ନନ୍ଦିଘୋଷ ବ୍ୟୁରୋ : ଭାରତ ଏବଂ ଆଫଗାନିସ୍ତାନ ମଧ୍ୟରେ ତିନି ମ୍ୟାଚ୍ ବିଶିଷ୍ଟ ଟି-୨୦ ସିରିଜ୍ ଆଜିଠୁ ଆରମ୍ଭ ହେଉଛି। ସିରିଜ୍ ର ସମସ୍ତ ମ୍ୟାଚ୍ ନୂଆଦିଲ୍ଲୀର ଅରୁଣ ଜେଟଲୀ ଷ୍ଟାଡିୟମରେ ଖେଳାଯିବ। ଭାରତରେ ଖେଳାଯାଉଥିବା ସତ୍ତ୍ୱେ, ଏହି ଦ୍ୱିପାକ୍ଷିକ ସିରିଜ୍ ପାଇଁ ଆଫଗାନିସ୍ତାନ ହେଉଛି ଆନୁଷ୍ଠାନିକ ଆୟୋଜକ। ମ୍ୟାଚ୍ ଫ୍ଲଡ ଲାଇଟରେ ରାତି ୭ଟାରେ ଖେଳାଯିବ। ଏହି ସିରିଜ୍ ଟିମ୍ ଇଣ୍ଡିଆ ପାଇଁ ଗୁରୁତ୍ବପୂର୍ଣ୍ଣ ।୨୦୨୬ ଏସୀୟ କ୍ରୀଡ଼ା ପାଇଁ ଦଳର ଆଗାମୀ ଅଭିଯାନ ନିମନ୍ତେ ଏକ ଗୁରୁତ୍ୱପୂର୍ଣ୍ଣ ପ୍ରସ୍ତୁତି ହେବ। ଶ୍ରେୟଶ୍ ଆୟରଙ୍କ ନେତତ୍ବରେ ଭାରତୀୟ ଦଳରେ ସଞ୍ଜୁ ସାମସନ, ଇଶାନ କିଶନ, ଅଭିଷେକ ଶର୍ମା, ଆକ୍ସର ପଟେଲ ଏବଂ ୧୫ ବର୍ଷୀୟ ୟଙ୍ଗ ସେନ୍ସେସନ ବୈଭବ ସୂର୍ଯ୍ୟବଂଶୀ ସାମିଲ ଅଛନ୍ତି। ଇବ୍ରାହିମ ଜାଦ୍ରାନଙ୍କ ନେତୃତ୍ୱରେ ପଡ଼ିଆକୁ ଓହ୍ଲାଇବ ଟିମ୍ ଆଫଗାନ।ରସିଦ ଖାନ, ରହମାନୁଲ୍ଲା ଗୁରୁବାଜ, ମହମ୍ମଦ ନବୀ, ମୁଜିବ ଉର ରହମାନ, ଏବଂ ନବୀନ-ଉଲ-ହକଙ୍କ ପରି ଅଭିଜ୍ଞ ଖେଳାଳି ଅଛନ୍ତି । ଦିଲ୍ଲୀର ସ୍ପିନିଙ୍ଗ ଟ୍ରାକରେ ଆଫଗାନିସ୍ତାନ ଭାରତକୁ ଜବରଦସ୍ତ ଟକ୍କର ଦେବ।
ବଡ଼ଗଡ଼ ଥାନା ଅଞ୍ଚଳରେ ଯୁବକଙ୍କୁ ଗୁଳିମାଡ଼, MKCGରେ ଭର୍ତ୍ତି…
ଭଞ୍ଜନଗର : ଗଞ୍ଜାମ ଜିଲ୍ଲା ବଡ଼ଗଡ଼ ଥାନା ଅନ୍ତର୍ଗତ ଯୋଡାବନ୍ଧ ନିକଟରେ ଯୁବକଙ୍କୁ ଗୁଳିମାଡ଼ । ଯୁବକ ଜଣଙ୍କ ହେଲେ ସରାବାଡି ଗ୍ରାମର ଜୟସେନ ପ୍ରଧାନ । କୌଣସି କାମରେ ଯୋଡବନ୍ଧ ନିକଟରେ ରହିଥିବା ବେଳେ ୩ ଜଣ ଯୁବକ ବାଇକରେ ଆସି ଗୁଳିକାଣ୍ଡ କରିଥିବା ସୂଚନା ମିଳିଛି । ଗୁରୁତର ଅବସ୍ଥାରେ ପ୍ରଥମେ ଆସିକା ମେଡିକାଲ ଓ ପରେ ବ୍ରହ୍ମପୁର MKCGକୁ ସ୍ଥାନାନ୍ତର କରାଯାଇଛି । ଜୟସେନଙ୍କ ପେଟରେ ଓ ଗୋଡ଼ରେ ଦୁଇଟି ଗୁଳି ବାଜିଛି । ବଡ଼ଗଡ଼ ପୋଲିସ ପହଂଚି ଘଟଣାର ତଦନ୍ତ ଚଲାଇଛି । ପୂର୍ବ ଶତ୍ରୁତାକୁ ନେଇ ଗୁଳିକାଣ୍ଡ ଘଟିଥିବା ଅନୁମାନ କରାଯାଉଛି l
ଆଜି ବ୍ରିକ୍ସ ସମ୍ମିଳନୀରେ ଶେଷ ଦିନ, ହେଇପାରେ ବଡ ନିଷ୍ପତ୍ତି…
ନନ୍ଦିଘୋଷ ବ୍ୟୁରୋ : ଆଜି ବ୍ରିକ୍ସ ସମ୍ମିଳନୀରେ ଶେଷ ଦିନ। ଅନ୍ତର୍ଭୁକ୍ତିମୂଳକ ବିଶ୍ବ ଅଭିବୃଦ୍ଧିର ଭବିଷ୍ୟତ, ସାମର୍ଥ୍ୟର ବିକାଶ, ଉଦ୍ଭାବନ, ସହଯୋଗ ଉପରେ ହେବ ଆଲୋଚନା। ଖାଦ୍ୟ ଓ ଶକ୍ତି ନିରାପତ୍ତା, ସାଧାରଣ ସ୍ବାସ୍ଥ୍ୟ, ବିପର୍ଯ୍ୟୟ ପରିଚାଳନା, ଯୋଗାଣ ଶୃଙ୍ଖଳ ଆଦି ପ୍ରସଙ୍ଗରେ ହେବ ଆଲୋଚନା। ଆଜି ଘୋଷଣା ହେବ ମିଳିତ ଘୋଷଣାନାମା। ଗତକାଲି ବ୍ରିକ୍ସ ସମ୍ମିଳନୀରେ ଉଠିଥିଲା ପହଲଗାମ ଆତଙ୍କୀ ହମଲା ପ୍ରସଙ୍ଗ। କଥାବାର୍ତ୍ତା ଜରିଆରେ ସହମତି, ଏକପାଖିଆ ଟାରିଫ, ବଳପୂର୍ବକ କାର୍ଯ୍ୟାନୁଷ୍ଠାନ ଆଦି ପ୍ରସଙ୍ଗ ବି ଏଥିରେ ସ୍ଥାନ ପାଇଛି। ଶାନ୍ତିପୂର୍ଣ୍ଣ କଥାବାର୍ତ୍ତା ଓ କୂଟନୈତିକ ଆଲୋଚନା ଜରିଆରେ ଅନ୍ତରାଷ୍ଟ୍ରୀୟ ବିବାଦଗୁଡିକର ସମାଧାନ ଲାଗି ସହମତି ହୋଇଥିଲା। ଅଷ୍ଟାଦଶତମ ବ୍ରିକ୍ସ ସମ୍ମିଳନୀରେ ପ୍ରତିନିଧିତ୍ବମୂଳକ, ଗଣତାନ୍ତ୍ରିକ ଓ ବହୁମୁଖୀ ବିଶ୍ବ ବ୍ୟବସ୍ଥା ଉପରେ ଫୋକସ କରାଯାଇଥିଲା। ସଦସ୍ୟ ରାଷ୍ଟ୍ରଗୁଡ଼ିକ ମଧ୍ୟରେ ଅର୍ଥନୈତିକ ସହଭାଗିତାକୁ ବି ଗୁରୁତ୍ବ ଦିଆଯାଇଛି। ସେହିପରି ଜାତିସଂଘ ଘୋଷଣାନାମାରେ ରହିଥିବା ବିଭିନ୍ନ ନୀତିକୁ ବି ଗୁରୁତ୍ବ ଦେଇଛନ୍ତି ସଦସ୍ୟ ରାଷ୍ଟ୍ର। ଜାତିସଂଘ ନିରାପତ୍ତା ପରିଷଦର ସଂସ୍କାର ଲାଗି ବ୍ରିକ୍ସ ଦାବି କରିବା ସହ ନିରାପତ୍ତା ପରିଷଦରେ ଭାରତ ଓ ବ୍ରାଜିଲର ଅଧିକ ଭୂମିକା ପ୍ରସ୍ତାବକୁ ଚୀନ ଓ ରୁଷିଆର ସମର୍ଥନକୁ ପ୍ରଶଂସା କରିଥିଲେ ବ୍ରିକ୍ସ ସଦସ୍ୟ ରାଷ୍ଟ୍ର। ସେହିପରି ଅନ୍ତରାଷ୍ଟ୍ରୀୟ ମୁଦ୍ରା ପାଣ୍ଠି, ବିଶ୍ବବ୍ୟାଙ୍କର ସଂସ୍କାର ଲାଗି ଦାବି କରିଥିଲେ ରାଷ୍ଟ୍ରସଙ୍ଘ। ପରୋକ୍ଷରେ ଆମେରିକାକୁ ସମାଲୋଚନା କରି ବ୍ରିକ୍ସ ରାଷ୍ଟ୍ରଗୋଷ୍ଠୀ କିଛି ରାଷ୍ଟ୍ର ବିରୋଧରେ ଜାରି ହେଉଥିବା ଅର୍ଥନୈତିକ କଟକଣାକୁ ବିରୋଧ କରିଥିଲେ। ସେହିପରି ଆତଙ୍କବାଦକୁ ଶୂନ୍ୟ ସହନଶୀଳତା ଲାଗି ଘୋଷଣାନାମାରେ ସ୍ଥାନୀତ ହୋଇଛି।
ବ୍ରିକ୍ସ ସମ୍ମିଳନୀ ଅବସରରେ ଚୀନ ରାଷ୍ଟ୍ରପତି ସି ଜିନପିଙ୍ଗକୁ ଭେଟିଥିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ଦୁଇ ନେତାଙ୍କ ମଧ୍ୟରେ ବହୁ ପ୍ରସଙ୍ଗରେ ହୋଇଥିଲା ଗୁରୁତ୍ବପୂର୍ଣ୍ଣ ଆଲୋଚନା। ୨୦୨୦ ଗଲୱାନ ସଂଘର୍ଷ ପରେ ଦୁଇ ନେତା ପରସ୍ପରକୁ ହାତ ମିଳାଇଥିଲେ। ଦୁଇ ଦେଶ ମଧ୍ୟରେ ଉତ୍ତମ ସମ୍ପର୍କ ପ୍ରତିଷ୍ଠା ଲାଗି ଦୁଇ ନେତା ସହମତି ପ୍ରକାଶ କରିଥିଲେ।
ମହିଳା ଏସିଆ କପ୍ ଫାଇନାଲ୍ରେ ଭାରତ-ଶ୍ରୀଲଙ୍କା ମୁହାଁମୁହିଁ
ନନ୍ଦିଘୋଷ ବ୍ୟୁରୋ : ଆଜି ମହିଳା ଏସିଆ କପ୍ର ହାଇଭୋଲ୍ଟେଜ୍ ଗ୍ରାଣ୍ଡ ଫାଇନାଲ୍ରେ ମୁହାଁମୁହିଁ ହେବେ ଭାରତ ଓ ଶ୍ରୀଲଙ୍କା। ଦୁବାଇ ଆନ୍ତର୍ଜାତୀୟ କ୍ରିକେଟ୍ ଷ୍ଟାଡିୟମ୍ରେ ରାତି ୮ଟାରେ ଖେଳାଯିବ ଏହି ରୋମାଞ୍ଚକର ମୁକାବିଲା। ପୂରା ଟୁର୍ଣ୍ଣାମେଣ୍ଟରେ ଉଭୟ ଦଳ ଅପରାଜିତ ରହିଥିବାରୁ ଫାଇନାଲ୍କୁ ନେଇ ବଢ଼ିଛି କ୍ରିକେଟ୍ପ୍ରେମୀଙ୍କ ଉତ୍ସାହ। ପ୍ରଥମ ସେମିଫାଇନାଲ୍ରେ ବାଂଲାଦେଶକୁ ୪୦ ରନ୍ରେ ପରାସ୍ତ କରି ଫାଇନାଲ୍ରେ ପ୍ରବେଶ କରିଛି ୭ ଥରର ଚାମ୍ପିଅନ୍ ଭାରତ। ଏବେ ଅଷ୍ଟମ ଥର ପାଇଁ ଟାଇଟଲ୍ ଜିତି ପୁଣିଥରେ ଚାମ୍ପିଅନ୍ ହେବା ଲକ୍ଷ୍ୟରେ ରହିଛି ଟିମ୍ ଇଣ୍ଡିଆ।
ଗେଟ୍ ବଜାର ଫ୍ଲାଏଓଭର ନିର୍ମାଣକୁ ନେଇ ଉଠିଲା ପ୍ରଶ୍ନ
ନନ୍ଦିଘୋଷ ବ୍ୟୁରୋ : ବ୍ରହ୍ମପୁରର ଗେଟ୍ ବଜାର ଅଞ୍ଚଳରେ ଚାଲିଥିବା ଫ୍ଲାଏଓଭର ନିର୍ମାଣରେ ଅବହେଳା ଓ ନିମ୍ନମାନର ସାମଗ୍ରୀ ବ୍ୟବହାର ହେଉଥିବା ନେଇ ଅଭିଯୋଗ ଆସିଛି। ପ୍ରକଳ୍ପର ବିଳମ୍ବ, ଅବ୍ୟବସ୍ଥା ଓ ନିର୍ମାଣର ମାନକୁ ନେଇ ପ୍ରଶ୍ନ ଉଠାଇଛନ୍ତି ବ୍ରହ୍ମପୁର ସାଂସଦ ଡ. ପ୍ରଦୀପ ପାଣିଗ୍ରାହୀ। ସାଂସଦ ଏନେଇ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କୁ ଚିଠି ଲେଖି ତୁରନ୍ତ ହସ୍ତକ୍ଷେପ ଦାବି କରିଛନ୍ତି। ଚିଠିରେ ସ୍ଥାନୀୟ ବାସିନ୍ଦା, ଯାତ୍ରୀ, ନାଗରିକ ସଙ୍ଗଠନ ଓ ସ୍ଥାନୀୟ ନେତାମାନେ ଦୀର୍ଘଦିନ ଧରି ଫ୍ଲାଏଓଭର ନିର୍ମାଣକୁ ନେଇ ଅଭିଯୋଗ କରିଆସୁଥିବା ଦର୍ଶାଇଛନ୍ତି। ବିଶେଷକରି ନିର୍ମାଣରେ ବ୍ୟବହୃତ କଞ୍ଚାମାଲର ଗୁଣବତ୍ତା ଓ ଗ୍ରେଡ୍କୁ ନେଇ ସନ୍ଦେହ ଥିବା ନେଇ ସାଂସଦ ମୁଖ୍ୟମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରିଛନ୍ତି। ଏହାସହ ଫ୍ଲାଏଓଭର ନିର୍ମାଣରେ ବିଳମ୍ବ ଯୋଗୁଁ ଗେଟ୍ ବଜାର ଅଞ୍ଚଳରେ ଲୋକଙ୍କ ଦୁର୍ଦ୍ଦଶା ବଢ଼ୁଥିବା ଅଭିଯୋଗ ହୋଇଛି। ନିର୍ମାଣ କାର୍ଯ୍ୟ ଯୋଗୁଁ ଯାତାୟାତ ବ୍ୟବସ୍ଥା ପ୍ରଭାବିତ ହେବା ସହ ନିର୍ମାଣସ୍ଥଳରୁ ଉଡ଼ୁଥିବା ଧୂଳି ଯୋଗୁଁ ପ୍ରଦୂଷଣ ବଢ଼ୁଥିବା କୁହାଯାଇଛି। ଦୀର୍ଘ ସମୟ ଧରି କାମ ଚାଲିଥିବାରୁ ରାସ୍ତାକଡ଼ର ବ୍ୟବସାୟୀମାନେ ମଧ୍ୟ ପ୍ରଭାବିତ ହେଉଥିବା ଅଭିଯୋଗ ରହିଛି।
ନିର୍ମାଣ କାର୍ଯ୍ୟରେ ତ୍ରୁଟି ଥିବା ନେଇ ସ୍ଥାନୀୟ ନେତା ଓ ପ୍ରତିନିଧିମାନେ ବାରମ୍ବାର ସମ୍ପୃକ୍ତ କର୍ତ୍ତୃପକ୍ଷଙ୍କୁ ଜଣାଇଥିଲେ ମଧ୍ୟ କାହିଁକି ଆବଶ୍ୟକ ପଦକ୍ଷେପ ନିଆଯାଉନାହିଁ, ତାହାକୁ ନେଇ ପ୍ରଶ୍ନ ଉଠିଛି। ନିର୍ମାଣାଧୀନ ଫ୍ଲାଏଓଭରରେ ଗୁଣବତ୍ତା ଯାଞ୍ଚ ପାଇଁ ନିୟମିତ ଓ ପ୍ରଭାବଶାଳୀ ବ୍ୟବସ୍ଥା ରହିଛି କି ନାହିଁ, ତାହା ସ୍ପଷ୍ଟ କରିବାକୁ ମଧ୍ୟ ଦାବି ହୋଇଛି। ଭୁବନେଶ୍ୱର ବମିଖାଲ ଫ୍ଲାଏଓଭର ଭୁଶୁଡ଼ିବା ଘଟଣାର ଉଦାହରଣ ଦେଇ ସାଂସଦ ଏହି ପ୍ରସଙ୍ଗର ଗୁରୁତ୍ୱ ଦର୍ଶାଇଛନ୍ତି। ତେଣୁ ଫ୍ଲାଏଓଭର ନିର୍ମାଣରେ ବ୍ୟବହୃତ ସାମଗ୍ରୀର ନମୁନା ପରୀକ୍ଷା ସହ ବୈଷୟିକ ଅଡିଟ୍ ତୁରନ୍ତ କରାଯିବା ନେଇ ଦାବି ଜୋର ଧରିଛି।
ବାଲେଶ୍ୱରରେ ଏଥର ଡିଜେ ନୁହେଁ, ଘଣ୍ଟ-ଶଙ୍ଖରେ ହେବ ଭସାଣୀ ଉତ୍ସବ
ନନ୍ଦିଘୋଷ ବ୍ୟୁରୋ : ବାଲେଶ୍ୱରରେ ଚଳିତ ବର୍ଷ ଗଣେଶ ପୂଜା ଓ ଭସାଣୀ ଉତ୍ସବରେ ଆଉ ବାଜିବନି କାନଫଟା ଡିଜେ। ଝଲସିବନି ଆଖିଧରା ଲେଜର ଲାଇଟ୍। ଉଚ୍ଚ ନ୍ୟାୟାଳୟଙ୍କ କଡ଼ା ନିର୍ଦ୍ଦେଶ ପରେ ଜିଲ୍ଲା ଓ ପୋଲିସ ପ୍ରଶାସନ ଏଥର ଆରମ୍ଭରୁ ହିଁ କଠୋର ଆଭିମୁଖ୍ୟ ଗ୍ରହଣ କରିଛି। ଗଣେଶ ପୂଜା ଓ ଭସାଣ ଉତ୍ସବ ସମୟରେ ଡିଜେ, ମୋଡିଫାଏଡ୍ ସାଉଣ୍ଡ ସିଷ୍ଟମ୍ ଏବଂ ଲେଜର ଲାଇଟ୍ ବ୍ୟବହାର ଉପରେ ସମ୍ପୂର୍ଣ୍ଣ ରୋକ୍ ଲଗାଯାଇଛି। ପ୍ରଶାସନ ପକ୍ଷରୁ ଆୟୋଜିତ ସମନ୍ୱୟ ବୈଠକରେ ସ୍ପଷ୍ଟ କରାଯାଇଛି ଯେ, କୌଣସି ପରିସ୍ଥିତିରେ ଡିଜେ କିମ୍ବା ମୋଡିଫାଏଡ୍ ସାଉଣ୍ଡ ସିଷ୍ଟମ୍କୁ ଅନୁମତି ଦିଆଯିବ ନାହିଁ। କେବଳ ଧାର୍ଯ୍ୟ ଡେସିବଲ୍ ସୀମା ମଧ୍ୟରେ ସାଧାରଣ ସାଉଣ୍ଡ ବକ୍ସ ବ୍ୟବହାର କରିବାକୁ ଅନୁମତି ରହିବ। ଏହା ସହିତ ଆଖି ଓ ସ୍ୱାସ୍ଥ୍ୟ ପାଇଁ ବିପଜ୍ଜନକ ହୋଇପାରୁଥିବା ଲେଜର ଲାଇଟ୍ ବ୍ୟବହାରକୁ ମଧ୍ୟ ସମ୍ପୂର୍ଣ୍ଣ ନିଷେଧ କରାଯାଇଛି। ନିୟମ ଉଲ୍ଲଂଘନ କଲେ ସମ୍ପୃକ୍ତ ପୂଜା କମିଟି ସହିତ ସାଉଣ୍ଡ ସିଷ୍ଟମ୍ ମାଲିକ ଓ ଆୟୋଜକଙ୍କ ବିରୋଧରେ ଦୃଢ଼ ଆଇନଗତ କାର୍ଯ୍ୟାନୁଷ୍ଠାନ ନିଆଯିବ ବୋଲି ପ୍ରଶାସନ ସ୍ପଷ୍ଟ ଚେତାବନୀ ଦେଇଛି। ତେଣୁ ଏଥର ବାଲେଶ୍ୱରର ଭସାଣୀ ଉତ୍ସବରେ ଡିଜେର କାନଫଟା ଶବ୍ଦ ବଦଳରେ ସାଧାରଣ ସାଉଣ୍ଡ ବକ୍ସ ଓ ପାରମ୍ପରିକ ବାଦ୍ୟର ତାଳେ ଉତ୍ସବ ପାଳନ କରାଯିବ। କେବଳ ଶବ୍ଦ ପ୍ରଦୂଷଣ ନୁହେଁ, ମେଢ଼ ନିର୍ମାଣକୁ ନେଇ ମଧ୍ୟ ପ୍ରଶାସନ କଟକଣା ଲଗାଇଛି। ବିଦ୍ୟୁତ୍ ଦୁର୍ଘଟଣାକୁ ଏଡ଼ାଇବା ପାଇଁ ମେଢ଼ର ଉଚ୍ଚତା ୧୦ରୁ ୧୨ ଫୁଟ୍ ମଧ୍ୟରେ ସୀମିତ ରଖିବାକୁ କୁହାଯାଇଛି। ଏହା ସହିତ ଅଶ୍ଳୀଳ ଗୀତ ବଜାଇବା ଏବଂ ବିକୃତ ମୂର୍ତ୍ତି ପ୍ରଦର୍ଶନ ଉପରେ ମଧ୍ୟ ରୋକ୍ ଲଗାଯାଇଛି। ପ୍ରଶାସନର ଏହି ‘ନୋ-ଡିଜେ’ ନିଷ୍ପତ୍ତିକୁ ସ୍ଥାନୀୟ ବୁଦ୍ଧିଜୀବୀ ଓ ବରିଷ୍ଠ ନାଗରିକମାନେ ସ୍ୱାଗତ କରିଛନ୍ତି। ବିଗତ ବର୍ଷଗୁଡ଼ିକରେ ଭସାଣୀ ସମୟରେ ଡିଜେର ପ୍ରଚଣ୍ଡ ଶବ୍ଦ ଓ ଲେଜର ଲାଇଟ୍ ଯୋଗୁଁ ରୋଗୀ, ବୃଦ୍ଧବୃଦ୍ଧା ଓ ଛୋଟ ପିଲାମାନେ ଅସୁବିଧାରେ ପଡ଼ୁଥିବାରୁ ଏଭଳି କଟକଣା ଜରୁରୀ ବୋଲି ସେମାନେ କହିଛନ୍ତି।
ଅନ୍ୟପଟେ ବାଲେଶ୍ୱରର କିଛି ପ୍ରମୁଖ କ୍ଲବ୍ ମଧ୍ୟ ପ୍ରଶାସନର ନିଷ୍ପତ୍ତିକୁ ସମ୍ମାନ ଜଣାଇଛନ୍ତି। ଡିଜେ ବଦଳରେ ପାରମ୍ପରିକ ବାଦ୍ୟ, ଘଣ୍ଟ ଓ ଶଙ୍ଖର ଧ୍ୱନି ମଧ୍ୟରେ ଭସାଣୀ ଉତ୍ସବକୁ ଆଧ୍ୟାତ୍ମିକ ଓ ଶାନ୍ତିପୂର୍ଣ୍ଣ ଭାବେ ପାଳନ କରିବାକୁ କିଛି କ୍ଲବ୍ ନିଷ୍ପତ୍ତି ନେଇଛନ୍ତି। ଫଳରେ ଏଥର ବାଲେଶ୍ୱରରେ ଗଣେଶ ପୂଜା ଓ ଭସାଣୀ ଉତ୍ସବରେ ଡିଜେର ତୀବ୍ର ଶବ୍ଦ ବଦଳରେ ପାରମ୍ପରିକ ବାଦ୍ୟର ଧ୍ୱନି ଶୁଣିବାକୁ ମିଳିବ। ତେବେ ପ୍ରଶାସନର ଚେତାବନୀ କେବଳ ବୈଠକ ଓ ନିର୍ଦ୍ଦେଶ ମଧ୍ୟରେ ସୀମିତ ନରହି ଭସାଣୀ ସମୟରେ ରାଜରାସ୍ତା ଉପରେ କଡ଼ା ନଜର ରଖିବାକୁ ସାଧାରଣରେ ଦାବି ହୋଇଛି। ନିୟମ ଖିଲାପ କରୁଥିବା ଆୟୋଜକଙ୍କ ବିରୋଧରେ ତୁରନ୍ତ କାର୍ଯ୍ୟାନୁଷ୍ଠାନ ହେଲେ ହିଁ ଶବ୍ଦ ପ୍ରଦୂଷଣ ନିୟନ୍ତ୍ରଣ ସହ ଗଣେଶ ପୂଜା ଓ ଭସାଣୀ ଉତ୍ସବ ଶାନ୍ତିଶୃଙ୍ଖଳାର ସହ ପାଳନ ହୋଇପାରିବ ବୋଲି ମତ ପ୍ରକାଶ ପାଇଛି।
ଗଜେଶ୍ୱର ହାଇସ୍କୁଲରେ ଭୂତ ଭୟ! ଛାତ୍ରୀଙ୍କ ଅସ୍ୱାଭାବିକ ଆଚରଣ, ସ୍କୁଲ ଯାଉନାହାନ୍ତି ଛାତ୍ରଛାତ୍ରୀ
ନନ୍ଦିଘୋଷ ବ୍ୟୁରୋ : କେନ୍ଦ୍ରାପଡ଼ା ଜିଲ୍ଲା ମହାକାଳପଡ଼ା ବ୍ଲକ ଦେଉଳପଡ଼ା ପଞ୍ଚାୟତର ଗଜେଶ୍ୱର ସରକାରୀ ଉଚ୍ଚ ବିଦ୍ୟାଳୟରେ ଏବେ ଭୂତ ଭୟକୁ ନେଇ ଆତଙ୍କର ପରିବେଶ। ବିଦ୍ୟାଳୟରେ ନବମ ଓ ଦଶମ ଶ୍ରେଣୀର କିଛି ଛାତ୍ରୀ ଗତ ୪ ଦିନ ଧରି ଅସ୍ୱାଭାବିକ ଆଚରଣ ପ୍ରଦର୍ଶନ କରୁଥିବାରୁ ଅଭିଭାବକମାନେ ଚିନ୍ତିତ ହୋଇପଡ଼ିଛନ୍ତି। ପ୍ରାୟ ୭ଟି ଗାଁରୁ ୩୦୦ରୁ ଅଧିକ ଛାତ୍ରଛାତ୍ରୀ ଏହି ବିଦ୍ୟାଳୟକୁ ପାଠ ପଢ଼ିବାକୁ ଆସନ୍ତି। ହେଲେ ଗତ କିଛିଦିନ ଧରି ପ୍ରାର୍ଥନା ସମୟରେ କିମ୍ବା କ୍ଲାସ ଚାଲିଥିବା ବେଳେ କିଛି ଛାତ୍ରୀ ହଠାତ୍ ତଳେ ପଡ଼ିଯିବା ସହ ମୁଣ୍ଡ, ଛାତି ଓ ଗୋଡ଼ ବିନ୍ଧା ହେଉଥିବା ଅଭିଯୋଗ ହୋଇଛି। କେତେକ ଛାତ୍ରୀ ଭୟଭୀତ ହୋଇ ଚିତ୍କାର କରି ମୋତେ ଛାଡ଼, ମୁଁ ଘରକୁ ଯିବି ବୋଲି କହୁଥିବା ଜଣାପଡ଼ିଛି। ଘଟଣା ପରେ ବିଦ୍ୟାଳୟ ପକ୍ଷରୁ ଅଭିଭାବକମାନଙ୍କୁ ଡକାଯାଇ ଛାତ୍ରୀମାନଙ୍କୁ ତୁରନ୍ତ ମେଡିକାଲ ନେଇ ଚିକିତ୍ସା କରାଇବାକୁ ପରାମର୍ଶ ଦିଆଯାଇଥିଲା। ଚିକିତ୍ସା ପରେ ଅସୁସ୍ଥ ଛାତ୍ରୀମାନେ ସୁସ୍ଥ ହୋଇ ଘରକୁ ଫେରିଥିବା ଜଣାପଡ଼ିଛି। ଅନ୍ୟପଟେ ଘଟଣାକୁ ନେଇ କିଛି ଅଭିଭାବକ ବିଦ୍ୟାଳୟରେ ଗୁଣିଗାରେଡ଼ି କିମ୍ବା ଭୂତପ୍ରେତର ପ୍ରଭାବ ଥିବା ଆଶଙ୍କା କରୁଛନ୍ତି। ଏହି ଭୟରେ ଅନେକ ଅଭିଭାବକ ନିଜ ପିଲାମାନଙ୍କୁ ବିଦ୍ୟାଳୟକୁ ପଠାଉନାହାନ୍ତି। ଏପରିକି କିଛି ସ୍ଥାନରେ ଗୁଣିଆକୁ ଡାକି ଝଡ଼ାଫୁଙ୍କା ମଧ୍ୟ ଆରମ୍ଭ ହୋଇଥିବା ଜଣାପଡ଼ିଛି।
ଘଟଣାର ପ୍ରକୃତ କାରଣ ଜାଣିବା ପାଇଁ ଆଜି ଏକ ମେଡିକାଲ ଟିମ୍ ବିଦ୍ୟାଳୟରେ ପହଞ୍ଚି ଛାତ୍ରୀମାନଙ୍କର ବ୍ଲଡ୍ ପ୍ରେସର, ବ୍ଲଡ୍ ଟେଷ୍ଟ ଓ ହିମୋଗ୍ଲୋବିନ ପରୀକ୍ଷା କରିଛି। ଏଥିସହ ଛାତ୍ରୀମାନେ ଏଭଳି ଅସ୍ୱାଭାବିକ ଆଚରଣ କଲେ କିପରି ତୁରନ୍ତ ପଦକ୍ଷେପ ନେବେ, ସେନେଇ ଶିକ୍ଷକ-ଶିକ୍ଷୟିତ୍ରୀମାନଙ୍କୁ ମେଡିକାଲ ଟିମ୍ ସଚେତନ କରିଛି। ବିଦ୍ୟାଳୟରେ ଚିକିତ୍ସା ଓ ସଚେତନତା ପଦକ୍ଷେପ ଆରମ୍ଭ ହୋଇଥିଲେ ମଧ୍ୟ ଭୂତପ୍ରେତକୁ ନେଇ ଛାତ୍ରୀ ଓ ଅଭିଭାବକଙ୍କ ମନରେ ରହିଥିବା ଭୟ ଏବେ ବି ଦୂର ହୋଇନାହିଁ। ଘଟଣାର ପ୍ରକୃତ କାରଣ ଚିକିତ୍ସା ଓ ବିଶେଷଜ୍ଞ ଯାଞ୍ଚ ପରେ ହିଁ ସ୍ପଷ୍ଟ ହେବ।
ଥମୁନି ଜନନୀ ଯନ୍ତ୍ରଣା, ପୁଣି ଖଟିଆରେ ବୁହାହେଲେ ଗର୍ଭବତୀ
ନନ୍ଦିଘୋଷ ବ୍ୟୁରୋ : ଥମୁନି ଜନନୀ ଯନ୍ତ୍ରଣା। ରାସ୍ତା ନଥିବାରୁ ପୁଣି ଖଟିଆରେ ବୁହାହେଲେ ଜଣେ ଗର୍ଭବତୀ। ପ୍ରାୟ ୩.୫ କିଲୋମିଟର କାଦୁଅ ରାସ୍ତାରେ ଖଟିଆରେ ବୋହି ଗର୍ଭବତୀଙ୍କୁ ଆମ୍ବୁଲାନ୍ସ ନିକଟକୁ ନେଲେ ପରିବାର ଲୋକ ଓ ଗ୍ରାମବାସୀ। ରାୟଗଡ଼ା ଜିଲ୍ଲା ଗୁଡ଼ାରି ବ୍ଲକ ଶିରିଗୁଡ଼ା ପଞ୍ଚାୟତ ସାଡ଼କଣା ଗାଁରୁ ଆସିଛି ଏଭଳି ବିକଳ ଚିତ୍ର। ସାଡ଼କଣା ଗାଁର ଚାମି ମାମ୍ବାଲାକାଙ୍କ ପ୍ରସବ ବେଦନା ହେବାରୁ ପରିବାର ଲୋକେ ଆମ୍ବୁଲାନ୍ସକୁ ଫୋନ୍ କରିଥିଲେ। ହେଲେ ଗାଁକୁ ଯିବା ପାଇଁ ରାସ୍ତା ନଥିବାରୁ ଆମ୍ବୁଲାନ୍ସ ଗାଁ ଭିତରକୁ ପହଞ୍ଚି ପାରିନଥିଲା। ଫଳରେ ପରିବାର ଲୋକ ଓ ଗ୍ରାମବାସୀ ଗର୍ଭବତୀଙ୍କୁ ଏକ ଖଟିଆରେ ବୋହି କାଦୁଅ ଭରା ରାସ୍ତା ଦେଇ ପ୍ରାୟ ୩.୫ କିଲୋମିଟର ଦୂର ବଡ଼ପଙ୍କାଳ ପର୍ଯ୍ୟନ୍ତ ନେଇଥିଲେ। ସେଠାରୁ ଆମ୍ବୁଲାନ୍ସ ଯୋଗେ ତାଙ୍କୁ ଗୁଡ଼ାରି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ନିଆଯାଇଥିଲା।
ସ୍ୱାସ୍ଥ୍ୟକେନ୍ଦ୍ରରେ ଚାମି ମାମ୍ବାଲାକା ଏକ ପୁତ୍ର ସନ୍ତାନ ଜନ୍ମ ଦେଇଥିବା ଜଣାପଡ଼ିଛି। ମା’ ଓ ନବଜାତ ଶିଶୁ ଉଭୟ ସୁସ୍ଥ ଥିବା ସୂଚନା ମିଳିଛି। ତେବେ ଗାଁର ରାସ୍ତା ସମସ୍ୟାକୁ ନେଇ ଗ୍ରାମବାସୀ ଦୀର୍ଘଦିନ ଧରି ସରକାର ଓ ସ୍ଥାନୀୟ ପ୍ରଶାସନ ନିକଟରେ ବାରମ୍ବାର ଅଭିଯୋଗ କରିଆସୁଥିବା କହିଛନ୍ତି। ହେଲେ ଏଯାଏଁ ସମସ୍ୟାର ସମାଧାନ ହୋଇନଥିବା ଅଭିଯୋଗ ହୋଇଛି। ରାସ୍ତା ଅଭାବରୁ ଜରୁରୀ ସମୟରେ ରୋଗୀ ଓ ଗର୍ଭବତୀଙ୍କୁ ଏଭଳି ଦୁର୍ଦ୍ଦଶା ଭୋଗିବାକୁ ପଡ଼ୁଥିବାରୁ ତୁରନ୍ତ ରାସ୍ତା ନିର୍ମାଣ ପାଇଁ ଦାବି ହୋଇଛି।
ଢୋଲ, ନିଶାନରେ ଦୁଲୁକୁଛି ଗାଁ ଦାଣ୍ଡ, କଳାହାଣ୍ଡିରେ ଆରମ୍ଭ ହେଲା ନୂଆଁଖାଇ
ନନ୍ଦିଘୋଷ ବ୍ୟୁରୋ : ଢୋଲ, ନିଶାନ ଓ ଘୁମୁରାର ଘୁମ୍ଘୁମ୍ ଶବ୍ଦରେ ଦୁଲୁକୁଛି ଗାଁ ଦାଣ୍ଡ। ପିଠାପଣାରେ ମହକୁଛି ପରିବେଶ। ଆରମ୍ଭ ହୋଇଛି କଳାହାଣ୍ଡିର ନୂଆଁଖାଇ ପର୍ବ। ସପ୍ତପୁରୀ ଅମାବାସ୍ୟା ପରଦିନ ପଥର୍ଲା, ବାହାଦୁର ପଦର ଓ ପଲକାପଡ଼ା ଗାଁରେ ଧୁମ୍ଧାମରେ ନୂଆଁଖାଇ ପାଳିତ ହୋଇଛି। ପଶ୍ଚିମ ଓଡ଼ିଶାର ଅନ୍ୟ ଜିଲ୍ଲାଗୁଡ଼ିକରେ ସାଧାରଣତଃ ଗୋଟିଏ ଦିନରେ ନୂଆଁଖାଇ ପାଳନ ହେଉଥିବା ବେଳେ କଳାହାଣ୍ଡିରେ ଏହା ପର୍ଯ୍ୟାୟକ୍ରମେ ପାଳନ କରାଯାଏ। ନୂଆଁଖାଇ ଅବସରରେ ପ୍ରଥମେ ଗାଁର ଇଷ୍ଟଦେବୀଙ୍କ ନିକଟରେ ପୂଜାର୍ଚ୍ଚନା କରାଯାଇ ନବାନ୍ନ ଲାଗି କରାଯାଇଥିଲା। ଏହାପରେ ସାନମାନେ ନୂଆ ବସ୍ତ୍ର ପିନ୍ଧି ବଡ଼ମାନଙ୍କୁ ମୁଣ୍ଡିଆ ମାରି ଆଶୀର୍ବାଦ ନେଇଥିଲେ। ପରେ ଜମିଥିଲା ନାଚଗୀତର ଆସର।
କଳାହାଣ୍ଡିରେ ସପ୍ତପୁରୀ ଅମାବାସ୍ୟାଠାରୁ ଆରମ୍ଭ ହେଉଥିବା ନୂଆଁଖାଇ ପର୍ବ ଦଶହରା ଦଶମୀରେ ଶେଷ ହୋଇଥାଏ। ଆସନ୍ତା ୧୫ ତାରିଖରେ ପଶ୍ଚିମ ଓଡ଼ିଶାବାସୀ ନୂଆଁଖାଇ ପାଳନ କରିବେ। ଏଥିପାଇଁ ଏବେଠୁ ଚଳଚଞ୍ଚଳ ହୋଇଉଠିଛି ସମ୍ବଲପୁର ଜିଲ୍ଲାର କୁଚିଣ୍ଡା ଉପଖଣ୍ଡ। ଲୋକେ ସଜବାଜ ହେବା ସହ ଘରଦ୍ୱାର ଲିପାପୋଛା କରୁଛନ୍ତି। ଲୁଗା ଦୋକାନଠାରୁ ଆରମ୍ଭ କରି ପରିବା ହାଟ ପର୍ଯ୍ୟନ୍ତ ସବୁଠି ଲାଗିଛି ଲୋକଙ୍କ ଭିଡ଼। ସେପଟେ ସୁବର୍ଣ୍ଣପୁର ଜିଲ୍ଲା ବିନିକା ବ୍ଲକର ଜଶପୁର ଗାଁ ମଧ୍ୟ ନୂଆଁଖାଇ ପାଇଁ ଚଳଚଞ୍ଚଳ ହୋଇଉଠିଛି। ଘରେ ଘରେ ଚାଲିଛି ପ୍ରସ୍ତୁତି। ନୂଆ ଧାନ, ନୂଆ ପୋଷାକ ଓ ପାରମ୍ପରିକ ରୀତିନୀତି ସହ ନୂଆଁଖାଇକୁ ନେଇ ଲୋକଙ୍କ ମଧ୍ୟରେ ଦେଖାଦେଇଛି ବେଶ୍ ଉତ୍ସାହ।
ଗଣେଶ ପୂଜା ପାଇଁ ଚଳଚଞ୍ଚଳ ଯାଜପୁର, ମୂର୍ତ୍ତି ନିର୍ମାଣରେ ବ୍ୟସ୍ତ କାରିଗର
ନନ୍ଦିଘୋଷ ବ୍ୟୁରୋ : ଆଉ ଦିନକ ପରେ ଗଣେଶ ପୂଜା। ଧରାପୃଷ୍ଠକୁ ଅବତରଣ କରିବେ ଅଗ୍ରପୂଜ୍ୟ ଗଜାନନ। ଏଥିପାଇଁ ଚାରିଆଡ଼େ ଉତ୍ସବର ମାହୋଲ। ଚିକମିକ ଆଲୋକରେ ଝଲସିବ ରାସ୍ତାଘାଟ। ବିଭିନ୍ନ ପୂଜା ମଣ୍ଡପରେ ଚାଲିଛି ଜୋରଦାର ପ୍ରସ୍ତୁତି। ଯାଜପୁରରେ ଗଣେଶ ମୂର୍ତ୍ତି ନିର୍ମାଣ ଜୋରଦାର ଚାଲିଥିବା ବେଳେ ଦିନରାତି ଏକ କରି ମୂର୍ତ୍ତିରେ ଶେଷ ସ୍ପର୍ଶ ଦେଉଛନ୍ତି କାରିଗର। କାରିଗରଙ୍କ ଆଙ୍ଗୁଠିର ପ୍ରତିଟି ସ୍ପର୍ଶରେ ମାଟି ପାଉଛି ଜୀବନ୍ୟାସ। ବିଭିନ୍ନ ଡିଜାଇନର ମୂର୍ତ୍ତି ନେବା ପାଇଁ ପୂଜା କମିଟିଗୁଡ଼ିକ ମଧ୍ୟରେ ଲାଗିଛି ପ୍ରତିଯୋଗିତା। ମୂର୍ତ୍ତି ନେବା ପାଇଁ କାରିଗରଙ୍କ ନିକଟରେ ଜମୁଛି ଗ୍ରାହକଙ୍କ ଭିଡ଼।
ସେପଟେ ଗଣେଶ ପୂଜା ପାଇଁ ଚଳଚଞ୍ଚଳ ହୋଇଉଠିଛି ବଡ଼ମ୍ବା-ନରସିଂହପୁର ଅଞ୍ଚଳ। ବିଭିନ୍ନ ପୂଜା ମଣ୍ଡପରେ ଚାଲିଛି ଜୋରଦାର ପ୍ରସ୍ତୁତି। କିଏ ମଣ୍ଡପ ସଜାଇବାରେ ବ୍ୟସ୍ତ ତ ଆଉ କିଏ ତୋରଣ ନିର୍ମାଣରେ ଲାଗିପଡ଼ିଛନ୍ତି। ପୂଜା ପାଇଁ କାରିଗରଙ୍କୁ ନାହିଁ ଫୁରସତ। ଗଣେଶ ପୂଜାକୁ ନେଇ ପୁରପଲ୍ଲୀରେ ଏବେଠୁ ଉତ୍ସବର ମାହୋଲ ସୃଷ୍ଟି ହୋଇଥିବା ବେଳେ ଅଗ୍ରପୂଜ୍ୟ ଗଜାନନଙ୍କ ଆଗମନକୁ ଅପେକ୍ଷା କରିଛନ୍ତି ସମସ୍ତେ।