଟାସ୍କଫୋର୍ସର ମୁଖା ଖୋଲି ଦେଲା ମାଟ୍ରିକ ପରୀକ୍ଷା
ବଲାଙ୍ଗିର: ବଲାଙ୍ଗୀର ଜିଲ୍ଲାରେ ମାଟ୍ରିକ ପରୀକ୍ଷା ଦେବାକୁ ଆସିଲେ ନାହିଁ ୭୭୪ ଛାତ୍ରଛାତ୍ରୀ । ଜିଲ୍ଲାରେ ୨୨ହଜାର ୪୨ଜଣ ଛାତ୍ରଛାତ୍ରୀ ମାଟ୍ରିକ୍ ପରୀକ୍ଷା ପାଇଁ ରେଜିଷ୍ଟ୍ରେସନ୍ କରିଥିଲେ । କିନ୍ତୁ ୨୧ ହଜାର ୩୦୫ଜଣ ଛାତ୍ରଛାତ୍ରୀ ପରୀକ୍ଷା ଦେଇଛନ୍ତି । ବାକି ୭୭୪ ଜଣ ଛାତ୍ରଛାତ୍ରୀ ପରୀକ୍ଷା କେନ୍ଦ୍ରରେ ଅନୁପସ୍ଥିତ ରହିଛନ୍ତି । ସେମାନେ ପରୀକ୍ଷା ଦେବା ପାଇଁ ଆସିନଥିବା ଜିଲ୍ଲା ଶିକ୍ଷା ବିଭାଗ ପକ୍ଷରୁ ସୂଚନା ମିଳିଛି । ଅନୁପସ୍ଥିତ ଛାତ୍ରଛାତ୍ରୀଙ୍କ ମଧ୍ୟରୁ ଅଧିକ ଛାତ୍ରଛାତ୍ରୀ ପାଟଣାଗଡ଼ ଓ କଣ୍ଟାବାଞ୍ଜି ନିର୍ବାଚନମଣ୍ଡଳୀ ଅଞ୍ଚଳର । ଅନୁପସ୍ଥିତ ଥିବା ଛାତ୍ରଛାତ୍ରୀ କେଉଁଠି ଅଛନ୍ତି ଜିଲ୍ଲା ପ୍ରଶାସନ ନିକଟରେ ତଥ୍ୟ ନାହିଁ । ଏହି ଛାତ୍ରଛାତ୍ରୀମାନେ ପରିବାର ସହିତ ଦାଦନ ଖଟିବାକୁ ଯାଇଥିବା ଚର୍ଚ୍ଚା ହେଉଛି ।
ମାଟ୍ରିକ୍ ପରୀକ୍ଷାରେ ଅନୁପସ୍ଥିତ ରହିଥିବା ଦାଦନ ଛାତ୍ରଛାତ୍ରୀଙ୍କ ଭବିଷ୍ୟତ ଅନ୍ଧାର ଘେରକୁ ଠେଲି ହୋଇଯାଇଛି । ଦାଦନ ଯାଇଥିବା ମାଟ୍ରିକ୍ ପରୀକ୍ଷାର୍ଥୀଙ୍କୁ ଫେରାଇ ଆଣିବାରେ ଜିଲ୍ଲା ପ୍ରଶାସନ ଫେଲ୍ ମାରିଛି । ଜିଲ୍ଲାରୁ କେତେ ସଂଖ୍ୟକ ଲୋକେ ପିଲାଛୁଆ ଧରି ଦାଦନ ଯାଇଛନ୍ତି ତାହାର୍ ସଠିକ ରିପୋର୍ଟ ଜିଲ୍ଲା ପ୍ରଶାସନ ନିକଟରେ ମଧ୍ୟ ନାହିଁ । ଏଥିରୁ ଜଣାପଡୁଛି ଅଧିକାଂଶ ଶ୍ରମିକ ବେଆଇନ ଭାବେ ଦାଦନ ଯାଇଛନ୍ତି । ଯଦି ଏତେ ସଂଖ୍ୟକ ଛାତ୍ରଛାତ୍ରୀ ମାଟ୍ରିକ ପରୀକ୍ଷା ଦେବାରୁ ବଞ୍ଚିତ ହେଉଛନ୍ତି ତେବେ ପୂର୍ବରୁ ଜିଲ୍ଲା ପ୍ରଶାସନ ସେମାନଙ୍କୁ ଫେରାଇ ଆଣିବାକୁ କାହିଁକି ପଦକ୍ଷେପ ଗ୍ରହଣ କଲା ନାହିଁ । ଏଥରୁ ସ୍ପଷ୍ଟ ହେଉଛି ଅନୁପସ୍ଥିତ ଥିବା ଛାତ୍ରଛାତ୍ରୀ ବାପା ମାଆଙ୍କ ସହ ଦାଦନ ଯାଇଥିବା କହିଛନ୍ତି ଗ୍ରାମବାସୀ ଓ ବୁଦ୍ଧିଜୀବୀ । ସେପଟେ ଶତାଧିକା ଛାତ୍ରଛାତ୍ରୀ ଦାଦନ ଯାଇ ପରୀକ୍ଷାରେ ଅନୁପସ୍ଥିତ ରହିଥିବା ଅଭିଯୋଗ ଆଣିଛନ୍ତି ବିଶିଷ୍ଟ ସାମାଜିକ କର୍ମୀ ନୀଳମଣି ଯୋଶୀ । ଏତେ ସଂଖ୍ୟାରେ ପିଲା ଅନୁପସ୍ଥିତ ଥିଲେ ମଧ୍ୟ ଘଟଣାକୁ ହାଲୁକା ଭାବେ ଗ୍ରହଣ କରିଛନ୍ତି ଜିଲ୍ଲା ଶିକ୍ଷାଧିକାରୀ ପ୍ରଦୀପ କୁମାର ନାଗ ।
ଅବ୍ୟବସ୍ଥା ଘେରରେ ରେକର୍ଡ ରୁମ: ଜେରକ୍ସ ଓ ପ୍ରିଣ୍ଟର ମେଶିନ ଅଚଳ, ଲୋକଙ୍କୁ ଲାଞ୍ଚ ମଗାଯାଉଥିବାର ଅଭିଯୋଗ
ଜଗତସିଂହପୁର: ଜଗତସିଂହରରେ ଅବ୍ୟବସ୍ଥା ଘେରରେ ରେକର୍ଡ ରୁମ । ରେକର୍ଡ ରୁମ ଅଛି ଅଥଚ ମିଳୁନାହିଁ ରେକର୍ଡ । ଜେରକ୍ସ ଏବଂ ପ୍ରିଣ୍ଟର ମେସିନ ଅଚଳ ହୋଇପଡିଛି । କେଉଁଠି ଥାକରେ ତ କେଉଁଠି ଏଣେ ତେଣେ ରେକର୍ଡ ପତ୍ର ସବୁ ପଡିଛି । ହାଲ ଓ ସାବକ ପଟ୍ଟା ପାଇଁ ଆବେଦନ କରି ଦୌଡିଦୌଡି ନୟାନ୍ତ ହେଲେଣି ଲୋକେ । ଖାଲି ଏତିକି ନୁହେଁ ଲୋକଙ୍କୁ ପଟ୍ଟା ଦେବା ପାଇଁ କର୍ମଚାରୀ ମାନେ ଲାଞ୍ଚ ମାଗୁଥିବା ଅଭିଯୋଗ ହୋଇଛି ।
ଟିକେ ନଜର ପକାନ୍ତୁ ଏହି ଦୃଶ୍ୟ ଉପରେ କିପରି ତଳେ ଖେଳା ହେଇକି ପଡିଛି ଫାଇଲପତ୍ର । ଅଧା ଥାକରେ ଥୁଆ ହୋଇଛି । ଏ କୌଣସି ଅଦରକାରୀ କାଗଜପତ୍ର ନୁହେଁ ଏ ହେଉଛି ଜନସାଧାରଣଙ୍କ ପଟ୍ଟା ରେକର୍ଡ ପତ୍ର । ହେଲେ ଏଥିପ୍ରତି କୌଣସି ଅଧିକାରୀଙ୍କ ଦାୟିତ୍ଵ ନଥିଲା ପରି ମନେ ହେଉଛି । ଏ ହେଉଛି ଜଗତସିଂହପୁର ଜିଲ୍ଲା ଜିଲ୍ଲାପାଳଙ୍କ ଅଫିସ ପରିସରରେ ଥିବା ରେକର୍ଡ ରୁମର ଦୃଶ୍ୟ । ଏଠାରେ ଜଗତସିଂହପୁର, ବାଲିକୁଦା, ନାଉଗାଁ, ବିରିଡି, ରଘୁନାଥପୁର, ତିର୍ତ୍ତୋଲ, ଏରସମା ଓ କୁଜଙ୍ଗ ତହସିଲ ଅଞ୍ଚଳର ସମସ୍ତ ଲୋକଙ୍କ ପଟ୍ଟା ବା ସମସ୍ତ ରେକର୍ଡ ପତ୍ର ରଖାଯାଇଛି । ହେଲେ ସେ କାଗଜପତ୍ରର ଠିକ ସେ ରକ୍ଷଣାବେକ୍ଷଣା ହେଉନଥିବାରୁ ଲୋକ ମାନେ ଠିକ ସମୟରେ ହାଲ ଓ ସାବକ ପଟ୍ଟା ପାଇପାରୁନାହିଁନ୍ତି ।
ଖାଲି ଏତିକି ନୁହେଁ ଲୋକଙ୍କୁ ପଟ୍ଟା ଦେବା ପାଇଁ କର୍ମଚାରୀ ମାନେ ଲାଞ୍ଚ ମାଗୁଥିବା ଅଭିଯୋଗ ହୋଇଛି । ସିସିଟିଭି କ୍ୟାମେରା ବାହାରେ ଆସି ସେମାନଙ୍କ ଠାରୁ ପଇସା ନେଇ ଆଜି ଆସ କାଲି ଆସ କହୁଛନ୍ତି । ଦୂରଦୂରାନ୍ତରୁ ଆସୁଥିବା ଆବେଦନକାରୀଙ୍କ ପାଇଁ ବସିବା ପାଇଁ ସୁବିଧା ନଥିବାରୁ ସେମାନେ ଫାଟକ ଆଗରେ ଠିଆ ହୋଇ ଫେରି ଯାଉଛନ୍ତି । ଯାହାକୁ ନେଇ ସାଧାରଣରେ ପ୍ରବଳ ଅସନ୍ତୋଷ ଦେଖାଦେଲାଣି। ସେପଟେ କ୍ୟାମେରା ଦେଖି ଅଫିସ ଭିତରେ ଥିବା କର୍ମଚାରୀ ହଡ଼ ବଡ଼ ହୋଇ ଯାଇଥିଲେ । ଫଟୋ ଉଠାନ୍ତୁ ନାହିଁ ବୋଲି କହିଥିଲେ । ଘଟଣା ସଂପର୍କରେ କିଛି ବି କହି ନଥିଲେ । ଏଠି ପ୍ରଶ୍ନ ଉଠୁଛି- କେତେ ଦିନ ଏମିତି ହଇରାଣ ହେବେ ଜଗତସିଂହପୁର ଜିଲ୍ଲାବାସୀ ? କେବେ ମିଳିବ ଆବେଦନକାରୀଙ୍କୁ ଠିକ ସମୟରେ ପଟ୍ଟା ? କେବେ ରେକର୍ଡ ରୁମ ପ୍ରତି ଦୃଷ୍ଟି ଦେବେ ରାଜ୍ୟ ସରକାର ? ତାକୁ ହିଁ ଅପେକ୍ଷା ।