ନନ୍ଦିଘୋଷ ବ୍ୟୁରୋ : ପ୍ରବଳ ବର୍ଷାକୁ ନଜରରେ ରଖି ଆଜି ୪ ଜିଲ୍ଲାରେ ସ୍କୁଲ ଓ ଅଙ୍ଗନବାଡ଼ି କେନ୍ଦ୍ର ଛୁଟି ଘୋଷଣା କରାଯାଇଛି। ପାଣିପାଗ ବିଭାଗର ସତର୍କ ସୂଚନା ପରେ ଜିଲ୍ଲାପାଳମାନେ ସତର୍କତାମୂଳକ ପଦକ୍ଷେପ ଭାବେ ଏହି ନିଷ୍ପତ୍ତି ନେଇଛନ୍ତି। ନବରଙ୍ଗପୁର ଜିଲ୍ଲାରେ ଆଜି ପ୍ରବଳରୁ ଅତି ପ୍ରବଳ ବର୍ଷା ନେଇ ସତର୍କ ସୂଚନା ଜାରି ହୋଇଛି। ଏହାକୁ ଦୃଷ୍ଟିରେ ରଖି ଜିଲ୍ଲାର ସମସ୍ତ ଅଙ୍ଗନବାଡ଼ି, ସରକାରୀ ଓ ବେସରକାରୀ ଶିକ୍ଷାନୁଷ୍ଠାନ ବନ୍ଦ ରଖିବାକୁ ଜିଲ୍ଲାପାଳ ନିର୍ଦ୍ଦେଶ ଦେଇଛନ୍ତି। ତେବେ ଅଙ୍ଗନବାଡ଼ି କର୍ମୀ ଓ ସ୍କୁଲରେ ଶିକ୍ଷକମାନେ ଉପସ୍ଥିତ ରହିବେ। ସେହିପରି ଭଦ୍ରକ ଜିଲ୍ଲାର ଭଦ୍ରକ, ତିହିଡ଼ି ଓ ଚାନ୍ଦବାଲି ବ୍ଲକର ୮୯ଟି ସ୍କୁଲ ବନ୍ଦ ରହିବ। ଲଗାଣ ବର୍ଷା, ସମ୍ଭାବ୍ୟ ବନ୍ୟା ପରିସ୍ଥିତି ଓ ପୁନରୁଦ୍ଧାର କାର୍ଯ୍ୟକୁ ନଜରରେ ରଖି ଜିଲ୍ଲା ପ୍ରଶାସନ ଏହି ନିଷ୍ପତ୍ତି ନେଇଛି। ଏହାବ୍ୟତୀତ ଯାଜପୁର ଓ କଳାହାଣ୍ଡି ଜିଲ୍ଲାରେ ମଧ୍ୟ ପ୍ରବଳ ବର୍ଷାକୁ ଦୃଷ୍ଟିରେ ରଖି ସ୍କୁଲ ଓ ଅଙ୍ଗନବାଡ଼ି କେନ୍ଦ୍ର ଛୁଟି ନେଇ ପ୍ରଶାସନ ପକ୍ଷରୁ ଘୋଷଣା କରାଯାଇଛି।
ସ୍କୁଲରେ ତାଲା ପକାଇଲେ ଅଭିଭାବକ
ନନ୍ଦିଘୋଷ ବ୍ୟୁରୋ : ଶିକ୍ଷକ ଅଭାବକୁ ନେଇ ବଡ଼ମ୍ବାରେ ତୀବ୍ର ଅସନ୍ତୋଷ। ଶିକ୍ଷକ ନିଯୁକ୍ତି ଦାବିରେ ବିଦ୍ୟାଳୟରେ ତାଲା ପକାଇ ଧାରଣାରେ ବସିଲେ ଅଭିଭାବକ, ପୁରାତନ ଛାତ୍ରଛାତ୍ରୀ ଓ ଗ୍ରାମ୍ୟ କମିଟି। ବାରମ୍ବାର ଦାବି ସତ୍ତ୍ୱେ ସମସ୍ୟାର ସମାଧାନ ହୋଇନଥିବାରୁ ଶେଷରେ ବାଧ୍ୟ ହୋଇ ଏଭଳି ପଦକ୍ଷେପ ନେଇଥିବା ଅଭିଭାବକମାନେ କହିଛନ୍ତି। ଶିକ୍ଷକ ଅଭାବ ଯୋଗୁଁ ବିଦ୍ୟାଳୟରେ ପାଠପଢ଼ା ବ୍ୟାହତ ହେଉଥିବା ଅଭିଯୋଗ କରି ତୁରନ୍ତ ଶିକ୍ଷକ ନିଯୁକ୍ତି ଦାବି କରିଛନ୍ତି ସେମାନେ।
କଟକ ଜିଲ୍ଲା ବଡ଼ମ୍ବା ଅଞ୍ଚଳର ଭଟ୍ଟାରିକା ନୋଡାଲ୍ ବିଦ୍ୟାପୀଠରେ ଏହି ଘଟଣାକୁ ନେଇ ଅସନ୍ତୋଷ ତୀବ୍ର ହୋଇଛି। ଅଭିଭାବକ, ପୁରାତନ ଛାତ୍ରଛାତ୍ରୀ ଓ ଗ୍ରାମ୍ୟ କମିଟି ପକ୍ଷରୁ ବିଦ୍ୟାଳୟରେ ତାଲାବନ୍ଦ ଆନ୍ଦୋଳନ କରାଯାଇଛି। ଶିକ୍ଷକ ନିଯୁକ୍ତି ନହେଲେ ଆନ୍ଦୋଳନକୁ ଆହୁରି ତୀବ୍ର କରାଯିବ ବୋଲି ଆନ୍ଦୋଳନକାରୀମାନେ ଚେତାବନୀ ଦେଇଛନ୍ତି।
ମିଠା ଦୋକାନରେ ଚଢାଉ
ନନ୍ଦିଘୋଷ ବ୍ୟୁରୋ : ରାକ୍ଷୀ ପୂର୍ଣ୍ଣିମା ପୂର୍ବରୁ ରାଜଧାନୀରେ ନକଲି ଛେନା ଓ ପନିର ବିରୋଧରେ ଜୋରଦାର ଯାଞ୍ଚ ଆରମ୍ଭ କରିଛି BMC ସ୍ୱାସ୍ଥ୍ୟ ବିଭାଗ। ବିଭିନ୍ନ ମିଠା ଦୋକାନରେ ଚଢ଼ାଉ କରି ମିଠା ପ୍ରସ୍ତୁତିରେ ବ୍ୟବହୃତ ଛେନା, ପନିର ସମେତ ଅନ୍ୟାନ୍ୟ ଖାଦ୍ୟ ସାମଗ୍ରୀର ମାନ ଯାଞ୍ଚ କରାଯାଉଛି।
ବିଶେଷକରି କେମିକାଲ୍ କିମ୍ବା ଅସ୍ୱାସ୍ଥ୍ୟକର ଉପାୟରେ ପ୍ରସ୍ତୁତ ପନିର ଓ ଛେନା ବିକ୍ରି ହେଉଛି କି ନାହିଁ, ସେନେଇ ଟିମ୍ର ନଜର ରହିଛି। CRP ଛକ ସମେତ ରାଜଧାନୀର ବିଭିନ୍ନ ଅଞ୍ଚଳର ମିଠା ଦୋକାନରେ ଏହି ଯାଞ୍ଚ ଜାରି ରହିଛି। ନିୟମ ଉଲ୍ଲଂଘନ କିମ୍ବା ନିମ୍ନମାନର ସାମଗ୍ରୀ ମିଳିଲେ ନମୁନା ସଂଗ୍ରହ କରାଯିବା ସହ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ନିଆଯିବ। ପାର୍ବଣ ସମୟରେ ମିଠାର ଚାହିଦା ବଢ଼ୁଥିବାରୁ ନକଲି ଛେନା ଓ ପନିରର କାରବାର ଉପରେ ରୋକ୍ ଲଗାଇବାକୁ ଏହି ଚଢ଼ାଉ ଜୋରଦାର କରାଯାଇଛି। ଲୋକଙ୍କ ସ୍ୱାସ୍ଥ୍ୟ ସହ ଖେଳୁଥିବା ବ୍ୟବସାୟୀଙ୍କ ବିରୋଧରେ କଡ଼ା ପଦକ୍ଷେପ ନେବା ଉପରେ BMC ସ୍ୱାସ୍ଥ୍ୟ ବିଭାଗ ଗୁରୁତ୍ୱ ଦେଇଛି।
ରହସ୍ୟ ଘେରରେ ‘ଓସେନ୍ ଓ୍ବିନର’ ବୁଡ଼ିବା ଘଟଣା, ୨୨ କ୍ରିୟୁ ସଦସ୍ୟ ନିଖୋଜ
ନନ୍ଦିଘୋଷ ବ୍ୟୁରୋ : ପାରାଦୀପରୁ ଲୁହାପଥର ନେଇ ଚୀନ୍ ଯାଉଥିବା ପଣ୍ୟବାହୀ ଜାହାଜ ‘ଓସେନ୍ ଓ୍ବିନର’ ବୁଡ଼ିଯିବା ଘଟଣା ଏବେବି ରହସ୍ୟ ଘେରରେ ରହିଛି। ଜାହାଜରେ ଥିବା ୨୪ ଜଣ କ୍ରିୟୁ ସଦସ୍ୟଙ୍କ ମଧ୍ୟରୁ ମାତ୍ର ୨ ଜଣଙ୍କୁ ଉଦ୍ଧାର କରାଯାଇଥିବା ବେଳେ ଏବେବି ୨୨ ଜଣଙ୍କର କୌଣସି ସନ୍ଧାନ ମିଳିନାହିଁ। କେନ୍ଦ୍ର ଜାହାଜ ଚଳାଚଳ ମନ୍ତ୍ରୀ ସର୍ବାନନ୍ଦ ସୋନୋୱାଲ ଏକ୍ସରେ ଏହି ଘଟଣାକୁ ନେଇ ଦୁଃଖ ପ୍ରକାଶ କରିବା ସହ ଦୁଇଜଣ କ୍ରିୟୁ ସଦସ୍ୟଙ୍କୁ ଉଦ୍ଧାର କରାଯାଇଥିବା ସୂଚନା ଦେଇଛନ୍ତି। ଏହାପରେ ଜାହାଜଟି କେବଳ ନିଖୋଜ ହୋଇନାହିଁ, ବରଂ ମଝି ସମୁଦ୍ରରେ ବୁଡ଼ିଯାଇଥିବା ସ୍ପଷ୍ଟ ହୋଇଛି।
ତେବେ ଜାହାଜଟି କେଉଁ କାରଣରୁ ବୁଡ଼ିଲା, ତାହା ଏବେବି ସ୍ପଷ୍ଟ ହୋଇନାହିଁ। ପ୍ରାଥମିକ ଭାବେ ଓଦା ଲୁହାପଥର ବୋଝେଇ ଯୋଗୁଁ ଜାହାଜର ଓଜନ ବଢ଼ିଯାଇଥିବା ଏବଂ ଏହା ଫଳରେ ଜାହାଜ ଭାରସାମ୍ୟ ହରାଇ ଓଲଟି ପଡ଼ିଥିବା ଆଶଙ୍କା କରାଯାଉଛି। ତେବେ ତଦନ୍ତ ପରେ ହିଁ ଦୁର୍ଘଟଣାର ପ୍ରକୃତ କାରଣ ସ୍ପଷ୍ଟ ହେବ।
ସମୁଦ୍ର ଜୀବଜଗତ ପ୍ରତି ବଢ଼ିଲା ବିପଦ
ଜାହାଜ ବୁଡ଼ିଯିବା ପରେ ଏବେ ଆଉ ଏକ ଚିନ୍ତାର କାରଣ ହୋଇଛି ସମୁଦ୍ର ପ୍ରଦୂଷଣ। ଜାହାଜରେ ଥିବା ତେଲ ଏବଂ ବହନ କରାଯାଉଥିବା ଲୁହାପଥର ସମୁଦ୍ର ଜଳରେ ମିଶିଲେ ଜଳଜୀବ ଓ ସାମୁଦ୍ରିକ ପରିବେଶ ପ୍ରତି ବଡ଼ ବିପଦ ସୃଷ୍ଟି ହୋଇପାରେ। ଏହା ଦ୍ୱାରା ସାମୁଦ୍ରିକ ଜୈବ ବିବିଧତା ଉପରେ ମଧ୍ୟ ପ୍ରତିକୂଳ ପ୍ରଭାବ ପଡ଼ିବାର ଆଶଙ୍କା ରହିଛି।
ବ୍ୟସ୍ତ ସାମୁଦ୍ରିକ ରୁଟ୍ରେ ବିପଦ
‘ଓସେନ୍ ଓ୍ବିନର’ ଜୁଲାଇ ୨୦ ତାରିଖରେ ପାରାଦୀପ ବନ୍ଦର ଛାଡ଼ିଥିଲା। ଜୁଲାଇ ୨୧ ତାରିଖ ରାତିରେ ପାରାଦୀପଠାରୁ ପ୍ରାୟ ୨୪୦ ନଟିକାଲ ମାଇଲ୍, ଅର୍ଥାତ୍ ପ୍ରାୟ ୩୮୪ କିଲୋମିଟର ଦୂରରେ, ଆଣ୍ଡାମାନ-ନିକୋବର ଦ୍ୱୀପପୁଞ୍ଜ ନିକଟ ଭାରତୀୟ ଆନ୍ତର୍ଜାତୀୟ ଜଳସୀମା ନିକଟରେ ଜାହାଜ ସହ ଯୋଗାଯୋଗ ବିଚ୍ଛିନ୍ନ ହୋଇଥିଲା।
ଏହି ସାମୁଦ୍ରିକ ରୁଟ୍ ଦେଇ ବହୁ ସଂଖ୍ୟକ ପଣ୍ୟବାହୀ ଜାହାଜ ଯାତାୟାତ କରୁଥିବାରୁ ‘ଓସେନ୍ ଓ୍ବିନର’ ବୁଡ଼ିଯିବା ଘଟଣା ଅନ୍ୟ ଜାହାଜଗୁଡ଼ିକ ପାଇଁ ମଧ୍ୟ ବିପଦ ସୃଷ୍ଟି କରିଛି। ଦୁର୍ଘଟଣାସ୍ଥଳରେ ବୁଡ଼ିଥିବା ଜାହାଜର ଅବସ୍ଥିତି ଏବଂ ସମ୍ଭାବ୍ୟ ତେଲ ଲିକ୍ ନେଇ ମଧ୍ୟ ଚିନ୍ତା ବଢ଼ିଛି।
୬୦ ଘଣ୍ଟା ପରେ ବି ନିଖୋଜ ୨୨ କ୍ରିୟୁ
ଜାହାଜ ବୁଡ଼ିବାର ୬୦ ଘଣ୍ଟାରୁ ଅଧିକ ସମୟ ବିତିଯାଇଥିଲେ ମଧ୍ୟ ନିଖୋଜ ୨୨ ଜଣ କ୍ରିୟୁ ସଦସ୍ୟଙ୍କୁ ଏପର୍ଯ୍ୟନ୍ତ ଠାବ କରାଯାଇପାରିନାହିଁ। ଭାରତୀୟ କୋଷ୍ଟଗାର୍ଡର ୩ଟି ଜାହାଜ ସହ ନ୍ୟାଭି ପକ୍ଷରୁ ମଧ୍ୟ ଘଟଣାସ୍ଥଳରେ ସର୍ଚ୍ଚ ଅପରେସନ୍ ଜାରି ରହିଛି। ତେବେ ପ୍ରତିକୂଳ ପାଗ ଓ ସମୁଦ୍ରର ଉତ୍ତାଳ ପରିସ୍ଥିତି ଉଦ୍ଧାର ଅଭିଯାନକୁ ଅଧିକ କଠିନ କରିଦେଇଛି।
ଘଟଣାକୁ ନେଇ ଅନ୍ତର୍ଜାତୀୟ ସ୍ତରରେ ଚର୍ଚ୍ଚା ବଢ଼ୁଥିବା ବେଳେ ପାରାଦୀପ ବନ୍ଦର କିମ୍ବା କୋଷ୍ଟଗାର୍ଡ ପକ୍ଷରୁ ସ୍ପଷ୍ଟ ବୁଲେଟିନ୍ ଜାରି ନହେବା ନେଇ ମଧ୍ୟ ପ୍ରଶ୍ନ ଉଠୁଛି। ଏପରି ସ୍ଥିତିରେ ଜାହାଜ ବୁଡ଼ିବାର ପ୍ରକୃତ କାରଣ, ନିଖୋଜ ୨୨ କ୍ରିୟୁ ସଦସ୍ୟଙ୍କ ସନ୍ଧାନ ଏବଂ ସାମୁଦ୍ରିକ ପରିବେଶ ଉପରେ ଏହାର ପ୍ରଭାବ—ଏହି ତିନୋଟି ଦିଗ ଏବେ ସବୁଠାରୁ ବଡ଼ ଚିନ୍ତାର ବିଷୟ ହୋଇଛି।
ଭାରତୀୟ ପୁରୁଷ ହକି ଦଳର ଆଜି ଗୁରୁତ୍ବପୂର୍ଣ୍ଣ ମ୍ୟାଚ ।
ନନ୍ଦିଘୋଷ ବ୍ୟୁରୋ : ହକି ବିଶ୍ବକପରେ ଭାରତୀୟ ପୁରୁଷ ହକି ଦଳ ପାଇଁ ଆଜି କର ବା ମର ସ୍ଥିତି । ଆଜି ନେଦରଲ୍ୟାଣ୍ଡର ଆମଷ୍ଟେଲଭିନର ୱାଗେନର ହକି ଷ୍ଟାଡିୟମରେ ଆର୍ଜେଣ୍ଟିନା ସହିତ ଏକ ଗୁରୁତ୍ବପୂର୍ଣ୍ଣ ମ୍ୟାଚ ଖେଳିବ ପୁରୁଷ ଟିମ୍ । ମ୍ୟାଚ ଉପରେ ରହିଛି ଭାରତର ସେମିଫାଇନାଲ ଆଶା । ନେଦରଲ୍ୟାଣ୍ଡସ୍ ଠାରୁ ୩-୧ ଗୋଲରେ ପରାଜୟ ପରେ, ଭାରତର ପଏଣ୍ଟ ୦ ଏବଂ ଗୋଲ ପାର୍ଥକ୍ୟ ୪ ରହିଛି ।
ଇଂଲଣ୍ଡ ବିପକ୍ଷରେ ଆର୍ଜେଣ୍ଟିନାର ୩-୧ ବିଜୟ ଫଳରେ, କ୍ରେଗ୍ ଫୁଲଟନଙ୍କ ଭାରତୀୟ ଦଳ ଏବେ ବି ସେମିଫାଇନାଲରେ ପ୍ରବେଶ କରିବା ପାଇଁ ସୁଯୋଗ ରହିଛି କିନ୍ତୁ କଷ୍ଟକର । ସମୀକରଣ-୧, ଭାରତକୁ ଅତି କମରେ ୩ ଗୋଲରେ ଆର୍ଜେଣ୍ଟିନାକୁ ପରାସ୍ତ କରିବାକୁ ପଡିବ । ସମାନ ସମୟରେ, ନେଦରଲ୍ୟାଣ୍ଡସ୍ ଆଜି ଇଂଲଣ୍ଡକୁ ଅତି କମରେ ୨ ଗୋଲରେ ପରାସ୍ତ କରିବା ଆବଶ୍ୟକ।
ଏହା ଗୋଲ ପାର୍ଥକ୍ୟରେ ଭାରତ ଉଭୟ ଦଳକୁ ପଛରେ ପକାଇବ । ସମୀକରଣ-୨, ଯଦି ଭାରତ ଆର୍ଜେଣ୍ଟିନା ବିପକ୍ଷରେ ୪ ଗୋଲ ବ୍ୟବଧାନରେ ବିଜୟ ହାସଲ କରେ, ତେବେ ନେଦରଲ୍ୟାଣ୍ଡ ବିପକ୍ଷରେ ଇଂଲଣ୍ଡର ଯେକୌଣସି ପରାଜୟ ଭାରତକୁ ସ୍ୱୟଂଚାଳିତ ଭାବରେ ସେମିଫାଇନାଲକୁ ପଠାଇଦେବ ।…
ମହାରାଷ୍ଟ୍ରର ଅମରାବତୀ ଜିଲ୍ଲାରେ ହୃଦୟ ବିଦାରକ ଘଟଣା।
ନନ୍ଦିଘୋଷ ବ୍ୟୁରୋ : ମହାରାଷ୍ଟ୍ରର ଅମରାବତୀ ଜିଲ୍ଲାରେ ହୃଦୟ ବିଦାରକ ଘଟଣା । ଅମରାବତୀର ସରକାରୀ ମହିଳା ହସ୍ପିଟାଲର ନବଜାତ ୱାର୍ଡରେ ଭୟଙ୍କର ଅଗ୍ନିକାଣ୍ଡ । ନିଆଁଲାଗି ୩ ନବଜାତ ଶିଶୁଙ୍କ ମୃତ୍ୟୁ ହୋଇଥିବା ବେଳେ ଅନ୍ୟ ୬ ଜଣ ଆହତ ହୋଇଛନ୍ତି।
ଆହତ ଶିଶୁମାନଙ୍କୁ ନିକଟସ୍ଥ ଅନ୍ୟ ଏକ ସରକାରୀ ସୁପର-ସ୍ପେଶାଲିଟି ସେଣ୍ଟରରେ ଭର୍ତ୍ତି କରାଯାଇଛି । ସୂଚନା ଅନୁଯାୟୀ, ଭୋର ୩:୩୦ ସମୟରେ ନବଜାତ ଇଣ୍ଟେନ୍ସିଭ୍ କେୟାର ୟୁନିଟ୍ (NICU) ରେ ଥିବା ଏକ ଭେଣ୍ଟିଲେଟରରେ ହଠାତ୍ ବିସ୍ଫୋରଣ ହୋଇ ନିଆଁ ଲାଗିଯାଇଥିଲା ।
ହସ୍ପିଟାଲର ତୃତୀୟ ମହଲାରେ ନିଆଁ ଲାଗିଥିଲା, ଯେଉଁଥିରେ ୩୯ ଜଣ ଶିଶୁ ରହୁଥିବା ୩ଟି କୋଠରୀ ଅଛି । ନିଆଁ ଲାଗିବା ମାତ୍ରେ ଡାକ୍ତର, ନର୍ସ ଏବଂ ଡ୍ୟୁଟିରେ ଥିବା କର୍ମଚାରୀମାନେ ନବଜାତ ଶିଶୁମାନଙ୍କୁ ଭେଣ୍ଟିଲେଟରରୁ ବାହାର କରିଥିଲେ । ଘଟଣା ସମୟରେ ସେହି ୱାର୍ଡରେ ୩୯ ଜଣ ନବଜାତ ଶିଶୁ ଭର୍ତ୍ତି ଥିଲେ । ତେବେ ଏଥିରେ ୩ ଜଣ ଶିଶୁଙ୍କ ମୃତ୍ୟୁ ହୋଇଥିବା ସୂଚନା ମିଳିଛି ।
ପୁଣି ଆଉ ଏକ ଲଘୁଚାପ ।
ନନ୍ଦିଘୋଷ ବ୍ୟୁରୋ:ସାରା ରାଜ୍ୟରେ ବର୍ଷା ନେଇ ଆଲର୍ଟ । ୬ଜିଲ୍ଲାକୁ ଅରେଞ୍ଜ ୱାର୍ନିଙ୍ଗ ଓ ୨୪ ଜିଲ୍ଲା କୁ ୟେଲୋ ୱାର୍ଣିଂ ଜାରି । ସୁନ୍ଦରଗଡ଼, ଝାରସୁଗୁଡା, ସମ୍ବଲପୁର, ବୌଦ୍ଧ,ସୋନପୁର ବରଗଡ଼ ଜିଲ୍ଲାକୁ ଅରେଞ୍ଜ ଆଲର୍ଟ ଜାରି କରାଯାଇଥିବାବେଳେ ଏଠାରେ ୧୨ ରୁ ୨୦ ସେଣ୍ଟିମିଟର ପର୍ଯ୍ୟନ୍ତ ବର୍ଷା ବର୍ଷା ହେବା ନେଇ ଆକଳନ କରାଯାଇଛି l
ସେହିପରି ଅବଶିଷ୍ଟ ୨୪ ଜିଲ୍ଲା ରେ ପ୍ରବଳ ବର୍ଷା ନେଇ ୟେଲୋ ୱାର୍ଣିଂ ଜାରି କରିଛି ପାଣିପାଗ କେନ୍ଦ୍ର l ଏହି ଜିଲ୍ଲା ରେ ୭ ରୁ ୧୧ ସେଣ୍ଟିମିଟର ପର୍ଯ୍ୟନ୍ତ ପ୍ରବଳ ବର୍ଷା ସମ୍ଭାବନା ରହିଛି l ଏହି ସମୟରେ ସମୁଦ୍ର ଅଶାନ୍ତ ଥିବାରୁ ମତ୍ସ୍ୟଜୀବୀଙ୍କୁ ସମୁଦ୍ରକୁ ଯିବାକୁ ବାରଣ କରାଯାଇଛି ।
ଉତ୍ତର ପଶ୍ଚିମ ବଙ୍ଗୋପସାଗର ରେ ସୃଷ୍ଟି ହୋଇଥିବା ଲଘୁଚାପ ପ୍ରଭାବରେ ରାଜ୍ୟରେ ଜାରି ରହିଛି ବର୍ଷା l ଏହା ଆସନ୍ତା ୨୪ ଘଣ୍ଟା ମଧ୍ୟରେ ଉତ୍ତର ଓଡିଶା ଅତିକ୍ରମ କରିବାର ସମ୍ଭାବନା ରହିଛି l ଏହାର ପ୍ରଭାବ ରେ ଆଜିଠାରୁ ରାଜ୍ୟରେ ବଢିବ ବର୍ଷା l ୨୮ ଯାଏ ବର୍ଷା ରୁ ନିସ୍ତାର ମିଳିବ ନାହିଁ ବୋଲି ଆକଳନ କରିଛି ପାଣିପାଗ କେନ୍ଦ୍ର l
ସେପଟେ ପଶ୍ଚିମବଙ୍ଗ, ବାଂଲାଦେଶ ସଂଲଗ୍ନ ଅଂଚଳରେ ସକ୍ରିୟ ଘୁର୍ଣ୍ଣିବଳୟ ଲଘୁଚାପ ରୂପ ନେବା ପରେ ଏବେ ଉତ୍ତର,ଉପକୂଳ,ଦକ୍ଷିଣ ଏବଂ ପଶ୍ଚିମ ଓଡିଶାରେ ବିଭିନ୍ନ ସ୍ଥାନରେ ପ୍ରବଳ ବର୍ଷା ଓ ଆଉ କିଛି ସ୍ଥାନରେ ପ୍ରବଳ ରୁ ଅତି ପ୍ରବଳ ବର୍ଷା ଜାରି ରହିଛି ବୋଲି ସୂଚନା ଦେଇଛି ଆଞ୍ଚଳିକ ପାଣିପାଗ କେନ୍ଦ୍ର ।
ଉପାନ୍ତରେ ବିକାଶର ବାଟ ହୁଡ଼ିଛି, ୨ କିମି ଖଟିଆରେ ବୁହା ହେଉଛନ୍ତି ରୋଗୀ; ରାସ୍ତା ନହେଲେ ଭୋଟ୍ ବର୍ଜନ ଚେତାବନୀ
ନନ୍ଦିଘୋଷ ବ୍ୟୁରୋ : ଉପାନ୍ତରେ ବାଟ ହୁଡ଼ିଛି ବିକାଶ । ଆଜି ଯାଏଁ ପହଞ୍ଚିପାରିନି ବିକାଶର ପଦଚିହ୍ନ । ଆବଡ଼ାଖାବଡ଼ା ରାସ୍ତା ଦେଇ ଯାଆସ କରୁଛନ୍ତି ଲୋକେ । ନିଘୋଡ଼ ନିଦରେ ପ୍ରଶାସନ । କୋରାପୁଟ ଜିଲ୍ଲା ପଟାଙ୍ଗୀ ବ୍ଲକ ଚନ୍ଦକା ପଞ୍ଚାୟତର ତୋଳଖରାଡ଼ବା ଗାଁକୁ ଆଜି ଯାଏଁ ରାସ୍ତା ଖଣ୍ଡିଏ ନାହିଁ । ଫଳରେ ଗାଁ ଲୋକେ ଯାତାୟାତରେ ନାନା ସମସ୍ୟା ଭୋଗୁଛନ୍ତି ।
ସବୁଠୁ ବଡ଼ ସମସ୍ୟା ହେଉଛି ଜରୁରୀ ସମୟରେ ଗାଁକୁ ଆମ୍ବୁଲାନ୍ସ ପହଞ୍ଚିପାରୁନାହିଁ । ରୋଗୀଙ୍କୁ ଖଟିଆରେ ପ୍ରାୟ ୨ କିଲୋମିଟର ବୋହି ନେବାକୁ ପଡ଼ୁଛି । ବର୍ଷା ଦିନେ ସ୍ଥିତି ଆହୁରି ଦୟନୀୟ ହୋଇପଡ଼ୁଛି । ରାସ୍ତା ନଥିବାରୁ ଗାଁ ଲୋକଙ୍କ ଦୁର୍ଦ୍ଦଶା ଦ୍ୱିଗୁଣିତ ହୋଇଯାଉଛି ।
ଗାଁକୁ ରାସ୍ତା ନିର୍ମାଣ ପାଇଁ ସ୍ଥାନୀୟ ଲୋକେ ବିଭାଗୀୟ ଅଧିକାରୀଙ୍କଠାରୁ ଆରମ୍ଭ କରି ଜିଲ୍ଲା ପ୍ରଶାସନ ନିକଟରେ ବାରମ୍ବାର ଗୁହାରି କରିଥିଲେ ମଧ୍ୟ କେହି କର୍ଣ୍ଣପାତ କରୁନଥିବା ଅଭିଯୋଗ ହୋଇଛି । କେବଳ ମିଳୁଛି ଫମ୍ପା ପ୍ରତିଶ୍ରୁତି । ଏହାକୁ ନେଇ ସ୍ଥାନୀୟ ଲୋକଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଦେଇଛି । ଆଗାମୀ ଦିନରେ ଗାଁକୁ ରାସ୍ତା ନିର୍ମାଣ ନହେଲେ ଭୋଟ୍ ବର୍ଜନ କରିବାକୁ ଚେତାବନୀ ଦେଇଛନ୍ତି ଗ୍ରାମବାସୀ । ଅନ୍ୟପଟେ, ଯଥାଶୀଘ୍ର ରାସ୍ତା ନିର୍ମାଣ ପାଇଁ ବ୍ୟବସ୍ଥା କରାଯିବ ବୋଲି କହିଛନ୍ତି ବ୍ଲକ୍ ଅଧ୍ୟକ୍ଷା ।
କନ୍ଦାଉଛି ପିଆଜ ଦର, କିଲୋ ୫୦ ଟଙ୍କା; ଗୋଦାମରେ ଯୋଗାଣ ବିଭାଗର ଚଢ଼ାଉ
ନନ୍ଦିଘୋଷ ବ୍ୟୁରୋ : କନ୍ଦାଉଛି ପିଆଜ ଦର । ୫୦ ଟଙ୍କାରେ ମିଳୁଛି କିଲେ । ଦରଦାମ ବୃଦ୍ଧିକୁ ନେଇ ଅତିଷ୍ଠ ଲୋକେ । ଖୋର୍ଦ୍ଧା ଜିଲ୍ଲାର ଅଧିକାଂଶ ପରିବା ଦୋକାନରୁ ପିଆଜ ଗାଏବ ହୋଇଯାଇଥିବା ବେଳେ କେଉଁଠି କେମିତି କିଛି ପିଆଜ ମିଳୁଛି ।
ଧନୀଠାରୁ ଗରିବ, ସମସ୍ତଙ୍କ ଖାଦ୍ୟରେ ପିଆଜର ଚାହିଦା ରହିଛି । ମାତ୍ର ଚାରି ଦିନ ତଳେ ୧୦୦ ଟଙ୍କାରେ ୩ କିଲୋ ପିଆଜ ମିଳୁଥିବା ବେଳେ ଅଚାନକ ଦର ବୃଦ୍ଧି ପାଇ ୫୦ ଟଙ୍କାରେ କିଲୋଏ ପିଆଜ ବିକ୍ରି ହେଉଛି । ଏହାକୁ ନେଇ ଗୃହିଣୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି । ଦରବୃଦ୍ଧି ପାଇଁ ବ୍ୟବସାୟୀମାନେ ସରକାରଙ୍କୁ ଦାୟୀ କରିଛନ୍ତି ।
ପିଆଜ ଦର ବୃଦ୍ଧି ଓ କଳାବଜାରୀ ନେଇ ଅଭିଯୋଗ ଆସିବା ପରେ ଖୋର୍ଦ୍ଧା ଜିଲ୍ଲା ଯୋଗାଣ ଅଧିକାରୀ ଜ୍ଞାନେନ୍ଦ୍ର ମିଶ୍ରଙ୍କ ନେତୃତ୍ୱରେ ୪ଟି ଟିମ୍ ଭୁବନେଶ୍ୱର, ଖୋର୍ଦ୍ଧା, ଜଟଣୀ, ବୋଲଗଡ଼ ଓ ବେଗୁନିଆ ଅଞ୍ଚଳର ବିଭିନ୍ନ ଗୋଦାମରେ ଚଢ଼ାଉ କରିଛନ୍ତି । ଟିମ୍ଗୁଡ଼ିକ ଗୋଦାମରେ ଥିବା ପିଆଜ ଷ୍ଟକ୍ ଯାଞ୍ଚ କରିବା ସହ ବିଲ୍ପତ୍ର ତନଖି କରୁଛନ୍ତି । ଅନ୍ୟପଟେ, ବିରୋଧୀ ଦଳ ଏହାକୁ ସରକାରଙ୍କ ଦୂରଦୃଷ୍ଟିର ଅଭାବ ଓ ବିଫଳତା ବୋଲି କହିଛି ।