ନନ୍ଦିଘୋଷ ବ୍ୟୁରୋ ; ଉତ୍ତର ସାଗରରେ ବଡ଼ ଦୁର୍ଘଟଣା ଘଟିଛି । ଇଷ୍ଟ ୟର୍କସାୟର ଉପକୂଳରୁ ପ୍ରାୟ ୧୦ ମାଇଲ ଦୂରରେ ତେଲ ଟ୍ୟାଙ୍କର୍ ଓ ମାଲବାହୀ ଜାହାଜ ଧକ୍କା ହୋଇଥିଲା। ଏଥିରେ ଅନେକ ଲୋକ ଆହତ ହୋଇଛନ୍ତି। ଗ୍ରିମ୍ସବିରେ ୩୨ ଜଣଙ୍କୁ କୂଳକୁ ଅଣାଯାଇଥିଲା। ଧକ୍କା ଏତେ ଭୟଙ୍କର ଥିଲା ଯେ ତେଲ ଟ୍ୟାଙ୍କର ଓ ମାଲବାହୀ ଜାହାଜଟି ନିଆଁ ପିଣ୍ଡୁଳାରେ ପରିଣତ ହୋଇଥିଲା । ଦୁର୍ଘଟଣା ସମ୍ପର୍କରେ ସୂଚନା ମିଳିବା ପରେ, ଉଦ୍ଧାର କାର୍ଯ୍ୟରେ ଲାଇଫବୋଟ୍ ଏବଂ ତଟରକ୍ଷୀ ହେଲିକପ୍ଟର ନିୟୋଜିତ କରାଯାଇଥିଲା। ଏକ ରିପୋର୍ଟ ଅନୁଯାୟୀ, ବନ୍ଦର ମୁଖ୍ୟ ଅନୁସାରେ, ଉତ୍ତର ସାଗରରେ ଏକ ତେଲ ଟ୍ୟାଙ୍କର ଏବଂ ମାଲବାହୀ ଜାହାଜ ମଧ୍ୟରେ ଧକ୍କା ହୋଇଥିଲା।
ଜାହାଜ ଚଳାଚଳ କମ୍ପାନୀ କହିବାନୁସାରେ, ଷ୍ଟେନା ଇମାକୁଲେଟ୍ ନାମକ ଟ୍ୟାଙ୍କରରେ ଥିବା ସମସ୍ତ କର୍ମଚାରୀ ସୁରକ୍ଷିତ ଅଛନ୍ତି। ଏହି ଦୁର୍ଘଟଣାର ଏକ ଭିଡିଓ ମଧ୍ୟ ସାମ୍ନାକୁ ଆସିଛି। ଏଥିରେ ଟ୍ୟାଙ୍କରରୁ ଘନ ଧୂଆଁ ବାହାରୁଥିବାର ଦେଖାଯାଉଛି। ଉଦ୍ଧାର କାର୍ଯ୍ୟ ଜାରି ରହିଛି।
ସମୁଦ୍ରରେ ଏହା ଦ୍ୱିତୀୟ ବଡ଼ ଦୁର୍ଘଟଣା। ନିକଟରେ, ୟେମେନ ଏବଂ ଜିବୋଟି ମଧ୍ୟରେ ପ୍ରବାସୀଙ୍କୁ ନେଇ ଯାଉଥିବା ଚାରୋଟି ଡଙ୍ଗା ବୁଡ଼ି ଯାଇଥିଲା। ଏହି ଦୁର୍ଘଟଣାରେ ୧୮୦ ରୁ ଅଧିକ ଲୋକ ନିଖୋଜ ହୋଇଯାଇଛନ୍ତି। ଦୁର୍ଘଟଣାକୁ ନିଶ୍ଚିତ କରି, ଜାତିସଂଘର ଆନ୍ତର୍ଜାତୀୟ ପ୍ରବାସ ସଂଗଠନ ଏହାକୁ ବିଶ୍ୱର ସବୁଠାରୁ ବିପଦପୂର୍ଣ୍ଣ ପ୍ରବାସ ପଥ ମଧ୍ୟରୁ ଗୋଟିଏ ଭାବରେ ବର୍ଣ୍ଣନା କରିଛି।
