ନନ୍ଦିଘୋଷ ବ୍ୟୁରୋ: ପ୍ରଳୟଙ୍କରୀ ବନ୍ୟାରେ ଭାଙ୍ଗିଗଲା ସ୍କୁଲ । ମାଟିରେ ମିଶିଛି ଭଗ୍ନାବଶେଷ l ଫାଟକ କଥା ନକହିବା ଭଲ l ଗଞ୍ଜାମ କବିସୂର୍ଯ୍ୟନଗର ଭେଟସିଙ୍ଗି ପ୍ରାଥମିକ ବିଦ୍ୟାଳୟ କୋଠା ଭାଙ୍ଗିଯାଇଛି । ଗୋଟିଏ ପାଖ ଫାଟକ ଛିଡ଼ା ହୋଇଥିବା ବେଳେ ଅନ୍ୟଟି ମାଟିରେ ପୋତି ହୋଇଯାଇଛି l ଶୌଚାଳୟ ଓ ଖେଳ ପଡ଼ିଆ ଯୁଆଡ଼େ ଦେଖିବେ ଖାଲି ମାଟି ଓ କାଦୁଅର ଆସ୍ତରଣ l ବନ୍ୟା ପରେ ଗଞ୍ଜାମ କବିସୂର୍ଯ୍ୟନଗର ବ୍ଲକ ଭେଟସିଙ୍ଗି ଗାଁ ପ୍ରାଥମିକ ବିଦ୍ୟାଳୟର ଏଭଳି ସ୍ଥିତି l ବିପଦଶଙ୍କୁଳ କୋଠାକୁ ପ୍ରଶାସନ ପକ୍ଷରୁ ବନ୍ଦ ରଖାଯାଇଛି । ଦୀର୍ଘ ୨୨ ଦିନ ପରେ ବିଦ୍ୟାଳୟ ଖୋଲିଛି ସତ । ହେଲେ କୋଠା ଅଭାବରୁ ଅଙ୍ଗନବାଡ଼ି କେନ୍ଦ୍ରରେ ଚାଲିଛି ପିଲାଙ୍କ ପାଠପଢା ।
ବନ୍ୟା ପୂର୍ବରୁ ଭେଟସିଙ୍ଗି ପ୍ରାଥମିକ ବିଦ୍ୟାଳୟର ଅବସ୍ଥା ବେଶ ଭଲ ଥିଲା । ବହୁ ପିଲା ଏଠାରେ ପାଠ ପଢୁଥିଲେ । ବନ୍ୟାରେ ବିଦ୍ୟାଳୟ କୋଠା ଭାଙ୍ଗିଯିବାରୁ ଅଙ୍ଗନବାଡ଼ି କେନ୍ଦ୍ରରେ ଚାଲିଛି ପିଲାଙ୍କ ପାଠପଢା । ଗୋଟିଏ ରୁମରେ ସକାଳୁ ଅଙ୍ଗନବାଡ଼ି କେନ୍ଦ୍ର ଓ ଦିନରେ ବିଦ୍ୟାଳୟ ଚାଲୁଛି l ଯେଉଁଠି ପିଲାଏ ପଢୁଛନ୍ତି, ସେଇଠି ଖାଇବାକୁ ବାଧ୍ୟ ହେଉଛନ୍ତି । ଶୌଚାଳୟ, ଖେଳପଡ଼ିଆ ଭଳି କୌଣସି ସୁବିଧା ନଥିବାରୁ ବହୁ ଅସୁବିଧାର ସମ୍ମୁଖୀନ ହେଉଛନ୍ତି । ଯଥାଶୀଘ୍ର ବିଦ୍ୟାଳୟ ମରାମତି କରିବାକୁ ସାଧାରଣରେ ଦାବି ହୋଇଛି ।

