ପେଟ୍ରୋଲ ପମ୍ପରେ ବିସ୍ଫୋରଣ ଘଟଣା: ନିଖୋଜ ସିମାଞ୍ଚଳ ପରିଡ଼ାଙ୍କ ହେଲା ପ୍ରତୀକାତ୍ମକ ଶବ ଦାହ

ଗଞ୍ଜାମ: ରାଜଧାନୀରେ ପେଟ୍ରୋଲ ପମ୍ପରେ ବିସ୍ଫୋରଣ ପୁରା ରାଜଧାନୀକୁ ସ୍ତବ୍ଦ କରିଦେଇଛି । ହଠାତ୍ ବିସ୍ଫୋରଣ ସବୁକିଛିକୁ ଅନ୍ଧାର କରିଦେଇଥିଲା । ଚାରିଆଡ଼େ ଶରୀରର ଖଣ୍ଡେ ଖଣ୍ଡେ ମାଂସ ବିଛାଡ଼ି ହୋଇ ପଡ଼ିଥାଏ । ଏ ଘଟଣା ୨୦୨୦ର କଳା ଫର୍ଦ୍ଦରେ ନିଜକୁ ସ୍ଥାନିତ କରିଛି । ଏ ଭିତରେ ରାଧାନୀର ବିସ୍ଫୋରଣ ଶବ୍ଦ ଗଞ୍ଜାମ ଜିଲ୍ଲାକୁ ଦୋହଲାଇ ଦେଇଛି । ରାଜଧାନୀରେ ହୋଇଥିବା ବିସ୍ଫୋରଣର ଆଉ ଏକ ହୃଦୟ ବିଦାରକ ଦୃଶ୍ୟ ଗଞ୍ଜାମ ଜିଲ୍ଲା ଆସିକା ବ୍ଳକ ଗହଙ୍ଗୁ ଗାଁରେ ଦେଖିବାକୁ ମିଳିଛି  । ଏମିତି ଏକ ଦୃଶ୍ୟ ଯାହା ଆପଣଙ୍କୁ ମଧ୍ୟ ଆଖିରେ ଲୁହ ଆଣିବାକୁ ବାଧ୍ୟ କରିବ । କାରଣ ବିନା ଶବରେ ଚାଲିଛି ଶବ ଶୋଭାଯାତ୍ରା । କାନ୍ଦ ବୋବାଳିରେ ଫାଟି ପଡ଼ୁଛି ଗାଁ ଦାଣ୍ଡ । ବିନା ମୃତ୍ୟୁ ହେଉଛି ମୃତ୍ୟୁ ବେଳର ଶେଷ କର୍ମ । ପୁଅ ବିସ୍ଫୋରଣରେ ଚାଲିଯାଇଛି ବୋଲି ଭାବି ପୂରା ପରିବାର ଏବେ ଶୋକ ସନ୍ତପ୍ତ ହୋଇପଡ଼ିଛି । ୪ କାନ୍ଧ ଉପରେ ଥିଲା ସତର କୋକେଇ ଆଉ ସତ ଜୁଇ ଉପରେ କିନ୍ତୁ ଥିଲା ମିଛର ଶବ । ମାଲୁଆ ଭାଇଙ୍କ ମୁହଁରେ ଥିଲା ରାମ ନାମ ସତ୍ୟ ହେ । ପୁରା ନୀତିକାନ୍ତିରେ ହେଉଛି ଶବ ଦାହ ।

ପୁଅ ମିଳିଲାନି, ତା ବୋଲି କ’ଣ ଆମେ ତା’ ଶବ ଦାହ କରିପାରିବୁନି । କ’ଣ ଆମେ ତା ଆତ୍ମାର ଶାନ୍ତି ପାଇଁ ଅକର୍ମଣ୍ୟ ହୋଇଯିବୁ । ସେଥିପାଇଁ ଲୁହ ଭିଜା ଭାବନାର ପୁଟୁଳି କାନ୍ଧରେ କାନ୍ଧେଇ ଚାଲିଲେ ଶବ ଦାହ କରିବାକୁ । ଆଉ ପାଳରେ ତିଆରି କଲେ ପୁଅର ଭାବନାର ଶବକୁ । ବିସ୍ଫୋରଣରେ ନିଖୋଜ ଥିବା ସିମାଞ୍ଚଳ ପରିଡାଙ୍କ ପରିବାର ଲୋକେ କଲେ ପ୍ରତୀକ ଶବଦାହ । ଘଟଣାର ୨ଦିନ ପରେ ପରିବାରଲୋକେ ପୁଅ ଆଉ ଫେରିବନି କହି ପାଳ ନଡାରେ ପୁତ୍ତଳିକା ତିଆରି କରି ଅନ୍ତିମ ସଂସ୍କାର କରିଛନ୍ତି । ଏ ଦୃଶ୍ୟ କେବଳ ଯେ, ଜିଲ୍ଲା ତାନୁହେଁ ରାଜ୍ୟରେ ଚର୍ଚ୍ଚାର ବିଷୟ ପାଲିଟିଛି ।

ସୂଚନ ଅନୁଯାୟୀ, ଗଲା ବୁଧବାର ଅପରାହ୍ନରେ ପେଟ୍ରୋଲ ପମ୍ପରେ ହୋଇଥିଲା ବିସ୍ଫୋରଣ । ଘଟଣାରେ ଜଣଙ୍କର ମୃତ୍ୟୁ ହୋଇଥିବା ବେଳେ ଜଣେ ନିଖୋଜ ଅଛନ୍ତି । ନିଖୋଜ ସିମାଞ୍ଚଳଙ୍କ ପତ୍ତା ନମିଳିବାରୁ ପରିବାର ଲୋକେ ତାଙ୍କ ପୁଅର ପ୍ରତୀକାତ୍ମକ ଦାହ ସଂସ୍କାର କରିଛନ୍ତି ।