ତହସିଲଦାରଙ୍କୁ ଦୁର୍ବ୍ୟବହାର କରି ଜେଲ୍ ଗଲେ ଅଧ୍ୟାପକ
ବାଲିଗୁଡ଼ା: କରୋନା ମହାମାରୀ ଦେଶ ଚିନ୍ତା ବଢାଇଥିବା ବେଳେ କେତେକ ଅମାନିଆ ଏହାକୁ ଫୁ କରୁଛନ୍ତି । କରୋନାକୁ ନିୟନ୍ତ୍ରଣକୁ ଆଣିବାକୁ ସବୁ ପ୍ରାକାର ପ୍ରୟାସ ବିଫଳ ହେଉଛି । କିନ୍ତୁ ଏବେ ଏହି ଅମାନିଆଙ୍କ ପାଇଁ ରାଜ୍ୟ ସରକାର କଠୋର ହୋଇଛନ୍ତି । ରାଜ୍ୟବାସୀଙ୍କୁ ସୁରକ୍ଷାକୁ ଦେଖି ବିଭିନ୍ନ ପ୍ରକାର ପଦକ୍ଷପ ନେଉଛନ୍ତି । ଠିକ୍ ଏମିତି ଏକ ଘଟଣା ଦେଖିବାକୁ ମିଳିଛି ବାଲିଗୁଡ଼ାରେ । ଅଧ୍ୟାପକଙ୍କୁ ମହଙ୍ଗା ପଡ଼ିଛି ତହସିଲଦାରଙ୍କୁ ଦୁର୍ବ୍ୟବହାର ।
ତହସିଲଦାରଙ୍କୁ ଦୁର୍ବ୍ୟବହାର କରି ଜେଲ୍ ଯାଇଛନ୍ତି ବାଲିଗୁଡ଼ା ଆଦିବାସୀ ମହାବିଦ୍ୟାଳୟର ଅଧ୍ୟାପକ ତେଜେଶ୍ୱର ନାୟକ । ସୂଚନା ଅନୁସାରେ କନ୍ଧମାଳ ଜିଲ୍ଲା ବାଲିଗୁଡା ଥାନା ମୁଣ୍ଡାସାହିରେ ରହୁଥିବା ଅଧ୍ୟାପକ ତେଜେଶ୍ୱର ନାୟକଙ୍କ ଘରକୁ ଗତ ଶନିବାର ୪ଜଣ କୋଲକାତା ଫେରନ୍ତା ଶୁଦ୍ଧିକ୍ରିୟାରେ ଯୋଗଦେବାକୁ ଆସିଥିଲେ । ଯାହା ଥିଲା ନିୟମର ସମ୍ପୂର୍ଣ୍ଣ ଉଲଂଘ୍ନ । ଏବଂ ଏହାକୁ ଗ୍ରାମବାସୀମାନେ ମଧ୍ୟ ବିରୋଧ କରିଥିଲେ ।
ସମ୍ପୃକ୍ତ ୪ଜଣ କୌଣସି ପ୍ରାଧୀକୃତ ଅଧିକାରୀଙ୍କ ଠାରୁ ଅନୁମତି ଆଣିନଥିବା ସୂଚନା ମିଳିଥିଲା । ଖବର ପାଇ ତହସିଲଦାର ପହଞ୍ଚି ସଙ୍ଗରୋଧରେ ରହିବା କଥା କହିବାରୁ ଉତକ୍ଷିପ୍ତ ହୋଇ ଅଧ୍ୟାପକ ତେଜେଶ୍ୱର ନାୟକ ତହସିଲଦାରଙ୍କୁ ଅସଭ୍ୟ ଭାଷାରେ ଗାଳି ଗୁଲଜ କରିବା ସହ ଆକ୍ରମଣ କରିଥିଲେ । ଏନେଇ ବାଲିଗୁଡ଼ା ଥାନାରେ ଅଭିଯୋଗ କରିଥିଲେ ତହସିଲଦାର । ଅଭିଯୋଗ ଆଧାରରେ ଘଟଣାର ତଦନ୍ତ କରି ଅଧ୍ୟାପକ ତେଜେଶ୍ୱର ନାୟକଙ୍କୁ ଗିରଫ କରି କୋର୍ଟ ଚାଲାଣ କରିଛି ପୋଲିସ୍ । ସେପଟେ ଅଧ୍ୟାପକଙ୍କ ଏଭଳି ଆଚରଣକୁ ଅଞ୍ଚଳବାସୀ ନିନ୍ଦା କରିଛନ୍ତି ।
