ବରଗଡ: ଡେବ୍ରିଗଡ଼ ବନ୍ୟପ୍ରାଣୀ ଅଭୟାରଣ୍ୟରେ ବୁଲୁଥିବା ବାଘର ଗତିବିଧି ସମ୍ପର୍କରେ ମିଳିଛି ସୂଚନା। ଛତିଶଗଡ଼ ବନ ବିଭାଗର ଅଧିକାରୀଙ୍କ ପକ୍ଷରୁ ମିଳିଥିବା କ୍ୟାମେରା ଟ୍ରାପ୍ ଫଟୋକୁ ବାଘର ଦେହରେ ଥିବା ଡୋରା ବା ଷ୍ଟ୍ରାଇପ୍ ପ୍ୟାଟର୍ଣ୍ଣ ସହ ମେଳ କରିବା ପରେ ଏହାର ପୂର୍ବ ଅବସ୍ଥିତି ସ୍ପଷ୍ଟ ହୋଇଛି। ବାଘଟି ୨୦୨୫ ମସିହାରେ ପ୍ରାୟ ୬ ମାସ ଧରି ଛତିଶଗଡ଼ର ଉଦନ୍ତୀ-ସୀତାନଦୀ ବ୍ୟାଘ୍ର ସଂରକ୍ଷଣ ପ୍ରକଳ୍ପ ଅଞ୍ଚଳରେ ଥିଲା ବୋଲି କ୍ୟାମେରାରେ କଏଦ ହୋଇଥିଲା।
ତେବେ ବାଘଟି ପ୍ରଥମେ ମହାରାଷ୍ଟ୍ରରୁ ବିଚରଣ କରି ଛତିଶଗଡ଼ ଦେଇ ଓଡ଼ିଶାର ଡେବ୍ରିଗଡ଼କୁ ଆସି ଥାଇପାରେ ବୋଲି ବନ ବିଭାଗର ଅଧିକାରୀମାନେ ଅନୁମାନ କରୁଛନ୍ତି। କିନ୍ତୁ ମହାରାଷ୍ଟ୍ରରୁ ବାଘର ଗତିପଥ ସମ୍ପର୍କରେ କୌଣସି କ୍ୟାମେରା ଟ୍ରାପ୍ ପ୍ରମାଣ ମିଳିନାହିଁ। ଅନ୍ୟପଟେ ବାଘର ପୂର୍ବ ଗତିବିଧି ଓ ବିଚରଣ ଇତିହାସ ସମ୍ପର୍କରେ ଅଧିକ ତଥ୍ୟ ପାଇବା ପାଇଁ ଡେବ୍ରିଗଡ଼ କର୍ତ୍ତୃପକ୍ଷ ଜାତୀୟ ବ୍ୟାଘ୍ର ସଂରକ୍ଷଣ ପ୍ରାଧିକରଣକୁ ଅନୁରୋଧ କରିଛନ୍ତି। ବାଘର ଅଧିକ କ୍ୟାମେରା ଟ୍ରାପ୍ ତଥ୍ୟ ଯାଞ୍ଚ ଓ ବିଶ୍ଳେଷଣ ଜାରି ରହିଛି।
