ପିଲାଙ୍କ ସହ ଦୀପାବଳି ପାଳିଲେ ନବୀନ; ‘ତୁ ଥିଲେ ମୋ ଡର କାହାକୁ’ ଗୀତରେ ଝୁମିଲେ

ଭୁବନେଶ୍ୱର: ନିଆରା ଢଙ୍ଗରେ ଆଲୋକର ପର୍ବ ଦୀପାବଳି ପାଳନ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । SOS ଚିଲଡ୍ରେନ କେୟାରରେ ଥିବା ପିଲାଙ୍କ ସହ ଦୀପାବଳି ପାଳିଛନ୍ତି ନବୀନ । ପିଲାଙ୍କୁ ଖୁସି କରିବାକୁ ଯାଇ ମୁଖ୍ୟମନ୍ତ୍ରୀ ନିଜେ ପିଲାଙ୍କ ସହ ଝୁରୁଝୁରି ଜଳାଇଛନ୍ତି । ଏଥିସହ SOS ଭିଲେଜ ପାଇଁ ୨୦ ଲକ୍ଷ ଟଙ୍କା ଅନୁଦାନ ପ୍ରଦାନ କରିଛନ୍ତି । ଏହି ଅନୁଦାନରେ SOS ଭିଲେଜର ବିକାଶ କରାଯିବ ।

ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଜୀବନଶୈଳୀ ଯେତେ ସରଳ ତାଠାରୁ ଅଧିକ ନିଆରା ତାଙ୍କର ପର୍ବ ପର୍ବାଣି ପାଳନ କରିବା ।  ବିଭିନ୍ନ ଚାଇଲ୍ଡ କେୟାର ଇନଷ୍ଟିଚ୍ୟୁସନରେ ଯାଇ ପିଲାଙ୍କ ସହ ଦୀପାବଳି ପାଳନ କରିବା ଲାଗି ମୁଖ୍ୟ ସଚିବ, ଉନ୍ନୟନ କମିଶନ, ସଚିବ, ପୋଲସ ଡିଜି, ଜିଲ୍ଲାପାଳ ଓ ଏସପି ମାନଙ୍କୁ ପରାମର୍ଶ ଦେଇଥିଲେ ମୁଖ୍ୟମନ୍ତ୍ରୀ ।  ଖାଲି ପରାମର୍ଶ ନୁହେଁ ନିଜେ ମଧ୍ୟ ପିଲାମାନଙ୍କ ସହିତ ଦୀପାବଳି ପାଳନ କରି ଉଦାହରଣ ସୃଷ୍ଟି କରିଛନ୍ତି ମୁଖ୍ୟମନ୍ତ୍ରୀ ।

ସନ୍ଧ୍ୟାରେ ଖଣ୍ଡଗିରି ଅଞ୍ଚଳରେ ଥିବା SOS ଚିଲଡ୍ରେନ କେୟାରରେ ମୁଖ୍ୟମନ୍ତ୍ରୀ ପହଞ୍ଚିଥିଲେ । ପିଲାମାନଙ୍କ ଲାଗି ମିଠା, ଚକଲେଟ, ଗିଫ୍ଟ ନେବାକୁ ଭୁଲିନଥିଲେ ନବୀନ । ପିଲାଙ୍କୁ ନିଜ ହାତରେ ଗିଫ୍ଟ ଓ ମିଠା ବାଣ୍ଟିଥିଲେ । ପିଲାଙ୍କୁ ଖୁସି କରିବାକୁ ଯାଇ ମୁଖ୍ୟମନ୍ତ୍ରୀ ନିଜେ ପିଲାଙ୍କ ସହ ଝୁରୁଝୁରି ଜଳାଇଥିଲେ । ପିଲାଙ୍କୁ ନବୀନ କେତେ ଭଲ ପାଆନ୍ତି ଓ ପ୍ରତି ବଦଳରେ ପିଲାମାନେ ତାଙ୍କୁ କେତେ ଭଲ ପାଇବା ଫେରାନ୍ତି ତାହାର ପ୍ରମାଣ  SOS ଚିଲଡ୍ରେନ କେୟାରରେ ଦେଖିବାକୁ ମିଳିଥିଲା ।

SOS ଚିଲଡ୍ରେନ କେୟାରରେ ଥିବା ପିଲାମାନେ ନବୀନଙ୍କ ଲାଗି ଗୀତ ଗାଇଥିଲେ । ପିଲାମାନେ ଗାଇଥିବା ଗୀତର ସଂ   ଳାପ ଥିଲା ‘ତୁ ଥିଲେ ମୋ ଡର କାହାକୁ’, ‘ତୁରେ ମୋର କଳା କାଞ୍ଚନ’ । ମୁଖ୍ୟମନ୍ତ୍ରୀ ଗୀତ ଉପଭୋଗ କରିବା ସହ ମଝିରେ ମଝିରେ ତାଳିମାରି ପିଲାଙ୍କୁ ଉତ୍ସାହିତ କରିଥିଲେ ।

')}