ନନ୍ଦିଘୋଷ ବ୍ୟୁରୋ : ଜଗତସିଂହପୁର ଜିଲ୍ଲାରେ ସ୍ୱାସ୍ଥ୍ୟସେବା ବିପର୍ଯ୍ୟସ୍ତ । ଦିନ ରାତି ଜଗତସିଂହପୁର ଜିଲ୍ଲା ମୁଖ୍ୟ ଚିକିତ୍ସାଳୟରେ ରୋଗୀଙ୍କ ଲମ୍ବା ଲାଇନ ଲାଗୁଥିବା ବେଳେ ଡାକ୍ତରଙ୍କ ଅଭାବରୁ ସେବା ପାଉନାହାନ୍ତି ରୋଗୀ । ଜିଲ୍ଲାରେ ମୋଟ ୩୫୦ ଡାକ୍ତର ପଦବୀ ମଧ୍ୟରୁ ମାତ୍ର ୧୨୦ ଜଣ ଡାକ୍ତର ରହିଥିବା ବେଳେ ୨୩୦ଟି ପଦବୀ ଖାଲି ପଡ଼ିଛି । ଜିଲ୍ଲା ମୁଖ୍ୟ ଚିକିତ୍ସାଳୟରେ ୧୩୧ ଡାକ୍ତର ପଦବୀ ମଧ୍ୟରୁ ୫୬ ଜଣ ଡାକ୍ତର ଥିବା ବେଳେ ୭୫ଟି ପଦବୀ ଖାଲି ରହିଛି । ସେହିପରି ବିଭିନ୍ନ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ମଧ୍ୟ ଡାକ୍ତର ଅଭାବ ସମସ୍ୟା ସୃଷ୍ଟି କଲାଣି ।
ବିରିଡ଼ିରେ ୨୧ଟି ଡାକ୍ତର ପଦବୀରୁ ୧୮ଟି, ରଘୁନାଥପୁରରେ ୧୫, ନାଉଗାଁରେ ୧୫ ଏବଂ ମଣ୍ଡାସାହିରେ ୧୫ଟି ଡାକ୍ତରୀ ପଦବୀ ଖାଲି ରହିଛି। ଅନ୍ୟପଟେ, ଜିଲ୍ଲା ମୁଖ୍ୟ ଚିକିତ୍ସାଳୟର ସବୁଠାରୁ ଗୁରୁତ୍ୱପୂର୍ଣ୍ଣ ବିଭାଗ କୁହାଯାଉଥିବା ରେଡିଓଲୋଜି ବିଭାଗରେ ଆଦୌ ଡାକ୍ତର ନଥିବା ବେଳେ ଆନେସ୍ଥେସିଆ ବିଭାଗରେ ମାତ୍ର ଜଣେ ଡାକ୍ତର ଥିବା ଜଣାପଡ଼ିଛି । ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ଗୁଡ଼ିକ ସହ ଅନେକ ପ୍ରାଥମିକ ସ୍ୱାସ୍ଥ୍ୟକେନ୍ଦ୍ରରେ ମଧ୍ୟ ଆଦୌ ଡାକ୍ତର ନଥିବା ଅଭିଯୋଗ ହୋଇଛି । କୁଜଙ୍ଗ, ଏରସମା, ବାଲିକୁଦା, ମଣିଜଙ୍ଗା ଓ ବିରିଡ଼ି ଅଞ୍ଚଳର ଏକାଧିକ ପ୍ରାଥମିକ ସ୍ୱାସ୍ଥ୍ୟକେନ୍ଦ୍ର ଏହି ସମସ୍ୟାରେ ରହିଛି ।
