ଦେବଗଡ଼ : ଦେବଗଡ଼ କୁଣ୍ଢେଇଗୋଳା ଥାନା ଗରିଆପାଲି ଗ୍ରାମରେ ଗତ ଗୁରୁବାର ଘଟି ଥିବା ଟ୍ରିପଲ ମର୍ଡର ଘଟଣାର ଏକମାତ୍ର ଅଭିଯୁକ୍ତ ରମେଶ ଗରିଆକୁ ଗାଁ ପାଣି ଟାଙ୍କି ଉପରୁ ଠାବ କଲେ ଗ୍ରାମବାସୀ l ନିଜ ସ୍ତ୍ରୀ ଗୁଲ ଗରିଆ, ବୋହୁ ଲିପି ମହାକୁଳ ଓ ୪ ବର୍ଷୀୟ ନାତୁଣୀ ଈଶାନୀକୁ ହାମର ସାହାଯ୍ୟରେ ପିଟି ହତ୍ୟା କରିବା ପରଠାରୁ ଫେରାରଥିଲା ଅଭିଯୁକ୍ତ ରମେଶ l ଆଜି ଗାଁ ପାଣି ଟାଙ୍କି ୫୦ ଫୁଟ ଉପରେ ଏକ କୁରାଢ଼ୀ ଧରି ଥିବା କେତେକ ଗ୍ରାମବାସୀ ଦେଖି କୁଣ୍ଢେଇଗୋଳା ପୋଲିସକୁ ଖବର ଦେଇଥିଲେ । ଅଭିଯୁକ୍ତ ଟାଙ୍କି ଉପରେ ଥିବାବେଳେ ତଳେ ଜଗି ରହିଥିଲେ ପୋଲିସ । ଦୀର୍ଘ ୨ ଘଣ୍ଟାର ହାଇ ଡ୍ରାମା ପରେ ଅଭିଯୁକ୍ତ ରମେଶ ଗରିଆକୁ ପାଣି ଟାଙ୍କି ଉପରେ କାବୁ କଲେ ଅଗ୍ନିଶମ ବିଭାଗ କର୍ମଚାରୀ l ତଳକୁ ଆଣିବା ପରେ ପୁଲିସ ହେପାଜତରେ ଅଭିଯୁକ୍ତକୁ ଥାନାକୁ ନେଲା ପୋଲିସ l ତେବେ ଅଭିଯୁକ୍ତ ବିଷପାନ କରିଥିବାରୁ ପ୍ରାଥମିକ ଚିକିତ୍ସା ପାଇଁ କୁଣ୍ଢେଇଗୋଳା ଡାକ୍ତରଖାନାରେ ଭର୍ତ୍ତି କରିଛି କୁଣ୍ଢେଇଗୋଳା ପୋଲିସ l
