ମାଲକାନଗିରି : ବିପର୍ଯ୍ୟସ୍ତ ରାସ୍ତା ଯୋଗୁ ଆସିପାରିଲାନି ଆମ୍ବୁଲାନ୍ସ । ଭାରରେ ବୁହାହେଲେ ରୋଗୀ। ଅଭାବନୀୟ ଘଟଣାଟି ଦେଖିବାକୁ ମିଳିଛି ମାଲକାନଗିରି ଜିଲ୍ଲା ଚିତ୍ରକୋଣ୍ଡା ବ୍ଲକ ନୂଆଗୁଡା ପଂଚାୟତର ରଥଗୁଡା ଗାଁରେ। ନୂଆଗୁଡା ପଞ୍ଚାୟତ ଅଧିନ ଆରଏସସି-୧୦କୁ ପାହାଡ଼ କାଟି ପ୍ରଧାନମନ୍ତ୍ରୀ ସଡକ ଯୋଜନାରେ ରାସ୍ତା ନିର୍ମାଣ ହୋଇଛି। ହେଲେ ଏ ପର୍ଯ୍ୟନ୍ତ କରାଯାଇନି ସେତୁ ନିର୍ମାଣ କାର୍ଯ୍ୟ। ଫଳରେ ଝରଣା ଦେଇ ଲୋକେ ଯିବା ଆସିବା କରୁଛନ୍ତି। ରାସ୍ତାର କାମ ସମ୍ପୂର୍ଣ୍ଣ ହୋଇନଥିବାରୁ ଗାଁ ଭିତରକୁ କୌଣସି ପ୍ରକାର ୪ ଚକିଆ ଗାଡି ଯିବାଆସିବ କରିପାରୁନି। ଯଦି କୌଣସି ଗ୍ରାମବାସୀଙ୍କ ଦେହ ଖରାପ ହୁଏ ତେବେ ବାଧ୍ୟ ହୋଇ ଷ୍ଟ୍ରେଚର କିମ୍ବା ଭାରରେ ରୋଗୀଙ୍କୁ ବୁହା ହୋଇ ମେଡିକାଲ ପର୍ଯ୍ୟନ୍ତ ନେବାକୁ ପଡେ। ରଥଗୁଡା ଗ୍ରାମର ଜଣେ ବ୍ୟକ୍ତିଙ୍କ ସ୍ୱାସ୍ଥ୍ୟବସ୍ଥା ଭୀଷଣ ଖରାପ ହୋଇଥିଲା। ଫଳରେ ତାଙ୍କୁ ମେଡିକାଲ ନେବା ବାଟରେ ଏପରି ଅଭାବନୀୟ ଦୃଶ୍ୟ ଦେଖିବାକୁ ମିଳିଛି। ତେବେ ତୁରନ୍ତ ଗ୍ରାମବାସୀ ଏଠାରେ ସେତୁ ନିର୍ମାଣ କରିବାକୁ ଦାବି କରିଛନ୍ତି।
