କରୋନା ସଙ୍କଟରେ ଆଶା ବଢାଉଛି କୋଭାକ୍ସିନ୍… ସମ୍ରେ ହ୍ୟୁମାନ ଟ୍ରାଏଲ ପାଇଁ ଉଦଘାଟନ ହେବ ଲ୍ୟାବ
ଭୁବନେଶ୍ୱର: କରୋନା ସଙ୍କଟ ମଧ୍ୟରେ ଭାରତର ସ୍ୱଦେଶୀ କୋଭିଡ୍ ଟିକା ‘କୋଭିକ୍ସିନ୍ ’ ଟ୍ରାଏଲ ବିଷୟରେ ଖବର ଆସିଥିଲା । ଏବେ କରୋନା ସଙ୍କଟରେ ଆଶା ବଢାଉଛି କୋଭାକ୍ସିନ୍। ଟିକାର ହ୍ୟୁମାନ ଟ୍ରାଏଲ ପାଇଁ ସମ ହସପିଟାଲରେ ଲ୍ୟାବ୍ ଉଦଘାଟନ କରାଯିବ । କୋଭାକ୍ସିନ୍ର ହ୍ୟୁମାନ କ୍ଲିନିକାଲ ଟ୍ରାଏଲ ପାଇଁ ଦେଶର ୧୨ଟି ହସପିଟାଲକୁ ଚୟନ କରିଛି ଇଣ୍ଡିଆନ୍ କାଉନସିଲ ଫର ମେଡିକାଲ ରିସର୍ଚ୍ଚ ବା ଆଇସିଏମଆର। ଏହା ମଧ୍ୟରେ ଭୁବନେଶ୍ୱର ସମ୍ ହସପିଟାଲ ମଧ୍ୟ ରହିଛି ।
ମାନବୀୟ ପରୀକ୍ଷଣ ପାଇଁ ଆଜି ସମ ଅଡିଟୋରିୟମରେ ଲ୍ୟାବର ଉଦଘାଟନ କରାଯିବ। ସେପଟେ ଆଜିଠୁ ଦିଲ୍ଲୀ ଏମ୍ସରେ ଆରମ୍ଭ ହେଉଛି କୋଭାକ୍ସିନର ହ୍ୟୁମାନ ଟ୍ରାଏଲ । ଶନିବାର ଦିଲ୍ଲୀ ଏମ୍ସର ଏଥିକ୍ସ କମିଟି ପ୍ରଥମ ପର୍ଯ୍ୟାୟ ମାନବୀୟ ପରୀକ୍ଷଣ ପାଇଁ ମଂଜୁରୀ ଦେଇଥିଲେ । ପ୍ରଥମ ପର୍ଯ୍ୟାୟରେ ୩୭୫ ଜଣ ସ୍ୱେଚ୍ଛାସେବୀଙ୍କ ଉପରେ ପରୀକ୍ଷଣ କରାଯିବ । ୧୮ରୁ ୫୫ ବର୍ଷ ବୟସ୍କ ସ୍ୱେଚ୍ଛାସେବୀଙ୍କ ଉପରେ ଏହି ପରୀକ୍ଷା କରାଯିବ । ଟିକା ଦେବା ପୂର୍ବରୁ ସେମାନଙ୍କ ସ୍ୱାସ୍ଥ୍ୟାବସ୍ଥା ଯାଞ୍ଚ କରାଯିବ । ହାଇଦ୍ରାବାଦର ଭାରତ ବାୟୋଟେକ ଆଇସିଏମଆର ଓ ନ୍ୟାସନାଲ ଇନଷ୍ଟିଚ୍ୟୁଟ୍ ଅଫ୍ ଭାଇରୋଲୋଜିର ସହଯୋଗରେ ଟିକାକୁ ବିକଶିତ କରିଛି ।
(ନନ୍ଦିଘୋଷ ବ୍ୟୁରୋ)
