ସୁବର୍ଣ୍ଣରେଖା ନଦୀ ଉପରେ ସେତୁ ନିର୍ମାଣ ନିଷ୍ପତିକୁ ସ୍ୱାଗତ
ବାଲେଶ୍ୱର: ସୁବର୍ଣ୍ଣରେଖା ନଦୀ ଉପରେ ସେତୁ ନିର୍ମାଣ ନିଷ୍ପତିକୁ ନେଇ ବାଲେଶ୍ୱର ଜିଲ୍ଲାବାସୀଙ୍କ ମଧ୍ୟରେ ଖୁସିର ଲହରୀ । ଏହି ବ୍ରିଜ ନିର୍ମାଣ ପାଇଁ ଦୀର୍ଘଦିନ ଧରି ଲୋକେ ଦାବି କରିଆସୁଥିଲେ । ମୁଖ୍ୟମନ୍ତ୍ରୀ ତାଙ୍କ ଦାବି ଶୁଣିଛନ୍ତି । ସୁବର୍ଣ୍ଣରେଖା ନଦୀ ଉପରେ ସେତୁ ନିର୍ମାଣ ପ୍ରସ୍ତାବକୁ ଗତକାଲି କ୍ୟାବିନେଟ୍ ଅନୁମୋଦନ ଦେଇଛନ୍ତି । ଏନେଇ ଭୋଗରାଇ ବିଧାୟକ ଅନନ୍ତ ଦାସ ସାମ୍ବାଦିକ ସମ୍ମିଳନୀ କରି ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଜଣାଇଛନ୍ତି ।
ବାଲେଶ୍ୱର ଜିଲ୍ଲାର ବାଲିଆପାଳ ବ୍ଲକର ଜାମକୁଣ୍ଡା ଓ ଭୋଗରାଇ ବ୍ଲକର ଅଡଙ୍ଗାପନ୍ତେଇ ମଧ୍ୟରେ ଏହି ସେତୁ ନିର୍ମାଣ ହେବ । ୯୯୩ . ୧୨ ମିଟର ଲମ୍ବ ଏବଂ ୬୨.୦୭ ମିଟର ଓସାର ବିଶିଷ୍ଟ ଏହି ବ୍ରିଜ ନିର୍ମାଣ ପାଇଁ ୧୩୮ କୋଟି ୭୪ ଲକ୍ଷ ୪୮ ହଜାର ଟଙ୍କା ବ୍ୟୟ ବରାଦ ହୋଇଥିବା ବେଲେ ଏହାର ନିର୍ମାଣ କାର୍ଯ୍ୟ ୩୦ ମାସ ମଧ୍ୟରେ ଶେଷ କରାଯିବ ।
ଭୋଗରାଇ ଏବଂ ବାଲିଆପାଳ ବ୍ଲକ ମଧ୍ୟରେ ଗମନାଗମନ ଦୂରତା ହ୍ରାସ ପାଇବ । ଏହି ବ୍ରିଜ ହେବା ଫଳରେ ପ୍ରସ୍ତାବିତ ସୁବର୍ଣ୍ଣରେଖା ବନ୍ଦର , ଚନ୍ଦନେଶ୍ୱର ମନ୍ଦିର ଏବଂ ଭୂଷଣ୍ତେଶ୍ୱର ମନ୍ଦିର ଭଳି ଅର୍ଥନୈତିକ ଏବଂ ପର୍ଯ୍ୟଟନସ୍ଥଳୀ ଗୁଡିକ ସିଧାସଳଖ ସଂଯୋଗ ହୋଇପାରିବ ।
