ଭୂକମ୍ପର ଭବିଷ୍ୟବାଣୀ କରିବା କ’ଣ ପାଇଁ ଅସମ୍ଭବ ? ଜାଣନ୍ତୁ
ନୂଆଦିଲ୍ଲୀ: ଅଧିକାଂଶ ସମୟରେ ଭୂମିକମ୍ପ ହୋଇଥାଏ । କିନ୍ତୁ ପ୍ରତ୍ୟେକ ଭୂମିକମ୍ପ ବଡ଼ ଧରଣର ହୋଇ ନଥାଏ । ଭୂମିକମ୍ପ ବଡ଼ ଧରଣର ହୋଇଥିଲେ ଅଧିକ କ୍ଷୟକ୍ଷତି ଘଟାଇଥାଏ । ସବୁଠାରୁ ଖାସ କଥା ହେଉଛି ବର୍ଷା,ବାତ୍ୟା,ଝଡ଼ ଆଦି ଆସିବା ପୂର୍ବରୁ ପାଣିପାଗ ବିଭାଗ ତରଫରୁ ସୂଚନା ମିଳିଥାଏ, କିନ୍ତୁ ଭୂମିକମ୍ପ ପୂର୍ବରୁ କୌଣସି ପ୍ରକାରର ଭବିଷ୍ୟବାଣୀ କରିବା ସମ୍ଭବ ହୋଇନଥାଏ । ଏହାର କାରଣ ଆଜି ପର୍ଯ୍ୟନ୍ତ ଏହାର ପୂର୍ବାନୁମାନ କରିବା ବୈଜ୍ଞାନିକଙ୍କ ପକ୍ଷରେ ସମ୍ଭବ ହୋଇ ପାରିନାହିଁ ।
ଭୂମିକମ୍ପ ହେଉଛି ଏକ ପ୍ରକାରର କମ୍ପନ ଯାହା ଭୂପୃଷ୍ଠକୁ ଦୋହଲାଇ ଦେଇଥାଏ । ପୃଥିବୀର ଲିଥୋସ୍ଫିୟରରେ ହଠାତ ଶକ୍ତି ଉତ୍ପନ୍ନ ହେବା ଦ୍ୱାରା ସିସମିକ୍ ତରଙ୍ଗ ସୃଷ୍ଟି ହୋଇଥାଏ । ଯାହା ପୃଥିବୀର ଉପରିଭାଗରେ କମ୍ପନ ସୃଷ୍ଟି କରିଥାଏ । ଫଳରେ କ୍ଷୟକ୍ଷତି ହୋଇଥାଏ ।
ଭୂକମ୍ପର ଆଶଙ୍କା ପୃଥିବୀର ସେହି ସ୍ଥାନରେ ଅଧିକ ଥାଏ ଯେଉଁଠି ମହାଦେଶୀୟ ପ୍ଲେଟ୍ ମିଶିଥାନ୍ତି । ଏଭଳି ପ୍ଲେଟର ସୀମାକୁ ମଧ୍ୟ ବୈଜ୍ଞାନିକ ଚିହ୍ନଟ କରିଛନ୍ତି । ଏଭଳି ସ୍ଥାନରେ ଭୂକମ୍ପର ଅଧିକ ସମ୍ଭାବନା ରହିଥାଏ । ଭାରତ ବିଷୟରେ ଯଦି ଆଲୋଚନା କରିବା ତେବେ ଆଣ୍ଡାମାନ ନିକୋବର ଦ୍ୱୀପପୂଞ୍ଜରୁ ହିମାଳୟ ପର୍ବତାମାଳା ଓ ହିମାଳୟ ପାଦଦେଶରୁ ପଶ୍ଚିମ ଭାରତ ପର୍ଯ୍ୟନ୍ତ ଅଂଚଳ ହେଉଛି ଅଧିକ ଭୂକମ୍ପ ପ୍ରବଣ । ଏଥିରେ ଗୁଜୁରାଟର କିଛି ଅଂଚଳ ମଧ୍ୟ ସାମିଲ ଅଛି । ହିମାଳୟରେ ଆସୁଥିବା ଭୂକମ୍ପର ପ୍ରଭାବ ଉତ୍ତର ଭାରତର ସମତଳ ଅଂଚଳ ପର୍ଯ୍ୟନ୍ତ ଅନୂଭୁତ ହୋଇଥାଏ ।
ଭୂମିକମ୍ପ ବା ଭୂକମ୍ପୀୟ ତରଙ୍ଗ ସିସମିକ ଓ୍ୱେଭ ଦ୍ୱାରା ଚିହ୍ନଟ ହୋଇଥାଏ । ଏହି ତରଙ୍ଗର ସମସ୍ୟା ହେଉଛି ଏହା ସୃଷ୍ଟି ହେବାମାତ୍ରେ ଏହାକୁ ଚିହ୍ନଟ କରିହୁଏ । ଏହାଦ୍ୱାରା ଭୂମିକମ୍ପର ତୀବ୍ରତା ଏବଂ ପ୍ରଭାବ ବିଷୟରେ ଜାଣିହୁଏ । କିନ୍ତୁ ଏହାର ପୂର୍ବ ଅନୁମାନ କରାଯାଇପାରେ ନାହିଁ । ଏଥିପାଇଁ ପୃଥିବୀ ପୃଷ୍ଠର ଖୁବ ଆଭ୍ୟନ୍ତରୀଣ ସ୍ତରର ଗତିବିଧିର ସୂଚନା ଆବଶ୍ୟକ । ଯାହାକୁ ଆଜି ପର୍ଯ୍ୟନ୍ତ ବୈଜ୍ଞାନିକ ହାସଲ କରିବାରେ ଅସମର୍ଥ ହୋଇଛନ୍ତି । ଏହାକୁ ନେଇ ଏବେ ମଧ୍ୟ ଗବେଷଣା ଚାଲିଛି । 
ଭୂକମ୍ପ କେଉଁଠାରେ ଅଧିକ ଆସେ ଓ କେଉଁଠାରେ ଅଧିକ ଭୂକମ୍ପ ଆସି ସାରିଛି ସେ ବାବଦରେ ବୈଜ୍ଞାନିକଙ୍କ ପାଖରେ ସୂଚନା ରହିଛି । ସେମାନେ ଏହା ମଧ୍ୟ ଜାଣି ସାରିଛନ୍ତି ଯେ,କେଉଁଠାରେ ଭୂକମ୍ପ ଅଧିକ ଆସିବାର ଆଶଙ୍କା ରହିଛି କିନ୍ତୁ ଦୁଇ ଦିନ ପରେ ଭୂକମ୍ପ ଆସିବ କି ନାହିଁ ତାହା କହିବା ଏବେ ମଧ୍ୟ ବୈଜ୍ଞାନିକଙ୍କ ପକ୍ଷରେ ଅସମ୍ଭବ ।
