କିଏ ହେବ ରିଲାଏନ୍ସର ଉତ୍ତରାଧିକାରୀ, ଜାଣନ୍ତୁ କ’ଣ କହିଲେ ମୁକେଶ ଆମ୍ବାନୀ

ନୂଆଦିଲ୍ଲୀ: ବଦଳିବେ ରିଲାଏନ୍ସ ଗ୍ରୁପ ମୁଖ୍ୟ ମୁକେଶ ଆମ୍ବାନୀ । ଭାରତର ସବୁଠାରୁ ଧନୀ ବ୍ୟକ୍ତି ମୁକେଶ ଆମ୍ବାନୀ ରିଲାଏନ୍ସର ପରବର୍ତ୍ତୀ ମୁଖ୍ୟ କିଏ ହେବ ତାହାକୁ ନେଇ ପ୍ରଥମ ଥର ପାଇଁ କହିଛନ୍ତି । ମୁକେଶ ଆମ୍ବାନୀଙ୍କ ଅବସର ପରେ ଯୁବପିଢ଼ିଙ୍କୁ ଗୁରୁତ୍ୱ ଦିଆଯିବ । ରିଲାଏନ୍ସର ନେତୃତ୍ୱ ନେବା ପାଇଁ ନୂତନ ପିଢ଼ି ପ୍ରସ୍ତୁତ ଅଛନ୍ତି ବୋଲି ସେ କହିଛନ୍ତି । ଆକାଶ, ଇଶା ଓ ଅନନ୍ତ ଆମ ଅପେକ୍ଷା ଭଲ କାମ କମ କରୁଛନ୍ତି ବୋଲି କହିଛନ୍ତି ରିଲାଏନ୍ସ ଗ୍ରୁପ ଚେୟାରମ୍ୟାନ ମୁକେଶ ଆମ୍ବାନୀ ।

ରିଲାଏନ୍ସ ଫ୍ୟାମିଲି ଡେ’ କାର୍ଯ୍ୟକ୍ରମକୁ ସମ୍ବୋଧନ କରିବା ବେଳେ ଅମ୍ବାନୀ ଏହି କଥା କହିଛନ୍ତି । ଉତ୍ତରାଧିକାରୀ ଯୋଜନା ଉପରେ ପ୍ରଥମ ଥର ପାଇଁ ରିଲାଏନ୍ସ ମୁଖ୍ୟ କହିଛନ୍ତି ଯେ ଯୁବପିଢ଼ି ବର୍ତ୍ତମାନ ନେତୃତ୍ୱ ଗ୍ରହଣ କରିବାକୁ ପ୍ରସ୍ତୁତ ଅଛନ୍ତି । ତାଙ୍କ ପିତା ଧୀରୁଭାଇ ଅମ୍ବାନୀଙ୍କ ଜନ୍ମଦିନରେ ଆୟୋଜିତ କାର୍ଯ୍ୟକ୍ରମରେ ଉତ୍ତରାଧିକାରୀ ହସ୍ତାନ୍ତର ପ୍ରକ୍ରିୟା ଆରମ୍ଭ କରିବା ବିଷୟରେ ଅମ୍ବାନୀ ସୂଚନା ଦେଇଥିଲେ। ଅମ୍ବାନୀ ଆହୁରି କହିଛନ୍ତି କି “ମୁଁ ପ୍ରତିଦିନ ରିଲାଏନ୍ସ ପାଇଁ ପିଲାମାନଙ୍କର ଉତ୍ସାହ, ପ୍ରତିବଦ୍ଧତା ଏବଂ ଉତ୍ସର୍ଗୀକୃତତାକୁ ଦେଖିପାରୁଛି ଏବଂ ଅନୁଭବ କରିପାରୁଛି ।

ମୁକେଶ ଆମ୍ବାନୀ ୨୦୦୨ରେ ପ୍ରଥମ ଥର ପାଇଁ ରିଲାଏନ୍ସ ଗ୍ରୁପର ଚେୟାରମ୍ୟାନ ଭାବରେ ନିଯୁକ୍ତି ହୋଇଥିଲେ । ତାଙ୍କ ପିତା ଧୀରୁଭାଇ ଆମ୍ବାନୀ ମୃତ୍ୟୁ ପରେ ସେ ରିଲାଏନ୍ସ ମୁଖ୍ୟ ଭାବରେ ଦାୟିତ୍ୱ ଗ୍ରହଣ କରିଥିଲେ । ମୁକେଶ ଆମ୍ବାନୀଙ୍କର ଦୁଇ ପୁଅ ଓ ଗୋଟିଏ ଝିଅ ଆକାଶ, ଅନନ୍ତ ଓ ଇଶା ରିଲାଏନ୍ସର ଟେଲିକମ୍, ରିଟେଲ ଓ ଏନର୍ଜି ବ୍ୟବସାୟରେ ଜଡିତ । ସେମାନଙ୍କ ମଧ୍ୟରୁ କେହି ବି ରିଲାଏନ୍ସ ବୋର୍ଡରେ ନାହାଁନ୍ତି, କିନ୍ତୁ ସେମାନେ କମ୍ପାନୀର ଭର୍ଟିକାଲ ନିର୍ଦ୍ଦେଶକ ଅଛନ୍ତି । ମୁକେଶ ଆମ୍ବାନୀ କହିଛନ୍ତି କି ମୋର କୌଣସି ସନ୍ଦେହ ନାହିଁ ଯେ ଆକାଶ, ଇଶା ଓ ଅନନ୍ତ ପରବର୍ତ୍ତୀ ପିଢ଼ିିର ନେତୃତ୍ୱ ନେଇ ରିଲାଏନ୍ସକୁ ଆହୁରି ଉଚ୍ଚକୁ ନେଇଯିବେ ।