ସ୍ୱାଧୀନତା ଦିବସରେ କାନ୍ଦିଲା ଗାଁ, ସ୍କୁଲକୁ ଯାଇ ଆଉ ଫେରିଲେନି…

ଜଗତସିଂହପୁର: ଅଗଷ୍ଟ ୧୫ ବା ସ୍ୱାଧୀନତା ଦିବସକୁ ସବୁଠୁ ଉତ୍ସାହର ମାହୋଲ୍ । ସ୍ୱାଧୀନତାର ଅଭିବ୍ୟକ୍ତିକୁ ସମସ୍ତେ ପ୍ରକାଶ କରୁଛନ୍ତି । କରୋନାର ଡର ଭିତରେ ଦିଲ୍ଲୀରୁ ପଲ୍ଲୀ ସବୁଠି କଟକଣାରେ ପାଳିତ ହୋଇଛି ଅଗଷ୍ଟ ୧୫ । ଏହାରି ଭିତରେ ଜଗତସିଂହପୁର ଜିଲ୍ଲାରୁ ଆସିଛି ଏକ ଦୁଃଖଦ ଖବର । ସ୍କୁଲକୁ ଜାତୀୟ ପତାକା ଉତ୍ତୋଳନ ପାଇଁ ଯାଇଥିବା ୨ ଜଣ ଛାତ୍ରଙ୍କ ମୃତ୍ୟୁ ହୋଇଥିବା ଜଣାପଡ଼ିଛି । ଯାହାକୁ ନେଇ ସ୍ଥାନୀୟ ଅଞ୍ଚଳରେ ଖେଳିଯାଇଛି ଶୋକର ଛାୟା ।

ଅଗଷ୍ଟ ୧୫ ପାଇଁ ସକାଳୁ ଚଳଚଞ୍ଚଳ ଥିଲା ତିର୍ତ୍ତୋଲ ଥାନା ତୁଳଙ୍ଗ ଗାଁ । ଦଶମ ଶ୍ରେଣୀରେ ପଢ଼ୁଥିବା ପ୍ରତ୍ୟୁଷ ବିଶ୍ୱାଳ ଓ ନବମ ଶ୍ରେଣୀରେ ପଢ଼ୁଥିବା ଆୟୁଷ ବିଶ୍ୱାଳ ବିଦ୍ୟାଳୟକୁ ଯାଇଥିଲେ । ହେଲେ, ପତାକା ଉତ୍ତୋଳନ ପରେ ଉଭୟ ଘରକୁ ଫେରିନଥିଲେ । ପରିବାର ଲୋକ ବହୁ ଖୋଜାଖୋଜି କରିବା ପରେ ଉଭୟଙ୍କ ଶରୀର କେନାଲରୁ ମିଳିଥିଲା ।

ଜଗନ୍ନାଥପୁର ପଞ୍ଚାୟତ ଖୁନ୍ଦଳ ଗାଁ ପୋଖରୀ ନିକଟ ଏକ କେନାଲରେ ମୃତଦେହ ଭାସୁଥିବା ଦେଖିଥିଲେ ଲୋକ । ଏ ଖବର ପ୍ରଚାର ହେବାପରେ ସମଗ୍ର ଅଞ୍ଚଳରେ ଶୋକର ଛାୟା ଖେଳିଯାଇଛି । ଘଟଣା ସ୍ଥଳରୁ ସାଙ୍ଗେ ସାଙ୍ଗେ ୨ ଜଣଙ୍କୁ ଏରସମା ମେଡିକାଲ ପରେ ଜଗତସିଂହପୁର ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା । ସେଠାରେ ଡାକ୍ତର ଉଭୟଙ୍କୁ ମୃତ ଘୋଷଣା କରିଛନ୍ତି ।

(ଜଗତସିଂହପୁରରୁ ଦୀପ୍ତି ମହାନ୍ତି)