ଶହୀଦ ଆମେରିକୀୟ ସୈନିକଙ୍କ ଶେଷ ପୋଷ୍ଟ: ‘ମାରିବୁ ନ ହେଲେ ମରିବୁ’
କାବୁଲ: ଆଫଗାନିସ୍ତାନରେ ତାଲିବାନର ବର୍ବରତା ଜାରି ରହିଛି । ଏଭଳି ସ୍ଥିତିରେ ଅନ୍ୟତ୍ର ପଳାୟନ ନେଇ ପ୍ରାଣପ୍ରଣେ ଉଦ୍ୟମ ଚଳାଇଛନ୍ତି ସ୍ଥାନୀୟ ଲୋକେ । ତାଲିବାନୀର ବର୍ବରତାରେ ଲୋକେ ଅତିଷ୍ଟି ଥିବା ବେଳେ ଏହାରି ମଧ୍ୟରେ ରକ୍ତର ହୋଲି ଖେଳିଛି ଆଉ ଏକ ଆତଙ୍କବାଦୀ ସଂଗଠନ ଆଇଏସ୍ଆଇଏସ୍ କେ । କାବୁଲ ଏୟାରପୋର୍ଟରେ ହୋଇଥିବା ଆତ୍ମଘାତୀ ସିରିଏଲ୍ ବ୍ଳାଷ୍ଟରେ ୧୬୯ ଲୋକେ ନିଜ ପ୍ରାଣ ହରାଇଥିବା ବେଳେ ସେମାନଙ୍କ ମଧ୍ୟରେ ୧୩ ଜଣ ଆମେରିକୀୟ ସୈନିକ ମଧ୍ୟ ଶହୀଦ ହୋଇଛନ୍ତି । ଏମାନଙ୍କ ମଧ୍ୟରୁ ଜଣେ ସୈନିକ ହେଉଛନ୍ତି ମ୍ୟାକ୍ସଟନ୍ ଓ୍ୱିଲିୟମ୍ ସୋଭିଏକ୍ । ନୈସେନା ଯବାନ ଓ୍ୱିଲିୟମ୍ ମୃତ୍ୟୁ ପୂର୍ବରୁ ପ୍ରଥମେ ଇନ୍ଷ୍ଟାଗ୍ରାମରେ ଏକ ପୋଷ୍ଟ କରିଥିଲେ । ଯେଉଁଥିରେ ଆଫଗାନିସ୍ତାନରେ ସେତେବେଳର ସ୍ଥିତି ସମ୍ପର୍କରେ ସୂଚିତ କରିଥିଲେ ।
ରିପୋର୍ଟ ମୁତାବକ ଆମେରିକା ନୈସେନାର ଓ୍ୱିଲିୟମ୍ ସୋଭିଏକ ୧୦ ଜୁନ୍ରେ ଇନଷ୍ଟାଗ୍ରାମ୍ରେ କରିଥିବା ଅନ୍ତିମ ପୋଷ୍ଟରେ ଲେଖିଥିଲେ ଯେ, ମାରିବାର ଅଛି ନଚେତ ମରିବାର ଅଛି । ଦୁଇଟି ଯାକ ସ୍ଥିତିରେ ମୃତ୍ୟୁ ସୁନିଶ୍ଚିତ । ଏହି ସମୟରେ ସେ ନିଜ ସାଥୀଙ୍କ ଫଟୋ ମଧ୍ୟ ସେୟାର କରିଥିଲେ ।
ଓ୍ୱିଲିୟମ୍ଙ୍କ ଭଉଣୀ ମର୍ଲିନ ନିଜ ଇନଷ୍ଟାଗ୍ରାମ ପୋଷ୍ଟରେ କହିଛନ୍ତି ଯେ, ଭାଇ ଲୋକଙ୍କୁ ସାହାଯ୍ୟ କରିବା ପାଇଁ ସେଠାରେ ଥିଲା, ଏବେ ମୋ ପରିବାର ଶେଷ ହୋଇଗଲା । ଏବେ ଆମେ ପୂର୍ବ ଭଳି ସ୍ୱାଭାବିକ ସ୍ଥିତିକୁ ଫେରିପାରିବୁ ନାହିଁ । ସେ ଏବେ ବି ଛୋଟ ପିଲା ଥିଲା । ଆମେ ସେଠାକୁ ପିଲାଙ୍କୁ ମରିବାକୁ ପଠାଇଦେଉଛୁ ।
ତେବେ ଆମେରିକା ଆଇଏସ୍ ଆଇଏସ୍ କେ ଆକ୍ରମଣର କଡ଼ା ଜବାବ ଦେଇଛି । ଡ୍ରୋନ୍ ଆକ୍ରମର କରିବା ସହ ଆତଙ୍କୀଙ୍କ ଆଡ୍ଡା ଉପରେ ଆକ୍ରମଣ କରିଛି ।
