ନନ୍ଦିଘୋଷ ବ୍ୟୁରୋ:ବିଳମ୍ବିତ ରାତିରେ ଭୟଙ୍କର ବିସ୍ଫୋରଣ । ଗୋଟିଏ ପରିବାରର ୩ ଜଣ ଗୁରୁତର। ଗଞ୍ଜାମ ଜିଲ୍ଲା ଖଲ୍ଲିକୋଟ ବିଜ୍ଞାପିତ ଅଞ୍ଚଳ ପରିଷଦ ଅନ୍ତର୍ଗତ ଅରବିନ୍ଦ ନଗର ଦ୍ୱିତୀୟ ଲାଇନ୍ରେ ବିଳମ୍ବିତ ରାତିରେ ଏକ ଘର ଭିତରେ ଭୟଙ୍କର ବିସ୍ଫୋରଣ ଘଟିଛି । ଏହି ଦୁର୍ଘଟଣାରେ ଘରେ ଥିବା ୩ଜଣ ଗୁରୁତର ଭାବେ ଆହତ ହୋଇଛନ୍ତି । ବିସ୍ଫୋରଣର ତୀବ୍ରତା ଏତେ ଅଧିକ ଥିଲା ଯେ ଘରର ଲୁହା ଗ୍ରୀଲ୍ ଉପୁଡ଼ି ଯିବା ସହ କାନ୍ଥରେ ବଡ଼ ଫାଟ ସୃଷ୍ଟି ହୋଇଛି । ଏହାସହ କିଛି କାନ୍ଥ ଭାଙ୍ଗି ଯାଇଛି । ସମସ୍ତ ଆହତଙ୍କୁ ତୁରନ୍ତ ଉଦ୍ଧାର କରାଯାଇ ପ୍ରାଥମିକ ଚିକିତ୍ସା ପରେ ଅଧିକ ଚିକିତ୍ସା ପାଇଁ ବ୍ରହ୍ମପୁର ବଡ଼ ମେଡିକାଲକୁ ସ୍ଥାନାନ୍ତର କରାଯାଇଛି । ତେବେ ଘର ଭିତରେ କେଉଁ କାରଣରୁ ଏହି ବିସ୍ଫୋରଣ ଘଟିଲା, ତାହା ବର୍ତ୍ତମାନ ସୁଦ୍ଧା ଅସ୍ପଷ୍ଟ ରହିଛି । ଘର ଭଡାରେ ରହିଥିବା କପିଳ ମହାରଣା ତାଙ୍କ ପରିବାରର ୩ ଜଣ ଗୁରୁତର ହୋଇଛନ୍ତି ।
Home Blog
ଗ୍ରୋସରୀ ଦୋକାନରେ ଭୟାବହ ଅଗ୍ନିକାଣ୍ଡ, ୫ ଲକ୍ଷରୁ ଅଧିକ ଟଙ୍କାର କ୍ଷତି
ନନ୍ଦିଘୋଷ ବ୍ୟୁରୋ:ଦୋକାନରେ ଲାଗିଲା ନିଆଁ । ଲକ୍ଷାଧିକ ଟଙ୍କାର ସମ୍ପତି ନଷ୍ଟ । ରାୟଗଡ଼ା ରାମକୃଷ୍ଣ ନଗର ସ୍ଥିତ ଏକ ଗ୍ରୋସରୀ ଦୋକାନରେ ହଠାତ୍ ଭୀଷଣ ନିଆଁ ଲାଗିଯିବାରୁ ଲକ୍ଷାଧିକ ଟଙ୍କାର ସମ୍ପତ୍ତି ପୋଡ଼ି ପାଉଁଶ ହୋଇଯାଇଛି । ରାଜେନ୍ଦ୍ର ମିଶ୍ରଙ୍କ ଗ୍ରୋସେରୀ ଦୋକାନରେ କୌଣସି କାରଣବଶତଃ ହଠାତ୍ ନିଆଁ ଲାଗିଯାଇଥିଲା । ଦେଖୁ ଦେଖୁ ନିଆଁ ଚାରିଆଡ଼େ ବ୍ୟାପିଯାଇଥିଲା । ସ୍ଥାନୀୟ ଲୋକେ ଅଗ୍ନିଶମ ବିଭାଗକୁ ଖବର ଦେଇଥିଲେ । ଅଗ୍ନିଶମ ବାହିନୀର ୧୨ ଜଣିଆ ଟିମ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ କରିଛନ୍ତି । ଦୋକାନରେ ଥିବା ଆଇସକ୍ରିମ ଫ୍ରିଜ ସମେତ ପ୍ରାୟ ୫ ଲକ୍ଷ ଟଙ୍କାରୁ ଉର୍ଦ୍ଧ୍ବ ସାମଗ୍ରୀ ପୋଡ଼ି ନଷ୍ଟ ହୋଇଯାଇଥିବା ଜଣାପଡ଼ିଛି ।
ଭବାନୀପାଟଣାରେ ଭୟଙ୍କର ଦୁର୍ଘଟଣା, ପିକ୍ଅପ୍ ଧକ୍କାରେ ଜଣେ ମୃତ
ନନ୍ଦିଘୋଷ ବ୍ୟୁରୋ:କଳାହାଣ୍ଡି ଜିଲ୍ଲା ଭବାନୀପାଟଣା ସହରର ଓଡ଼ିଆ ବାଙ୍ଗଟି ପଡ଼ା ଛକ ନିକଟରେ ମର୍ମନ୍ତୁଦ ସଡ଼କ ଦୁର୍ଘଟଣା। ଏକ ପିକ୍ଅପ୍ ଭ୍ୟାନ୍ ଦୁଇ ଜଣ ବାଇକ୍ ଆରୋହୀଙ୍କୁ ଧକ୍କା ଦେବା ପରେ ରାସ୍ତାକଡ଼ରେ ଥିବା ଏକ ଘରର କାନ୍ଥକୁ ଭାଙ୍ଗି ଦେଇଛି । ଏହି ଦୁର୍ଘଟଣାରେ ଜଣେ ବାଇକ୍ ଆରୋହୀଙ୍କ ମୃତ୍ୟୁ ହୋଇଥିବା ବେଳେ ଅନ୍ୟ ଜଣେ ଗୁରୁତର ଆହତ ହୋଇଛନ୍ତି । ମୃତକ ଜଣକ ଭବାନୀପାଟଣା ସହରର ଅନିଲ ନାଏକ । ଦୁର୍ଘଟଣାରେ ପିକ୍ଅପ୍ ଭ୍ୟାନ୍ଟି ଘରର କାନ୍ଥ ଭାଙ୍ଗି ଭିତରକୁ ପଶିଯାଇଥିବା ବେଳେ ଘର ଭିତରେ ଥିବା ପରିବାର ସଦସ୍ୟମାନେ ଅଳ୍ପକେ ଏକ ବଡ଼ ଅଘଟଣରୁ ବର୍ତ୍ତିଯାଇଛନ୍ତି । ଖବର ପାଇ ଭବାନୀପାଟଣା ଟାଉନ୍ ଥାନା ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ କରିଛି । ଏହାସହ ପିକ୍ଅପ୍ ଭ୍ୟାନ୍ର ଡ୍ରାଇଭରଙ୍କୁ ଅଟକ ରଖିଛି ପୋଲିସ ।
ଡେବ୍ରିଗଡ଼ ଅଭୟାରଣ୍ୟରେ ଚଢ଼ାଉ, ଶିକାର ଯୋଜନା ବେଳେ ୨ ଗିରଫ
ନନ୍ଦିଘୋଷ ବ୍ୟୁରୋ: ଡେବ୍ରିଗଡ ଅଭୟାରଣ୍ୟରେ ବନ ବିଭାଗ ଓ ପୋଲିସର ମିଳିତ ଚଢ଼ାଉ। ଶିକାର ଯୋଜନା ବେଳେ ଦୁଇ ଗିରଫ । ଡେବ୍ରିଗଡ ଅଭୟାରଣ୍ୟରେ ବନ୍ୟଜନ୍ତୁ ଶିକାର ରୋକିବାକୁ ବନ ବିଭାଗ ଓ ବରଗଡ଼ ଜିଲ୍ଲା ପୋଲିସର ମିଳିତ ଚଢ଼ାଉ ଜାରି ରହିଛି । ନଭେମ୍ବର ୧୦ ଓ ୧୧ ତାରିଖରେ ଅଭୟାରଣ୍ୟ ସଂଲଗ୍ନ ୫ଟି ଗାଁରେ ଚାଲିଥିଲା ବ୍ୟାପକ ଚଢ଼ାଉ ଓ ତଲାସୀ ଅଭିଯାନ କରାଯାଇଛି । ପ୍ରାୟ ୭୦ ଜଣ ବନ କର୍ମଚାରୀ ଓ ପୋଲିସ ଅଧିକାରୀଙ୍କୁ ନେଇ ଏହି ମିଳିତ ଅଭିଯାନ ଅଛନ୍ତି । ଚଢ଼ାଉ ସମୟରେ ଦୁଇଜଣ ଶିକାରୀଙ୍କୁ ଗିରଫ କରାଯାଇଛି । ଗିରଫ ବ୍ୟକ୍ତି ହେଲେ ରାଉତପଡ଼ା ଗାଁର ପ୍ରାୟ ୪୦ ବର୍ଷୀୟ ଘନଶ୍ୟାମ ମିର୍ଦ୍ଧା ଏବଂ ୪୮ ବର୍ଷୀୟ ସୁପ୍ରସାଦ ସୁଇ । ଚଢ଼ାଉ ସମୟରେ ବନ ବିଭାଗ ବହୁ ପରିମାଣରେ ଶିକାର ସାମଗ୍ରୀ ଜବତ କରିଛି। ଏଥିରେ ରହିଛି ପଶୁ ଧରିବା ପାଇଁ ବ୍ୟବହୃତ ଫାଶ, ଜାଲ, ୩ କିଲୋଗ୍ରାମ ବିଦ୍ୟୁତ୍ ହୁକିଂ ତାର, ୨ କିଲୋଗ୍ରାମ କେବୁଲ୍ ତାର ଏବଂ ଦୁଇ ବଣ୍ଡଲ୍ ପଶୁ ଧରିବା ଜାଲ । ଅଭିଯୁକ୍ତମାନେ ଚିତାବାଘ ଶିକାର ପାଇଁ ଯୋଜନା କରିଥିବା ଏବଂ ଅଭୟାରଣ୍ୟ ଭିତରେ ଫାଶ ବିଛାଇଥିବା ସନ୍ଦେହ କରାଯାଉଛି । ତେବେ ବନ୍ୟଜନ୍ତୁଙ୍କ ସୁରକ୍ଷା ଦୃଷ୍ଟିରୁ ଏହି ଅଭିଯାନରେ ତଲାସୀ ହୋଇଥିବା ପାଞ୍ଚଟି ଗାଁର ନାମ ଗୋପନ ରଖାଯାଇଛି। ଅନ୍ୟପଟେ, ବନ୍ୟଜନ୍ତୁ ଶିକାର ସମ୍ପର୍କରେ ବିଶ୍ୱସନୀୟ ସୂଚନା ଦେଉଥିବା ବ୍ୟକ୍ତିଙ୍କୁ ୧ ହଜାର ଟଙ୍କା ପୁରସ୍କାର ଦେବାକୁ ଡେବ୍ରିଗଡ଼ ବନ ବିଭାଗ ଘୋଷଣା କରିଛି । ଏହାସହ ଅଭୟାରଣ୍ୟ ସଂଲଗ୍ନ ଅଞ୍ଚଳରେ ମେଟାଲ୍ ଡିଟେକ୍ଟର ଓ ଲାଇଭ୍ ଓୟାର୍ ଡିଟେକ୍ଟର ସହାୟତାରେ ମଧ୍ୟ ଯାଞ୍ଚ କରାଯାଉଛି ।
ସାଲେପୁରରେ ବିଜେଡିର ଜନସମ୍ପର୍କ ପଦଯାତ୍ରା ଓ ବାଇକ୍ ରାଲି, ଶତାଧିକ ନେତା ଓ କର୍ମୀ ସାମିଲ
ନନ୍ଦିଘୋଷ ବ୍ୟୁରୋ: କଟକ ଜିଲ୍ଲା ସାଲେପୁର ଟାଙ୍ଗୀ ନିର୍ବାଚନ ମଣ୍ଡଳୀ ପକ୍ଷରୁ ବିଧାୟକ ପ୍ରଶାନ୍ତ ବେହେରାଙ୍କ ନେତୃତ୍ବରେ ବିଜେଡିର ଜନ ସମ୍ପର୍କ ପଦଯାତ୍ରା ଓ ବାଇକ ରାଲି ଅନୁଷ୍ଠିତ ହୋଇଛି । ଦୁଇଟି ପଞ୍ଚାୟତ ମାଳ ଓ ନରଦାରେ ବିଶାଳ ବାଇକ୍ ରାଲି ସହ ପଦଯାତ୍ରାରେ ସାମିଲ ହୋଇଥିଲେ ଶତାଧିକ ନେତା ଓ କର୍ମୀ । ସମଗ୍ର ପଞ୍ଚାୟତ ପରିକ୍ରମା କରି ପୂର୍ବ ସରକାରଙ୍କ ଲୋକାଭିମୁଖି କାର୍ଯ୍ୟର ସଫଳ ରୁପାୟନ ବିଷୟରେ ଲୋକଙ୍କୁ ବୁଝାଇଥିଲେ । ସମସ୍ତେ ଏକ ହୋଇ ପୁଣି ନବୀନ ସରକାରକୁ ଫେରାଇ ଆଣିବା ସହ ନୂଆ ଓଡ଼ିଶା ଗଢିବାକୁ ସଂକଳ୍ପ ନେବାକୁ ଆହ୍ବାନ ଦେଇଥିଲେ । ଏହି ଯାତ୍ରାରେ ବହୁ ଯୁବ ଛାତ୍ର ମହିଳା ସଂଖ୍ୟାଲଘୁ ମୂରବୀ ସାମିଲ ହୋଇଥିଲେ ।
ମହାରାଷ୍ଟ୍ର ରାଜନୀତିରେ ହଲଚଲ, ଦଳ ଛାଡ଼ିପାରନ୍ତି ୨୨ ବିଧାୟକ!
ନନ୍ଦିଘୋଷ ବ୍ୟୁରୋ:ମହାରାଷ୍ଟ୍ର ରାଜନୀତିରେ ବଡ଼ ହଲଚଲ ଆଶଙ୍କା । ଦଳ ଛାଡି ପାରନ୍ତି ସୁନେତ୍ର ପାଓ୍ବାରଙ୍କ ନେତୃତ୍ବାଧୀନ ଗୋଷ୍ଟୀର ୨୦ରୁ ୨୨ ବିଧାୟକ । ଏନସିପିର ଦୁଇ ଗୋଷ୍ଟୀ ମିଶ୍ରଣର କଳ୍ପନାଜଳ୍ପନା ମଧ୍ୟରେ ଶିବସେନା ଯୁବିଟି ସାଂସଦ ସଞ୍ଜୟ ରାଉତ ଏଭଳି ଦାବି କରିଛନ୍ତି । ଏନସିପି ବିଧାୟକ ଏବଂ ଦଳର ପ୍ରତିଷ୍ଠାତା ଶରଦ ପାଓ୍ବାରଙ୍କ ମଧ୍ୟରେ ହୋଇଥିବା ବୈଠକ କେବଳ ସାଧାରଣ ଆଲୋଚନା ନୁହଁ, ଏହା ମହାରାଷ୍ଟ ରାଜନୀତିକୁ ଚକିତ କଲାଭଳି ପସଙ୍ଗ ଉପରେ ଆଲୋଚନା କରାଯାଇଥିବା ସେ ଦାବି କରିଛନ୍ତି । ଅଜିତ ପାଓ୍ବାରଙ୍କ ମୃତ୍ୟୁ ପରେ ତାଙ୍କ ଦଳର ନେତା `ଦାସ’ ହୋଇ ଯାଇଥିବା ଅଭିଯୋଗ କରିଛନ୍ତି ସଞ୍ଜୟ । ସୁନେତ୍ର ପାଓ୍ବାରଙ୍କ ନେତୃତ୍ବାଧୀନ ଗୋଷ୍ଟୀର ୨୦ରୁ ୨୨ ବିଧାୟକ କେତେବେଳେ ବି ଦଳ ପରିବର୍ତ୍ତନ କରିପାରନ୍ତି ବୋଲି ସେ କହିଛନ୍ତି । ପୂର୍ବରୁ ମହାରାଷ୍ଟ୍ର ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡ଼ନାଭିସ୍ କହିଥିଲେ ଯେ ବିଜେପି ସହିତ ପରାମର୍ଶ ନକରି ଏନସିପି ଗୋଷ୍ଟୀ ସହିତ ଜଡିତ କୌଣସି ମିଶ୍ରଣ ହୋଇପାରିବ ନାହିଁ । ଏହି ମନ୍ତବ୍ୟ ଉପରେ ସଞ୍ଜୟ ରାଉତ ଏଭଳି ମନ୍ତବ୍ୟ ଦେଇଛନ୍ତି ।
ବଦଳିଲା ଭାରତର ଭିସା ନିୟମ, ବିଦେଶୀଙ୍କ ପାଇଁ ସହଜ ହେବ ଯାତ୍ରା
ନନ୍ଦିଘୋଷ ବ୍ୟୁରୋ:ଭିସା ନିୟମରେ ବଡ଼ ପରିବର୍ତ୍ତନ । ଭାରତ ଆସିବାକୁ ବିଦେଶୀଙ୍କୁ ଆଉ କରିବାକୁ ପଡିବନି କଷ୍ଟ । ମୁଖ୍ୟ ବର୍ଗ ଗୁଡିକୁ ୧୩ରୁ ୯କୁ ହ୍ରାସ କରିଛନ୍ତି ଭାରତ ସରକାର । ସେହିଭଳି ଉପ-ବର୍ଗକୁ ୪୯ ରୁ ୨୩ କୁ ହ୍ରାସ କରାଯାଇଛି । ଯାହାଦ୍ୱାରା ବିଦେଶୀ ନାଗରିକମାନେ ପର୍ଯ୍ୟଟନ, ଚିକିତ୍ସା, ଶିକ୍ଷା, ଗବେଷଣା ଏବଂ ବ୍ୟବସାୟ ପାଇଁ ଭାରତ ଆସିବାକୁ ସହଜ କରିପାରିବେ । ଏନେଇ ଟୁରିଷ୍ଟ ଭିସା ବଦଳରେ ରହିବ ଭିଜିଟର ଭିସା । ଭିଜିଟର ଭିସାକୁ V-1 ଏବଂ V-2ରେ ବିଭକ୍ତ କରାଯାଇଛି, । V-1 ଭିସା ବହୁବିଧ ପ୍ରବେଶ ସହିତ ୩୦ ଦିନ ପାଇଁ ପ୍ରଦାନ କରାଯିବ। V-2 ଭିସା ଦୀର୍ଘକାଳୀନ ଗସ୍ତ ପାଇଁ ଉଦ୍ଦିଷ୍ଟ ଏବଂ ଯୋଗ୍ୟତା ଉପରେ ନିର୍ଭର କରି ୧, ୫ କିମ୍ବା ୧୦ ବର୍ଷ ବୈଧତା ସହିତ ପ୍ରଦାନ କରାଯାଇପାରିବ। ଏହା ପର୍ବତାରୋହଣ ସହିତ V-1 ଅଧୀନରେ ଅନୁମତିପ୍ରାପ୍ତ କାର୍ଯ୍ୟକଳାପକୁ କଭର କରେ। ପର୍ବତାରୋହଣ ପାଇଁ ଏକ ପୃଥକ ଛଅ ମାସର ବହୁବିଧ ପ୍ରବେଶ ବ୍ୟବସ୍ଥା କରାଯାଇଛି । ଗୃହ ମନ୍ତ୍ରଣାଳୟ ମଧ୍ୟ ଭିସା ଆବେଦନ ଫର୍ମକୁ ସରଳ କରିବା ପାଇଁ ପ୍ରୟାସ କରିଛି । ସବୁଠୁ ବଡ଼ କଥା ହେଉଛି, ଭିସା ଆବେଦନ ଫର୍ମରେ ଥିବା ତଥ୍ୟ ପୂରଣ କରିବାର ଆବଶ୍ୟକତା ୬୫ରୁ ୭୦ ପ୍ରତିଶତ ପର୍ଯ୍ୟନ୍ତ କମିବ। ଭିସାରେ ଏହି ପରିବର୍ତ୍ତନ ଆଣିବା ପୂର୍ବରୁ ବିକଶିତ ଦେଶଗୁଡ଼ିକର ଭିସା ବ୍ୟବସ୍ଥା ଏବଂ ବିଶ୍ୱ ମାନଦଣ୍ଡର ଅଧ୍ୟୟନ କରାଯାଇଥିବା କହିଛନ୍ତି ସରକାର ।
ବିବାହ ବନ୍ଧନରେ ବାନ୍ଧିହେଲେ ଅନିରୁଦ୍ଧ-କାବ୍ୟା, ନଭେମ୍ବର ୨୧ରେ ଚେନ୍ନାଇରେ ହେବ ଗ୍ରାଣ୍ଡ ରିସେପ୍ସନ୍
ନନ୍ଦିଘାେଷବ୍ୟୁରୋ: ସଙ୍ଗୀତ ଜଗତର ଲୋକପ୍ରିୟ କମ୍ପୋଜର ଅନିରୁଦ୍ଧ ରବିଚନ୍ଦର ଏବଂ ସନରାଇଜର୍ସ ହାଇଦ୍ରାବାଦର ସହ-ମାଲିକା କାବ୍ୟା ମାରନ୍ ବିବାହ ବନ୍ଧନରେ ଆବଦ୍ଧ ହୋଇଛନ୍ତି। ନଭେମ୍ବର ୧୧ ତାରିଖ ତଥା ଆଜି ଗ୍ରୀସ୍ରେ ଏକ ଭବ୍ୟ ତଥା ଷ୍ଟାର୍ଷ୍ଟଡେଡ୍ ସମାରୋହରେ ଉଭୟଙ୍କ ବିବାହ ହୋଇଛି। ଏହି ବିଶେଷ ଦିନର କିଛି ଫଟୋ ଅନିରୁଦ୍ଧ ନିଜ ଇନଷ୍ଟାଗ୍ରାମରେ ସେୟାର କରିଛନ୍ତି। ଫଟୋ ସହ ସେ ଲେଖିଛନ୍ତି, ‘My once in a lifetime, for a lifetime 11.11’।
ତେବେ ବିବାହ ଅବସରରେ ଅନିରୁଦ୍ଧ ଏକ ଆଇଭରୀ ରଙ୍ଗର ପାରମ୍ପରିକ ପୋଷାକ ପିନ୍ଧିଥିବା ବେଳେ କାବ୍ୟା ଏକ ସୁନ୍ଦର ବ୍ଲସ୍ ପିଙ୍କ୍ ଲେହେଙ୍ଗାରେ ନଜର ଆସିଛନ୍ତି । ଲେହେଙ୍ଗାରେ ଆକର୍ଷଣୀୟ ଏମ୍ବ୍ରୋଡରୀ ଓ ସିକ୍ୱିନ୍ କାମ ରହିଛି। ଏହା ସହ ମ୍ୟାଚିଂ ବ୍ଲାଉଜ୍ ଏବଂ ଷ୍ଟେଟମେଣ୍ଟ ଚୋକର୍ ପିନ୍ଧିଛନ୍ତି କାବ୍ୟା।
ତେବେ ବିବାହ ଉତ୍ସବରେ ଯୋଗଦେବା ପାଇଁ ସୁପରଷ୍ଟାର ରଜନୀକାନ୍ତ ନିଜ ପରିବାର ସହ ଗ୍ରୀସ୍ ଯାତ୍ରା କରିଥିବା ବେଳେ ତାମିଲନାଡୁର ପୂର୍ବତନ ମୁଖ୍ୟମନ୍ତ୍ରୀ ଏମ୍.କେ. ଷ୍ଟାଲିନ୍ ମଧ୍ୟ ପରିବାର ସହ ଯାଇଥିବା ଦେଖିବାକୁ ମିଳିଥିଲା। ହାଇପ୍ରୋଫାଇଲ୍ ଅତିଥିଙ୍କ ଯାତ୍ରା ସମୟର ଫଟୋ ଓ ଭିଡିଓ ବର୍ତ୍ତମାନ ସୋସିଆଲ ମିଡିଆରେ ଭାଇରାଲ୍ ହେଉଛି।
ନଭେମ୍ବର ୨୧ରେ ଗ୍ରାଣ୍ଡ ରିସେପ୍ସନ୍:
ଗ୍ରୀସ୍ରେ ବିବାହ ପରେ ନଭେମ୍ବର ୨୧ ତାରିଖରେ ଚେନ୍ନାଇରେ ଏକ ଭବ୍ୟ ରିସେପ୍ସନ୍ ଆୟୋଜନ ହେବାକୁ ଯାଉଛି। କାବ୍ୟାଙ୍କ ପିତା କଲାନିଧି ମାରନ୍ ଏବଂ ମାତା କାବେରୀ ମାରନ୍ ତେଲେଙ୍ଗାନା ମୁଖ୍ୟମନ୍ତ୍ରୀ ଏ. ରେବନ୍ତ ରେଡ୍ଡୀଙ୍କୁ ଭେଟି ନିମନ୍ତ୍ରଣ ଦେଇଥିବା ନେଇ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ଏକ ପୋଷ୍ଟ ସେୟାର କରାଯାଇଥିଲା।
ରିପୋର୍ଟ ଅନୁସାରେ, ଏହି ରିସେପ୍ସନ୍ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ସୋନିଆ ଗାନ୍ଧୀ, ରାହୁଲ ଗାନ୍ଧୀ ଓ ପ୍ରିୟଙ୍କା ଗାନ୍ଧୀଙ୍କ ସମେତ ଅନେକ ବଡ଼ ବଡ଼ ରାଜନେତା ଯୋଗଦେଇପାରନ୍ତି। ତାମିଲନାଡୁ ମୁଖ୍ୟମନ୍ତ୍ରୀ ସି. ଜୋସେଫ ବିଜୟ, ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ଏନ୍. ଚନ୍ଦ୍ରବାବୁ ନାଇଡୁ, ଏ. ରେବନ୍ତ ରେଡ୍ଡୀ ଏବଂ ଏମ୍.କେ. ଷ୍ଟାଲିନ୍ଙ୍କ ନାମ ମଧ୍ୟ ଅତିଥି ତାଲିକାରେ ଥିବା ଚର୍ଚ୍ଚା ହେଉଛି। ସେହିପରି ସିନେମା ଜଗତରୁ ରଜନୀକାନ୍ତ, କମଲ ହାସନ୍, ଏ.ଆର୍. ରହମାନ, ଧନୁଷ, ଅଜିତ କୁମାର, ଅଲ୍ଲୁ ଅର୍ଜୁନଙ୍କ ସମେତ ଅନେକ ନାମୀଦାମୀ କଳାକାର ଯୋଗଦେବାର ସମ୍ଭାବନା ରହିଛି। କ୍ରିକେଟ୍ ଜଗତରୁ ମଧ୍ୟ ଅଭିଷେକ ଶର୍ମା ଓ ଈଶାନ କିଶନଙ୍କ ଭଳି ଖେଳାଳି ଯୋଗଦେଇପାରନ୍ତି ବୋଲି ବିଭିନ୍ନ ରିପୋର୍ଟରେ କୁହାଯାଇଛି।
କିଏ ଅନିରୁଦ୍ଧ ଓ କାବ୍ୟା ମାରନ୍?
‘Why This Kolaveri Di’ ଗୀତ ଜରିଆରେ ଚର୍ଚ୍ଚାକୁ ଆସିଥିଲେ ଅନିରୁଦ୍ଧ ରବିଚନ୍ଦର। ଏହାପରେ ଅନେକ ସୁପରହିଟ୍ ଫିଲ୍ମରେ ସଙ୍ଗୀତ ନିର୍ଦ୍ଦେଶନା ଦେଇ ସେ ନିଜର ସ୍ୱତନ୍ତ୍ର ପରିଚୟ ସୃଷ୍ଟି କରିଛନ୍ତି। ଅନ୍ୟପଟେ କାବ୍ୟା ମାରନ୍ ହେଉଛନ୍ତି ସନ୍ ଟିଭି ନେଟୱର୍କର ନିର୍ଦ୍ଦେଶିକା ଏବଂ ଆଇପିଏଲ୍ ଟିମ୍ ସନରାଇଜର୍ସ ହାଇଦ୍ରାବାଦର ସିଇଓ।
ତେବେ ୨୦୨୫ରୁ ଉଭୟଙ୍କ ବିବାହକୁ ନେଇ ଚର୍ଚ୍ଚା ଆରମ୍ଭ ହୋଇଥିଲା। ତେବେ ସେତେବେଳେ ଅନିରୁଦ୍ଧ ଏହି ଖବରକୁ ଗୁଜବ କହି ଖଣ୍ଡନ କରିଥିଲେ। ପରେ ଅନିରୁଦ୍ଧଙ୍କ ଦାଦା ତଥା ଅଭିନେତା ୱାଇ. ଜି. ମହେନ୍ଦ୍ର ମଧ୍ୟ ଏକ ସାକ୍ଷାତକାରରେ ବିବାହ ଖବରକୁ ନେଇ ସଙ୍କେତ ଦେଇଥିବା ଚର୍ଚ୍ଚା ହୋଇଥିଲା।
ଦୀପାବଳି ପରେ ସେୟାର ବଜାରରେ ଧମାକା: ୮ ମାସର ସର୍ବୋଚ୍ଚ ସ୍ତରରେ ସେନସେକ୍ସ ଓ ନିଫ୍ଟି
ନନ୍ଦିଘୋଷବ୍ୟୁରୋ: ଦୀପାବଳି ପରବର୍ତ୍ତୀ କାରବାରରେ ଭାରତୀୟ ସେୟାର ବଜାରରେ ଏକ ବଡ଼ଧରଣର ଉତ୍ସାହ ଦେଖିବାକୁ ମିଳିଛି। କାରବାର ଆରମ୍ଭରୁ ହିଁ ସେନସେକ୍ସ ୧୨୦୦ ପଏଣ୍ଟରୁ ଅଧିକ ବଢ଼ିଥିବା ବେଳେ ନିଫ୍ଟି ମଧ୍ୟ ୨୫,୩୫୦ ସ୍ତର ଅତିକ୍ରମ କରିଛି। ଫଳରେ ଭାରତୀୟ ପୁଞ୍ଚିବଜାର ଗତ ୮ ମାସରେ ସର୍ବୋଚ୍ଚ ସ୍ତରରେ ପହଞ୍ଚିଛି।
ଆଜି ସକାଳ ୧୦ଟା ୪୫ ମିନିଟ୍ ସୁଦ୍ଧା ସେନସେକ୍ସ ୧.୫୨ ପ୍ରତିଶତ ବୃଦ୍ଧି ପାଇ ୮୨,୩୪୨.୫୫ ଅଙ୍କରେ କାରବାର କରୁଥିଲା। ସେହିପରି ନିଫ୍ଟି ୧.୩୧ ପ୍ରତିଶତ ବୃଦ୍ଧି ଘଟି ୨୫,୩୭୨.୫୫ ଅଙ୍କରେ ପହଞ୍ଚିଥିଲା। ଗତକାଲି ବଜାର ବନ୍ଦ ରହିଥିବା ବେଳେ ଆଜିର ଏହି ଦ୍ରୁତ ବଜାର ବୃଦ୍ଧି ନିବେଶକଙ୍କ ମଧ୍ୟରେ ବେଶ୍ ଉତ୍ସାହ ଭରିଦେଇଛି।
ତେବେ ବଜାରରେ ଏହି ଅଭୂତପୂର୍ବ ବୃଦ୍ଧି ପଛରେ ମୁଖ୍ୟତଃ ତିନୋଟି ପ୍ରମୁଖ କାରଣ ରହିଛି। ଭାରତୀୟ ସେୟାର ବଜାରକୁ ବିଦେଶୀ ନିବେଶକଙ୍କ ପୁଞ୍ଜି ପ୍ରବାହ ବୃଦ୍ଧି ପାଇବା, ଅନ୍ତର୍ଜାତୀୟ ବଜାରରେ ଅଶୋଧିତ ତୈଳ ଦର ହ୍ରାସ ଏବଂ ବିଭିନ୍ନ କମ୍ପାନୀର ଆଶାଠାରୁ ଭଲ ତ୍ରୈମାସିକ ଆର୍ଥିକ ଫଳାଫଳ ବଜାରକୁ ଏକ ବଡ଼ ସମର୍ଥନ ଯୋଗାଇ ଦେଇଛି।
ଉଭୟ ସୂଚକାଙ୍କ ଗତ ଫେବ୍ରୁଆରୀ ୨୭ ତାରିଖ ପରଠାରୁ ସବୁଠାରୁ ଉଚ୍ଚସ୍ତର ଛୁଇଁଛନ୍ତି। କେବଳ ଏତିକି ନୁହେଁ, ନଭେମ୍ବର ମାସରେ ଏପର୍ଯ୍ୟନ୍ତ ନିଫ୍ଟି ପ୍ରାୟ ୧୦ ପ୍ରତିଶତ ଏବଂ ସେନସେକ୍ସ ପ୍ରାୟ ୧୦.୫ ପ୍ରତିଶତ ବୃଦ୍ଧି ପାଇଛି। ଏହି ସକାରାତ୍ମକ ଧାରା ଜାରି ରହିଲେ, ନଭେମ୍ବର ୨୦୨୦ ପରଠାରୁ ଏହା ଉଭୟ ସୂଚକାଙ୍କ ପାଇଁ ସବୁଠାରୁ ଶକ୍ତିଶାଳୀ ମାସିକ ପ୍ରଦର୍ଶନ ହେବ ବୋଲି ଆଶା କରାଯାଉଛି।
ବାଲିଯାତ୍ରାରେ ଯୋଗଦେବେ ରାଷ୍ଟ୍ରପତି! ନିମନ୍ତ୍ରଣ ପଠାଇଲା ପ୍ରଶାସନ
ନନ୍ଦିଘୋଷବ୍ୟୁରୋ: ଏଥର କଟକର ଐତିହାସିକ ବାଲିଯାତ୍ରାରେ ରାଷ୍ଟ୍ରପତିଙ୍କ ଉପସ୍ଥିତିକୁ ନେଇ ବଢ଼ିଛି ଚର୍ଚ୍ଚା । ଏହି ଭବ୍ୟ ମହୋତ୍ସବରେ ଯୋଗଦେବା ପାଇଁ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ନିମନ୍ତ୍ରଣ ପଠାଇଛି କଟକ ଜିଲ୍ଲା ପ୍ରଶାସନ । ରାଜ୍ୟ ସରକାରଙ୍କ ସହ ବିଚାରବିମର୍ଶ ପରେ ଏହି ପଦକ୍ଷେପ ନିଆଯାଇଥିବା ସୂଚନା ମିଳିଛି ।
ପ୍ରତିବର୍ଷ ବାଲିଯାତ୍ରାକୁ ନେଇ କଟକ ସହରରେ ଉତ୍ସବର ମାହୋଲ ଦେଖିବାକୁ ମିଳେ । ଓଡ଼ିଶାର ଗୌରବମୟ ସାମୁଦ୍ରିକ ଇତିହାସ ଓ ପରମ୍ପରାକୁ ମନେ ପକାଇଥାଏ ଏହି ମହୋତ୍ସବ । ଏଭଳି ଏକ ବଡ଼ ଆୟୋଜନରେ ଦେଶର ପ୍ରଥମ ନାଗରିକ ତଥା ଓଡ଼ିଶାର ମାଟିର ଝିଅ ଦ୍ରୌପଦୀ ମୁର୍ମୁ ଯୋଗଦେଲେ, ତାହା କଟକ ପାଇଁ ଏକ ସ୍ମରଣୀୟ ମୁହୂର୍ତ୍ତ ହେବ ।
ତେବେ ନିମନ୍ତ୍ରଣ ମିଳିବା ପରେ ରାଷ୍ଟ୍ରପତିଙ୍କ ଗସ୍ତକୁ ନେଇ ଆଶା ବଢ଼ିଥିଲେ ମଧ୍ୟ ତାଙ୍କ କାର୍ଯ୍ୟାଳୟ ପକ୍ଷରୁ ଏଯାଏଁ କୌଣସି ଚୂଡ଼ାନ୍ତ ସହମତି ମିଳିନାହିଁ । ତେଣୁ ଚଳିତ ବର୍ଷ ବାଲିଯାତ୍ରାରେ ରାଷ୍ଟ୍ରପତିଙ୍କ ଉପସ୍ଥିତି ରହିବ କି ନାହିଁ, ଏବେ ସେହି ଘୋଷଣାକୁ ଅପେକ୍ଷା କରିଛନ୍ତି କଟକବାସୀ ।