ନନ୍ଦିଘୋଷ ବ୍ୟୁରୋ: ଆଫଗାନିସ୍ତାନରେ ଭୂମିକମ୍ପ। ଏହାର ତୀବ୍ରତା ରିକ୍ଟର ସ୍କେଲରେ ୫.୯ ହୋଇଥିବାର ସୂଚନା ମିଳିଛି। ହିନ୍ଦୁକୁଶ ଅଞ୍ଚଳରେ ଏହି ଭୂମିକମ୍ପ ହୋଇଛି। ଦିଲ୍ଲୀ-ଏନସିଆର ସହିତ ଭାରତର କେତେକ ଅଞ୍ଚଳରେ ମଧ୍ୟ ଏହାର ଝଟକା ଅନୁଭୂତ ହୋଇଛି। ଆଜି ଭୋର୍ ସମୟରେ ଏହି ଭୂମିକମ୍ପ ହୋଇଥିଲା। କିନ୍ତୁ କେହି ମୃତାହତ କିମ୍ବା କୌଣସି କ୍ଷୟକ୍ଷତିର ରିପୋର୍ଟ ମିଳିନାହିଁ।
ଜାତୀୟ ଭୂକମ୍ପ ବିଜ୍ଞାନ କେନ୍ଦ୍ର, NCS ଅନୁସାରେ ଭୂମିକମ୍ପ ୭୫ କିଲୋମିଟର ଗଭୀରତାରେ ହୋଇଥିଲା। ୫.୯ ତୀବ୍ରତାର ଭୂମିକମ୍ପ ହେଲେ ସାଧାରଣତଃ କ୍ଷୟକ୍ଷତି ହୋଇଥାଏ। ବିଶେଷ କରି କେନ୍ଦ୍ରସ୍ଥଳ ନିକଟରେ ଘରଦ୍ଵାର ଭାଙ୍ଗିଥାଏ। କିନ୍ତୁ ଏପର୍ଯ୍ୟନ୍ତ କୌଣସି ମୃତାହତ କିମ୍ବା କ୍ଷୟକ୍ଷତିର ରିପୋର୍ଟ ପ୍ରକାଶ ପାଇନାହିଁ। ଦିଲ୍ଲୀ ଏବଂ ଏହାର ଆଖପାଖ ଅଞ୍ଚଳର ଝଟକା ପରେ ଲୋକେ ଆତଙ୍କିତ ହୋଇ ଘରୁ ବାହାରି ଆସିଥିଲେ।
ଆଫଗାନିସ୍ତାନରେ ଭୂମିକମ୍ପ, ଏହାର ତୀବ୍ରତା ରିକ୍ଟର ସ୍କେଲରେ ୫.୯
କୋଇଲା ଓ୍ବାସେରୀରେ ଚଢାଉ, ହଜାର ହଜାର ଟନ୍ କୋଇଲା ଜବତ
ସୁନ୍ଦରଗଡ଼ : ସୁନ୍ଦରଗଡ଼ ହେମଗିରି ଥାନା କନିକା ସ୍ଥିତ ଆର୍ଯ୍ୟନ କୋଲ ୱାସେରୀର ବିଭିନ୍ନ ଠିକଣାରେ ଚଢ଼ାଉ । ହଜାର ହଜାର ଟନ ବେଆଇନ କୋଇଲା ଗଚ୍ଛିତ ଥିବାର ସୂଚନା ପାଇ ଚଢାଉ ହୋଇଛି। ଜିଲ୍ଲା ପ୍ରଶାସନର ରାଜସ୍ବ ବିଭାଗ ଏବଂ ପୋଲିସର ଚଢ଼ାଉ ପରେ ଖଣି ବିଭାଗର ମଧ୍ୟ ଚଢ଼ାଉ ଜାରି ରହିଛି। କମ୍ପାନୀ ପାଚେରୀରୁ ଦୁଇ କିଲୋମିଟର ଜଙ୍ଗଲରେ ହଜାର ହଜାର ଟନ କୋଇଲା ରହିଛି। ପାଚେରୀ ଠାରୁ ଦୂରରେ ଆଉ ଏକ ଠିକଣାରେ ହଜାର ହଜାର ଟନ ବିଶୋଧିତ କୋଇଲା ଗଚ୍ଛିତ ଥିବା ଜଣାପଡିଛି। ପାଖାପାଖି ୧୦ ହଜାର ଟନ ବେଆଇନ କଞ୍ଚା କୋଇଲା ଜବତ ନେଇ ସୂଚନା ଦେଇଛନ୍ତି କନିଷ୍ଠ ଖଣି ଅଧିକାରୀ ମଙ୍ଗଳ ଚରଣ ହେମ୍ବ୍ରମ । ଆସନ୍ତାକାଲି ଅନ୍ୟ ସ୍ଥାନରେ ଥିବା କୋଇଲାର ଆକଳନ କରାଯିବ।
‘ବିଜୁବାବୁଙ୍କ ପ୍ରତିମୂର୍ତ୍ତି ପୋଡି ଘଟଣାରେ ମୁଖ୍ୟ ଷଡଯନ୍ତ୍ରକାରୀଙ୍କ ଗିରଫ ଦାବି’
ବଲାଙ୍ଗୀର : ପାଟଣାଗଡ଼ରେ ପ୍ରବାଦପୁରୁଷ ବିଜୁବାବୁଙ୍କ ପ୍ରତିମୂର୍ତ୍ତି ପୋଡି ଘଟଣାରେ ମୁଖ୍ୟ ଷଡଯନ୍ତ୍ରକାରୀଙ୍କ ଗିରଫ ଦାବି କରିଛନ୍ତି ପୂର୍ବତନ ପାଟଣାଗଡ଼ ବିଧାୟକ ସରୋଜ ମେହେର । ଗିରଫ ଅଭିଯୁକ୍ତ ଯୁଗଳ କିଶୋର ସାହୁଙ୍କୁ ପ୍ରତିମୂର୍ତ୍ତି ପୋଡ଼ିବାକୁ ପ୍ରବର୍ତ୍ତାଇ ଥିବା ଅଭିଯୁକ୍ତ ମାନଙ୍କୁ ଚିହ୍ନଟ କରି ଗିରଫ କରିବାକୁ ପୂର୍ବତନ ବିଧାୟକ ସରୋଜ ମେହେର ତାଙ୍କ ସମର୍ଥକ ମାନଙ୍କ ସହ ଥାନାରେ ପହଞ୍ଚି ଅଭିଯୋଗ କରିଛନ୍ତି । ଗତ ୨୦୨୨ ନଭେମ୍ବର ୧୨ ତାରିଖରେ ଶାସକ ଦଳର ଦୁଇ ଜଣ ବ୍ୟକ୍ତି ପ୍ରତିମୂର୍ତ୍ତି ସ୍ଥାପନ କରିବା ପୂର୍ବରୁ ଫାଉଣ୍ଡେସନ ଭାଙ୍ଗିଥିଲେ । ଏହି ଘଟଣା ପଛରେ ମଧ୍ୟ ମୁଖ୍ୟ ଷଡଯନ୍ତ୍ରକାରୀ ବିଜେପି ଦଳର ବୋଲି ସେ ଅଭିଯୋଗ ଆଣିଛନ୍ତି । ପାଟଣାଗଡ଼ ଥାନାରେ ପାଟଣାଗଡ଼ ଏସଡିପିଓ ସଦାନନ୍ଦ ପୂଜାରୀଙ୍କ ସହ ବିଜେଡି ଟିମ ଦୀର୍ଘ ସମୟ ଧରି ଆଲୋଚନା କରିଛନ୍ତି । ଘଟଣାର ନିରପେକ୍ଷ ତଦନ୍ତକରି ମୁଖ୍ୟ ଷଡଯନ୍ତ୍ରକାରୀକୁ ଗିରଫ ନକଲେ ଆଗାମୀ ଦିନରେ ବିଜେଡି ପକ୍ଷରୁ ଏହାର ଜୋରଦାର ପ୍ରତିବାଦ ସହ ଥାନା ଘେରାଉ କରାଯିବ ବୋଲି ସୂଚନା ଦେଇଛନ୍ତି । ପୋଲିସ ଜଣଙ୍କୁ ଗିରଫ କରିଛି ଓ ତାକୁ ପାଗଳ ବୋଲି ଦର୍ଶାଉଛି। କିନ୍ତୁ ପ୍ରତିମୂର୍ତ୍ତି ଜାଳିବା ପାଇଁ ସଂପୃକ୍ତ ବ୍ୟକ୍ତିଙ୍କୁ କିଏ ଉସୁକାଇଛି ସେନେଇ କିନ୍ତୁ ଜଣାପଡିନି।
ରାଜ୍ୟବ୍ୟାପୀ କଂଗ୍ରେସର ମଶାଲ ଶୋଭାଯାତ୍ରା, ସାମିଲ ହେଲେ ନେତା ଓ କର୍ମୀ
ଭୁବନେଶ୍ବର : ରାଜ୍ୟରେ ବୃଦ୍ଧି ପାଉଥିବା ନାରୀ ନିର୍ଯାତନା, ଧର୍ଷଣ, ଗଣଧର୍ଷଣ ଓ ବାଳିକା ନିଖୋଜ ପ୍ରତିବାଦରେ ରାଜ୍ୟବ୍ୟାପୀ କଂଗ୍ରେସର ବିଶାଳ ମଶାଲ ଶୋଭାଯାତ୍ରା । ଭୁବନେଶ୍ବର କଂଗ୍ରସଭବନରୁ ଏହି ଶୋଭାଯାତ୍ରା ବାହାରି ରାମ ମନ୍ଦିର ପର୍ଯ୍ୟନ୍ତ ଯାଇଥିଲା । ଭଦ୍ରକ ବନ୍ତ ଛକରୁ ଏକ ବିଶାଳ ଶୋଭାଯାତ୍ରା ବାହାରି ସହର ପରିକ୍ରମା କରି ଭଦ୍ରକ ଟାଉନ ହଲରେ ପହଞ୍ଚିଥିଲା ଶୋଭାଯାତ୍ରା । ପୁରୀ ଜିଲ୍ଲା ଅସ୍ତରଙ୍ଗ କଂଗ୍ରେସ ଦଳ ତରଫରୁ ଅସ୍ତରଙ୍ଗ ମୁଖ୍ୟ ବଜାର ତାରିଣୀ ମନ୍ଦିର ଠାରୁ ଥାନା ପର୍ଯ୍ୟନ୍ତ ଶତାଧିକ କଂଗ୍ରେସ କର୍ମୀ ମଶାଲ ଶୋଭାଯାତ୍ରା କରିଥିଲେ । ବାଙ୍କୀ କଂଗ୍ରେସ କାର୍ଯ୍ୟାଳୟ ଠାରୁ ମାଆ ଚର୍ଚ୍ଚିକା ମନ୍ଦିର ପର୍ଯ୍ୟନ୍ତ ହାତରେ ମଶାଲ ଜାଳି ବିରାଟ ଶୋଭାଯାତ୍ରା ରେ ଆସି ପହଞ୍ଚିଥିଲେ ।ଅନୁଗGଳ ଜିଲ୍ଲା ଛେଣ୍ଡିପଦା ବ୍ଳକ କଂଗ୍ରେସ ପକ୍ଷରୁ ଛେଣ୍ଡିପଦା ବ୍ଲକ ଅଫିସ ଯାଏଁ ଯାଇଥିଲା ଶୋଭାଯାତ୍ରା । ଧର୍ମାଗଡ ବ୍ଲକ କଂଗ୍ରେସ ତରଫରୁ ଶହଶହ କର୍ମୀ ଶୋଭାଯାତ୍ରାରେ ସାମିଲ ହୋଇଥିଲେ । ପରେ ଏକ ପ୍ରତିବାଦ ସଭା ଆୟୋଜିତ ହୋଇଥିଲା । ଏଥିରେ କଂଗ୍ରେସର ବରିଷ୍ଠ ନେତୃବୃନ୍ଦ ରାଜ୍ୟ ସରକାରଙ୍କ ଉପରେ ବର୍ଷିଥିଲେ ।
ବିହାର ବିଧାନସଭା ନିର୍ବାଚନ ଲାଗି ଦିଲ୍ଲୀରେ ରଣନୀତି
ନୂଆଦିଳ୍ଲୀ ; ବିହାର ବିଧାନସଭା ନିର୍ବାଚନ ଲାଗି ଦିଲ୍ଲୀରେ ରଣନୀତି। ଏଆଇସିସି ସଭାପତି ମଲ୍ଲିକାର୍ଜୁନ ଖଡଗେ ଓ ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କୁ ଭେଟିଲେ ଆରଜେଡି ନେତା ତେଜସ୍ବୀ ଯାଦବ। ରାଜ୍ୟରେ ବିଧାନସଭା ନିର୍ବାଚନ ପାଖେଇଆସୁଥିବାବେଳେ ଆସନ ବୁଝାମଣା ପ୍ରସଙ୍ଗରେ ଆଲୋଚନା ହୋଇଥିବା ସୂଚନା ମିଳିଛି। ଦିଲ୍ଲୀ ବୈଠକ ପରେ ପାଟନାରେ ଅନ୍ୟ ଏକ ବୈଠକ ହେବ ବୋଲି କହିଛନ୍ତି ତେଜସ୍ବୀ। ବିହାରକୁ ଆଗେଇ ନେବା ଲାଗି କଂଗ୍ରେସ ଓ ଆରଜେଡି ହିଁ ବିକଳ୍ପ ବୋଲି ତେଜସ୍ବୀ କହିଛନ୍ତି। ସେ ଆହୁରି କହିଛନ୍ତି- ଗତ ୨୦ ବର୍ଷ ଧରି ରାଜ୍ୟର କୌଣସି ବିକାଶ ସାଧନ ହୋଇନାହିଁ। ବିଜେପି ଶାସନରେ ରାଜ୍ୟବାସୀ ତଳିତଳାନ୍ତ ହୋଇଛନ୍ତି। ତେବେ ବିହାର ଲାଗି କିଏ ସିଏମ ଫେସ ହେବେ ସେ ନେଇ ନୀରବ ରହିଛନ୍ତି ତେଜସ୍ବୀ। ରାଜ୍ୟର ବିଭିନ୍ନ ପ୍ରସଙ୍ଗକୁ ଆଧାର କରି ଦଳ ନିର୍ବାଚନ ଲଢିବ ବୋଲି ସେ କହିଛନ୍ତି।
ସମ୍ବଲପୁରରେ ବିଜେଡି ପ୍ରତିବାଦ ସଭାରେ ପୋଲିସର ଦମନଲୀଳା
ସମ୍ବଲପୁର : ସମ୍ବଲପୁରରେ ବିଜେଡି ପ୍ରତିବାଦ ସଭାରେ ପୋଲିସର ଦମନଲୀଳା। ବର୍ଦ୍ଦିରେ ଲାଗିଲା କଳଙ୍କ। ବିଜୁବାବୁଙ୍କ ପ୍ରତିମୂର୍ତ୍ତି ପୋଡିବା ଘଟଣାରେ ବିଜେଡି ଶାନ୍ତିପୂର୍ଣ୍ଣ ପ୍ରତିବାଦ ଆନ୍ଦୋଳନ କରୁଥିବାବେଳେ ପୋଲିସ କରିଛି ଅମାନୁଷିକ ଆକ୍ରମଣ। ଏପରିକି ମହିଳା କର୍ମୀଙ୍କୁ ବି ଛାଡ଼ି ନଥିଲା ପୋଲିସ। ମହିଳା କର୍ମୀଙ୍କୁ ପୋଲିସ ଘୋଷାରି ଘୋଷାରି ନେଇଥିଲା। କିଛି ମହିଳାଙ୍କ ଉପରକୁ ବି ପୋଲିସ ହାତ ଉଠାଇଥିବା ଦେଖାଯାଇଛି। ବିହାର ଓ ଉତ୍ତରପ୍ରଦେଶକୁ ଓଡ଼ିଶା ପୋଲିସ ବଳିଗଲା ବୋଲି କହିଛନ୍ତି ଆନ୍ଦୋଳନକାରୀ। ସରକାରୀ କଳର ଅପବ୍ୟବହାର କରି ଆନ୍ଦୋଳନକାରୀଙ୍କୁ ଦମନ କରାଯାଇଛି ବୋଲି କହିଛନ୍ତି ଆନ୍ଦୋଳନକାରୀ। ପୋଲିସର ଆକ୍ରମଣରେ ବିଜେଡି ନେତ୍ରୀ ସଂଯୁକ୍ତା ମେହେରଙ୍କୁ ଆଘାତ ଲାଗିଛି। ସଂଯୁକ୍ତାଙ୍କ ଦୁଇଟି ଆଙ୍ଗୁଠି ଭାଙ୍ଗି ଯାଇଛି। ତାଙ୍କୁ ସଦର ମେଡ଼ିକାଲରେ ଭର୍ତ୍ତି କରାଯାଇ ଚିକିତ୍ସା କରାଯାଉଛି। ପୋଲିସର ଏଭଳି ଆଚରଣକୁ ଚାରିଆଡୁ ନିନ୍ଦା କରାଯାଇଛି।
୧୮ ଜିଲ୍ଲାକୁ ମିଳିଲା ବିଜେଡି ଜିଲ୍ଲା ସଭାପତି
ଭୁବନେଶ୍ବର ; ବିଜେଡିର ୧୮ ଜଣିଆ ଜିଲ୍ଲା ସଭାପତି ତାଲିକା ପ୍ରକାଶ। ୧୮ ଜିଲ୍ଲାର ପ୍ରକ୍ରିୟାରେ ସିଙ୍ଗଲ ନୋମିନେସନ ହେବା ଯୋଗୁ ସଭାପତିମାନେ ନିର୍ଦ୍ୱନ୍ଦରେ ନିର୍ବାଚିତ ହୋଇଛନ୍ତି। ତିନି ଦିନ ଯାଏ ଅର୍ଥାତ ୧୩ ରୁ ୧୫ ଯାଏ ଅର୍ଥାତ ଆଜି ପର୍ଯ୍ୟନ୍ତ ଜିଲ୍ଲା ସଭାପତି ନିର୍ବାଚନ ପ୍ରକ୍ରିୟା ହୋଇଥିଲା। ଆସନ୍ତାକାଲିଠୁ ଆଉ ନିର୍ବାଚନର ଆଉ ଏକ ପର୍ଯ୍ୟାୟ ଆରମ୍ଭ ହେବ। ରାଜ୍ୟ ପରିଷଦ ସଦସ୍ୟ ପାଇଁ ବିଧିବଦ୍ଧ କମିଟି ଓ ତା ପରେ ଏକଜିକ୍ୟୁଟିଭ କମିଟି ଗଠିତ ହେବ। ତା ପରେ ସଭାପତି ନିର୍ବାଚନ ପ୍ରକ୍ରିୟା ଆରମ୍ଭ ହେବ। ସଭାପତି ପଦ ପାଇଁ ନୋମିନେସନ କେବେ ଓ ନିର୍ବାଚନ କେବେ ପରବର୍ତ୍ତୀ ପର୍ଯ୍ୟାୟରେ ଚୂଡାନ୍ତ ହେବ ବୋଲି ସୂଚନା ଦେଇଛନ୍ତି ନିର୍ବାଚନ ଅଧିକାରୀ ପ୍ରତାପ ଦେବ। ଅନୁଗୁଳ ପାଇଁ ବ୍ରଜକିଶୋର ପ୍ରଧାନ, ବରଗଡ଼ ପାଇଁ ସୁଶାନ୍ତ କୁମାର ମହାପାତ୍ର, ଭଦ୍ରକ ପାଇଁ ଜଗନ୍ନାଥ ସ୍ବାଇଁ, ବୌଦ୍ଧ ପାଇଁ ପ୍ରଦୀପ ଅମାତ, ଦେବଗଡ଼ ପାଇଁ ରୋମାଞ୍ଚ ରଞ୍ଜନ ବିଶ୍ବାଳଙ୍କୁ ଜିଲ୍ଲା ସଭାପତି ହୋଇଛନ୍ତି। ସେହିପରି ଗଜପତି ଲାଗି ପ୍ରଦୀପ ନାୟକ, ଜଗତସିଂହପୁର ପାଇଁ ପ୍ରଶାନ୍ତ ମୁଦୁଲି, ଯାଜପୁର ପାଇଁ ସରୋଜ କୁମାର ମହାପାତ୍ର, ଝାରସୁଗୁଡା ପାଇଁ ହରିଶ ଗଣତ୍ରା, କନ୍ଧମାଳ ପାଇଁ ପଦ୍ମନାଭ ବେହେରା, ମାଲକାନଗିରି ପାଇଁ ମାନସ ମାଡ଼କାମୀ, ମୟୂରଭଞ୍ଜ ପାଇଁ ସୁଦାମ ମାର୍ଣ୍ଡି, ନବରଙ୍ଗପୁର ପାଇଁ ମନୋହର ରନ୍ଧାରୀ, ନୟାଗଡ଼ ପାଇଁ ରମେଶ ଚନ୍ଦ୍ର ବେହେରା, ନୂଆପଡ଼ା ପାଇଁ ଅବନୀ ରଞ୍ଜନ ଯୋଶୀ, ପୁରୀ ପାଇଁ ଉମାକାନ୍ତ ସାମନ୍ତରାୟ, ସୁବର୍ଣ୍ଣପୁର ପାଇଁ ସରୋଜ କୁମାର କମ୍ପ ଓ ସୁନ୍ଦରଗଡ଼ ପାଇଁ ଯୋଗେଶ ସିଂ ଜିଲ୍ଲା ସଭାପତି ଭାବେ ମନୋନୀତ ହୋଇଛନ୍ତି।
ପୁଣି ଫେରିଲା ପେଗାସସ ବିବାଦ, ଚୋରି ହୋଇଛି ଭାରତୀୟଙ୍କ ହ୍ବାଟ୍ସଆପ୍ ଡାଟା
ଭୁବନେଶ୍ବର : ଶହେ ଜଣ ଭାରତୀୟଙ୍କ ହ୍ବାଟସ୍ଆପ୍ ହ୍ୟାକ ହୋଇଛି ! ମେକସିକୋ ପରେ ଭାରତୀୟଙ୍କ ଡାଟା ଚୋରି ବିଶ୍ବରେ ଦ୍ବିତୀୟ । ୬ ବର୍ଷ ପରେ ପୁଣି ଥରେ ଫେରିଲା ପେଗାସସ୍ ବିବାଦ । ୨୦୧୯ରେ ଫେସ୍ବୁକ ଓ ହ୍ବାଟସ୍ଆପ୍ ପ୍ରତିଷ୍ଠାତା ମାର୍କ ଜୁକରବର୍ଗ ପେଗାସସ୍ ବିକଶିତ କରିଥିବା ଇସ୍ରାଏଲି ସଂସ୍ଥା ଏନ୍ଏସ୍ଓ ବିରୋଧରେ ଆମେରିକା କୋର୍ଟରେ ମାମଲା ଦାଏର କରିଥିଲେ । ଏକ ଜାତୀୟସ୍ତରର ଗଣମାଧ୍ୟମରେ ପ୍ରକାଶିତ ଖବର ଅନୁଯାୟୀ ଜୁକରବର୍ଗଙ୍କ ମାମଲାରୁ ଏହି ନୂଆ ତଥ୍ୟ ସାମନାକୁ ଆସିଛି । ୨୦୨୧ରେ ୨୯ ଜଣ ବିଶିଷ୍ଟ ବ୍ୟକ୍ତିଙ୍କ ଫୋନ ହ୍ୟାକ୍ ନେଇ ଅଭିଯୋଗ ଉଠିଥିଲା । ଯେଉଁଥିରେ ବିଶିଷ୍ଟ ରାଜନେତା ଓ ସାମ୍ବାଦିକଙ୍କ ସାମିଲ ଥିଲେ । ଏହାକୁ ନେଇ ସଂସଦରେ ଝଡ ଉଠିବା ସହ ସୁପ୍ରିମକୋର୍ଟରେ ଏକାଧିକ ମାମଲା ଦାୟର ହୋଇଥିଲା । ପରେ ସୁପ୍ରିମକୋର୍ଟଙ୍କ ଦ୍ବାରା ଗଠିତ ଦୁଇଟି କମିଟିର ତଦନ୍ତ ପରେ ମାତ୍ର ୫ ଜଣଙ୍କ ଫୋନ ପ୍ରଭାବିତ ହୋଇଥିବା ଖବର ସାମନାକୁ ଆସିଥିଲା । ଏବେ ପୁଣି ଥରେ ଏନ୍ଏସ୍ଓ ଗୃପ୍ର କାରନାମା ସାମନାକୁ ଆସିବା ପରେ କେନ୍ଦ୍ର ସରକାରଙ୍କୁ ସିଧା ସିଧା ଟାର୍ଗେଟ୍ କରିଛନ୍ତି ବିରୋଧୀ ।
ସାଧାରଣ ଲୋକଙ୍କ ବ୍ୟକ୍ତିଗତ ଡିଜିଟାଲ ଡାଟାକୁ ସୁରକ୍ଷା ଦେବା କେନ୍ଦ୍ର ସରକାରଙ୍କ ଦାୟିତ୍ବ । ଆଜିକାଲି ଟଙ୍କାଠୁ ଆରମ୍ଭ କରି ଜମିବାଡ଼ି ସବୁ କିଛି ଲୋକେ ଡିଜିଟାଲରେ କାରବାର କରୁଛନ୍ତି । ଏଥିପାଇଁ କେନ୍ଦ୍ର ସରକାର ମଧ୍ୟ ଡିଜିଟାଲ ପ୍ଲାଟଫର୍ମର ବିକାଶ କରିଛନ୍ତି । କିନ୍ତୁ ଏହି ଡାଟା ଯେ କାଲି କୌଣସି ମାଲଓ୍ବେର୍ କିମ୍ବା ସ୍ପାଇଓ୍ବେର ଜରିଆରେ ଚୋରି ହେଉନଥିବା କିଏ କହିବ ? ଖୋଦ ସରକାରୀ ଓ୍ବେବସାଇଟ ବି ହ୍ୟାକ ହେଉଛି । ଯଦି ବିକଶିତ ରାଷ୍ଟ୍ର ଆମେରିକାରେ ଉଦବେଗ ପ୍ରକାଶ ପାଉଛି । ଏଠି କେନ୍ଦ୍ର ସରକାର ଭାରତୀୟଙ୍କ ଡାଟା କିପରି ସୁରକ୍ଷିତ ରହିବ ? ସେ ନେଇ ଦୃଢ଼ ପଦକ୍ଷେପ ନେବାକୁ ବିଶେଷଜ୍ଞ ଦାବି କରିଛନ୍ତି । ପୋଗାସସ୍ ଜରିଆରେ ୫୧ଟି ରାଷ୍ଟ୍ରର ୧୨୨୩ ଲୋକଙ୍କ ଡାଟା ଚୋରି ନେଇ ତଥ୍ୟ ଆସିଛି । ମେକ୍ସିକୋରେ ସର୍ବାଧିକ ୪୫୬ ଡଣଙ୍କର ଥିବାବେଳେ ଭାରତରେ ୧୦୦ ଜଣ, ବାହାରିନରେ ୮୨, ମରୋକ୍କୋରେ ୬୦, ପାକିସ୍ତାନରେ ୫୮, ଇଣ୍ଡୋନେସିଆରେ ୫୪ ଓ ଇସ୍ରାଏଲରୁ ୫୧ ଜଣଙ୍କର ଡାଟା ଚୋରି ହୋଇଥିବା ଅଭିଯୋଗ ହୋଇଛି ।
ଗ୍ରାମସଭା ବ୍ୟବସ୍ଥାକୁ ପଙ୍ଗୁ କରିଦେବାକୁ ଚକ୍ରାନ୍ତ
ଭୁବନେଶ୍ବର : ବାଟବଣା ବିକଶିତ ଗାଁ, ବିକଶିତ ଓଡ଼ିଶା ଯୋଜନା। ବିରୋଧୀ ଦଳରେ ଥିବାବେଳେ ଗ୍ରାମସଭାକୁ ନେଇ ଚାଲିଥିଲା ହୋହଲ୍ଲା। ହେଲେ ସରକାରକୁ ଆସିବା ପରେ ଗ୍ରାମସଭାକୁ ଫୁ। ନବୀନ ସରକାର ଅମଳରେ ନାଁ ଥିଲା ଆମ ଓଡ଼ିଶା, ନବୀନ ଓଡ଼ିଶା। ହେଲେ ଏବେ ନାଁ ବଦଳାଇ ରଖାଗଲା ବିକଶିତ ଗାଁ, ବିକଶିତ ଓଡ଼ିଶା। ଜାନୁଆରୀ ୨୮ରେ ପ୍ରଥମ ଗାଇଡ଼ଲାଇନ ଜାରି କରିଥିଲା ପଞ୍ଚାୟତିରାଜ ବିଭାଗ। ଏଥିରେ ବିଭିନ୍ନ କାମ ପାଇଁ ଡ଼େଡ଼ଲାଇନ ସ୍ଥିର କରାଯିବା ସହ ସବୁକିଛି ଗ୍ରାମସଭା ଜରିଆରେ ହେବ ବୋଲି କୁହାଯାଇଥିଲା। ମାତ୍ର ମାର୍ଚ୍ଚ ୧୨ରେ ଗାଇଡ଼ଲାଇନରେ ପରିବର୍ତ୍ତନ ହେଲା। ୨୦ ପ୍ରତିଶତ କାମ ବିନା ଗ୍ରାମସଭାରେ ବିଧାୟକ, ସାଂସଦଙ୍କ ସୁପାରିଶରେ ହେବ। ପୁଣି ମାର୍ଚ୍ଚ ୨୫ରେ ଏହି ସୀମା ୪୦ ପ୍ରତିଶତ କରିଦେଇ ଗ୍ରାମସଭାକୁ ଗୁରୁତ୍ବହୀନ କରିଦେଲେ ସରକାର। ଜିଲ୍ଲାପାଳ ଚାହିଁଲେ ପ୍ରକଳ୍ପ ଯୋଡ଼ିପାରିବେ କିମ୍ବା କାଟିପାରିବେ। ସରକାରଙ୍କ ଏପରି ଚାଲାକିକୁ ନେଇ ବର୍ଷିଛନ୍ତି ବିରୋଧୀ।
ବିଜେପି ବିରୋଧୀ ଦଳରେ ଥିବା ବେଳେ ଗ୍ରାମସଭାକୁ ଗୌଣ କରାଯାଉଥିବାର ଅଭିଯୋଗ କରୁଥିଲା। ହେଲେ ସରକାରକୁ ଆସିବା ପରେ ନିଜର ଡ଼ବଲ ଷ୍ଟାଣ୍ଡାର୍ଡ଼ ରୂପ ଦେଖାଇଛି। ବିରୋଧିଙ୍କ ତୀବ୍ର ସମାଲୋଚନା ପରେ ପ୍ରତିକ୍ରିୟା ରଖିଛନ୍ତି ବିଭାଗୀୟ ମନ୍ତ୍ରୀ। କହିଛନ୍ତି- ବିଧାୟକ ଓ ସାଂସଦ ହେଉଛନ୍ତି ଜନ ପ୍ରତିନିଧି। ଏମାନେ ମଧ୍ୟ ଗାଁରେ କିଛି ଭଲ କାମ କରିବାକୁ ଇଚ୍ଛା ପ୍ରକାଶ କରିଥାନ୍ତି। ହେଲେ ଏମାନେ ଗ୍ରାମସଭାରେ ଉପସ୍ଥିତ ରହୁନଥିବାରୁ ସେମାନଙ୍କ ମନରେ ଥିବା ପ୍ରକଳ୍ପ ଯୋଜନାରେ ସ୍ଥାନ ପାଏନାହିଁ। ୨୦୦୨ ପଞ୍ଚାୟତିରାଜ ଓପିଡ଼ବ୍ଲ୍ୟୁଡ଼ି କୋଡ଼୍ ଅନୁସାରେ କାମ ହେଉଛି ବୋଲି ମନ୍ତ୍ରୀ କହୁଛନ୍ତି। ମାତ୍ର କାହିଁକି ୪୦ ପ୍ରତିଶତ କାମ ବିନା ଗ୍ରାମସଭାରେ ହେବ, ସେହି ପ୍ରଶ୍ନର ସନ୍ତୋଷଜନକ ଉତ୍ତର ଦେଇପାରିନାହାନ୍ତି ମନ୍ତ୍ରୀ। ବିକଶିତ ଗାଁ ବିକଶିତ ଓଡ଼ିଶା ଯୋଜନାରେ ଟଙ୍କାଟିଏ ନ ଦେଇ ବିଜେପି ସରକାର ବାହାବା ନେବାକୁ ବସିଛନ୍ତି ବୋଲି ବିଜେଡ଼ି ଅଭିଯୋଗ କରିଛି। ସେପଟେ ବିଭାଗୀୟ ମନ୍ତ୍ରୀ କହିଛନ୍ତି ଏହି ଯୋଜନାରେ ବର୍ଷକୁ ହଜାରେ କୋଟି ବଦଳରେ ମୁଖ୍ୟମନ୍ତ୍ରୀ ୨ ହଜାର କୋଟି ଟଙ୍କା ଦେବାକୁ ନିଷ୍ପତ୍ତି ନେଇଛନ୍ତି।
ମିଶନ ଶକ୍ତିକୁ ଶକ୍ତିହୀନ କରିବାକୁ ବିଜେପିର ଷଡ଼ଯନ୍ତ୍ର ଅଭିଯୋଗ
ଭୁବନେଶ୍ଵର : ପୁଣି ରାଜନୀତି ପଶାପାଲିରେ ମହିଳା ସ୍ବୟଂ ସହାୟକ ଗୋଷ୍ଠୀ । ଉପମୁଖ୍ୟମନ୍ତ୍ରୀଙ୍କ ପୋଷ୍ଟକୁ ନେଇ ଉଠିଲା ପ୍ରଶ୍ନ । ଘେରିଲେ ବିଜେଡି ଓ କଂଗ୍ରେସ । ମାଆଙ୍କୁ କିଏ କରିଛି ସଶକ୍ତ ? ଆରମ୍ଭ ହେଲା ବାକଯୁଦ୍ଧ । ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡାଙ୍କ କଥାରେ ଭରସା କରିବେ ତ ରାଜ୍ୟର ମହିଳାମାନେ । ରାଜନୈତିକ ଉଦ୍ଦେଶ୍ୟ ରଖି ମିଶନ ଶକ୍ତିର ପୁନର୍ଗଠନ ପ୍ରକ୍ରିୟାକୁ ନେଇ ସୃଷ୍ଟି ହୋଇଥିବା ଦ୍ଵନ୍ଦ୍ଵ ଦୂର କରିପାରିବ କି ସୋସିଆଲ ମିଡିଆ ପୋଷ୍ଟ ? ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନେତୃତ୍ୱରେ ୭୦ ଲକ୍ଷ ମହିଳା ମିଶନ ଶକ୍ତି ଜରିଆରେ ସଶକ୍ତ ହୋଇଥିଲେ । ମହିଳାମାନଙ୍କୁ ୫ ହଜାରରୁ ୧୫ ଲକ୍ଷ ଯାଏ ବିଭିନ୍ନ ଯୋଜନାରେ ନବୀନ ସହାୟକ ହୋଇ ସେମାନଙ୍କୁ ସ୍ବାବଲମ୍ବୀ କରିଥିଲେ । ଯାହା ବିଜେପି ସରକାର ଆସିବା ପରେ ବିଭିନ୍ନ ବାହାନା ଦେଖାଇ ମିଶନ ଶକ୍ତିକୁ ଶକ୍ତିହୀନ କରାଯାଇଛି । ସୁଭଦ୍ରା ଯୋଜନାରେ ମାତ୍ର ୫ ହଜାର ଟଙ୍କା ଦେଇ କିପରି ଲକ୍ଷପତି ଦିଦି କଲେ ତାହାର ହିସାବ ମାଗିଛି ବିଜେଡି । ବିରୋଧୀ ଦଳ ମୁଖ୍ୟ ସଚେତକ କହିଛନ୍ତି ମହିଳାମାନଙ୍କୁ ଘରର ଚାରି କାନ୍ଥରୁ ବାହାରକରି ନବୀନ ସ୍ବାବଲମ୍ବୀ କରିବା ସହ ସାମାଜିକ ଓ ଆର୍ଥିକ କ୍ଷେତ୍ରରେ ସଶକ୍ତ କରିଥିଲେ । ଏଥିରେ ବିଜେଡି, କଂଗ୍ରେସ, ବିଜେପି ସବୁ ଦଳର ମହିଳା ସାମିଲ ହୋଇଥିଲେ । ହେଲେ ଶାସନ ବଦଳିବା ପରେ ବିଜେପି ସରକାର ସ୍ବୟଂ ସହାୟକ ଗୋଷ୍ଠୀକୁ ଦଳୀୟ ଭିତ୍ତିରେ ବିଚାର କରୁଛି । ଏଥିରେ ମହିଳା କିପରି ସ୍ବାବଲମ୍ବୀ ହେବେ ବୋଲି ପ୍ରମିଳା ମଲ୍ଲିକ ପ୍ରଶ୍ନ କରିଛନ୍ତି । ତେଣୁ ଯେତେ ପୋଷ୍ଟ କଲେ ବି ମହିଳାମାନେ ବିଜେପି ସରକାରର ନେତୃତ୍ବକୁ ବିଶ୍ଵାସ କରିବେ ନାହିଁ ବୋଲି ବିଜେଡି କହିଛି ।
ସେପଟେ କଂଗ୍ରେସ ମଧ୍ୟ ସମାନ ଅଭିଯୋଗ ଆଣିଛି । ବରିଷ୍ଠ କଂଗ୍ରେସ ନେତା ସୁରେଶ ରାଉତରାୟ କହିଛନ୍ତି ନବୀନ ପଟ୍ଟନାୟକ ସ୍ବୟଂ ସହାୟକ ଗୋଷ୍ଠୀ ଜରିଆରେ ମହିଳାଙ୍କୁ ଶକ୍ତିଶାଳୀ କରିଥଲେ । ହେଲେ ବିଜେପି ୨୮ ଟଙ୍କାରେ କିପରି ଉଦ୍ଯୋଗୀ କରିବ ବୋଲି ସୁର ପ୍ରଶ୍ନ କରିଛନ୍ତି । ସେପଟେ ବିଜେପି ବିଧାୟକ ଅଶୋକ ମହାନ୍ତି କହିଛନ୍ତି ମହିଳାମାନଙ୍କୁ ସୁଭଦ୍ରା ଯୋଜନାରେ ସଶକ୍ତ କରାଯିବ । ଯାହାକୁ ନେଇ ବିଜେପି ଓ କଂଗ୍ରେସ ମୁହାଁମୁହିଁ ହୋଇଛନ୍ତି । ମିଶନ ଶକ୍ତି ପୁନର୍ଗଠନକୁ ନେଇ ସୃଷ୍ଟି ହୋଇଥିବା ଅବିଶ୍ବାସ ବାତାବରଣ ଦୂର କରିବାକୁ ସରକାର ଯେତେ ଚେଷ୍ଠା କଲେ ମଧ୍ୟ ସେଥିରେ ସଫଳ ହେଉନାହାନ୍ତି । ଯାହା ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ାଙ୍କ ସୋସିଆଲ ପୋଷ୍ଟରୁ ସ୍ପଷ୍ଟ ସଙ୍କେତ ମିଳୁଛି । ଯାହାକୁ ନେଇ ସରକାରଙ୍କୁ ଘେରିଛନ୍ତି ବିଜେଡି ଓ କଂଗ୍ରେସ ।