ସିଙ୍ଘୁ ସୀମାରେ ବସିଥିବା ଚାଷୀଙ୍କ ବିରୋଧରେ FIR ଦାୟର

ନୂଆଦିଲ୍ଲୀ: ସିଙ୍ଘୁ ସୀମାରେ ଚାଷୀଙ୍କ ଚରମ ନିଷ୍ପତି । କୃଷି ଆଇନ ପ୍ରତ୍ୟାହାର ପର୍ଯ୍ୟନ୍ତ ପ୍ରତିବାଦର ପ୍ରତିଶ୍ରୁତି । ଆଉ ଏବେ ପ୍ରତିବାଦ ପାଲଟିବାକୁ ଯାଉଛି ପ୍ରାଣଘାତି । ଆନ୍ଦୋଳନ ସମୟରେ କୋଭିଡ ଗାଇଡଲାଇନ୍ସ ଉଲ୍ଲଂଘନ କରିବା, ସାମାଜିକ ଦୂରତାକୁ ଅବମାମନା କରିଥିବା ଚାଷୀଙ୍କ ବିରୋଧରେ ଦାୟର ହୋଇଛି ମାମଲା । ୨୯ ନଭେମ୍ବରରେ ଲାମପୁର ବର୍ଡରରୁ ସିଙ୍ଘୁ ବର୍ଡରକୁ ପସି ଆସିଥିଲେ । ସିଙ୍ଘୁ ସୀମାର ରେଡ ଲାଇଟ ରୋଡରେ ବସିଥିଲେ ଆନ୍ଦୋଳନରତ ଚାଷୀ ।

ଆନ୍ଦୋଳନ ସମୟରେ କୃଷକ କୋଭିଡର ନିୟମକୁ ଅବମାନନା କରିଥିଲେ । ଏନେଇ ୭ ଡିସେମ୍ବରରେ ଆନ୍ଦୋଳନରତ ଚାଷୀଙ୍କ ବିରୋଧରେ FIR ଦାୟର କରିଥିଲା ପୋଲିସ । ପ୍ରତିବାଦ ୧୬ ଦିନରେ ପହଁଚିଥିଲେ ମଧ୍ୟ ଥମିବାର ନା ନେଉ ନାହିଁ । ସେପଟେ ନିଜ ଜିଦରେ ଅଟଳ ଥିବା କୃଷକ ସଂଗଠନ ସରକାରଙ୍କ ଲିଖିତ ପ୍ରିଶ୍ରୁତିକୁ ଗ୍ରହଣ କରିନଥିଲେ । ୮ ତାରିଖରେ ଭାରତ ବନ୍ଦ କରିଥିବା ଚାଷୀ ପୁନର୍ବାର ଅର୍ଥାତ ଡିସେମ୍ବର ୧୬ର ଦେଶକୁ ଅଚଳ କରିବାର ଆହ୍ୱାନ ଦେଇଛନ୍ତି ।

ସରକାର ଯେପର୍ଯ୍ୟନ୍ତ ନୂତନ କୃଷି ଆଇନକୁ ପ୍ରତ୍ୟାହାର ନକରିଛନ୍ତି, ସେପର୍ଯ୍ୟନ୍ତ ପ୍ରତିବାଦ ଜାରି ରହିବ । ଆଗାମୀ ଦିନରେ ଆନ୍ଦୋଳନକୁ ଆହୁରି ବ୍ୟାପକ କରାଯିବ । ୧୨ ତାରିଖରେ ଦେଶର ଅନେକ ରାଜପଥକୁ ଠପ କରିବା ସହ ଟୋଲପ୍ଲାଜାରେ ଟିକସ ନଦେବାକୁ ନିଷ୍ପତି ନେଇଛନ୍ତି ଦେଶର ତମାମ ଚାଷୀ ସଂଗଠନ । ସେପଟେ କୋଭିଡ ମହାମାରୀ ସମୟରେ ଚାଷୀଙ୍କ ବ୍ୟାପକ ପ୍ରତିବାଦ ସରକାରଙ୍କ ପାଇଁ ମୁଣ୍ଡ ବିନ୍ଧାର କାରଣ ସାଜିଥିବାବେଳେ ଆନ୍ଦୋଳନରତ ଚାଷୀଙ୍କ ନାମରେ ପୋଲିସ ଫାଇଲ କରିଛି FIR ।