ରାଉରକେଲା: ରାଉରକେଲା ରେଳବାଇ ସୁରକ୍ଷା ବଳ (RPF) ଥାନାରେ ସିବିଆଇର ବଡ଼ଧରଣର ଚଢ଼ାଉ ପରେ ବଡ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ଭେଣ୍ଡରମାନଙ୍କଠାରୁ ଦଲାଲ୍ଙ୍କ ଜରିଆରେ ମାସିକିଆ ବଟି ଆଦାୟ ଅଭିଯୋଗରେ ଆରପିଏଫ୍ ଇନ୍ସପେକ୍ଟର କମଲେସ ସମାଦାରଙ୍କୁ ଚାକିରିରୁ ନିଲମ୍ବିତ କରାଯାଇଛି।
ମିଳିଥିବା ସୂଚନା ଅନୁଯାୟୀ, ଏହି ମାମଲାରେ ସିବିଆଇ ପକ୍ଷରୁ ଚଢ଼ାଉ କରାଯାଇ ଅଜୟ ମିଶ୍ର ନାମକ ଜଣେ ଦଲାଲଙ୍କୁ ଗିରଫ କରାଯାଇଛି। ଏହା ସହ ଘଟଣାରେ ସଂପୃକ୍ତ ଥିବା ଅନ୍ୟ ଜଣେ ଦଲାଲଙ୍କୁ ସିବିଆଇ ପଚରାଉଚରା ଜାରି ରଖିଛି। ଅପରପକ୍ଷରେ, ସିବିଆଇ ଚଢ଼ାଉ ପରେ ଆରପିଏଫ୍ ଇନ୍ସପେକ୍ଟର କମଲେସ ସମାଦାର ଫେରାର ହୋଇଯାଇଥିବା ଜଣାପଡ଼ିଛି। ଗତକାଲି ସେ ଥାନାକୁ ମଧ୍ୟ ଆସିନଥିଲେ। ସିବିଆଇ ଟିମ୍ ତାଙ୍କ ବାସଭବନରେ ମଧ୍ୟ ରେଡ୍ କରିଥିବା ସୂଚନା ମିଳିଛି।
ଗିରଫ ଦଲାଲ ଅଜୟ ମିଶ୍ରଙ୍କୁ ଟ୍ରାନଜିଟ୍ ରିମାଣ୍ଡରେ ଭୁବନେଶ୍ୱର ନିଆଯାଇଛି। ଆଜି ତାଙ୍କୁ ଭୁବନେଶ୍ୱର ସିବିଆଇ କୋର୍ଟରେ ହାଜର କରାଯିବ। ଏହି ବଡ଼ଧରଣର ଲାଞ୍ଚ କାରବାର ପଛରେ ଆଉ କାହାର ହାତ ରହିଛି, ସେ ନେଇ ସିବିଆଇ ପକ୍ଷରୁ ଅଧିକ ଖୋଳତାଳ ଜାରି ରହିଛି।
