ଓଡ଼ିଶା ବିଧାନସଭାରେ ଭାରତୀୟ ହକି ଟିମ୍ ଉଦ୍ଦେଶ୍ୟରେ ଧନ୍ୟବାଦ ପ୍ରସ୍ତାବ ଆଗତ
ଭୁବନେଶ୍ୱର: ଟୋକିଓ ଅଲିମ୍ପିକ୍ସରେ ମହିଳା ଓ ପୁରୁଷ ହକି ଦଳର ଶ୍ରେଷ୍ଠ ପ୍ରଦର୍ଶନ ପାଇଁ ବିଧାନସଭାରେ ଧନ୍ୟବାଦ ପ୍ରସ୍ତାବ ଆଗତ କରିଛନ୍ତି କ୍ରୀଡ଼ାମନ୍ତ୍ରୀ ତୁଷାରକାନ୍ତି ବେହେରା । ୪୧ ବର୍ଷ ପରେ ପୁରୁଷ ହକି ଟିମ ଅଲିମ୍ପିକ୍ସରେ ପଦକ ଜିତିଛି । ଏହା ସାରା ବିଶ୍ୱରେ ଦେଶକୁ ସ୍ୱତନ୍ତ୍ର ପରିଚୟ ଦେଇଛି । ସେହିପରି ମହିଳା ହକି ଟିମ ଟୋକିଓରେ ମେଡାଲ ଜିତିନଥିଲେ ମଧ୍ୟ ସଂଘର୍ଷ କରି ସାରା ଦେଶର ହୃଦୟ ଜିତିଛି । ଉଭୟ ଟିମର ଏଭଳି ପ୍ରଦର୍ଶନ ସାରା ଦେଶକୁ ଏକାଠି କରିଛି । ବିଧାନସଭା ତରଫରୁ ଉଭୟ ପୁରୁଷ ଓ ମହିଳା ହକି ଟିମକୁ ଅଭିନନ୍ଦନ ଜଣାଇବା ସହ ଆଗାମୀ ଦିନରେ ଅଧିକ ସଫଳତା କାମନା କରିଛନ୍ତି କ୍ରିଡାମନ୍ତ୍ରୀ ତୁଷାରକାନ୍ତି ବେହେରା । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସବୁ ସମୟରେ ହକିର ବିକାଶ ପାଇଁ ଚେଷ୍ଟା କରିଛନ୍ତି । ଓଡ଼ିଶା ହକି ଟିମର ପ୍ରାୟୋଜକ ରହିଥିଲା । ୨୦୧୮ରେ ହକି ବିଶ୍ୱକପ୍ ଆୟୋଜନ କରିଛି ଓଡ଼ିଶା । ଏହା ରାଜ୍ୟରେ ହକିର ବିକାଶ ଦିଗରେ ଆଉ ଏକ ଉଲ୍ଲେଖନୀୟ ଅବଦାନ । ସେହିଭଳି ୨୦୨୩ରେ ରାଉଲକେଲାରେ ହେବାକୁ ଥିବା ପୁରୁଷ ହକି ବିଶ୍ୱକପ ପାଇଁ ଦେଶର ସର୍ବବୃହତ ହକି ଷ୍ଟାଡିୟମ ନିର୍ମାଣ କରାଯାଉଛି । ତୃଣମୂଳ ସ୍ତରରେ ପ୍ରସ୍ତୁତ ହେଉଛି ହକି ତାଲିମ କେନ୍ଦ୍ର । କଳିଙ୍ଗ ଷ୍ଟାଡିୟମରେ ନିର୍ମାଣ ହୋଇଛି ହାଇ ପରଫର୍ମାନ୍ସ ସେଣ୍ଟର । ଆସନ୍ତା ୧୦ ବର୍ଷ ପାଇଁ ହକି ପ୍ରାୟୋଜକ ରହିବ ଓଡିଶା । ମୁଖ୍ୟମନ୍ତ୍ରୀ ଏହି ଐତିହାସିକ ଘୋଷଣା କରିଛନ୍ତି ।
