ଜୁଲାଇ୧ରୁ ୧୫ ଭିତରେ ହେବ ସିବିଏସଇ ଦ୍ୱାଦଶ ପରୀକ୍ଷା, ତାରିଖ ଘୋଷଣା

ନୂଆଦିଲ୍ଲୀ : ସିବିଏସଇ ବୋର୍ଡ ଦଶମ ଓ ଦ୍ୱାଦଶ ପରୀକ୍ଷା ପାଇଁ ଡେଟ୍ ସିଟ୍ ଜାରି କରିଛି । ଏହି ପରୀକ୍ଷାକୁ କରୋନା କାରଣରୁ ମଝିରୁ ବାତିଲ କରିଦିଆଯାଇଥିଲା । ଦ୍ୱାଦଶ ପରୀକ୍ଷା ୧ ଜୁଲାଇରୁ ୧୫ ଜୁଲାଇ ମଧ୍ୟରେ ହେବ । ଏହାସହ ୧ ଜୁଲାଇରୁ ୧୫ ଜୁଲାଇ ଭିତରେ ଉତ୍ତର ପୂର୍ବ ଦିଲ୍ଲୀର ଦଶମ ଶ୍ରେଣୀ ଛାତ୍ରଙ୍କ ପାଇଁ  ଦଶମ ଶ୍ରେଣୀ ପରୀକ୍ଷା ଆୟୋଜିତ ହେବ । ମାନବ ସମ୍ବଳ ବିକାଶ ମନ୍ତ୍ରୀ ରମେଶ ପୋଖରିୟାଲ ଆଜି ଏନେଇ ଡେଟ୍ ସିଟ୍ ଜାରି କରିଛନ୍ତି ।

ଲକଡାଉନ୍ କାରଣରୁ ସିବିଏସଇ ବୋର୍ଡ ପରୀକ୍ଷାକୁ ମାର୍ଚ୍ଚ ମାସରେ ରୋକି ଦେଇଥିଲା । ଏହା ପରେ ଲକଡାଉନ୍ ୨.୦ ବେଳେ ସିବିଏସଇର ଦଶମ ପରୀକ୍ଷା ହେବ ନାହିଁ ବୋଲି ବୋର୍ଡ ପକ୍ଷରୁ ଘୋଷଣା କରାଯାଇଥିଲା ।  ଦ୍ୱାଦଶ ବୋର୍ଡର ବଳକା ପରୀକ୍ଷାରେ ୨୯ଟି ମୁଖ୍ୟ ବିଷୟରେ ପରୀକ୍ଷା ହେବ ।

ଏହି ମୁଖ୍ୟ ବିଷୟ ସେହି ବିଷୟ ଯାହା ଜରିଆରେ ବିଶ୍ୱବିଦ୍ୟାଳୟରେ ସ୍ନାତକ ସ୍ତରରେ ଆଡମିଶନ ମିଳିଥାଏ । ଅନେକ ବିଶ୍ୱବିଦ୍ୟାଳୟ ଏହି ସବୁ ବିଷୟରେ ମିଳିଥିବା ନମ୍ବର ଆଧାରରେ ଆଡମିଶନ୍ ଦେଇଥାନ୍ତି ।

ଆପଣଙ୍କୁ କହି ରଖୁଛୁ ଯେ, ଦେଶରେ ଦଶମ ପରୀକ୍ଷା ହେବ ନାହିଁ ଓ  କେବଳ ନର୍ଥ ଇଷ୍ଟ ଦିଲ୍ଲୀର ଛାତ୍ରଙ୍କ ପାଇଁ ଦଶମ ଶ୍ରେଣୀ ପରୀକ୍ଷା ହେବ ବୋଲି ପୂର୍ବରୁ ସିବିଏସଇ ସ୍ପଷ୍ଟ କରିଦେଇଥିଲା ।

ଅନ୍ୟପକ୍ଷରେ ଯେଉଁ ସବୁ ବିଷୟର ପରୀକ୍ଷା ହୋଇସାରିଛି ତାହାର ମୁଲ୍ୟାଙ୍କନ ସିବିଏସଇ ଆରମ୍ଭ କରିଛି ।