ନନ୍ଦିଘୋଷ ବ୍ୟୁରୋ : ଦିନ ଗଡ଼ି ଚାଲିଛି। ହେଲେ ଏଯାଏଁ ସଂଶୋଧିତ ପୁସ୍ତକ ପାଉନାହାନ୍ତି ପ୍ରଥମରୁ ଅଷ୍ଟମ ଶ୍ରେଣୀର ଛାତ୍ରଛାତ୍ରୀ। ଆଉ କିଛି ଦିନ ପରେ ସେମାନେ ଷାଣ୍ମାସିକ ପରୀକ୍ଷା ଦେବେ। ଏହାପରେ ଆସିବ ପୂଜା ଛୁଟି। ଏଭଳି ସମୟରେ ପିଲାଙ୍କ ହାତରେ ପ୍ରଶ୍ନପତ୍ର ରହିବା କଥା, ହେଲେ ଏଯାଏଁ ସେମାନେ ବହି ପାଇନାହାନ୍ତି। ସଂଶୋଧିତ ବହି ନମିଳିବାକୁ ନେଇ ପୁଣି ରାଜରାସ୍ତାକୁ ଓହ୍ଲାଇବାକୁ ସଜବାଜ ହେଉଛି ବିଜୁ ଜନତା ଦଳ। ଦିନକ ପରେ ବିଧାନସଭାର ମୌସୁମୀ ଅଧିବେଶନ ଆରମ୍ଭ ହେବାକୁ ଥିବା ବେଳେ, ଏହା ପୂର୍ବରୁ ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡ ଇସ୍ତଫା ନଦେଲେ ଭୁବନେଶ୍ୱର ଗାନ୍ଧୀ ମାର୍ଗରେ ଅହୋରାତ୍ର ଧାରଣା ସହ ବିଧାନସଭା ଘେରାଉ କରିବାକୁ ଯୁବ ଓ ଛାତ୍ର ବିଜେଡି ନିଷ୍ପତ୍ତି ନେଇଛି। ଏଥିରେ ବିଧାୟକ, ସାଂସଦଙ୍କ ସମେତ ବୁଦ୍ଧିଜୀବୀମାନେ ମଧ୍ୟ ସାମିଲ ହେବେ ବୋଲି ଦଳ ପକ୍ଷରୁ କୁହାଯାଇଛି। ବହିରେ ୧୬୭୮ରୁ ଅଧିକ ତ୍ରୁଟି ଧରାପଡ଼ିବା ପରଠାରୁ ସରକାରଙ୍କୁ ବିରୋଧୀ ଓ ବିଭିନ୍ନ ସଂଗଠନ ଘେରିଛନ୍ତି। କେତେବେଳେ ଜାତୀୟ ଶିକ୍ଷା ନୀତି-୨୦୨୦ର ଆଳ କରାଯାଉଛି, ତ ଆଉ କେତେବେଳେ ମୁଖ୍ୟମନ୍ତ୍ରୀ ସଂଶୋଧିତ ପୁସ୍ତକ ବିଷୟରେ କହୁଛନ୍ତି। ଏହାପରେ ସଂଶୋଧିତ ବହିକୁ ନେଇ ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ସସପେନ୍ସ ଜାରି ରଖିଥିବା ବିଜେଡି ଅଭିଯୋଗ କରିଛି।
ମୁଖ୍ୟମନ୍ତ୍ରୀ ଏହି ଘଟଣାରେ ଷଡ଼ଯନ୍ତ୍ର କଥା କହିଥିଲେ ମଧ୍ୟ ଷଡ଼ଯନ୍ତ୍ରକାରୀଙ୍କ ନାଁ କହିନାହାନ୍ତି ବୋଲି ଦଳ ପକ୍ଷରୁ କୁହାଯାଇଛି। ସିବିଆଇ ତଦନ୍ତ ପରିବର୍ତ୍ତେ କ୍ରାଇମବ୍ରାଞ୍ଚ ତଦନ୍ତ ହୋଇଛି ଏବଂ ବଡ଼ ଅଧିକାରୀମାନେ ଖସିଯାଇଛନ୍ତି ବୋଲି ବିଜେଡି ଅଭିଯୋଗ କରିଛି। ୨୨ ତାରିଖ ସୁଦ୍ଧା ଗଣଶିକ୍ଷା ମନ୍ତ୍ରୀ ଇସ୍ତଫା ନଦେଲେ ଅହୋରାତ୍ର ଧାରଣା ଏବଂ ଆସନ୍ତା ୨୩ ତାରିଖରେ ବିଧାନସଭା ଘେରାଉ କରିବ ବୋଲି ବିଜୁ ଜନତା ଦଳ ଘୋଷଣା କରିଛି। ବହିରେ ତ୍ରୁଟିକୁ ନେଇ ବିରୋଧୀ ଦଳ ନେତା ନବୀନ ପଟ୍ଟନାୟକ ପ୍ରଥମ ଦିନରୁ ମୁହଁ ଖୋଲିଛନ୍ତି ବୋଲି ବିଜେଡି କହିଛି। ତାଙ୍କ ନିର୍ଦ୍ଦେଶରେ ପ୍ରତି ଜିଲ୍ଲାରେ ଯୁବ ଓ ଛାତ୍ର ବିଜେଡି ପକ୍ଷରୁ ‘ଶିକ୍ଷା ବଞ୍ଚାଅ’ ଆନ୍ଦୋଳନ କରାଯାଇଥିଲା। ଏଥର ମଧ୍ୟ ଅଭିଭାବକ, ଛାତ୍ରଛାତ୍ରୀ ଓ ବୁଦ୍ଧିଜୀବୀଙ୍କୁ ଆନ୍ଦୋଳନରେ ସାମିଲ ହେବାକୁ ବିଜେଡି ଆହ୍ୱାନ ଦେଇଛି।
