ନୟାଗଡ: ପ୍ରେମ ପାଇଁ ଦେହରେ ପେଟ୍ରୋଲ ଢ଼ାଳି ଯୁବକଙ୍କ ଆତ୍ମହତ୍ୟା ଉଦ୍ୟମ । ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି ନୟାଗଡ଼ ଜିଲ୍ଲା ଇଟାମାଟି ଥାନା ଅଞ୍ଚଳରେ । ପ୍ରେମ ପାଇଁ ଜଣେ ଯୁବକ ନିଜ ଦେହରେ ପେଟ୍ରୋଲ ଢାଳିହୋଇ ନିଆଁ ଲଗାଇ ଦେଇଥିବା ଦେଖିବାକୁ ମିଳିଛି । ଯୁବକଙ୍କୁ ଗୁରୁତର ଅବସ୍ଥାରେ ମେଡିକାଲରେ ଭର୍ତ୍ତି କରାଯାଇଛି । ଗୁରୁତର ଯୁବକ ଜଣଙ୍କ କଟକ ଜିଲ୍ଲା କିଶୋରନଗର ଥାନା ଯାଞ୍ଚପଡ଼ା ଗାଁର ଲିଟୁଆ ଦାସ ବୋଲି ଜଣାପଡ଼ିଛି । ଲିଟୁଆ ଇଟାମାଟି ଥାନା ଅଞ୍ଚଳର ଜଣେ ଯୁବତୀକୁ ୪ ବର୍ଷ ହେବ ଭଲ ପାଉଥିଲେ । ଆଜି ଯୁବକ ଜଣକ ଯୁବତୀଙ୍କ ଘରେ ପହଞ୍ଚିଥିଲେ । ଝିଅର ବଡ଼ ଭଉଣୀ ଓ ସାନ ଭଉଣୀ ଉକ୍ତ ଯୁବକକୁ ଗାଳିଗୁଲଜ କରିଥିଲେ । ଫଳରେ ଯୁବକ ଜଣକ ନିଜ ଦେହରେ ପେଟ୍ରୋଲ ଢାଳି ନିଆଁ ଲଗାଇ ଦେଇଥିଲେ । ସ୍ଥାନୀୟଲୋକେ ଗୁରୁତର ଅବସ୍ଥାରେ ଯୁବକଙ୍କୁ ଉଦ୍ଧାର କରି ଆମ୍ବୁଲାନ୍ସ ଯୋଗେ ନୟାଗଡ଼ ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ । ସ୍ଵାସ୍ଥ୍ୟବସ୍ଥା ସଂକଟାପନ୍ନ ହେବାରୁ ଯୁବକଙ୍କୁ ଭୁବନେଶ୍ୱର ସ୍ଥାନାନ୍ତର କରାଯାଇଛି । ଯୁବକ ଜଣଙ୍କର ଶରୀରର ୮୦ ଭାଗ ପୋଡ଼ିଯାଇଛି । ଖବର ପାଇ ଘଟଣାସ୍ଥଳରେ ଇଟାମାଟି ଥାନା ପୋଲିସ ପହଞ୍ଚି ତଦନ୍ତ ଜାରି ରଖିଛି ।
ପଦାରେ ପଡିଲା ବିଦ୍ୟାଳୟ ଓ ଗଣଶିକ୍ଷା ବିଭାଗର ଅପାରଗତା,ପୁଣି ପ୍ରଶ୍ନପତ୍ର ଲିକ୍ ଅଭିଯୋଗ
ନନ୍ଦିଘୋଷ ବ୍ୟୁରୋ: ପୁଣି ପ୍ରଶ୍ନପତ୍ର ଲିକ । ପଦାରେ ପଡିଲା ବିଦ୍ୟାଳୟ ଓ ଗଣଶିକ୍ଷା ବିଭାଗର ଅପାରଗତା । ସୋସିଆଲ ମିଡ଼ିଆରେ ଘୁରି ବୁଲୁଛି ପ୍ରାଥମିକ ଓ ଉଚ୍ଚ ପ୍ରାଥମିକ ବିଦ୍ୟାଳୟର ବାର୍ଷିକ ପରୀକ୍ଷା ପ୍ରଶ୍ନପତ୍ର । ପରୀକ୍ଷାର 2ରୁ 3 ଦିନ ପୂର୍ବରୁ ୟୁଟ୍ୟୁବରେ ଅପଲୋଡ଼ ହେଉଛି ପ୍ରଶ୍ନ ପତ୍ର ସହିତ ଉତ୍ତର। ଯାହାକୁ ନେଇ ପୁଣି ରାଜ୍ୟ ବିଦ୍ୟାଳୟ ଗଣଶିକ୍ଷା ବିଭାଗର ଅପାରଗତା ପଦାରେ ପଡିଛି । ଭଦ୍ରକ ଜିଲ୍ଲାରେ ପ୍ରାଥମିକ ଓ ଉଚ୍ଚ ପ୍ରାଥମିକ ବିଦ୍ୟାଳୟ ର ବାର୍ଷିକ ପରୀକ୍ଷା ପୂର୍ବରୁ ପ୍ରଶ୍ନପତ୍ର ଓ ତାର ଉତ୍ତର 2 ରୁ 3 ଦିନ ପୂର୍ବରୁ ଆସି ଯାଉଛି ୟୁଟ୍ୟୁବ ଚ୍ୟାନେଲରେ । ଯାହା ଉଭୟ ଛାତ୍ରଛାତ୍ରୀ ଏବଂ ଶିକ୍ଷକ ଶିକ୍ଷୟିତ୍ରୀ ଓ ଅବିଭାବକଙ୍କୁ ଆଶ୍ଚର୍ଯ୍ୟ କରିଛି। ଛାତ୍ରଛାତ୍ରୀ ମାନେ ବର୍ଷ ତମାମ ଯାହା ପଢ଼ନ୍ତି ତାର ଉତ୍କର୍ଷତା ଦେଖାଇବା ପାଇଁ ବାର୍ଷିକ ପରୀକ୍ଷା କରାଯାଇଥାଏ। ସେଥିପାଇଁ ଛାତ୍ରଛାତ୍ରୀ ମାନେ ପରୀକ୍ଷା ପୂର୍ବରୁ ପ୍ରସ୍ତୁତ ହୋଇ ରହିଥାନ୍ତି। ତେବେ ଚଳିତ ବର୍ଷ ପିଲା ମାନଙ୍କୁ ଆଉ ପରିଶ୍ରମ କରିବାକୁ ପଡୁ ନାହିଁ । ଆଜିର ପରୀକ୍ଷାର ଉତ୍ତର ଗତ କାଲି ଠାରୁ ଗୋଟିଏ ନିର୍ଧିଷ୍ଟ ୟୁଟ୍ୟୁବ ଚ୍ୟାନେଲରେ ଆସି ଯାଉଛି । ଆଉ ପିଲା ତାହା ଦେଖି ଓ ଲେଖି ପରୀକ୍ଷା କେନ୍ଦ୍ର କୁ ଆସି ପରୀକ୍ଷା ସମୟ ଶେଷ ହେବା ପୂର୍ବରୁ ଉତ୍ତର ଲେଖି ପଳାଇ ଯାଉଛନ୍ତି।ଏମିତି ଘଟଣା ଗତ ତିନି ଦିନ ହେବ ଦେଖା ଯାଉ ଥିଲେ ମଧ୍ୟ କେହି ଏଥିପ୍ରତି ଦୃଷ୍ଟି ଦେଉ ନାହାନ୍ତି। ଆଜି ସପ୍ତମ ଶ୍ରେଣୀର ଗଣିତ ପରୀକ୍ଷା ଥିଲା। ଯାହା ପ୍ରଶ୍ନ ପଡିଥିଲା ତାର ଉତ୍ତର ଗତ 3 ଦିନ ପୂର୍ବରୁ ନଲେଜ୍ ଓ୍ବିଥ୍ ନିଲୁ ନାମକ ୟୁଟ୍ୟୁବ ଚ୍ୟାନେଲରେ ଆସିଥିଲା । ଯାହାକୁ ନେଇ ଅବିଭାବକଙ୍କ ମହଲରେ ଅସନ୍ତୋଷ ଦେଖାଦେଇଛି। ତେବେ ଏହି ପ୍ରଶ୍ନପତ୍ର ପରୀକ୍ଷାର ତିନି ଦିନ ପୂର୍ବରୁ ସଂପୃକ୍ତ ଚ୍ୟାନେଲ ହାତକୁ ଗଲା ତାହା ଏବେ ବଡ଼ ପ୍ରଶ୍ନ ପାଲଟିଛି।
ଯଦି ପ୍ରଶ୍ନ ପତ୍ର ଲିକ କରିବାର ଥିଲା ତେବେ ରାଜ୍ୟ ବିଦ୍ୟାଳୟ ଓ ଗଣ ଶିକ୍ଷା ବିଭାଗ କାହିଁକି ପରୀକ୍ଷା କରାଉଛି ତାହା ମଧ୍ୟ ପ୍ରଶ୍ନ ଉଠିଛି । କେବଳ ଅଙ୍କ ନୁହଁ ଆଗାମୀ ଦିନରେ ଥିବା ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ପରୀକ୍ଷା ପ୍ରଶ୍ନ ୟୁଟ୍ୟୁବ ଚାନେଲରେ ଅପଲୋଡ଼ ହୋଇଥିବା ବେଳେ ତାହା ବି ଚଳିତ ବର୍ଷର ପ୍ରଶ୍ନପତ୍ର ନୁହଁ ତ ବୋଲି ପ୍ରଶ୍ନ ଉଠିଛି । ଯାହାକୁ ନେଇ ରାଜ୍ୟ ସରକାର ତୁରନ୍ତ ଦୃଢ଼ ପଦକ୍ଷେପ ନେବାକୁ ଅବିଭାବକ ମହଲରେ ଦାବି ହୋଇଛି। ଅନ୍ୟପଟେ ଘଟଣା ସଂପର୍କରେ ଭଦ୍ରକ ଜିଲ୍ଲା ଶିକ୍ଷା ଅଧିକାରୀଙ୍କୁ ଘଟଣା ସଂପର୍କରେ ଅବଗତ କରାଯିବା ପରେ କ୍ୟାମେରା ଆଗରେ କିଛି ପ୍ରତିକ୍ରିୟା ଦେଇନାଥିଲେ ମଧ୍ୟ ଘଟଣା ସଂପର୍କରେ ଯାଞ୍ଚ କରାଯିବାର ପ୍ରତିଶୃତି ଦେଇଛନ୍ତି।
ରେଳ ଧାରଣାରୁ ଛାତ୍ରଙ୍କ ମୁଣ୍ଡବିହୀନ ମୃତଦେହ ଉଦ୍ଧାର
ଭଦ୍ରକ: ବାଉଦପୁର ନିକଟସ୍ଥ ରେଳଧାରଣ ଯୁବକଙ୍କ ମୁଣ୍ଡବିହୀନ ଶବ ଉଦ୍ଧାର । ମୃତଦେହ ପଡ଼ିଥିବା ବେଳେ ଶରୀରରୁ ମୁଣ୍ଡ ଓ ଡାହାଣ ହାତ ଗାଏବ ହୋଇଯାଇଛି । ମୃତକ ଜଣଙ୍କ ହେଲେ ରଞ୍ଜନ ସାମନ୍ତରା । ତେବେ ପୁଅକୁ ହତ୍ୟା କରାଯାଇଥିବା ପରିବାର ଲୋକେ ଅଭିଯୋଗ କରିଛନ୍ତି । ପାରିପାର୍ଶିକ ପରିସ୍ଥିତିକୁ ନେଇ ସୁପରିକଳ୍ପିତ ହତ୍ୟାକାଣ୍ଡ ବୋଲି ଭଦ୍ରକ ଟାଉନ ଥାନାରେ ଅଭିଯୋଗ କରିଛନ୍ତି ମୃତକଙ୍କ ପରିବାର ଲୋକେ ।
ରାନ୍ଦିଆ ଓ ବାଉଦପୁର ଷ୍ଟେସନ ମଝି ଥିବା ସାଳନ୍ଦୀ ବ୍ରିଜ ରେଳ ଧାରଣା ନିକଟରୁ ଭଦ୍ରକ ରେଲୱେ ପୋଲିସ ମୃତଦେହକୁ ଉଦ୍ଧାର କରିଛି । ସାବରଙ୍ଗ ଥାନା ଅଧୀନସ୍ଥ ବ୍ରହ୍ମପୁର ଗାଁର ନିରଞ୍ଜନ ସାମନ୍ତରାଙ୍କ ପୁଅ ରଞ୍ଜନ ଭଦ୍ରକ ସହରରେ ଥିବା କନିକା ମେସରେ ରହି ଇଞ୍ଜିନିୟରିଂ କଲେଜରେ ଡିପ୍ଲୋମା ପଢୁଥିଲେ । ଗତ ରାତିରୁ ରଞ୍ଜନ ମେସକୁ ଫେରି ନଥିବା ପରିବାର ଲୋକେ ଜାଣିବାକୁ ପାଇଥିଲେ । ରେଲୱେ ପୋଲିସ ଏକ ଯୁବକଙ୍କ ମୁଣ୍ଡବିହୀନ ଶବ ଉଦ୍ଧାର କରି ଭଦ୍ରକ ମୁଖ୍ୟ ଚିକିତ୍ସାଳୟକୁ ଆଣିଥିବା ଘର ଲୋକେ ଖବର ପାଇଥିଲେ । ମେଡିକାଲରେ ପହଞ୍ଚି ରଞ୍ଜନଙ୍କ ମୃତଦେହକୁ ଚିହ୍ନଟ କରିଥିଲେ ପରିବାର ଲୋକେ । ରଞ୍ଜନଙ୍କ ମୁଣ୍ଡ ଓ ଡାହାଣ ହାତଟି ନଥିବା ବେଳେ ଶରୀରରେ ଅନ୍ୟ କୌଣସି ସ୍ଥାନରେ କ୍ଷତଚିହ୍ନ ନାହିଁ । ଆଖପାଖ ଅଞ୍ଚଳରେ ପୋଲିସ ଖୋଜାଖୋଜି ପରେ ମଧ୍ୟ ମୁଣ୍ଡ ଓ ହାତ ମିଳିନାହିଁ । ହତ୍ୟା ଅଭିଯୋଗ ପରେ ଘଟଣାର ତଦନ୍ତ ଆରମ୍ଭ କରିଛି ରେଲୱେ ପୋଲିସ ।
୫ ବର୍ଷ ଶିଶୁଙ୍କୁ ଦୁଷ୍କର୍ମ ଓ ହତ୍ୟା ଘଟଣା, ଅଟକ ଅଭିଯୁକ୍ତ ଗିରଫ
ଅନୁଗୁଳ: ନିଶା ଶିଳ୍ପାଞ୍ଚଳ ଥାନା ଅଞ୍ଚଳରେ ୫ ବର୍ଷ ଶିଶୁଙ୍କୁ ଦୁଷ୍କର୍ମ ପରେ ହତ୍ୟା ଘଟଣାରେ ଅଟକ ଅଭିଯୁକ୍ତ ଗିରଫ । ଗିରଫ ଅଭିଯୁକ୍ତ ଯୁବକ ଜଣକ ହେଲେ ବାବୁଲା ଜେନା l ନିଶା ଶିଳ୍ପାଞ୍ଚଳ ଥାନା ଅଞ୍ଚଳରେ ଗତ ଗୁରୁବାର ଘଟିଥିଲା ଘଟଣା । ଏନେଇ ନିଖୋଜ ଶିଶୁର ପରିବାର ପକ୍ଷରୁ ଶୁକ୍ରବାର ଥାନାରେ ଅଭିଯୋଗ କରାଯାଇଥିଲା । ଅଭିଯୋଗ ପାଇବା ପରେ ପୋଲିସ ଏକ ମିସିଙ୍ଗ ରିପୋର୍ଟ ରୁଜୁ କରି ତଦନ୍ତ ଆରମ୍ଭ କରିଥିଲା ।
ଶନିବାର ଏକ ମହୁଲ ଗଛ ମୂଳରୁ ନିଖୋଜ ଶିଶୁର ରକ୍ତ ଜୁଡୁବୁଡୁ ଶବକୁ ଉଦ୍ଧାର କରିଥିଲା ପୋଲିସ । ପ୍ରାଥମିକ ତଦନ୍ତରୁ ଶିଶୁକୁ ଦୁଷ୍କର୍ମ ପରେ ହତ୍ୟା କରାଯାଇଥିବା ସନ୍ଦେହ କରି ଅଧିକ ଖୋଲାତାଡ଼ କରୁଥିଲା ପୋଲିସ । ଖୋଳତାଡ଼ ପରେ ପୋଲିସ ମୃତଦେହ ପଡ଼ିଥିବା ସ୍ଥାନରୁ ଶହେ ମିଟର ଦୂରରେ ଥିବା ଏକ ଘରେ ରକ୍ତ ଛିଟା ପଡ଼ିଥିବା ଦେଖିଥିଲା । ଏହାପରେ ସାଇଣ୍ଟିଫିକ ଟିମର ସହାୟତା ନିଆଯାଇଥିଲା । ସେହି ଘରେ ରହୁଥିବା ବାବୁଲା ଜେନାଙ୍କୁ ପୋଲିସ ଅଟକ ରଖି ତଦନ୍ତ ଆରମ୍ଭ କରିଥିଲା । ଦୀର୍ଘ ୩ ଦିନ ଧରି ପୋଲିସ ବିଭାଗର ବରିଷ୍ଠ ଅଧିକାରୀ ଜେରା କରିବା ପରେ ଅଭିଯୁକ୍ତ ବାବୁଲା ଜେନାକୁ ଗିରଫ କରାଯାଇଛି ।
ଗାଡ଼ି ସାଇଟ ମରାକୁ କେନ୍ଦ୍ର କରି ଫୁଟିଲା ଗୁଳି, ଜଣେ ଆହତ
ବାଲେଶ୍ବର: ବାଲେଶ୍ଵର ଜିଲ୍ଲାର ବସ୍ତା ଥାନା ଚକୁରି ଗାଁରେ ଗାଡ଼ି ସାଇଟ ମାଗିବାରୁ ଫୁଟିଲା ଗୁଳି । ରାସ୍ତାରେ ଗାଡ଼ି ସାଇଟ୍ ମାଗିବାରୁ ଗୁଳିମାଡ଼ ହୋଇଥିବା ଅଭିଯୋଗ ହୋଇଛି । ଗୁଳିମାଡ଼ରେ ଶ୍ରୀରାମପୁର ପଞ୍ଚାୟତ ନିମା ଗାଁର ସୁଧାଂଶୁ ଶେଖର ଜେନା ଆହତ । ସୁଧାଂଶଙ୍କ ଆଣ୍ଠୁରେ ଗୁଳି ବାଜିଛି । ତାଙ୍କୁ ବାଲେଶ୍ଵର ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି ।
ଅଭିଯୋଗ ଅନୁସାରେ ଗତକାଲି ରାତି ପ୍ରାୟ ୧୦ଟା ସମୟରେ ସୁଧାଂଶୁ ଓ ତାଙ୍କ ମାଉସୀ ପୁଅ ଭାଇ ଚିନ୍ମୟୀ ଏକ ବାଇକରେ ନିଜ ଘରକୁ ଫେରୁଥିଲେ । ତେବେ ରାସ୍ତାରେ ୨ଟି ବାଇକରେ ୩ ଜଣ ଯୁବକ ଆସି ତାଙ୍କ ଗାଡି ଅଟକାଇଥିଲେ । ସୁଧାଂଶୁ ସାଇଟ ମାଗିବାରୁ ସାଇଡ ନଦେଇ ସୁଧାଂଶୁଙ୍କ ଗାଡ଼ି ଛଡ଼ାଇବାକୁ ଉଦ୍ୟମ କରିଥିଲେ । ସୁଧାଂଶୁ ଏଥିରେ ବାଧା ଦେବାରୁ ଗୁଳି ମାଡ଼ କରି ୩ ଯୁବକ ଫେରାର ହୋଇଯାଇଥିଲେ ।
ଥାନାରେ ଅଭିଯୋଗ ପରେ ପୋଲିସ ତଦନ୍ତ ଆରମ୍ଭ କରିଛି । ପ୍ରକୃତରେ ସୁଧାଂଶୁଙ୍କୁ ଗୁଳିମାଡ଼ କରାଯାଇଛି ବା ଅନ୍ୟ କେଉଁଥିରେ ଆକ୍ରମଣ ହୋଇଛି ସେ ନେଇ ପୋଲିସ ସ୍ପଷ୍ଟ କରିନାହିଁ ।
ବିଧାନସଭାରେ ସରକାରଙ୍କୁ ଘେରିଲେ ଦୁଇ ବିରୋଧୀ
ଭୁବନେଶ୍ବର: ଆଜି ଓଡ଼ିଶା ବିଧାନସଭା ବଜେଟ ଅଧିବେଶନରେ ଦୁଇ ବିରୋଧୀ ଦଳ ବିଜେଡି ଓ କଂଗ୍ରେସ ରାଜ୍ୟ ସରକାରଙ୍କୁ ଘେରିଛନ୍ତି । ଲଘୁ ଖଣିଜ ପଦାର୍ଥ ଦୁର୍ନୀତିକୁ ନେଇ ବିଜେଡି ରାଜ୍ୟ ସରକାରଙ୍କୁ ଟାର୍ଗେଟ କରିଛି । ସେହିପରି ନାରୀ ନିର୍ଯାତନାକୁ ନେଇ କଂଗ୍ରେସ ନୀରବ ପ୍ରତିବାଦ ଜଣାଇଛି ।
ଆଜି ଶୂନ୍ୟକାଳରେ ବିଜେଡି ବିଧାୟକ ଗଣେଶ୍ବର ବେହେରା ଲଘୁ ଖଣିଜ ପଦାର୍ଥ ଦୁର୍ନୀତି ପ୍ରସଙ୍ଗ ଉଠାଇଥିଲେ । ସେ କହିଥିଲେ, ଦୁର୍ନୀତିରେ ରାଜ୍ୟ ଶୂନ୍ୟ ସହନଶୀଳତା ପରିବର୍ତ୍ତେ ପୂର୍ଣ୍ଣ ଶୂନ୍ୟ ସହନଶୀଳତା ନୀତି ଆପଣାଇଛନ୍ତି l ରତ୍ନଗର୍ଭା ଓଡିଶାକୁ ଲୁଟ ଚାଲିଛି । ଏହି ଲୁଟରେ ଶାସକ ଦଳର ସଦସ୍ୟ ସାମିଲ ଅଛନ୍ତି । ସରକାର ଏହି ଖଣି ଲୁଟକୁ ସ୍ୱୀକାର କରିବେ କି ? ଦୁର୍ନୀତି ବିରୋଧରେ ସରକାର ଆଭିମୁଖ୍ୟ ସ୍ପଷ୍ଟ କରନ୍ତୁ । ଟାସ୍କଫୋର୍ସ ଗଠନ କରିବା ନେଇ ଉତ୍ତର ରଖିବାକୁ ଗଣେଶ୍ବର ଦାବି କରିଥିଲେ ।
ସେହିପରି ବାଲି ଚୋରମାନେ ବିଧାନସଭା କମିଟି ସହ ବୁଲୁଥିବା ଗୃହରେ ଅଭିଯୋଗ କରିଛନ୍ତି ବିଜେଡି ବିଧାୟକ ସଞ୍ଜୀବ ମଲ୍ଲିକ । ବାଲି ଚୋରି ଦେଖିବାକୁ ଗୃହ କମିଟି ଯାଇଥିଲା । ହେଲେ ଆଶ୍ଚର୍ଯ୍ୟର କଥା ହେଲା, ବାଲି ଚୋରି କରୁଥିବା ମାଫିଆମାନେ କମିଟି ସହ ବୁଲୁଥିଲେ । ତେଣୁ ସରକାର ଏହା ଉପରେ ଗୁରୁତ୍ବ ଦେଇ ବାଲି ବନ୍ଦ କରିବାକୁ ଶୂନ୍ଯକାଳରେ ଦାବି କରିଥିଲେ ସଞ୍ଜୟ ।
ସେପଟେ ବିଧାନସଭାରେ ନାରୀ ସୁରକ୍ଷା ପ୍ରସଙ୍ଗରେ କଂଗ୍ରେସର ନୀରବ ପ୍ରତିବାଦ ଜାରି ରହିଛି । ନିଜ ନିଜ ଆସନରେ ଛିଡ଼ା ହୋଇ କଂଗ୍ରେସ ବିଧାୟକମାନେ ନୀରବ ପ୍ରତିବାଦ କରିଛନ୍ତି । ମୁହଁରେ କଂଗ୍ରେସ ସଦସ୍ଯ କଳା ପଟି ବାନ୍ଧି ପ୍ରତିବାଦ କରୁଛନ୍ତି । କଂଗ୍ରେସ ବିଧାୟକ ଦଳ ଉପନେତା ପ୍ରସଙ୍ଗ ଉଠାଇ ଟାର୍ଗେଟ କରିଛନ୍ତି । ରାଜ୍ୟରେ ଆଇନ୍ ଶୃଙ୍ଖଳା ପରିସ୍ଥିତି ବିଗିଡି ଯାଇଛି । ହୋଲିରେ ୯ରୁ ଅଧିକ ମୁଣ୍ଡ ଗଡିଛି । ହୋଲିରେ ବି ମଦ ବେପାର ହୋଇଛି । ରାଜ୍ୟରେ ମହିଳାମାନେ ଅସୁରକ୍ଷିତ । ୮ ମାସରେ ୧୮୦୧ ନାରୀ ନିର୍ଯାତନାର ଶିକାର ହୋଇଛନ୍ତି । ୫୪ ଜଣଙ୍କ ଗଣ ଦୁଷ୍କର୍ମ ହୋଇଛନ୍ତି । ସରକାର ମହିଳାଙ୍କୁ ସୁରକ୍ଷା ଦିଅନ୍ତୁ ବୋଲି ଦଳ ଦାବି କରିଛି । ନାରୀ ନିର୍ଯାତନା ନେଇ ଗୃହ କମିଟି ଗଠନ କରାଯାଉ ବୋଲି କଂଗ୍ରେସ ଦାବି କରିଛି । ଶୂନ୍ୟକାଳରେ ନାରୀ ନିର୍ଯାତନା ପ୍ରସଙ୍ଗ ଉଠାଇ ସରକାରଙ୍କ ଉପରେ ବର୍ଷିଛନ୍ତି କଂଗ୍ରେସ ବିଧାୟକ ରାଜେନ ଏକ୍କା । ଆଦିବାସୀ ହଷ୍ଟେଲରେ ନାବାଳିକାମାନେ ଗର୍ଭବତୀ ହେଉଛନ୍ତି । ମହିଳା ମାନେ ଅସୁରକ୍ଷିତ । ୩୬ ହଜାର ମହିଳା ରାଜ୍ୟରେ ନିଖୋଜ ଅଛନ୍ତି । ତେଣୁ ଗୃହ କମିଟି ଗଠନ କରିବା ଓ ଏନେଇ ବାଚସ୍ପତିଙ୍କ ରୁଲିଂ ଦେବାକୁ ଦାବି କରିଛନ୍ତି ରାଜେନ । ଏହାସହ ଅନୁଗୁଳ ନାବାଳିକା ଦୁଷ୍କର୍ମ ଓ ହତ୍ୟା ମାମଲାରେ ଦଳ ପକ୍ଷରୁ ମୁଲତବୀ ନୋଟିସ ଦିଆଯାଇଛି । ସେପଟେ ପ୍ରଶ୍ନକାଳ ଆଜି ସୁରୁଖୁରୁରେ ଚାଲିଥିଲା । ଆଜି ଉଚ୍ଚଶିକ୍ଷା, କ୍ରୀଡା ଓ ଓଡିଆ ଭାଷା ଓ ସଂସ୍କୃତି ବିଭାଗର ଖର୍ଚ୍ଚ ଦାବି ଆଲୋଚନା ରହିଛି ।
ଲାଇସେନ୍ସ ରିନୁଆଲ କରିବାକୁ ଯୋଗାଣ ଅଧିକାରୀ ଲାଞ୍ଚ ନେଉଥିବା ଭିଡିଓ ଭାଇରାଲ
ପାତ୍ରପୁର: ଚାଉଳ ବଣ୍ଟନ ପାଇଁ ଲାଇସେନ୍ସ ପାଇଥିବା ଏସଏଚଜି ଗ୍ରୁପ ପାଖରୁ ଯୋଗାଣ ଅଧିକାରୀ ନେଉଛନ୍ତି ଲାଞ୍ଚ । ଲାଇସେନ୍ସ ରିନୁଆଲ କରିବାକୁ ପାତ୍ରପୁର ବ୍ଲକ ଯୋଗାଣ ଅଧିକାରୀ ବଳରାମ ଜେନା ଲାଞ୍ଚ ମାଗୁଥିବା ଭିଡିଓ ସୋସିଆଲ ମିଡ଼ିଆରେ ହେଉଛି ଭାଇରାଲ । ଯାହାକୁ ନେଇ ଅଞ୍ଚଳରେ ଅସନ୍ତୋଷ ଦେଖିବାକୁ ମିଳିଛି । ଏପରିକି ଏହି ଲାଞ୍ଚ କାରବାରରେ ବିଧାୟକଙ୍କ ସମ୍ପୃକ୍ତି ଥିବା ଓ ତାଙ୍କ ଫୋନ୍ କଲ ଯାଞ୍ଚ କରିବାକୁ ଦାବି ହେଉଛି ।
ସୂଚନାଯାଗ୍ୟ, ଗଞ୍ଜାମ ଜିଲ୍ଲା ପାତ୍ରପୁର ବ୍ଲକ ଯୋଗାଣ ଅଧିକାରୀ ମହିଳାଙ୍କୁ ରାସନ ସାମଗ୍ରୀ ବଣ୍ଟନ ଲାଇସେନ୍ସ ରିନୁଆଲ କରିବାକୁ ଲାଞ୍ଚ ନେଉଛନ୍ତି । ଲାଞ୍ଚ ନଦେଲେ କାମ ହେଉନାହିଁ । ଜଣେ ବ୍ୟକ୍ତି ଲାଇସେନ୍ସ ରିନୁଆଲ କରିବା ପାଇଁ ୩ ହଜାର ଟଙ୍କା ଲାଞ୍ଚ ନେଉଥିବା ଭିଡିଓ ଭାଇରାଲ ହେଉଛି । ତେବେ ୫୦୦ ଟଙ୍କା କମ ଥିବାରୁ ବ୍ୟକ୍ତି ଜଣଙ୍କ ପରେ ଆଣି ଦେବାକୁ କହୁଛନ୍ତି । ଏହାପରେ ଯୋଗାଣ ଅଧିକାରୀ ଜଣେ କର୍ମଚାରୀଙ୍କୁ ଡାକି ମୁଁ ଥାଏ ନଥାଏ, ଇଏ ଆସିଲେ ୫୦୦ ଟଙ୍କା ଓ ଫଟୋ ରଖିବାକୁ ନିର୍ଦ୍ଦେଶ ଦେଉଛନ୍ତି । ତେବେ ଯୋଗାଣ ଅଧିକାରୀ ଅଭିଯୋଗକୁ ଖଣ୍ଡନ କରିବା ସହ ତାଙ୍କୁ ଫସେଇବାକୁ ଉଦ୍ୟମ କରାଯାଇଥିବା କହିଛନ୍ତି ।
ଫେରୁଛନ୍ତି ସୁନୀତା ଓ୍ବିଲିୟମ୍ସ: ୧୮ ହଜାର ଫୁଟ୍ ଉଚ୍ଚରେ ଖୋଲିବ ପାରାଚ୍ୟୁଟ, ସମୁଦ୍ରରେ କରିବେ ଲାଣ୍ଡିଂ
ନନ୍ଦିଘୋଷ ବ୍ୟୁରୋ: ଦୀର୍ଘ ୯ ମାସ ମହାକାଶରେ ରହିବା ପରେ ପୃଥିବୀକୁ ଫେରୁଛନ୍ତି ଭାରତୀୟ ମୂଳ ଆମେରିକୀୟ ଅନ୍ତରୀକ୍ଷ ଯାତ୍ରୀ ସୁନୀତା ଓ୍ବିଲିୟମ୍ସ । ତାଙ୍କ ସହ ମହାକାଶକାରୀ ବଚ୍ ୱିଲମୋର, ଆମେରିକାର ନିକ୍ ହେଗ୍ ଓ ରୁଷିଆର ଆଲେକଜାଣ୍ଡାର ଗୋରବୁନୋଭ ମଧ୍ୟ ଫେରୁଛନ୍ତି । ଏଲେନ ମସ୍କଙ୍କ ସ୍ପେସ ଏକ୍ସ କମ୍ପାନୀର ସ୍ପେସ କ୍ରାଫ୍ଟ ଡ୍ରାଗନରେ ଫେରୁଛନ୍ତି ସୁନୀତା । ବୁଧବାର ଭାରତୀୟ ସମୟ ଭୋର ସାଢ଼େ ତିନିଟାରେ ଲାଣ୍ଡ କରିବେ । ତେବେ ସୁନିତା ଏବଂ ତାଙ୍କ ସାଥୀଙ୍କ ଫେରିବା ଏତେ ସହଜ ନୁହେଁ । ତେବେ କେମିତି ଏମାନେ ଲାଣ୍ଡ କରିବେ ଆସନ୍ତୁ ଜାଣିବା ପୂରା ପ୍ରକ୍ରିୟା ।
ସ୍ପେସ ଷ୍ଟେସନରୁ ପୃଥିବୀକୁ କେମିତି ଫେରିବେ ସୁନିତା ?
ସୁନିତାଙ୍କୁ ନେଇ ଆସୁଥିବା ସ୍ପେସ ଏକ୍ସର ଡ୍ରାଗନ ସ୍ପେସ କ୍ରାଫ୍ଟର ଅନଡକିଂ ହୋଇସାରିଛି । ଏହା ଅଟୋମେଟିକ ପ୍ରକ୍ରିୟା ଥିଲା । ଏକାଧିକ ପର୍ଯ୍ୟାୟରେ ଏହା ପୃଥିବୀକୁ ଫେରିବ । ଆସନ୍ତୁ ଜାଣିବା ଏହି ପର୍ଯ୍ୟାୟ ଗୁଡ଼ିକ ସମ୍ପର୍କରେ…
୧. ସ୍ପେସ ଏକ୍ସରୁ ଡ୍ରାଗନ ସ୍ପେସ କ୍ରାପ୍ଟକୁ ଆସିବାକୁ ହେଲେ ପ୍ରଥମେ ମହାକାଶଚାରୀଙ୍କୁ ପ୍ରେଶର ସୁଟ ପିନ୍ଧିବାକୁ ପଡ଼ିଥାଏ । ହେଚ୍ ବନ୍ଦ କରାଯିବା ସହ କୌଣସି ସ୍ଥାନରେ ଯେମିତି ଲିକେଜ ନଥିବା ତାହା ଯାଞ୍ଚ କରାଯାଇ ସ୍ପଷ୍ଟ କରାଯିବ ।
୨. ଦ୍ବିତୀୟ ପର୍ଯ୍ୟାୟରେ ସ୍ପେସ ଏକ୍ସର ଡ୍ରାଗନ୍ ସ୍ପେସ କ୍ରାପ୍ଟ ଅନଡକିଂ ହେବ । ଏହି ପ୍ରକ୍ରିୟା ମଧ୍ୟ ଏକାଧିକ ପର୍ଯ୍ୟାୟରେ ହେବ । ପ୍ରଥମ ପର୍ଯ୍ୟାୟରେ ସିକ୍ୟୁରିଟି ଯାଞ୍ଚ କରାଯିବ । ଅନଡକିଂ ପୂର୍ବରୁ ସ୍ପେସ କ୍ରାପ୍ଟରେ ଲାଇଫ ସପୋର୍ଟ ଜ୍ୟାକେଟ, ଯୋଗାଯୋଗ ଓ ଥ୍ରିଷ୍ଟର ସିଷ୍ଟମ ଓ୍ବାର୍ଣ୍ଣିଂ ଚେକ୍ ହେବ । ଦ୍ବିତୀୟ ପର୍ଯ୍ୟାୟରେ ସ୍ପେସ କ୍ରାପ୍ଟର ଲକ୍ ଖୋଲିଯିବ । ଏହାଦ୍ବାରା ଇଣ୍ଟରନ୍ୟାସନାଲ ସ୍ପେସ ଷ୍ଟେସନରୁ ସ୍ପେସ କ୍ରାପ୍ଟ ଅଲଗା ହୋଇଯିବ । ତୃତୀୟ ପର୍ଯ୍ୟାୟରେ, ଅନଡକିଂ ସିଷ୍ଟମ ଖୋଲିବା ପରେ ଥ୍ରିଷ୍ଟର ଜରିଆରେ ସ୍ପେସ କ୍ରାପ୍ଟକୁ ଆଇଏସଏସରୁ ଅଲଗା କରାଯିବ । ସୂଚନାଯୋଗ୍ୟ, ଥ୍ରିଷ୍ଟର ସ୍ପେସ କ୍ରାପ୍ଟର ସ୍ପିଡ ଓ ଦିଗକୁ କଣ୍ଟ୍ରୋଲ କରିଥାଏ । ଚତୁର୍ଥ ପର୍ଯ୍ୟାୟରେ ଅନଡକିଂ ପରେ ସ୍ପେସ କ୍ରାପ୍ଟର ମନିଟରିଂ ହେବ । ଶେଷ ପର୍ଯ୍ୟାୟରେ ସ୍ପେସ କ୍ରାପ୍ଟ ଆଇଏସଏସରୁ ସମ୍ପୂର୍ଣ୍ଣ ଅଲଗା ହୋଇ ପୃଥିବୀ ଅଭିମୁଖେ ବାହାରି ପଡ଼ିବ ।
୩. ଏହି ପର୍ଯ୍ୟାୟରେ ସ୍ପେସ କ୍ରାପ୍ଟର ଡି-ଅରବିଟ ଓ୍ବର୍ଣ୍ଣ ପ୍ରକ୍ରିୟା ରହିଛି । ଏହା ବୁଧବାର ଭୋର ପ୍ରାୟ ୨ଟା ୪୧ରେ ହେବ । ଏଥିରେ ଇଞ୍ଜନକୁ ଫାୟାର କରାଯିବ । ଏହାଦ୍ବାରା ସ୍ପେସ କ୍ରାପ୍ଟ ପୃଥିବୀର ଆହୁରି ନିକଟତର ହେବ ।
୪. ଏହି ପର୍ଯ୍ୟାୟରେ ସ୍ପେସ କ୍ରାପ୍ଟ ପୃଥିବୀର ବାୟୁମଣ୍ଡଳରେ ପ୍ରବେଶ କରିବ । କୁହାଯାଉଛି, ସ୍ପେସ କ୍ରାପ୍ଟ ଯେତେବେଳେ ବାୟୁମଣ୍ଡଳରେ ପ୍ରବେଶ କରିବ ଏହାର ଗତି ଘଣ୍ଟା ପ୍ରତି ୨୭ ହଜାର କିଲୋମିଟର ରହିବ ।
୫. ସ୍ପେସ କ୍ରେପ୍ଟ ପୃଥିବୀ ପୃଷ୍ଠରୁ ୧୮ ହଜାର ଫୁଟ୍ ଉପରେ ଥିବା ବେଳେ ଦୁଇଟି ଡ୍ରାଗନ ପାରାଚ୍ୟୁଟ୍ ଖୋଲିବ । ଏହାପରେ ସ୍ପେସ କ୍ରାପ୍ଟ ଯେତେବେଳେ ୬ ହଜାର ଫୁଟରେ ପହଞ୍ଚିବ, ସେତେବେଳେ ମୁଖ୍ୟ ପରାଚ୍ୟୁଟ ଖୋଲିବ ।
୬. ନାସା ସୂଚନା ଅନୁସାରେ, ଏହାପରେ ପ୍ଲାସ ଡାଉନ କରାଯିବ । ଏହାର ଅର୍ଥ ଅନ୍ତରୀକ୍ଷ ଯାତ୍ରୀଙ୍କ ଲାଣ୍ଡିଂ ସମୁଦ୍ରରେ କରାଯିବ । ସୁନୀତା ଏବଂ ତାଙ୍କ ସାଥୀ ଫ୍ଲୋରିଡା ସ୍ଥିତ ସମୁଦ୍ରରେ ଲାଣ୍ଡ କରିବେ । ଯଦି ପାଗ ଠିକ ନରହିବ ତେବେ ଲାଣ୍ଡିଂ କେଉଁଠି ବି ହୋଇପାରେ ।
ସରିଲା ଡ୍ରାଗନ ସ୍ପେସ କ୍ରାପ୍ଟର ଅନଡକିଂ ପ୍ରକ୍ରିୟା, ମହାକାଶରୁ ଫେରୁଛନ୍ତି ସୁନୀତା ୱିଲିୟମ୍ସ
ନନ୍ଦିଘୋଷ ବ୍ୟୁରୋ: ଆଇଏସଏସରୁ ବାହାରିଲେ ସୁନୀତା ୱିଲାୟମ୍ସ । ତାଙ୍କ ସହିତ ଅନ୍ୟ ୩ ମହାକାଶଚାରୀ ବି ଫେରୁଛନ୍ତି । ସରିଲା ଡ୍ରାଗନ ସ୍ପେସକ୍ରାପ୍ଟର ଅନଡକିଂ ପ୍ରକ୍ରିୟା । ଆଇଏସଏସରୁ ଡ୍ରାଗନର ଅନଡକିଂ ଶେଷ ହୋଇଛି । ସେମାନେ ଡ୍ରାଗନରେ ପୃଥିବୀ ଅଭିମୁଖେ ଯାତ୍ରା ଆରମ୍ଭ କରିଛନ୍ତି । ଆସନ୍ତାକାଲି ପୃଥିବୀ ପୃଷ୍ଠକୁ ଫେରିବେ ମହାକାଶକାରୀ ସୁନୀତା ୱିଲିୟମ୍ସ । ଭାରତୀୟ ସମୟ ବୁଧବାର ରାତି ପ୍ରାୟ ସାଢ଼େ ୩ଟାରେ ଆମେରିକାର ଫ୍ଲୋରିଡ଼ାରେ ଅବତରଣ କରିବେ । ସୁନୀତାଙ୍କ ସହିତ ଆଉ ୩ ଜଣ ମହାକାଶକାରୀ ବଚ୍ ୱିଲମୋର, ଆମେରିକାର ନିକ୍ ହେଗ୍ ଓ ରୁଷିଆର ଆଲେକଜାଣ୍ଡାର ଗୋରବୁନୋଭ ମଧ୍ୟ ଫେରୁଛନ୍ତି । ଏମାନଙ୍କୁ ଫେରାଇ ଆଣିବାକୁ ବ୍ୟବସ୍ଥା କରାଯାଇଥିବାରୁ ଆମେରିକାର ରାଷ୍ଟ୍ରପତି ଡୋନାଲଡ ଟ୍ରମ୍ପ ଓ ସ୍ପେସ୍ ଏକ୍ସର ମାଲିକ ଏଲନ୍ ମସ୍କଙ୍କୁ ଆଇଏସଏସରୁ ଧନ୍ୟବାଦ ଦେଇଛନ୍ତି ସୁନୀତା ୱିଲିୟମ୍ସ ।
ମହାକାଶଚାରୀଙ୍କୁ ଆଣିବାକୁ ଯାଇଛି ସ୍ପେସ୍ ଏକ୍ସର ଡ୍ରାଗନ । ପ୍ରାୟ ୯ ମାସ ହେଲା ଇଣ୍ଟରନ୍ୟାସନାଲ ସ୍ପେସ୍ ଷ୍ଟେସନରେ ଫସି ରହିଛନ୍ତି ସୁନୀତା ଏବଂ ୱିଲମୋର । ଗତ ବର୍ଷ ଜୁନ ୫ ତାରିଖରେ ସେମାନେ ଆଇଏସଏଓକୁ ଯାଇଥିଲେ। ଏକ ମରାମତି କାମ କରିବାକୁ ଯାଇଥିଲେ ସୁନୀତା ଓ ବଚ୍ । କିଛି ଦିନରେ କାମ ଶେଷ କରି ସେମାନେ ବୋଇଂ ଷ୍ଟାରଲାଇନରରେ ଫେରିବାର ଥିଲା । କିନ୍ତୁ ଏହି ମହାକାଶଯାନରେ ତ୍ରୁଟି ଦେଖାଯିବାରୁ ସେମାନେ ଫେରି ପାରି ନଥିଲେ । ଏପରିକି ସେମାନଙ୍କ ଫେରିବାକୁ ନେଇ ବହୁତ ଅନିଶ୍ଚିତତା ଦେଖା ଦେଇଥିଲା । ପୃଥିବୀ ପୃଷ୍ଠରୁ ଆଉ ଏକ ମହାକାଶଯାନ ପଠାଇବାର ବ୍ୟବସ୍ଥା ହୋଇଥିଲା । ଶେଷରେ ଏଲନ୍ ମସ୍କଙ୍କ ସ୍ପେସ୍ ଏକ୍ସ ସଂସ୍ଥା ପକ୍ଷରୁ ଡ୍ରାଗନକୁ ପଠା ଯାଇଛି, ଯାହାକି ସେଠାରେ ପହଞ୍ଚିଛି । ଏହି ଡ୍ରାଗନରେ ଫେରୁଛନ୍ତି ସୁନୀତା ଓ ତାଙ୍କର ସାଥୀ ମହାକାଶଚାରୀ । ଜଣେ ମହାକାଶଚାରୀ ଆଇଏସଏସରେ ୬ ମାସରୁ ଅଧିକ ଦିନ ରହନ୍ତି ନାହିଁ । କିନ୍ତୁ ସୁନୀତା ଏବଂ ବଚଙ୍କୁ ଗତ ଜୁନରୁ ଏପର୍ଯ୍ୟନ୍ତ ୯ ମାସ ରହିବାକୁ ପଡ଼ିଛି । ରୁଷିଆର କସମୋନଟ୍ ଭାଲେରି ପୋଲୟାକୋଭ୍ ସର୍ବାଧିକ ୪୩୭ ଦିନ ମହାକାଶରେ ରହିଥିଲେ ।
ପୋଲିସ ହେପାଜତରେ ଚୋରି ଅଭିଯୁକ୍ତଙ୍କ ମୃତ୍ୟୁର ତଦନ୍ତ ନିର୍ଦ୍ଦେଶ
ସମ୍ବଲପୁର: ଚୋରି ଅଭିଯୁକ୍ତ ମୃତ୍ୟୁର ତଦନ୍ତ ନିର୍ଦ୍ଦେଶ । ସମ୍ଵଲପୁର ଏସପି ଦେଲେ ନିର୍ଦ୍ଦେଶ । ଜଣେ ଡିଏସପି ରାଙ୍କର ଅଧିକାରୀ କରିବେ ତଦନ୍ତ । ଗତକାଲି ଜଣେ ଅଭିଯୁକ୍ତର ମୃତ୍ୟୁ ଘଟିଥିଲା । ସନ୍ଦେହଜନକ ଅବସ୍ଥାରେ ଅଭିଯୁକ୍ତ କାଦିର ମହମ୍ମଦ ଶେଖଙ୍କ ମୃତ୍ୟୁ ହୋଇଥିଲା । ଚୋରି ଉଦ୍ୟମ ଅଭିଯୋଗରେ ତାକୁ ଆଗରୁ ଗିରଫ କରିଥିଲା ପୋଲିସ ।
କୋର୍ଟ ଚାଲାଣ ପୂର୍ବରୁ ମହମ୍ମଦ ଅସୁସ୍ଥ ହୋଇ ପଡ଼ିଥିଲେ । ତାଙ୍କୁ ବୁର୍ଲା ମେଡିକାଲରେ ଭର୍ତ୍ତି କରାଯାଇଥିଲା । ସେଠାରେ ତାଙ୍କର ମୃତ୍ୟୁ ଘଟିଥିଲା । ଚୋରି କରୁଥିବା ବେଳେ ସ୍ଥାନୀୟ ଲୋକେ ଅଭିଯୁକ୍ତଙ୍କୁ ଧରି ପୋଲିସ ଜିମାରେ ଦେଇଥିଲେ । ତେବେ ମହମ୍ମଦଙ୍କୁ ପୋଲିସ ପିଟି ପିଟି ମାରି ଦେଇଥିବା ପରିବାର ଲୋକେ ଅଭିଯୋଗ କରିଛନ୍ତି ।