ପୂର୍ବତନ ASI ଅଧିକାରୀଙ୍କ ବଡ଼ ଦାବି, ସୂର୍ଯ୍ୟଙ୍କ ସ୍ଥିତି ଅଧ୍ୟୟନ ପାଇଁ ନିର୍ମାଣ ହୋଇଥିଲା କୁତବ ମିନାର

ନୂଆଦିଲ୍ଲୀ: ମହାରାଷ୍ଟ୍ରସ୍ଥିତ ଔରଙ୍ଗଜେବ ସ୍ତମ୍ଭକୁ ନେଇ ଦେଶ ବ୍ୟାପୀ ବିବାଦ ଥମି ନଥିବା ବେଳେ, ଏବେ କୁତବ ମିନାରକୁ ନେଇ ଆରମ୍ଭ ହୋଇଛି ନୂଆ ବିବାଦ । କୁତବ ମିନାରକୁ ମୋଗଲ ସମ୍ରାଟ କୁତବୁଦ୍ଦିନ ନିର୍ମାଣ କରିନଥିଲେ ବରଂ ଏହି ନିର୍ମାଣ ପଞ୍ଚମ ଶତାବ୍ଦୀରେ ସମ୍ରାଟ ବିକ୍ରମାଦିତ୍ୟ କରିଥିଲେ ବୋଲି କହିଛନ୍ତି ଏଏସଆଇର ପୂର୍ବତନ ବରିଷ୍ଠ ପଦାଧିକାରୀ । ସୂର୍ଯ୍ୟଙ୍କ ସ୍ଥିତିର ଅଧ୍ୟୟନ ଓ ଗବେଷଣା ପାଇଁ ଏହି ମିନାର ନିର୍ମାଣ କରାଯାଇଥିଲା ।

ଏହା କୁତବ ମିନାର ନୁହେଁ ବରଂ ସନ୍ ଟାୱାର ବୋଲି ବିଭିନ୍ନ ସମୟରେ କରାଯାଇଥିବା ସର୍ଭେ ଓ ଗବେଷଣାରୁ ତଥ୍ୟ ମିଳିଥିଲା ବୋଲି କହିଛନ୍ତି ଏଏସଆଇର ପୂର୍ବତନ ଆଞ୍ଚଳିକ ନିର୍ଦ୍ଦେଶକ ଧରମବିର ଶର୍ମା । ଯାହାକୁ ନେଇ ଏବେ ମୁଣ୍ଡ ଟେକିଛି ବିବାଦ । ରାତିରେ ଧ୍ରୁବତାରାର ଅଧ୍ୟୟନ ପାଇଁ ଏହି ଟାୱାରର ଉତ୍ତର ପାର୍ଶ୍ୱରେ ଏକ ଦ୍ୱାର ମଧ୍ୟ ରହିଛି । ରାଜା ଚନ୍ଦ୍ରଗୁପ୍ତ ବିକ୍ରମାଦିତ୍ୟ ୩୭୫ରୁ ୪୧୨ ଖ୍ରୀଷ୍ଟାଦ୍ଦରେ ଏହି ସ୍ତମ୍ବ ନିର୍ମାଣ କରିଥିଲେ ବୋଲି ଅଧ୍ୟୟନରୁ ଜଣାପଡ଼ିଛି ।