୩୭ ରନ୍ରେ କୋଲକତାଠାରୁ ପରାଜୟ ସ୍ୱୀକାର କଲା ରାଜସ୍ଥାନ, ପଢ଼ନ୍ତୁ ହାଇଲାଇଟ୍ସ..
ନୂଆଦିଲ୍ଲୀ: ରାଜସ୍ଥାନ ରୟାଲ୍ସର ପରାଜୟ । ବୁଧବାର କୋଲକତା ନାଇଟ୍ ରାଇଡର୍ସ ଓ ରାଜସ୍ଥାନ ରୟାଲ୍ସ ମଧ୍ୟରେ ଖେଳାଯାଇଥିବା ମ୍ୟାଚ୍ରେ ରାଜସ୍ଥାନ ରାୟଲ୍ସକୁ ପରାଜୟର ସମ୍ମୁଖୀନ ହେବାକୁ ପଡ଼ିଛି । ୧୭୫ ରନ୍ର ବିଜୟ ଲକ୍ଷ ନେଇ ମଇଦାନକୁ ଓହ୍ଲାଇଥିବା ରାଜସ୍ଥାନ ୧୩୭ ରନ୍ରେ ଅଲ୍ଆଉଟ୍ ହୋଇଯାଇଛି ।
୧୭୫ ରନ୍ର ବିଜୟ ଲକ୍ଷ ନେଇ ମଇଦାନକୁ ଓହ୍ଲାଇଥିବା ରାଜସ୍ଥାନ ରାୟଲ୍ସ ଆରମ୍ଭରୁ ବ୍ୟାଟିଂ ବିପର୍ଯ୍ୟର ସମ୍ମୁଖୀନ ହୋଇଥିଲା । ଗୋଟିଏ ପରେ ଗୋଟିଏ ଓ୍ୱିକେଟ୍ ହରାଇ ମାତ୍ର ୪୩ ରନ୍ ମଧ୍ୟରେ ୫ଟି ଓ୍ୱିକେଟ୍ ହରାଇଥିଲା ରାଜସ୍ଥାନ । ଜସ୍ ବଟଲର୍ ୨୧ ରନ୍ କରି ପ୍ୟାଭିଲିୟନ୍ ଫେରିଥିବା ବେଳ ସ୍ଟିଭେନ୍ ସ୍ମିଥ୍ ୩, ସଞ୍ଜୁ ସାମ୍ସନ ୮, ରବିନ୍ ଉତ୍ଥାପା ୨, ରିୟାନ୍ ପ୍ରୟାଗ୍ ୧ ରନ୍ କରି ଖୁବ୍ଶୀଘ୍ର ପ୍ୟାଭିଲିୟନ୍ ଫେରିଥିଲେ । ଏହା ପରେ ରାହୁଲ ତିଓ୍ୱେତିଆ କ୍ରିଜ୍ରେ ଅଧିକ ସମୟ ରହିବାକୁ ଚେଷ୍ଟା କରିଥିଲେ । ତାଙ୍କ ପ୍ରଦର୍ଶନ ଦେଖି ରାଜସ୍ଥାନ ପ୍ରଶଂସକଙ୍କ ମନରେ ବିଜୟ ଆଶା ସଞ୍ଚାର ହୋଇଥିଲା । ହେଲେ ମାତ୍ର କିଛି ସମୟ ପରେ ଅର୍ଥାତ୍ ୧୩ ରନ୍ କରି ତିଓ୍ୱେତିଆ ମଧ୍ୟ ପ୍ୟାଭିଲିୟନ୍ ଫେରିଥିଲେ । ସେହିଭଳି ଶ୍ରେୟାସ୍ ଗୋପାଲ ୫, ଜୋଫ୍ରା ଆର୍ଚ୍ଚର ୬, ଜୟଦେବ ଉନାଦ୍କଟ୍ ୯ ରନ୍ କରି ଆଉଟ୍ ହୋଇଥିଲେ ।
ତେବେ ଟସ୍ ଜିତି ରାଜସ୍ଥାନ ପ୍ରଥମେ ବୋଲିଂ ନିଷ୍ପତ୍ତି ନେଇଥିବା ବେଳେ କୋଲକତା ନାଇଟ୍ ରାଇଡର୍ସ ପ୍ରଥମେ ବ୍ୟାଟିଂ କରିଥିଲା । କୋଲକତା ପକ୍ଷରୁ ସୁବ୍ମନ୍ ଗିଲ୍ ସର୍ବାଧିକ ୪୭ ରନ୍ କରିଥିବା ବେଳେ ମୋରଗାନ୍ ୩୪, ରସେଲ୍ ୨୪, ନିତିଶ ରାଣା ୨୨, ନାରେନ୍ ୧୫ ରନ୍ କରିଛନ୍ତି । ସେହିଭଳି କୁମିନିସ୍ ୧୨, କେ ନାଗରକୋଟି ୮, କାର୍ତ୍ତିକ୍ ୧ ରନ୍ କରିଛନ୍ତି । ୨୦ ଓଭରରେ ମୋଟ୍ ୬ଟି ଓ୍ୱିକେଟ୍ ହରାଇ ଦଳ ୧୭୪ ରନ୍ କରିଥିଲା ।
