spot_img
Home Blog Page 900

ଆସନ୍ତାକାଲି ଆମେରିକା ରାଷ୍ଟ୍ରପତି ଟ୍ରମ୍ପ ଘୋଷଣା କରିବେ ନୂଆ ଟାରିଫ ପ୍ଲାନ: ପ୍ରଭାବିତ ହୋଇପାରେ ଭାରତ

ଓ୍ବାଶିଂଟନ: ଆମେରିକାର ନୂଆ ଟାରିଫ ପ୍ଲାନରେ କ୍ଷତିଗ୍ରସ୍ତ ହୋଇପାରେ ଭାରତ। ଆସନ୍ତାକାଲି ରାଷ୍ଟ୍ରପତି ଡୋନାଲଡ ଟ୍ରମ୍ପ ନୂଆ ଟାରିଫ ପ୍ଲାନ ଘୋଷଣା କରିବାକୁ ଯାଉଥିବାବେଳେ ଏହି ଦିବସକୁ ଆମେରିକାର ମୁକ୍ତି ଦିବସ ଭାବେ ମାନ୍ୟତା ଦିଆଯାଇଛି। କେଉଁ ରାଷ୍ଟ୍ର ଲାଗି କେତେକ ପ୍ରତିଶତ ଟାରିଫ ଲାଗିବ ତାହା ଟ୍ରମ୍ପ ଘୋଷଣା କରିବେ। ଆମେରିକୀୟ ଚାଉଳ ଉପରେ ଜାପାନର ୭୦୦ ପ୍ରତିଶତ ଟାରିଫ, ଆମେରିକୀୟ ଦୁଗ୍ଧଜାତ ସାମଗ୍ରୀ ଉପରେ ୟୁରୋପୀୟ ୟୁନିଅନର ୫୦ ପ୍ରତିଶତ ଟାରିଫ, ଆମେରିକୀୟ କୃଷିଭିତ୍ତିକ ସାମଗ୍ରୀ ଉପରେ ଭାରତର ୧୦୦ ପ୍ରତିଶତ ଟାରିଫ ଯୋଗୁ ଆମେରିକା ବିଶେଷ ଚିନ୍ତିତ ହୋଇଛି। ସେହିପରି ଆମେରିକୀୟ ଲହୁଣୀ ଓ ଘିଅ ଉପରେ କାନାଡାର ୩ ୦୦ ପ୍ରତିଶତ ଟାରିଫ ବି ଆମେରିକା ଲାଗି ଚିନ୍ତାର କାରଣ ହୋଇଛି। ସେପଟେ ଟାରିଫ ପ୍ରସଙ୍ଗ ନେଇ ଷ୍ଟକ ମାର୍କେଟ ଉପରେ ପଡ଼ିଛି ପ୍ରଭାବ। ସେନସେକ୍ସ ପ୍ରାୟ ୧ ହଜାର ପଏଣ୍ଟ ଖସିଥିବାବେଳେ ନିଫ୍ଟି ୨୨୫ ପଏଣ୍ଟ ହ୍ରାସ ପାଇଛି। ସବୁଠାରୁ ଅଧିକ କ୍ଷତି ସହିଛନ୍ତି ଆଇଟି ସେକ୍ଟର।

ଆଜିଠାରୁ ସାରା ଦେଶରେ ଲାଗୁ ହେଲା ଏହି ୫ଟି ବଡ଼ ନିୟମ

ନୂଆଦିଲ୍ଲୀ: ଏପ୍ରିଲ ପହିଲା ଅର୍ଥାତ ଆଜିଠାରୁ ସାରା ଦେଶରେ ୫ଟି ବଡ଼ ନିୟମ ଲାଗୁ ହୋଇଛି । ଏହାଫଳରେ ଗ୍ରାହକମାନେ ବହୁମାତ୍ରାରେ ପ୍ରଭାବିତ ହେବାର ସମ୍ଭାବନା ରହିଛି । ତେଣୁ କ’ଣ ସବୁ ପରିବର୍ତ୍ତନ ଘଟିଲା ତାହା ଆପଣମାନେ ନିହାତି ଜାଣିବା ଆବଶ୍ୟକ ।

(୧) ଆଜିଠାରୁ ଏଲପିଜି ସିଲିଣ୍ଡର ଦାମ୍ ହ୍ରାସ ପାଇଛି । ୧୯ କେଜି ବିଶିଷ୍ଟ କମର୍ସିଆଲ ଗ୍ୟାସ ସିଲିଣ୍ଡରର ଦାମ ଦିଲ୍ଲୀରେ ୪୧ଟା, କୋଲକତାରେ ୪୪.୫୦ ଟଙ୍କା ଶସ୍ତା ହୋଇଛି । ଘରୋଇ ଗ୍ୟାସ ସିଲିଣ୍ଡର ଦାମରେ କୌଣସି ପରିବର୍ତ୍ତନ ହୋଇନାହିଁ ।

(୨) ନୂଆ ଟ୍ୟାକ୍ସ ଇୟର ଆରମ୍ଭରୁ ନୂଆ ଟ୍ୟାକ୍ସ ସ୍ଲାବ ଲାଗୁ କରାଯାଇଛି । ବେତନଭୋଗୀ କର୍ମଚାରୀ ୭୫ ହଜାର ଟଙ୍କାର ଷ୍ଟାଣ୍ଡାର୍ଡ ଡିଡକ୍ସନ ପାଇଁ ଯୋଗ୍ୟ ହେବେ । ଏହାର ଅର୍ଥ ହେଉଛି, ୧୨.୭୫ ଲକ୍ଷ ଟଙ୍କା ପର୍ଯ୍ୟନ୍ତ ବେତନଧାରୀମାନେ ଏବେ ଟ୍ୟାକ୍ସରୁ ମୁକ୍ତି ପାଇବେ । ନୂଆ ଟ୍ୟାକ୍ସକୁ ବିକଳ୍ପ ଭାବେ ବାଛିଥିବା ଲୋକମାନେ କେବଳ ଏହାର ଫାଇଦା ଉଠାଇ ପାରିବେ ।

(୩) ନୂଆ ଟ୍ୟାକ୍ସ ସ୍ଲାବ ବ୍ୟତୀତ ଟିଡିଏସ ବିନିୟମକୁ ମଧ୍ୟ ଅପଡେଟ କରାଯାଇଛି । ଅନାବ୍ୟଶକ କଟକୁ ହ୍ରାସ କରିବା ଓ କରଦାତାଙ୍କ ପାଇଁ କ୍ୟାଶ ଫ୍ଲୋରେ ସୁଧାର ପାଇଁ ବିଭିନ୍ନ ବର୍ଗରେ ଲିମିଟ୍ ବୃଦ୍ଧି କରାଯାଇଛି । ଉଦାହରଣ ସ୍ବରୂପ- ବରିଷ୍ଠ ନାଗରିକଙ୍କ ପାଇଁ ସୁଧ ଆୟରେ ଟିଡିଏସର ସୀମା ଦୁଇଗୁଣ କରି ୧ ଲକ୍ଷ କରାଯାଇଛି ।

(୪) ନୂଆ ଟ୍ୟାକ୍ସ ବର୍ଷ ଆରମ୍ଭ ସହିତ ଏପ୍ରିଲ ପହିଲାରୁ କେନ୍ଦ୍ର କର୍ମଚାରୀଙ୍କୁ ଗ୍ୟାରେଣ୍ଟିକୃତ ପେନସନ ଦେଉଥିବା ୟୁନିଫାଏଡ ପେନସନ ସ୍କିମ ବା ୟୁପିଏସର ଶୁଭାରମ୍ଭ ହେବାକୁ ଯାଉଛି । ଆଜିଠାରୁ କେନ୍ଦ୍ର କର୍ମଚାରୀମାନେ ପୋର୍ଟାଲରେ ଆବେଦନ କରିପାରିବେ । ୟୁପିଏସ ଅଧିନରେ ସର୍ବନିମ୍ନ ପେନସନ ମାସକୁ ୧୦ ହଜାର ଟଙ୍କା ମିଳିବ ।

(୫) ଆଜିଠାରୁ ଏସବିଆଇ ଓ ପିଏନବି ସମେତ ଅନ୍ୟ ବ୍ୟାଙ୍କ ଗ୍ରାହକଙ୍କ ସେଭିଂ ଆକାଉଣ୍ଟ ପାଇଁ ସବର୍ନିମ୍ନ ବାଲାନ୍ସ ସହ ଜଡ଼ି ନିୟମ ସଂଶୋଧନ କରାଯାଇଛି । ଗ୍ରାହକଙ୍କ ପାଇଁ ମିନିମମ ବାଲାନ୍ସ ପାଇଁ ସେକ୍ଟର ଆଧାରରେ ସ୍ଥିର ହେବ । ମିନିମମ ବାଲାନ୍ସ ନରଖିଲେ ଫାଇନ ଲାଗିପାରେ ।

’ନବୀନ ପଟ୍ଟନାୟକଙ୍କ ଅମଳରେ ଅଭାବୀ ଓଡ଼ିଶା ପ୍ରଭାବୀ ରାଜ୍ୟରେ ପରିଣତ ହୋଇଥିଲା’

ଭୁବନେଶ୍ବର: ଓଡିଶା ଦିବସ ପାଇଁ ଆଲୋକମାଳାରେ ସଜେଇ ହୋଇଛି ପୂରା ରାଜଧାନୀ। ଏଜି ଛକରୁ ୟୁନିଟ-୪ ଛକ ଓ ରବୀନ୍ଦ୍ର ମଣ୍ଡପ ଛକରୁ କମିଶନରେଟ ପୋଲିସ କାର୍ଯ୍ୟାଳୟ ପର୍ଯ୍ୟନ୍ତ ରାସ୍ତା ପାର୍ଶ୍ଵକୁ ପୂରା ଆଲୋକ ମାଳାରେ ସଜା ଯାଇଛି। ଏଜି ଅଫିସ, ଜୟଦେବ ଭବନ, ଗୀତ ଗୋବିନ୍ଦ ସଦନ, ବିଧାନସଭା, ଲୋକସେବା ଭବନ, ବିଏମସି କାର୍ଯ୍ୟାଳୟ, ରବୀନ୍ଦ୍ର ମଣ୍ଡପ ସହ ବିଭିନ୍ନ ସରକାରୀ କାର୍ଯ୍ୟାଳୟକୁ ସୁସଜ୍ଜିତ କରାଯାଇଛି। ସୁନ୍ଦର ଆଲୋକମାଳାକୁ ଦେଖି ଯିଏ ରାସ୍ତାରେ ଯାଉଛି ଟିକେ ଅଟକି ଯାଇ ଫଟୋ ଉଠାଉଥିବା ଦେଖିବାକୁ ମିଳିଛି।

ଏହି ଅବସରରେ ଆଜି ସାରା ରାଜ୍ୟରେ ବିଜେଡି ପାଳୁଛି ଓଡ଼ିଶା ଦିବସ । ଓଡ଼ିଶାର ଅନେକ ବରପୁତ୍ର ମାନଙ୍କ ସଂଘର୍ଷ, ତ୍ୟାଗ, ବଳିଦାନ ଫଳରେ ୧୯୩୬ ମସିହା ଏପ୍ରିଲ ୧ ତାରିଖ ଦିନ ଭାଷା ଭିତ୍ତିରେ ଓଡ଼ିଶା ସ୍ବତନ୍ତ୍ର ପ୍ରଦେଶ ଗଠନ ହୋଇଥିଲା । ଏହି ଦିନକୁ ଓଡ଼ିଶାବାସୀଙ୍କ ପାଇଁ ଚିରସ୍ମରଣୀୟ କରିବାକୁ ଓଡ଼ିଶା ଦିବସ ଭାବେ ପାଳିତ ହେଉଛି । ବିଜୁ ଜନତା ଦଳର ସଭାପତି ନବୀନ ପଟ୍ଟନାୟକଙ୍କ ନିର୍ଦ୍ଦେଶ କ୍ରମେ, ରାଜ୍ୟର ପ୍ରତ୍ୟେକ ନିର୍ବାଚନମଣ୍ଡଳୀ ଓ ଜିଲ୍ଲା କାର୍ଯ୍ୟାଳୟରେ ବିଜେଡ଼ି ତରଫରୁ ଓଡ଼ିଶା ଦିବସ ପାଳନ କରାଯାଉଛି । ବିଜେଡି ସଭାପତି ନବୀନ ପଟ୍ଟନାୟକଙ୍କ ସଭାପତିତ୍ବରେ ଆଜି ରାଜ୍ୟ କାର୍ଯ୍ୟାଳୟ ଶଙ୍ଖ ଭବନରେ ବଡ଼ ଧୂମଧାମରେ ପାଳି ହୋଇଯାଇଛି । ଏହି ଅବସରରେ ରାଜ୍ୟର ବିକାଶ ପାଇଁ ନବୀନଙ୍କ ଅବଦାନ ସମ୍ପର୍କରେ ଆଲୋକପାତ କରିଥିଲେ ବରିଷ୍ଠ ବିଜେଡି ନେତା ଦେବୀ ମିଶ୍ର । ଓଡ଼ିଶା ଆଜି ଏକ ମଜଭୁତ ଭିତ୍ତିଭୂମି ଉପରେ ଆଗକୁ ବଢିଛି। ଓଡ଼ିଶାର ବିକାଶକୁ କେହି ରୋକିପାରିବେ ନାହିଁ। କିଛି ବର୍ଷ ପରେ ଆମେ ସ୍ବତନ୍ତ୍ର ଓଡ଼ିଶା ଗଠନର ୧୦୦ ବର୍ଷ ପୂର୍ତ୍ତି ପାଳନ କରିବା। ବିଜୁ ବାବୁଙ୍କ ସ୍ବପ୍ନ ଥିଲା ଓଡ଼ିଶାକୁ ଏସିଆର ଏକ ନମ୍ବର ରାଜ୍ୟ କରିବା ବୋଲି ନବୀନ କହିଥିଲେ ।

ଓଡ଼ିଶା ପୋଲିସ ଅଧିକ ଶକ୍ତିଶାଳୀ ହେବ: ପୋଲିସ ପ୍ରତିଷ୍ଠା ଦିବସରେ ଲୋକଙ୍କ ମନରେ ସାହସ ଦେଲେ DGP

କଟକ: କଟକ ବକ୍ସିବଜାର ରିଜର୍ଭ ପୋଲିସ ଗ୍ରାଉଣ୍ଡରେ ୯୦ ତମ ପୋଲିସ ପ୍ରତିଷ୍ଠା ଦିବସ ପାଳିତ । ଏଥିରେ ପୋଲିସ ଡିଜି ୱାଇ.ବି.ଖୁରାନିଆ ମୁଖ୍ୟ ଅତିଥି ଭାବେ ଯୋଗଦେଇ ସମ୍ମିଳିତ ପରେଡରେ ଅଭିବାଦନ ଗ୍ରହଣ କରିଥିଲେ। ଏଥିରେ ବିଭିନ୍ନ ପୋଲିସ ଜିଲ୍ଲାର ଅଧିକାରୀ ଓ ଯବାନ ମାନଙ୍କୁ ସାହାସିକତା ଓ ଅବଦାନ ପାଇଁ ପୁରସ୍କୃତ କରାଯାଉଛି। ଓଡ଼ିଶା ପୋଲିସ ଅଧିକ ଶକ୍ତିଶାଳୀ ହେବା ନେଇ ଉଦ୍ୟମ ଜାରି ରହିଛି ବୋଲି ଏହି ଅବସରରେ ଡିଜିପି କହିଥିଲେ । ଡିଜିପିଙ୍କ ଏହି ବୟାନ ଜନତାଙ୍କ ମଧ୍ୟରେ ସାହସ ଭରି ଦେଇଛି

ଓଡ଼ିଶାର ବିକାଶକୁ କେହି ରୋକି ପାରିବେ ନାହିଁ: ଓଡ଼ିଶା ଦିବସରେ ଏଭଳି କହିଲେ ବିରୋଧୀ ଦଳ ନେତା ନବୀନ

ଭୁବନେଶ୍ବର: ଓଡ଼ିଶା ଆଜି ଏକ ମଜଭୁତ ଭିତ୍ତିଭୂମି ଉପରେ ଆଗକୁ ବଢିଛି। ଓଡ଼ିଶାର ବିକାଶକୁ କେହି ରୋକିପାରିବେ ନାହିଁ। କିଛି ବର୍ଷ ପରେ ଆମେ ସ୍ବତନ୍ତ୍ର ଓଡ଼ିଶା ଗଠନର ୧୦୦ ବର୍ଷ ପୂର୍ତ୍ତି ପାଳନ କରିବା। ବିଜୁ ବାବୁଙ୍କ ସ୍ବପ୍ନ ଥିଲା ଓଡ଼ିଶାକୁ ଏସିଆର ଏକ ନମ୍ବର ରାଜ୍ୟ କରିବା। ସମସ୍ତଙ୍କ ସହଯୋଗ ରହିଲେ ଏହି ଲକ୍ଷ୍ୟ ନିଶ୍ଚୟ ପୂର୍ଣ୍ଣ ହେବ ବୋଲି କହିଛନ୍ତି ବିରୋଧୀ ଦଳ ନେତା ନବୀନ ପଟ୍ଟନାୟକ। ଓଡ଼ିଶା ଦିବସ ଅବସରରେ ଆୟୋଜିତ ସ୍ବତନ୍ତ୍ର ଉତ୍ସବରେ ଯୋଗ ଦେଇ ସେ କହିଛନ୍ତି- ଆଜି ଓଡ଼ିଶା ଦିବସ। ଆମ ସମସ୍ତଙ୍କ ପାଇଁ ଗର୍ବ ଓ ଗୌରବର ଦିବସ। ଏହି ପବିତ୍ର ଦିବସରେ ଉତ୍କଳ ଗୌରବ ମଧୁସୂଦନ ଦାସ, ପାରଳା ମହାରାଜା କୃଷ୍ଣଚନ୍ଦ୍ର ଗଜପତି, ମୟୂରଭଞ୍ଜ ମହାରାଜା ଶ୍ରୀରାମଚନ୍ଦ୍ର ଭଞ୍ଜଦେଓ, କବି ଗଙ୍ଗାଧର ମେହର, ଔପନ୍ୟାସିକ ଫକୀର ମୋହନ ସେନାପତିଙ୍କ ପରି ମହାନ ପୁରୁଷମାନଙ୍କ ପ୍ରତି ଶ୍ରଦ୍ଧାଞ୍ଜଳି।

ସ୍ବତନ୍ତ୍ର ଓଡ଼ିଶା ପ୍ରଦେଶ ଗଠନ ଭାରତ ଇତିହାସର ଏକ ଗୌରବମୟ ଅଧ୍ୟାୟ। ଓଡ଼ିଶା ହେଉଛି ଦେଶର ପ୍ରଥମ ଭାଷାଭିତ୍ତିକ ରାଜ୍ୟ। ପୂର୍ବସୁରୀମାନଙ୍କ ଲକ୍ଷ୍ୟ ଥିଲା ଏକ ସ୍ବାଭିମାନ ଓଡ଼ିଶା ଗଠନ। ଦେଶର ବିକାଶରେ ଓଡ଼ିଶାର ଗୁରୁତ୍ବପୂର୍ଣ୍ଣ ଭୂମିକା ରହିଛି। ଓଡ଼ିଶା ନୂଆ ପରିଚୟ ପାଇଛି। ଓଡ଼ିଆମାନେ ଦେଶ ବିଦେଶରେ ଓଡ଼ିଶାର ପରିଚୟକୁ ଗରିମାମୟ କରିଛନ୍ତି। ୨୦୦୦ରୁ ୨୦୨୪ ଥିଲା ଓଡ଼ିଶା ବିକାଶର ନୂଆ ଯୁଗ। ଓଡ଼ିଆ ଭାଷାକୁ ଶାସ୍ତ୍ରୀୟ ମାନ୍ୟତା, ଓଡ଼ିଆ ବିଶ୍ବବିଦ୍ୟାଳୟ ପ୍ରତିଷ୍ଠା, ବିଭିନ୍ନ ବିଶ୍ବବିଦ୍ୟାଳୟରେ ଓଡ଼ିଆ ଭାଷା ଉପରେ ଗବେଷଣା କରିବା ଲାଗି ଚେୟାର ପ୍ରତିଷ୍ଠା ହୋଇଛି। କୃଷିଭିତ୍ତିଭୂମି, ଅର୍ଥନୀତି, ନିର୍ବେଶ, ବିପର୍ଯ୍ୟୟ ପରିଚାଳନା,ଶିକ୍ଷା, ସ୍ବାସ୍ଥ୍ୟ ସହିତ ବିକାଶ ସମ୍ଭବ ହୋଇିଥିଲା। ଏ ସବୁଥିରେ ଓଡ଼ିଶା ଆଗରେ ରହିଥିଲା। ସବୁଠାରୁ ବଡ଼ ସଫଳତା ହେଉଛି ଗରିବୀ ହଟିବା। ରାଜ୍ୟରେ ୭୦ ପ୍ରତିଶତରୁ ୧୦ ପ୍ରତିଶତକୁ ହଟିଥିଲା ଗରିବୀ। ଉତ୍କଳ ଗୌରବ ମଧୁସୂଦନ ଦାସ ଓ ଉତ୍କଳମଣି ଗୋପବନ୍ଧୁ ଦାସଙ୍କ ଜନ୍ମପୀଠର ବିକାଶ ଓଡ଼ିଆ ସ୍ବାଭିମାନର ଜୟଗାନ କରୁଛି ବୋଲି କହିଥିଲେ ନବୀନ।

କଟକରେ ଭୟଙ୍କର ଅଗ୍ନିକାଣ୍ଡ: ନିଆଁକୁ ଆୟତ୍ତ କରୁଛି ଅଗ୍ନିଶମ ବାହିନୀ

କଟକ: କଟକର ଏକ ସୁଟକେସ ସୋ’ ରୁମ ସହିତ କପଡ଼ା ଗୋଦାମରେ ଭୟଙ୍କର ଅଗ୍ନିକାଣ୍ଡ । ଦୋଳମୁଣ୍ଡାଇ ସ୍ଥିତ ସୋ’ ରୁମ କପଡ଼ା ଗୋଦାମରେ ଲାଗିଛି ନିଆଁ ।
ଅଗ୍ନିକାଣ୍ଡର କାରଣ ଜଣାପଡ଼ିନଥିବା ବେଳେ ସୋରୁମ୍ ଭିତରେ ନିଆଁ ଜଳୁଥିବା ବେଳେ ପ୍ରବଳ ଧୂଆଁ ବାହାରୁଛି । ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିବାକୁ ଅଗ୍ନିଶମ ବାହିନୀ ଉଦ୍ୟମ କରୁଛି।

ତେଲକୋଇରେ ଆଦିବାସୀ ନାବାଳିକାଙ୍କୁ ଗଣଦୁଷ୍କର୍ମ: ଦୁଇ ନାବାଳକଙ୍କ ସମେତ ଅନ୍ୟ ଦୁଇ ଜଣ ଅଟକ

ତେଲକୋଇ: ତେଲକୋଇ କାଳିଆହତା ଫାଣ୍ଡି ଅଞ୍ଚଳରେ ଆଦିବାସୀ ନାବାଳିକାକୁ ଗଣଦୁଷ୍କର୍ମ । ତେଲକୋଇ ଥାନାରେ ଅଭିଯୋଗ ପରେ ତଦନ୍ତ ଆରମ୍ଭ କରିଛି ପୋଲିସ । ଏହି ଘଟଣାରେ ସମ୍ପୃକ୍ତ ଅଭିଯୋଗରେ ଦୁଇ ନାବାଳକ ସହିତ ଅନ୍ୟ ଦୁଇଜଣଙ୍କୁ ଅଟକ ରଖି ତଦନ୍ତ କରୁଛି ତେଲକୋଇ ପୋଲିସ।

ପାରାୟଣ ବେଳେ ମହାପ୍ରୟାଣ: ପ୍ରବଚନ ଦେବା ବେଳେ ଚାଲିଗଲା ପ୍ରବଚକଙ୍କ ଜୀବନ

ଭଦ୍ରକ: ପ୍ରବଚନ ଦେବା ବେଳେ ଚାଲିଗଲା ଜୀବନ । ଅଧ୍ୟାପକ ତଥା ରାମ ଚରିତ ମାନସ ପ୍ରବଚକ ଗୋପାଳ ପ୍ରସାଦ ବେଜଙ୍କ ମୃତ୍ୟୁ । ଏଭଳି ଘଟଣା ଘଟିଛି ଭଦ୍ରକ ବ୍ଲକ ସାହାଡ଼ା ପଞ୍ଚାୟତରେ। ହନୁମାନ ମନ୍ଦିର ପ୍ରାଙ୍ଗଣରେ ତିନି ଦିନ ଧରି ଶ୍ରୀରାମ ଚରିତ ମାନସ ନବାହ୍ନ ପାରାୟଣ ଓ ପ୍ରବଚନ କାର୍ଯ୍ୟକ୍ରମ ଆୟୋଜିତ ହୋଇଥିଲା । ଯେଉଁଥିରେ ପ୍ରବଚକ ଭାବରେ ଯୋଗଦେଇଥିଲେ ହନୁମାନ ମନ୍ଦିର ପାଖରେ ବାସୁଦେବପୁର ବ୍ଲକ ଆଢୁଆଁ ଧାତାପୁରର ବିଶିଷ୍ଟ ପ୍ରବଚକ ତଥା ଅଧ୍ୟାପକ ଗୋପାଳ ପ୍ରଶାଦ ବେଜ । ତେବେ ଗତକାଲି ଦ୍ଵିତୀୟ ଦିବସ ସନ୍ଧ୍ୟାରେ ପ୍ରବଚନ ଦେଉଥିବା ବେଳେ ସେ ହଠାତ ଅସୁସ୍ଥ ହୋଇପଡ଼ିଥିଲେ। ପରେ ତାଙ୍କର ସହଯୋଗୀମାନେ ତାଙ୍କୁ ଭଦ୍ରକ ମେଡିକାଲକୁ ନେଇଆସିଥିଲେ। ମାତ୍ର ମାଡିକାଲରେ ଡାକ୍ତର ଗୋପାଳଙ୍କୁ ମୃତ ଘୋଷଣା କରିଥିଲେ। ଯାହାକୁ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି।

ଆଜିଠୁ ବଦଳିବ ପାଗ: ଘଡ଼ଘଡି ସହ ବୃଷ୍ଟିପାତ ନେଇ ୧୦ ଜିଲ୍ଲାକୁ ସତର୍କତା ଜାରି କଲା ପାଣିପାଗ କେନ୍ଦ୍ର

ଭୁବନେଶ୍ବର: ଆଜିଠୁ ବଦଳିବ ପାଗ। ଗରମରୁ ଆଶ୍ଵସ୍ତି ଦେବ କାଳ ବୈଶାଖୀ ବର୍ଷା। ଘଡ଼ଘଡି ସହ ବୃଷ୍ଟିପାତ ନେଇ ୧୦ ଜିଲ୍ଲାକୁ ସତର୍କତା ଜାରି କରିଛି ପାଣିପାଗ କେନ୍ଦ୍ର । ମୟୂରଭଞ୍ଜ, କେନ୍ଦୁଝର,ଅନୁଗୁଳ, ବୌଦ୍ଧ, ଖୋର୍ଦ୍ଧା, କଳାହାଣ୍ଡି, ରାୟଗଡା, ନବରଙ୍ଗପୁର,କୋରାପୁଟ, ଓ ମାଲାକନଗିରି ଜିଲା ମାନଙ୍କରେ ବିଜୁଳି ଘଡ଼ଘଡ଼ି ବର୍ଷା ହେବାନେଇ ଅନୁମାନ କରାଯାଉଛି । ଏହି ସମୟରେ ୩୦ ରୁ ୪୦ କିଲୋମିଟର ବେଗରେ ପବନ ବହିବାର ସମ୍ଭାବନା ରହିଛି ।ସେପଟେ ସମ୍ବଲପୁରରେ ସର୍ବୋଚ୍ଚ ତାପମାତ୍ରା ୪୨.୧ ଡିଗ୍ରୀ ରେକର୍ଡ କରାଯାଇଥିବା ବେଳେ ଝାରସୁଗୁଡାରେ 42°C ରେକର୍ଡ କରାଯାଇଛି । ଚଳିତ ଅପ୍ରେଲରେ ରାଜ୍ୟରେ ଅସହ୍ୟ ତାତି ଅନୁଭବ ହୋଇପାରେ । ସ୍ୱାଭାବିକ ଠାରୁ ଅଧିକ ଦିନ ଗ୍ରୀଷ୍ମପ୍ରବାହ ଅନୁମାନ କରିଛି ପାଣିପାଗ କେନ୍ଦ୍ର ।

ଆଜି ସାରା ରାଜ୍ୟରେ ବିଜେଡି ପାଳୁଛି ଓଡ଼ିଶା ଦିବସ

ଭୁବନେଶ୍ବର: ଆଜି ସାରା ରାଜ୍ୟରେ ବିଜେଡି ପାଳୁଛି ଓଡ଼ିଶା ଦିବସ । ଓଡ଼ିଶାର ଅନେକ ବରପୁତ୍ର ମାନଙ୍କ ସଂଘର୍ଷ, ତ୍ୟାଗ, ବଳିଦାନ ଫଳରେ ୧୯୩୬ ମସିହା ଏପ୍ରିଲ ୧ ତାରିଖ ଦିନ ଭାଷା ଭିତ୍ତିରେ ଓଡ଼ିଶା ସ୍ବତନ୍ତ୍ର ପ୍ରଦେଶ ଗଠନ ହୋଇଥିଲା । ଏହି ଦିନକୁ ଓଡ଼ିଶାବାସୀଙ୍କ ପାଇଁ ଚିରସ୍ମରଣୀୟ କରିବାକୁ ଓଡ଼ିଶା ଦିବସ ଭାବେ ପାଳିତ ହେଉଛି । ବିଜୁ ଜନତା ଦଳର ସଭାପତି ନବୀନ ପଟ୍ଟନାୟକଙ୍କ ନିର୍ଦ୍ଦେଶ କ୍ରମେ, ରାଜ୍ୟର ପ୍ରତ୍ୟେକ ନିର୍ବାଚନମଣ୍ଡଳୀ ଓ ଜିଲ୍ଲା କାର୍ଯ୍ୟାଳୟରେ ବିଜେଡ଼ି ତରଫରୁ ଓଡ଼ିଶା ଦିବସ ପାଳନ କରାଯାଉଛି । ସ୍ବତନ୍ତ୍ର ଓଡ଼ିଶା ପ୍ରଦେଶ ଗଠନରେ ଅଗ୍ରଣୀ ଭୂମିକା ନିର୍ବାହ କରିଥିବା ବରପୁତ୍ରମାନଙ୍କ ଫଟୋଚିତ୍ରରେ ମାଲ୍ୟାର୍ପଣ କରିବା ସହିତ ସେମାନଙ୍କ ଅବଦାନ ବିଷୟରେ ଆଲୋଚନା କରାଯିବ । ନିଜ ନିଜ ଅଞ୍ଚଳରେ ଓଡ଼ିଶା ଦିବସ କାର୍ଯ୍ୟକ୍ରମର ଫଟୋ ଓ ଭିଡିଓ ଶଙ୍ଖଭବନକୁ ପଠାଇବାକୁ ସମସ୍ତ ବିଧାୟକ, ସାଂସଦ, ନିର୍ବାଚନମଣ୍ଡଳୀ ନେତୃତ୍ବ, ଜିଲ୍ଲା ପରିଷଦ ସଭାପତି, ପୌରାଧ୍ୟକ୍ଷଙ୍କ ସହିତ ଯୁବ, ଛାତ୍ର, ମହିଳା, କୃଷକ, ଶ୍ରମିକ ସଙ୍ଗଠନର ଆବାହକମାନଙ୍କୁ ଚିଠି କରାଯାଇଛି ।