ବଲାଙ୍ଗୀର: ବଲାଙ୍ଗୀରରେ ପୁଣି ଗଡିଲା ମୁଣ୍ଡ। ବଲାଙ୍ଗୀର ବିଷ୍ଣୁମୁଣ୍ଡା ଗାଁରେ ଛକରେ ଘଟିଛି ଅଘଟଣ। ଜମି ବ୍ୟାପାରକୁ କେନ୍ଦ୍ର କରି ପାନ ଦୋକାନୀଙ୍କୁ ହତ୍ୟା କରାଯାଇଛି I ମୃତ ଦୋକାନୀ ଜଣଙ୍କ ହେଲେ ମନୋଜ ନାଏକ । ଟାଙ୍ଗିଆରେ ତାଙ୍କୁ ଆକ୍ରମଣ କରାଯାଇଥିବା ସୂଚନା ମିଳିଛି । ଭୀମଭୋଇ ମେଡିକାଲରେ ମନୋଜଙ୍କୁ ଭର୍ତ୍ତି କରାଯାଇଥିଲା । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି । ଖବରପାଇ ଟାଉନ୍ ଥାନା ପୁଲିସର ଛାନବିନ୍ ଆରମ୍ଭ କରିଛି ।
ରାଜ୍ୟ ବିଜେପିରେ ଗୋଷ୍ଠୀ ବିବାଦ ତୀବ୍ର, ସୀମା ଟପିଲାଣି ନେତାଙ୍କ ଅହଙ୍କାର
ଭୁବନେଶ୍ୱର: ବିଜେପିରେ ଗୋଷ୍ଠୀବିବାଦ ତୀବ୍ରରୂପ ଧାରଣ କରିଛି। କ୍ଷମତାକୁ ଆସିବା ପରେ ନେତାଙ୍କ ଅହଙ୍କାର ବଢିଛି। ରାଷ୍ଟ୍ରୀୟ ଅଧ୍ୟକ୍ଷ ନଡ୍ଡାଙ୍କ ତାଗିଦ ପରେ ପଦାକୁ ଆସିଛି ବିଜେପିର ଭିତିରି କଥା। ଗୋଷ୍ଠୀ ବିବାଦ ସାଂଘାତିକ ଅବସ୍ଥାରେ ଥିବାରୁ ଦଳରେ ସ୍ଥାଣୁତା ଓ ସରକାରରେ ନିଷ୍କ୍ରିୟତା ଜାରି ରହିଛି। ୧୦ ମାସ ପରେ ବି ଜିଲ୍ଲା ଯୋଜନା କମିଟି, ସ୍ବତନ୍ତ୍ର ଉନ୍ନୟନ ପରିଷଦ, ରାଜ୍ୟ ଯୋଜନା ବୋର୍ଡ଼, ବିଭିନ୍ନ ବିଭାଗରେ ଉପଦେଷ୍ଟା, ନିଗମରେ ନିଯୁକ୍ତି ହୋଇପାରୁନି। ମନ୍ତ୍ରିମଣ୍ଡଳ ସଂପ୍ରସାରଣର ଅଙ୍କ ବି ଛିଡୁନି। ଜିଲ୍ଲା ସ୍ତରରେ ସରକାରୀ ଓକିଲ ନିଯୁକ୍ତି ହୋଇପାରୁନାହାନ୍ତି। ବିଭିନ୍ନ ଏକାଡ଼େମୀରେ ମୁଖିଆ ପଦ ଖାଲି ପଡ଼ିଛି। ଏପରିକି ବିଜେପି ରାଜ୍ୟ ସଭାପତି ଚୟନ ବି ଘୁଞ୍ଚି ଘୁଞ୍ଚି ଚାଲିଛି। ଏଭଳି ଅବସ୍ଥାରେ ଦଳର କର୍ମୀ ଓ ନେତାଙ୍କ ଧୈର୍ଯ୍ୟଚ୍ୟୁତି ଘଟିଲାଣି। ଏସବୁ ପଛର କାରଣ ହେଉଛି ଦଳ ଭିତରେ ଅସ୍ଥିରତା ଓ ମନମାନୀ।
ଏଯାଏଁ ସମ୍ବଲପୁର ଜିଲ୍ଲା ସଭାପତି ଚୂଡ଼ାନ୍ତ ହୋଇପାରିନି। ଏଠି ବି ଚାଲିଛି ନେତାଙ୍କ ମଧ୍ୟରେ ପତିଆରା ଲଢେଇ। ମନମୋହନ ସାମଲ ପୁଣି ଥରେ ରାଜ୍ୟ ସଭାପତି ଭାବେ ନିର୍ବାଚିତ ହେଉଛନ୍ତି ବୋଲି କିଛି ଦିନ ତଳେ ଚର୍ଚ୍ଚା ହେଉଥିଲା। ଏବେ ତାହା ଫିକା ପଡ଼ିଗଲାଣି। ଚର୍ଚ୍ଚା ହେଉଛି ବିଜେପିରେ ତୀବ୍ର ଗୋଷ୍ଠୀ ବିବାଦ ଯୋଗୁଁ ସଭାପତି ଅଙ୍କ ଛିଡୁନାହିଁ। ମନ୍ତ୍ରିମଣ୍ଡଳ ସଂପ୍ରସାରଣ ପାଇଁ ମୁଖ୍ୟମନ୍ତ୍ରୀ ପ୍ରସ୍ତୁତ ଥିବା ବେଳେ ଦୁଇ ମନ୍ତ୍ରୀଙ୍କୁ ବାଦ୍ ଦେବାକୁ ଇଚ୍ଛା ପ୍ରକାଶ କରିଥିବା ଭିତିରି ମହଲରୁ ଶୁଣିବାକୁ ମିଳୁଛି। ହେଲେ ଏଥିପାଇଁ ବି ଗ୍ରୀନ ସିଗନାଲ ମିଳୁନାହିଁ। ଏଥିରେ ଦଳୀୟ ନେତାଙ୍କ ମଧ୍ୟରେ ସହମତି ହୋଇପାରୁନଥିବାରୁ ଏଥିରେ ବିଳମ୍ବ ହେଉଛି। ୧୦ ମାସରେ ଦଳ ଓ ସରକାରର ସ୍ଥାଣୁତା ପାଇଁ ଦଳରେ ଗୋଷ୍ଠୀବାଦ ଓ ଅବିଶ୍ବାସର ବାତାବରଣ ଦାୟୀ ବୋଲି ସମୀକ୍ଷକ ଅନୁମାନ କରିଛନ୍ତି।
ସଙ୍ଗଠନରେ ଦ୍ଵନ୍ଦ୍ଵ, ସରକାର ନିଷ୍କ୍ରିୟ। ରାଜ୍ୟ ସଭାପତି ଚୟନ ପଦ୍ମ ଯେପରି ଘୁଞ୍ଚି ଘୁଞ୍ଚି ଚାଲିଛି, ନିଗମ ଓ ବୋର୍ଡ଼ ନିଯୁକ୍ତି ସେତିକି ବିଳମ୍ବିତ ହେଉଛି। ନିଜର ପତିଆରା ଦେଖାଇବାକୁ ଦଳ ଭିତରେ ଥିବା ଗୋଷ୍ଠୀର ଛକାପଞ୍ଝା ବଡ଼ ସମସ୍ୟା ଭାବେ ଉଭା ହୋଇଛି। ଗୋଷ୍ଠୀବାଦ ସମସ୍ୟା କଥା କେନ୍ଦ୍ରୀୟ ନେତୃତ୍ବଙ୍କୁ ଜଣାଥିଲେ ବି ସମାଧାନର ବାଟ କିଛି ବାହାରି ପାରୁନାହିଁ।
କାଳିଆ ଦର୍ଶନ ପାଇଁ କଲବଲ ଭକ୍ତ, ତିକ୍ତ ଅନୁଭୂତି ନେଇ ଫେରୁଛନ୍ତି ଲୋକେ
ପୁରୀ: କାଳିଆ ଦର୍ଶନ ପାଇଁ କଲବଲ ଭକ୍ତ । ପ୍ରବଳ ଖରା ସାଙ୍ଗକୁ ଲମ୍ବା ଲାଇନ୍ ଲାଗୁଛି । ତିକ୍ତ ଅନୁଭୂତି ନେଇ ଫେରୁଛନ୍ତି ଶ୍ରଦ୍ଧାଳୁ। ଦିନକୁ ଦିନ ପୁରୀ ଶ୍ରୀମନ୍ଦିରରେ ଶ୍ରଦ୍ଧାଳୁଙ୍କ ସଂଖ୍ୟା ବଢିବାରେ ଲାଗିଥିବାବେଳେ ଦର୍ଶନ ସୁବିଧା ନଥିବାରୁ ଅଣନିଶ୍ବାସୀ ହେଉଛନ୍ତି ଶ୍ରଦ୍ଧାଳୁ । ୪ ଦ୍ବାର ଦେଇ ପ୍ରବେଶ ଅନୁମତି ମିଳିଛି, କିନ୍ତୁ ଭିତରେ ପ୍ରବଳ ଗହଳି ଯୋଗୁଁ ଲମ୍ବା ଧାଡ଼ିରେ ଠିଆହୋଇ କଲବଲ ହେଉଛନ୍ତି ଶ୍ରଦ୍ଧାଳୁ। ବାରମ୍ବାର ଦାବି ସତ୍ତ୍ବେ ପ୍ରଶାସନ ଏ ଦିଗରେ ପଦକ୍ଷେପ ନେଉ ନଥିବାରୁ ତେଜୁଛି ଅସନ୍ତୋଷ। କେବଳ ପ୍ରତିଶ୍ରୁତି ମିଳୁଛି, ହେଲେ କୌଣସି ବ୍ୟବସ୍ଥା କରାଯାଉ ନଥିବା ଅଭିଯୋଗ କରିଛନ୍ତି।
ପୂର୍ବ ସରକାର ସମୟରେ ଭକ୍ତଙ୍କ ଦର୍ଶନ ନେଇ ସ୍ୱତନ୍ତ୍ର ଏସି ସେଡର ବ୍ୟବସ୍ଥା ରହିଥିଲା। ଏହାଦ୍ବାରା ଖରା ସତ୍ତ୍ବେ ଶାନ୍ତିରେ ଦର୍ଶନ କରୁଥିଲେ ଶ୍ରଦ୍ଧାଳୁ। ଏପରିକି ସେଡ ଭିତରେ ପାଣି ଓ ବିଶ୍ରାମ ପାଇଁ ମଧ୍ୟ ବ୍ୟବସ୍ଥା ରହିଥିଲା। ଏବେ ସେଡ ହଟିବା ପରେ ଖରାରେ ଆଉଟୁପାଉଟୁ ହେଉଛନ୍ତି ଶ୍ରଦ୍ଧାଳୁ। ତେବେ ଖୁବଶୀଘ୍ର ସମସ୍ୟାର ସମାଧାନ କରିବା ନେଇ ଆଇନମନ୍ତ୍ରୀ ପ୍ରତିଶ୍ରୁତି ଦେଇଛନ୍ତି । ନାଟ ମଣ୍ଡପ ଧାଡି ଦର୍ଶନ ବ୍ୟବସ୍ଥା ଆରମ୍ଭ କରାଯାଇ ଏହି ସମସ୍ୟାର ସମାଧାନ କରାଯିବ ବୋଲି ସୂଚନା ଦେଇଛନ୍ତି ମନ୍ତ୍ରୀ।
ଶ୍ରୀମନ୍ଦିରର ଦର୍ଶନ ବ୍ୟବସ୍ଥାକୁ ନେଇ ବାରମ୍ବାର ଚର୍ଚ୍ଚା ହେଉଥିବା ସତ୍ୱେ ସରକାର ପଦକ୍ଷେପ ନେଉ ନଥିବାରୁ ତିକ୍ତ ଅନୁଭୂତି ନେଇ ଫେରୁଛନ୍ତି ଶ୍ରଦ୍ଧାଳୁ ।
ପ୍ରଣବଙ୍କ ଉପରେ ଆକ୍ରମଣ: ନବୀନଙ୍କ ନିନ୍ଦା
ଭୁବନେଶ୍ୱର: ଧର୍ମଶାଳାର ପୂର୍ବତନ ବିଧାୟକ ତଥା ବିଜୁ ଜନତା ଦଳର ଯୁବ ନେତା ପ୍ରଣବ ବଳବନ୍ତରାୟଙ୍କ ଉପରେ ଆକ୍ରମଣକୁ କଡ଼ା ଭାଷାରେ ନିନ୍ଦା କରିଛନ୍ତି ବିରୋଧୀ ଦଳ ନେତା ତଥା ବିଜେଡି ସୁପ୍ରିମୋ ନବୀନ ପଟ୍ଟନାୟକ। ସୋସିଆଲ ମିଡିଆ ଏକ୍ସରେ ସେ ଲେଖିଛନ୍ତି, ପ୍ରଣବ ବଳବନ୍ତରାୟଙ୍କ ଉପରେ ଖୋଲା ଦିବାଲୋକରେ ସଂଘବଦ୍ଧ ଆକ୍ରମଣ ରାଜ୍ୟରେ ବିପର୍ଯ୍ୟସ୍ତ ଆଇନ ଶୃଙ୍ଖଳାକୁ ଦର୍ଶାଉଛି। ଜନ ପ୍ରତିନିଧିମାନେ ଯଦି ରାଜ୍ୟରେ ଅସୁରକ୍ଷିତ, ତେବେ ସାଧାରଣ ଲୋକଙ୍କ ସୁରକ୍ଷା ଉପରେ ବିରାଟ ପ୍ରଶ୍ନବାଚୀ ସୃଷ୍ଟି ହେଉଛି। ଅସାମାଜିକ ବ୍ୟକ୍ତି ତଥା କାର୍ଯ୍ୟକଳାପକୁ ରୋକିବାରେ ରାଜ୍ୟ ସରକାରଙ୍କ ନିଷ୍କ୍ରିୟତା, ସ୍ଥାଣୁ ତଥା ଏକପାଖିଆ ମନୋଭାବ ଏପରି ଘଟଣାକୁ ଆହୁରି ପ୍ରୋତ୍ସାହିତ କରୁଛି। ସରକାର ରାଜନୈତିକ ହିଂସାକୁ ପ୍ରୋତ୍ସାହିତ ନ କରି ତୁରନ୍ତ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରନ୍ତୁ ବୋଲି ଦାବି କରିଛନ୍ତି ନବୀନ ପଟ୍ଟନାୟକ।
ପ୍ରଣବଙ୍କୁ ଟାର୍ଗେଟ କରି ଦୁର୍ବୃତ୍ତମାନେ ଆକ୍ରମଣ କରିଥିଲେ: ବିଜେଡି
ଭୁବନେଶ୍ୱର: ରାଜ୍ୟରେ ଚାଲିଛି ଗୁଣ୍ଡାରାଜ। ପୋଲିସ ଉପସ୍ଥିତିରେ ଅସାମାଜିକ ବ୍ୟକ୍ତି କରୁଛନ୍ତି ଆକ୍ରମଣ। ପୂର୍ବତନ ବିଧାୟକ ତଥା ବରିଷ୍ଠ ବିଜେଡି ନେତା ପ୍ରଣବ ବଳବନ୍ତରାୟଙ୍କ ଉପରେ ହୋଇଥିବା ଆକ୍ରମଣ ନେଇ ବର୍ଷିଛି ବିଜେଡି। ଦଳ କହିଛି-ପୂର୍ବତନ ବିଜେଡି ବିଧାୟକ ପ୍ରଣବ ବଳବନ୍ତରାୟଙ୍କ ଉପରେ ସଂଘବଦ୍ଧ ଆକ୍ରମଣ ହୋଇଛି। ସମସ୍ତ ଆକ୍ରମଣକାରୀ ବିଜେପିର ଓ ବିଧାୟକଙ୍କ ସହଯୋଗୀ। ବିଜେପି ରାଜ୍ୟ ସଭାପତିଙ୍କ ବି ସେମାନଙ୍କର ସମ୍ପର୍କ ରହିଛି। ଆକ୍ରମଣକାରୀମାନେ ଗତକାଲି ରାତିରୁ ପ୍ରସ୍ତୁତି କରିଥିଲେ। ଏପରିକି ମଦମାଂସ ଦିଆଯାଇ ଆକ୍ରମଣକାରୀଙ୍କୁ ପ୍ରସ୍ତୁତ କରାଯାଇଥିଲା।
ପ୍ରଣବଙ୍କୁ ଟାର୍ଗେଟ କରି ଦୁର୍ବୃତ୍ତମାନେ ଆକ୍ରମଣ କରିଥିଲେ। ସବୁଠାରୁ ବଡ଼ କଥା ହେଲା ସମସ୍ତ ଘଟଣା ପୋଲିସ ଉପସ୍ଥିତିରେ ହୋଇଛି। ପ୍ରଣବଙ୍କୁ ଜୀବନରେ ମାରିଦେବାକୁ ଲକ୍ଷ୍ୟ ଥିଲା। ସେମାନଙ୍କ ନିକଟରୁ ଭୁଜାଲି, ଠେଙ୍ଗା, ବାଡ଼ି ଆଦି ପୋଲିସ ଜବତ କରିଛି। ସମ୍ପୂର୍ଣ୍ଣ ଆକ୍ରମଣର ଦୃଶ୍ୟ ସିସିଟିଭିରେ କଏଦ ହୋଇଛି । ଆକ୍ରମଣକାରୀମାନେ ସ୍ଥାନୀୟ ବିଧାୟକଙ୍କ ସହଯୋଗୀ ବୋଲି ଦଳ କହିଛି। ନିର୍ବାଚନ ପରଠାରୁ ପ୍ରଣବଙ୍କ ଉପରେ ଘନ ଘନ ଆକ୍ରମଣ କରାଯାଇଛି। ଚାରି ଚାରି ଥର ଏଫଆଇଆର ଦେବା ପରେ ବି ପୋଲିସର କିଛି ପ୍ରତିକ୍ରିୟା ନାହିଁ। ଜିଲ୍ଲା ପୋଲିସ ଉପରେ ସମ୍ପୂର୍ଣ୍ଣ ବିଶ୍ବାସ ତୁଟିଯାଇଛି। ପୋଲିସ ଜାଣତରେ ସବୁକିଛି ଆକ୍ରମଣ ହୋଇଛି। ଆକ୍ରମଣ ବେଳେ ଏନେଇ ପ୍ରଣବ ଏସପିଙ୍କୁ ଅବଗତ କରିଥିଲେ ବି କିଛି ଫଳ ମିଳି ନଥିଲା ବୋଲି କହିଛି ବିଜେଡି।
ଚାଲବାଜ୍ ମହିଳାଙ୍କ ଚାଲାକି ଦେଖି ତାଜୁବ ପୋଲିସ, ଖାକି ପିନ୍ଧି ପୋଲିସ ବେଶରେ ପୋଲିସକୁ ଦେଉଥିଲା ଚକମା
କେନ୍ଦୁଝର: ବନ୍ଧୁ ସାଜିଲା ବଇରୀ । ସୋସିଆଲ ମିଡ଼ିଆ ବନ୍ଧୁତ୍ୱ ହେଲା କାଳ । ଫେସବୁକରେ ବନ୍ଧୁତା କରୁଥିଲେ ସାବଧାନ । ବନ୍ଧୁତା ଆଳରେ ଠକେଇ କରୁଥିବା ଠକଙ୍କ ଠାରୁ ଦୂରେଇ ରୁହନ୍ତୁ । ପ୍ରଥମେ ନିଜର ଦାରିଦ୍ର୍ୟ ଓ ସ୍ୱାସ୍ଥ୍ୟ ଗତ ଅସୁବିଧା ଜଣାଇ ଟଙ୍କା ଟଙ୍କା ନେଉଛନ୍ତି ଓ ପରେ ଟଙ୍କା ମାଗିଲେ ଧମକ ଦେଉଛନ୍ତି ।
ଚାଲବାଜ୍ ମହିଳାଙ୍କ ଚାଲାକି ଦେଖି ତାଜୁବ ପୋଲିସ । ଖାକି ପିନ୍ଧି ପୋଲିସ ବେଶରେ ପୋଲିସକୁ ଦେଉଥିଲା ଚକମା । କେନ୍ଦୁଝରରୁ କରିତକର୍ମା ମହିଳାକୁ ବାନ୍ଧିଲା କମିଶନରେଟ ପୋଲିସ। ଏଭଳି ଏକ ଘଟଣାରେ ସାଇବର ଥାନା ପୋଲିସ ସଂଯୁକ୍ତା ଭୂୟାଁକୁ ଗିରଫ କରିଛି । ଫେସବୁକରେ ବନ୍ଧୁତା ଯୋଗୁଁ ଚନ୍ଦକା ଥାନା ଅନ୍ଧାରୁଆ ଦାସପୁରର ବିଷ୍ଣୁ ପ୍ରସାଦ ମୁଦୁଲି ୮ ଲକ୍ଷ ୭୫ ହଜାର ଟଙ୍କା ଠକେଇର ଶିକାର ହୋଇଥିଲେ। ଯାହାକୁ ନେଇ ସାଇବର ଥାନାରେ ଅଭିଯୋଗ ପରେ ମଧ୍ୟ ପୋଲିସ ନଶୁଣିବାରୁ ଗତ ଶୁକ୍ରବାର ପୋଲିସ କମିଶନରଙ୍କ ଦ୍ୱାରସ୍ଥ ହୋଇଥିଲେ ପରିବାରବର୍ଗ। ଠକ ମହିଳା ଜଣଙ୍କ ପ୍ରୋଫାଇରେ ପୋଲିସ ଆଇଆଇସିଙ୍କ ଫଟୋ ରଖି ଠକେଇ କରୁଥିବା ଜାଣିବାକୁ ପାଇଛି ପୋଲିସ।
ପୋଲିସର ସୂଚନା ମୁତାବକ ଜାନୁଆରୀ ୨୭ ତାରିଖ ଦିନ ସାଇବର ଥାନାରେ ଏନେଇ ଏତଲା ହୋଇଥିଲା। କରିତକର୍ମା ମହିଳା ଜଣଙ୍କ ନିଜକୁ କେନ୍ଦୁଝର ଟାଉନ ଥାନା ଅଧିକାରୀ କହୁଥିଲେ। ଏପରିକି ବାରମ୍ବାର ଟଙ୍କା ମାଗି ଫୋନ କଲେ ଜୀବନରୁ ମାରିଦେବାକୁ ଧମକ ଦେଉଥିଲେ । ସେପଟେ ଅଭିଯୁକ୍ତ ମହିଳାଙ୍କ ସ୍ୱାମୀ ଜଣେ ପୋଲିସ କନଷ୍ଟେବଳ ବୋଲି ଜାଣିବା ପରେ କମିଶନରେଟ ପୋଲିସର ଅକଲ ଗୁଡୁମ ହୋଇଛି । ତେବେ ମହିଳା ଜଣଙ୍କୁ ରିମାଣ୍ଡରେ ଆଣିବା ପରେ ସେ ଏହିଭଳି ଆଉ କାହାକୁ ଠକିଛନ୍ତି କି ନାହିଁ ସେ ନେଇ ଅଧିକ ତଥ୍ୟ ମିଳିବ ବୋଲି କହିଛନ୍ତି ଏସିପି।
ଲାଗିଛି ଷ୍ଟାଣ୍ଡପୋଷ୍ଟ, ଆସୁନି ପାଣି: ଜଳକଷ୍ଟ ଭୋଗୁଛନ୍ତି ଗ୍ରାମବାସୀ
କେନ୍ଦୁଝର: ପ୍ରତି ଘର ଆଗରେ ଲାଗିଛି ଷ୍ଟାଣ୍ଡପୋଷ୍ଟ, ହେଲେ ପାଣି ନାହିଁ। ଯେଉଁ ତିନୋଟି ନଳକୂପ ରହିଛି ସେଥିରୁ ଦୁଇଟି ଅଚଳ। ଗୋଟିଏରୁ ବାହାରୁଛି ଗୋଳିଆ ପାଣି। ଜଳକଷ୍ଟ ଭୋଗୁଛନ୍ତି କେନ୍ଦୁଝର ଜିଲ୍ଲା ଚମ୍ପୁଆ ବ୍ଳକ ସୁନାପଶି ପଞ୍ଚାୟତ ସରାଶପଶି ନୂଆସାହି ଲୋକେ। ଗାଁରେ ତିନୋଟି ନଳକୂପ ଥିବାବେଳେ ସେଥିମଧ୍ଯରୁ ଦୁଇଟି ନଳକୂପ ଦୀର୍ଘ ଦିନ ହେଲା ଅଚଳ ହୋଇପଡିଛି । ଗୋଟିଏ ନଳକୂପରୁ ଗୋଳିଆ ପାଣି ବାହାରୁଛି। ବାଧ୍ଯହୋଇ ଲାଲ ପାଣି ପିଇ ଜୀବନ ବିତାଉଛନ୍ତି ୫୦ ରୁ ଅଧିକ ପରିବାର। ନଳକୂଅ ମରାମତି ସହିତ ସାହିକୁ ପାଇପ ପାଣି ଯେlଗାଇଦେବାକୁ ଗ୍ରାମବାସୀ ବାରମ୍ବାର ପଞ୍ଚାୟତ ଠାରୁ ଆରମ୍ଭ କରି ପ୍ରଶାସନ ନିକଟରେ ଦ୍ଵାରସ୍ଥ ହୋଇଛନ୍ତି। ହେଲେ କେହି ଗୁରୁତ୍ଵ ଦେଉନଥିବା ଅଭିଯୋଗ କରିଛନ୍ତି ଗ୍ରାମବାସୀ।
ନୂଆସାହିର ପାଖ ଗାଁ ମିରିଗିସିଗାଂ ଠାରେ ବସୁଧା ଯୋଜନାରେ ମେଗା ପାନୀୟ ଜଳ ପ୍ରକଳ୍ପ ନିର୍ମାଣ ହୋଇଛି। ଏଠାରୁ ସାରା ଜିଲ୍ଲାକୁ ପାଣି ଯୋଗାଇ ଦିଆଯାଉଛି l ମାତ୍ର ନୂଆସାହିକୁ ପାଣି ପହଞ୍ଚିପାରୁନି। ଗାଁ କୁ ଆସୁଥିବା ପାଣି ଗାଁ ପାଖ ନାଳରେ ଅନବରତ ଭାସି ଯାଉଥିବାରୁ ସାହିକୁ ପାଣି ପହଞ୍ଚି ପାରୁନାହିଁ। ବାଧ୍ୟହୋଇ ଗୋଳିଆ ପାଣି ପିଉଛନ୍ତି ଲୋକେ। ଅନ୍ୟପଟେ ସହକାରୀ ଯନ୍ତ୍ରୀ କହିଛନ୍ତି । ଗାଁ ଲେlକ ପାଣି ଟ୍ୟାପ ଖେlଲା ରଖୁଥିବାରୁ ନୂଆ ସାହିକୁ ପାଣି ପହଞ୍ଚି ପାରୁନାହିଁ । ଶୀଘ୍ର ଏହାର ସମାଧାନ କରି ସାହିକୁ ପାଣି ଯୋଗାଇ ଦିଆଯିବ।
ତେବେ ଲୋକଙ୍କ ପାଣି ସମସ୍ଯାର କେବେ ସମାଧାନ ହେଉଛି ତାହା ଉପରେ ରହିଛି ସମସ୍ତଙ୍କ ନଜର।
ଶ୍ଵଶୁର ଘରେ ବୋମା ମାଡ଼ ଅଭିଯୋଗରେ ଜ୍ଵାଇଁ ଗିରଫ
କଟକ: ନରସିଂହପୁର ମୁସଲିମ ବସ୍ତିରେ ପୁଣି ଥରେ ଶ୍ଵଶୁର ଘରକୁ ବୋମାମାଡ଼ କରିବାକୁ ଆସିଥିବା ଜ୍ବାଇଁ ଅବଦୁଲ ମନସୁରକୁ ଗିରଫ କରିଛି ନରସିଂହପୁର ପୋଲିସ୍। ଚାରିଟି ଅଫୁଟା ବୋମା ଜବତ ହୋଇଛି।
ସୂଚନା ଅନୁଯାୟୀ, ନରସିଂହପୁର ସୁଲତାନ ମହମ୍ମଦଙ୍କ ଜ୍ୱାଇଁ ଅବଦୁଲ ମନସୁର ଗତ ୬ ତାରିଖ ଦିନ କିଛି ସହଯୋଗୀଙ୍କୁ ନେଇ ଦୁଇଟି ବାଇକରେ ଚାରିଜଣ ଆସି ନରସିଂହପୁର ମୁସଲମାନ ବସ୍ତିରେ ଦୁଇଟି ବୋମା ପକାଇଥିବା ଅଭିଯୋଗ ହୋଇଥିଲା। ଫଳରେ ପରିବାର ପକ୍ଷରୁ ପୋଲିସକୁ ଖବର ଦିଆଯାଇଥିଲା। ଘଟଣାସ୍ଥଳରେ ନରସିଂହପୁର ପୋଲିସ ପହଞ୍ଚି ତଦନ୍ତ ଆରମ୍ଭ କରିଥିବା ବେଳେ ଆଜି ପୁଣି ଥରେ ଶ୍ଵଶୁର ଘରେ ବୋମାମାଡ଼ କରିବାକୁ ଆସିଥିବା ଜ୍ବାଇଁ ଅବଦୁଲ ମନସୁରକୁ କାନପୁର ଥାନା ଅନ୍ତର୍ଗତ ବାଗଧରିଆ ନିକଟରୁ ଗିରଫ କରିଛି ନରସିଂହପୁର ପୋଲିସ। ଚାରିଟି ଅଫୁଟା ବୋମା ଜବତ କରି ନିଷ୍କ୍ରିୟ କରିଥିବା ସୂଚନା ମିଳିଛି।
ମୁର୍ଶିଦାବାଦ ଛାଡ଼ିଲେ ୫୦୦ ଲୋକ
ନନ୍ଦିଘୋଷ ବ୍ୟୁରୋ: ପଶ୍ଚିମବଙ୍ଗର ମୁର୍ଶିଦାବାଦରେ ବ୍ୟାପକ ହିଂସା ଲାଗି ରହିଛି । ହିଂସାକୁ ନେଇ ଏପର୍ଯ୍ୟନ୍ତ ପାଞ୍ଚ ଶହ ଲୋକ ମୁର୍ଶିଦାବାଦ ଛାଡ଼ି ମାଲଦାକୁ ଚାଲିଯାଇଛନ୍ତି। ପଳାୟନ ଲୋକଙ୍କ ସଂଖ୍ୟା ଦିନକୁ ଦିନ ବୃଦ୍ଧି ପାଇବାରେ ଲାଗିଛି। ଏହି ଶରଣାର୍ଥୀମାନେ ଗ୍ରାମୀଣ ମାଲଦାର ଏକ ସ୍କୁଲରେ ଆଶ୍ରୟ ନେଇଛନ୍ତି।
ପଳାୟନ ଗ୍ରାମବାସୀମାନେ ମାଲଦାର ପରଲାଲପୁର ହାଇସ୍କୁଲରେ ଆଶ୍ରୟ ନେଇଛନ୍ତି। ଏହି ସ୍କୁଲରେ ପ୍ରାୟ ୫୦୦ ଲୋକ ଆଶ୍ରୟ ନେଇଛନ୍ତି। ଏମାନଙ୍କ ମଧ୍ୟରେ ମୁଖ୍ୟତଃ ମହିଳା ଏବଂ ପିଲାମାନେ ଅନ୍ତର୍ଭୁକ୍ତ ।
ଗାଁ ଲୋକେଙ୍କ କହିବା ଅନୁଯାୟୀ, ସେମାନେ ନିଜ ଘର ଛାଡି ଡଙ୍ଗା ସାହାଯ୍ୟରେ ନଦୀ ପାର ହୋଇ ମାଲଦାରେ ପହଞ୍ଚିଥିଲେ। ଏହି ଲୋକମାନଙ୍କ ମଧ୍ୟରେ ୩ ଦିନର ନବଜାତ ଶିଶୁଠାରୁ ଆରମ୍ଭ କରି ବୟସ୍କ ମହିଳା ଅନ୍ତର୍ଭୁକ୍ତ ଅଛନ୍ତି। ସ୍ଥାନୀୟ ଲୋକମାନେ ଏହି ଲୋକମାନଙ୍କୁ ଆଶ୍ରୟ ଦେଇଛନ୍ତି ଏବଂ ସେମାନଙ୍କୁ ଖାଇବାକୁ ମଧ୍ୟ ଦେଉଛନ୍ତି। ଲୋକଙ୍କ ଆସିବା ବନ୍ଦ ହୋଇନାହିଁ।
ଏହି ଶରଣାର୍ଥୀମାନେ ମାଲଦାର ଏକ ହାଇସ୍କୁଲର ଶ୍ରେଣୀଗୃହରେ ଆଶ୍ରୟ ନେଇଥିବା ବେଳେ ତାଙ୍କ ସହିତ ପିଲାମାନେ ମଧ୍ୟ ଅଛନ୍ତି। ସ୍ଥାନୀୟ ଡାକ୍ତରମାନେ ସେଠାରେ ପହଞ୍ଚି ସ୍ୱାସ୍ଥ୍ୟ ଅବସ୍ଥା ଯାଞ୍ଚ କରିଛନ୍ତି ।
ଦ୍ଵିତୀୟ ଶ୍ରେଣୀ ଛାତ୍ରୀର ଝୁଲନ୍ତା ମୃତଦେହ ଉଦ୍ଧାର
ମୟୂରଭଞ୍ଜ: ଆଶ୍ରମ ବିଦ୍ୟାଳୟରୁ ଦ୍ଵିତୀୟ ଶ୍ରେଣୀ ଛାତ୍ରୀର ଝୁଲନ୍ତା ମୃତଦେହ ଉଦ୍ଧାର। ମୟୂରଭଞ୍ଜ ଜିଲ୍ଲା ଉଦଳା ଥାନା ଶାଳଖୁଣ୍ଟା ଏସଏସଡି ଆଶ୍ରମ ବିଦ୍ୟାଳୟରେ ଘଟିଛି ଏହି ଅଭାବନୀୟ ଘଟଣା ।
ସୂଚନା ଅନୁଯାୟୀ, ଆଜି ମଧ୍ୟାହ୍ନରେ ହଷ୍ଟେଲ ଛାତ୍ରୀମାନେ ଖାଇବା ପାଇଁ ଯିବା ସମୟରେ ମୃତ ଛାତ୍ରୀଙ୍କ ସାଙ୍ଗ ବାହାରକୁ ପରିସ୍ରା କରିବା ନିମନ୍ତେ ଆସିଥିଲେ । ଏହି ସମୟରେ ମୃତ ଛାତ୍ରୀଙ୍କୁ ବିଦ୍ୟାଳୟ ପଛରେ ଥିବା ୩ ଫୁଟ ବାଉଁଶରେ ଝୁଲନ୍ତା ଅବସ୍ଥାରେ ଦେଖିବାକୁ ପାଇଥିଲେ। ଏହା ଦେଖି ମ୍ୟାଟ୍ରୋନ୍ ଏବଂ ଅନ୍ୟମାନଙ୍କୁ ଜଣାଇଥିଲେ। ଛାତ୍ରୀଙ୍କୁ ତୁରନ୍ତ ଉଦ୍ଧାର କରି ଉଦଳା ମେଡିକାଲକୁ ଚିକିତ୍ସା ନିମନ୍ତେ ଭର୍ତ୍ତି କରାଯାଇଥିଲା। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି। ଉଦଳା ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ଏହା ହତ୍ୟା କି ଅଘଟଣ ତାହା ଜଣାପଡିନଥିବା ବେଳେ ୩ ଫୁଟ ଉଚ୍ଚରେ ଛାତ୍ରୀଙ୍କ ମୃତଦେହ ଉଦ୍ଧାର ସନ୍ଦେହ ସୃଷ୍ଟି କରିଛି ।