ନୂଆଦିଲ୍ଲୀ: ଦିଲ୍ଲୀ ବିଧାନସଭା ନିର୍ବାଚନ ପୂର୍ବରୁ ଦିଲ୍ଲୀ ସରକାର ଓ କେନ୍ଦ୍ର ସରକାର ମୁହାଁମୁହିଁ। ଏବେ ଦିଲ୍ଲୀରେ ଆମ୍ ଆଦମୀ ପାର୍ଟି କ୍ଷମତାରେ ଥିଲେ ବି ଏପରି ପରିସ୍ଥିତି ସୃଷ୍ଟି ହୋଇଛି। ନିର୍ବାଚନ ଆଗରୁ ଆପ୍ ଦୁଇଟି ବଡ଼ ଘୋଷଣା କରିଛି। ବରିଷ୍ଠ ଲୋକଙ୍କୁ ମାଗଣା ଚିକିତ୍ସା ପାଇଁ ସଂଜୀବନୀ ଯୋଜନା ଓ ମହିଳାଙ୍କୁ ଆର୍ଥିକ ସହାୟତା ପାଇଁ ମହିଳା ସମ୍ମାନ ଯୋଜନା ଘୋଷଣା କରାଯାଇଛି। ଏପରିକି ଏହାର ପଂଜୀକରଣ ପାଇଁ ନିଜେ ଆପ୍ ତରଫରୁ ବିଭିନ୍ନ କଲୋନି ବୁଲୁଛନ୍ତି ନେତାମାନେ। ତେବେ ଦିଲ୍ଲୀ ସରକାରଙ୍କ ତରଫରୁ ଏପରି କୌଣସି ଯୋଜନା ଲାଗୁ କରାଯାଇ ନାହିଁ ବୋଲି ଦିଲ୍ଲୀ ସରକାରଙ୍କ ସ୍ଵାସ୍ଥ୍ୟ ବିଭାଗ ଏବଂ ମହିଳା ଓ ଶିଶୁ କଲ୍ୟାଣ ବିଭାଗ କହିଛି। ଏ ସଂପର୍କିତ ବିଜ୍ଞାପନ ବିଭିନ୍ନ ଖବର କାଗଜରେ ଆଜି ପ୍ରକାଶ ପାଇଛି। ସ୍ଵାସ୍ଥ୍ୟ ବିଭାଗ ପକ୍ଷରୁ କୁହାଯାଇଛି, ସଂଜୀବନୀ ନାଁରେ ଆମର କୌଣସି ଯୋଜନା ନାହିଁ। ଲୋକଙ୍କ ବ୍ୟକ୍ତିଗତ ତଥ୍ୟ ସଂଗ୍ରହ କରିବାର ଅଧିକାର ବି କାହାର ନାହିଁ। ଏହା ବେଆଇନ।
ସେହିପରି ମହିଳା ଓ ଶିଶୁ କଲ୍ୟାଣ ବିଭାଗ ପକ୍ଷରୁ କୁହାଯାଇଛି, ମହିଳା ସମ୍ମାନ ନାଁରେ ଆମର କୌଣସି ଯୋଜନା ନାହିଁ। ଏହା ପରେ ବିଜେପିକୁ କଡ଼ା ଭାଷାରେ ଭର୍ତ୍ସନା କରିଛନ୍ତି ଅରବିନ୍ଦ କେଜରିୱାଲ ଓ ମୁଖ୍ୟମନ୍ତ୍ରୀ ଅତିଶୀ। କେଜରିୱାଲ କହିଛନ୍ତି, ଆମେ ଯୋଜନା ଘୋଷଣା କରିବା ପରେ ବିଜେପି ପୁରା ଡରି ଯାଇଛି। ନିର୍ବାଚନର ଏଥର ମଧ୍ୟ ବିଜେପିର ଶୋଚନୀୟ ପରାଜୟ ହେବ। ସେଥିପାଇଁ ସେମାନେ ଆତଙ୍କିତ। ଦିଲ୍ଲୀ ପାଇଁ ବିଜେପି କିଛି ବି କରି ନାହିଁ। ରାଜଧାନୀର ଆଇନ ଶୃଙ୍ଖଳା ବିଗିଡ଼ିଛି। ସଂଜୀବନୀ ପାଇଁ ୧ ଲକ୍ଷ ୫୦ ଲୋକ ପଂଜୀକରଣ କଲେଣି। ସେହିପରି ମହିଳା ସମ୍ମାନ ଯୋଜନାରେ ୧୩ ଲକ୍ଷ ମହିଳା ପଂଜୀକରଣ କଲେଣି । ଏହି କାମରେ ଲାଗିଛନ୍ତି ୩ ହଜାର ଆପ୍ କର୍ମୀ। ଏହାକୁ ବିଜେପି ସହିପାରୁନି। ତେଣୁ ମୁଖ୍ୟମନ୍ତ୍ରୀ ଅତିଶୀ ଓ ଦଳ ଅନ୍ୟ ବରିଷ୍ଠ ନେତାଙ୍କୁ ଗିରଫ କରିବାକୁ ଷଡ଼଼ଯନ୍ତ୍ର କରାଯାଉଛି। କେଜରିୱାଲ କହିଛନ୍ତି, ମୋ ଉପରେ, ସିସୋଦିଆ, ସଂଜୟଙ୍କ ଉପରେ ରେଡ୍ ହୋଇପାରେ।
ମୁଖ୍ୟମନ୍ତ୍ରୀ ଅତିଶି କହିଛନ୍ତି, ବିଜେପିର ସବୁ ଷଡ଼ଯନ୍ତ୍ର ଫେଲ୍ ମାରିବ। ଦେଶର ନ୍ୟାୟ ବ୍ୟବସ୍ଥା ଉପରେ ମୋର ଭରସା ଅଛି। ସ୍ଵାସ୍ଥ୍ୟ ବିଭାଗ, ମହିଳା ଓ ଶିଶୁ କଲ୍ୟାଣ ତରଫରୁ ଯେଉଁ ନୋଟିସ୍ ବାହାର କରାଯାଇଛି, ତାହା ଠିକ୍ ନୁହେଁ। ବିଜେପିର ଚାପରେ ଅଧିକାରୀମାନେ ଏପରି କରିବାକୁ ବାଧ୍ୟ ହୋଇଛନ୍ତି।
