ନନ୍ଦିଘୋଷ ବ୍ୟୁରୋ : ଦୟନୀୟ ଅବସ୍ଥାରେ କାମାକ୍ଷାନଗର ହାଟ । କାଦୁଅ ଓ ପାଣିରେ ଭର୍ତ୍ତି ପରିସର । ହେଉନି ବିକ୍ରିବଟା। ହାଟକୁ ଆସିବାକୁ ଅମଙ୍ଗ ହେଲେଣି ବ୍ୟବସାୟୀ । ଢେଙ୍କାନାଳ କାମାକ୍ଷାନଗର ସହରର ମଧ୍ୟଭାଗ ରେ ଅବସ୍ଥିତ କାମାକ୍ଷାନଗର ହାଟ l ପ୍ରତ୍ୟେକ ସପ୍ତାହର ସୋମବାରରେ ଏହି ହାଟ ବସୁଥିବାରୁ ଦୂରଦୁରାନ୍ତ ରୁ ବହୁ ବ୍ୟବସାୟୀ ଓ ଗ୍ରାହକଙ୍କ ଭିଡ଼ ଲାଗିଥାଏ l ମାତ୍ର ପ୍ରଶାସନର ଅବହେଳା ରୁ ଏବେ ଦୟନୀୟ ଅବସ୍ଥାରେ ଏହି ହାଟ l ବର୍ଷା ହେଲେ ପାଲଟିଯାଉଛି କୃତ୍ରିମ ପୋଖରୀ l ବ୍ୟବସାୟୀ ଓ ଲୋକେ ହୀନସ୍ତା ଭୋଗୁଛନ୍ତି l ବାରମ୍ବାର ଜଣାଇବା ସତ୍ତ୍ବେ ସମସ୍ୟା ପ୍ରତି ପ୍ରଶାସନ ଦୃଷ୍ଟି ଦେଉନଥିବା ଅଭିଯୋଗ ହୋଇଛି। ଫଳରେ ପୁରାତନ ହାଟରୁ ମୁହଁ ଫେରାଇଲେଣି ଲୋକେ ।
ହଜାର ହଜାର ଲୋକଙ୍କ ଜୀବନ ଓ ଜୀବିକାର ପେଣ୍ଠସ୍ଥଳ ହେଉଛି କାମାକ୍ଷାନଗର ହାଟ। ଅନେକ ପରିବାରକୁ ରୋଜଗାର ଯୋଗାଏ ଏହି ହାଟ l ମାତ୍ର ଦିନକୁ ଦିନ ଏହାର ଦୁରାବସ୍ଥା ଯୋଗୁ ବ୍ୟବସାୟୀ ଓ ଲୋକଙ୍କ ସଂଖ୍ୟା କମିବାରେ ଲାଗିଛି। ଏହି ପୁରାତନ ହାଟ ଏବେ ସଙ୍କଟରେ। କାମାକ୍ଷାନଗର ବିଜ୍ଞାପିତ ଅଞ୍ଚଳ ପରିଷଦର କାର୍ଯ୍ୟନିର୍ବାହୀ ଯନ୍ତ୍ରୀ କୌଣସି ପଦକ୍ଷେପ ଗ୍ରହଣ କରୁନଥିବା ଅଭିଯୋଗ ହୋଇଛି। ସେପଟେ ତୁରନ୍ତ ହାଟ ସମସ୍ୟାର ସମାଧାନ ହେବ ବୋଲି ଉପଜିଲ୍ଲାପାଳ କହିଛନ୍ତି।
ଶହଶହ ବର୍ଷର ଏହି ପୁରାତନ ହାଟ ଏବେ ଦୟନୀୟ ଅବସ୍ଥାରେ l ପ୍ରଶାସନ ତୁରନ୍ତ ସମସ୍ୟାର ସମାଧାନ ନକଲେ ହାଟ ବନ୍ଦ ହୋଇଯିବା ନିଶ୍ଚିତ l
