ମାଲକାନଗିରି: ଜୀବିତ ଯୁବତୀ ସୁଭଦ୍ରା ପୋର୍ଟାଲରେ ମୃତ। ମିଳିଥିଲା ସୁଭଦ୍ରାର ପ୍ରଥମ କିସ୍ତି । ଦ୍ୱିତୀୟ କିସ୍ତି ପାଇଁ ଗଲାବେଳେ ଯୁବତୀ ସୁଭଦ୍ରା ପୋର୍ଟାଲରେ ମୃତ୍ୟୁ । ନା ଚଳୁଛି ଆଧାର କାର୍ଡ ନା କାମରେ ଲାଗୁଛି ସ୍ୱାସ୍ଥ୍ୟ ବିମା କାର୍ଡ । ଦୀର୍ଘ ଦିନରୁ ଜୀବିତ ହୋଇ ବି ସରକାରୀ କାଗଜପତ୍ରରେ ମୃତ ହୋଇଯାଇଛନ୍ତି ଆଦିବାସୀ ଯୁବତୀ ସନମତି କଟପାଡିଆ । ମାଲକାନଗିରି ଜିଲ୍ଲା ମାଥିଲି ବ୍ଲକ ଅନ୍ତର୍ଗତ କିଆଙ୍ଗ ପଞ୍ଚାୟତ ଅଧିନ ସର୍ଗୀଗୁଡାରେ ଏଭଳି ଘଟଣା ଦେଖିବାକୁ ମିଳୁଛି।
ଏନେଇ ଆଜି କିଆଙ୍ଗ ଠାରେ ବିଡିଓଙ୍କ ଅଭିଯୋଗ ଶୁଣାଣିରେ ଆସି ଏଭଳି ଅଭିଯୋଗ କରିଛନ୍ତି ଯୁବତୀ। ଏହାର ପ୍ରଭାବରେ ତାଙ୍କ ଆଧାର କାର୍ଡ ସମେତ, ସ୍ୱାସ୍ଥ୍ୟ ବିମା, ରାସନ କାର୍ଡ ମଧ୍ୟ କାମରେ ଲାଗୁନାହିଁ । ଗରିବ ଯୁବତୀ ଜଣକ ସ୍ୱାସ୍ଥ୍ୟକ୍ଷେତ୍ରରେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି ।
ବିଡିଓ ଏହାକୁ ଗୁରୁତ୍ୱ ସହ ନେଇ ପଦକ୍ଷେପ ନେବେ, କାହିଁକି ଏପରି ହୋଇଛି ଏବଂ ଜୀବିତ ସମନତିଙ୍କୁ କିପରି ନ୍ୟାୟ ମିଳିବ ସେ ନେଇ ପଦକ୍ଷେପ ନିଆଯିବ ବୋଲି କହିଛନ୍ତି ମାଥିଲି ବିଡିଓ ପ୍ରମୋଦ କୁମାର ବେହେରା ।
